ត្បូងឃ្មុំគឺជាខេត្តដែលមានរមណីដ្ឋានទេសចរណ៍ល្បីៗជាច្រើនកន្លែង ជាពិសេសក៏មានបន្សល់ទុកតំបន់ប្រវត្តិសាស្ត្រជំនាន់ហ្លួងព្រះស្តេចកននាសតវត្សទី ១៦ ដ៏គួរឱ្យចាប់អារម្មណ៍ផងដែរ។ ខេត្តនេះមានចម្ងាយ ២០៤ គីឡូម៉ែត្រពីរាជធានីភ្នំពេញ ដោយនៅថ្ងៃធម្មតាមិនសូវមានភ្ញៀវទេសចរមកទស្សនាកម្សាន្តនោះទេ ប៉ុន្តែនៅរដូវបុណ្យទានមិនថាជារដូវចូលឆ្នាំ ឬភ្ជុំបិណ្ឌឡើយ នៅទីនេះគឺមានភ្ញៀវមកទស្សនាច្រើន ហើយតំបន់ដែលពេញនិយមបំផុតរួមមាន៖
១.ហ្លួងព្រះស្តេចកន៖ គឺជារមណីយដ្ឋានប្រវត្តិសាស្ត្រ មានទីតាំងស្ថិតនៅភូមិនគរក្នុង ឃុំដូនតី ស្រុកពញាក្រែក ខេត្តត្បូងឃ្មុំ។ តំបន់នេះគឺជាអតីតរាជធានី នៃអំឡុងពេលមុនអង្គរ ដែលបច្ចុប្បន្ននេះត្រូវបានរៀបចំឡើងវិញឱ្យក្លាយជារមណីយដ្ឋានបែបវប្បធម៌ និងប្រវត្តសាស្រ្ត សម្រាប់បម្រើដល់វិស័យទេសចរណ៍។ រមណីយដ្ឋានហ្លួងព្រះស្តេចកនមានទីតាំងកសិ្សណទឹក ដែលមានទេសភាពធម្មជាតិដ៏អស្ចារ្យ យ៉ាងស្រស់បំព្រងមិនចាញ់តំបន់ទេសចរណ៍ប្រវត្តិសាស្ត្រនៅតាមខេត្តផ្សេងៗរបស់កម្ពុជានោះឡើយ។
២.ទឹកធ្លាក់ហោង៖ ជារមណីយដ្ឋានធម្មជាតិ ដែលមានទីតាំងស្ថិតនៅភូមិស្រែវែង ឃុំទឹកជ្រៅ ស្រុកតំបែរ ខេត្តត្បូងឃ្មុំ។ ទឹកធ្លាក់ហោងគឺជាតំបន់ភ្នំក្រំថ្ម ហើយរូងថ្មរាប់សិបម៉ែត្រការ៉េ ដែលមានល្បាក់ទឹកធ្លាក់ជាច្រើនថ្នាក់ គឺមានទេសភាពស្រស់បំព្រង និងខ្យល់អាកាសល្អបរិសុទ្ធខ្លាំងណាស់។ ភ្ញៀវទេសចរតែងតែនាំគ្នាទៅទស្សនាទេសភាពពិតៗ និងហែលទឹកកម្សាន្ដលេងជាមួយល្បឿនទឹកហូរ។ ក្រៅពីនេះភ្ញៀវជាញឹកញាប់ក៏បានមកទីនោះ ដើម្បីអធិដ្ឋានដល់ព្រះពុទ្ធបដិមា និងដើម្បីស្វែងរកពរជ័យពីព្រះសង្ឃដែលគង់នៅទីនោះផងដែរ។ 
៣.ភូមិអភិវឌ្ឍន៍អន្លង់ជ្រៃ៖ គឺជារមណីយដ្ឋានធម្មជាតិ ស្ថិតនៅក្នុងឃុំកក់ ស្រុកពញាក្រែក ខេត្តត្បូងឃ្មុំ។ នៅទីនេះមិនត្រឹមតែមានទំនប់ទឹកធំមួយសម្រាប់ហែលលេងប៉ុណ្ណោះទេ ថែមទាំងមានខ្ជុះសម្រាប់អង្គុយលេងរាប់សិប ព្រមទាំងមានពោងជួលសម្រាប់លេងទឹកផងដែរ និងមានលក់គ្រឿងក្លែមច្រើនមុខដូចជា ងៀតគោថ្មីៗ សាច់គោអាំង ពោះគោអាំង កង្កែបបោក និងចំណីចំណុកឆ្ងាញ់ជាច្រើនប្រភេទទៀត។ 
៤.ប្រាសាទព្រះធាតុបាស្រី៖ ប្រាសាទព្រះធាតុបាស្រី ស្ថិតនៅភូមិព្រះធាតុ ឃុំព្រះធាតុ ស្រុកអូររាំងឪ ខេត្តត្បូងឃ្មុំ។ នៅពេលទៅដល់លោកអ្នកនឹងបានឃើញ ផ្លូវចូលវត្តមានគ្រឹះបា្រសាទបុរាណចំនួន២ ដែលសាងសង់អំពីថ្មបាយក្រៀម ហើយផ្នែកខាងស្ដាំដៃ គេហៅថាវិហារគុក និងផ្នែកខាងឆ្វេងដៃហៅថា វិហារព្រះនិពាន្ដ។ ចំណែកនៅក្នុងបរិវេណវត្តព្រះធាតុបាស្រីមានប្រាសាទបុរាណមួយកសាងឡើងអំពីថ្មភក់ក្នុងឆ្នាំ៩៨៣ នៃគ្រឹស្ដសករាជ សង់រាងជាការ៉េដែលមានទំហំ ១៥មx១៥ម ជាមួយកម្ពស់ ៣៣ ម។.png)
៥.សួនបឹងក្រចាប់៖ គឺជារមណីយដ្ឋានកែច្នៃ ដែលមានទីតាំងស្ថិតនៅក្នុងភូមិបឹងត្រស់ ឃុំជីរោទ៍ទី២ ស្រុកត្បូងឃ្មុំ ខេត្តត្បូងឃ្មុំ។ សួនកម្សាន្តដ៏តូចច្រឡឹងនេះពិតជាមានលក្ខណៈអំណោយផលល្អពីធម្មជាតិសម្រាប់វិស័យទេសចរណ៍ក្នុងស្រុក ពីព្រោះវាមានទីតាំងស្ថិតនៅបង្កើយជាប់មាត់បឹងធម្មជាតិដ៏ធំល្វឹងល្វើយ និងមានបរិយាកាសស្ងប់ស្ងាត់បែបជនបទសុទ្ធសាធ។ សួននេះមានទំហំផ្ទៃដីមិនសូវធំប៉ុន្មានទេ តែមានការរៀបចំតុបតែងជាសួនផ្កាស្រស់ស្អាតផ្សារភ្ជាប់នឹងបរិយាកាសធម្មជាតិជុំវិញស័ក្តិសមសម្រាប់អ្នកទេសចរមកពីទីក្រុងដែលចង់ស្វែងរកកន្លែងស្ងប់ស្ងាត់ទទួលទានអាហារជួបជុំក្រុមគ្រួសារឱ្យស្រស់ស្រាយស្រឡះមុខស្រឡះមាត់តែម្តង៕
