ប្រទេសចិន៖ បន្ទាប់ពីព្យុះ Yagi និង Bebinca ប្រទេសចិនត្រូវបានគេព្យាករណ៍ថានឹងទទួលរងនូវព្យុះដ៏កំណាចថ្មីមួយទៀតដែលមានឈ្មោះថា Pulasan ចាប់ពីពេលនេះរហូតដល់ខែតុលា ដែលវានឹងបោកបក់រៀងរាល់សប្តាហ៍តែម្តង។
យោងតាមបណ្តាញអាកាសធាតុចិន (Weather.com) ក្នុងរយៈពេល ១០ ថ្ងៃខាងមុខគឺចាប់ពីថ្ងៃទី ១ ខែតុលា ឆ្នាំ២០២៤ ព្យុះទីហ្វុង Pulasan ត្រូវបានគេជឿថានឹងបោកបក់មកលើសមុទ្រខាងកើត និងប៉ាស៊ីហ្វិកភាគពាយ័ព្យ ដែលឥទ្ធិពលព្យុះនេះទំនងជាប៉ះពាល់ដល់តំបន់ឆ្នេរភាគអាគ្នេយ៍នៃប្រទេស មានន័យថា ជារៀងរាល់សប្តាហ៍ប្រទេសចិននឹងរងគ្រោះដោយសារព្យុះថ្មីមួយនេះ។

ស្របពេលដែលឥទ្ធិពលនៃព្យុះទីហ្វុង Bebinca មិនទាន់បញ្ចប់នៅឡើយ បើយោងតាមការព្យាករណ៍ចុងក្រោយបង្អស់ដែលចេញផ្សាយកាលពីព្រឹកថ្ងៃទី១៨ ខែកញ្ញា ដោយមជ្ឈមណ្ឌលឧតុនិយមជាតិចិន (NMC) ព្យុះទីហ្វុង Pulasan អាចនឹងបោកបក់ចូលតំបន់ភាគខាងកើតនៃប្រទេសចិននៅយប់ថ្ងៃនេះតែម្តង ដែលបណ្តាលឱ្យមានការបាក់ដីនៅឆ្នេរសមុទ្រ Zhejiang ចាប់ពីល្ងាចថ្ងៃទី ១៩ ខែកញ្ញានេះតទៅ ដែលវាត្រូវបានគេចាត់ទុកថាជាព្យុះត្រូពិចខ្លាំងបំផុត។

នេះបើយោងតាមរបាយការណ៍ បានឱ្យដឹងទៀតថា ព្យុះទីហ្វុង Pulasan ដែលនឹងបោកបកយប់ថ្ងៃទី ១៩-២០ ខែកញ្ញា នឹងប៉ះពាល់ទៅលើតំបន់មួយចំនួនក្នុងខេត្ត Zhejiang, Anhui, Jiangsu, Shanghai និង Shandong ដែលនឹងបណ្តាលឱ្យមានភ្លៀងធ្លាក់ខ្លាំងខុសធម្មតាពីមធ្យមទៅច្រើន។ យោងតាមទីភ្នាក់ងារនេះផងដែរ ដោយសារតែឥទ្ធិពលនៃខ្យល់ព្យុះត្រូពិចដែលបង្កើតនៅសមុទ្រខាងកើត រំកិលទៅទិសខាងលិចយ៉ាងឆាប់រហ័ស និងបានពង្រឹងបន្តិចម្តងៗ ថ្ងៃនេះកោះហៃណានក៏អាចនឹងមានភ្លៀងធ្លាក់ខ្លាំងទៅៗផងដែរ។

វាត្រូវបានគេដឹងថាព្យុះ Pulasan មានទិសដៅស្រដៀងនឹងព្យុះ Bebinca ដែរប៉ុន្តែដោយសារឥទ្ធិពលនៃម៉ាស់ខ្យល់ត្រជាក់ ការព្យាករណ៍នឹងកាន់តែស្មុគស្មាញជាងមុន។ បច្ចុប្បន្នប្រទេសចិនកំពុងប្រឈមមុខនឹងព្យុះទីហ្វុង Bebinca ដែលវាកំពុងបោកបក់ទៅលើខេត្ត Jiangsu, Anhui និង Shandong ភាគខាងកើតប្រទេសចិន ក៏ដូចជាខេត្ត Henan ភាគកណ្តាលប្រទេសចិន ប្រសិនបើថ្ងៃនេះមានព្យុះថ្មីបោកបក់ តំបន់ទាំងនេះនឹងក្លាយទៅជាតំបន់ដែលមានហានិភ័យគ្រោះធម្មជាតិពីកម្រិតមធ្យមទៅខ្ពស់បំផុតមិនធ្លាប់មាន៕

សហរដ្ឋអាមេរិក៖ ទោះបីជាមានរថយន្តទំនើបៗជាច្រើនគ្រឿងបានកំពុងវាយលុកទីផ្សារពិភពលោក ឬទីផ្សារអាមេរិកក៏ដោយ ក៏ Lexus របស់ជប៉ុននៅតែស្ថិតក្នុងបញ្ជីម៉ាករថយន្តល្អបំផុតឈានមុខគេនៅក្នុងទីផ្សារសហរដ្ឋអាមេរិក។
នេះបើយោងតាមក្រុមហ៊ុន JD Power ដែលជាអង្គការស្រាវជ្រាវទីផ្សារ បានប្រកាសថា Lexus ជាប់ចំណាត់ថ្នាក់លេខ ១ គឺជាម៉ាកយីហោដែលគួរឱ្យទុកចិត្តបំផុតក្នុងរយៈពេល ២ ឆ្នាំជាប់ៗគ្នា ដោយសារគុណភាពខ្ពស់ ធន់ និងមិនងាយខូច ទោះបីប្រើប្រាស់ច្រើនឆ្នាំក៏ដោយ ក៏គ្រឿងម៉ាស៊ីននៅតែល្អឥតខ្ចោះ។

ខណៈដែល Consumer Reports ក៏បានផ្តល់កិត្តិយសដល់ក្រុមហ៊ុនរថយន្តប្រណីតរបស់ជប៉ុនថាជាក្រុមហ៊ុននាំមុខគេនៅក្នុងទីផ្សារសហរដ្ឋអាមេរិកសម្រាប់ឆ្នាំ ២០២៤។ នេះបញ្ជាក់ថា Lexus គឺជាម៉ាករថយន្តដែលគួរឱ្យទុកចិត្តបំផុតទាំងរថយន្តចាស់ និងរថយន្តថ្មី។ លើសពីនេះបើយោងតាមការស្ទង់មតិរបស់ Consumer Reports ក៏បានបង្ហាញដែរថា រថយន្ត Lexus គឺមានការចំណាយជួសជុលតិចបំផុត បើធៀបទៅនឹងរថយន្តផ្សេង មានន័យថា ម៉ាក Lexus របស់ជប៉ុនមានកំហុសតិចតួចបំផុតដែលកើតឡើង។

ទន្ទឹមនឹងនេះអ្នកជំនាញក៏ចង្អុលបង្ហាញផងដែរថា បន្ថែមពីលើកត្តាផលិតផល ភាពធន់នៃម៉ូដែលរថយន្តក៏កំណត់ពីភាពជឿជាក់របស់ម៉ាក សមត្ថភាពក្នុងការរក្សាតម្លៃ ក៏ដូចជាសាច់ប្រាក់រហ័សផងដែរ។ ជាពិសេស សេវាកម្មក្រោយពេលលក់ រួមទាំងការធានា ការថែទាំ និងការថែទាំអតិថិជនដើរតួនាទីយ៉ាងសំខាន់បំផុត។

គួរបញ្ជាក់ដែរថា នៅក្នុងឆមាសទីមួយនៃឆ្នាំនេះ ក្រុមហ៊ុនរថយន្តប្រណីតរបស់ជប៉ុនក៏សម្រេចបានការលក់រថយន្ត Lexus ចំនួន ១៦៧,២១១ នៅសហរដ្ឋអាមេរិក ដែលជាចំនួនខ្ពស់បំផុតក្នុងរយៈពេល ៣៥ ឆ្នាំនៃវត្តមាននៅក្នុងទីផ្សារនេះ។ កាលពីឆ្នាំមុន Lexus ក៏បានកត់ត្រាការលក់នៅទូទាំងពិភពលោកចំនួន ៨២៤ ២៥៨ គ្រឿងផងដែរ ដែលនេះមានការកើនឡើងរហូតដល់ ១៣២% ឯណោះ៕

បរទេស៖ ប្រទេសប្រេស៊ីលគ្រោងសាងសង់អគារលំនៅដ្ឋានខ្ពស់ជាងគេបំផុតលើពិភពលោកជាមួយនឹងកម្ពស់ ៥០០ ម៉ែត្រ ដែលមានទីតាំងនៅរដ្ឋ Santa Catarina មានឈ្មោះថា Senna Tower។
Senna Tower គឺជាអគារខ្ពស់កប់ពពក ដែលនឹងក្លាយជាអគារលំនៅដ្ឋានខ្ពស់ជាងគេក្នុងប្រទេសប្រេស៊ីល និងខ្ពស់ជាងគេទីពីរនៅលើពិភពលោក បន្ទាប់អាគារ Burj Khalifa របស់ឌូបៃ។

នេះបើយោងតាមការចុះផ្សាយពីគេហទំព័របរទេស Dezeen កាលពីថ្ងៃទី១៧ ខែកញ្ញា បានឱ្យដឹងថា អគារលំនៅដ្ឋាន Senna Tower នឹងត្រូវបានសាងសង់នៅក្នុងទីក្រុង Balneário Camboriú នៃរដ្ឋ Santa Catarina ប្រទេសប្រេស៊ីល ដែលជាតំបន់ល្បីល្បាញដោយសារអគារខ្ពស់ៗនៅតាមឆ្នេរសមុទ្រ។ ការរចនាអគារនេះនឹងមានរាងស្ដើង គ្របដោយកញ្ចក់ថ្លា បង្កើតជាស៊េរីនៃផ្ទៃរាបស្មើអមដោយអាងហែលទឹក និងដើមឈើបៃតង។

ជាមួយនឹងកម្ពស់ ៥០០ ម៉ែត្រ អគារ Senna Tower នឹងរួមបញ្ចូលលំនៅឋានចំនួន ២២៨ យូនីត ដែលក្នុងនោះមានវីឡាចំនួន ១៨ ផ្ទះល្វែងចំនួន ២០៤ ផ្ទះប្រណិតកូនកាត់ចំនួន ៤ និង Penthouse ចំនួន ២ ដែលមានកម្ពស់ ៣ ជាន់ជាមួយទំហំ ៩០៣ ម៉ែត្រការ៉េ។ គ្រឿងបរិក្ខារនឹងត្រូវបានចែកចាយនៅទូទាំងប្រាំមួយជាន់នៃអគារ ហើយដំបូលទំហំ ៦,០០០ ម៉ែត្រការ៉េនឹងរួមបញ្ចូលកន្លែងកម្សាន្តផងដែរ។ លើសពីនេះនៅលើកំពូលប៉ម នឹងមានពន្លឺជុំវិញភ្លឺឡើងបង្កើតបានជាភ្លើងរាត្រីដ៏អស្ចារ្យបំផុត។

យោងតាមអ្នកអភិវឌ្ឍន៍ គម្រោងនេះនឹងស្នើសុំវិញ្ញាបនប័ត្រ LEED Platinum ដែលធ្វើឱ្យវាក្លាយជាអគារលំនៅដ្ឋានខ្ពស់ដំបូងគេដែលសម្រេចបាននូវវិញ្ញាបនប័ត្រអគារបៃតង។ លើសពីនេះ វាក៏ជាអគារដំបូងគេនៅអាមេរិកឡាទីនផងដែរ ដែលប្រើប្រាស់ (TMDs) ដើម្បីជួយកាត់បន្ថយការរំញ័រនៅក្នុងអគារខ្ពស់ និងស្តើង ដោយគម្រោងនេះនឹងចាប់ផ្តើមសាងសងជាផ្លូវការនៅឆមាសទីពីរនៃឆ្នាំ ២០២៥ ខាងមុន៕

ប្រទេសអូស្ត្រាលី៖ សត្វបក្សី Emu ត្រូវបានគេចាត់ទុកថា ជាបក្សីដ៏កម្របំផុតនៅលើផែនដី ព្រោះពួកវានៅសល់តែ ៤០ ក្បាលប៉ុណ្ណោះក្នុងពិភពលោក ហើយការរកឃើញសំបុកពងរបស់បក្សីនេះត្រូវបានគេចាត់ទុកថាជាការរកឃើញអេកូឡូស៊ីដ៏សំខាន់បំផុតមួយ។
យោងតាមការចុះផ្សាយកាលពីថ្ងៃទី១៨ ខែកញ្ញា នៅលើគេហទំព័រ Australian Geographic បានឱ្យដឹងថា អ្នកស្រាវជ្រាវមួយក្រុមបានរកឃើញសំបុកពងរបស់បក្សីនេះដោយចៃដន្យនៅក្នុងព្រៃភាគខាងជើងនៃរដ្ឋ New South Wales ប្រទេសអូស្ត្រាលីដែលមានពងចំនួន ៩។

ព្រឹត្តិការណ៍នេះត្រូវបានចាត់ទុកថាជារបកគំហើញអេកូឡូស៊ីដ៏សំខាន់មួយ ដោយសារសត្វបក្សី Emu ត្រូវបានចុះបញ្ជីថាជាសត្វជិតផុតពូជតាំងពីឆ្នាំ ២០០២ មកម្លេះ។ ពួកវាដើរតួនាទីយ៉ាងសំខាន់ក្នុងការបំបែកគ្រាប់ពូជ និងផ្លែឈើនៅក្នុងតំបន់។ យោងតាម Chris Slade អ្នកជំនាញបរិស្ថានជាន់ខ្ពស់នៃសាជីវកម្មព្រៃឈើអូស្ត្រាលីបានចែករំលែកថា “ការរកឃើញសំបុកសត្វ Emu នៅក្នុងព្រៃជាមួយនឹងពងគឺជាពេលវេលាដ៏មានអត្ថន័យបំផុតសម្រាប់បក្សីដែលជិតផុតពូជ។ នេះគឺជាសញ្ញាដ៏ល្អមួយពីព្រោះពេលវេលានៃការរកឃើញគឺអំណោយផលណាស់ យើងនឹងខិតខំប្រឹងប្រែងដើម្បីធានាថាស៊ុតទាំងនេះនឹងញាស់ចេញដោយជោគជ័យ»។

សត្វបក្សី Emu គឺជាសាច់ញាតិរបស់ពពួកសត្វអូទ្រីស ដែលមានអំបូរ Dromaius ដូចគ្នា។ ទោះជាយ៉ាងណាសត្វអូទ្រីសគឺមានច្រើននៅទូទាំងពិភពលោក ខណៈសត្វបក្សី Emu គឺមានចំនួនត្រឹមតែ ៤០ ក្បាលប៉ុណ្ណោះក្នុងពិភពលោក។ បច្ចុប្បន្នវារកឃើញតែនៅក្នុងប្រទេសអូស្ត្រាលីប៉ុណ្ណោះ ជាសត្វបក្សីដែលមិនចេះហើរ ទន់ខ្សោយ ស្លូតបូត ប៉ុន្តែពួកគេក៏មានសមត្ថភាពធ្វើដំណើរក្នុងចម្ងាយឆ្ងាយ ហើយនៅពេលចាំបាច់ អាចឈានដល់ល្បឿនរហូតដល់ ៥០ គីឡូម៉ែត្រក្នុងមួយម៉ោងទៀតផង ហើយរបបអាហាររបស់ពួកវារួមមានរុក្ខជាតិ និងសត្វល្អិតជាច្រើនប្រភេទ។

ទោះជាយ៉ាងណាយោងតាមការស្រាវជ្រាវសំបុកសត្វ emu គឺមានអត្រារស់រានមានជីវិតទាបបំផុត។ នេះបើតាមការសិក្សាឆ្នាំ ២០២៣ សំបុកសត្វស្លាបដែលមានពងចំនួន ៩ ត្រូវបានរកឃើញ ប៉ុន្តែនៅទីបញ្ចប់ស៊ុតចំនួន ៧ មិនបានញាស់នោះទេ មានតែស៊ុតពីរប៉ុណ្ណោះដែលញាស់។ ទោះបីជាយ៉ាងនេះក្តី ការរកឃើញសំបុកពងរបស់បក្សី emu ត្រូវបានគេចាត់ទុកថាជាការរកឃើញអេកូឡូស៊ីដ៏សំខាន់បំផុត ដូច្នេះបច្ចុប្បន្នសាជីវកម្មព្រៃឈើអូស្ត្រាលីបានបញ្ឈប់ជាបណ្តោះអាសន្ននូវសកម្មភាពកាប់ឈើ និងការបរបាញ់នៅជិតតំបន់ដែលបានរកឃើញសំបុកពងដើម្បីការពារបក្សីនេះ៕

ប្រទេសអង់គ្លេស ៖ ក្រុមអ្នករចនាម៉ូដមកពីសាកលវិទ្យាល័យ Royal College of Art និង Mperial College London ប្រទេសអង់គ្លេស បានផលិតឧបករណ៍ផ្តល់សញ្ញាភ្លើងឆេះព្រៃប្រាប់ទៅអាជ្ញាធរភ្លាមៗ ដើម្បីឱ្យអាជ្ញាធរអាចគ្រប់គ្រងស្ថានការណ៍ទាន់ពេលវេលា ។ ឧបករណ៍នេះមានលក្ខណៈពិសេសច្រើនយ៉ាងភ្ជាប់ជាមួយបច្ចេកវិទ្យា AI ធ្វើឱ្យពួកគេទទួលបានពានរង្វាន់ពីកម្មវិធី James Dyson Award ប្រចាំឆ្នាំ២០២៤ នៅអង់គ្លេស ។

ឧបករណ៍ផ្តល់សញ្ញាភ្លើងឆេះព្រៃនេះឈ្មោះ Pyri នៅពេលទទួលកំដៅខ្លាំងដោយសារភ្លើងឆេះព្រៃ វានឹងផ្តល់សញ្ញាតាមរលកវិទ្យុប្រាប់ទៅអាជ្ញាធរឱ្យចាត់វិធានការទាន់ពេលវេលា។ ឧបករណ៍នេះដំណើរការដោយថ្ម និងអាចបំពាក់វានៅតាមចំណុចផ្សេងៗក្នុងព្រៃ ឬអាចទម្លាក់ឧបករណ៍ពីលើយន្តហោះមកក្នុងព្រៃផ្សេងៗ និងអាចប្រើប្រាស់បានភ្លាមៗ ។

ឧបករណ៍ Pyri អាចផ្តល់ដំណឹងពីភ្លើងឆេះព្រៃទៅកាន់អាជ្ញាធររហូតដល់ចម្ងាយ៥០គីឡូម៉ែត្រ ហើយគេអាចបោះចោលឧបករណ៍នេះ ក្រោយការប្រើប្រាស់ចំនួន១លើក ។ នៅពេលឧបករណ៍នេះផ្តល់ដំណឹងប្រាប់អាជ្ញាធររួចហើយ វានឹងរលាយដោយសារកំដៅដោយខ្លួនឯង ។

ក្រុមអ្នករចនាម៉ូដនិយាយថា ឧបករណ៍នេះបានផលិតពីវត្ថុធាតុដើមអាចរលាយបាន ហើយវាមានផលប៉ះពាល់បរិស្ថានតិចតួច ។ ពួកគេផលិតវាឡើងដើម្បីងាយស្រួលប្រើប្រាស់នៅតំបន់ឆ្ងាយដាច់ស្រយាល និងប្រើប្រាស់បច្ចេកវិទ្យា AI ដើម្បីបញ្ជាក់ពីទីតាំងឧបករណ៍ ព្រមទាំងទិន្នន័យអាកាសធាតុ និងផ្កាយរណប ។

វានឹងជូនដំណឹងពីភ្លើងឆេះព្រៃទៅភ្នាក់ងារសង្គ្រោះបន្ទាន់ និងតំបន់ប្រឈម ដើម្បីឱ្យអាជ្ញាធរអាចជម្លៀសពលរដ្ឋ ឬពន្លត់ភ្លើងទាន់ពេលវេលា ។ ក្រុមអ្នករចនាម៉ូដបានសាកល្បងប្រើប្រាស់ឧបករណ៍ចំនួន២០ប្រភេទ ហើយពួកគេមានគម្រោងសាកល្បងបន្ថែមទៀតនៅតំបន់មួយចំនួនក្រោមបរិយាកាសដែលពួកគេគ្រប់គ្រង ។

ក្រោយពីផលិតគំរូឧបករណ៍រួចរាល់ហើយ ពួកគេក៏ទទួលបានពានរង្វាន់លេខ១ ពីកម្មវិធីប្រកួតរចនាម៉ូដឧបករណ៍ដ៏ល្បីល្បាញឈ្មោះ James Dyson Award ប្រចាំឆ្នាំ២០២៤ នៅប្រទេសអង់គ្លេស ៕

ប្រទេសឡាវ ៖ ឡាវ គឺជាប្រទេសទេសចរណ៍មួយស្ថិតក្នុងតំបន់អាស៊ីអាគ្នេយ៍ ដែលមានអ្វីៗជាច្រើនទាក់ទាញភ្ញៀវទេសចរ ។ រីឯភ្ញៀវទេសចរគួរតែឈ្វេងយល់, គោរពច្បាប់ និងទំនៀមទម្លាប់ប្រពៃណីរបស់ឡាវផងដែរពេលមកកម្សាន្តនៅទីនេះ ទើបដំណើរកម្សាន្តប្រកបដោយភាពរីករាយ ។

បច្ចុប្បន្ន ភ្ញៀវទេសចរបរទេសយ៉ាងច្រើននិយមមកកម្សាន្តនៅឡាវ ដោយសារប្រទេសនេះមានវប្បធម៌ ប្រពៃណី និងតំបន់ទេសចរណ៍ធម្មជាតិដ៏ស្រស់ស្អាតជាច្រើនកន្លែង ។ ប៉ុន្តែមុនពេលទៅកម្សាន្តនៅឡាវ តើភ្ញៀវទេសចរគួរតែឈ្វេងយល់ពីចំណុចសំខាន់ៗអ្វីខ្លះ?

១-ប្រុងប្រយ័ត្នលិខិតឆ្លងដែន ៖ គួរតែទុកដាក់លិខិតឆ្លងដែនឱ្យបានល្អ ហើយមិនត្រូវទុកវាជាមួយលុយកាក់ និងទ្រព្យសម្បត្តិមានតម្លៃផ្សេងៗឡើយ ។ លិខិតឆ្លងដែនត្រូវតែយកជាប់ខ្លួនជានិច្ច ព្រមទាំងថតកូពីចម្លងលិខិតឆ្លងដែនទុកយ៉ាងហោចណាស់១ច្បាប់ ដើម្បីធ្វើភស្តុតាងពេលបាត់បង់ ។

២-ស្នាក់នៅក្នុងសណ្ឋាគារប៉ុណ្ណោះ ៖ បើមកប្រទេសឡាវក្នុងឋានៈជាភ្ញៀវទេសចរ យើងគួរតែស្នាក់នៅក្នុងសណ្ឋាគារប៉ុណ្ណោះ ។ បើមានជនជាតិឡាវស្គាល់គ្នាបបួលទៅស្នាក់នៅផ្ទះរបស់គេ យើងពុំគួរទៅទេ ពីព្រោះវាខុសច្បាប់ប្រទេសឡាវ ។

ប៉ុន្តែបើចង់ទៅស្នាក់នៅផ្ទះមិត្តភក្តិជនជាតិឡាវ គឺត្រូវសុំការអនុញ្ញាតឱ្យសមត្ថកិច្ចឡាវជាមុនសិន ។ ជាទូទៅ សមត្ថកិច្ចឡាវនឹងចេញលិខិតអនុញ្ញាតស្នាក់នៅដល់ជនបរទេសណាដែលចូលមកប្រទេសឡាវដើម្បីធ្វើការជាផ្លូវការប៉ុណ្ណោះ ។

៣-ការចតរថយន្តនៅទីសាធារណៈ ៖ ការចតរថយន្តនៅទីសាធារណៈ ឬតំបន់ទេសចរណ៍នានានៅឡាវ នឹងយើងនឹងចំណាយថ្លៃចតរថយន្តជានិច្ច ដោយនឹងមានអាជ្ញាធរឡាវមើលការខុសត្រូវយានជំនិះភ្ញៀវ ។ វាជាការការពារសុវត្ថិភាពយានជំនិះរបស់ភ្ញៀវទេសចរកុំឱ្យមានការបាត់បង់ ។

៤-ការទស្សនាកន្លែងស័ក្តិសិទ្ធិ ៖ ប្រទេសឡាវមានតំបន់ទេសចរណ៍ និងកន្លែងស័ក្តិសិទ្ធិជាច្រើន ហើយការទៅទស្សនានៅតំបន់ទាំងនេះត្រូវរង់ចាំការអនុញ្ញាតពីអាជ្ញាធរជាមុនសិន ទើបអាចចូលទៅបាន ។

៥-ការថតរូបមនុស្សម្នា ៖ មុនពេលថតរូបអ្នកណាម្នាក់ គួរតែសុំអនុញ្ញាតជាមុនសិន ទើបអាចថតរូបបាន ពីព្រោះពេលខ្លះ ជនជាតិឡាវពុំពេញចិត្តនឹងការថតរូបរបស់ភ្ញៀវទេសចរទេ ។

៦-ការតុបតែងខ្លួន ៖ គួរតុបតែងខ្លួន ឬស្លៀកពាក់ឱ្យបានសមរម្យជានិច្ចពេលចូលទៅកន្លែងសំខាន់ៗ ដូចជា ៖ វត្តអារ៉ាម ឬកន្លែងស័ក្តិសិទ្ធិ ដោយសារឡាវជាប្រទេសគោរពព្រះពុទ្ធសាសនា ហើយពលរដ្ឋឡាវប្រកាន់យកការស្លៀកពាក់សុភាពរាបសារ ៕

ប្រទេសជប៉ុន ៖ កាលពីឆ្នាំ២០១១ មានគ្រោះធម្មជាតិរញ្ជួយដីយ៉ាងខ្លាំង ព្រមទាំងរលកយក្សស៊ូណាមិនៅភាគឦសានប្រទេសជប៉ុន ហើយហេតុការណ៍នេះបានបំផ្លា.ញ ទ្រព្យសម្បត្តិយ៉ាងច្រើនមហាសាល និងបាត់បង់ជីវិតមនុស្សរហូតដល់ជាង១ម៉ឺន៥ពាន់នាក់ ។ រីឯអ្នកនៅរស់រានមានជីវិតមានភាពសោកសៅ ដោយសារការបាត់បង់សមាជិកគ្រួសារ ឬមនុស្សជាទីស្រឡាញ់ ។

ក្នុងទីក្រុងអូឈូឈិ មានទូរសម្រាប់ហៅទូរស័ព្ទចេញមួយកន្លែងនៅលើភ្នំ ដែលនៅទីនេះអាចមើលឃើញមហាសមុទ្រប៉ាស៊ីហ្វិក ហើយគេដាក់ឈ្មោះវាថា «ទូរសម្រាប់ហៅទូរស័ព្ទតាមខ្យល់» ។ នៅទីនេះ អនុញ្ញាតឱ្យមនុស្សគ្រប់គ្នាដែលនៅរស់រានមានជីវិតពីគ្រោះធម្មជាតិអាចទូរស័ព្ទទៅរកសាច់ញាតិ ឬមនុស្សជាទីស្រឡាញ់ដែលស្លាប់ទៅហើយ ។

ពួកគេអាចនិយាយពីអារម្មណ៍នឹករលឹកសាច់ញាតិតាមទូរស័ព្ទ ប៉ុន្តែការពិត ទូរស័ព្ទមួយនេះគ្មានការតភ្ជាប់ជាមួយបណ្តាញទូរស័ព្ទណាទេ ។ ទូរសម្រាប់ហៅទូរស័ព្ទចេញនេះបានបង្កើតឡើងដោយលោក អ៊ីតារុ សាសាគិ ដែលលោកបានបាត់បង់បងប្អូនជីដូនមួយ កាលពីឆ្នាំ២០១០ ឬរយៈពេល១ឆ្នាំមុនរលកយក្សស៊ូណាមិបំផ្លាញទីក្រុងតូចនេះ ។

ពីដំបូង មានតែលោក សាសាគិ ម្នាក់ប៉ុណ្ណោះដែលប្រើប្រាស់ទូរស័ព្ទនៅលើភ្នំ ។ លោកព្យាយាមទំនាក់ទំនងទៅរកបងប្អូនជីដូនមួយ បើទោះលោកដឹងច្បាស់ថា ការនឹករលឹករបស់លោកពុំអាចរៀបរាប់ប្រាប់អ្នកណាម្នាក់តាមទូរស័ព្ទបានទេ ប៉ុន្តែលោកជឿថា ខ្យល់នឹងបញ្ជូនការនឹករលឹកនេះទៅដល់សាច់ញាតិ ។

បន្ទាប់ពីមានគ្រោះធម្មជាតិរញ្ជួយដីយ៉ាងខ្លាំង ព្រមទាំងរលកយក្សស៊ូណាមិនៅភាគឦសានប្រទេសជប៉ុននៅឆ្នាំ២០១១ និងសម្លាប់មនុស្សនៅទីក្រុងអូឈូឈិ ជាង៨០០នាក់ ទូរសម្រាប់ហៅទូរស័ព្ទចេញនេះ ក៏ក្លាយជាកន្លែងពេញនិយមសម្រាប់មនុស្សក្នុងទីក្រុង និងអ្នកដំណើរពីចម្ងាយ ។ រយៈពេល៦ឆ្នាំក្រោយកើតហេតុការណ៍ស៊ូណាមិ មានមនុស្សជាង១ម៉ឺននាក់ បានធ្វើដំណើរមកទីនេះ ។

មនុស្សជាច្រើនបាននិយាយពីអារម្មណ៍សោកស្តាយសាច់ញាតិរបស់ខ្លួនតាមទូរស័ព្ទ ខណៈអ្នកខ្លះចង់បានការឆ្លើយតប ឬសម្រេចក្តីប្រាថ្នា ។ អ្នកខ្លះទៀតនិយាយប្រាប់សាច់ញាតិដែលស្លាប់ថា ខ្លួនសុខសប្បាយធម្មតា ពុំចាំបាច់បារម្ភទេ ។

ស្ត្រីម្នាក់រស់នៅទីក្រុងអូឈូឈិ ដែលបានទូរស័ព្ទទៅរកកូនប្រុសរបស់ខ្លួនដែលស្លាប់ទៅ ប្រាប់ថា ៖ «ខ្ញុំពុំបានឮសំឡេងកូនប្រុសនិយាយទេ ហើយខ្ញុំនិយាយតែម្នាក់ឯង ។ ខ្ញុំជឿថា កូនប្រុសបានឮសំឡេងខ្ញុំ វាធ្វើឱ្យខ្ញុំអាចមានជីវិតរស់នៅបន្តទៀត» ។

ក្រៅពីពលរដ្ឋនៅទីក្រុងអូឈូឈិ ស្លាប់អស់ជាង៨០០នាក់ នៅមានពលរដ្ឋជាង៤០០នាក់ទៀតបាត់ខ្លួនរហូតមកដល់បច្ចុប្បន្ន ដោយសារគ្រោះធម្មជាតិនៅជប៉ុន ។ ពលរដ្ឋជប៉ុនជឿថា សមាជិកគ្រួសារដែលបាត់ខ្លួននោះកំពុងស្នាក់នៅកន្លែងណាមួយ ទើបពួកគេធ្វើដំណើរមកនិយាយទូរស័ព្ទនៅលើភ្នំម្តងហើយម្តងទៀត ។

វាជារឿងចម្លែក ប៉ុន្តែបើតាមលទ្ធផលការស្រាវជ្រាវបង្ហាញថា វិធីសមស្របដើម្បីដោះស្រាយបញ្ហាសោកសៅផ្លូវចិត្ត ពុំមែនជាការព្យាយាមបំភ្លេចក្តីទុក្ខឱ្យបានឆាប់រហ័សទេ គឺវាជាការទទួលស្គាល់អារម្មណ៍ខ្លួនឯង ។

អ្នកដែលបាត់បង់មនុស្សជាទីស្រឡាញ់ ពួកគេគ្រាន់តែចង់ជជែកជាមួយអ្នកស្លាប់ម្តងទៀត ហើយទោះបីទូរស័ព្ទនេះពុំអាចទាក់ទងបានក្តី ប៉ុន្តែវាបានជួយព្យាបាលផ្លូវចិត្តមនុស្សសោកសៅបាន ។ លោក សាសាគិ ធ្លាប់និយាយថា ទោះបីវាលំបាកខ្លាំងប៉ុនណាក្តី ប៉ុន្តែក្តីសង្ឃឹមអាចធ្វើឱ្យយើងមានជីវិតរស់នៅបន្តទៀត ៕

ជារៀងរាល់ឆ្នាំ ប្រទេសនានាបានកាប់ដើមឈើប្រមាណ១ម៉ឺន៥ពាន់លានដើម ហើយមានដើមឈើប្រមាណ៤០% ឬជិត៦ពាន់លានដើម ត្រូវបានយកទៅប្រើប្រាស់ក្នុងឧស្សាហកម្មផលិតក្រដាស ។ លើសពីនេះ ស្ទើរតែគ្មានផលិតផលផ្សេងទៀតអាចប្រើប្រាស់ជំនួសក្រដាសបានទេ ដោយសារពិភពលោក បានប្រើប្រាស់ក្រដាសយ៉ាងច្រើនមហាសាលក្នុងជីវិតប្រចាំថ្ងៃ ។

Releaf Paper គឺជាក្រុមហ៊ុនរបស់អ៊ុយក្រែនបានរកឃើញវិធីផលិតក្រដាសពីស្លឹកឈើជ្រុះតាមធម្មជាតិ ហើយក្រុមហ៊ុននេះអាចផ្លាស់ប្តូរស្លឹកឈើជ្រុះជាង២តោន ឱ្យក្លាយជាក្រដាសចំនួន១តោន ។ ការផលិតក្រដាសតាមវិធីថ្មីនេះមានភាពខុសប្លែកពីវិធីចាស់ ដែលត្រូវប្រើប្រាស់សាច់ឈើរហូតដល់១៧តោន ដើម្បីផលិតឱ្យបានក្រដាសក្នុងបរិមាណនេះ ។

ស្លឹកឈើជ្រុះ គឺជាបញ្ហាមួយដែលទីក្រុងនានាលើពិភពលោក កំពុងតែចាត់វិធានការ ។ ប្រទេសជាច្រើនពិបាកកម្ចាត់ស្លឹកឈើជ្រុះណាស់ ដោយសារវារលាយកើតជាផូស្វ័រ ដែលជាមូលហេតុបំផ្លាញប្រភពទឹក ។ ក្រៅពីនេះ ស្លឹកឈើងាប់បានធ្វើឱ្យស្ទះលូ និងប្រព័ន្ធបង្ហូរទឹក ហើយជាទូទៅ ស្លឹកឈើជ្រុះត្រូវបានគេយកទៅកប់ក្នុងដី ឬដុតកំទេច ដែលធ្វើឱ្យប៉ះពាល់បរិស្ថាន ។

ក្រុមហ៊ុន Releaf Paper ឱ្យដឹងថា បើគិតជាមធ្យម ទីក្រុងនីមួយៗបានកម្ចាត់ស្លឹកឈើងាប់រហូតដល់៨.០០០តោនក្នុង១ឆ្នាំ ហើយគ្រាន់តែទីក្រុងនៅអឺរ៉ុបអាចប្រមូលស្លឹកឈើងាប់រហូតដល់ជាង១លានតោនឯណោះ ។

ទីក្រុងនានានៅអឺរ៉ុបបានបញ្ជូនសំរាមស្លឹកឈើទៅកាន់រោងចក្ររបស់ក្រុមហ៊ុន Releaf Paper នៅទីក្រុងប៉ារីស ប្រទេសបារាំង ។ រីឯដំណាក់កាលយកស្លឹកឈើងាប់ទៅផលិតជាក្រដាស គឺចាប់ផ្តើមពីការលាងស្លឹកឈើឱ្យស្អាត និងយកវាទៅលាយជាមួយសារធាតុជីវសាស្ត្រ ។ បន្ទាប់មក យកវាហាលថ្ងៃឱ្យស្ងួតដើម្បីផលិតជាថង់ក្រដាស សៀវភៅកត់ត្រា ឡាំងក្រដាស ក្រដាសខ្ចប់កាដូ និងផលិតផលជាច្រើនទៀត ។

ក្រុមហ៊ុន Releaf Paper បន្តថា ផលិតផលក្រដាសរបស់ពួកគេបានបញ្ចេញកាបូនឌីអុកស៊ីតរហូតដល់៨០% និងប្រើប្រាស់ទឹកតិចជាងការផលិតក្រដាសតាមវិធីចាស់រហូតដល់១៥ដង ។ ក្រដាសផលិតពីស្លឹកឈើងាប់នឹងរលាយក្នុងដីត្រឹមរយៈពេល៣០ថ្ងៃ ខណៈក្រដាសធម្មតាបានចំណាយពេលរលាយក្នុងដី រហូតដល់២៧០ថ្ងៃ ឬយូរជាងនេះ ។

ប៉ុន្តែក្រុមហ៊ុនបញ្ជាក់ថា ពួកគេនឹងប្រមូលស្លឹកឈើជ្រុះក្នុងទីក្រុងប៉ុណ្ណោះមកផលិតជាក្រដាស ហើយពួកគេពុំយកស្លឹកឈើដែលជ្រុះក្នុងព្រៃមកផលិតជាក្រដាសទេ ដើម្បីរក្សាភាពសម្បូរបែបរបស់ប្រព័ន្ធអេកូឡូស៊ីព្រៃឈើ ។

បច្ចុប្បន្ន ក្រុមហ៊ុនអាចផលិតថង់ក្រដាសបានជាង៣លានថង់ក្នុង១ខែ និងកែច្នៃស្លឹកឈើជ្រុះជាង៥.០០០តោនក្នុងឆ្នាំ ។ អតិថិជនរបស់ក្រុមហ៊ុន រួមមាន ៖ ធនាគារ BNP Paribas, Logitech, Samsung និងក្រុមហ៊ុនធំៗជាច្រើនទៀត ហើយក្រុមហ៊ុនមានគម្រោងបង្កើនការផលិត ដោយការបើករោងចក្របន្ថែមនៅប្រទេសផ្សេងៗ ។

នាយកក្រុមហ៊ុន Releaf Paper និយាយថា ៖ «យើងចង់ផ្សព្វផ្សាយពីវិធីផលិតក្រដាសនេះទៅកាន់ពិភពលោក ។ ចក្ខុវិស័យរបស់យើង គឺមនុស្សម្នានៅគ្រប់ទ្វីបទាំងអស់អាចប្រើប្រាស់ក្រដាសផលិតពីស្លឹកឈើងាប់» ៕

ប្រទេសកូរ៉េខាងត្បូង ៖ អត្រាកំណើតនៅប្រទេសកូរ៉េខាងត្បូងបានធ្លាក់ចុះយ៉ាងខ្លាំង ដោយសារពលរដ្ឋកូរ៉េខាងត្បូងចូលចិត្តចិញ្ចឹមឆ្កែជាងចិញ្ចឹមកូនតូ.ច រហូតធ្វើឱ្យរទេះដឹកឆ្កែ លក់ដាច់ជាងរទេះកូនក្មេ.ង ។ នេះបង្ហាញថា យុវជនភាគច្រើនពុំចង់រៀបការ និងមានកូនទេ ដែលធ្វើឱ្យអត្រាកំណើតធ្លាក់ចុះជាបន្តបន្ទាប់ ។

វាជាបញ្ហាមួយធ្វើឱ្យរដ្ឋាភិបាលបារម្ភយ៉ាងខ្លាំងពីផលប៉ះពាល់សេដ្ឋកិច្ចរយៈពេលយូរ និងកំណើនពលរដ្ឋអាយុច្រើន ។ លើសពីនេះ រដ្ឋាភិបាលមានគម្រោងបង្កើតក្រសួងថ្មី ដើម្បីដោះស្រាយបញ្ហានេះទៀតផង ។ កាលពីឆ្នាំ២០២៣ រទេះដឹកឆ្កែបានលក់ដាច់ជាងរទេះកូនក្មេងនៅ Gmarket ជាហាងលក់រាយតាមអនឡាញឈានមុខគេនៅកូរ៉េខាងត្បូង ។

សារព័ត៌មាន The Wall Street Journal រាយការណ៍ថា អត្រាកំណើតនៅកូរ៉េខាងត្បូងបានធ្លាក់ចុះម្តងទៀតកាលពីឆ្នាំ២០២៣ ហើយធ្វើឱ្យការទិញរទេះដឹកសត្វចិញ្ចឹមកើនឡើងខ្ពស់ គឺចំនួនលក់បានកើនឡើងរហូតដល់៤ដង គិតចាប់ពីឆ្នាំ២០១៩ ។

ពលរដ្ឋកូរ៉េខាងត្បូងចូលចិត្តចិញ្ចឹមសត្វ ហើយចំនួនមនុស្សក្លាយជាម្ចាស់សត្វចិញ្ចឹមបានកើនឡើងជាបន្តបន្ទាប់ ខណៈការចំណាយប្រាក់ពាក់ព័ន្ធនឹងសត្វចិញ្ចឹម ក៏កើនឡើងដែរ ។ នេះជាការលើកឡើងរបស់ CEO មកពី Pet Friends ជាកម្មវិធីលក់សត្វចិញ្ចឹមតាមអនឡាញដ៏ធំបំផុត បាននិយាយមកកាន់សារព័ត៌មាន The Wall Street Journal ។

ចំណែករដ្ឋមន្ត្រីក្រសួងការងារ បានថ្លែងកាលពីឆ្នាំ២០២៣ ថា ៖ «អ្វីដែលខ្ញុំបារម្ភបំផុត គឺយុវជនកូរ៉េខាងត្បូងពុំស្រឡាញ់គ្នាទេ ។ ពួកគេស្រឡាញ់ឆ្កែ និងយកឆ្កែដើរតាមខ្លួន ហើយពួកគេពុំរៀបការ ឬមានកូនឡើយ» ។

វិធានការកាត់បន្ថយអត្រាកំណើតធ្លាក់ចុះ គឺរដ្ឋាភិបាលកូរ៉េបានផ្តល់ប្រាក់ឧបត្ថម្ភជិត៣សែនលានដុល្លារអាមេរិកសម្រាប់ជួយឱ្យពលរដ្ឋចិញ្ចឹមកូន ឬផ្តល់ប្រាក់ដល់គ្រួសារផ្តល់កំណើតទារក ។ រីឯអាជ្ញាធរក្នុងតំបន់ខ្លះបានផ្តល់ប្រាក់ចំនួន៧ម៉ឺនដុល្លារអាមេរិកសម្រាប់ទារកម្នាក់ ដែលវាជាផ្នែកមួយនៃគំនិតផ្តួចផ្តើមគាំទ្រទារកកើតថ្មី ។

ក្រៅពីនេះ រដ្ឋាភិបាលក៏បានជំរុញយុវជនឱ្យស្វែងរកគូស្រករ ព្រមទាំងផ្តល់ប្រាក់ឱ្យគូស្នេហ៍ណាត់ជួបគ្នាភ្ជាប់ទំនាក់ទំនង ។ ប៉ុន្តែវិធានការទាំងនេះពុំទទួលបានលទ្ធផលទេ ដោយសារយុវជនជួបឧបសគ្គជាច្រើនដើម្បីបង្កើតគ្រួសារ ជាពិសេស នៅទីក្រុងសេអ៊ូល ដែលមានការចំណាយខ្ពស់ ។

សាស្ត្រាចារ្យផ្នែកសង្គមវិទ្យានៅសាកលវិទ្យាល័យ Seoul Women និយាយថា ៖ «យុវជនសម័យថ្មីបានចំណាយប្រាក់ច្រើនជាងយុវជនជំនាន់មុន និងគ្មានប្រាក់សន្សំទេ ។ ពួកគេតែងតែបង្ហាញភាពជោគជ័យរបស់ខ្លួនក្នុងអ៊ីនធើរណេតច្រើនជាង» ៕