ប្រទេសស៊ុយអែត ៖ កាលពីថ្ងៃទី១៨ ខែកញ្ញា ឆ្នាំ២០២៤ សារព័ត៌មានបរទេសរាយការណ៍ថា ផ្សារទំនើបជាច្រើនកន្លែងនៅប្រទេសស៊ុយអែតបានប្រើប្រាស់ធ្នើរដាក់ទំនិញធ្វើជាកន្លែងដាំបន្លែលើទឹក ដើម្បីឱ្យអតិថិជនអាចជ្រើសរើសទិញបន្លែស្រស់ៗ គ្មានសារធាតុគីមី ។ បន្លែទាំងនេះបានដាំក្នុងបន្ទះជ័រដែលមានទឹកនៅខាងក្រោមតម្រៀបគ្នាជាជួរលើធ្នើរ ដែលមានបុគ្គលិកក្រុមហ៊ុនកសិកម្មឈ្មោះ SweGreen ជាអ្នកថែទាំ ។

ការដាំបន្លែក្នុងផ្សារទំនើបនេះ ក្រុមហ៊ុន SweGreen មានគោលបំណងដោះស្រាយបញ្ហាមួយចំនួន ដូចជា ៖ ការខ្វះខាតទឹកស្រោចស្រពបន្លែ, ផ្ទៃដីកសិកម្មពុំគ្រប់គ្រាន់, កាត់បន្ថយការពឹងផ្អែកលើអាកាសធាតុ និងជាការធ្វើកសិកម្មពុំប៉ះពាល់បរិស្ថាន ។

លើសពីនេះ ការដាំបន្លែបៃតងក្នុងស្រុកនឹងជួយកាត់បន្ថយការទិញបន្លែពីក្រៅប្រទេស, កាត់បន្ថយការបញ្ចេញជាតិពុលពេលដឹកជញ្ជូន, រក្សាទុកបានយូរ, បន្លែមានគុណភាពល្អ និងពុំប្រើប្រាស់ដីសម្រាប់ដាំទេ ។ បច្ចុប្បន្ន បន្លែស្រស់របស់ក្រុមហ៊ុនបានដាក់លក់នៅតាមផ្សារទំនើបនៅស៊ុយអែត និងអាល្លឺម៉ង់ ។ បន្លែទាំងអស់ទទួលបានការថែទាំយ៉ាងល្អ គ្មានសត្វល្អិតបំផ្លាញ និងសារធាតុគីមីទេ ។ វាជាការផ្តល់ទំនុកចិត្តដល់អតិថិជនអាចទិញបន្លែស្រស់ពេញ១ឆ្នាំ, ស្អាត និងមានសុវត្ថិភាព ។

ការដាំបន្លែទាំងអស់បានប្រើប្រាស់ទឹកតិចតួច គឺក្រុមហ៊ុនអាចដាំស្ពៃក្រញាញ់បាន១គីឡូក្រាម ដោយត្រូវការទឹកត្រឹមតែ១លីត្រប៉ុណ្ណោះ ។ នេះជាការប្រើប្រាស់ទឹកតិចជាងការដាំស្ពៃក្រញាញ់នៅទីវាល រហូតដល់៩៩% ខណៈការដាំនៅទីវាលប្រើទឹករហូតដល់២៥០លីត្រ ។ ពេលយកបន្លែមកដាំក្នុងផ្សារទំនើបបែបនេះ ក្រុមហ៊ុនពុំចាំបាច់ចំណាយប្រាក់លើដឹកជញ្ជូនបន្លែទេ ខណៈការដឹកជញ្ជូនបន្លែបានបញ្ចេញកាបូនឌីអុកស៊ីតទៅបរិយាកាស ។

ក្រុមហ៊ុនបានដាំបន្លែក្នុងផ្សារទំនើបចំនួន១០០មុខ ដូចជា ៖ ស្ពៃក្រញាញ់, ស្លឹកជីរ, ជីអង្កាម និងជីស្លឹកវែង ជាដើម ។ នាយកក្រុមហ៊ុន SweGreen និយាយថា ក្រុមហ៊ុននឹងពង្រីកការដាំបន្លែបន្ថែមទៀត ដូចជា ៖ ដាំក្នុងភោជនីយដ្ឋាន សណ្ឋាគារ និងសាកលវិទ្យាល័យ ។ បច្ចុប្បន្ន ក្រុមហ៊ុនកំពុងតែសាកល្បងដាំឈើហូបផ្លែ និង Strawberry ៕

ប្រទេសអ៊ីតាលី ៖ អ៊ីតាលីនឹងទទួលបានតំណែងជាប្រទេសផលិតស្រាទំពាំងបាយជូរច្រើនបំផុតលើពិភពលោក នៅឆ្នាំ២០២៤នេះ ក្រោយពីចម្ការទំពាំងបាយជូរនៅប្រទេសបារាំងរងផលប៉ះពាល់ដោយសារការធ្លាក់ព្រិល និងមានទឹកសំណើមច្រើនក្នុងចម្ការទំពាំងបាយជូរ ។ នេះបើតាមការរាយការណ៍របស់សារព័ត៌មាន AFP កាលពីថ្ងៃទី១៩ ខែកញ្ញា ឆ្នាំ២០២៤ ។

ក្រសួងកសិកម្មអ៊ីតាលីឱ្យដឹងថា ការផលិតស្រាទំពាំងបាយជូររបស់អ៊ីតាលីនឹងកើនឡើង៨% ឬកើនឡើងចាប់ពី៤១លាន ទៅ៤២លានហិកតា ក្រោយពេលការផលិតបានធ្លាក់ចុះ កាលពីឆ្នាំ២០២៣ ។ អ៊ីតាលីនឹងវ៉ាដាច់បារាំងនាពេលឆាប់ៗ ពីព្រោះក្រសួងកសិកម្មបារាំងរំពឹងថា ការផលិតស្រាទំពាំងបាយជូររបស់បារាំងនឹងធ្លាក់ចុះ១៨% ឬធ្លាក់ចុះជាង៣៩លានហិកតា ។

យោងតាមទិន្នន័យរបស់អង្គការស្រាទំពាំងបាយជូរអន្តរជាតិបញ្ជាក់ថា ចាប់ពីឆ្នាំ២០០៦មក អ៊ីតាលីបានគ្រប់គ្រងតំណែងជាប្រទេសផលិតស្រាទំពាំងបាយជូរច្រើនបំផុតលើពិភពលោក ប៉ុន្តែនៅឆ្នាំ២០១១, ឆ្នាំ២០១៤ និងឆ្នាំ២០២៣ អ៊ីតាលីបានបាត់បង់តំណែងនេះទៅឱ្យបារាំង ។

ទោះយ៉ាងណា នៅតំបន់ខាងជើងប្រទេសអ៊ីតាលីបានប្រឈមជាមួយបញ្ហាភ្លៀងធ្លាក់ខ្លាំង និងមានព្រិលធ្លាក់ច្រើនក្នុងនិទាឃរដូវ និងរដូវក្តៅ ។ រីឯតំបន់ខាងត្បូងអ៊ីតាលីបានប្រឈមនឹងគ្រោះរាំងស្ងួត ក្តៅខ្លាំង និងមានភ្លៀងធ្លាក់តិចតួច ។ ហេតុនេះ ទើបធ្វើឱ្យកសិករអ៊ីតាលីប្រញាប់ប្រមូលផលទំពាំងបាយជូរលឿនជាងពេលធម្មតា ។

ចំណែកនៅតំបន់ភ្នំជូរ៉ា ស្ថិតនៅភាគខាងកើតប្រទេសបារាំងឯណោះវិញ មានសំណើមច្រើន និងជំងឺផ្សិត ដែលបណ្តាលឱ្យទិន្នផលដំណាំទំពាំងបាយជូរធ្លាក់ចុះរហូតដល់៧១% ក្នុងតំបន់ឆារ៉ម ។ រីឯតំបន់ភាគខាងលិចបារាំង ទិន្នផលទំពាំងបាយជូរបានធ្លាក់ចុះ៣៥% នៅជ្រលងភ្នំលួ និងធ្លាក់ចុះ៣០% នៅទីក្រុងបូឆូឡេ ដោយសារចម្ការទំពាំងបាយជូរនៅតំបន់ទាំងនេះមានព្រិលធ្លាក់ច្រើនពេក ៕

ប្រទេសជាច្រើននៅអឺរ៉ុបកណ្តាល និងខាងកើតដូចជា អូទ្រីស ស្លូវ៉ាគី សាធារណរដ្ឋឆេក ប៉ូឡូញ និងរូម៉ានី បានរងគ្រោះដោយសារឥទ្ធិពលព្យុះ Boris ដ៏កាចសាហាវបំផុតមិនធ្លាប់មាន ដែលនាំមកនូវភ្លៀងធ្លាក់យ៉ាងខ្លាំងជាបន្តបន្ទាប់ បណ្តាលឱ្យលំនៅដ្ឋានរបស់ប្រជាពលរដ្ឋលិចលង់ដោយទឹកជំនន់។
យោងតាម BBC ខ្យល់ព្យុះ Boris បានបោកបក់វាយប្រហារនៅអឺរ៉ុបកណ្តាល និងខាងកើតកាលពីថ្ងៃទី ១៤ ខែកញ្ញា ឆ្នាំ២០២៤ ដោយបានធ្វើឱ្យមានភ្លៀងធ្លាក់ខ្លាំងជាបន្តបន្ទាប់មកលើតំបន់ជាច្រើនក្នុងប្រទេស អូទ្រីស ស្លូវ៉ាគី សាធារណរដ្ឋឆេក ប៉ូឡូញ និងរូម៉ានី។

នៅប្រទេសអូទ្រីសទីក្រុងវីយែនត្រូវបានប្រកាសថាជាតំបន់គ្រោះមហន្តរាយដ៏ធ្ងន់ធ្ងរបំផុតមិនធ្លាប់មានពីមុនមក ខណៈមនុស្សម្នាក់បានស្លាប់ភ្លាមៗ ពេលកំពុងជួយសង្គ្រោះប្រជាជនក្នុងរដ្ឋអូទ្រីសក្រោម។ រីឯប្រទេសស្លូវ៉ាគីវិញក្នុងទីក្រុង Bratislava ក៏មិនខុសគ្នាពីប្រទេសអូទ្រីសទីក្រុងវីយែនដែរ ដោយប្រទេសទាំងពីរនេះសុទ្ធតែបានប្រកាសភាពអាសន្ននៅក្នុងទីក្រុងដូចគ្នាថាជាតំបន់គ្រោះមហន្តរាយដ៏ធ្ងន់ធ្ងរបំផុតមិនធ្លាប់មាន។ ស្ថានភាពនៅអឺរ៉ុបគឺកាន់តែអាក្រក់ទៅៗហើយ ដោយសារកម្ពស់ទឹកបានឡើងដល់ទ្រូងមនុស្សពេញវ័យក្នុងទីក្រុង Opava នៃសាធារណរដ្ឋឆេក។

ធ្វើឱ្យមនុស្សប្រហែល ១០,០០០ នាក់ក្នុងចំណោមប្រជាជនសរុបរបស់ទីក្រុងដែលមានចំនួន ៥៦,០០០ ត្រូវបានស្នើសុំឱ្យជម្លៀសទៅកាន់ទីទួលខ្ពស់ ខណៈមនុស្ស ៤ នាក់ផ្សេងទៀតបានបាត់ខ្លួនក្នុងគ្រោះទឹកជំនន់ ហើយផ្ទះជាច្រើនរងការខូចខាតយ៉ាងខ្លាំងដោយទឹកជំនន់នៅក្នុងទីក្រុង Jesenik ភាគឦសានសាធារណរដ្ឋឆេក។ ចំណែកឯប្រទេសប៉ូឡូញក្នុងទីក្រុង Klodzko វិញក៏មិនធម្មតាដែរ ត្រូវបានគេចាត់ទុកថា ជាតំបន់រងគ្រោះខ្លាំងបំផុត ដោយបង្ខំឱ្យប្រជាជនប្រហែល ១,៦០០ នាក់ជម្លៀសចេញ ដោយសារភ្លៀងខ្លាំងបណ្តាលឱ្យបាក់ទំនប់ទឹក។

នៅប្រទេសរ៉ូម៉ានីកាលពីថ្ងៃទី១៥ ខែកញ្ញា ក៏កំពុងប្រឈមមុខនឹងឥទ្ធិពលនៃការប្រែប្រួលអាកាសធាតុធ្ងន់ធ្ងរផងដែរ ដែលឥទ្ធិពលខ្យល់ព្យុះនេះបានលេចឡើងកាន់តែច្រើនឡើងនៅក្នុងទ្វីបអឺរ៉ុប ជាពិសេសគឺអឺរ៉ុបកណ្តាល និងខាងកើត។ កម្ពស់ទឹកកាន់តែខ្ពស់ទៅៗធ្វើឱ្យអឺរ៉ុបជួបការលំបាកក្នុងការដោះស្រាយបញ្ហា ទោះជាយ៉ាងណាពួកគេបានត្រៀមខ្លួនរួចជាស្រេចក្នុងការឆ្លើយតបនឹងគ្រោះទឹកជំនន់។

នៅក្នុងរដ្ឋធានី Budapest ប្រទេសហុងគ្រី ក្រុមមន្ត្រីបានលើកឡើងពីការព្យាករណ៍ថា កម្ពស់ទឹកទន្លេ Danube នៅចុងសប្តាហ៍នេះអាចកើនឡើងដល់ជាង ៨.៥ ម៉ែត្រ ដែលជិតនឹងកំណត់ត្រា ៨.៩១ ម៉ែត្រក្នុងឆ្នាំ ២០១៣។ ហើយកម្ពស់ទឹកនៃទន្លេ Elbe ក្នុងទីក្រុង Schona ប្រទេសអាល្លឺម៉ង់ នៅជិតព្រំដែនជាមួយសាធារណរដ្ឋឆេក ត្រូវបានគេរំពឹងថានឹងឡើងដល់កំពូលក្នុងកម្រិត ៧.៥ ម៉ែត្រ នៅរសៀលថ្ងៃទី ១៧ ខែកញ្ញានេះ ដែលនឹងធ្វើឱ្យតំបន់ជាច្រើនចេញការព្រមានកម្រិតខ្ពស់បំផុត៕

កាលពីថ្ងៃទី៧ ដល់ថ្ងៃទី១៤ ខែកញ្ញា ឥទ្ធិពលព្យុះយ៉ាហ្គីបានវាយប្រហារប្រទេសជាច្រើននៅទ្វីបអាស៊ី ហើយនៅថ្ងៃ១៤ ដល់ ១៦ វិញឥទ្ធិពលព្យុះ Boris ក៏បានវាយប្រហារប្រទេសជាច្រើននៅទ្វីបអឺរ៉ុបម្តង។ ប៉ុន្តែឥឡូវនេះចាប់ពីថ្ងៃទី ១៦ រហូតមកដល់ពេលនេះ ខ្យល់ព្យុះដ៏កាចសាហាវមួយស្រាប់តែបានបោកបក់មកលើតំបន់ជាច្រើននៅទ្វីបអាមេរិក បណ្តាលឱ្យផ្ទះរាប់រយខ្នងជន់លិច បង្កឱ្យមានការបាក់ដីយ៉ាងធ្ងន់ធ្ងរ និងរថយន្តជាច្រើនគ្រឿងត្រូវរសាត់ទៅតាមទឹក។

យោងតាម CNN ទីក្រុងឆ្នេរសមុទ្រ Carolina Beach ក្នុងរដ្ឋ North Carolina ប្រទេសសហរដ្ឋអាមេរិកត្រូវបានដាក់ក្នុងភាពអាសន្នកាលពីថ្ងៃទី ១៦ ខែកញ្ញា ឆ្នាំ២០២៤ បន្ទាប់ពីមានភ្លៀងធ្លាក់ខ្លាំងជាប្រវត្តិសាស្ត្របានធ្លាក់ទឹកភ្លៀងរហូតដល់ ៤៥៧ មីលីម៉ែត្រក្នុងរយៈពេល ១២ ម៉ោងប៉ុណ្ណោះ បណ្តាលឱ្យទឹកជំនន់បានជន់លិចតំបន់លំនៅដ្ឋាន និងបង្កការកកស្ទះចរាចរណ៍យ៉ាងខ្លាំង។ ព្យុះភ្លៀងដ៏កាចសាហាវនេះត្រូវបានគេចាត់ទុកថាគឺជាបាតុភូត «ម្ដងក្នុងមួយពាន់ឆ្នាំ»។

លោក Bruce Oakley មន្ត្រីនៅទីក្រុងទេសចរណ៍ Carolina Beach បាននិយាយថា “នេះប្រហែលជាទឹកជំនន់ដ៏អាក្រក់បំផុតដែលអ្នកស្រុកមិនធ្លាប់បានឃើញពីមុនមកទេ”។ លោក Bruce Oakley បានបន្តទៀតថា ខ្យល់និងភ្លៀងភ្លាមៗបានចាប់ផ្តើមតាំងពីព្រឹកព្រលឹម ហើយបន្តភ្លៀងជាបន្តបន្ទាប់ៗ ដោយមនុស្សមិនបានត្រៀមខ្លួនទេព្រោះតំបន់នេះមិនធ្លាប់មានទឹកជំនន់ពីមុនមកឡើយ។

ទន្ទឹមនឹងនឹងនេះកន្លែងផ្សេងទៀតនៅក្នុងតំបន់ក៏បានកត់ត្រាភ្លៀងច្រើនជាង ៣០០ មីលីម៉ែត្រក្នុងរយៈពេល ១២ ម៉ោង ដែលជាចំនួនច្រើនបំផុតក្នុងរយៈពេល ២០០ ឆ្នាំ។ បច្ចុប្បន្នអាជ្ញាធរកំពុងជួយមនុស្សជាច្រើនដែលជាប់ក្នុងរថយន្ត និងផ្ទះឱ្យមានសុវត្ថិភាពហើយ។ ទោះជាយ៉ាងណា ទឹកជំនន់នៅឆ្នេរ Carolina បានចាប់ផ្តើមស្រកបន្តិចម្តងៗ នៅពេលដែលសម្ពាធទាបបានផ្លាស់ទីទៅភាគខាងលិចនៃតំបន់នោះ ដោយគេរំពឹងថានឹងចុះខ្សោយនៅព្រឹកថ្ងៃទី ១៨ ខែកញ្ញានេះ៕