ប្រទេសចិន៖ មិនថ្មី មិនប្លែក មិនមែនចិន ម្ហូបមួយមុខដែលផលិតពីសារ៉ាយសមុទ្រមានរូបរាងដូចសក់មនុស្ស បានកំពុងក្លាយជាអាហារតាមចិញ្ចើមផ្លូវដ៏ពេញនិយមបំផុតនៅក្នុងប្រទេសចិន។
ម្ហូបនេះមានឈ្មោះថា Fa Cai ឬសារ៉ាយសក់ទេពអប្សរ គឺជាប្រភេទស្មៅសក់ដែលប្រជាជនចិននិយមប្រើប្រាស់ជាបន្លែ។ បច្ចុប្បន្ននៅតាមដងផ្លូវនៃទីក្រុង Chengdu ខេត្ត Sichuan មុខម្ហូបដែលមើលមួយភ្លេតស្រដៀងសក់មនុស្សគឺមានប្រជាប្រិយភាពខ្លាំងណាស់។

នេះជាមុខម្ហូបសំណាងដ៏ពេញនិយមនៅថ្ងៃចូលឆ្នាំសកល ព្រោះនៅក្នុងភាសាចិនកាតាំង ការបញ្ចេញសំឡេងរបស់វាស្រដៀងទៅនឹងឃ្លាថា “សម្បូរបែប”។ ម្ហូបដែលប្រើនៅថ្ងៃចូលឆ្នាំសកល ឥឡូវនេះគឺជាអាហារសម្រន់តាមដងផ្លូវដ៏ពេញនិយមនៅក្នុងប្រទេសចិន។ Fa Cai ដែលមើលទៅដូចជាសក់មនុស្ស ហាក់ដូចជាកំពុងញ៉ាំសក់បានទាក់ទាញចំណាប់អារម្មណ៍របស់អ្នកញ៉ាំអាហារចិនយ៉ាងឆាប់រហ័ស។

Fa Cai ច្រើនតែដុះនៅតំបន់វាលខ្សាច់ស្ងួតដូចជា Gansu, Shaanxi, Qinghai, Xinjiang និង Inner Mongolia។ ក្រោយពីច្រូតរួច មនុស្សនឹងសម្ងួតវាមុននឹងកែច្នៃ ដោយសារតែរូបរាងសរសៃតូចងងឹត ពេលហាលស្ងួត Fa Cai គឺមានរូបរាងដូចសក់មនុស្សពិតៗ។ ជាធម្មតាមនុស្សចម្អិនសារ៉ាយសមុទ្រជាមួយទំពាំងបាយជូរហើយញ៉ាំវាដូចជាស៊ុប។ បន្ថែមពីលើការចៀន មេចុងភៅតាមចិញ្ចើមផ្លូវក៏ដុតសារ៉ាយសមុទ្រនៅលើធ្យូង និងប្រោះម្សៅម្ទេសមួយស្រទាប់មុនពេលបម្រើដល់ភ្ញៀវ។

សារ៉ាយសមុទ្រ Fa Cai ឬហៅថា “សក់ទេពអប្សរ ” ដុតជាមួយអំបិលម្ទេស ឬចៀន គឺជាមុខម្ហូបថ្មីដែលទើបតែលេចឡើងក្នុងបញ្ជីអាហារតាមចិញ្ចើមផ្លូវប្រទេសចិន។ ពីមុនប្រទេសនេះបានទាក់ទាញចំណាប់អារម្មណ៍ភ្ញៀវទេសចរក្នុងស្រុក និងបរទេសជាមួយនឹងមុខម្ហូបមួយមុខដូចជា ថ្មដុតជាមួយអំបិល និងម្ទេស កាហ្វេស្លឹកខ្ទឹម ហើយឥឡូវនេះក៏បង្កើតម៉ឺនុយសក់ចៀនវិញម្តង ដែលការបង្កើតម៉ឺនុយថ្មីៗរហូតបែបនេះគឺដើម្បីទាក់ទាញការចាប់អារម្មណ៍ពីភ្ញៀវទេសចរ៕

កាលពីថ្ងៃទី១៤ ខែវិច្ឆិកា ឆ្នាំ២០២៤ ក្រុមហ៊ុន Unbabel បានបង្ហាកម្មវិធីថ្មីសម្រាប់បកប្រែភាសាឈ្មោះ Widn.AI ដែលប្រើប្រាស់បច្ចេកវិទ្យា AI ដើម្បីប្រកួតប្រជែងជាមួយកម្មវិធីផ្សេងៗ ។ នាយកក្រុមហ៊ុននេះលើកឡើងថា រយៈពេល៣ឆ្នាំទៀត បច្ចេកវិទ្យា AI នឹងអាចបកប្រែបានច្រើនភាសា ហើយពុំចាំបាច់ពឹងផ្អែកលើអ្នកបកប្រែជាមនុស្សទៀតទេ ។

កម្មវិធី Widn.AI ត្រូវបានបង្កើតឡើងនៅលើគំរូភាសាដ៏ធំមួយដែលក្រុមហ៊ុនបង្កើតខ្លួនឯងឈ្មោះ Tower និងប្រើប្រាស់បច្ចេកវិទ្យា AI ស្រដៀងគ្នាជាមួយកម្មវិធី ChatGPT របស់ OpenAI ។

នាយកក្រុមហ៊ុន Unbabel លោក Vasco Pedro បានផ្តល់សម្ភាសន៍មកកាន់សារព័ត៌មាន CNBC ថា ការបង្កើតគំរូភាសាដ៏ធំរបស់ក្រុមហ៊ុន នឹងធ្វើឱ្យបច្ចេកវិទ្យា AI អាចបកប្រែបាន រហូតដល់៣២ភាសា ។ ពេលយើងចាប់ផ្តើមបង្កើតក្រុមហ៊ុន Unbabel កាលពី១០ឆ្នាំមុន AI ពុំទាន់រីកចម្រើនដូចបច្ចុប្បន្នទេ ទើបយើងស្វែងរកដំណោះស្រាយ គឺការរួមបញ្ចូលគ្នារវាងមនុស្ស និង AI ។ យើងជឿថា AI នឹងអាចបកប្រែភាសាគ្រប់ជ្រុងជ្រោយ ដោយពុំចាំបាច់ពឹងផ្អែកមនុស្ស ។

កន្លងមក ក្រុមហ៊ុន Unbabel ធ្លាប់ប្រើប្រាស់ប្រព័ន្ធ Machine Learning ដើម្បីបកប្រែភាសា បន្ទាប់មក ត្រូវឆ្លងកាត់ការត្រួតពិនិត្យពីមនុស្សនៅដំណាក់កាលចុងក្រោយ ។ ប៉ុន្តែកម្មវិធីបកប្រែភាសាឈ្មោះ Widn.AI ពុំត្រូវការមនុស្សជួយបកប្រែទៀតទេ ។

លោក Vasco បន្តថា ៖ «ខ្ញុំគិតថា មនុស្សមានប្រៀបជាង AI បន្តិច ក្នុងការបកប្រែភាសាដែលសរសេរមានលក្ខណៈស្មុគស្មាញ ឬលំបាក ។ ប៉ុន្តែ AI នឹងអាចបំពេញការងារជំនួសមនុស្សយ៉ាងពិតប្រាកដ ហើយរយៈពេល៣ឆ្នាំទៀត យើងនឹងពុំត្រូវការមនុស្សបកប្រែភាសាទៀតឡើយ» ។

បច្ចេកវិទ្យា AI ដណ្តើមការងាររបស់មនុស្សត្រូវបានលើកមកជជែកគ្នាយូរមកហើយ ចាប់តាំងពីការបកប្រែភាសាតាមកម្មវិធី Google Translate គឺកម្មវិធីនេះបានបកប្រែត្រឹមត្រូវខ្លះ និងខុសខ្លះ ។ ក្រោយមក ក៏មានការបង្កើតកម្មវិធីបកប្រែថ្មីៗជាបន្តបន្ទាប់ និងបកប្រែភាសាបានត្រឹមត្រូវជាងមុនច្រើន ។

ទោះយ៉ាងណា ការបកប្រែប្រកបដោយវិជ្ជាជីវៈ ឬការបកប្រែឯកសារសំខាន់ៗ ដូចជា ៖ ឯកសារកិច្ចសន្យាអាជីវកម្ម និងឯកសារផ្នែកពេទ្យ គឺពុំអាចបណ្តោយឱ្យបច្ចេកវិទ្យា AI បកប្រែភាសាតែឯងបានទេ ពីព្រោះឯកសារទាំងនេះតម្រូវឱ្យមនុស្សបកប្រែយ៉ាងត្រឹមត្រូវ ដើម្បីកុំឱ្យមានផលប៉ះពាល់នាពេលក្រោយ ។

ចំណែកអ្នកប្រកបអាជីពបកប្រែភាសាអាចស្វែងរកជំនួយពីបច្ចេកវិទ្យា AI ក្នុងការបកប្រែដើម្បីឱ្យការងារឆាប់រហ័ស និងប្រើពេលវេលានៅសេសសល់អភិវឌ្ឍន៍ជំនាញបន្ថែមទៀត ។ ហេតុនេះ យើងនឹងប្រាកដចិត្តថា AI នឹងអាចបកប្រែភាសាបានត្រឹមត្រូវ និងរីកចម្រើនខ្លាំងកម្រិតណា ៕

ប្រទេសជប៉ុន ៖ សារព័ត៌មានបរទេសបានរាយការណ៍កាលពីថ្ងៃទី១៤ ខែវិច្ឆិកា ឆ្នាំ២០២៤ ថា មេដឹកនាំគណបក្សនយោបាយ១រូបនៅប្រទេសជប៉ុនបានរងការរិះគ.ន់ ពីសំណាក់មហាជន ក្រោយហាមឃាត់នារីអាយុច្រើនជាង២៥ឆ្នាំរៀបការ និងស្នើឱ្យពួកនាងកាត់មាត់ស្បូ.នចេញ បើមានអាយុច្រើនជាង៣០ឆ្នាំហើយអត់ព្រមមានកូន ។

លោក ណាអូគិ ហ៊ិយ៉ាឃុតាក់ (Naoki Hyakuta) មេដឹកនាំគណបក្សអភិរក្សនិយមបានបញ្ចេញគំនិតប្លែកៗ ដូចជា ៖ ហាមនារីអាយុច្រើនជាង២៥ឆ្នាំរៀបការ, ហាមនារីអាយុលើស១៨ឆ្នាំ ចូលរៀននៅសាកលវិទ្យាល័យ ដើម្បីដោះស្រាយបញ្ហាអត្រាកំណើតធ្លាក់ចុះនៅប្រទេសជប៉ុន ។ លោកថែមទាំងស្នើឱ្យនារីៗកាត់មាត់ស្បូនចេញទៀតផង ពេលអាយុច្រើនជាង៣០ឆ្នាំហើយអត់ព្រមមានកូន ។ ប៉ុន្តែគំនិតរបស់លោកត្រូវបានមហាជនបង្ហាញក្តីបារម្ភ និងរិះគន់យ៉ាងខ្លាំង ។

មេដឹកនាំគណបក្សនយោបាយរូបនេះបានលើកឡើងពីគំនិតរបស់ខ្លួន កាលពីថ្ងៃទី៨ ខែវិច្ឆិកា កន្លងមក ក្នុងកម្មវិធីមួយបានរៀបចំក្នុង YouTube ។ លោកអះអាងថា គំនិតរបស់លោកអាចធ្វើឱ្យនារីៗឆាប់រៀបការពេលវ័យក្មេង និងឆាប់មានកូន និងដោះស្រាយបញ្ហាអត្រាកំណើតធ្លាក់ចុះនៅជប៉ុន ។ រីឯការហាមនារីចូលរៀននៅសាកលវិទ្យាល័យពេលអាយុលើស១៨ឆ្នាំ គឺនឹងធ្វើឱ្យពួកនាងរៀបការមានគ្រួសារ ។

លោក ខាអ៊ុរិ អារិម៉ូតុ ជាមន្ត្រីធ្វើការជាមួយលោក ណាអូគិ និយាយថា គំនិតរបស់ពលរដ្ឋជប៉ុនបានផ្លាស់ប្តូរយ៉ាងឆាប់រហ័ស ពេលនារីចូលបម្រើការងារក្នុងសង្គមកាន់តែច្រើន ។ បច្ចុប្បន្ន នារីគ្រប់រូបយល់ថា ការមានកូននឹងប៉ះពាល់ដល់សេចក្តីសុខផ្ទាល់ខ្លួនរបស់ពួកនាង ។

ក្រោយពីមហាជនពុំឯកភាពនឹងការលើកឡើងនេះ លោក ណាអូគិ ក៏បានសូមទោសជាសាធារណៈ ចំពោះពាក្យសម្តីរបស់ខ្លួនពេលថ្លែងសុន្ទរកថានៅទីក្រុងណាកូយ៉ា និងបណ្តាញសង្គម X កាលពីថ្ងៃទី១០ ខែវិច្ឆិកា ដោយលោកប្រាប់ថា វាគ្រាន់តែជាការយល់ឃើញប៉ុណ្ណោះ ។ ក្រោយពីសូមទោសរួច លោកក៏បន្ទោសអ្នកសារព័ត៌មានជប៉ុនដែលចុះផ្សព្វផ្សាយពីគំនិតរបស់លោកថា ពុំត្រឹមត្រូវ ហើយពួកគេបានមើលវីដេអូមានខ្លឹមសារពេញលេញទេ ។

គួរបញ្ជាក់ថា នេះមិនមែនជាលើកដំបូងទេ ដែលលោក ណាអូគិ ធ្វើឱ្យមហាជនរិះគន់ក្នុងបណ្តាញសង្គម ។ ជាក់ស្តែង កាលពីឆ្នាំ២០១៤ មហាជនបានរិះគន់ម្តងហើយក្រោយពីលោកបដិសេធថា កងទ័ពជប៉ុនពុំធ្លាប់សម្លាប់ពលរដ្ឋចិននៅទីក្រុងណានគីង ប្រទេសចិន ក្នុងអំឡុងសង្គ្រាមលោកលើកទី២ ទេ ។

ប្រទេសជប៉ុនបានប្រឈមនឹងអត្រាកំណើតថ្មីធ្លាក់ចុះយ៉ាងខ្លាំង ហើយបើតាមទិន្នន័យរបស់ក្រសួងសុខាភិបាលបញ្ជាក់ថា ចាប់ពីខែមករា ដល់ខែមិថុនា ឆ្នាំ២០២៤ មានទារកកើតថ្មី ត្រឹមតែ៣៥០,០៧៤នាក់ ធ្លាក់ចុះ៥.៧% (គឺតិចជាងឆ្នាំ២០២៣ ចំនួន២០,៩៧៨នាក់) ៕

ប្រទេសអាល្លឺម៉ង់៖ ទីភ្នាក់ងារព័ត៌មានអាល្លឺម៉ង់ DPA បានរាយការណ៍កាលពីពេលថ្មីៗនេះថា ពលរដ្ឋអាល្លឺម៉ង់វ័យចំណាស់ជាង ៣ លាននាក់ដែលមានអាយុចាប់ពី ៦៥ ឆ្នាំឡើងទៅបច្ចុប្បន្នកំពុងប្រឈមនឹងភាពក្រីក្រ ហើយអង្គុយសុំទានពាសពេញផ្លូវ។
សារព័តមានបរទេសចុះផ្សាយថា ចំនួនមនុស្សចាស់រស់នៅក្នុងភាពក្រីក្រនៅប្រទេសអាល្លឺម៉ង់គឺបានកើនឡើងយ៉ាងខ្លាំង និងឆាប់រហ័សបំផុតបើធៀបនឹង ១០ ឆ្នាំមុនពី ២.៤ លាននាក់រហូតដល់ ៣.២ លាននាក់។

បញ្ហានៃភាពក្រីក្រក្នុងចំណោមមនុស្សចាស់បានធ្វើឱ្យមានការជជែកវែកញែកកាន់តែខ្លាំងអំពីកំណែទម្រង់សោធននិវត្តន៍នៅក្នុងប្រទេស ដោយគណបក្សនយោបាយអាល្លឺម៉ង់បច្ចុប្បន្នបានកំពុងបែកបាក់គ្នា ហើយមិនទាន់មានដំណោះស្រាយណាមួយដែលមានសក្តានុពលជួយកាត់បន្ថយភាពក្រីក្ររបស់ប្រជាជនបាននោះទេ។ ក្នុងរយៈពេលប៉ុន្មានឆ្នាំមកនេះ ចំនួនប្រជាជនវ័យចំណាស់របស់ប្រទេសអាល្លឺម៉ង់ក៏បានកើនឡើងយ៉ាងខ្លាំងផងដែរ ដោយកើនឡើងពី ១២ លាននាក់ក្នុងឆ្នាំ ១៩៩១ ដល់ ១៨,៧ លាននាក់ក្នុងឆ្នាំ ២០២២។

ដូច្នេះប្រទេសនេះមិនត្រឹមតែកើនឡើងនៃប្រជាជនវ័យចំណាស់ប៉ុណ្ណោះទេ វាក៏កើនឡើងកត្តានៃភាពក្រក្ររបស់ប្រជាជនវ័យចំណាស់ផងដែរ។ យោងតាមការិយាល័យស្ថិតិសហព័ន្ធ ក្នុងចំណោមទ្វីបអឺរ៉ុប ប្រទេសអាល្លឺម៉ងគឺមានប្រជាជនវ័យចំណាស់ក្រីក្រច្រើនជាងគេបំផុត។ ហានិភ័យនៃភាពក្រីក្រនៅប្រទេសអាល្លឺម៉ង់ត្រូវបានកំណត់ថាមានប្រាក់ចំណូលក្រោម ៦០% នៃមធ្យមភាគបន្ទាប់ពីទទួលបានអត្ថប្រយោជន៍សង្គម។

គួរបញ្ជាក់ដែរថា ក្នុងពាក់កណ្តាលទសវត្សរ៍រយៈពេល ៣០ ឆ្នាំមកនេះសេដ្ឋកិច្ចពិភពលោកកំពុងស្ថិតនៅលើផ្លូវសម្រាប់កំណើនយឺត ដោយកត់សម្គាល់ថា បណ្តាប្រទេសដែលមានជាងគេបំផុតនៅលើពិភពលោកគឺមានកម្រិតជីវភាពធ្លាក់ចុះ ដោយសារតែអតិផរណាធ្លាក់ចុះនៅក្នុងសេដ្ឋកិច្ចសំខាន់ៗជាច្រើន។ ដូច្នេះការថយចុះកម្រិតជីវភាពដែលបណ្តាលមកពីអតិផរណាគឺ “ទំនងជាមិនវិលត្រលប់មកវិញយ៉ាងឆាប់រហ័សនោះទេ”៕

ប្រទេសឥណ្ឌា ៖ ផ្សែងអ័ព្ទនៅពាសពេញបរិយាកាសក្នុងទីក្រុងញូវដែលី ប្រទេសឥណ្ឌា ពុំបានកើតឡើងដោយសារអាកាសធាតុត្រជាក់ទេ ប៉ុន្តែវាជាធូលីកខ្វ.ក់ដែលប៉ះពាល់សុខភាពយ៉ាងខ្លាំង ។ តាំងពីព្រឹកព្រលឹម ការធ្វើដំណើររបស់ពលរដ្ឋជួបការលំបាកមើលពុំឃើញផ្លូវដោយសារធូលីកខ្វ.ក់ ហើយសន្ទស្សន៍គុណភាពខ្យល់ (AQI) ដែលបានវាស់កាលពីថ្ងៃទី១៥ ខែវិច្ឆិកា ឆ្នាំ២០២៤ គឺស្មើនឹង៤៥៥ ។

សន្ទស្សន៍គុណភាពខ្យល់នៅទីក្រុងញូវដែលី ស្ថិតក្នុងកម្រិតមានគ្រោះថ្នាក់ដល់សុខភាពពលរដ្ឋ ហើយរដ្ឋាភិបាលឥណ្ឌាស្នើឱ្យពលរដ្ឋផ្អាកហាត់ប្រាណក្នុងអំឡុងពេលនេះ ពីព្រោះអាចប្រឈមនឹងផលប៉ះពាល់សុខភាពធ្ងន់ធ្ងរ ឬមានជំងឺផ្លូវដង្ហើម ។

ទីក្រុងញូវដែលី និងតំបន់នៅជុំវិញបានប្រឈមនឹងអាកាសធាតុដ៏អាក្រក់ រហូតដល់ជាប់ចំណាត់ថ្នាក់ទី១ គឺជាទីក្រុងមានមានបរិយាកាសកខ្វក់បំផុតលើពិភពលោក កាលពីថ្ងៃទី១៥ ខែវិច្ឆិកា កន្លងមក ។ មូលហេតុចម្បងធ្វើឱ្យនៅទីនេះប្រឈមនឹងបរិយាកាសកខ្វក់ និងធូលីពុល គឺបណ្តាលមកពីការដុតចំប៉ើងខុសច្បាប់ ។

ក្រុមហ៊ុនឥណ្ឌា Airvoice លើកឡើងថា ការរៀបចំពិធីបុណ្យ Diwali សម្រាប់អ្នកគោរពសាសនាហិណ្ឌូ និងជាពិធីបុណ្យចូលឆ្នាំថ្មីរបស់ឥណ្ឌា កាលពីថ្ងៃទី៣១ ខែតុលា កន្លងមក បានធ្វើឱ្យតំបន់មួយចំនួនមានបរិយាកាសកខ្វក់រហូតដល់៨៧៥% ។ ក្រៅពីនេះ ពលរដ្ឋឥណ្ឌាក៏បានប្រឈមនឹងទឹកខ្វក់ក្នុងទន្លេយ៉ាក់មុណា នៅទីក្រុងញូវដែលី ផងដែរ ។ បច្ចុប្បន្ន ទន្លេនេះគ្របដណ្តប់ទៅដោយពពុះ ពណ៌ស ដោយសារការបង្ហូរទឹកស្អុយចេញពីរោងចក្រឧស្សាហកម្ម ជាពិសេស រោងចក្រតម្បាញនៅរដ្ឋហារ៉ាយាណា និងរដ្ឋអុតតារៈប្រាថេត ។

ភ្នាក់ងារគ្រប់គ្រងទឹកនៅឥណ្ឌាបញ្ជាក់ថា ទឹកស្អុយ និងពពុះក្នុងទន្លេយ៉ាក់មុណា មានប្រភពមកពីរដ្ឋនៅក្បែរ និងគ្មានប្រភពពីទីក្រុងញូវដែលីទេ ហើយពួកគេបានសំណូមពរឱ្យថ្នាក់ដឹកនាំរដ្ឋនីមួយៗមានវិធានការគ្រប់គ្រងការបង្ហូរទឹកស្អុយចូលទន្លេ ។ ពពុះពណ៌ស គ្របដណ្តប់ក្នុងទន្លេនេះ កើតឡើងស្របពេលអ្នកគោរពសាសនាហិណ្ឌូធ្វើពិធីសាសនាក្នុងទន្លេ ដូចជា ៖ ងូតទឹក និងត្រាំទឹក ដែលជាពិធីបុណ្យបូជាព្រះអាទិត្យ ដែលពួកគេពុំអាចចៀសវាង ៕

ទីក្រុង Kaymakli ស្ថិតនៅជម្រៅ ៨៥ ម៉ែត្រក្រោមដី ជាមួយនឹងជាន់ដែលមានមុខងារសំខាន់ៗជាច្រើន អាចផ្ទុកមនុស្សបាន ៣,០០០ នាក់។ ទីក្រុងនេះមានទីតាំងនៅតំបន់ Cappadocia ក្នុងខេត្ត Nevşehir ប្រទេសទួរគី មានអាយុជាង ៣ ពាន់ឆ្នាំហើយ បច្ចុប្បន្នគឺជាកន្លែងទាក់ទាញទេសចរណ៍ដ៏ពេញនិយមមួយ។ នៅតំបន់ Cappadocia មានទីក្រុងក្រោមដីជាច្រើន ប៉ុន្តែមានតែ ១៦ ប៉ុណ្ណោះដែលបើកសម្រាប់ភ្ញៀវទេសចរ។

Kaymakli គឺជាទីក្រុងក្រោមដីដ៏ធំបំផុត និងត្រូវបានថែរក្សាយ៉ាងល្អ ដោយបានបើកជាលើកដំបូងដើម្បីស្វាគមន៍ភ្ញៀវទេសចរនៅឆ្នាំ ១៩៦៤។ Kaymakli មានផ្ទៃដីប្រហែល ២.៥ គីឡូម៉ែត្រការ៉េ ស្ថិតនៅជម្រៅ ៨៥ ម៉ែត្រក្រោមដី ហើយត្រូវបានបញ្ចូលក្នុងបញ្ជីបេតិកភណ្ឌពិភពលោកក្នុងឆ្នាំ ១៩៨៥។ យោងតាមឯកសារបុរាណបានបង្ហាញថា គម្រោងនេះត្រូវបានសាងសង់ឡើងក្នុងសតវត្សទី ៦-៧ មុនគ.សតវត្សបន្ទាប់ គឺជាគម្រោងដែលជីកនៅពីក្រោមថ្ម បង្កើតឡើងដោយការផ្ទុះភ្នំភ្លើង មានសមត្ថភាពផ្ទុកមនុស្សប្រហែល ៣,០០០ នាក់។

ទីក្រុងនេះគឺជាជម្រកប្រឆាំងនឹងការឈ្លានពាន គ្រោះមហន្តរាយធម្មជាតិ និងបម្រុងស្បៀងអាហារ និងទឹក ដោយមាន ៨ ជាន់ ដែលជាន់នីមួយៗត្រូវបានបែងចែកទៅជាតំបន់ដូចជា បសុសត្វ ព្រះវិហារ កន្លែងផ្ទុកអាហារ បន្ទប់ដាក់ស្រា កន្លែងស្តុកទុក និងផ្ទះបាយជាដើម។ ទោះជាយ៉ាងណាបច្ចុប្បន្នភ្ញៀវអាចចូលបានត្រឹមតែ ៤ ជាន់ប៉ុណ្ណោះ ដោយផ្លូវដើរក្នុងទីក្រុងក្រោមដីគឺមានជ្រុងតូចចង្អៀត ខ្យល់ខ្លាំង និងចោត។ នៅផ្នែកជាច្រើន អ្នកទស្សនាត្រូវពត់ខ្លួនទាប ដើម្បីអាចផ្លាស់ទីបាន។ ការរចនាផ្លូវដើរតូចចង្អៀតបែបនេះគឺមានបំណងជួយមនុស្សការពារសត្រូវមិនឱ្យចូលទៅជិត។

ដូច្នោះហើយ នៅពេលដែលខ្មាំងសត្រូវឈ្លានពានទីក្រុង គេអាចទៅបានតែម្នាក់ប៉ុណ្ណោះ ហើយប្រជាជនអាចវាយលុក និងបំផ្លាញសត្រូវបានយ៉ាងងាយ។ ហេតុនេះដើម្បីធានាសុវត្ថិភាព និងចៀសវាងការវង្វេង អ្នកទស្សនាត្រូវបានណែនាំឱ្យដើរតាមទិសព្រួញជានិច្ច។ គួរបញ្ជាក់ដែរថា សម្រាប់តម្លៃចូលទស្សនាទីក្រុងក្រោមដីដែលមានអាយុកាលជាង ៣ ពាន់ឆ្នាំក្នុងប្រទេសទួរគីគឺ ១៣ អឺរ៉ូក្នុងម្នាក់ (ប្រមាណជាង ១៣ ដុល្លារអាមេរិក)៕