ប្រទេសចិន៖ ថ្មីៗនេះយាន Thien Chau 8 ដែលផ្ទុកឥដ្ឋរាប់រយបានបាញ់បង្ហោះទៅកាន់ស្ថានីយអវកាស Thien Cung ដើម្បីសាកល្បងសាងសង់មូលដ្ឋាននៅលើឋានព្រះច័ន្ទជាលើកដំបូង។
ពួកគេមិនត្រឹមសិក្សាស្រាវជ្រាវប៉ុណ្ណោះទេ ឥឡូវនេះក៏បានអនុវត្តជាក់ស្តែងតែម្តង ដោយយកឥដ្ឋមានគុណភាពរាប់រយទៅកាន់ឋានព្រះច័ន្ទ ដើម្បីសាកល្បងសាងសង់មូលដ្ឋាននៅទីនេះ។

ឥដ្ឋនេះមានសមត្ថភាពទប់ទល់នឹងស្ថានភាពដ៏អាក្រក់នៅលើឋានព្រះច័ន្ទ រួមទាំងការប្រែប្រួលសីតុណ្ហភាពធំៗពី -១៩០ អង្សាសេទៅ ១៨០ អង្សាសេ ក៏ដូចជាទប់ទល់នឹងវិទ្យុសកម្មលោហធាតុដ៏ខ្លាំង និងមីក្រូម៉េតេអ័រធ្លាក់ កង្វះបរិយាកាសក្រាស់ដើម្បីការពារអាកាសយានិក។ សាស្ត្រាចារ្យ Zhou Cheng នៅសកលវិទ្យាល័យវិទ្យាសាស្ត្រ និងបច្ចេកវិទ្យា Huazhong និងសហការីរបស់លោក បាននិយាយថា យើងនឹងដំឡើងក្បឿងជាចម្បងនៅក្នុងលំហ បន្ទាប់មកយើងនឹងដាក់វានៅខាងក្រៅស្ថានីយអវកាស ហើយទុកវានៅទីនោះ ដោយឱ្យវាប្រឈមនឹងកត្តាបរិស្ថាន ដើម្បីមើលថាតើគុណភាពឥដ្ឋទៅជាយ៉ាងណា។

គំរូឥដ្ឋត្រូវបានផលិតចេញពីគ្រឿងផ្សំដែលយកពីឋានព្រះច័ន្ទដូចជា basalt និង anorthosite ដែលវាគឺជាវត្ថុធាតុដើមមានច្រើននៅលើព្រះច័ន្ទ។ យោងតាមការសិក្សា ឥដ្ឋមានសមត្ថភាពផ្ទុកលើសពីមួយតោនក្នុងមួយសង់ទីម៉ែត្រការ៉េ ហើយលក្ខណៈពិសេសគួរឱ្យកត់សម្គាល់មួយនៃពួកវាគឺសមត្ថភាពក្នុងការភ្ជាប់របស់ពួកវាដោយមិនចាំបាច់មានសារធាតុស្អិត។ ដូច្នេះហើយ ពួកវាជួយពង្រឹងភាពជាប់ល្អនៃរចនាសម្ព័ន្ធ និងសម្រួលដល់ដំណើរការសាងសង់។

គំនិតផ្តួចផ្តើមនេះគឺជាផ្នែកមួយនៃមហិច្ឆិតារបស់ប្រទេសចិនក្នុងការកសាងស្ថានីយ៍ស្រាវជ្រាវព្រះច័ន្ទអន្តរជាតិ (ILRS) នៅឆ្នាំ ២០៣០។ នេះក៏ជាគម្រោងរួមគ្នាជាមួយប្រទេសរុស្ស៊ី និងមានការចូលរួមពីប្រទេសជាច្រើនទៀត រួមទាំងប្រទេសវេណេហ្ស៊ុយអេឡា ថៃ ប៉ាគីស្ថាន សេណេហ្គាល់ រួមជាមួយនឹងអង្គការបរទេសប្រហែល ៤០ ផងដែរ។ ប្រទេសចិនក៏មានគោលបំណងបញ្ជូនអវកាសយានិកទៅកាន់ឋានព្រះច័ន្ទនៅឆ្នាំ ២០៣០ ដែលជាព្រឹត្តិការណ៍ដ៏សំខាន់មួយនៅក្នុងកិច្ចខិតខំប្រឹងប្រែងរុករកអវកាសរបស់ខ្លួន៕

សហរដ្ឋអាមេរិក ៖ អាមេរិកបានប្រមូលការ៉ុតពីផ្សារទំនើប និងហាងលក់ទំនិញនៅទូទាំងប្រទេស ក្រោយរកឃើញមេរោគ E. coli ឆ្លងរាតត្បាតបណ្តាលឱ្យពលរដ្ឋស្លា.ប់ ម្នាក់ និងពលរដ្ឋជាច្រើននាក់ទៀតត្រូវបញ្ជូនទៅសង្គ្រោះនៅមន្ទីរពេទ្យ ។

តាមទិន្នន័យរបស់មជ្ឈមណ្ឌលគ្រប់គ្រង និងបង្ការជំងឺអាមេរិកបញ្ជាក់ថា រហូតមកដល់ថ្ងៃទី១៨ ខែវិច្ឆិកា ឆ្នាំ២០២៤ មេរោគ E. coli បានឆ្លងពីការ៉ុតបណ្តាលឱ្យមនុស្សស្លាប់ម្នាក់ និងមនុស្ស១៥នាក់ទៀតត្រូវទៅបញ្ជូនទៅមន្ទីរពេទ្យ ។ ក្រៅពីនេះ មានអ្នកឆ្លងជំងឺនេះ៣៩នាក់ ក្នុងរដ្ឋចំនួន១៨ ។

ការ៉ុតដែលអាជ្ញាធរអាមេរិកប្រមូលមកវិញនេះ មានប្រភពពី Grimmway Farms ដែលបានលក់ឱ្យផ្សារទំនើបជាច្រើនកន្លែង ហើយអាជ្ញាធរជឿថា បច្ចុប្បន្ន ការ៉ុតផ្ទុកមេរោគទាំងអស់ត្រូវបានយកចេញពីផ្សារទំនើបអស់ហើយ ប៉ុន្តែអាចនៅសេសសល់ខ្លះក្នុងលំនៅឋានពលរដ្ឋដែលទិញមុនពេលប្រមូល ។ អាជ្ញាធរបានណែនាំឱ្យពលរដ្ឋបោះចោលការ៉ុត ឬយកវាទៅឱ្យផ្សារទំនើបវិញដើម្បីសុំប្រាក់វិញ ។

អ្នកឆ្លងមេរោគ E. coli ភាគច្រើនរស់នៅរដ្ឋញូវយ៉ក, រដ្ឋមិនិសូតា, រដ្ឋវ៉ាស៊ីនតោន, រដ្ឋកាលីហ្វ័រញ៉ា និងរដ្ឋអូរ៉េហ្គន ។ មជ្ឈមណ្ឌលគ្រប់គ្រង និងបង្ការជំងឺអាមេរិកឱ្យដឹងថា ការ៉ុតប្រមូលមកវិញគ្មានស្លាកបិទបញ្ជាក់ច្បាស់លាស់ទេ ដែលគេបានដាក់លក់ចាប់ពីថ្ងៃទី១៤ ខែសីហា ដល់ថ្ងៃទី២៣ ខែតុលា កន្លងមក ។ រីឯការ៉ុតតូចៗមានបិទស្លាកថា គួរតែបរិភោគចាប់ពីថ្ងៃទី១១ ខែកញ្ញា ដល់ថ្ងៃទី១២ ខែវិច្ឆិកា ។

ការឆ្លងមេរោគ E. coli នឹងមានរោគសញ្ញាជាច្រើន ដូចជា ៖ ចុកពោះខ្លាំង, រាគរូស និងក្អួតចង្អោរ ហើយរោគសញ្ញាទាំងនេះនឹងកើតឡើងក្រោយបរិភោគការ៉ុត ចាប់ពី៣ថ្ងៃ ទៅ៤ថ្ងៃ ។ អ្នកឆ្លងមេរោគនេះភាគច្រើនអាចជាសះស្បើយដោយខ្លួនឯង ប៉ុន្តែអ្នកខ្លះទៀតមានបញ្ហាតម្រងនោមធ្ងន់ធ្ងរ និងព្យាបាលនៅមន្ទីរពេទ្យ ។

កន្លងមក ពលរដ្ឋអាមេរិកចំនួន១០៤នាក់ ទើបតែឆ្លងមេរោគនេះពីខ្ទឹមបារាំងក្នុងហាង McDonald’s ហើយអ្នកឆ្លងម្នាក់ក្នុងចំណោមនេះ បានស្លាប់កាលពីខែតុលា ឆ្នាំ២០២៤ ។ រីឯអ្នកឆ្លង៣៤នាក់ផ្សេងទៀតត្រូវបានបញ្ជូនទៅកាន់មន្ទីរពេទ្យ ៕

សមុទ្រមេឌីទែរ៉ានេ គឺជាផ្នែកមួយនៃ “មហាសមុទ្រអាត្លង់ទិក” ដែលខាងជើងជាប់នឹងទ្វីបអឺរ៉ុប ខាងត្បូងជាប់នឹងទ្វីបអាហ្វ្រិក និងខាងកើតជាប់នឹងទ្វីបអាស៊ី។ សមុទ្រនេះត្រូវបានអ្នកវិទ្យាសាស្ត្រព្យាករណ៍ថា អាចនឹងរលាយបាត់ពីផែនដីនាពេលអនាគតដោយសារមូលហេតុធំៗទាំងនេះ។

ជាការពិតណាស់ ទ្វីបនានានៅលើផែនដីបច្ចុប្បន្នបានកំពុងស្ថិតនៅក្នុងស្ថានភាពនៃការផ្លាស់ប្តូរឥតឈប់ឈរ ដោយសារការប្រែប្រួលអាកាសធាតុ ហើយសំបកផែនដីត្រូវបានបែងចែកទៅជាបន្ទះ tectonic ដែលនាំទៅដល់ការរៀបចំឡើងវិញបន្តិចម្តងៗនៃទ្វីប និងការបង្កើតលក្ខណៈភូគព្ភសាស្ត្រចម្រុះនៅលើផែនដី។

ប្លង់ទ្វីបបច្ចុប្បន្នដូចជា អាហ្រ្វិក អឺរ៉ុប អាស៊ី និងទ្វីបអាមេរិក… គ្រាន់តែជាបណ្ដោះអាសន្នប៉ុណ្ណោះ។ ការកំណត់រចនាសម្ព័ន្ធទ្វីបបានផ្លាស់ប្តូរយ៉ាងខ្លាំងកាលពីអតីតកាល ហើយនឹងបន្តវិវឌ្ឍទៅថ្ងៃអនាគត អាស្រ័យលើចលនានៃចាន tectonic នេះបើយោងតាមការចុះផ្សាយរបស់សារព័ត៌មានបរទេស IFL Science ទ្វីបនៅលើពិភពលោករបស់យើងទំនងនឹងរួមបញ្ជូលគ្នានាពេលអនាគត ឬក៏អាចមានទ្វីបថ្មីបន្ថែមទៀត។

ដូច្នេះសមុទ្រមេឌីទែរ៉ាណេអាចនឹងត្រូវរងការគំរាមកំហែងខ្លាំងជាងគេដោយសារបន្ទះ tectonic ដ៏ធំពីររបស់ផែនដីបានបុកគ្នា បណ្តាលឱ្យមានការប្រែប្រួលនៃកម្រិតទឹកសមុទ្រ រារាំងមហាសមុទ្រអាត្លង់ទិកពីការហូរចូលទៅក្នុងសមុទ្រមេឌីទែរ៉ាណេតាមរយៈច្រកសមុទ្រ Gibraltar ដែលរំខានដល់ការផ្គត់ផ្គង់ទឹកសំខាន់ៗ។ https://blogger.googleusercontent.com/img/b/R29vZ2xl/AVvXsEgL-PxiWNytxVhf-UdAzNRlsvxyjwggXD8U-CJf0t_xtJKc0JU4Cw-Vk0KOjQidArnHB3g6mMb0bVSdXsZYLdLtoPHMuMLhrOnXz4HYqnVrHZP7JtcDc_UnWEkoNqEH07mwz5IqfO7UnQjyBP7G_S-VU_joC5gcjB8WsTP-WHZWpogxCOk4JuCloH0D4xjH/s1080/image_2024-11-19_10-23-18.png

តំបន់មេឌីទែរ៉ាណេ ងាយនឹងផ្លាស់ប្តូរ ដោយសារវាជាតំបន់ក្តៅ និងស្ងួតជាងគេ ដូច្នេះទឹកសមុទ្រហួតយ៉ាងលឿន ធ្វើឱ្យវាងាយនឹងរលាយបាត់ពីផែនដីនាពេលអនាគត។ ទោះជាយ៉ាងណា នេះគ្រាន់តែជាការទស្សន៍ទាយមួយដែលអាចធ្វើទៅបាននៃរបៀបដែលបន្ទះ tectonic របស់ផែនដីផ្លាស់ទីប៉ុណ្ណោះ ប៉ុន្តែយើងមិនដឹងថាពេលណាបន្ទះ tectonic របស់ផែនដីផ្លាស់ទីនោះទេ ប៉ុន្តែតាមការសិក្សាវានឹងត្រូវផ្លាស់ទីនាពេលអនាគត ហើយនៅពេលវាផ្លាស់ទី សមុទ្រមេឌីទែរ៉ាណេនឹងរលាយមុនគេ។

ជាការពិតណាស់ ការទស្សន៍ទាយការកំណត់រចនាសម្ព័ន្ធនៃមហាទ្វីបនាពេលអនាគតគឺពិបាកដោយសារតែធម្មជាតិដ៏ស្មុគស្មាញ និងថាមវន្តនៃប្លាកែត ក៏ដូចជាពេលវេលាដែលពាក់ព័ន្ធ។ ទោះជាយ៉ាងណាក៏ដោយ ទិន្នន័យប្រវត្តិសាស្ត្របានបង្ហាញថា សមុទ្រមេឌីទែរ៉ាណេស្ថិតក្នុងស្ថានភាពមិនស្ថិតស្ថេរតាំងពីយូរលង់ណាស់មកហើយ។ ប្រហែល ៥.៩៧ លានឆ្នាំមុន ព្រឹត្តិការណ៍មួយហៅថាវិបត្តិអំបិល Messinian បានកើតឡើងដែលប្រែក្លាយសមុទ្រមេឌីទែរ៉ាណេទៅជាអាងអំបិលដ៏ធំសម្បើមមួយអស់រយៈពេលកន្លះលានឆ្នាំ។ ដូច្នេះប្រសិនផែនដីប្រែប្រួល សមុទ្រមេឌីទែរ៉ាណេទំនងនឹងត្រូវបានគេលុបចោលពីផែនទីពិភពលោកនាពេលអនាគត៕

សហរដ្ឋអាមេរិក៖ កាលពីថ្ងៃទី១៥ ខែវិច្ឆិកា ក្រុមហ៊ុន Tesla បានដាក់លក់គំរូមនុស្សយន្តជំនាន់ថ្មីរបស់ Optimus ដែលមានឈ្មោះថា Tesla Bot Action Figure ហើយបានលក់អស់យ៉ាងឆាប់រហ័សក្នុងរយៈពេលតិចជាង ២៤ ម៉ោង។

Tesla Bot Action Figure គឺជាជំនួយការខ្នាតតូចដោយស្វ័យប្រវត្តិ និងជាមិត្តគួរឱ្យទុកចិត្តបំផុតរបស់មនុស្ស។ យោងតាមការពិពណ៌នាពីហាងអនឡាញ មនុស្សយន្តនេះមានតម្លៃត្រឹមតែ ៤០ ដុល្លារប៉ុណ្ណោះ ដោយភ្ជាប់មកជាមួយកន្លែងសាកថ្មខ្នាតតូច និងញញួរ Cyberhammer។

វាមានកំពស់ ១៨.២ សង់ទីម៉ែត្រ ទទឹង ៥.៥ សង់ទីម៉ែត្រ និងទម្ងន់ប្រហែល ៤៨ ក្រាម ត្រូវបានលក់អស់ក្នុងរយៈពេលតិចជាង ២៤ ម៉ោងចាប់តាំងពីវាត្រូវបានដាក់លក់នៅថ្ងៃទី ១៥ ខែវិច្ឆិកា។ នៅលើបណ្តាញសង្គម មនុស្សមួយចំនួនបានអួតថាពួកគេបានបញ្ជាទិញដោយជោគជ័យ ខណៈពេលដែលអ្នកផ្សេងទៀតបាននិយាយថាពួកគេបានទទួលការជូនដំណឹងថាផលិតផលអស់ស្តុក ហើយត្រូវរង់ចាំអ៊ីមែលពីក្រុមហ៊ុន Tesla នៅពេលដែលផលិតផលមានលក់ម្តងទៀត។

ក្រៅពីម៉ូដែលជំនាន់ថ្មីនេះ នៅលើគេហទំព័រ Tesla ក៏មានម៉ូដែលខ្នាតតូចមួយចំនួនទៀតផងដែរដូចជា Cybertruck, Model Y, និង Model 3។ គួរបញ្ជាក់ដែរថា Tesla បានបង្ហាញមនុស្សយន្ត Optimus នៅឆ្នាំ ២០២១ បន្ទាប់មកបានចេញនូវគំរូដំបូងនៅឆ្នាំ ២០២២ ជាមួយកម្ពស់ ១៧៣ សង់ទីម៉ែត្រ ទម្ងន់ ៥៧ គីឡូក្រាម បំពាក់ដោយអេក្រង់នៅលើផ្ទៃមុខដើម្បីបង្ហាញព័ត៌មាន។

ក្នុងរយៈពេលពីរឆ្នាំកន្លងមកនេះ Elon Musk បានចាប់ផ្តើមបង្កើតគំរូមនុស្សយន្តថ្មីៗជាបន្តបន្ទាប់ ហើយសម្រេចបាននូវសមិទ្ធិផលមួយចំនួន ដូចជាសមត្ថភាពក្នុងការបត់សំលៀកបំពាក់ ហាត់យូហ្គា ឬផ្លាស់ទីដោយឯករាជ្យជាដើម៕

ប្រទេសចិន៖ មិនថ្មី មិនប្លែក មិនមែនចិន ម្ហូបមួយមុខដែលផលិតពីសារ៉ាយសមុទ្រមានរូបរាងដូចសក់មនុស្ស បានកំពុងក្លាយជាអាហារតាមចិញ្ចើមផ្លូវដ៏ពេញនិយមបំផុតនៅក្នុងប្រទេសចិន។
ម្ហូបនេះមានឈ្មោះថា Fa Cai ឬសារ៉ាយសក់ទេពអប្សរ គឺជាប្រភេទស្មៅសក់ដែលប្រជាជនចិននិយមប្រើប្រាស់ជាបន្លែ។ បច្ចុប្បន្ននៅតាមដងផ្លូវនៃទីក្រុង Chengdu ខេត្ត Sichuan មុខម្ហូបដែលមើលមួយភ្លេតស្រដៀងសក់មនុស្សគឺមានប្រជាប្រិយភាពខ្លាំងណាស់។

នេះជាមុខម្ហូបសំណាងដ៏ពេញនិយមនៅថ្ងៃចូលឆ្នាំសកល ព្រោះនៅក្នុងភាសាចិនកាតាំង ការបញ្ចេញសំឡេងរបស់វាស្រដៀងទៅនឹងឃ្លាថា “សម្បូរបែប”។ ម្ហូបដែលប្រើនៅថ្ងៃចូលឆ្នាំសកល ឥឡូវនេះគឺជាអាហារសម្រន់តាមដងផ្លូវដ៏ពេញនិយមនៅក្នុងប្រទេសចិន។ Fa Cai ដែលមើលទៅដូចជាសក់មនុស្ស ហាក់ដូចជាកំពុងញ៉ាំសក់បានទាក់ទាញចំណាប់អារម្មណ៍របស់អ្នកញ៉ាំអាហារចិនយ៉ាងឆាប់រហ័ស។

Fa Cai ច្រើនតែដុះនៅតំបន់វាលខ្សាច់ស្ងួតដូចជា Gansu, Shaanxi, Qinghai, Xinjiang និង Inner Mongolia។ ក្រោយពីច្រូតរួច មនុស្សនឹងសម្ងួតវាមុននឹងកែច្នៃ ដោយសារតែរូបរាងសរសៃតូចងងឹត ពេលហាលស្ងួត Fa Cai គឺមានរូបរាងដូចសក់មនុស្សពិតៗ។ ជាធម្មតាមនុស្សចម្អិនសារ៉ាយសមុទ្រជាមួយទំពាំងបាយជូរហើយញ៉ាំវាដូចជាស៊ុប។ បន្ថែមពីលើការចៀន មេចុងភៅតាមចិញ្ចើមផ្លូវក៏ដុតសារ៉ាយសមុទ្រនៅលើធ្យូង និងប្រោះម្សៅម្ទេសមួយស្រទាប់មុនពេលបម្រើដល់ភ្ញៀវ។

សារ៉ាយសមុទ្រ Fa Cai ឬហៅថា “សក់ទេពអប្សរ ” ដុតជាមួយអំបិលម្ទេស ឬចៀន គឺជាមុខម្ហូបថ្មីដែលទើបតែលេចឡើងក្នុងបញ្ជីអាហារតាមចិញ្ចើមផ្លូវប្រទេសចិន។ ពីមុនប្រទេសនេះបានទាក់ទាញចំណាប់អារម្មណ៍ភ្ញៀវទេសចរក្នុងស្រុក និងបរទេសជាមួយនឹងមុខម្ហូបមួយមុខដូចជា ថ្មដុតជាមួយអំបិល និងម្ទេស កាហ្វេស្លឹកខ្ទឹម ហើយឥឡូវនេះក៏បង្កើតម៉ឺនុយសក់ចៀនវិញម្តង ដែលការបង្កើតម៉ឺនុយថ្មីៗរហូតបែបនេះគឺដើម្បីទាក់ទាញការចាប់អារម្មណ៍ពីភ្ញៀវទេសចរ៕

កាលពីថ្ងៃទី១៤ ខែវិច្ឆិកា ឆ្នាំ២០២៤ ក្រុមហ៊ុន Unbabel បានបង្ហាកម្មវិធីថ្មីសម្រាប់បកប្រែភាសាឈ្មោះ Widn.AI ដែលប្រើប្រាស់បច្ចេកវិទ្យា AI ដើម្បីប្រកួតប្រជែងជាមួយកម្មវិធីផ្សេងៗ ។ នាយកក្រុមហ៊ុននេះលើកឡើងថា រយៈពេល៣ឆ្នាំទៀត បច្ចេកវិទ្យា AI នឹងអាចបកប្រែបានច្រើនភាសា ហើយពុំចាំបាច់ពឹងផ្អែកលើអ្នកបកប្រែជាមនុស្សទៀតទេ ។

កម្មវិធី Widn.AI ត្រូវបានបង្កើតឡើងនៅលើគំរូភាសាដ៏ធំមួយដែលក្រុមហ៊ុនបង្កើតខ្លួនឯងឈ្មោះ Tower និងប្រើប្រាស់បច្ចេកវិទ្យា AI ស្រដៀងគ្នាជាមួយកម្មវិធី ChatGPT របស់ OpenAI ។

នាយកក្រុមហ៊ុន Unbabel លោក Vasco Pedro បានផ្តល់សម្ភាសន៍មកកាន់សារព័ត៌មាន CNBC ថា ការបង្កើតគំរូភាសាដ៏ធំរបស់ក្រុមហ៊ុន នឹងធ្វើឱ្យបច្ចេកវិទ្យា AI អាចបកប្រែបាន រហូតដល់៣២ភាសា ។ ពេលយើងចាប់ផ្តើមបង្កើតក្រុមហ៊ុន Unbabel កាលពី១០ឆ្នាំមុន AI ពុំទាន់រីកចម្រើនដូចបច្ចុប្បន្នទេ ទើបយើងស្វែងរកដំណោះស្រាយ គឺការរួមបញ្ចូលគ្នារវាងមនុស្ស និង AI ។ យើងជឿថា AI នឹងអាចបកប្រែភាសាគ្រប់ជ្រុងជ្រោយ ដោយពុំចាំបាច់ពឹងផ្អែកមនុស្ស ។

កន្លងមក ក្រុមហ៊ុន Unbabel ធ្លាប់ប្រើប្រាស់ប្រព័ន្ធ Machine Learning ដើម្បីបកប្រែភាសា បន្ទាប់មក ត្រូវឆ្លងកាត់ការត្រួតពិនិត្យពីមនុស្សនៅដំណាក់កាលចុងក្រោយ ។ ប៉ុន្តែកម្មវិធីបកប្រែភាសាឈ្មោះ Widn.AI ពុំត្រូវការមនុស្សជួយបកប្រែទៀតទេ ។

លោក Vasco បន្តថា ៖ «ខ្ញុំគិតថា មនុស្សមានប្រៀបជាង AI បន្តិច ក្នុងការបកប្រែភាសាដែលសរសេរមានលក្ខណៈស្មុគស្មាញ ឬលំបាក ។ ប៉ុន្តែ AI នឹងអាចបំពេញការងារជំនួសមនុស្សយ៉ាងពិតប្រាកដ ហើយរយៈពេល៣ឆ្នាំទៀត យើងនឹងពុំត្រូវការមនុស្សបកប្រែភាសាទៀតឡើយ» ។

បច្ចេកវិទ្យា AI ដណ្តើមការងាររបស់មនុស្សត្រូវបានលើកមកជជែកគ្នាយូរមកហើយ ចាប់តាំងពីការបកប្រែភាសាតាមកម្មវិធី Google Translate គឺកម្មវិធីនេះបានបកប្រែត្រឹមត្រូវខ្លះ និងខុសខ្លះ ។ ក្រោយមក ក៏មានការបង្កើតកម្មវិធីបកប្រែថ្មីៗជាបន្តបន្ទាប់ និងបកប្រែភាសាបានត្រឹមត្រូវជាងមុនច្រើន ។

ទោះយ៉ាងណា ការបកប្រែប្រកបដោយវិជ្ជាជីវៈ ឬការបកប្រែឯកសារសំខាន់ៗ ដូចជា ៖ ឯកសារកិច្ចសន្យាអាជីវកម្ម និងឯកសារផ្នែកពេទ្យ គឺពុំអាចបណ្តោយឱ្យបច្ចេកវិទ្យា AI បកប្រែភាសាតែឯងបានទេ ពីព្រោះឯកសារទាំងនេះតម្រូវឱ្យមនុស្សបកប្រែយ៉ាងត្រឹមត្រូវ ដើម្បីកុំឱ្យមានផលប៉ះពាល់នាពេលក្រោយ ។

ចំណែកអ្នកប្រកបអាជីពបកប្រែភាសាអាចស្វែងរកជំនួយពីបច្ចេកវិទ្យា AI ក្នុងការបកប្រែដើម្បីឱ្យការងារឆាប់រហ័ស និងប្រើពេលវេលានៅសេសសល់អភិវឌ្ឍន៍ជំនាញបន្ថែមទៀត ។ ហេតុនេះ យើងនឹងប្រាកដចិត្តថា AI នឹងអាចបកប្រែភាសាបានត្រឹមត្រូវ និងរីកចម្រើនខ្លាំងកម្រិតណា ៕