ទីបំផុតបទ «កំលោះស្រុកខ្មែរ» ពីតារាចម្រៀងរ៉េប វណ្ណដា និង វណ្ណថាន ទទួលបានសមិទ្ធផលដ៏ជោគជ័យមានការស្តាប់លើសពី១០០លានដង បន្ទាប់ពីចាយពេល១ឆ្នាំ៧ខែនិងជាង១០ថ្ងៃ។ នេះជាប្រវត្តិសាស្រ្តលើកដំបូងសម្រាប់ វណ្ណថាន មានបទចម្រៀង១០០M ខណៈជាលើកទី២ សម្រាប់ វណ្ណដា បន្ទាប់ពីបទ «Time To Rise» ។
កាលពីល្ងាចថ្ងៃទី១៧ វិច្ឆិកា តារាចម្រៀង វណ្ណថាន បានបង្ហាញពីការអបអរនៃបទ«កំលោះស្រុកខ្មែរ» ដែលសហការជាមួយ វណ្ណដា មានការស្តាប់១០០លានដងនៅលើយូធូប ខណៈ វណ្ណដា ក៏បានបង្ហាញពីការអបអររបស់ខ្លួននៃភាពជោគជ័យក្នុងបទចម្រៀងនេះដូចគ្នា។ «កំលោះស្រុកខ្មែរ» បានទម្លាក់កាលពីថ្ងៃទី៧ ខែមេសា ឆ្នាំ២០២៣ ក្នុងឱកាសអបអរសាទេបុណ្យចូលឆ្នាំថ្មីប្រពៃណីជាតិខ្មែរ ហើយបានក្លាយជាបទដ៏ជោគជ័យបំផុតរបស់អ្នកទាំងពីរបន្ទាប់ពីចាយពេល១ឆ្នាំ៧ខែនិងជាង១០ថ្ងៃ។
នេះជាលើកដំបូងក្នុងអាជីពរបស់ខ្លួនសម្រាប់តារាចម្រៀង វណ្ណថាន ដែលមានបទចម្រៀងផ្ទុះខ្លាំងមានការស្តាប់រហូតទៅដល់១០០លានដងដែលជាប្រវត្តិសាស្រ្តលើកដំបូងរបស់លោក។ ចំណែកឯតារាចម្រៀងរ៉េប វណ្ណដា វិញគឺបានសាងកំណត់ត្រាលើកទី២ហើយសម្រាប់តារាចម្រៀងមានដើមកំណើតនៅខេត្តព្រះសីហនុរូបនេះបន្ទាប់ពីបទ «Time To Rise» ដែលមានវត្តមានលោកតា គង់ ណៃ ចូលរួម។
អំឡុងពេលប្រគំតន្រ្តីនៅខេត្តសៀមរាបកាលពីដើមខែវិច្ឆិកា នេះ វណ្ណថាន បានបង្ហើបដែរថានឹងមានកាដូពិសេសជូនហ្វេនៗពីអ្នកទាំងពីរបន្ទាប់ពីបទ កំលោះស្រុកខ្មែរ ទទួលបាន ១០០ M ។ 
គួរបញ្ជាក់ផងដែរថា វណ្ណដា , វណ្ណថាន គឺជាដៃគូដ៏ល្អដែលបានចេញស្នាដៃរួមគ្នាបំរើអារម្មណ៍ទស្សនិកជនជាមួយនឹងបទពីរោះៗ ហើយអ្នកទាំងពីរបានចេញទៅសម្តែងនៅក្រៅប្រទេសជាមួយគ្នាជាច្រើនលើកផងដែរ៕
