្រទេសថៃ ៖ កាលពីពេលថ្មីៗនេះ សារព័ត៌មានថៃរាយការណ៍ថា បណ្តាខេត្តនៅភាគខាងជើងប្រទេសថៃ ដូចជា ៖ ខេត្តឈៀងម៉ៃ និងខេត្តឈៀងរ៉ៃ នៅតែរ.ងគ្រោះដោយសារទឹកជំនន់ ដែលបណ្តាលមកភ្លៀងធ្លាក់ខ្លាំងជាច្រើនថ្ងៃ ។ ទឹកជំនន់បានបំផ្លា.ញ ទ្រព្យសម្បត្តិពលរដ្ឋអស់យ៉ាងច្រើន ហើយសូម្បីតែរថយន្តតូច-ធំ ក៏អណ្តែតតាមទឹកជំនន់បាត់អស់ដែរ ។

ទឹកទន្លេពីងបានកើនឡើងខ្ពស់បណ្តាលឱ្យជន់លិចតំបន់ជាច្រើនរបស់ខេត្តឈៀងម៉ៃ ហើយអ្វីដែលធ្វើឱ្យពលរដ្ឋខេត្តឈៀងម៉ៃកាន់តែបារម្ភខ្លាំងនោះ គឺកម្រិតទឹកទន្លេពីងនឹងកើនឡើងថែមទៀត ដោយសារភ្លៀងធ្លាក់ខ្លាំងជាច្រើនថ្ងៃ ។ លើសពីនេះ ទឹកជំនន់បណ្តាលឱ្យប៉ះពាល់ដល់ការរៀនសូត្ររបស់សិស្សសាលាផងដែរ ដោយសារសាលារៀនបិទទ្វារជាបន្តបន្ទាប់ ។

មុនដំបូង ទឹកជំនន់ចាប់ផ្តើមលិចនៅតំបន់ប៉ាកប្រាវណក ដែលជាតំបន់ទំនាប បន្ទាប់មក ទឹកជំនន់ក៏លិចតំបន់ជាច្រើនទៀតនៅខេត្តឈៀងម៉ៃ ដូចជា ៖ តំបន់ប៉ាឌេត និងតំបន់សាន់តាខុយ ព្រមទាំងលិចផ្លូវចារឺនប្រាថេត ដោយកម្រិតទឹកបានកើនឡើង ចាប់ពី២សង់ទីម៉ែត្រ ទៅ៣សង់ទីម៉ែត្រក្នុង១ម៉ោង ។

សាលារៀន និងទីកន្លែងផ្សេងៗបានបិទទ្វារបណ្តោះអាសន្ន និងរង់ចាំឱ្យស្ថានការណ៍ទឹកជំនន់ធូរស្រាលវិញ ។ រីឯនៅភូមិហួយប៉ាកសាង ឃុំគីឆាង ស្រុកមេទែង ក៏គួរឱ្យបារម្ភដែរ ដោយសារទឹកជំនន់មានកម្ពស់ស្មើជាង៤ម៉ែត្រ គឺជិតដល់កម្រិតប្រកាសអាសន្ន ស្មើនឹង៥ម៉ែត្រ ។

សារព័ត៌មានថៃរាយការណ៍ថា កម្រិតទឹកជំនន់កើនឡើងជាបន្តបន្ទាប់ក្នុងតំបន់នានា ខណៈទឹកទន្លេពីងបានហូរតាមលូរបង្ហូរទឹក និងលិចផ្លូវឆាងក្លាន ដែលជាតំបន់សេដ្ឋកិច្ចដ៏សំខាន់របស់ខេត្តឈៀងម៉ៃ ។ ហាងលក់ដូរផ្សេងៗបានយកការ៉ុងខ្សាច់មកដាក់នៅមុខហាងការពារកុំឱ្យទឹកហូរចូល ប៉ុន្តែដោយសាររថយន្តបើកបរតាមផ្លូវធ្វើឱ្យទឹកហូរចូលផ្នែកខាងក្នុង ។

អាជ្ញាធររាយការណ៍ថា កម្រិតទឹកជំនន់នៅតំបន់ឈៀងដាវបានកើនឡើងជាបន្តបន្ទាប់ ហើយវានឹងហូរមកទីរួមខេត្តឈៀងម៉ៃ ដោយសារតំបន់នេះមានភ្លៀងធ្លាក់ខ្លាំង ។ ហេតុនេះ ទឹកជំនន់នឹងមិនស្រកក្នុងរយៈពេលខ្លីទេ ។

នៅថ្ងៃទី២៤ ខែកញ្ញា ឆ្នាំ២០២៤ ក្រុមការងារសារព័ត៌មានថៃបានរាយការណ៍ពីបរិវេណផ្លូវឆាងក្លានថា រថយន្តតូចៗពុំអាចបើកបរតាមផ្លូវនេះបានទេ ហើយពលរដ្ឋនិយាយថា ទឹកជំនន់ឆ្នាំនេះធ្វើឱ្យពួកគេលំបាកយ៉ាងខ្លាំង ដូចជា ៖ ខូចខាតទ្រព្យសម្បត្តិ និងមានទឹកកខ្វក់ហូរចូលផ្ទះ ។ រីឯនៅផ្លូវចារឺនប្រាថេត ក៏មានទឹកលិចជ្រៅដែរ ខណៈតំបន់ប៉ាកប្រាវណក និងប៉ាកប្រាវណៃ ក្នុងស្រុកមឿងឈៀងម៉ៃ មានទឹកជំនន់លិចខ្លាំងដូចគ្នា ប៉ុន្តែពលរដ្ឋបានដឹកជញ្ជូនសម្ភារៈចេញមុនទឹកលិច ។

ដោយឡែក នៅខេត្តឈៀងរ៉ៃ សារព័ត៌មានថៃរាយការណ៍ថា ទឹកហូរលាយឡំជាមួយមែកឈើ និងភក់មកពីតំបន់ព្រៃភ្នំបណ្តាលឱ្យលិចផ្ទះសម្បែងពលរដ្ឋ និងខូចខាតទ្រព្យសម្បត្តិយ៉ាងច្រើន ដោយសារតែភ្លៀងធ្លាក់ខ្លាំងជាប់ៗគ្នា ។

កាលពីថ្ងៃទី២៤ ខែកញ្ញា ឆ្នាំ២០២៤ មានទឹកជំនន់យ៉ាងខ្លាំងហូរពីតំបន់ព្រៃភ្នំឆ្លងកាត់ភូមិបានហ៊ីនឡាតណៃ ឃុំបានប៉ូង ស្រុកវៀងប៉ាប៉ៅ ខេត្តឈៀងរ៉ៃ ដែលបណ្តាលឱ្យផ្ទះពលរដ្ឋនៅសងខាងផ្លូវ និងរថយន្តតូច-ធំអណ្តែតតាមទឹកអស់ជាច្រើនគ្រឿង ។ រីឯតំបន់នៅឆ្ងាយៗក៏មានទឹកជំនន់ហូរពីតំបន់ព្រៃភ្នំផងដែរ ខណៈពលរដ្ឋដឹកជញ្ជូនសម្ភារៈចេញពីផ្ទះពុំទាន់អស់ ។

អាជ្ញាធរខេត្តឈៀងរ៉ៃបានជូនដំណឹងឱ្យពលរដ្ឋរស់នៅតំបន់ជិតព្រៃភ្នំបង្កើនប្រុងប្រយ័ត្ន និងតាមដានស្ថានការណ៍ទឹកជំនន់ឱ្យបានដិតដល់ ដោយសារមានភ្លៀងធ្លាក់ខ្លាំងមិនឈប់ឈរ ៕

ប្រទេសបារាំង ៖ អ្នកដំណើរមួយចំនួនពុំសូវបរិភោគអាហារលើយន្តហោះទេ ដែលអាចបណ្តាលមកពីរសជាតិ, ពុំចូលចិត្ត និងពុំធ្លាប់បរិភោគ ទើបធ្វើឱ្យក្រុមហ៊ុនអាកាសចរណ៍ជាច្រើន រួមទាំងក្រុមហ៊ុន Air France របស់ប្រទេសបារាំង ប្រកាសឈប់ផ្តល់អាហារជូនអ្នកដំណើរលើយន្តហោះ ។ ប៉ុន្តែពួកគេនឹងផ្តល់អាហារសម្រាប់តែអ្នកដំណើរណាដែលកុម្ម៉ង់ប៉ុណ្ណោះ ។

មូលហេតុធ្វើឱ្យក្រុមហ៊ុនអាកាសចរណ៍ Air France ឈប់ផ្តល់អាហារជូនអ្នកដំណើរលើយន្តហោះ គឺអាចបណ្តាលមកពីកាលពីឆ្នាំ២០២៣ សមាគមដឹកជញ្ជូនផ្លូវអាកាសអន្តរជាតិ (International Air Transport Association) រកឃើញថា អាហារសម្រាប់អ្នកដំណើរលើយន្តហោះបានបង្កើតសំរាម រហូតដល់១លាន១សែន៤ម៉ឺនតោនជារៀងរាល់ឆ្នាំ ។ ប៉ុន្តែមូលហេតុចម្បង គឺមកពីការកាត់បន្ថយចំណាយក្នុងការហោះហើរ និងប្រកួតប្រជែងជាមួយក្រុមហ៊ុនអាកាសចរណ៍លក់សំបុត្រយន្តហោះតម្លៃទាប ។

នៅចុងឆ្នាំ២០២៥ ក្រុមហ៊ុនអាកាសចរណ៍ Air France នឹងសាកល្បងប្រើប្រាស់ប្រព័ន្ធទិញអាហារលើយន្តហោះសម្រាប់ការធ្វើដំណើររយៈពេលខ្លី (គឺតិចជាង៣ម៉ោង) និងរយៈពេលមធ្យម (ចាប់ពី២ម៉ោង ទៅ៦ម៉ោង) ជំនួសឱ្យការចែកសានវិច និងនំប៉័ង ដោយអ្នកដំណើរត្រូវកុម្ម៉ង់អាហារជាមុន ។ ប៉ុន្តែក្រុមហ៊ុនអាកាសចរណ៍នេះនៅតែផ្តល់ទឹកបរិសុទ្ធ, ទឹកតែ, កាហ្វេ និងភេសជ្ជៈផ្សេងៗដល់អ្នកដំណើរ ។

ចំណែកអ្នកដំណើរទិញសំបុត្រយន្តហោះប្រភេទ Business Class នឹងគ្មានការផ្លាស់ប្តូរទេ គឺក្រុមហ៊ុនអាកាសចរណ៍ Air France នឹងផ្តល់អាហារដូចមុន ព្រមទាំងភេសជ្ជៈផ្សេងៗ ។ ក្រុមហ៊ុននឹងសាកល្បងនៅខែមករា ឆ្នាំ២០២៥ ជាមួយយន្តហោះធ្វើដំណើរពីទីក្រុងប៉ារីស ទៅទីក្រុងហេលស៊ិនគិ ប្រទេសហ្វាំងឡង់ ព្រមទាំងពីទីក្រុងប៉ារីស ទៅទីក្រុងលីសប៊ន ប្រទេសព័រទុយហ្គាល់ ។

កន្លងមក ក្រុមហ៊ុនអាកាសចរណ៍នានាដែលផ្តល់ការហោះហើរតម្លៃថោកក៏បានអនុវត្តវិធានការនេះដែរ ប៉ុន្តែវាជាលើកដំបូងសម្រាប់ក្រុមហ៊ុន Air France ប្រកាសឈប់ផ្តល់អាហារជូនអ្នកដំណើរទិញសំបុត្រតម្លៃថោក ។ ហេតុនេះ ទើបមានសំណួរថា ការឈប់ផ្តល់អាហារលើយន្តហោះ តើក្រុមហ៊ុននេះនឹងបញ្ចុះតម្លៃសំបុត្រយន្តហោះដែរឬទេ? ឬគ្រាន់តែជាវិធីសាស្ត្ររកចំណូលមួយទៀត ។

រីឯការលើកឡើងថា ក្រុមហ៊ុន Air France ចង់កាត់បន្ថយកាកសំណល់អាហារលើយន្តហោះនោះ គឺកន្លងមក ក្រុមហ៊ុនធ្លាប់បានផ្លាស់ប្តូរពីស្លាបព្រា, សម និងកែវផ្លាស្ទិក ទៅជាវត្ថុឆាប់រលាយសម្រាប់អ្នកដំណើរប្រើប្រាស់លើយន្តហោះ ៕

ប្រទេសថៃ ៖ សារព័ត៌មានថៃរាយការណ៍ថា ពលរដ្ឋថៃសប្បាយចិត្តយ៉ាងខ្លាំងក្រោយពីពួកគេទទួលបានប្រាក់ម្នាក់១ម៉ឺនបាតពីរដ្ឋាភិបាលថ្មី និងជូនពរឱ្យលោកស្រី ផេថងថាន ស៊ីណាវ៉ាត់ កាន់តំណែងជានាយករដ្ឋមន្ត្រីប្រទេសថៃជារៀងរហូត ។ ក្រៅពីនេះ ពួកគេក៏បានអរគុណដល់មន្ត្រីរដ្ឋាភិបាលទាំងអស់ផងដែរ ដែលផ្តល់ប្រាក់ជួយសង្គ្រោះពលរដ្ឋសម្រាប់ដោះស្រាយជីវភាព ។

រដ្ឋាភិបាលថៃចាប់ផ្តើមអនុវត្តគម្រោង Digital Wallet ដោយជំហានដំបូងនេះ គឺផ្តល់ប្រាក់ឱ្យក្រុមពលរដ្ឋងាយរងគ្រោះក្នុងម្នាក់ចំនួន១ម៉ឺនបាត (ឬស្មើជាង ៣០០ដុល្លារអាមេរិក) រួមមាន ៖ អ្នកមានប័ណ្ណក្រីក្រ និងជនពិការ ។ ការផ្តល់ប្រាក់នេះ គឺរដ្ឋាភិបាលបានផ្ញើប្រាក់ចូលគណនីធនាគាររបស់ពលរដ្ឋដោយផ្ទាល់ គិតចាប់ពីថ្ងៃទី២៥ ដល់ថ្ងៃទី៣០ ខែកញ្ញា ឆ្នាំ២០២៤ តាមរយៈប្រព័ន្ធ PromptPay ដែលភ្ជាប់ជាមួយលេខអត្តសញ្ញាណប័ណ្ណពលរដ្ឋ ។

នៅថ្ងៃទី២៥ ខែកញ្ញា ឆ្នាំ២០២៤ គឺជាថ្ងៃដំបូងដែលរដ្ឋាភិបាលថៃចាប់ផ្តើមផ្តល់ប្រាក់ឱ្យពលរដ្ឋ តាមរយៈគម្រោង Digital Wallet ។ ហេតុនេះ ធ្វើឱ្យបរិវេណមុខសាខាធនាគារ Krungthai នៅស្រុកព្រះនគរស្រីអយុធ្យា ខេត្តអយុធ្យា មានពលរដ្ឋអាយុច្រើន និងជនពិការ យកសៀវភៅធនាគារ និងកាត ATM ដកប្រាក់១ម៉ឺនបាត ដែលរដ្ឋាភិបាលបានផ្ញើចូលក្នុងគណនីធនាគារពួកគេ ។

ប៉ុន្តែដោយសារពលរដ្ឋអាយុច្រើន និងជនពិការពិបាកដកប្រាក់តាមទូរ ATM ទើបពួកគេចូលដកប្រាក់ក្នុងធនាគារតែម្តង ។ ហេតុនេះ ខាងធនាគារបានបន្ថែមកន្លែងដកប្រាក់ទៀត ដើម្បីកុំឱ្យពលរដ្ឋរង់ចាំយូរ ។ ពលរដ្ឋថៃទាំងនេះសប្បាយចិត្តយ៉ាងខ្លាំងក្រោយពីទទួលបានប្រាក់ម្នាក់១ម៉ឺនបាតពីរដ្ឋាភិបាល ហើយពួកគេនិយាយថា ប្រញាប់យកប្រាក់ទាំងនេះទៅទិញសម្ភារៈប្រើប្រាស់ចាំបាច់ ឬចំណាយថែទាំសាច់ញាតិ ហើយប្រាក់នេះអាចជួយកាត់បន្ថយការចំណាយក្នុងគ្រួសារយ៉ាងច្រើន ។

លោក សុមេឃ ផាត់សាឌុ អាយុ៥៨ឆ្នាំ និយាយថា រដ្ឋាភិបាលបានផ្ញើប្រាក់ចូលកុងធនាគារកូនប្រុសពិការរបស់លោករួចរាល់ហើយ ។ លោកនឹងយកប្រាក់នេះទុកឱ្យកូនរៀនសូត្របន្តទៀត ហើយប្រាក់នេះបានជួយគ្រួសារលោកយ៉ាងខ្លាំង ។ វាជាគម្រោងល្អរបស់រដ្ឋាភិបាល ដែលពលរដ្ឋអាចបើកប្រាក់ពីកុងធនាគារយកមកចាយ ។

រីឯលោកយាយ ចាំណង បុនឌី អាយុ៧៦ឆ្នាំ និយាយថា លោកយាយសប្បាយចិត្តខ្លាំងណាស់ ដែលដឹងថា រដ្ឋាភិបាលផ្ញើប្រាក់ចូលកុងធនាគារ ។ សព្វថ្ងៃនេះ លោកយាយបានទទួលប្រាក់សម្រាប់មនុស្សចាស់ និងពិការជារៀងរាល់ខែពីរដ្ឋាភិបាលទុកចាយវាយចិញ្ចឹមចៅ២នាក់ ហើយប្រាក់ខ្លះទៀតទិញថ្នាំពេទ្យ ។ រីឯប្រាក់១ម៉ឺនបាតនេះ លោកយាយឱ្យអ្នកជិតខាងជួយដកពីធនាគារតែ ៣ពាន់បាតសិន រីឯ ៧ពាន់បាតទៀត ទុកចាយពេលចាំបាច់ ។

លោកយាយនិយាយទាំងទឹកភ្នែក និងលើកដៃសំពះថា ៖ «សូមអរគុណនាយករដ្ឋមន្ត្រី ផេថងថាន ស៊ីណាវ៉ាត់ និងរដ្ឋាភិបាលខ្លាំងណាស់ ដែលបានចែកប្រាក់ជួយពលរដ្ឋ ។ សូមឱ្យនាយករដ្ឋមន្ត្រីដឹកនាំប្រទេសថៃជារៀងរហូត ។ ខ្ញុំចូលចិត្តតាំងពីជំនាន់លោក ថាក់ស៊ីន មកម៉្លេះ គឺលោកបានបង្ក្រាបថ្នាំញៀន ហើយបានកូនស្រីធ្វើជានាយករដ្ឋមន្ត្រី» ។

ចំណែកលោកតា រ៉ហៃ លិសេន អាយុ៦៨ឆ្នាំ អតីតទាហាន ដែលបច្ចុប្បន្នជាជនពិការ បានធ្វើដំណើរមកបើកប្រាក់១ម៉ឺនបាត និយាយថា រីករាយណាស់ដែលទទួលបានប្រាក់នេះ ។ វាមានប្រយោជន៍ខ្លាំងណាស់សម្រាប់ជនក្រីក្រដូចលោកតា ហើយលោកតានឹងយកប្រាក់ទៅចិញ្ចឹមចៅ និងកូនពិការផងដែរ ។ លោកតាប្រាប់ថា បើកប្រាក់ពីធនាគារសរុប១ម៉ឺនបាតតែម្តង និងមិនទុកក្នុងកុងធនាគារទេ ពីព្រោះពិបាកធ្វើដំណើរញឹកញាប់ ៕

ប្រទេសកូរ៉េខាងត្បូង ៖ កូរ៉េខាងត្បូង គឺស្ថិតក្នុងចំណោមប្រទេសអភិវឌ្ឍន៍ជឿនលឿនលើពិភពលោក ប៉ុន្តែកូរ៉េខាងត្បូងក៏ដូចប្រទេសផ្សេងៗដែរ គឺតែងតែមានពលរដ្ឋមានចំណូលតិច និងរស់នៅខុសប្លែកពីអ្នកមានចំណូលខ្ពស់ ។ អ្នកមានចំណូលតិចនៅកូរ៉េខាងត្បូងត្រូវរស់នៅក្នុងបន្ទប់ដ៏តូចចង្អៀតហៅថា «Goshitel និង Goshiwon» ។

លោក ឈីង ខាយូឌុង ជាជាងថតរូបម្នាក់នៅប្រទេសកូរ៉េខាងត្បូងនិយាយថា លោកជាមនុស្សម្នាក់ដែលបានរស់នៅក្នុងបន្ទប់តូចចង្អៀតប្រភេទ Goshiwon អស់រយៈពេល៥ឆ្នាំ ក្រោយពីលោកបានមកធ្វើការនៅទីក្រុងសេអ៊ូល ។ លោកក៏ចាប់ផ្តើមថតរូបអ្នកផ្សេងទៀតដែលរស់នៅក្នុងបន្ទប់តូចៗ ដែលលោកពុំធ្លាប់ឃើញពីមុនដើម្បីឱ្យគ្រប់គ្នាឃើញ ។

លោករៀបរាប់ថា ពេលលោកផ្លាស់មកធ្វើការនៅទីក្រុងសេអ៊ូលដំបូង គឺលោកគ្មានជម្រើសអ្វីផ្សេងក្រៅពីការជួលបន្ទប់តូចប្រភេទ Goshiwon មានតម្លៃថោក ។ ម្យ៉ាងទៀត ការស្នាក់នៅបន្ទប់នេះ លោកពុំចាំបាច់កក់ប្រាក់មុន ឬចំណាយប្រាក់ជួសជុលបន្ទប់ទេ ។

លោកបន្តថា ការពិត បន្ទប់ប្រភេទ Goshiwon ត្រូវបានសាងសង់ឡើងសម្រាប់ឱ្យនិស្សិតជួលអានសៀវភៅត្រៀមប្រឡង ឬបេក្ខជនត្រៀមប្រឡងចូលធ្វើការងាររដ្ឋ ។ ការរស់នៅបន្ទប់នេះងាយស្រួល ទើបលោករស់នៅទីនេះរហូតដល់៥ឆ្នាំក្នុងទីក្រុងសេអ៊ូល ។ បន្ទប់នេះស្រដៀងនឹងបន្ទប់ស្នាក់នៅក្នុងសាកលវិទ្យាល័យ ដែលមានផ្ទះបាយ និងបន្ទប់ទឹកនៅជាមួយគ្នា ទើបវាពេញនិយមសម្រាប់និស្សិត និងពលករបរទេស ។

រីឯបន្ទប់ប្រភេទ Goshitel វិញ គឺមានទំហំធំជាងបន្ទប់ Goshiwon បន្តិច ព្រមទាំងមានសម្ភារៈប្រើប្រាស់ច្រើនជាង ។ ប៉ុន្តែបន្ទប់ទាំង២ប្រភេទនេះសុទ្ធតែមានតម្លៃថោកដូចគ្នានៅកូរ៉េខាងត្បូង ។

លោក ឈីង ខាយូឌុង បន្តទៀតថា បច្ចុប្បន្ន បន្ទប់ប្រភេទ Goshiwon មិនគ្រាន់តែជាកន្លែងស្នាក់នៅរបស់និស្សិតទេ គឺមនុស្សទូទៅក៏អាចមកស្នាក់នៅទីនេះបានដែរ ។ ពេលខ្ញុំស្នាក់នៅក្នុងបន្ទប់ប្រភេទ Goshiwon តែងមានអ្នកសួរជានិច្ចថា តើលោកកំពុងត្រៀមប្រឡងនៅទីណា? ពេលឮសំណួរនេះ លោកមានអារម្មណ៍ប្លែកៗ និងពុំសូវពេញចិត្តទេ ។

មនុស្សគ្រប់គ្នាអាចគិតថា លោកកំពុងរស់នៅបន្ទប់ពុំសមរម្យ ទើបលោកថតពីការស្នាក់នៅក្នុងបន្ទប់ Goshiwon ឱ្យគ្រប់គ្នាបានឃើញថា មានមនុស្សច្រើនណាស់មករស់នៅទីនេះ មិនមែនមានតែនិស្សិតទេ ។ លោកគិតថា វាមានន័យណាស់សម្រាប់អ្នករស់នៅបន្ទប់ Goshiwon ៕