ប្រទេសស្វីស ៖ វិបត្តិអាកាសធាតុលើពិភពលោក ធ្វើឱ្យក្រុមហ៊ុននានាព្យាយាមអភិវឌ្ឍន៍បច្ចេកវិទ្យាបន្ទះសូឡា ដើម្បីបំពាក់នៅតាមទីតាំងផ្សេងៗឱ្យបានច្រើនបំផុត ។ ក្រុមហ៊ុនមួយនៅប្រទេសស្វីសទទួលបានការអនុញ្ញាតពីរដ្ឋាភិបាលឱ្យដំណើរការគម្រោងដាក់បន្ទះសូឡានៅក្រោមផ្លូវរថភ្លើងដើម្បីផលិតអគ្គិសនី ។

ក្រុមហ៊ុននេះឈ្មោះ Sun-Ways បានបង្ហាញពីគម្រោងថាមពលពន្លឺព្រះអាទិត្យ ដោយការដាក់បន្ទះសូឡានៅក្រោមផ្លូវរថភ្លើង ដើម្បីផលិតអគ្គិសនីប្រើប្រាស់ពេញមួយថ្ងៃ ។ ក្រុមហ៊ុនបញ្ជាក់ថា វាជាបន្ទះសូឡាអាចធន់ជាមួយកម្លាំងខ្យល់ និងព្រិលបានល្អ ហើយនេះក៏ជាការទាញយកប្រយោជន៍ពីចន្លោះទំនេរបស់ផ្លូវរថភ្លើងផងដែរ ។

ក្រុមហ៊ុននឹងប្រើប្រាស់ចន្លោះទំនេររបស់ផ្លូវរថភ្លើងឱ្យក្លាយជាប្រយោជន៍ ហើយនៅពេលរថភ្លើងបើកឆ្លងកាត់ ឬពេលសម្រាក បន្ទះសូឡានឹងរក្សាទុកថាមពលអគ្គិសនីភ្លាមៗ ។ នេះជាលើកដំបូងលើពិភពលោក ដែលមានការដាក់បន្ទះសូឡានៅក្រោមផ្លូវរថភ្លើង ។

ចំណែកការសុំអនុញ្ញាតអនុវត្តគម្រោងនេះទៅកាន់រដ្ឋាភិបាល ពុំមែនជារឿងងាយស្រួលឡើយ ។ កាលពីឆ្នាំ២០២៣ ការិយាល័យដឹកជញ្ជូនកណ្តាលបានបដិសេធគម្រោងរបស់ក្រុមហ៊ុន ដោយអះអាងថា វានឹងបង្កគ្រោះថ្នាក់ដល់មនុស្សទូទៅ ឬប៉ះពាល់បរិស្ថាន ដោយសារគ្មានទិន្នន័យបញ្ជាក់ពីបច្ចេកទេសគ្រប់គ្រាន់ ។

ប៉ុន្តែក្រោយពីចំណាយពេលអស់១០ខែក្នុងការសាកល្បងគំរូ ការព្យាយាមរបស់ក្រុមហ៊ុន Sun-Ways ក៏ទទួលបានជោគជ័យ ហើយមានការយល់ព្រមពីរដ្ឋាភិបាល ។ ក្រុមហ៊ុននឹងចាប់ផ្តើមប្រើប្រាស់បច្ចេកវិទ្យានេះនៅទីក្រុង Neuchâtel ស្ថិតនៅភាគខាងលិចប្រទេសស្វីស ក្នុងឆ្នាំ២០២៥ ។

បន្ទះសូឡាដែលក្រុមហ៊ុនគ្រោងយកមកប្រើប្រាស់ គឺត្រូវបានរចនាឡើងដោយសហការជាមួយវិស្វករផ្លូវដែក និងរោងចក្រថាមពល ហើយក្រុមហ៊ុនក៏បានសាកល្បងស្ថិរភាពសម្រាប់រថភ្លើងឆ្លងកាត់ក្នុងល្បឿនលឿនបំផុត ស្មើនឹង១៥០គីឡូម៉ែត្រក្នុង១ម៉ោង ។ បន្ទះសូឡានឹងអាចធន់ជាមួយកម្លាំងខ្យល់ និងព្រិលបានល្អ ពីព្រោះវាមានតួនាទីកម្ចាត់ភាពកខ្វក់ ។

រីឯអគ្គិសនីដែលទទួលបានបន្ទះសូឡាស្រូបពន្លឺព្រះអាទិត្យ ក្រុមហ៊ុននឹងផ្គត់ផ្គង់ដល់គម្រោងហេដ្ឋារចនាសម្ព័ន្ធនៅក្បែរៗ ដូចជា ៖ ទីតាំងផ្សេងៗ, បញ្ចូលចរន្តអគ្គិសនីក្នុងប្រព័ន្ធ ឬបញ្ជូនថាមពលអូសក្បាលរថភ្លើង ដោយពុំចាំបាច់ប្រើប្រាស់ Inverter នៅលើដី ។

ការិយាល័យដឹកជញ្ជូនសហព័ន្ធបានអនុញ្ញាតឱ្យក្រុមហ៊ុនស្វីសដំណើរការគម្រោងនេះ ហើយនៅឆ្នាំ២០២៥ ក្រុមហ៊ុននឹងចាប់ផ្តើមដាក់បន្ទះសូឡាស្រូបពន្លឺព្រះអាទិត្យ ចំនួន៤៨បន្ទះ ដែលមានប្រវែង១០០ម៉ែត្រ ។ នាថ្ងៃអនាគត ក្រុមហ៊ុននឹងដាក់បន្ទះសូឡាក្រោមផ្លូវរថភ្លើងឱ្យបានច្រើនបន្ថែមទៀត ដើម្បីបង្កើនបរិមាណផលិតអគ្គិសនី ព្រមទាំងពង្រីកគម្រោងទៅកាន់ប្រទេសជាច្រើន ។

កន្លងមក ប្រទេសស្វីសបានអនុម័តច្បាប់ពន្លឿនការប្រើប្រាស់ថាមពលពន្លឺព្រះអាទិត្យនៅទូទាំងប្រទេស ហើយរដ្ឋាភិបាលស្វីសបានគាំទ្រការដំឡើងបន្ទះសូឡានៅតាមទីតាំងផ្សេងៗ ដូចជា ៖ ដំបូលផ្ទះ, វាលស្មៅលើភ្នំ និងលើផ្លូវល្បឿនលឿន ៕

បរទេស៖ បច្ចុប្បន្ននេះ អារ៉ាប៊ីសាអូឌីតបានកំពុងសាងសង់ Mukaab ដែលជាអគារធំបំផុតនៅលើពិភពលោក ជាមួយកម្ពស់ ៤០០ ម៉ែត្រ ហើយប្រវែង និងទទឹងគឺ ៤០០ ម៉ែត្រដូចគ្នា ដែលធ្វើឱ្យគម្រោងនេះមានទំហំធំរហូតអាចដាក់អាគារ Empire State ចំនួន ២០ នៅខាងក្នុងបាន។

អគារ Mukaab គឺជាអគារធំបំផុតរបស់ពិភពលោកនៅពេលសាងសង់រួច ដែលស្ថិតក្នុងរដ្ឋធានី Riyadh ប្រទេសអារ៉ាប៊ីសាអូឌីត។ ផ្នែកខាងក្រៅនៃអគារនេះត្រូវបានបំផុសគំនិតដោយស្ថាបត្យកម្មឥស្លាមប្រពៃណី ខណៈដែលផ្នែកខាងក្នុងមានផ្ទៃក្រឡាប្រហែល ២ លានម៉ែត្រការ៉េ នៅចំកណ្តាលអាគារនឹងជាប៉មរមួលមួយទៀត។ Mukaab នឹងបង្ហាញនូវប្រព័ន្ធ holographic ដែលប្រើដើម្បីបង្ហាញឈុតឆាកក្រោមទឹក និងឈុតវេទមន្តជាច្រើនទៀតនៅខាងក្នុងរចនាសម្ព័ន្ធគូប។

រហូតមកដល់ពេលនេះ ដំណើរនៃការជីកកកាយគ្រឹះត្រូវបានបញ្ចប់ហើយ ដោយផ្ទៃដី ១០ លានម៉ែត្រគូបក៏ត្រូវបានផ្លាស់ប្តូរ។ ដំណើរការទាំងមូលតម្រូវឱ្យមានការជីកយករ៉ែចំនួន ២៥០ និងឧបករណ៍ជាង ៤០០ គ្រឿងជារៀងរាល់ថ្ងៃ ដើម្បីដំណើរការដី។ ដូច្នេះគិតមកដល់ពេលនេះ កម្មករសំណង់បានចំណាយពេលធ្វើការសរុបប្រមាណ ៣ លានម៉ោងហើយ។ លើសពីនេះ ស្ពានមួយក៏ត្រូវបានសាងសង់ផងដែរ ដើម្បីឱ្យសកម្មភាពសាងសង់ដំណើរការទៅដោយរលូន។

រាជទាយាទអារ៉ាប៊ីសាអូឌីត Mohammed bin Salman បានប្រកាសពីការបង្កើត New Murabba Development ដើម្បីផ្លាស់ប្តូរទីប្រជុំជន Riyadh តាមរយៈការសាងសង់អគារដែលផ្តល់នូវបទពិសោធន៍រស់នៅ ការងារ និងការកម្សាន្តប្លែកៗ។ គម្រោងនេះនឹងផ្តោតលើនិរន្តរភាពជាមួយនឹងតំបន់បៃតង ផ្លូវដើរ និងជិះកង់ ដែលលើកកំពស់គុណភាពជីវិត តាមរយៈការលើកទឹកចិត្តដល់របៀបរស់នៅដែលមានសុខភាពល្អ និងសកម្មភាពសហគមន៍។

ជាមួយនឹងកម្មករ ៩០០ នាក់នៅនឹងកន្លែង ការសាងសង់កំពុងរីកចម្រើនយ៉ាងឆាប់រហ័សបំផុត។ ហេតុនេះហើយគេរំពឹងថាអគារ Mukaab ទាំងមូលដែលមានសមត្ថភាពផ្ទុកអ្នកស្រុករាប់សែននាក់នឹងត្រូវបញ្ចប់នៅឆ្នាំ ២០៣០៕

ជាការពិតណាស់បុគ្គលិកភាគច្រើនតែងតែនិយាយថា ពួកគេគឺមានភាពតានតឹងខ្លាំងនៅកន្លែងធ្វើការ ក៏ដូចជាប្រឈមនឹងបញ្ហាជាច្រើនដែលអាចប៉ះពាល់ដល់ផ្លូវចិត្តពួកគេ។ ទោះជាយ៉ាងណាមិនមែនការងារទាំងអស់សុទ្ធតែលំបាក និងតានតឹងរហូតនោះទេ នេះបើយោងតាមគេហទំព័របរទេស indeed បានឱ្យដឹងថា ក្នុងចំណោមការងារទាំងអស់ គឺមានការងារចំនួន ៥ ដែលមានប្រាក់ចំណូលខ្ពស់ និងស្ត្រេសតិច មានន័យថាបុគ្គលិកផ្នែកខាងក្រោមនេះគឺទទួលរងសម្ពាធតិចតួចបំផុត៖

១.អ្នកគូររូប និងអ្នកថតរូប៖ យោងតាមការស្រាវជ្រាវបានឱ្យដឹងថា ការងារទាំងនេះមានកម្រិតស្ត្រេសត្រឹមតែ ៥២% ប៉ុណ្ណោះ ហើយសម្រាប់ប្រាក់ចំណូលជាមធ្យមវិញគឺជិត ៧២,០០០ ដុល្លារក្នុងមួយឆ្នាំឯណោះ។

២.អ្នកកាន់ស្តុក៖ បុគ្គលិកកាន់ស្តុកមានទំនួលខុសត្រូវក្នុងការត្រួតពិនិត្យឥវ៉ាន់ និងចាត់ថ្នាក់ដើម្បីធានាថាផលិតផលគ្មានកំហុស មុនពេលប្រគល់វាទៅឱ្យអតិថិជន។ ក្រៅពីនេះ ពួកគេក៏ត្រួតពិនិត្យប្រតិបត្តិការនានានៅក្នុងឃ្លាំងផងដែរ ដើម្បីធានាថាការផលិតដំណើរការដោយរលូន។ ដូច្នេះការងារនេះមានកម្រិតស្ត្រេស ៥២% និងប្រាក់ចំណូលជាមធ្យមជិត ៣៧,០០០ ដុល្លារក្នុងមួយឆ្នាំ។

៣.អ្នករៀចំឯកសារ ឬរដ្ឋបាល៖ សម្រាប់បុគ្គលិកផ្នែកនេះវិញ មានកម្រិតស្ត្រេស ៥២% ដូចជំនាញខាងលើដែរ ដោយសារត្រូវទទួលខុសត្រូវលើការការពារឯកសារសំខាន់ៗ។ ក្នុងពេលជាមួយគ្នានេះក៏ត្រូវដឹងពីរបៀបរៀបចំឯកសារឱ្យមានសណ្តាប់ធ្នាប់ល្អ ក៏ដូចជាជួយសម្រួលការងារនៃផ្នែកនីមួយៗឱ្យមានភាពរលូនផងដែរ។ ដូច្នេះប្រាក់ចំណូលជាមធ្យមជិត ៥៩,០០០ ដុល្លារក្នុងមួយឆ្នាំ។

៤.បុគ្គលិកថែទាំផ្លូវហាយវេ៖ បុគ្គលិកទាំងនេះមានភារកិច្ចជួសជុលផ្លូវហាយវេដែលខូចខាត និងផ្លូវរត់អាកាសយានដ្ឋាន ដូចជាលាបពណ៌ស្លាកសញ្ញាផ្លូវ ឬសម្អាតកំទេចកំទីនៅលើផ្លូវជាដើម។ ដូច្នេះការងារនេះមានកម្រិតស្ត្រេសត្រឹមតែ ៥០% ប៉ុណ្ណោះនិងប្រាក់ចំណូលជាមធ្យមជិត ៤៥,០០០ ដុល្លារក្នុងមួយឆ្នាំ។

៥.អ្នកដឹកជញ្ជូន ឬ Delivery៖ ភារកិច្ចចម្បងរបស់អ្នកដឹកជញ្ជូន ឬ Delivery គឺត្រូវធ្វើយ៉ាងម៉េចដឹកអាហារ ឬផលិតផលផ្សេងទៅឱ្យអតិថិឱ្យបានលឿន និងឆាប់រហ័សបំផុត ដូច្នេះតម្រូវឱ្យស្គាល់ផ្លូវច្រើន។ លើសពីនេះទំនួលខុសត្រូវរបស់ពួកគេរួមមានការផ្ទុកទំនិញដោយសុវត្ថិភាពទៅក្នុងយានជំនិះ ការបើកបរដោយសុវត្ថិភាព និងគោរពច្បាប់ចរាចរណ៍ រួមទាំងការកត់ត្រាការធ្វើដំណើររបស់ពួកគេ។ ហេតុនេះសម្រាប់កម្រិតស្ត្រេសត្រឹមតែ ៥០% ប៉ុណ្ណោះហើយប្រាក់ចំណូលជាមធ្យមគឺ ៤០,០០០ ដុល្លារក្នុងមួយឆ្នាំ៕

វាបានធ្វើឱ្យអ្នកដំណើរទាំងអស់ និងបុគ្គលិកអាកាសចរណ៍សម្លឹងមើលពុំដាក់ភ្នែកទៅលើស្ត្រីអ្នកដំណើរម្នាក់ ដែលនៅសុខៗចេញមកហាត់យូហ្គា (Yoga) លើយន្តហោះ ។ រីឯអ្នកលេងបណ្តាញសង្គមបារម្ភថា ការហាត់យូហ្គា នឹងធ្វើឱ្យយន្តហោះធ្លាក់ពីលើអាកាស និងមានគ្រោះថ្នា.ក់ ដល់អ្នកដំណើរផ្សេងទៀត ។

កាលពីថ្ងៃទី២៣ ខែតុលា ឆ្នាំ២០២៤ សារព័ត៌មានបរទេសបានផ្សព្វផ្សាយពីស្ត្រីអ្នកដំណើរម្នាក់ដោះស្បែកជើងរបស់ខ្លួន និងហាត់យូហ្គាលើយន្តហោះ ហើយនាងពុំចាប់អារម្មណ៍នឹងភ្នែកមហាជនទេ រហូតធ្វើឱ្យបុគ្គលិកអាកាសចរណ៍ភ្ញាក់ផ្អើលគ្រប់គ្នា ។ ហេតុការណ៍នេះបានកើតឡើងក្នុងយន្តហោះរបស់ក្រុមហ៊ុនអាកាសចរណ៍ Jet2 Airline ដែលធ្វើដំណើរចាកចេញពីកោះអ៊ីប៊ិសា ប្រទេសអេស្ប៉ាញ ទៅកាន់ទីក្រុង Manchester ប្រទេសអង់គ្លេស ។

រូបភាពស្ត្រីអ្នកដំណើរហាត់យូហ្គានេះ ត្រូវបានចែកចាយយ៉ាងច្រើនក្នុងបណ្តាញសង្គម ហើយធ្វើឱ្យអ្នកលេងបណ្តាញសង្គមបារម្ភថា ទង្វើនេះអាចធ្វើឱ្យធ្លាក់យន្តហោះ និងមានគ្រោះថ្នាក់ដល់អ្នកដំណើរផ្សេងទៀត ។ មតិខ្លះថា ការសំយ៉ុងក្បាលចុះក្រោមបែបនេះ អាចធ្វើឱ្យស្ត្រីហាត់យូហ្គាស្លាប់បាន ។

មតិផ្សេងទៀតសួរថា តើវាសមរម្យដែរឬទេ? ទីធ្លានៅលើយន្តហោះមានកំណត់ ហើយបើទោះជាអ្នកដំណើរគ្រប់រូបមានសេរីភាពក្តី ប៉ុន្តែគួរតែចេះគិតពិចារណា ។ ផ្ទុយពីនេះ មតិខ្លះថា វាជាការបង្ហាញពីសិទ្ធិសេរីភាព និងការធ្វើចលនារាងកាយក្រោយពីជិះយន្តហោះរយៈពេលយូរ ។

សារព័ត៌មានបរទេសរាយការណ៍បន្ថែមថា ស្ត្រីរូបនេះឈ្មោះ Daisy Doris May ជាតារាកំប្លែងជនជាតិអាល្លឺម៉ង់ ហើយគ្មានអ្នកណាម្នាក់គាំទ្រនាងឱ្យធ្វើបែបនេះទេ ។ ដូច្នេះ ពួកគេក៏បានថតវីដេអូនាងហាត់យូហ្គា រយៈពេលខ្លីៗត្រឹម១៨វិនាទី ។ ក្រោយមក នាងបានយកវីដេអូរបស់ខ្លួនមកបង្ហោះក្នុង TikTok និង Instagram ព្រមទាំងសរសេរថា ៖ «វាគ្រាន់តែជាការកម្សាន្តលើយន្តហោះលក់សំបុត្រតម្លៃទាបប៉ុណ្ណោះ» ។

គួរបញ្ជាក់ថា ដោយសារគិតពីសុវត្ថិភាពលើយន្តហោះជាចម្បង អ្នកដំណើរផ្សេងទៀតបានអង្គុយលើកៅអីយ៉ាងស្ងៀមស្ងាត់រៀងៗខ្លួន និងពុំឈរបាំងនៅបរិវេណផ្លូវដើរទេ ។ រីឯអ្នកដំណើរខ្លះទៀតបានចងខ្សែក្រវ៉ាត់ការពារសុវត្ថិភាពដើម្បីការពារគ្រោះថ្នាក់ ប៉ុន្តែបែរជាស្ត្រីរូបនេះងើបពីកៅអីមកហាត់យូហ្គាទៅវិញ ៕

កូរ៉េខាងត្បូង៖ បច្ចុប្បន្នការទស្សទាយតាមអ៊ីនធឺណិតនៅប្រទេសកូរ៉េខាងត្បូងគឺកំពុងរីកដុះដាលខ្លាំង ជាពិសេសសម្រាប់យុវវ័យដែលមានអាយុ ២០ ទៅ ៣០ ឆ្នាំ។
ជាមួយនឹងព័ត៌មានសាមញ្ញៗដូចជា ថ្ងៃខែឆ្នាំកំណើត អាយុ ភេទ ឈ្មោះពេញ “គ្រូទាយតាមអ៊ីនធឺណិត” គឺអាចឆ្លើយសំណួរបានទាំងអស់អំពីអាពាហ៍ពិពាហ៍ ជីវិតគូរស្រករ ការងារ និងទ្រព្យសម្បត្តិនៅពេលអនាគត។ ប្រជាជនកូរ៉េរាប់លាននាក់សព្វថ្ងៃនេះបានកំពុងឈ្លក់វង្វេងទៅនឹងការទស្សទាយយ៉ាងខ្លាំង ដោយពួកគេបានបាញ់លុយជារៀងរាល់ថ្ងៃទៅឱ្យគ្រូទាយតាមអ៊ីនធឺណិតដើម្បីទស្សទាយអំពីជីវិតរបស់ពួកគេ។

ដូច្នេះហើយបច្ចុប្បន្នអាជីវកម្មទស្សទាយតាមអ៊ីនធឺណិតនៅកូរ៉េគឺកំពុងកាក់កបខ្លាំងណាស់ ទោះជាយ៉ាងណាការទស្សទាយបែបប្រពៃណីដូចជាការទៅរកគ្រូផ្ទាល់នៅកន្លែងណាមួយហាក់កំពុងថយចុះគួរឱ្យកត់សម្គាល់ ដែលបណ្តាលឱ្យគ្រូទាយបែបប្រពៃណីមានការព្រួយបារម្ភយ៉ាងខ្លាំង។ នៅប្រទេសកូរ៉េមាន Channel Youtube មួយដែលត្រូវបានគេស្គាល់ថា ជាគ្រូទាយតាមអ៊ីនធឺណិតល្បីល្បាញម្នាក់តែងតែអង្គុយនៅមុខកាមេរ៉ា ឆ្លើយសំណួររបស់អ្នកមើលយ៉ាងឆាប់រហ័សបំផុត។

ជាមួយនឹងការផ្សាយបន្តផ្ទាល់ គ្រូទាយបានផ្តល់ជូននូវមាតិកាឥតគិតថ្លៃ ដើម្បីទាក់ទាញចំណាប់អារម្មណ៍ ហើយបន្ទាប់មកលើកទឹកចិត្តអ្នកមើលឱ្យបង់ប្រាក់សម្រាប់ដំបូន្មានស៊ីជម្រៅបន្ថែមទៀត។ យោងតាមក្រុមហ៊ុន Innoforest ដែលជាក្រុមហ៊ុនវិភាគ បាននិយាយថា ចំនួនអ្នកទស្សនាការផ្សាយបន្តផ្ទាល់នៅលើ Channel Youtube នេះគឺបានកើនឡើងទ្វេដងពីជាង ៥ សែននាក់ មកជាង ១ លាននាក់។ ហើយកម្មវិធីទស្សន៍ទាយតាមអ៊ីនធឺណិតដ៏ពេញនិយមមួយផ្សេងទៀត ក៏បានឃើញចំនួនអ្នកទស្សនាកើនឡើងជិតពីរដងផងដែរ។

ដូច្នេះហើយវេទិកាធំៗជាច្រើនគឺកំពុងរកលុយបានពីការទស្សន៍ទាយតាមអ៊ីធឺណិតយ៉ាងច្រើនសន្ធឹកសន្ធាប់ជារៀងរាល់ខែ ដោយសារយុវវ័យតែងតែបាញ់លុយទៅកាន់គណនីគ្រូទាយតាមអ៊ីនធឺណិតដើម្បីឱ្យទស្សទាយពីជីវិតរបស់ពួកគេ។ ហេតុនេះបច្ចុប្បន្នអាជីវកម្មទស្សទាយតាមអ៊ីនធឺណិតនៅប្រទេសកូរ៉េខាងត្បូងគឺកំពុងរីកចម្រើនយ៉ាងខ្លាំង ដែលបណ្តាលឱ្យគ្រូទាយបែបប្រពៃណីបាត់បង់ការងារធ្វើ៕