ប្រិយមិត្តប្រាកដជាដឹងហើយថា Rosé ដែលជាសមាជិក BLACKPINK គឺចូលចិត្តលាបពណ៌សក់ណាស់ នេះក៏ព្រោះតែនាងស្អប់សក់ពណ៌ខ្មៅ ដែលជាពណ៌សក់ពីកំណើតរបស់នាង ទើបនាងតែងតែលាបពណ៌សក់ពណ៌ទង់ដែងរហូត។ សក់ពណ៌ទង់ដែងគឺពិតជាសក្តិសមនឹងតារាចម្រៀងវ័យ ២៧ ឆ្នាំរូបនេះខ្លាំងណាស់ ដោយសារវាមានភាពស្រស់ស្អាត ធ្វើឱ្យ Rosé លេចធ្លោរខ្លាំងក្នុងពិភពសិល្បៈ។ ដូច្នេះដើម្បីថែរក្សាពណ៌សក់ឱ្យនៅបានយូរ Rosé តែងតែអនុវត្តគន្លឹះដូចខាងក្រោម៖

១.មិនកក់សក់ពេញមួយថ្ងៃ៖ បន្ទាប់បញ្ចប់ការលាបពណ៌សក់រួច Rosé តែងតែទុកសក់នាងចោលរយៈពេល ២៤ ម៉ោងដោយមិនធ្វើការកក់សក់នោះទេ។ នេះក៏ដោយសារតែនៅពេលដែលសក់ថ្មីត្រូវបានប៉ះពាល់នឹងសារធាតុគីមីពីការជ្រលក់ពណ៌ ឬសារធាតុ bleach វាច្រើនតែស្ងួតខ្លាំង ដូច្នេះការកក់សក់ភ្លាមៗនឹងលាងសម្អាតជាតិប្រេងធម្មជាតិចេញ ធ្វើឱ្យសក់របស់អ្នកកាន់តែស្ងួត និងឆាប់ខូច។ លើសពីនេះការកក់សក់ជាមួយសាប៊ូភ្លាមៗ ក៏ធ្វើឱ្យសក់លាបជ្រះពណ៌ផងដែរ។

២.ប្រើក្រែមបន្ទន់៖ បន្ទាប់ពីទុកសក់ចោលរយៈពេល ២៤ ម៉ោងរួច តារាស្រីរូបនេះក៏បានកក់សក់ និងប្រើក្រែមបន្ទន់ ដើម្បីពង្រឹងសក់ កាត់បន្ថយបញ្ហាសក់ជ្រុះ ក៏ដូចជាជួយធ្វើឱ្យសក់មានទម្ងន់ ងាយស្រួលធ្វើរចនាប័ទ្ម និងធ្វើឱ្យសក់ពណ៌មើលទៅមានសុខភាពល្អ ភ្លឺ រលោង ស្អាតបែបធម្មជាតិ។

៣.ជៀសវាងប្រើម៉ាស៊ីនក្នុងសីតុណ្ហភាពខ្ពស់៖ ចំពោះសក់ដែលទើបតែលាបពណ៌រួច Rosé គឺមិនងាយធ្វើម៉ូដសក់ផ្តេសផ្តាសឡើយ ព្រោះការធ្វើម៉ូដច្រើនហួសហេតុពេកដូចជា ការកៀប និងការកិបជាមួយម៉ាស៊ីនដោយប្រើកម្តៅខ្លាំង នឹងងាយធ្វើឱ្យសក់ឆាប់ខូច ឬឆេះជាដើម។

៤.កុំសិតសក់នៅពេលសើម៖ នៅពេលដែលសក់សើម សរសៃសក់កាន់តែខ្សោយជាងធម្មតា ងាយលាតសន្ធឹង និងខូច។ ដូច្នេះ Rosé គឺមិនដែលសិតសក់នៅពេលសក់សើមនោះទេ ការសិតសក់ពេលវាសើមអាចបណ្តាលឱ្យសរសៃសក់បែកចុង ជាហេតុនាំឱ្យសក់ជ្រុះកាន់តែច្រើន។ លើសពីនេះ ការសិតសក់នៅពេលវាសើម ក៏អាចបណ្តាលឱ្យសក់របស់អ្នកកណ្តាញ់ និងពិបាកក្នុងការគ្រប់គ្រងផងដែរ។ ដើម្បីការពារសក់របស់អ្នកពីការខូចខាត អ្នកគួររង់ចាំរហូតដល់សក់របស់អ្នកស្ងួតទាំងស្រុងសិប ទើបអាចសិតសក់បាន៕

មនុស្សមួយចំនួនចូលចិត្តសន្សំសម្ភារៈចាស់ៗទុកពេញផ្ទះ មិនហ៊ានបោះចោលទេ ហើយពេលសន្សំកាន់តែច្រើនធ្វើឱ្យផ្ទះកាន់តែណែនចង្អៀតខ្លាំងឡើង និងគ្មានកន្លែងទំនេរ សូម្បីតែចន្លោះសម្រាប់ដើរ ។ រីឯអ្នកខ្លះទៀតទុកដាក់សម្ភារៈពេញផ្ទះ ដូចជា ៖ សម្លៀកបំពាក់, គ្រឿងសម្អាង និងសម្ភារៈប្រើប្រាស់ផ្សេងៗ ហើយពេលត្រូវការម្តងៗ ពួកគេបានចំណាយពេលយ៉ាងយូរដើម្បីរកសម្ភារៈទាំងនេះ ។

តើលោកអ្នកជ្រាបទេថា ផ្ទះគ្មានសណ្តាប់ធ្នាប់ និងពុំបានរៀបចំកន្លែងសម្រាកពេលក្រោកពីគេង តើវានឹងប៉ះពាល់ដល់ជីវិតបែបណាខ្លះ? យោងតាមទិន្នន័យរបស់ Center of Everyday Lives and Families បញ្ជាក់ថា អ្នកដែលមានសម្ភារៈប្រើប្រាស់ច្រើនចង្អៀតពេញផ្ទះ ឬផ្ទះគ្មានសណ្តាប់ធ្នាប់ ឬសម្ភារៈនៅខ្ចាត់ខ្ចាយពាសពេញ វានឹងធ្វើឱ្យអ្នកនោះស្ត្រេសកាន់តែខ្លាំង ហើយជួបតែភាពបរាជ័យក្នុងជីវិត ។

ក្រៅពីនេះ តាមការស្ទង់មតិផ្សេងទៀតបញ្ជាក់ថា អ្នកឆ្លើយតបសំណួរ៧១% ប្រាប់ថា ការរៀបចំគ្រែសម្រាកឱ្យមានរបៀបរៀបរយក្រោយក្រោកពីគេងបានធ្វើឱ្យពួកគេមានសេចក្តីសុខ ។ រីឯអ្នកឆ្លើយសំណួរ៦២% ទៀតប្រាប់ថា ពួកគេពុំបានរៀបចំគ្រែសម្រាកឱ្យមានសណ្តាប់ធ្នាប់ទេ ហើយវាធ្វើឱ្យពួកគេស្ត្រេសក្នុងចិត្ត និងគ្មានសេចក្តីសុខ ។

ហេតុនេះ ពេលក្រោកពីដំណេកជារៀងរាល់ថ្ងៃ យើងគួរតែចំណាយពេល២នាទីរៀបចំកន្លែងគេងឱ្យមានសណ្តាប់ធ្នាប់ល្អ និងបោសធូលីឱ្យស្អាតបាត ពីព្រោះវានឹងជួយឱ្យយើងអាចចាប់ផ្តើមថ្ងៃថ្មីយ៉ាងល្អ និងមានកម្លាំងចិត្ត ។

តាមផ្នែកវិទ្យាសាស្ត្របញ្ជាក់ថា សុភមង្គល និងសេចក្តីសុខអាចកើតឡើងបាន គឺអាស្រ័យលើទម្លាប់ការរស់នៅរបស់មនុស្សម្នាក់ៗ ហើយវាពាក់ព័ន្ធនឹងជីវិតប្រចាំថ្ងៃក្នុងផ្ទះផងដែរ ។ តើជ្រាបទេថា បើផ្ទះយើងកាន់តែរញ៉េរញ៉ៃ និងពុំបានរៀបចំកន្លែងគេងឱ្យបានត្រឹមត្រូវ វានឹងធ្វើឱ្យជីវិតជួបតែភាពបរាជ័យជានិច្ច ។

ចំណែកស្ត្រីវិញ បើមានសម្ភារៈប្រើប្រាស់ក្នុងផ្ទះណែនខ្លាំងប៉ុនណា វានឹងកាន់តែធ្វើឱ្យមានភាពស្ត្រេស និងជួបតែភាពបរាជ័យកាន់តែខ្លាំងដែរ ។ ហេតុនេះ ចូរកម្ចាត់សម្ភារៈរញ៉េរញ៉ៃទាំងនេះឱ្យអស់ ដើម្បីឱ្យជីវិតជួបតែភាពស្ងប់ស្ងាត់ ៕

តារាសម្ដែងថៃ Min Pechaya យំសូមទោសដែលធ្វើការស្រាវជ្រាវមិនបានគ្រប់គ្រាន់ ទើបនាងបានផ្សាយពាណិជ្ជកម្មឱ្យក្រុមហ៊ុនមួយ ដែលស៊ើបអង្កេតពីបទឆបោក ធ្វើឱ្យមនុស្សជាច្រើនក្ស័យធន។ នៅក្នុងសន្និសីទសារព័ត៌មានកាលពីថ្ងៃទី១២ ខែតុលា Min Pechaya បាននិយាយថា នាងមិនបានកាន់តំណែងនៅក្រុមហ៊ុន The iCon Group ដែលជាក្រុមហ៊ុនកំពុងត្រូវបានស៊ើបអង្កេតដោយប៉ូលិសនោះទេ ប៉ុន្តែគ្រាន់តែជាទូតសុឆ្ឆនៈប្រព័ន្ធផ្សព្វផ្សាយសម្រាប់ផលិតផលប៉ុណ្ណោះ។

ក្នុងសេចក្តីថ្លែងរបស់ Min នាងបាននិយាយថាបានបញ្ចប់កិច្ចសន្យាជាមួយក្រុមហ៊ុន។ តារាស្រីរូបនេះបាននិយាយថានាងមិនដែលទាក់ទងជាមួយទិដ្ឋភាពណាមួយដែលទាក់ទងនឹងប្រតិបត្តិការរបស់ក្រុមហ៊ុនទេ។ នាងបានសូមទោសចំពោះការពាក់ព័ន្ធនឹងរឿងអាស្រូវ និងមិនបានធ្វើការស្រាវជ្រាវគ្រប់គ្រាន់មុនពេលចុះកិច្ចសន្យាជាមួយ The iCon Group។

គិតត្រឹមថ្ងៃទី១២ ខែតុលា ប៉ូលិសបានចាប់ខ្លួនអ្នកគ្រប់គ្រង ៦នាក់នៅ The iCon Group ។ ក្រុមហ៊ុននេះលក់ផលិតផលថែរក្សាសម្រស់ អាហារបំប៉ន និងលក់វគ្គបណ្តុះបណ្តាលស្តីពីការលក់ និងការការពារសុខភាព។ ពួកគេបញ្ចុះបញ្ចូលសមាជិកឱ្យជ្រើសរើសសមាជិកថ្មី និងទិញផលិតផលដើម្បីសម្រេចបាននូវការលក់ដែលបានកំណត់ដោយក្រុមហ៊ុន ដោយហេតុនេះទទួលបានប្រាក់ចំណូលកាន់តែច្រើន។ ដើម្បីឈានដល់កម្រិតកំណត់ មនុស្សជាច្រើនបានខ្ចីលុយនិងបានដាក់ដើមទុនទៅក្នុងការទិញទំនិញ មនុស្សជាច្រើនបានបាត់បង់ទ្រព្យសម្បត្តិទាំងអស់របស់ខ្លួនហើយក្ស័យធន។
ជនរងគ្រោះម្នាក់បាននិយាយថា បន្ទាប់ពីក្លាយជាសមាជិក ខ្លួនគេមិនដែលរៀនពីរបៀបលក់ទេ ប៉ុន្តែត្រូវបានបញ្ចុះបញ្ចូលជានិច្ច ឱ្យវិនិយោគលុយបន្ថែមទៀត ដើម្បីយកដើមទុនមកវិញ និងទទួលបានប្រាក់ចំណេញ។ ចំពោះផលិតផលរបស់ក្រុមហ៊ុនគឺ«សម្រាប់លក់តែគ្មានអ្នកណាទិញ»។

ក្រៅពី Min Pechaya ក៏មានតារាល្បីៗមួយចំនួនទៀតដែលជាប់ពាក់ព័ន្ធក្នុងរឿងនេះ ក្នុងនោះក៏មានតារាសម្ដែង Boy Pakorn ផងដែរ។ នៅក្នុងកម្មវិធីទូរទស្សន៍មួយលោកបានយំ សូមទោសជនរងគ្រោះ ហើយនិយាយថា លោកមិនមែនជាអ្នកដឹកនាំក្រុមហ៊ុនទេ គឺគ្រាន់តែថតរូបផ្សព្វផ្សាយ និងចូលរួមក្នុងព្រឹត្តិការណ៍ក្រុមហ៊ុនប៉ុណ្ណោះ។ តារាសម្តែងរូបនេះបាននិយាយថា លោកនឹងប្រឹងប្រែងឱ្យអស់ពីសមត្ថភាព ដើម្បីផ្តល់ព័ត៌មានទាំងអស់នៅក្នុងកិច្ចសន្យា ដើម្បីបម្រើការស៊ើបអង្កេតរបស់ប៉ូលិស។

របាយការណ៍ហិរញ្ញវត្ថុចុងក្រោយបំផុតរបស់ក្រុមហ៊ុននេះកាលពីឆ្នាំមុនបានបង្ហាញថាខ្លួនមានទ្រព្យសម្បត្តិសរុបដែលមានតម្លៃ ២.៤ ពាន់លានបាត បំណុល ១.៥៥ ពាន់លាន ប្រាក់ចំណូលសរុប ១.៨៩ ពាន់លានបាត ការចំណាយ ១.៨៦ពាន់លាន បង់ពន្ធ ៩.១ លានបាត និងប្រាក់ចំណេញសុទ្ធ ១៩.៧៧ លានបាតប្រមាណជិត៦០ម៉ឺនដុល្លារ។

គួរបញ្ជាក់ថាទាំង Min Pechaya និង Boy Pakorn សុទ្ធតែជាតារាល្បីក្នុងជួរសិល្បៈដែលមានអ្នកគាំទ្រច្រើន។ Min Pechaya មានវ័យ៣៥ឆ្នាំមានអ្នកតាមដានលើបណ្តាញសង្គម IG ៧លាននាក់ ។ ចំណែកតារាសម្ដែង Boy Pakorn មានអាយុ៤០ឆ្នាំមានអ្នកតាមដានជិត១០លាននាក់នៅលើ Instagram ៕

ប្រទេសអូស្ត្រាលី ៖ មនុស្សភាគច្រើនពុំសូវបានឮឈ្មោះទីក្រុងនេះទេនៅប្រទេសអូស្ត្រាលី បើទោះជាទីក្រុងគ្របដណ្តប់ទៅដោយវាលខ្សាច់ និងមានអាកាសធាតុក្តៅខ្លាំងក្តី ប៉ុន្តែមានភ្ញៀវទេសចរបរទេសជាច្រើននាក់ចង់មកកម្សាន្តនៅទីនេះ ជាពិសេស អ្នកចូលចិត្តធ្វើដំណើរផ្សងព្រេង ។ តើអ្វីជាមន្តស្នេហ៍ទាក់ទាញរបស់ទីក្រុង? ហេតុអ្វីភ្ញៀវទេសចរចង់មកកម្សាន្តនៅតំបន់ក្តៅខ្លាំងបែបនេះ?

Coober Pedy គឺជាឈ្មោះទីក្រុងរ៉ែដ៏ល្បីល្បាញលំដាប់ពិភពលោក ដែលស្ថិតនៅរដ្ឋ South Australia ប្រទេសអូស្ត្រាលី ។ ទីក្រុងនេះត្រូវបានមនុស្សជាច្រើនហៅថា «រាជធានី Opal របស់ពិភពលោក» ដោយសារវាជាកន្លែងជីករ៉ែ Opal ដ៏ធំបំផុតលើពិភពលោក សម្រាប់យកមកផលិតជាគ្រឿងអលង្ការ ។ ប៉ុន្តែចំណុចទាក់ទាញមួយទៀតរបស់ទីក្រុងនេះ គឺពលរដ្ឋភាគច្រើននិយមសាងសង់ផ្ទះ និងអគារផ្សេងៗនៅក្រោមដីខ្សាច់ ។

ទីក្រុង Coober Pedy មានទីតាំងស្ថិតនៅលើវាលខ្សាច់ដ៏ស្ងួតហួតហែង និងមានអាកាសធាតុក្តៅយ៉ាងខ្លាំង ។ ហេតុនេះ ទើបធ្វើឱ្យមនុស្សម្នាភាគច្រើនរស់នៅក្នុងទីក្រុងសម្រេចចិត្តសាងសង់ផ្ទះរបស់ខ្លួននៅក្រោមដីខ្សាច់ ឬហៅថា «Dugouts» ដើម្បីការពារកំដៅខ្លាំងនៅពេលថ្ងៃ ។

ទីក្រុង Coober Pedy ត្រូវបានបង្កើតឡើងកាលពីដើមសតវត្សទី២០ ក្រោយពីការរកឃើញរ៉ែប្រភេទ Opal ក្នុងតំបន់នេះ កាលពីឆ្នាំ១៩១៥ ។ ចាប់តាំងពីពេលនោះមក ទីក្រុងនេះក៏បានក្លាយជាមជ្ឈមណ្ឌលជីករ៉ែ Opal សម្រាប់ផលិតគ្រឿងអលង្ការ និងមានជនបរទេសមកពីជុំវិញពិភពលោក ផ្លាស់មកធ្វើការនៅទីនេះ និងស្វែងរករ៉ែ Opal ។

ក្រៅពីការជីកយករ៉ែ ទីក្រុង Coober Pedy គឺជាតំបន់ទេសចរណ៍មួយកន្លែងគួរឱ្យចាប់អារម្មណ៍សម្រាប់ភ្ញៀវទេសចរមកពីជុំវិញពិភពលោក ពីព្រោះពលរដ្ឋរស់នៅទីនេះមានការរស់នៅខុសប្លែកពីគេ ។ ភ្ញៀវទេសចរបរទេសអាចដើរមើលសំណង់ផ្សេងៗនៅក្រោមដីខ្សាច់ ដូចជា ៖ ផ្ទះ, ព្រះវិហារ, សារមន្ទីរបង្ហាញពីការជីករ៉ែ Opal និងទទួលបានបទពិសោធន៍ជីករ៉ែ Opal ដោយខ្លួនឯង ។

ក្រៅពីនេះ វាលខ្សាច់យ៉ាងស្រស់ស្អាត និងពោរពេញទៅដោយភាពរាំងស្ងួត គឺជាការបង្កើតមន្តស្នេហ៍ថ្មីប្លែកសម្រាប់ទីក្រុង Coober Pedy ។ ជារៀងរាល់ឆ្នាំ មានភ្ញៀវទេសចរបរទេសជាច្រើននាក់ដែលចូលចិត្តការធ្វើដំណើរផ្សងព្រេងបានមកលេងទីក្រុងវាលខ្សាច់ និងដើរមើលសំណង់ផ្សេងៗនៅក្រោមដីខ្សាច់ ៕

ប្រទេសថៃ ៖ នាយកដ្ឋានជំរុញពាណិជ្ជកម្មអន្តរជាតិប្រចាំប្រទេសថៃបានលើកឡើងពីស្ថានការណ៍នាំចូលផ្លែមៀននៅអាល្លឺម៉ង់ថា អាល្លឺម៉ង់ត្រូវនាំចូលផ្លែមៀនពីបណ្តាប្រទេសអាស៊ី ដូចជា ៖ ថៃ, វៀតណាម និងចិន ។ កាលពីឆ្នាំ២០២២ ថៃជាប្រទេសដាំដុះ និងនាំចេញផ្លែមៀនយ៉ាងច្រើនទីកាន់ទីផ្សារពិភពលោក ហើយអាល្លឺម៉ង់ គឺជាទីផ្សារសំខាន់បំផុតរបស់ថៃនៅតំបន់អឺរ៉ុប ។

បច្ចុប្បន្ន ក្រុមហ៊ុននាំចេញផ្លែមៀនថៃបានប្រឈមនឹងការប្រកួតប្រជែងយ៉ាងខ្លាំងជាមួយប្រទេសវៀតណាម ដែលវៀតណាមបានបង្កើនដាំដុះ និងនាំចេញផ្លែមៀនយ៉ាងច្រើនទៅក្រៅប្រទេស ។ ម្យ៉ាងទៀត រយៈពេលប្រមូលផលផ្លែមៀនរបស់វៀតណាម គឺយូរជាងថៃ ទើបធ្វើឱ្យវៀតណាមអាចនាំចេញផ្លែមៀនទៅក្រៅប្រទេស ក្នុងអំឡុងពេលថៃផុតរដូវកាលប្រមូលផល ។ ហេតុនេះ ក្រុមហ៊ុននាំចេញផ្លែមៀនវៀតណាមមានប្រៀបជាង ពីព្រោះអាចបំពេញតម្រូវការក្នុងទីផ្សារសំខាន់ៗរយៈពេលយូរ ។

ប៉ុន្តែប្រទេសអាល្លឺម៉ង់បាននាំចូលផ្លែមៀនតិចជាងមុន ដោយសារតម្រូវការរបស់អតិថិជនធ្លាក់ចុះ គឺអតិថិជនអាល្លឺម៉ង់ផ្តល់ភាពសំខាន់យ៉ាងខ្លាំងក្នុងការសន្សំសំចៃប្រាក់នាពេលបច្ចុប្បន្ន ។ ក្រៅពីកត្តាទីផ្សារ បញ្ហាផ្សេងទៀតក៏បានធ្វើឱ្យការនាំចូលផ្លែមៀនរយៈពេលជាច្រើនឆ្នាំរបស់អាល្លឺម៉ង់ធ្លាក់ចុះផងដែរ ដូចជា ៖ គោលនយោបាយពាណិជ្ជកម្ម និងការផ្គត់ផ្គង់ផ្លែឈើក្នុងស្រុក ។

ដូច្នេះ គេអាចសន្និដ្ឋានថា ការនាំចូលផ្លែមៀនរបស់អាល្លឺម៉ង់ក្នុងរយៈពេលជាច្រើនឆ្នាំមកនេះ បានធ្លាក់ចុះទាំងបរិមាណ និងតម្លៃ ។ វាពាក់ព័ន្ធនឹងកត្តាសេដ្ឋកិច្ច ដូចជា ៖ តម្រូវការធ្លាក់ចុះ, ការចំណាយដើមទុនកើនឡើង និងការផ្លាស់ប្តូរទីផ្សារធ្វើឱ្យប៉ះពាល់ដល់ការនាំចូលផ្លែមៀនស្រស់ ។

កាលពីឆ្នាំ២០២១ អាល្លឺម៉ង់បាននាំចូលផ្លែមៀនច្រើនបំផុត ដោយសារតម្រូវការកើនឡើង និងលក្ខខណ្ឌទីផ្សារអំណោយផល ។ ប៉ុន្តែរយៈពេលក្រោយមក ការនាំចូលផ្លែមៀនរបស់អាល្លឺម៉ង់បានធ្លាក់ចុះ ដែលបង្ហាញពីការផ្លាស់ប្តូរទីផ្សារ ដូចជា ៖ អាល្លឺម៉ង់នាំចូលផ្លែឈើផ្សេងទៀត, អតិថិជនអាល្លឺម៉ង់ទិញផ្លែមៀនតិចជាងមុន និងបញ្ហាប្រឈមសេដ្ឋកិច្ច ។

បរិមាណ និងតម្លៃនាំចូលផ្លែមៀនធ្លាក់ចុះបានបង្ហាញពីការផ្លាស់ប្តូរគោលនយោបាយពាណិជ្ជកម្ម, ការផ្អាកការផ្គត់ផ្គង់ និងបញ្ហាក្នុងពេលដឹកជញ្ជូន ទើបធ្វើឱ្យប៉ះពាល់ដល់ការចំណាយដើមទុន និងការនាំចូលផ្លែមៀនរបស់អាល្លឺម៉ង់ ។ លើសនេះ អតិថិជនអាល្លឺម៉ង់ទិញផ្លែមៀនតិច និងតម្រូវការផ្លែឈើផ្សេងៗខ្ពស់ជាងមុនអាចធ្វើឱ្យការនាំចូលផ្លែមៀនស្រស់របស់អាល្លឺម៉ង់ធ្លាក់ចុះ ។

ក្រៅពីនេះ ផ្លែមៀនឆាប់ស្អុយខូចគុណភាព ទើបធ្វើឱ្យពិបាកលក់ផ្លែមៀនស្រស់នៅអាល្លឺម៉ង់ ហើយផ្លែមៀនភាគច្រើនត្រូវបានដាក់លក់ក្នុងហាងលក់ទំនិញអាស៊ី និងផ្សារទំនើបធំៗ ។ បច្ចុប្បន្ន អាល្លឺម៉ង់បានលក់ផ្លែមៀនតាមអនឡាញ ហើយអ្នកលក់ផ្លែមៀនភាគច្រើន គឺជាពលរដ្ឋអាស៊ីរស់នៅអាល្លឺម៉ង់ រួមមាន ៖ វៀតណាម, ចិន និងថៃ ៕

ប្រទេសជប៉ុន ៖ ការឡើងកំដៅផែនដីបានធ្វើឱ្យកម្រិតទឹកសមុទ្រកើនឡើងយ៉ាងខ្លាំងគួរឱ្យភ្ញាក់ផ្អើល ហើយបណ្តាលឱ្យទីក្រុងឆ្នេរសមុទ្រទូទាំងពិភពលោក ប្រឈមនឹងគ្រោះថ្នា.ក់ នៅឆ្នាំ២០៥០ ។ អ្នកជំនាញព្យាករថា មនុស្សជិត៣០០លាននាក់ដែលរស់នៅតំបន់ឆ្នេរសមុទ្រ នឹងរង.គ្រោះ ដោយសារទឹកលិចជារៀងរាល់ឆ្នាំ ។ ហេតុនេះ ក្រុមហ៊ុនជប៉ុនមួយឈ្មោះ N-Ark ក៏បានបង្កើតគម្រោងទីក្រុងអណ្តែតទឹកដែលមានអ្វីៗទាំងអស់ដើម្បីដោះស្រាយបញ្ហានេះ ។

Dogen City នឹងក្លាយជាទីក្រុងមានអង្កត់ផ្ចិតប្រមាណ១.៥៨គីឡូម៉ែត្រ និងមានប្រវែងព័ទ្ធជុំវិញទីក្រុង ប្រមាណ៤គីឡូម៉ែត្រ ។ ទីក្រុងនេះនឹងមានកម្ពស់២ជាន់ និងមានរាងជារង្វង់មូល ហើយទីក្រុងរង្វង់មូលនឹងការពារអ្នករស់នៅឱ្យចៀសផុតពីរលកយក្សស៊ូណាមិ ។ នៅជាន់លើបំផុតរបស់ទីក្រុងនឹងប្រើប្រាស់ថាមពលស្អាតសម្រាប់ឱ្យទីក្រុងអណ្តែតលើទឹកសមុទ្រដោយខ្លួនឯង ខណៈជាន់នៅក្រោមសមុទ្រ នឹងក្លាយជាមជ្ឈមណ្ឌលព័ត៌មានសមុទ្រសម្រាប់ការរៀបចំទីក្រុង, ការថែទាំសុខភាព និងការស្រាវជ្រាវវេជ្ជសាស្ត្រ ។

ទីក្រុងអណ្តែតទឹកនឹងទទួលឱ្យមនុស្សរស់នៅចំនួន១ម៉ឺននាក់ និងទទួលភ្ញៀវទេសចរចំនួន៤ម៉ឺននាក់ទៀត ហើយទីក្រុងនេះមានអ្វីៗគ្រប់យ៉ាង ដូចជា ៖ សាលារៀន, ពហុកីឡដ្ឋាន, ការិយាល័យធ្វើការ, សណ្ឋាគារ, កន្លែងរៀបចំពិធីសាសនា និងសួនច្បារសាធារណៈ ។ ចំណុចសំខាន់ អ្នករស់នៅទីក្រុងអណ្តែតទឹកនឹងអាចដាំដំណាំផ្សេងៗក្នុងកសិដ្ឋានទទួលទិន្នផលរហូតដល់៧.០០០តោនក្នុង១ឆ្នាំ ដោយការប្រើប្រាស់ទឹកសមុទ្រស្រោចស្រព ។

ក្រៅពីនេះ ក៏មានមន្ទីរពេទ្យសម្រាប់ព្យាបាលអ្នករស់នៅក្នុងទីក្រុងអណ្តែតទឹក ឬភ្ញៀវទេសចរអាចមកពិនិត្យសុខភាព ឬទទួលការព្យាបាលជំងឺបែបទំនើបនៅមន្ទីរពេទ្យ ។ ក្រុមហ៊ុនជប៉ុនថែមទាំងមានមហិច្ឆតាអភិវឌ្ឍទីក្រុង Dogen ឱ្យកាន់តែជឿនលឿនជាងនេះ គឺបង្កើតទីតាំងការហោះហើរ និងការចុះចតរបស់យានអវកាសសម្រាប់ផ្នែកអាកាសចរណ៍អវកាស ។

ក្រុមហ៊ុន N-Ark បានកំណត់គោលដៅថា នឹងបង្កើតទីក្រុងអណ្តែតទឹកនេះឱ្យរួចរាល់នៅឆ្នាំ២០៣០ ។ ប៉ុន្តែក្រុមហ៊ុននេះពុំទាន់បញ្ជាក់ព័ត៌មានលម្អិតសំខាន់ៗ ដូចជា ៖ ទីតាំង និងការចំណាយដើមទុនសម្រាប់ដំណើរការគម្រោងសាងសង់ទីក្រុងអណ្តែតទឹកទេ ។

គួរបញ្ជាក់ថា មិនមែនមានតែប្រទេសជប៉ុនមួយទេ ដែលមានគម្រោងបង្កើតទីក្រុងអណ្តែតទឹក កន្លងមក ប្រទេសកូរ៉េខាងត្បូងក៏បានប្រកាសពីគម្រោងបង្កើតទីក្រុងអណ្តែតទឹកនៅទីក្រុង Busan ដែរ ដែកនឹងទទួលមនុស្សឱ្យរស់នៅចំនួន១សែននាក់ ។ រីឯប្រទេសហូឡង់ បានបង្កើតទីក្រុងអណ្តែតទឹក និងសាងសង់ផ្ទះជាច្រើនខ្នងសម្រាប់ឱ្យពលរដ្ឋរស់នៅកាលពីឆ្នាំ២០២១ ៕

ដើម្បីទាក់ទាញអតិថិជន ភោជនីយដ្ឋានមួយក្នុងប្រទេសវៀតណាមដែលទើបនឹងបើកថ្មីៗ បានបង្កើតម៉ឺនុយអាហារប្លែកៗជាច្រើនដូចជា “មីទឹកដោះគោគុជ” ដែលបច្ចុប្បន្នកំពុងទទួលបានការចាប់អារម្មណ៍ខ្លាំងពេញបណ្តាញសង្គមទាំងក្នុង និងក្រៅប្រទេស។
ភោជនីយដ្ឋាន Yu Tang ដែលមានមូលដ្ឋាននៅទីក្រុងហាណូយ ប្រទេសវៀតណាម គឺកំពុងមានប្រជាប្រិយភាពខ្លាំងណាស់ ដោយសារម៉ឺនុយថ្មីគឺ “មីទឹកដោះគោគុជ” ជាមួយរសជាតិប្លែកមិនធ្លាប់មាន មនុស្សជាច្រើនបានសរសើរមិនដាច់ពីមាត់ថាមានរសជាតិឆ្ងាញ់អស្ចារ្យ។

តែទឹកដោះគោគុជ ឬ Bubble Milk tea គឺជាភេសជ្ជៈដ៏ពេញនិយមបំផុតមួយសម្រាប់យុវវ័យទូទាំងពិភពលោក ដោយសារតែវាមានរសជាតិប្លែកបូករួមជាមួយគុជខ្មៅដ៏ស្រទន់ បានកំពុងធ្វើឱ្យមនុស្សជាច្រើនញៀននឹងភេសជ្ជៈនេះខ្លាំងណាស់។ ខណៈពេលដែលភេសជ្ជៈនេះកំពុងល្បី ភោជនីយដ្ឋានវៀតណាមមួយក៏ព្យាយាមទាញយកអត្ថប្រយោជន៍ពីភេសជ្ជៈនេះ ដើម្បីទាក់ទាញអតិថិជន ជាមួយម៉ឺនុយថ្មីប្លែកគឺ “មីទឹកដោះគោគុជ”។ រូបមន្តគឺយកតែទឹកដោះគោគុជធ្វើជាស៊ុបក្តៅៗស្រូបលើមី អមជាមួយសាច់គោ និងគុជខ្មៅ គួបផ្សំនឹងយុទ្ធសាស្ត្រទីផ្សារគួរឱ្យចាប់អារម្មណ៍ បានធ្វើឱ្យមុខម្ហូបនេះល្បីខ្លាំងបំផុតក្នុងពិភពអ៊ីនធឺណិត។

ទោះជាយ៉ាងណាម៉ឺនុយថ្មីនេះក៏មានមតិចម្រុះផងដែរ ដោយអ្នកខ្លះថា វាមានរសជាតិមិនសូវឆ្ងាញ់នោះទេ ដោយសាររសជាតិនីមួយៗមិនចូលគ្នាទាល់តែសោះ មានន័យថា មីដោយមី ទឹកដោះគោដោយទឹកដោះគោ គុជដោយគុជទៅ ហើយអ្នកខ្លះទៀតក៏ថា ម៉ឺនុយថ្មីនេះគឺពិតជាមានរសជាតិឆ្ងាញ់ប្លែកដែលពួកគេមិនធ្លាប់សាកពីមុនមកឡើយ។ ហេតុនេះសម្រាប់អ្នកដែលធ្វើដំណើរទៅហាណូយ ហើយចង់ពិសោធរសជាតិនៃ “មីទឹកដោះគោគុជ” អ្នកអាចទៅភោជនីយដ្ឋាន Yu Tang ដោយម៉ឺនុយថ្មីនេះមានតម្លៃជិត ៤ ដុល្លារក្នុងមួយចាន។

គួរបញ្ជាក់ដែរថា នេះមិនមែនជាលើកទីមួយទេ ដែលភោជនីយដ្ឋានវៀតណាមបានបង្កើតម៉ឺនុយប្លែកនេះ។ កាលពីមុនហាងកាហ្វេមួយក្នុងប្រទេសចិនក៏បានបង្កើតម៉ឺនុយប្លែកដែរ គឺកាហ្វេស្លឹកខ្ទឹម ហើយហាងមួយទៀត ក៏បានបង្កើតម៉ឺនុយ កាហ្វេរស់ជាតិសាច់ជ្រូកផងដែរ ក្នុងគោលបំណងទាក់ទាញអតិថិជន៕

ទស្សនិកជនជាអ្នកគាំទ្ររបស់បវរកញ្ញាចក្រវាលកម្ពុជាឆ្នាំ២០១៨ រឿន ណាត និងបុរសឯកកម្ពុជា លាវ វេងហួរ មានការភ្ញាក់ផ្អើលជាមួយនឹងអារម្មណ៍រីករាយក្រោយពីគូស្នេហ៍ថ្មីថ្មោងនេះបានសុំគ្នារៀបការនៅមុខប្រាសាទអង្គរវត្តយ៉ាងផ្អែមល្អែម។ អ្នកទាំងពីរបានប្រកាសចំណងស្នេហ៍ជាសាធារណៈចេញពីមាត់តែម្តងកាលពីខែមិថុនា ខណៈផ្ទុះពាក្យចចាមអារ៉ាមស្នេហានៅខែមីនា ក្នុងឆ្នាំ២០២៤នេះ។

កាលពីថ្ងៃទី១២ ខែតុលា ឆ្នាំ២០២៤ លាវ វេងហួរ Mister Friendship International2023 បានបង្ហោះរូបភាពសុំ រឿន ណាត Miss universe Cambodia 2018 ជាមិត្តស្រីរៀបការនៅមុខប្រាសាទអង្គរវត្តហើយចំថ្ងៃខួបកំណើតរបស់លោកផងដែរ។ លាវ វេងហួរ បានសរសេរថា « ថ្ងៃកំណើតដ៏សែនពិសេស អរគុណអូនដែលបានចូលមកជីវិតបង ដែលបានធ្វើឱ្យជីវិតបងមានសម្រស់និងមានន័យ បងសន្យាថាបងនឹងការពារបេះដូងអូនអស់មួយជីវិត»។ ការសុំគ្នារៀបការនេះខាង រឿន ណាត បានឆ្លើយយល់ព្រមចំពោះសំណើររបស់មិត្តប្រុសនឹងដឹកដៃចូលរោងការ។

ចំណែកឯចិញ្ចៀនដែល លាវ វេងហួរ សុំស្រីស្អាត រឿន ណាត ត្រូវបានគេដឹងមានតួលេខខ្ទង់ជាង២ម៉ឺនដុល្លារឯណោះ។ ដំណឹងល្អអ្នកទាំងពីរអ្នកគាំទ្រជាច្រើនរួមទាំងអ្នកក្នុងចង្កោមសិល្បៈបានចូលរួមសម្តែងនូវក្តីត្រេកអរចំពោះអ្នកទាំងពីរទោះបីជាមានទំនាក់ទំនងគ្នាមិនយូរឆ្នាំក្តីប៉ុន្តែបង្ហាញពីភាពច្បាស់លាស់ចំពោះគ្នា។

គួរបញ្ជាក់ថា ស្នេហាប្រុសសង្ហា លាវ វេងហួរ និងស្រីស្អាត រឿន ណាត កាន់តែផ្អែមល្ហែមពីមួយថ្ងៃទៅមួយថ្ងៃធ្វើឱ្យអ្នកគាំទ្រច្រណែនមិនស្ទើរនោះទេសូម្បីតែឃ្លាតគ្នាមួយថ្ងៃក៏បង្ហោះសារនឹករលឹកគ្នាទៅហើយ។ អ្នកទាំងពីរបានធ្វើឱ្យមានពាក្យចចាមអារ៉ាមស្នេហាកាលពីខែមីនា ខណៈនៅខែមេសា វេងហួរ កាន់តែធ្វើឱ្យអ្នកគាំទ្រកាន់តែច្បាស់ពីទំនាក់ទំនងអ្នកទាំងពីរបន្ទាប់ពីលោកហៅ រឿន ណាតថាជា My Girlfriend ក្នុងពេលណែនាំនាងទៅកាន់បុរសឯកវៀតណាម។

អ្នកទាំងពីរក៏បានលាតត្រដាងទំនាក់ទំនងនិងប្រកាសពេញមាត់ៗតែម្តងថាជាគូស្នេហ៍នៅពេលអ្នកទាំងពីរបានចូលរួមផ្តល់បទសម្ភាសន៍ក្នុងកម្មវិធីកម្សាន្ត 3Fun កាលពីខែមិថុនា និងបានបង្ហើបដែរថាទំនាក់ទំនងបានចាប់ផ្តើមនៅពេលអ្នកទាំងពីរមានឱកាសសម្តែងខ្សែភាពយន្តខ្នាតធំជាមួយគ្នា៕