ប្រទេសស៊ុយអែត ៖ កាលពីថ្ងៃទី១៤ ខែតុលា ឆ្នាំ២០២៤ សារព័ត៌មានបរទេសរាយការណ៍ថា ប្រទេសស៊ុយអ៊ែតបានសាកល្បងប្រើប្រាស់សាឡាងអគ្គិសនីបើកបរដោយស្វ័យប្រវត្តិ ឬអាចបញ្ជាការបើកបរពីលើគោក សម្រាប់ដឹកអ្នកដំណើរឆ្លងទន្លេនៅទីក្រុង Stockholm ។ នេះជាជម្រើសការធ្វើដំណើរដ៏ល្អមួយ ដែលអាចជួយកាត់បន្ថយការបំពុលបរិស្ថានមួយបានកម្រិតធំ ។

វាធ្វើឱ្យ Stockholm ក្លាយជាទីក្រុងដំបូងគេនៅលើពិភពលោក ដែលបានប្រើប្រាស់បច្ចេកវិទ្យាសាឡាងបើកបរដោយស្វ័យប្រវត្តិសម្រាប់ផ្តល់សេវាកម្មដល់ពលរដ្ឋ ខណៈបច្ចុប្បន្ន ក្រុមហ៊ុនជាច្រើនបានផលិតរថយន្តអគ្គិសនីប្រកួតប្រជែងគ្នានៅលើទីផ្សារ ។

សាឡាងអគ្គិសនីមានឈ្មោះថា «MF Estelle» មានថ្មទំហំ១៨៨គីឡូវ៉ាត់ម៉ោង ដែលអាចប្រើប្រាស់បានរយៈពេលយូរបំផុតចំនួន១៥ម៉ោងក្នុង១ថ្ងៃ និងបើកបរក្នុងល្បឿន១២គីឡូម៉ែត្រក្នុង១ម៉ោង ។ សាឡាងអគ្គិសនីមានប្រវែងសរុប១២ម៉ែត្រ និងអាចផ្ទុកអ្នកដំណើរ ព្រមទាំងបុគ្គលិកសាឡាង ប្រមាណ២៥នាក់ ដោយសាឡាងពុំត្រូវការអ្នកបើកបរទេ ។ ប៉ុន្តែត្រូវមានភ្នាក់ងារមើលការខុសត្រូវ, រៀបចំសណ្តាប់ធ្នាប់ក្នុងសាឡាង និងគ្រប់គ្រងសាឡាងករណីកើតហេតុការណ៍អាសន្ន ។

ការដឹកអ្នកដំណើរឆ្លងទន្លេ គឺស្ថិតនៅក្រោមការបញ្ជាប្រព័ន្ធបើកបរពីបន្ទប់គ្រប់គ្រងនៅលើគោក ដោយប្រើប្រាស់បច្ចេកវិទ្យាបើកបរសាឡាងដោយស្វ័យប្រវត្តិរបស់ក្រុមហ៊ុនស៊ីប៉ាស់ ។ ក្រៅពីនេះ ក៏មានកាមេរ៉ាថតការបើកបរនៅជុំវិញសាឡាង ៣៦០ដឺក្រេ ដើម្បីឱ្យអ្នកបញ្ជាការបើកបរអាចត្រួតពិនិត្យសុវត្ថិភាពគ្រប់ពេលវេលា ។

ក្រុមហ៊ុនស៊ីប៉ាស់បានសាកល្បងប្រើប្រាស់សាឡាងអគ្គិសនីដឹកអ្នកដំណើរជាក់ស្តែងរវាងតំបន់ខុមហូលម៉េន និងតំបន់សូលឌឺ បេឡាសត្រេន នៅទីក្រុង Stockholm ។ បច្ចុប្បន្ន មានប្រទេសជាច្រើនចាប់អារម្មណ៍ចង់ប្រើប្រាស់សាឡាងអគ្គិសនី ជាពិសេស ប្រទេសស្ថិតនៅជាប់មាត់ទន្លេ ដោយសារការប្រើប្រាស់ពុំប៉ះពាល់បរិស្ថាន និងចំណាយដើមទុនតិច ។

ចំណែកអ្នកជំនាញលើកឡើងថា សាឡាងអគ្គិសនីនឹងជួយឱ្យពលរដ្ឋស៊ុយអែតងាកមកធ្វើដំណើរតាមសាឡាងកាន់តែច្រើន ដោយសារវាពុំប៉ះពាល់បរិស្ថាន ។ ក្រុមហ៊ុនគួរតែបង្កើនចំនួនសាឡាងបន្ថែមទៀតដើម្បីផ្តល់សេវាកម្មដឹកអ្នកដំណើរនៅទីក្រុង Stockholm និងទីក្រុងផ្សេងៗនៅទូទាំងពិភពលោក នាថ្ងៃអនាគត ៕

បរទេស៖ ក្រុមហ៊ុនជប៉ុន Honda ថ្មីៗនេះបានសម្ពោធរោងចក្រផលិតរថយន្តអគ្គិសនីដំបូងគេបង្អស់នៅក្នុងប្រទេសចិន ដោយមានសមត្ថភាពផលិតរថយន្តប្រចាំឆ្នាំចំនួន ១២០,០០០ គ្រឿង។
យោងតាមគេហទំព័របរទេស Yahoo finance រោងចក្រថ្មីនេះគឺមានឈ្មោះថា Dongfeng Honda ដែលជាក្រុមហ៊ុនបណ្តាក់ទុនរួមគ្នារវាងក្រុមហ៊ុន Honda របស់ជប៉ុន និងក្រុមហ៊ុន Dongfeng Motor របស់ប្រទេសចិន។ វាមានទីតាំងនៅទីក្រុង Wuhan ខេត្ត Hubei គឺជារោងចក្រផលិតរថយន្តថាមពលថ្មី (NEV) ដំបូងបង្អស់របស់ Honda នៅលើពិភពលោក។

នេះមានន័យថា ក្រុមហ៊ុន Honda បានបើករោងចក្រផលិតរថយន្តអគ្គិសនីដំបូងបង្អស់នៅលើពិភពលោកក្នុងប្រទេសចិន។ រោងចក្រនេះមានសមត្ថភាពផលិតម៉ូដែលរថយន្តអគ្គិសនីមួយចំនួនដូចជា Lingxi L និង Ye S7 ប្រចាំឆ្នាំប្រហែល ១២០,០០០ គ្រឿង ដោយបច្ចុប្បន្នមានបុគ្គលិកចំនួន ៨០០ នាក់ហើយ។ ការបើករោងចក្រថ្មីនេះគឺជាផ្នែកមួយនៃគោលដៅបរិស្ថានកាន់តែទូលំទូលាយរបស់ក្រុមហ៊ុន Honda ដើម្បីសម្រេចបាននូវអព្យាក្រឹតភាពកាបូនសម្រាប់ផលិតផលទាំងអស់ និងសកម្មភាពសាជីវកម្មរបស់ខ្លួននៅឆ្នាំ ២០៥០។

បច្ចុប្បន្នក្រុមហ៊ុន Honda កំពុងពន្លឿនកិច្ចខិតខំប្រឹងប្រែងផ្នែកអគ្គិសនីរបស់ខ្លួននៅក្នុងប្រទេសចិន ដោយគ្រោងនឹងដាក់បង្ហាញរថយន្តថ្មីៗរបស់ខ្លួនចំនួន ១០ ម៉ូដែលក្នុងប្រទេសចិននៅឆ្នាំ ២០២៧ រួមទាំង e:N Series ដែលដាក់លក់នៅឆ្នាំ ២០២២ និង Ye Series ដែលជាស៊េរី EV ជំនាន់ក្រោយ។ ជាមួយនឹងម៉ូដែលទាំងនេះ ក្រុមហ៊ុន Honda កំពុងកំណត់គោលដៅលក់រថយន្ត EV ១០០% នៅក្នុងទីផ្សារប្រទេសចិននៅឆ្នាំ ២០៣៥។ ទោះជាយ៉ាងណាក្នុងរយៈពេល ៩ ខែដំបូងនៃឆ្នាំនេះ ក្រុមហ៊ុនបានលក់រថយន្តចំនួន ៥៨៨,០១៨ គ្រឿងនៅក្នុងប្រទេសចិន ធ្លាក់ចុះ ២៩.២៧% បើធៀបនឹងរយៈពេលដូចគ្នាកាលពីឆ្នាំមុន។

ដូច្នេះការបើករោងចក្រថ្មីនៅទីនេះគឺបើកក្នុងបរិបទដែលក្រុមហ៊ុនផលិតរថយន្តជប៉ុន រួមទាំងក្រុមហ៊ុន Honda កំពុងមើលឃើញការធ្លាក់ចុះនៃការលក់យ៉ាងឆាប់រហ័សនៅក្នុងទីផ្សារប្រទេសចិន។ ទោះបីជាយ៉ាងនេះក្តី លោក Toshihiro Mibe នាយកប្រតិបត្តិក្រុមហ៊ុន Honda បាននិយាយថា “លោកនឹងដំណើរការរោងចក្រថ្មីនេះដោយរលូន និងស្ថិរភាព ក៏ដូចជាផ្តល់នូវម៉ូដែល EV ជាច្រើនដែលមានគុណភាពខ្ពស់បំផុតដល់អតិថិជននៅក្នុងប្រទេសចិន តាមរយៈការខិតខំប្រឹងប្រែងរបស់យើងដើម្បីពង្រីកភាពរីករាយសម្រាប់អតិថិជន និងសង្គមរបស់យើង៕

តៃវ៉ាន់ ៖ កងទ័ពចិនបានចាប់ផ្តើមធ្វើសមយុទ្ធជាថ្មីនៅជុំវិញកោះតៃវ៉ាន់ កាលពីថ្ងៃទី១៤ ខែតុលា ឆ្នាំ២០២៤ ហើយបញ្ជាក់ថា វាជាការផ្តល់សញ្ញាទៅកាន់ឥរិយាបថបែងចែកទឹកដីរបស់កងទ័ពឯករាជ្យតៃវ៉ាន់ ។ ការធ្វើសមយុទ្ធរបស់កងទ័ពចិនលើកនេះពុំបានកំណត់ថា នឹងបញ្ចប់នៅថ្ងៃណាទេ ដែលធ្វើឱ្យរដ្ឋាភិបាលទីក្រុងតៃប៉ិរបស់តៃវ៉ាន់ចេញមុខថ្កោលទោ.ស ចិនភ្លាមៗ ។

ចិនបានប្រកាសធ្វើសមយុទ្ធកងទ័ពនេះ គឺក្រោយពីប្រធានាធិបតីតៃវ៉ាន់ លោក Lai Ching-te ថ្លែងសុន្ទរកថានៅថ្ងៃបុណ្យជាតិ កាលពីសប្តាហ៍មុន ។ ក្នុងសុន្ទរកថានេះ ប្រធានាធិបតីតៃវ៉ាន់បានប្រកាសប្រឆាំងនឹងការបង្រួបបង្រួមទឹកដីរបស់ចិនជាមួយតៃវ៉ាន់ ហើយលោកបញ្ជាក់ថា ទីក្រុងប៉េកាំងគ្មានសិទ្ធិមកលើតៃវ៉ាន់ទេ បើទោះជាលោកធ្លាប់ស្នើសុំសហការផ្នែកមួយចំនួនជាមួយក្រុងប៉េកាំងក្តី ។

សុន្ទរកថារបស់ប្រធានាធិបតីតៃវ៉ាន់បានធ្វើឱ្យចិនថ្កោលទោសយ៉ាងខ្លាំង ហើយនាពេលថ្មីៗនេះ មេបញ្ជាការភូមិភាគខាងកើតរបស់កងទ័ពរំដោះប្រជាជនចិននិយាយថា ការធ្វើសមយុទ្ធ «Joint Sword-2024B» បានចាប់ផ្តើមនៅច្រកសមុទ្រតៃវ៉ាន់ និងតំបន់នៅភាគខាងជើង, ខាងត្បូង និងខាងកើតរបស់តៃវ៉ាន់ ។

កងទ័ពចិនបានចេញសេចក្តីប្រកាសជាភាសាចិន និងអង់គ្លេសថា ការធ្វើសមយុទ្ធ គឺជាការដាស់តឿនមួយចំពោះឥរិយាបថផ្តាច់ទឹកដីរបស់កងទ័ពឯករាជ្យតៃវ៉ាន់ ។ វាជាប្រតិបត្តិការស្របច្បាប់ និងចាំបាច់ដើម្បីការពារអធិបតេយ្យ និងប្រទេសចិនតែមួយ ។

ប៉ុន្តែកងទ័ពចិនពុំបានបញ្ជាក់ថា ពួកគេធ្វើសមយុទ្ធបាញ់គ្រាប់ពិត ឬធ្វើសមយុទ្ធនៅតំបន់ហាមឃាត់ទេ ។ រីឯមន្ត្រីតៃវ៉ាន់និយាយថា ការធ្វើសមយុទ្ធរបស់ចិន គឺជាការញុះញង់ឈានទៅបំផ្លាញស្ថិរភាព និងសន្តិភាពក្នុងតំបន់យ៉ាងខ្លាំង ។ មន្ត្រីតៃវ៉ាន់បន្តថា បើទោះជាចិនគំរាមផ្នែកនយោបាយ, កងទ័ព និងសេដ្ឋកិច្ចយ៉ាងខ្លាំងក្តី ប៉ុន្តែតៃវ៉ាន់នឹងពុំចុះចាញ់ឡើញ ។

មន្ត្រីសន្តិសុខជាន់ខ្ពស់របស់តៃវ៉ាន់ពុំបញ្ចេញឈ្មោះម្នាក់បាននិយាយមកកាន់សារព័ត៌មានរ៉យទ័រថា ចិនធ្វើសមយុទ្ធដើម្បីបិទច្រកកំពង់ផែនានានៅភាគខាងជើងតៃវ៉ាន់ ព្រមទាំងបិទកំពង់ផែអន្តរជាតិ ។ វាដូចគ្នានឹងការធ្វើសមយុទ្ធបិទផ្លូវការធ្វើដំណើរចូលតៃវ៉ាន់របស់កងទ័ពបរទេស ។

កាលពីថ្ងៃទី១៣ ខែតុលា កន្លងមក សារព័ត៌មានតៃវ៉ាន់រាយការណ៍ថា នាវាផ្ទុកយន្តហោះរបស់ចិនបានបើកមកកាន់ភាគខាងត្បូងកោះតៃវ៉ាន់ ដោយឆ្លងកាត់ច្រកសមុទ្រយុទ្ធសាស្ត្រ «បាស៊ិ» ។ ច្រកសមុទ្រយុទ្ធសាស្ត្រនេះ គឺជាការបែងចែកទឹកដីរវាងតៃវ៉ាន់ និងហ្វីលីពីន ហើយវាតភ្ជាប់សមុទ្រចិនខាងត្បូងទៅកាន់មហាសមុទ្រប៉ាស៊ីហ្វិក ។

គួរបញ្ជាក់ថា កាលពីខែឧសភា ឆ្នាំ២០២៤ ចិនធ្លាប់ធ្វើសមយុទ្ធ «Joint Sword-2024A» នៅជុំវិញកោះតៃវ៉ាន់ ចំនួន២ថ្ងៃ ក្រោយពីលោក Lai Ching-te ឡើងកាន់តំណែងជាប្រធានាធិបតីតៃវ៉ាន់មិនយូរប៉ុន្មាន ។ ការធ្វើសមយុទ្ធលើកនោះ ចិនប្រាប់ថា វាជាការថ្កោលទោសចំពោះការស្បថចូលកាន់តំណែងរបស់ប្រធានាធិបតីតៃវ៉ាន់ ដែលមានបំណងផ្តាច់ខ្លួនពីចិន ៕