កម្មវិធីប្រកួតសម្រស់ថ្មី Miss Mera Cambodia ដែលបង្កើតដោយកញ្ញា ខាត់ ស្រីច័ន្ទ សុខចិត្តប្រកាសលក់ដីបន្ទាន់យកមកធ្វើកម្មវិធីកំពុងត្រូវបានសាធារណជនជាអ្នកស្នេហាវិស័យបវរកញ្ញាចាប់អារម្មណ៍។ ភាពចាប់អារម្មណ៍នេះគឺដោយសារតែរូបភាពរបស់បេក្ខភាពប្រកួតចេញមកស្អាតៗភ្លឹងចាប់ប្លង់បានល្អ។ លើសពីនេះខាងអន្តរជាតិក៏មានការចាប់អារម្មណ៍កម្មវិធីថ្មីនេះដូចគ្នាដែរ។
នៅថ្ងៃទី១៧ ខែតុលា តាមការបង្ហោះពីផេក review តាមអារម្មណ៍ បានឱ្យដឹងថា «មានកម្មវិធី International ទាក់ទងមកចង់បានបេក្ខភាព Miss Mera Cambodia 2024 ទៅតំណាងកម្ពុជា សុខចិត្តពន្យារការប្រកួតចាំទទួល តែ Organization សូមពិចារណាសិន»។
មុននឹងដំណឹងល្អខាងអន្តរជាតិចាប់អារម្មណ៍មកកាន់កម្មវិធីកញ្ញា ខាត់ ស្រីច័ន្ទ កម្មវិធីប្រកួតដែលទើបបង្កើតឡើងថ្មីថ្មោងប្រកួតក្នុងស្រុកនេះក៏ត្រូវបានសាធារណជនចាប់អារម្មណ៍ដូចគ្នា។ ទស្សនិកជនបានកត់សម្គាល់ឃើញថាស្នាដៃក្រុមការងារថតរូបរបស់កម្មវិធីនេះចាប់ប្លង់នៃបេក្ខនារីបានល្អជាមួយនឹងសម្រស់ដ៏ស្រស់ស្អាតនៃប្រាង្គប្រាសាទខ្មែរ និងទេសភាពធម្មជាតិ។
ក្នុងដំណើរទស្សនៈកិច្ចរយៈពេល៣ថ្ងៃនៅលើទឹកដីខេត្តសៀមរាបរបស់បេក្ខភាពទាំង១៦នាក់គឺបានបង្ហាញសកម្មភាពជាច្រើនទាំងប្រាសាទខ្មែរ ការងារសង្គម ស្លៀកពាក់បុរាណ កន្លែងផលិត វត្ថុអនុស្សាវរីយ៍ និងសកម្មភាពនានាទៀត។មិនត្រឹមតែរូបភាពចេញមកស្អាតៗទេ ទាំង Poster និង វីដេអូ ក៏ត្រូវបានគេលើកឡើងដែរថារៀបចំបានល្អ។
កម្មវិធី Miss Mera Cambodia ទើបតែបង្កើតឡើងនៅក្នុងឆ្នាំនេះក្រោមការគ្រប់គ្រងរបស់ ខាត់ ស្រីច័ន្ទ បន្ទាប់ពីនាងដកខ្លួនពីកម្មវិធី Miss Planet Cambodia ។ កញ្ញា ខាត់ ស្រីច័ន្ទ ក៏មានមហិច្ឆាខ្ពស់មួយក្នុងវិស័យបវរញ្ញារៀបចំឱ្យស្របតាមលក្ខណៈស្តង់ដារដោយសុខចិត្តចេញមកប្រកាសលក់ដីរបស់ខ្លួនជាបន្ទាន់ទៀតដើម្បីយកលុយមករៀបចំកម្មវិធី។ មហិច្ឆតារបស់នាងកាន់តែខ្ពស់ដោយសារតែឃើញបណ្តាអ្នកជិតខាងមើលងាយពេកថាកម្ពុជារៀបចំស្របតាមលក្ខណៈមិនស្តង់ដារ៕
