យោងតាមគេហទំព័របរទេស Forbes នៅលើពិភពលោកយើងនេះមានកំពូលមហាសេដ្ឋីសរុបទាំងអស់ចំនួន ២,៧៨១ នាក់ហើយ ក្នុងនោះមានប្រទេសចំនួន ១០ ប៉ុណ្ណោះដែលសម្បូរទៅដោយមហាសេដ្ឋីច្រើនជាងគេលើពិភពលោកសម្រាប់ឆ្នាំ ២០២៤។ ដូច្នេះប្រទេសដែលមានមហាសេដ្ឋីច្រើនជាងគេនោះគឺ៖

១.សហរដ្ឋអាមេរិក៖ គឺជាប្រទេសដែលមានមហាសេដ្ឋីសរុបចំនួន ៨១៣ នាក់ ជាមួយនឹងទ្រពសកម្មសរុប ៥,៧ ពាន់ពាន់លានដុល្លារ។ ក្នុងនោះមហាសេដ្ឋីដែលមានជាងគេនៅសហរដ្ឋអាមេរិកគឺលោក Elon Musk ជាមួយទ្រពសម្បត្តិសរុបទាំងអស់ ២៤៧.៤ ពាន់លានដុល្លារ។

២.ប្រទេសចិន៖ ប្រទេសអាស៊ីមួយនេះវិញក៏មិនធម្មតាដែរ ដោយសារគិតត្រឹមឆ្នាំ ២០២៤ ប្រទេសនេះមានមហាសេដ្ឋីចំនួន ៤០៦ នាក់ហើយ ជាមួយទ្រពសកម្មសរុប១,៣ ពាន់ពាន់លានដុល្លារ។ ហើយមហាសេដ្ឋីដែលមានជាងគេនៅក្នុងប្រទេសចិនគឺលោក Zhong Shanshan ជាមួយទ្រពសម្បត្តិ ៦២,៣ ពាន់លានដុល្លារ។

៣.ប្រទេសឥណ្ឌា៖ អ្នកណាថាឥណ្ឌាជាប្រទេសក្រីក្រច្រឡំធំហើយ នៅឆ្នាំ ២០២៤ នេះប្រទេសឥណ្ឌាមានមហាសេដ្ឋីសរុប ២០០ នាក់ ដោយមានទ្រពសកម្មសរុប ៩៥៤ ពាន់លានដុល្លារ។ អ្នកមានបំផុតនៅក្នុងប្រទេសឥណ្ឌាគឺលោក Mukesh Ambani ជាមួយទ្រពសម្បត្តិ ១១៦ ពាន់លានដុល្លារ។

៤.ប្រទេសអាល្លឺម៉ង់៖ គឺជាប្រទេសអឺរ៉ុបដែលមានចំនួនមហាសេដ្ឋី ១៣២ នាក់ ជាមួយទ្រពសកម្មសរុប ៦៤៤ ពាន់លានដុល្លារ។ លោក Klaus-Michael Kuehne គឺជាមហាសេដ្ឋីដែលមានជាងគេនៅក្នុងប្រទេសអាល្លឺម៉ង់ ជាមួយទ្រពសម្បត្តិសរុបទាំងអស់ ៣៩,២ ពាន់លានដុល្លារ។

៥.ប្រទេសរុស្សី៖ ប្រទេសធំជាងគេលើពិភពលោកយើងនេះ ជាប់ចំណាត់ថ្នាក់ទី ៥ ជាប្រទេសមានមហាសេដ្ឋីចំនួន ១២០ នាក់ ដោយមានទ្រពសកម្មសរុប ៤៧៤ ពាន់លានដុល្លារ។ ហើយលោក Vagit Alekperov គឺជាមហាសេដ្ឋីមានជាងគេនៅក្នុងប្រទេសរុស្សី ជាមួយទ្រពសម្បត្តិសរុបទាំងអស់ ២៨,៦ ពាន់លានដុល្លារ៕

ប្រទេសថៃ ៖ នៅខែតុលា ឆ្នាំ២០២៤ រដ្ឋាភិបាលថៃមានគម្រោងប្រមូលប្រាក់ថ្លៃស្ទះចរាចរណ៍ពីពលរដ្ឋដើម្បីកាត់បន្ថយការស្ទះចរាចរណ៍នៅទីក្រុងបាងកក ដោយរដ្ឋាភិបាលថៃបញ្ជាក់ថា ប្រាក់ថ្លៃស្ទះចរាចរណ៍ (Congestion Fee) ដែលរដ្ឋាភិបាលមានគម្រោងប្រមូលពីពលរដ្ឋនាថ្ងៃអនាគត ពុំមែនជារឿងថ្មីទេ ពីព្រោះប្រទេសជាច្រើនលើពិភពលោក បានប្រមូលប្រាក់ថ្លៃស្ទះចរាចរណ៍យូរមកហើយ ។

ជាក់ស្តែង សិង្ហបុរី គឺជាប្រទេសដំបូងគេដែលអនុវត្តគោលនយោបាយប្រមូលប្រាក់ថ្លៃស្ទះចរាចរណ៍ក្នុងទីក្រុង កាលពីឆ្នាំ១៩៧៥ ។ ក្រៅពីនេះ ទីក្រុងជាច្រើនលើពិភពលោក ក៏បានអនុវត្តគោលនយោបាយប្រមូលប្រាក់ថ្លៃស្ទះចរាចរណ៍ពីពលរដ្ឋផងដែរ ដូចជា ៖ ទីក្រុងឡុងដ៍, ស្តុកហម, មីឡា និងហ្គូថិនបឺក ។

ការប្រមូលប្រាក់ថ្លៃស្ទះចរាចរណ៍ គឺជាការប្រមូលប្រាក់ពីរថយន្តណាដែលបើកបរចូលទីក្រុង ក្នុងអំឡុងពេលស្ទះចរាចរណ៍ខ្លាំង (ដូចជា ៖ ពេលព្រឹក ឬល្ងាច ដែលមានពលរដ្ឋធ្វើដំណើរទៅធ្វើការ និងចេញពីធ្វើការច្រើន) ។ ការប្រមូលប្រាក់នេះក្នុងគោលបំណងកុំឱ្យពលរដ្ឋបើកបររថយន្តផ្ទាល់ខ្លួនចូលទីក្រុង ដើម្បីកាត់បន្ថយការកកស្ទះ និងកាត់បន្ថយខ្យល់ពុល ហើយវាបានធ្វើឱ្យពលរដ្ឋរស់នៅទីក្រុងពុំពេញចិត្ត ដោយសារពិបាកធ្វើដំណើរ ឬត្រូវចំណាយប្រាក់បន្ថែមទៀត ។ ប៉ុន្តែប្រាក់ដែលរដ្ឋាភិបាលប្រមូលពីពលរដ្ឋថ្លៃស្ទះចរាចរណ៍ គឺនឹងយកទៅបង្កើតប្រយោជន៍ផ្សេងៗ ។

ប្រទេសសិង្ហបុរីបានចាប់ផ្តើមប្រមូលប្រាក់ថ្លៃស្ទះចរាចរណ៍នាពេលព្រឹក តាំងពីឆ្នាំ១៩៧៥ បន្ទាប់មក សិង្ហបុរីក៏បានប្រមូលប្រាក់ដោយស្វ័យប្រវត្តិ ដោយការកំណត់ពេលវេលា កាលពី១៩៩៨ ។ វាបានជួយកាត់បន្ថយការស្ទះចរាចរណ៍១៣% ហើយរថយន្តអាចបើកបរលឿនជាងមុន២២% ។

ចំណែកទីក្រុងឡុងដ៍ ប្រទេសអង់គ្លេស ដែលមានការស្ទះចរាចរណ៍ខ្លាំងបំផុតលើពិភពលោក នៅឆ្នាំ២០២៣ ពេលពិចារណាពីការធ្វើដំណើររបស់ពលរដ្ឋក្នុងទីក្រុង រដ្ឋាភិបាលក៏ចាប់ផ្តើមប្រមូលប្រាក់ថ្លៃស្ទះចរាចរណ៍ប្រចាំថ្ងៃពីរថយន្តបើកបរក្នុងទីក្រុង គឺចាប់ពីម៉ោង៧ព្រឹក ដល់ម៉ោង៦និង៣០នាទីល្ងាច (សម្រាប់ថ្ងៃធម្មតា) ។ ក្រោយការអនុវត្តគោលនយោបាយនេះ បានជួយឱ្យការស្ទះចរាចរណ៍ធ្លាក់ចុះ ១៥% និងកាត់បន្ថយភាពយឺតយ៉ាវក្នុងការធ្វើដំណើរ ៣០% ។

ប៉ុន្តែមតិផ្សេងៗនិយាយថា ទីក្រុងដែលទទួលបានជោគជ័យក្នុងការកាត់បន្ថយការស្ទះចរាចរណ៍ តែងតែមានមធ្យោបាយដឹកជញ្ជូនសាធារណៈគ្រប់គ្រាន់ ដូចជា ៖ សិង្ហបុរី មានប្រព័ន្ធដឹកជញ្ជូនតាមរថភ្លើងក្រោមដីខ្វាត់ខ្វែងពេញទីក្រុង ដែលថ្លៃសំបុត្រស្មើពី១ដុល្លារ ទៅ២.៥ដុល្លារសិង្ហបុរី ។ ក្រៅពីនេះ សិង្ហបុរីក៏មានរថយន្តក្រុងសម្រាប់ដឹកអ្នកដំណើរទូទាំងប្រទេស ។

រីឯទីក្រុងឡុងដ៍ គឺជាទីក្រុងមានបណ្តាញដឹកជញ្ជូនអ្នកដំណើរធំបំផុតលើពិភពលោក រួមមាន ៖ រថភ្លើងក្រោមដី, រថភ្លើងធម្មតា និងរថយន្តក្រុងគ្រប់កន្លែងក្នុងទីក្រុង ។ រីឯតម្លៃសំបុត្រសម្រាប់ជិះរថភ្លើងក្រោមដី គឺស្មើពី២.៨ផោន ទៅ៣.៤ផោន ។

ចំណែកទីក្រុងបាងកក ពុំមានបណ្តាញដឹកជញ្ជូនអ្នកដំណើរសម្បូរបែបគ្រប់កន្លែងដូចទីក្រុងទាំងនេះទេ ហើយទីក្រុងបាងកកមានបញ្ហាមួយចំនួន ដូចជា ៖ តម្លៃសំបុត្រធ្វើដំណើរតាមរថភ្លើងថ្លៃ និងបញ្ហាការតភ្ជាប់រវាងរថភ្លើងអាកាសនីមួយៗ ទើបធ្វើឱ្យពលរដ្ឋក្រុងបាងកក ត្រូវចំណាយថ្លៃធ្វើដំណើរច្រើនដំណាក់កាល ។

ជាក់ស្តែង ពលរដ្ឋក្រុងបាងកក ត្រូវចំណាយប្រាក់ជិះម៉ូតូឌុប រួចហើយពួកគេនឹងបន្តដំណើរតាមរថយន្តក្រុង ឬរថភ្លើងអាកាសទៀត ទើបទៅដល់គោលដៅ ។ ហេតុនេះ ពលរដ្ឋថៃភាគច្រើនបានជ្រើសរើសប្រើប្រាស់រថយន្តផ្ទាល់ខ្លួន ។

ទោះយ៉ាងណា រដ្ឋាភិបាលថៃបញ្ជាក់ថា គោលនយោបាយប្រមូលប្រាក់ថ្លៃស្ទះចរាចរណ៍ គឺជាការចាប់ផ្តើមកាត់បន្ថយបញ្ហាស្ទះចរាចរណ៍ ពីព្រោះបើតាមការចាត់ចំណាត់ថ្នាក់ទីក្រុងស្ទះចរាចរណ៍បំផុតលើពិភពលោក នៅឆ្នាំ២០២៣ គឺទីក្រុងបាងកក ជាប់ចំណាត់ថ្នាក់ទី៤ ។

ដូច្នេះ យើងនឹងរង់ចាំតាមដានបន្តថា តើការធ្វើដំណើរក្នុងទីក្រុងបាងកកនឹងមានសភាពដូចម្តេច នាថ្ងៃអនាគត? ហើយគោលនយោបាយប្រមូលប្រាក់ថ្លៃស្ទះចរាចរណ៍នឹងអាចអនុវត្តនៅទីក្រុងនេះបានដែរឬទេ?

ប្រទេសវៀតណាម ៖ កាលពីថ្ងៃទី២០ ខែតុលា ឆ្នាំ២០២៤ សារព័ត៌មានបរទេសរាយការណ៍ថា ក្រុមហ៊ុនវៀតណាមជាច្រើនបានទទួលការកុម្ម៉ង់ទិញផ្លែដូងស្រស់ពីប្រទេសចិន ហើយក្រុមហ៊ុនផ្សេងទៀតក៏ត្រៀមនាំចេញផលិតផលទៅចិនដែរ ក្រោយពីវៀតណាមទទួលបានការអនុម័តឱ្យនាំចេញដូងស្រស់ទៅចិន កាលពីខែសីហា ឆ្នាំ២០២៤ ។

លោក Cao Ba Dang Khoa អគ្គលេខាធិការសមាគមផ្លែដូងវៀតណាមបញ្ជាក់ថា ក្រុមហ៊ុនធំៗជាច្រើនរបស់វៀតណាមបានចុះហត្ថលេខានាំចេញដូងស្រស់ ចាប់ពី៣០ទូរ ទៅ៥០ទូរកុងទឺន័រទៅកាន់ប្រទេសចិន ក្នុងនោះក្រុមហ៊ុន១ ទទួលបានការកុម្ម៉ង់ទិញដូងពីចិន ចំនួន១.៥០០ទូរកុងទឺន័រ ។

លោក Cao Ba បន្តទៀតថា នេះជាសញ្ញាវិជ្ជមានសម្រាប់ការនាំចេញដូងវៀតណាមទៅកាន់ទីផ្សារចិននាថ្ងៃអនាគត ។ ប្រទេសវៀតណាមរំពឹងថា ប្រាក់ចំណូលបានពីការនាំចេញដូងទៅក្រៅប្រទេស នៅឆ្នាំ២០២៤ នឹងស្មើរហូតដល់១.២០០លានដុល្លារអាមេរិក ។

វៀតណាម គឺជាប្រទេសផលិតដូងដ៏ច្រើនស្ថិតក្នុងចំណាត់ថ្នាក់ទី៧ លើពិភពលោក ហើយវៀតណាមមានចម្ការដូងប្រមាណ២សែនហិកតា ក្នុងនោះចម្ការដូង១កន្លែង ក្នុងចំណោម៣កន្លែង គឺបានអនុវត្តការដាំដុះស្របតាមស្តង់ដាររបស់សហរដ្ឋអាមេរិក និងអឺរ៉ុប ។ ចម្ការដូងភាគច្រើនមានទីតាំងស្ថិតនៅខេត្តជាប់ឆ្នេរសមុទ្រភាគកណ្តាល និងតំបន់ដីសណ្តទន្លេមេគង្គ ។

គួរបញ្ជាក់ថា ផ្លែដូងរបស់វៀតណាមអាចប្រកួតប្រជែងជាមួយផ្លែដូងថៃបាន ដោយសារដូងវៀតណាមមានរសជាតិផ្អែម ដែលជាតម្រូវការក្នុងទីផ្សារក្រៅប្រទេសជាច្រើន ដូចជា ៖ តំបន់អឺរ៉ុប, សហរដ្ឋអាមេរិក, កាណាដា និងកូរ៉េខាងត្បូង ។ ក្រៅពីនេះ អតិថិជនចិនក៏បានសរសើរចំណីអាហារដែលផលិតពីដូងវៀតណាមផងដែរ ដូចជា ៖ នំ, គ្រីម (Cream) និងចាហួយ ។

យោងតាមរបាយការណ៍បញ្ជាក់ថា តម្លៃដូងថៃបានធ្លាក់ចុះនៅខែតុលា ឆ្នាំ២០២៤នេះ អាចក្លាយជាបញ្ហាប្រឈម និងធ្វើឱ្យក្រុមហ៊ុនថៃចាំបាច់ត្រូវតែផ្តោតលើតម្លៃ, ការវេចខ្ចប់ និងគុណភាពដូង ដើម្បីអាចប្រកួតប្រជែងជាមួយដូងវៀតណាម ។ ហេតុនេះ វានឹងអាចធ្វើឱ្យអតិថិជនចិនចូលចិត្តដូងថៃ និងកុម្ម៉ង់ទិញដូងពីប្រទេសថៃ ៕

ប្រទេសអង់គ្លេស ៖ សារមន្ទីរមួយកន្លែងនៅប្រទេសអង់គ្លេសបានប្រើប្រាស់បច្ចេកវិទ្យា AI បង្កើតជាសំឡេងសត្វស្លាបផុតពូជពីផែនដី ដើម្បីអាចជជែកជាមួយមនុស្ស ។ សំឡេងបង្កើតពី AI នេះ ពុំមែនជាសំឡេងសត្វតាមធម្មជាតិទេ ប៉ុន្តែវាជាសំឡេងដូចមនុស្សសម្រាប់ឱ្យគ្រោងឆ្អឹងសត្វស្លាបអាចទំនាក់ទំនងជាមួយអ្នកចូលសារមន្ទីរ ។

ការបង្កើតសំឡេងនេះក្នុងគោលបំណងឱ្យអ្នកចូលសារមន្ទីរ Museum Of Zoology អាចសួរសំណួរផ្សេងៗ និងជាការបង្កើតបទពិសោធន៍ថ្មីក្នុងការចូលសារមន្ទីរ ។ គេបានឮសំឡេងរបស់គ្រោងឆ្អឹងសត្វស្លាបនិយាយជាមួយអ្នកចូលសារមន្ទីរម្នាក់ ដែលសំឡេងនេះបញ្ជាក់ពីលក្ខណៈរបស់សត្វស្លាបផុតពូជមួយប្រភេទឈ្មោះ Dodo ។

សត្វស្លាប Dodo មានទំហំខ្លួនធំ និងពុំអាចហោះហើរបានទេ ហើយវាធ្លាប់មានជីវិតរស់នៅលើកោះម៉ូរីសៀស ក្នុងមហាសមុទ្រឥណ្ឌា ប៉ុន្តែបានផុតពូជកាលពីសតវត្សទី១៧ ។ បច្ចេកវិទ្យា AI ដែលធ្វើឱ្យគ្រោងឆ្អឹងសត្វស្លាប Dodo អាចទំនាក់ទំនងជាមួយមនុស្សនេះ គឺធ្វើឡើងដោយក្រុមហ៊ុនផ្នែកស្រាវជ្រាវបច្ចេកវិទ្យា ។ ក្រុមហ៊ុនបានប្រមូលព័ត៌មានពាក់ព័ន្ធនឹងវិទ្យាសាស្ត្រ និងស្រាវជ្រាវពីបរិស្ថានក្នុងអំឡុងពេលសត្វស្លាបនេះមានជីវិតលើផែនដី ដើម្បីបង្កើតសំឡេងឱ្យមានលក្ខណៈដូចសត្វនេះបំផុត ។

បច្ចេកវិទ្យា AI អាចជួយឱ្យគ្រោងឆ្អឹងសត្វ Dodo ឆ្លើយតបសំណួររបស់មនុស្សយ៉ាងឆាប់រហ័ស ព្រមទាំងចេះស្តាប់ភាសាមនុស្ស រហូតដល់២០ភាសា ។ ក្នុងសារមន្ទីរនេះ មិនមែនមានត្រឹមតែគ្រោងឆ្អឹងសត្វ Dodo ប៉ុណ្ណោះទេ ដែលអាចជជែកជាមួយមនុស្សបាន ប៉ុន្តែក្រុមហ៊ុនស្រាវជ្រាវបច្ចេកវិទ្យា ក៏បានប្រើប្រាស់បច្ចេកវិទ្យា AI ជាមួយគ្រោងឆ្អឹងសត្វផ្សេងទៀតផងដែរ ។

ហេតុនេះ អ្នកចូលទស្សនាសារមន្ទីរនឹងអាចសាកសួរសំណួរផ្សេងៗដែលចាប់អារម្មណ៍ដោយសេរី ។ ក្រៅពីនេះ ការប្រើប្រាស់បច្ចេកវិទ្យា AI ក្នុងសារមន្ទីរ ក៏បានទាក់ទាញចំណាប់អារម្មណ៍មនុស្សចូលសារមន្ទីរកាន់តែច្រើន ។ ប៉ុន្តែបច្ចុប្បន្ន បច្ចេកវិទ្យានេះពុំទាន់បានប្រើប្រាស់១០០% ទេ ដោយសារក្រុមហ៊ុនកំពុងសាកល្បងប្រើប្រាស់រយៈពេល១ខែ គឺចាប់ពីថ្ងៃទី១៥ ខែតុលា រហូតដល់ថ្ងៃទី១៥ ខែវិច្ឆិកា ឆ្នាំ២០២៤ ។

ក្រោយការសាកល្បងបច្ចេកវិទ្យា AI បង្កើតជាសំឡេងសត្វផុតពូជ សារមន្ទីរនឹងវិភាគព័ត៌មានផ្សេងៗ ដូចជា ៖ ការឆ្លើយតប និងប្រភេទការសន្ទនារវាងគ្រោងឆ្អឹងសត្វជាមួយមនុស្ស ដើម្បីពិចារណាពីគម្រោងប្រើប្រាស់បច្ចេកវិទ្យានេះ នាថ្ងៃអនាគត ៕

ប្រទេសថៃ ៖ វាបានក្លាយជារឿងមួយល្បីល្បាញនៅខែតុលា ឆ្នាំ២០២៤ និងធ្វើឱ្យរង្គោះរង្គឺក្នុងវិស័យសិល្បៈប្រទេសថៃ ករណីក្រុមហ៊ុន The iCON GROUP ដែលមានលោក វ៉ារ៉ាត់ផុន វ៉ារ៉ាត់វរ៉ាគុន (ឬថៅកែផុន) ជានាយកគ្រប់គ្រងក្រុមហ៊ុន ត្រូវបានជនរងគ្រោះជាច្រើននាក់ចោ.ទប្រកាន់ថា ក្រុមហ៊ុននេះបោកប្រាស់ពួកគេឱ្យជួយលក់ផលិតផលរហូតដល់អស់ប្រាក់ពីខ្លួន ។

ក្រោយមានការប្តឹងជាបន្តបន្ទាប់ពីជនរងគ្រោះទាំងនៅប្រទេសថៃ និងក្រៅប្រទេស នៅទីបំផុត សមត្ថកិច្ចក៏បានចាប់ខ្លួនជនពាក់ព័ន្ធជាមួយក្រុមហ៊ុន ចំនួន១៨នាក់ ដែលសុទ្ធតែមានតួនាទីជានាយកគ្រប់គ្រងក្នុងក្រុមហ៊ុន និងទទួលបានចំណូលយ៉ាងច្រើន ។ ជនពាក់ព័ន្ធដែលត្រូវបានសមត្ថកិច្ចចាប់ខ្លួន ក៏មានតារាសម្តែង៣រូបផងដែរ គឺអ្នកនាង ភីឆាយ៉ា វឌ្ឍនាមុនទ្រី (ហៅមីន), លោក យូរ៉ាណាន់ ផាម៉ុនមុនទ្រី (ហៅសែម ឬលោក ប៉ាតាវី), លោក បូសាកាន់ កាន់ថាថាវ៉ន (ហៅកាន់) ។

កាលពីថ្ងៃទី១៨ ខែតុលា ឆ្នាំ២០២៤ មេធាវីឈ្មោះ ដេឆា បានផ្តល់បទសម្ភាសន៍ទៅកាន់ប្រព័ន្ធផ្សព្វផ្សាយថា ក្រុមជនដែលសហការជាមួយក្រុមហ៊ុន The iCON GROUP រួមគ្នាបោកប្រា.ស់ ពលរដ្ឋ និងត្រូវបានសមត្ថកិច្ចចាប់ខ្លួននោះ គឺតុលាការពុំអនុញ្ញាតឱ្យពួកគេនៅក្រៅឃុំទេ បើទោះជាពួកគេមិនរត់គេចក្តី ពីព្រោះរឿងក្តីនេះមានជនរងគ្រោះជាច្រើននាក់ ។

តុលាការបញ្ជាក់ថា ជនជាប់ចោទម្នាក់ៗនឹងត្រូវជាប់ពន្ធនាគាររយៈពេលយូរឆ្នាំ ហើយជំហានបន្ទាប់ សមត្ថកិច្ចនឹងប្រមូលភស្តុតាងដើម្បីចាប់ខ្លួនជនពាក់ព័ន្ធជាមួយក្រុមហ៊ុន The iCON GROUP ផ្សេងទៀត ។ លោកមេធាវី ដេឆា បន្តថា តារាសម្តែង២នាក់ទៀតអាចប្រឈមនឹងការចាប់ខ្លួនដែរ គឺលោក បយប្រាកន ឆាត់ប៉ារិរ៉ាក់ និងលោក ដុមប្រាកនឡាំ ។

សមត្ថកិច្ចនឹងស៊ើបអង្កេតថា តើតារាសម្តែងទាំង២រូបនេះមានតួនាទីគ្រាន់តែផ្សព្វផ្សាយផលិតផលឱ្យក្រុមហ៊ុន The iCON GROUP ឬពួកគេបានអូសទាញមនុស្សផ្សេងទៀតឱ្យចាញ់បោកក្រុមហ៊ុន ។ ក្រៅពីនេះ ក៏មានការរឹបអូសទ្រព្យសម្បត្តិរបស់អតីតភរិយាលោក វ៉ារ៉ាត់ផុន វ៉ារ៉ាត់វរ៉ាគុន (ឬថៅកែផុន) ជានាយកគ្រប់គ្រងក្រុមហ៊ុន The iCON GROUP ពីព្រោះអតីតភរិយារូបនេះបានទទួលប្រាក់ពីក្រុមហ៊ុន ចំនួន១សែនបាតក្នុង១ខែ ។

ចំណែកជំនួយការរបស់តារាសម្តែងលោក ដុមប្រាកនឡាំ និយាយថា លោក ដុមប្រាកនឡាំ គ្រាន់តែមានតួនាទីជាអ្នកផ្សព្វផ្សាយផលិតផលឱ្យក្រុមហ៊ុនប៉ុណ្ណោះ ហើយលោកគ្មានតួនាទីក្នុងផ្នែកគ្រប់គ្រងក្រុមហ៊ុននេះទេ ។

រីឯតារាសម្តែងលោក បយប្រាកន ឆាត់ប៉ារិរ៉ាក់ បានចេញមកបង្ហាញពីភាពបរិសុទ្ធរបស់ខ្លួននៅស្ថានីយទូរទស្សន៍ប៉ុស្តិ៍លេខ៣ ថៃ ថា លោកបានលុបចោលកិច្ចសន្យាជាមួយក្រុមហ៊ុន The iCON GROUP និងប្រគល់ប្រាក់ទាំងអស់ទៅឱ្យក្រុមហ៊ុនវិញហើយ ។

លោកមេធាវី ដេឆា បន្តទៀតថា ជនពាក់ព័ន្ធម្នាក់ទៀតដែលសមត្ថកិច្ចមានភស្តុតាងច្បាស់លាស់ គឺព្រះសង្ឃ១អង្គ ដោយសារព្រះអង្គបានទទួលប្រាក់១លានបាត និងធ្លាប់មានសង្ឃដីកាអូសទាញឱ្យជនរងគ្រោះបង់ប្រាក់ឱ្យក្រុមហ៊ុន The iCON GROUP ។

កាលពីថ្ងៃទី២០ ខែតុលា ឆ្នាំ២០២៤ សារព័ត៌មានថៃរាយការណ៍ថា ចំនួនជនរងគ្រោះសរុបដែលបានចាញ់បោកក្រុមហ៊ុន The iCON GROUP គឺស្មើនឹង៥.៦៤៨នាក់ ដោយពួកគេបានបង់ប្រាក់ឱ្យក្រុមហ៊ុននេះសរុបជាង១.៦១១លានបាត ៕

ឥណ្ឌូនេស៊ី៖ ប្រទេសឥណ្ឌូនេស៊ីកំពុងស្វែងរកអ្នកវិនិយោគបរទេសដើម្បីគាំទ្រផែនការរបស់ខ្លួនក្នុងការសាងសង់ផ្ទះចំនួន ១៥ លានខ្នងរយៈពេល ៥ ឆ្នាំ ឬ ៣ លានខ្នងក្នុងមួយឆ្នាំសម្រាប់ប្រជាជនក្រីក្រនៅទូទាំងប្រទេស។
ថ្មីៗនេះលោក Hashim Djojohadikusumo ប្រធានក្រុមការងារលំនៅឋាន និងជាទីប្រឹក្សាកំពូលរបស់ប្រធានាធិបតីជាប់ឆ្នោតឥណ្ឌូនេស៊ី បាននិយាយថា នេះគឺជាគំនិតផ្តួចផ្តើមដ៏សំខាន់មួយដែលត្រូវបានប្រកាសដោយប្រធានាធិបតីថ្មី Prabowo Subianto និងដៃគូរបស់គាត់ Gibran Rakabuming Raka ក្នុងអំឡុងពេលយុទ្ធនាការបោះឆ្នោតប្រធានាធិបតីឆ្នាំ ២០២៤ ។

លោក Hashim Djojohadikusumo បានប្រកាសថា “អ្នកវិនិយោគបរទេសនឹងត្រូវបានបែងចែកសម្រាប់សាងសង់ផ្ទះចំនួន ១ លានខ្នង ខណៈដែលអចលនទ្រព្យដែលនៅសល់ចំនួន ២ លានខ្នងទៀតនឹងត្រូវបានបម្រុងទុកសម្រាប់អ្នកវិនិយោគក្នុងស្រុក”។ ផែនការសាងសង់ផ្ទះចំនួន ៣ លានខ្នងក្នុងមួយឆ្នាំរួមមានផ្ទះល្វែងចំនួន ១ លានខ្នងនៅក្នុងទីក្រុង និង ២ លានខ្នងទៀតនៅតំបន់ជនបទ។ លោក Hashim បានបន្តទៀតថា ការសាងសង់ផ្ទះចំនួន ២ លានខ្នងនៅក្នុងភូមិជារៀងរាល់ឆ្នាំ ត្រូវបានគេរំពឹងថានឹងបង្កើតឱកាសការងារជាច្រើននៅក្នុងតំបន់ទាំងនោះ។

ដូច្នេះកម្មវិធីនេះត្រូវបានគេរំពឹងថានឹងក្លាយជាដំណោះស្រាយដំធំមួយដើម្បីបំពេញតម្រូវការលំនៅដ្ឋាននាពេលបច្ចុប្បន្នរបស់ប្រជាជនក្នុងបរិបទនៃការខ្វះខាតផ្ទះរបស់ប្រទេសឥណ្ឌូនេស៊ីប្រហែល ១២.៧ លានខ្នងនៅទូទាំងប្រទេស។ យោងតាមស្ថិតិ ប្រជាជនក្រីក្ររាប់ពាន់នាក់នៅក្នុងប្រទេសអាស៊ីអាគ្នេយ៍មួយនេះ កំពុងរស់នៅក្នុងតំបន់ដែលមិនមានលក្ខខណ្ឌអប្បបរមាគ្រប់គ្រាន់ ដូចជាកង្វះទឹកស្អាត អគ្គិសនី និងអ៊ីនធឺណិត។

ហេតុនេះហើយកម្មវិធីសាងសង់ផ្ទះថ្មីជូនប្រជាពលរដ្ឋគឺជាកិច្ចខិតខំប្រឹងប្រែងមួយរបស់រដ្ឋាភិបាលថ្មីក្នុងការជួយដល់ប្រជាពលរដ្ឋដើម្បីរក្សាលំនឹងជីវិត។ គួរបញ្ជាក់ដែរថាលោក Prabowo Subianto បានចូលកាន់តំណែងជាប្រធានាធិបតីជាផ្លូវការនៅថ្ងៃទី ២០ ខែតុលា បន្ទាប់ពីបានឈ្នះការបោះឆ្នោតប្រធានាធិបតីឥណ្ឌូនេស៊ីកាលពីខែកុម្ភៈ ឆ្នាំ ២០២៤ កន្លងទៅ៕

ប្រទេសថៃ៖ ប្រទេសថៃដែលគេស្គាល់ថាជាប្រទេសកាន់សាសនាព្រះពុទ្ធ ៩៥% ស្រាប់តែមានបំណងចង់ក្លាយជាដឹកនាំឧស្សាហកម្មហាឡាល់ឈានមុខគេនៅលើសកលលោកទៅវិញ ដោយសារទីផ្សារអាហារមូស្លីមក្នុងប្រទេសនេះកំពុងរីកចម្រើនខ្លាំងគួរឱ្យកត់សម្គាល់។

យោងតាមសារព័ត៌មានបរទេស Nation Thailand បច្ចុប្បន្នប្រទេសថៃកំពុងផ្តោតលើផលិតផល និងសេវាកម្មហាឡាលជាច្រើន ដើម្បីប្រកួតប្រជែងជាមួយម៉ាឡេស៊ី ក្នុងការក្លាយជាមជ្ឈមណ្ឌលហាឡាលឈានមុខគេនៅលើសកលលោក។

ឧស្សាហកម្មហាឡាល់រួមមានផលិតផល និងសេវាកម្មជាច្រើនដូចជា អាហារ គ្រឿងសម្អាង ម៉ូដ និងទេសចរណ៍។ ជាមួយនឹងគោលដៅនៃការអភិវឌ្ឍន៍ឧស្សាហកម្មហាឡាល ក្រសួងឧស្សាហកម្មថៃបានបង្កើតមជ្ឈមណ្ឌលឧស្សាហកម្មហាឡាល់ប្រទេសថៃ (THIC) ដើម្បីសម្រេចបាននូវមហិច្ឆតារបស់ខ្លួន ធ្វើឱ្យប្រទេសនេះក្លាយជាប្រទេសឈានមុខគេក្នុងតំបន់ក្នុងការផលិត និងនាំចេញផលិតផលហាឡាល។

គោលដៅរបស់រដ្ឋាភិបាលថៃគឺដើម្បីលើកកម្ពស់ប្រទេសថៃឱ្យក្លាយជាមជ្ឈមណ្ឌលផលិតផលហាឡាល់នៅឆ្នាំ ២០២៨ ដោយផ្តោតលើប្រភេទផលិតផលចំនួន ៥ គឺ ម្ហូបអាហារ ម៉ូដ ឱសថ សេវាកម្ម និងការធ្វើដំណើរ ដោយជំរុញឱ្យមានការខិតខំប្រឹងប្រែងបន្ថែមទៀតដើម្បីប្រកួតប្រជែងជាមួយឧស្សាហកម្មហាឡាលរបស់ប្រទេសម៉ាឡេស៊ី។ ទោះជាយ៉ាងណាក៏ដោយ អ្នកជំនាញសេដ្ឋកិច្ចអន្តរជាតិ Aat Pisanwanich បាននិយាយថា បច្ចុប្បន្ននេះប្រទេសម៉ាឡេស៊ីនៅតែនាំមុខគេក្នុងឧស្សាហកម្មហាឡាល់។

ទោះបីជាម៉ាឡេស៊ីនៅនាំមុខគេក្នុងឧស្សាហកម្មហាឡាល់ក៏ដោយ ក៏ប្រទេសថៃនៅតែមានមហិច្ឆិតាចង់ក្លាយជាអ្នកដឹកនាំឧស្សាហកម្មហាឡាល់ឈានមុខគេនៅលើសកលលោកផងដែរ ដោយសារទីផ្សារអាហារមូស្លីមក្នុងប្រទេសនេះគឺកំពុងរីកចម្រើនយ៉ាងឆាប់រហ័ស។ លោក Aat Pisanwanich បាននិយាយថា “ភាពខ្លាំងរបស់ប្រទេសថៃស្ថិតគឺនៅក្នុងឧស្សាហកម្មម្ហូបអាហារ ភេសជ្ជៈ និងកសិកម្ម”។

គួរបញ្ជាក់ដែរថា តម្លៃនៃការនាំចេញផលិតផលអាហារហាឡាលរបស់ប្រទេសថៃក្នុងរយៈពេល ១១ ខែដំបូងនៃឆ្នាំ ២០២៣ មានចំនួន ២១៧ ពាន់លានបាត (ប្រមាណ ៥,៨៧ ពាន់លានដុល្លារអាមេរិក) កើនឡើង ២,៦% ធៀបនឹងរយៈពេលដូចគ្នាកាលពីឆ្នាំមុន។ ភាគច្រើននៃការនាំចេញទាំងនេះ ស្ថិតនៅក្រោមប្រភេទអាហារហាឡាល់ធម្មជាតិ រួមមានអង្ករ គ្រាប់ធញ្ញជាតិ និងអំពៅ។ ដូច្នេះបច្ចុប្បន្នប្រទេសថៃមានក្រុមហ៊ុនផលិតអាហារហាឡាល់ចំនួន ១៥.០៤៣ និងគ្រឹះស្ថានអាហារហាឡាល់ជាង ៣.៥០០ កន្លែងហើយ៕