ប្រទេសឥណ្ឌា ៖ នៅខែតុលា ឆ្នាំ២០២៤ ពលរដ្ឋឥណ្ឌារស់នៅតាមមាត់ទន្លេម៉ាក់មុណា (Yamuna River) បានបង្ហាញការបារម្ភថា ពួកគេនឹងរងផលប៉ះពាល់សុខភាព និងអាយុជីវិតកាន់តែខ្លាំង ដោយសារទឹកទន្លេនេះមានសភាពកខ្វ.ក់ ខ្លាំង និងគ្របដណ្តប់ទៅដោយពពុះពណ៌ស ។

បើយើងធ្វើដំណើរឆ្លងកាត់ទន្លេយ៉ាក់មុណា យើងនឹងឃើញពពុះពណ៌ស ស្រដៀងនឹងព្រិលគ្របដណ្តប់ពេញទន្លេនេះទាំងអស់ ។ វាជាទន្លេដ៏សំខាន់មួយដែលហូរឆ្លងកាត់ទីក្រុងញូវដែលី ហើយពលរដ្ឋឥណ្ឌាជឿថា វាជាទន្លេស័ក្តិសិទ្ធិ ។ ប៉ុន្តែបច្ចុប្បន្ន ទន្លេនេះបានគំរាមកំហែងដល់អាយុជីវិត និងសុខភាពពលរដ្ឋឥណ្ឌារាប់លាននាក់ដែលរស់នៅតាមមាត់ទន្លេ ។

សារព័ត៌មានឥណ្ឌារាយការណ៍ថា ពពុះពណ៌ស បានគ្របដណ្តប់លើទន្លេយ៉ាក់មុណា អស់មួយរយៈហើយ ហើយវាបានកើតឡើងជាញឹកញាប់ បើទោះជាកន្លងមក ធ្លាប់មានកិច្ចប្រជុំគណៈកម្មការចាត់ការបញ្ហានេះក្តី ។ មូលហេតុធ្វើឱ្យមានពពុះពណ៌ស គ្របដណ្តប់លើទន្លេយ៉ាក់មុណា គឺបណ្តាលមកពីសារធាតុគីមីឈ្មោះហ្វតហ្វេត ចេញពីសំរាម និងហូរចូលក្នុងទឹកទន្លេ ហើយសារធាតុគីមីនេះបានធ្វើឱ្យទឹកទន្លេកាន់តែកខ្វក់ខ្លាំងឡើង ។

យោងតាមស្ថិតិបង្ហាញថា ទីក្រុងញូវដែលី មានបរិមាណទឹកកខ្វក់ស្មើជាង៣.៦០០លានលីត្រ ដែលនឹងប៉ះពាល់សុខភាពមនុស្ស និងបរិស្ថាននៅជុំវិញ ។ ក្នុងចំណោមបរិមាណទឹកកខ្វក់ហូរចូលទន្លេ ក្នុងនោះមានទឹកកខ្វក់តិចជាងពាក់កណ្តាលប៉ុណ្ណោះដែលបានឆ្លងកាត់ការចម្រោះ ។ ក្រៅពីនេះ មានសំរាមជាច្រើនទៀតត្រូវបានបោះចូលក្នុងទន្លេយ៉ាក់មុណា ជារៀងរាល់ថ្ងៃ ។

គួរបញ្ជាក់ថា យ៉ាក់មុណា គឺជាទន្លេមួយស្ថិតក្នុងចំណោមទន្លេស័ក្តិសិទ្ធិចំនួន៧ នៅប្រទេសឥណ្ឌា ។ ទន្លេនេះមានប្រភពមកពីជួរភ្នំហិម៉ាឡៃ និងហូរឆ្លងកាត់ទន្លេគង្គា ទៅកាន់ទិសអាគ្នេយ៍ ប្រវែងជាង១.២៨៧គីឡូម៉ែត្រ ។

ហេតុការណ៍នេះពុំមែនទើបតែកើតឡើងជាលើកដំបូងទេនៅទន្លេយ៉ាក់មុណា កាលពីឆ្នាំ២០២៣ ទន្លេនេះក៏ធ្លាប់មានសភាពកខ្វក់ខ្លាំងដែរ ។ អ្នកជំនាញនិយាយថា ពពុះពណ៌សនេះកើតឡើងដោយសារសំរាមក្នុងទន្លេ និងទឹកស្អុយហូរចេញពីរោងចក្រឧស្សាហកម្ម ហើយវានឹងប៉ះពាល់ដល់ការដកដង្ហើម និងមានបញ្ហាស្បែក ។

កាលពីឆ្នាំ២០២៣ ពលរដ្ឋរស់នៅទីក្រុងញូវដែលីជាច្រើននាក់បានឈឺថ្កាត់ដោយសារទឹកកខ្វក់ក្នុងទន្លេ រហូតដល់រដ្ឋាភិបាលប្រកាសបិទសាលារៀន និងកន្លែងធ្វើការមួយរយៈ ៕

iPhone 17 Air ដែលនឹងដាក់បង្ហាញនៅចុងឆ្នាំ ២០២៥ ឥឡូវនេះបានលេចចេញជារូបរាងហើយ ជាមួយទំហំស្តើងបំផុតមិនធ្លាប់មាន ដោយមានកាមេរ៉ាខាងមុខទំហំ ២៤ មេហ្គាភិចសែល ត្រូវបានគេនិយាយថា អាចមានតម្លៃខ្ពស់ជាងម៉ូដែល iPhone ទាំងអស់របស់ Apple។
យោងតាមលោក Jeff Pu អ្នកវិភាគនៅ Haitong International បាននិយាយថា មូលហេតុដែល iPhone 17 Air ត្រូវបានគេនិយាយថា នឹងមានតម្លៃថ្លៃជាងម៉ូដែលផ្សេងៗទៀតគឺដោយសារ វាត្រូវបានបំពាក់ដោយបន្ទះឈីប A19 ដែលផលិតនៅលើដំណើរការ 3 nm ដូច iPhone 17 ដែរ។

លើសពីនេះសមត្ថភាព RAM របស់វាគឺមាន 8 GB ដែលនឹងគាំទ្រ Apple Intelligence ។ ទោះបីជាមានអេក្រង់ ៦.៦ អ៊ីញក៏ដោយ ក៏ 17 Air ទំនងស្រាលជាង ៦.៣ អ៊ីញនៃ 17 Pro ផងដែរ។ ទន្ទឹមនឹងនេះកាមេរ៉ាខាងមុខមានទំហំ ២៤ មេហ្គាភិចសែល ស្របពេលជាមួយនឹងពាក្យចចាមអារ៉ាមមុនៗថា Apple នឹងដំឡើងកាមេរ៉ា Selfie សម្រាប់ស្មាតហ្វូននៅឆ្នាំក្រោយ។ ដូច្នេះផលិតផលនេះនឹងក្លាយជា iPhone ស្តើងបំផុតមិនធ្លាប់មាន និងជាស្មាតហ្វូនមានកាមេរ៉ាតែមួយប៉ុណ្ណោះ។

ហេតុនេះហើយ សម្រាប់តម្លៃត្រូវបានគេនិយាយថា iPhone 17 Air នឹងមានតម្លៃចាប់ពី ១,២៩៩ ដុល្លារអាមេរិក ដែលខ្ពស់ជាងតម្លៃចាប់ផ្តើមរបស់ iPhone ដទៃទៀត ខណៈ iPhone ផ្សេងៗមានតម្លៃចាប់ផ្តើមដំបូងត្រឹមតែ ១,១៩៩ ប៉ុណ្ណោះ។ ដូច្នេះ Jeff Pu ក៏បាននិយាយដែរថា iPhone 17 Air នឹងជាស្មាតហ្វូនមានតម្លៃថ្លៃបំផុតរបស់ Apple ។

លោក Jeff Pu ក៏បានបន្តថា iPhone នៅឆ្នាំក្រោយនេះក៏នឹងមាន Dynamic Island តូចជាងមុនផងដែរ ដោយសារប្រព័ន្ធ FaceID ថ្មី។ គួរបញ្ជាក់ដែរថា Jeff Pu ដែលជាអ្នកវិភាគនៅ Haitong International តែងតែចែករំលែកព័ត៌មានត្រឹមត្រូវអំពីផលិតផល Apple។ ទោះជាយ៉ាងណាយើងមិនទាន់ដឹងច្បាស់ទេថា iPhone 17 Air ពិតជាមានតម្លៃថ្លៃជាង iPhone ដទៃទៀតឬយ៉ាងណានោះទេ៕

គ្រឿងទេសនៅលើពិភពលោកយើងនេះគឺមានច្រើនប្រភេទណាស់ ដូចជាស្ករស ស្ករត្នោត អំបិល ប៊ីចេង ទឹកត្រី ទឹកសៀវអ៊ីវ ទឹកម្ទេសជាដើម និយាយរួមទៅគឺមានច្រើនសម្បូរបែបណាស់។ ប៉ុន្តែតើលោកអ្នកដឹងទេថា ក្នុងចំណោមគ្រឿងទេសទាំងអស់នេះ តើគ្រឿងទេសមួយណាដែលត្រូវបានគេចាត់ទុកថា មានតម្លៃថ្លៃជាងគេបំផុតនៅលើពិភពលោក? សម្រាប់ចម្លើយនោះគឺផ្កា Saffron ( Crocus sativus ) ដែលត្រូវបានគេហៅថាជាមាសក្រហម ឬអំបោះក្រហម ប្រើសម្រាប់បន្ថែមរសជាតិ និងពណ៌នៅក្នុងអាហារ។

គ្រឿងទេស Saffron មានដើមកំណើតនៅប្រទេសអ៊ីរ៉ង់ គឺជាគ្រឿងទេសដែលមានតម្លៃថ្លៃបំផុតក្នុងលោក ដោយក្នុងមួយគីឡូក្រាមមានតម្លៃរហូតដល់ ១ ម៉ឺនដុល្លារអាមេរិកឯណោះ នេះបើយោងតាមគេហទំព័របរទេស IFL Science ។ ផ្កា Saffron គឺជាវត្ថុធាតុដើមសំខាន់សម្រាប់ផលិតកម្មគ្រឿងទេស saffron ដែលបច្ចុប្បន្នវាត្រូវបានដាំដុះយ៉ាងទូលំទូលាយនៅក្នុងប្រទេសអ៊ីរ៉ង់ ក្រិក អេស្ប៉ាញ និង Türkiye។ ក្នុងនោះ អ៊ីរ៉ង់មានប្រមាណ ៩០% នៃផលិតកម្មពិភពលោក។

យោងតាមការសិក្សាជាច្រើន Saffron គឺជាគ្រឿងទេសដ៏សំខានមួយសម្រាប់សុខភាពរាងកាយរបស់មនុស្ស ព្រោះវាសម្បូរទៅដោយសារធាតុប្រឆាំងអុកស៊ីតកម្ម ជួយប្រឆាំងនឹងការបំផ្លាញកោសិកា អាចការពារជំងឺមហារីក និងល្អសម្រាប់ខួរក្បាល រួមទាំងល្អចំពោះប្រព័ន្ធប្រសាទទៀតផង។ មូលហេតុដែលគ្រឿងទេសនេះមានតម្លៃថ្លៃខ្លាំង គឺដោយសារវាជាផ្កាកម្រ រីកតែមួយសប្តាហ៍ប៉ុណ្ណោះក្នុងមួយឆ្នាំ ហើយផ្កានីមួយៗត្រូវប្រើ សម្រាប់កែច្នៃជាគ្រឿងផ្សំអាហារសុខភាព ដោយវាមានតួនាទីបន្ថែមរសជាតិ និងពណ៌នៅក្នុងអាហារ។

អ្នកផលិតបាននិយាយថា ទម្រាំយើងយកផ្កានេះទៅផលិតជាគ្រឿងទេសបាន គឺមិនងាយស្រួលនោះទេ ដោយសារយើងត្រូវចំណាយពេលវេលាយូរណាស់ក្នុងការផលិត។ វាត្រូវចំណាយពេលប្រហែល ៤០ ម៉ោងនៃផ្កាចំនួន ១៧០,០០០ ដោយបំបែកវាជាសសៃៗតូចៗធ្វើដោយដៃផ្ទាល់តែម្តង ដូច្នេះក្នុងមួយគីឡូក្រាមគឺមានតម្លៃថ្លៃ ដោយសារមូលហេតុនេះឯង។ នៅក្នុងប្រទេសជាច្រើន ផ្កា saffron ត្រូវបានប្រមូលផលនៅពេលព្រឹកព្រលឹម ដោយសារតែការប៉ះពាល់នឹងព្រះអាទិត្យយូរ ផ្កានឹងលែងមានគុណភាព។ ដូច្នេះទាំងការប្រមូលផល និងការផលិតគឺតម្រូវឱ្យមានកម្លាំងពលកម្មច្រើន ក៏ដូចជាត្រូវចំណាយសម្ភារៈច្រើនផងដែរ៕