ប្រទេសឥណ្ឌា៖ ក្រុមហ៊ុនម៉ូតូឥណ្ឌា Hero បានធ្វើឱ្យមនុស្សគ្រប់គ្នាមានការភ្ញាក់ផ្អើលយ៉ាងខ្លាំងនៅពេលដែលខ្លួន បានបង្ហាញម៉ូដែលថ្មីមួយឈ្មោះថា Surge S32 ដែលមានលក្ខណៈពិសេសប្លែកមិនធ្លាប់មាន។
ក្រុមហ៊ុន Hero MotoCorp ដែលជាក្រុមហ៊ុនផលិតម៉ូតូធំជាងគេរបស់ប្រទេសឥណ្ឌា បាននិយាយថា ម៉ូតូអគ្គិសនីដែលមានកង់ពីររបស់ខ្លួន អាចបំប្លែងទៅជាយានជំនិះកង់បីបានយ៉ាងងាយស្រួល ដោយចំណាយពេលត្រឹមតែ ៣ នាទីប៉ុណ្ណោះ។

ក្រុមហ៊ុនក៏បានបន្តទៀតថា ម៉ូតូអគ្គិសនីជំនាន់ថ្មីរបស់ខ្លួនគឺ Surge S32 នឹងដាក់លក់នៅពាក់កណ្តាលឆ្នាំ ២០២៥ ដោយមានបំណងផលិតយានយន្តនេះចំនួន ១០,០០០ គ្រឿងឯណោះ។ Surge S32 ភ្ជាប់ទៅនឹងកាប៊ីនជាមួយតួខាងក្រោយ ដោយផ្នែកខាងក្រោយនឹងត្រូវបានផ្តល់ជូនដោយក្រុមហ៊ុន អាស្រ័យលើតម្រូវការរបស់អតិថិជន និងប្រើប្រាស់សម្រាប់ដឹកមនុស្ស ឬទំនិញ។ ដូច្នោះហើយផ្នែកខាងមុខគឺជាយានជំនិះកង់ពីរដាច់ដោយឡែក ហើយអាចប្រើប្រាស់បានដូចម៉ូតូធម្មតាដែរ។

យានជំនិះនេះត្រូវបានគេនិយាយថាមានប្រយោជន៍ខ្លាំងណាស់សម្រាប់អាជីវកម្មខ្នាតតូចនៅក្នុងប្រទេសអាស៊ីខាងត្បូង។ បច្ចុប្បន្នក្រុមហ៊ុន Hero និងក្រសួងដឹកជញ្ជូនផ្លូវគោកឥណ្ឌាបានសហការគ្នា បង្កើតប្រភេទផ្ទាល់ខ្លួនរបស់ពួកគេគឺ L2/L5 ដែលប្រភេទនេះត្រូវបានកំណត់ថាជា “ការរួមបញ្ចូលគ្នានៃយានយន្តកង់ពីរ និងកង់បី”។ ក្នុងចំណោមយានយន្តទាំងនោះ យានយន្តកង់ពីរក្នុងប្រភេទ L2 អាចត្រូវបានរួមបញ្ចូលជាមួយ “ម៉ូឌុលក្រោយមិនស្វយ័ត”។ ជាពិសេស ការកំណត់រចនាសម្ព័ន្ធនីមួយៗក៏មានស្លាកលេខចុះបញ្ជីផ្ទាល់ខ្លួនផងដែរ។

ទាក់ទងនឹងម៉ូទ័រអេឡិចត្រិច និងថ្ម នៅក្នុងរបៀបកង់ពីរ យានយន្តនេះប្រើប្រាស់ម៉ូទ័រអេឡិចត្រិចកម្លាំង ២.៦ សេះ ថាមពលថ្ម ៣.៥ kWh និងឈានដល់ល្បឿនអតិបរមា ៦០ គីឡូម៉ែត្រក្នុងមួយម៉ោង។ នៅក្នុងរបៀបកង់បី យានយន្តប្រើម៉ូទ័រ ៤ សេះ និងថ្ម ១១ kWh ហើយល្បឿនអតិបរមាត្រូវបានកាត់បន្ថយមកត្រឹម ៥០ គីឡូម៉ែត្រក្នុងមួយម៉ោងវិញ។ គួរបញ្ជាក់ដែរថា ក្រុមហ៊ុន Hero MotoCorp មានគោលបំណងផលិតយានយន្ត Surge S32 ចំនួន ១០,០០០ គ្រឿងក្នុងមួយឆ្នាំ៕

តារាសម្តែង Jung Woo Sung ត្រូវបានប្រព័ន្ធផ្សព្វផ្សាយចាប់អារម្មណ៍យ៉ាងខ្លាំងចំពោះជីវិតឯកជនតារាប្រុសរូបនេះបន្ទាប់ពីប្រកាសទទួលស្គាល់ថាមានកូនប្រុសជាមួយតារាម៉ូដែល Moon Gabi ។ ទោះជាយ៉ាងណា តារាសម្តែងរូបនេះប្រឈមនឹងការរិះគន់ដូចគ្នាពីទស្សនិកជនថាមានចិត្តសាវ៉ាក្បត់មិត្តស្រីដែលជាអ្នកក្រៅរង្វង់សិល្បៈហើយទៅមានកូនជាមួយនឹងនារីម្នាក់ទៀត។

កាលពីថ្ងៃទី២៥ ខែវិច្ឆិកា មនុស្សមួយចំនួនដែលស្គាល់ជីវិតឯកជនរបស់ Jung Woo Sung បាននិយាយថា តារាប្រុសរូបនេះបានស្រលាញ់មនុស្សម្នាក់នៅក្រៅរង្វង់សិល្បៈអស់រយៈពេលជាងមួយឆ្នាំហើយ ។ Woo Sung និងមិត្តស្រីរបស់លោកធ្លាប់ដើរលេងជាមួយគូស្នេហ៍ Lee Jung Jae – Im Se Ryung ។ មិត្តស្រីរបស់ Jung Woo Sung មានការភ្ញាក់ផ្អើលពេលបានដឹងថាតារាប្រុសរូបនេះមានកូនជាមួយនឹងតារាម៉ូដែល Moon Gabi ហើយនាងមិនបានដឹងថា Woo Sung ស្គាល់តារាម៉ូដែលនោះទេ។

តំណាងក្រុមហ៊ុនសិល្បករ ដែលជាក្រុមហ៊ុនគ្រប់គ្រងរបស់ Jung Woo Sung បានឆ្លើយតបនឹងរឿងអាស្រូវនេះថា «វាជារឿងផ្ទាល់ខ្លួនរបស់អ្នកសិល្បៈ យើងមិនអាចបញ្ជាក់បានទេ យើងសង្ឃឹមថាអ្នកទាំងអស់គ្នានឹងយោគយល់» ។ ក្រុមហ៊ុន Woo Sung សង្ឃឹមថាអ្នកគាំទ្រកុំប៉ាន់ស្មានខ្លាំងពេកអំពីជីវិតស្នេហារបស់តារាសម្ដែងរូបនេះ។ មហាជនជាច្រើនបានរិះគន់លោកថា «ធ្វើមិនបានល្អក្នុងនាមជាឪពុក» ពេលលោកមិនណាត់ជួប Moon Gabi គ្មានចេតនាចង់រៀបការ ប៉ុន្តែនៅតែមានកូន និងក្បត់គូស្នេហ៍។

គួរបញ្ជាក់ថា នៅថ្ងៃទី ២៤ ខែវិច្ឆិកា Dispatch បានចុះផ្សាយថាកូនរបស់តារាម៉ូដែល Moon Gabi បានកើតក្នុងខែមីនា ឆ្នាំ២០២៤ ។ តារាសម្តែង Jung Woo Sung និងតារាម៉ូដែល Moon Gabi បានជួបគ្នាដំបូងនៅឯការជួបជុំសង្គមមួយក្នុងឆ្នាំ ២០២២។ បន្ទាប់ពីនោះ អ្នកទាំងពីរបានទាក់ទងគ្នា និងកាន់តែស្និទ្ធស្នាលកាន់តែខ្លាំងឡើង។ នៅខែមិថុនា ឆ្នាំ២០២៣ Moon Gabi បានជូនដំណឹង ថានាងមានផ្ទៃពោះ។ ចំណែកតារាសម្ដែង Jung Woo Sung រីករាយពេលបានដឹងដំណឹងនេះហើយសន្យាថានឹងទទួលខុសត្រូវចិញ្ចឹមកូន។ យ៉ាងណាមិញ អ្នកទាំងពីរមិនដែលណាត់គ្នា ហើយក៏មិនមានបំណងចង់រៀបការដែរ៕

ប្រទេសចិន ៖ ប្រទេសចិនបានរៀបចំពិធីប្រកួតឡើងដើមដូងលឿនបំផុតក្នុងទីក្រុងសាន់យ៉ា ដែលជាទីក្រុងឆ្នេរសមុទ្រដ៏ល្បីល្បាញរបស់ខេត្តហៃណាន ។ វាជាផ្នែកមួយនៃការប្រកួតកីឡាក្នុងស្រុក លើកទី១២ ហើយកីឡាករទទួលបានជ័យជម្នះក្នុងការប្រកួតនេះ គឺសុទ្ធតែមានស្រុកកំណើតនៅខេត្តហៃណាន ។

បើកីឡាកររូបណាអាចឡើងដល់ចុងដូងលឿនបំផុត គឺជាអ្នកឈ្នះ ហើយពួកគេត្រូវតែប្រើប្រាស់ដៃរបស់ខ្លួនឡើងដើមដូង និងគ្មានឧបករណ៍ជំនួយ ។ គណៈកម្មការប្រកួតអនុញ្ញាតឱ្យកីឡាករគ្រប់រូបពាក់ខ្សែការពារសុវត្ថិភាពដើម្បីការពារគ្រោះថ្នាក់ផ្សេងៗ ឬករណីកីឡាករភ្លាត់ស្នៀតធ្លាក់ចុះក្រោម ។

កីឡាករ និងកីឡាការិនី ដែលទទួលបានជ័យជម្នះក្នុងការប្រកួតនេះ គឺជាពលរដ្ឋរស់នៅខេត្តហៃណាន ពីព្រោះពួកគេមានបទពិសោធន៍ឡើងដើមដូងស្ទើរគ្រប់ទីកន្លែងតាំងពីនៅក្មេង ។ ម្យ៉ាងទៀត ការឡើងដើមដូង គឺជាកីឡាមួយដែលខេត្តហៃណាន តែងតែរៀបចំការប្រកួតជាបន្តបន្ទាប់ ។

កីឡាករទទួលជ័យជម្នះឡើងដើមដូងលឿនបំផុតផ្នែកបុរសបានចំណាយពេល៦.១៨វិនាទី រីឯផ្នែកនារី ចំណាយពេល៦.៦៦វិនាទី ។ ចិនបានរៀបចំប្រកួតកីឡាឡើងដើមដូងចាប់ពីឆ្នាំ១៩៥៣ និងរៀបចំរៀងរាល់៤ឆ្នាំម្តង ហើយនៅឆ្នាំ២០២៤ ការប្រកួតឡើងដើមដូងបានរៀបចំចាប់ពីថ្ងៃទី២២ ខែវិច្ឆិកា រហូតដល់ថ្ងៃទី៣០ ខែវិច្ឆិកា ។

ហៃណាន គឺជាខេត្តនៅជាប់ឆ្នេរសមុទ្រមានទេសភាពយ៉ាងស្រស់ស្អាត និងសម្បូរដើមដូងជាច្រើនដើម ។ ហេតុនេះ ទើបពលរដ្ឋរស់នៅខេត្តហៃណាន ពូកែឡើងដើមដូងដោយប្រើប្រាស់ដៃទទេ តាំងពីពួកគេនៅក្មេងម៉្លេះ ។

គួរបញ្ជាក់ថា កាលពីថ្ងៃទី២១ ខែកញ្ញា កន្លងមក ប្រទេសអង់គ្លេសបានរៀបចំការប្រកួតឡើងសសរឆាប់រហ័សបំផុតលំដាប់ពិភពលោក «World Pole Climbing Championship» ប្រចាំឆ្នាំ២០២៤ ដែលមានកម្ពស់២៥ម៉ែត្រ ។ ប៉ុន្តែកីឡាករអង់គ្លេសបានប្រើប្រាស់ឧបករណ៍ជំនួយឡើងសសរ ដែលខុសប្លែកពីកីឡាករឡើងដើមដូងរបស់ចិន ៕

ប្រទេសឥណ្ឌា៖ ហេតុការណ៍ដ៏រ.ន្ធត់ បុរសបីនាក់បានបា.ត់បង់ជីវិតនៅពេលដែលរថយន្តមួយគ្រឿងបានធ្លាក់ពីលើស្ពាន ដែលមិនទាន់សាងសង់រួចក្នុងទីក្រុង Bareilly រដ្ឋ Uttar Pradesh ប្រទេសឥណ្ឌា កាលពីថ្ងៃទី ២៤ ខែវិច្ឆិកា។
ហេតុការណ៍នេះបានកើតឡើងនៅពេលដែលជនរងគ្រោះចាកចេញពីតំបន់លំនៅដ្ឋាន Gurugram ហើយកំពុងធ្វើដំណើរទៅកាន់ Bareilly នៅពេលយប់ដើម្បីចូលរួមពិធីមង្គលការមួយ ដោយពួកគេពឹងផ្អែកទាំងស្រុងលើ Google Maps ដើម្បីទៅដល់ទីតាំងព្រឹត្តិការណ៍នោះ។

ទោះជាយ៉ាងណារថយន្តក៏បានបើកឆ្លងកាត់ស្ពាន ដែលជាស្ពានបាក់ពាក់កណ្តាល ហើយធ្លាក់ចូលទន្លេ Ramganga ដែលជាទន្លេស្ងួតពីកម្ពស់ប្រហែល ១៥ ម៉ែត្រ។ នៅព្រឹកថ្ងៃបន្ទាប់អ្នកស្រុកក៏បានប្រទះឃើញរថយន្តដែលរងការខូចខាត រួមជាមួយអ្នកស្លា.ប់ទាំងបីនាក់។ យោងតាមអាជ្ញាធរស្ពាននេះត្រូវបានគេបិទក្នុងរដូវវស្សា ព្រោះវាបាក់ពាក់កណ្តាល ប៉ុន្តែដោយសារស្ពានមិនមានរបាំង ឬផ្លាកសញ្ញាហាមយានយន្តឆ្លងកាត់ ចំពេលដែលអ្នកបើកបរពឹងផ្អែកតែ Google Maps ទើបបណ្តាលឱ្យជួបគ្រោះ.ថ្នាក់បែបនេះ។

នៅពេលដំណឹងនេះត្រូវបានសារព័ត៌មានធំៗជាច្រើនចុះផ្សាយ ក្រុមហ៊ុន Google ក៏បានផ្ញើការរំលែកទុក្ខរបស់ខ្លួនទៅកាន់ក្រុមគ្រួសារជនរងគ្រោះ ហើយបាននិយាយថា ខ្លួនកំពុងធ្វើការយ៉ាងជិតស្និទ្ធជាមួយអាជ្ញាធរដើម្បីស៊ើបអង្កេតឧបទ្ទវ.ហេតុនេះ។ គួរបញ្ជាក់ដែរថា នេះមិនមែនជាលើកទីមួយទេដែលមានគ្រោះ.ថ្នាក់ធ្ងន់.ធ្ងរបានកើតឡើងដោយសារអ្នកបើកបរដើរតាមទិសដៅ Google Maps។

នៅប្រទេសឥណ្ឌា កាលពីឆ្នាំ ២០២១ មនុស្សពីរនាក់ក៏បានបាត់បង់ជីវិតផងដែរ នៅពេលពួកគេរវល់មើល Google Maps ហើយឆ្លងកាត់ផ្លូវខុសធ្វើឱ្យធ្លាក់ពីលើស្ពានបាក់បែកមួយ ខណៈស្ពាននៅប្រទេសឥណ្ឌាភាគច្រើនក៏មិនមានរបាំង ឬផ្លាកសញ្ញាហាមឃាត់ដែរ ទើបធ្វើឱ្យមានហេតុការណ៍នេះកើតឡើងជាញឹកញាប់។ សរុបមកវិញ មូលហេតុដែលបុរសបីនាក់ខាងលើស្លា.ប់ គឺដោយសារកំហុសរបស់អាជ្ញាធរដែលមិនបានបិទរបាំង ឬផ្លាកសញ្ញាហាមឃាត់ រួមទាំងដោយសារ Google Maps ផងដែរ៕

មីកញ្ចប់ គឺជាអាហារសម្រន់ដ៏ពេញនិយមបំផុតនាពេលបច្ចុប្បន្ននេះ ដោយសារវាងាយស្រួលក្នុងការចម្អិន ក៏ដូចជាមានតម្លៃសមរម្យ ងាយស្រួលរក និងអាចរក្សាទុកបានយូរទៀតផង។ ដូច្នេះគិតត្រឹមឆ្នាំ ២០២៣ ពិភពលោកយើងបានប្រើប្រាស់មីកញ្ចប់ចំនួន ១២០ ពាន់លានកញ្ចប់ ក្នុងនោះចិនគឺជាប្រទេសដែលមានប្រជាជននិយមបរិភោគមីកញ្ចប់ច្រើនជាងគេក្នុងពិភពលោក រហូតដល់ ៤២.២០០ លានកញ្ចប់ក្នុងមួយឆ្នាំ។ នេះបើយោងតាមសារព័ត៌មានបរទេសចុះផ្សាយថា ក្រៅពីប្រទេសចិន ក៏មានប្រទេស ៩ ផ្សេងទៀតក៏ជាប់ក្នុងបញ្ជីញ៉ាំមីកញ្ចប់ច្រើនជាងគេបំផុតលើពិភពលោកផងដែរ។

ខាងក្រោមនេះគឺជាប្រទេសចំនួន ១០ ដែលញ៉ាំមីកញ្ចប់ច្រើនជាងគេបំផុតនៅលើពិភពលោក៖
១. ប្រទេសចិន មានប្រជាជននិយមបរិភោគមីកញ្ចប់ចំនួន ៤២.២០០ លានកញ្ចប់ក្នុងមួយឆ្នាំ
២. ឥណ្ឌូនេស៊ី ១៤.៥០០ លានកញ្ចប់ក្នុងមួយឆ្នាំ
៣. ឥណ្ឌា ៨.៧០០ លានកញ្ចប់ក្នុងមួយឆ្នាំ
៤. វៀតណាម ៨.១០០ លានកញ្ចប់ក្នុងមួយឆ្នាំ
៥. ប្រទេសជប៉ុន ៥.៨០០ លានកញ្ចប់ក្នុងមួយឆ្នាំ
៦. សហរដ្ឋអាមេរិក ៥.១០០ លានកញ្ចប់ក្នុងមួយឆ្នាំ
៧. ប្រទេសហ្វីលីពីន ៤.៤០០ លានកញ្ចប់ក្នុងមួយឆ្នាំ
៨. កូរ៉េខាងត្បូង ៤.០០០ លានកញ្ចប់ក្នុងមួយឆ្នាំ
៩. ប្រទេសថៃ ៤.០០០ លានកញ្ចប់ក្នុងមួយឆ្នាំ
១០. នីហ្សេរីយ៉ា ៣.០០០ លានកញ្ចប់ក្នុងមួយឆ្នាំ

គួរបញ្ជាក់ដែរថា ការញ៉ាំមីកញ្ចប់ច្រើនពេកគឺមិនល្អចំពោះសុខភាពរាងកាយរបស់យើងឡើយ។ ការស្រាវជ្រាវបានឱ្យដឹងថា សម្រាប់អ្នកដែលបរិភោគមីកញ្ចប់ ឬមីកំប៉ុងច្រើនពេកនឹងប្រឈមបញ្ហាសុខភាពធ្ងន់ធ្ងរ អាចធ្វើឱ្យស្លាប់មុនអាយុផងដែរ។ ផលប៉ះពាល់ដែលបណ្ដាលមកពីការបរិភោគមីច្រើនមានដូចជា៖ សម្ពាធឈាមឡើងខ្ពស់, ជាតិស្ករក្នុងឈាមឡើងខ្ពស់, លើសជាតិខ្លាញ់ត្រង់ចង្កេះ, កម្រិតកូឡេស្តេរ៉ុលខុសធម្មតាដែលអាចបង្កទៅជាជំងឺទឹកនោមផ្អែម គាំងបេះដូង ឬដាច់សរសៃឈាមខួរក្បាលជាដើម។ ដូច្នេះ អ្នកគួរតែទទួលទានមីកញ្ចប់ ឬមីកំប៉ុង ក្នុងបរិមាណសមល្មមបានហើយ ដើម្បីបង្ការការប្រឈមបញ្ហាសុខភាព៕