ពេលយើងឃើញផ្លែម្នាស់ធំៗក្នុងផ្ទះបាយ មើលទៅគួរឱ្យចង់បរិភោគ ប៉ុន្តែវាមិនទាន់ទុំ បើទោះជារង់ចាំអស់ច្រើនថ្ងៃក្តី ។ យើងបានអនុវត្តគ្រប់វិធីនៅតែមិនទុំទៀត ហើយទម្រាំវាទុំ យើងបាត់ឃ្លានល្មម ។ សារព័ត៌មាន KBN សូមបង្ហាញនូវវិធីជួយឱ្យម្នាស់ទុំរហ័សឆាប់បានបរិភោគ ពុំចាំបាច់រង់ចាំច្រើនថ្ងៃ និងវិធីសង្កេតមើលម្នាស់ណាទុំមុនគេ ។
ខាងក្រោមនេះ គឺជាវិធីធ្វើឱ្យផ្លែម្នាស់ទុំរហ័សឆាប់បានបរិភោគ ៖
១-បើយើងចង់បរិភោគម្នាស់ឆាប់ៗ គឺត្រូវយកវាដាក់ក្នុងថង់ជាមួយផ្លែឈើផ្សេងៗ ដូចជា ៖ ផ្លែប៉ោម, ចេក និងប៉េងប៉ោះ ។ ម្នាស់ខុសពីផ្លែឈើផ្សេងទៀត គឺវានឹងមិនទុំដោយខ្លួនឯងទេក្រោយពេលប្រមូលផល ពីព្រោះជាតិស្ករក្នុងម្នាស់មានប្រភពពីដើមរបស់វា ។
២-ដាក់ម្នាស់ក្នុងថង់ជាមួយផ្លែឈើទុំផ្សេងទៀត ពីព្រោះផ្លែឈើទុំទាំងនេះនឹងបញ្ចេញឧស្ម័នអេទីឡែន ជួយឱ្យម្នាស់ឆាប់ទុំ ។ ប៉ុន្តែយើងត្រូវតែចងមាត់ថង់ឱ្យជិត និងទុកវាចាប់ពី១ថ្ងៃ ទៅ២ថ្ងៃ ។
៣-យើងត្រូវដាក់ម្នាស់បញ្ច្រាស គឺដាក់ផ្នែកដែលមានស្លឹកចុះក្រោម ដើម្បីឱ្យជាតិម្សៅដែលប្រមូលផ្តុំនៅគល់ម្នាស់បែងចែកទៅផ្នែកផ្សេងទៀតរបស់ផ្លែ ។
ពេលសាកល្បងវិធីទាំងនេះរួចហើយ មនុស្សមួយចំនួនឆ្ងល់ថា តើម្នាស់ទុំហើយឬនៅ តើដឹងថាវាទុំដោយរបៀបណា? គ្មានអ្វីពិបាកទេ គឺអាចមើលពណ៌របស់វា និងយកដៃសង្កត់ពីលើ ។ ផ្លែម្នាស់នឹងប្តូរទៅជាពណ៌លឿងលាយបៃតង ចាប់ពីគល់របស់វាមុនគេ ហើយចំណុចសំខាន់ ម្នាស់មិនគួរមានពណ៌ត្នោតទេ ពីព្រោះពណ៌ត្នោត មានន័យថា វាទុំខ្លាំងពេក ។.png)
ក្រៅពីនេះ ម្នាស់គួរតែមានសភាពទន់បន្តិច នៅពេលយើងយកដៃសង្កត់នៅផ្នែកខាងលើ ។ វិធីមួយទៀតដើម្បីសង្កេតមើលថា ម្នាស់ទុំ ឬមិនទាន់ទុំ គឺការហិតក្លិននៅគល់របស់វា ពីព្រោះម្នាស់ចាប់ផ្តើមទុំពីគល់ឡើងទៅផ្នែកខាងលើ ហើយម្នាស់ទុំនឹងមានក្លិនក្រអូប ៕
