ហុងកុង ៖ កាលពីថ្ងៃទី២ ខែធ្នូ ឆ្នាំ២០២៤ សារព័ត៌មានបរទេសរាយការណ៍ថា អាកាសយានដ្ឋាននៅទីក្រុងហុងកុង បានបង្ហាញរូបសំណាកខ្លាឃ្មុំ ជាង២,០០០ក្បាលតំណាងឱ្យខ្លាឃ្មុំយក្ស ដើម្បីទាក់ទាញចំណាប់អារម្មណ៍ភ្ញៀវទេសចរជាតិ និងអន្តរជាតិ ព្រមទាំងជំរុញឱ្យហុងកុងក្លាយជាតំបន់ទេសចរណ៍ដ៏ពេញនិយមនៅតំបន់អាស៊ីម្តងទៀត ។

រូបសំណាកខ្លាឃ្មុំរាប់ពាន់ក្បាលដែលលោកអ្នកបានឃើញនេះ គឺជាការរៀបចំកម្មវិធី «Panda Go! Fest Hong Kong» ដោយការបង្ហាញរូបសំណាកខ្លាឃ្មុំ រហូតដល់២,៥០០ក្បាល នៅអាកាសយានដ្ឋានក្នុងទីក្រុងហុងកុង ។ ក្រៅពីនេះ នឹងមានការបង្ហាញរូបសំណាកខ្លាឃ្មុំឱ្យមហាជនទូទៅទស្សនានៅបរិវេណផ្លូវ Avenue of Stars ក្នុងតំបន់លក់ទំនិញ Tsim Sha Tsui និងទីតាំងល្បីៗ ៣កន្លែងទៀត នាខែធ្នូ ឆ្នាំ២០២៤ ។

ក្នុងចំណោមទីតាំងបង្ហាញរូបសំណាកខ្លាឃ្មុំទាំងនេះ គឺនឹងបង្ហាញនៅឧទ្យានជាតិ Ocean ផងដែរ ដែលជាកន្លែងរស់នៅរបស់កូនខ្លាឃ្មុំយក្ស, មេបារបស់វា ព្រមទាំងខ្លាឃ្មុំ២ក្បាលទៀត ដែលចិនប្រគល់ឱ្យហុងកុង សម្រាប់ជាកាដូ ឆ្នាំ២០២៤ ។

គោលបំណងនៃការបង្ហាញរូបសំណាកខ្លាឃ្មុំ គឺដើម្បីជួយជំរុញសេដ្ឋកិច្ចទីក្រុងហុងកុងឱ្យកាន់តែល្អប្រសើរឡើង និងជួយឱ្យហុងកុងក្លាយជាតំបន់ទេសចរណ៍ដ៏ពេញនិយមជាងគេនៅអាស៊ីឡើងវិញ ។

អ្នករៀបចំកម្មវិធីរូបសំណាកខ្លាឃ្មុំ ក៏បានអញ្ជើញតារាល្បីៗជាច្រើនរូបមកចូលរួមកម្មវិធីផងដែរ ដូចជា ៖ តារាចម្រៀងរបស់អាមេរិក ។ រីឯប្រាក់ចំណូលបានពីកម្មវិធីនេះ គឺសម្រាប់ជួយឧបត្ថម្ភដល់កម្មវិធីផ្សេងៗពាក់ព័ន្ធនឹងខ្លាឃ្មុំយក្ស ។

គួរបញ្ជាក់ថា ការបង្ហាញរូបសំណាកខ្លាឃ្មុំយក្សដល់ភ្ញៀវទេសចរ គឺក្នុងគោលបំណងអបអរសាទរដល់កូនខ្លាឃ្មុំភ្លោះដែលបានកើតនៅឧទ្យានជាតិ Ocean (Ocean Park Hong Kong) ។ ដោយឡែក ការប្រគល់ខ្លាឃ្មុំយក្សដល់សួនសត្វនៅក្រៅប្រទេស គឺបង្ហាញពីទំនាក់ទំនងការទូត និង Soft Power របស់ទីក្រុងប៉េកាំង ៕

ប្រទេសចិន៖ ក្រុមហ៊ុនផលិតរថយន្តចិន BYD បានលក់រថយន្តច្រើនជាងក្រុមហ៊ុនផលិតរថយន្តអាមេរិក Ford នៅក្នុងត្រីមាសទី ៣ នៃឆ្នាំ ២០២៤ នេះហើយទំនងនឹងវ៉ាដាច់គូប្រជែងរបស់ខ្លួនពេញមួយឆ្នាំតែម្តង។
យោងតាមសារព័ត៌មានបរទេសបានចុះផ្សាយថា នៅក្នុងត្រីមាសទីបី BYD លក់រថយន្តបាន ១.១៣ លានគ្រឿង កើនឡើង ៣៨% ធៀបនឹងរយៈពេលដូចគ្នាក្នុងឆ្នាំ ២០២៣ ដែលវ៉ាដាច់ក្រុមហ៊ុន Ford ជាលើកដំបូង ក្លាយជាក្រុមហ៊ុនផលិតរថយន្តធំជាងគេទី ៦ នៅលើពិភពលោក។

ខណៈក្រុមហ៊ុន Ford បានលក់រថយន្តតិចជាង ៤០,០០០ គ្រឿងក្នុងអំឡុងពេលដូចគ្នា ដោយបានធ្លាក់មកចំណាត់ថ្នាក់ទី ៧ ក្នុងរយៈពេល ៩ ខែដំបូងនៃឆ្នាំនេះ។ ប្រសិនបើសន្ទុះកំណើនត្រូវបានរក្សា BYD នឹងវ៉ាដាច់ក្រុមហ៊ុន Ford ក្នុងឆ្នាំ ២០២៤ និងឈានដល់ដំណាក់កាលសំខាន់នៃការលក់រថយន្តជាង ៤ លានគ្រឿង។ មិនត្រឹមតែ BYD ប៉ុណ្ណោះទេ ក្រុមហ៊ុនផលិតរថយន្តចិនផ្សេងទៀតក៏កំពុងដាក់សម្ពាធលើក្រុមហ៊ុនផលិតរថយន្តប្រពៃណីផងដែរ។

នៅក្នុងបញ្ជី focus 2 move ដែលជាគេហទំព័រកត់ត្រាទិន្នន័យនៃការលក់របស់ក្រុមហ៊ុនរថយន្តទូទាំងពិភពលោកបានឱ្យដឹងថា Toyota របស់ជប៉ុននៅតែរក្សាតំណែងលេខ ១ ជាក្រុមហ៊ុនផលិតរថយន្តធំជាងគេនៅលើពិភពលោក។ ទោះជាយ៉ាងណាក៏ដោយយោងតាម Nikkei Asia ម៉ាកយីហោជាច្រើនមកពីប្រទេសជប៉ុន អឺរ៉ុប និងសហរដ្ឋអាមេរិក នៅក្នុងត្រីមាសចុងក្រោយនេះហាក់មានការធ្លាក់ចុះគួរឱ្យកត់សម្គាល់ ដោយ Toyota បានថយចុះ ៤% មកនៅ ២.៧៣ លានគ្រឿង ប៉ុន្តែនៅតែនាំមុខក្រុមហ៊ុនជាច្រើនទៀតដូចជា Volkswagen, Hyundai, Honda និង BYD។

ទោះបីក្រុមហ៊ុនចិន BYD ឈរនៅលេខរៀងទី ៦ នៅលើពិភពលោកក៏ដោយ ក៏ក្រុមហ៊ុននេះនៅតែនាំមុខក្រុមហ៊ុន Ford និង Tesla ជាមួយនឹងចំណែកទីផ្សារ ២៦%។ កំណើនដ៏រឹងមាំរបស់ BYD បានជួយកែលម្អហិរញ្ញវត្ថុរបស់ខ្លួន ដោយនៅក្នុងត្រីមាសទីបី BYD ទទួលបានប្រាក់ចំណូលរហូតដល់ ២០១ ពាន់លានយន់ (ប្រមាណ ២៧.៦ ពាន់លានដុល្លារអាមេរិក) ខ្ពស់ជាង Tesla ដែលមានត្រឹមតែ ២៥.២ ពាន់លានដុល្លារប៉ុណ្ណោះ៕

ប្រទេសកូរ៉េខាងត្បូង ៖ កាលពីថ្ងៃទី៤ ខែធ្នូ ឆ្នាំ២០២៤ សារព័ត៌មាន AFP រាយការណ៍ថា ប្រធានាធិបតីកូរ៉េខាងត្បូង លោក Yoon Suk Yeol បានយល់ព្រមដកច្បាប់អាជ្ញាសឹក ដែលលោកទើបតែប្រកាសឱ្យប្រើច្បាប់នេះរយៈពេលប៉ុន្មានម៉ោងមុន ដើម្បីបង្ក្រា.ប កងកម្លាំងប្រឆាំងរដ្ឋាភិបាល និងទប់ស្កាត់ការគំរា.មកំហែ.ងពីកូរ៉េខាងជើង ។

ប្រធានាធិបតីកូរ៉េខាងត្បូង លោក Yoon បានប្រកាសប្រើច្បាប់អាជ្ញាសឹកជាបន្ទាន់ ដោយសារលោកបារម្ភពីបញ្ហាអសន្តិសុខពីការគំរាមកំហែងរបស់កូរ៉េខាងជើង និងមានមន្ត្រីគណបក្សប្រឆាំងក្នុងរដ្ឋសភាបង្កើតកងកម្លាំងប្រឆាំងរដ្ឋាភិបាល ។ បន្ទាប់មក មេបញ្ជាការកងទ័ពជើងគោកបានបំពេញតួនាទីជាមេបញ្ជាការច្បាប់អាជ្ញាសឹកនៅអគាររដ្ឋសភា ។

ក្រោយមកមិនយូរប៉ុន្មាន កងទ័ព និងសមត្ថកិច្ចនៅក្រោមច្បាប់អាជ្ញាសឹកដែលគ្រប់គ្រងរដ្ឋសភា ក៏បានដកកម្លាំងចេញទាំងអស់ និងទុកផ្លូវឱ្យសមាជិករដ្ឋសភាចូលប្រជុំភ្លាមៗ ដើម្បីរារាំងការអនុវត្តអំណាចរបស់ប្រធានាធិបតីកូរ៉េខាងត្បូង ។ សមាជិកសភាចំនួន១៩០នាក់ (ក្នុងចំណោមសមាជិកសភាសរុប៣០០នាក់) បានចូលរួមប្រជុំបោះឆ្នោតរារាំងការប្រើច្បាប់អាជ្ញាសឹក និងអំពាវនាវឱ្យប្រធានាធិបតីកូរ៉េខាងត្បូងដកវាចេញជាបន្ទាន់ ។

យោងតាមរដ្ឋធម្មនុញ្ញកូរ៉េខាងត្បូងបញ្ជាក់ថា ច្បាប់អាជ្ញាសឹកនឹងលុបចោល នៅពេលសំឡេងភាគច្រើនក្នុងរដ្ឋសភាពុំយល់ស្រប ហើយការប្រើអំណាចកងទ័ព និងសមត្ថកិច្ចតាមច្បាប់អាជ្ញាសឹក គឺជាទង្វើខុសច្បាប់ ។ ហេតុនេះ លោក Yoon ត្រូវតែយល់ព្រមដកច្បាប់អាជ្ញាសឹក និងត្រៀមលុបចោលច្បាប់ដែលបានប្រកាសដោយគ្មានការគ្រោងទុក ។

មុននេះ កងទ័ពបានចូលក្នុងរដ្ឋសភា ខណៈអ្នកតវ៉ាជាច្រើននាក់ប្រមូលផ្តុំគ្នានៅបរិវេណខាងក្រៅអគារ និងប្រឈមមុខជាមួយកងកម្លាំងសន្តិសុខ ។ គណៈរដ្ឋមន្ត្រីរបស់លោក Yoon បានអនុម័តលុបចោលច្បាប់អាជ្ញាសឹករួចហើយ និងនៅសល់តែសេចក្តីប្រកាសរបស់ប្រធានាធិបតីប៉ុណ្ណោះ ។

អ្នកតវ៉ាជាច្រើនបានលើកស្លាកសញ្ញា និងទង់ជាតិកូរ៉េខាងត្បូង ហើយស្រែកខ្លាំងៗថា «ចូរចាប់ខ្លួនលោក Yoon» ដែលសកម្មភាពនេះបង្ហាញថា ពលរដ្ឋមិនគាំទ្រការប្រើច្បាប់អាជ្ញាសឹករបស់ប្រធានាធិបតីទេ ។ លោក Yoon បានហៅក្រុមមន្ត្រីមកពីបក្សប្រឆាំងដែលមានសំឡេងច្រើនក្នុងរដ្ឋសភាថា គឺជាកងកម្លាំងប្រឆាំងរដ្ឋាភិបាល ។

លោកបានប្រកាសប្រើច្បាប់អាជ្ញាសឹកជាលើកដំបូងក្នុងរយៈពេល៤៤ឆ្នាំ និងនិយាយថា មន្ត្រីបក្សប្រឆាំងមានបំណងផ្តួលរំលំរដ្ឋាភិបាល និងគាំទ្រកូរ៉េខាងជើង ។ រីឯមន្ត្រីបក្សប្រឆាំងបញ្ជាក់ថា វាជាការប្រឆាំងនឹងរដ្ឋធម្មនុញ្ញកូរ៉េខាងត្បូង ។ កាលពីថ្ងៃទី៣ ខែធ្នូ កន្លងមក លោក Yoon បានថ្លែងក្នុងទូរទស្សន៍ជាតិដោយគ្មានការគ្រោងទុកពីការប្រើច្បាប់អាជ្ញាសឹក ដើម្បីកម្ចាត់កងកម្លាំងគាំទ្រកូរ៉េខាងជើង និងការពារសេរីភាពនៅកូរ៉េខាងត្បូង ។

គួរបញ្ជាក់ថា ច្បាប់អាជ្ញាសឹកនឹងប្រកាសឱ្យប្រើប្រាស់ក្នុងរយៈពេលបណ្តោះអាសន្ន នៅពេលប្រទេសជាតិមានអាសន្ន និងផ្តល់អំណាចដឹកនាំទៅឱ្យក្រុមកងទ័ពដើម្បីស្តារសណ្តាប់ធ្នាប់សាធារណៈ និងសន្តិសុខ ។ ច្បាប់នេះអាចរឹតបន្តឹងសិទ្ធិសេរីភាពរបស់ប្រព័ន្ធផ្សព្វផ្សាយ និងពលរដ្ឋទូទៅ ៕

យោងតាមអ្នកយកព័ត៌មានរបស់កាសែត The Straits Times ដែលមានឈ្មោះថា Lydia Yang បានចែករំលែកថា សម្រាប់ភ្ញៀវទេសចរដែលចូលចិត្តឡើងភ្នំគយគន់ទេសភាព តំបន់ទាំង ៥ នៃប្រទេសអាស៊ីអាគ្នេយ៍នេះគឺពិតជាស្រស់ស្អាត និងទាក់ទាញខ្លាំងណាស់ ជាពិសេសនៅរដូវរងារតែម្តង ដែលកន្លែងទាំងនោះរួមមាន៖

១.ភ្នំកំពង់ត្រាច៖ ភ្នំកំពង់ត្រាចមានទីតាំងស្ថិតនៅតាមបណ្តោយផ្លូវជាតិលេខ ៣៦ ក្នុងឃុំដំណាក់កន្ទួត ស្រុកកំពង់ត្រាច ខេត្តកំពត ប្រទេសកម្ពុជាយើង។ ភ្នំនេះគឺជារមណីយដ្ឋានធម្មជាតិនិងប្រវត្តិសាស្ត្រមួយ ដែលទាក់ទាញបំផុតសម្រាប់ភ្ញៀវទេសចរដែលចង់ទៅកម្សាន្តនៅតំបន់ទេសភាពប្លែកភ្នែក ខ្យល់អាកាសបរិសុទ្ធ រូងភ្នំមានខ្យល់ត្រជាក់ ជាពិសេសគឺបទពិសោធន៍ឡើងភ្នំតែម្តង ដែលអាចធ្វើឱ្យអ្នកលោកអ្នកទៅកម្សាន្តនៅទីនេះទទួលបានអារម្មណ៍ស្រស់ស្រាយបំផុត។

២.តំបន់ Thakhek៖ តំបន់ Thakhek មានទីតាំងស្ថិតនៅភាគកណ្តាលប្រទេសឡាវ ជាប់ព្រំដែនប្រទេសថៃ។ តំបន់នេះមានភាពល្បីល្បាញខ្លាំងដោយសារផ្លូវឡើងភ្នំចម្រុះជាង ៦០០ ដែលមានជួរភ្នំជាច្រើន មានផ្ទាំងថ្មធំៗ ទម្រង់ថ្មរាងចម្លែក និងជម្រាលថ្មចោត។ ផ្លូវឡើងភ្នំមានទីតាំងនៅជ្រលងភ្នំដូចគ្នា ចំណុចខ្លះទៀតត្រូវដើរ ១០-២០ នាទីពីកន្លែងបោះជំរំ។ ដូច្នេះកន្លែងនេះគឺសក្តិសមបំផុតសម្រាប់ភ្ញៀវទេសចរណ៍ដែលចូលចិត្តឡើងភ្នំ និងការផ្សងព្រេង។

៣.តំបន់ Batu Caves៖ Batu Caves គឺជាកន្លែងទាក់ទាញដ៏ល្បីល្បាញមួយរបស់ប្រទេសម៉ាឡេស៊ី រួមទាំងការឡើងភ្នំផងដែរ។ ជាមួយនឹងច្រាំងថ្មកំបោរ និងប្រព័ន្ធរូងភ្នំដ៏ធំទូលាយ តំបន់ Batu Caves ផ្តល់នូវផ្លូវឡើងភ្នំសមរម្យសម្រាប់គ្រប់កម្រិតទាំងអស់។ នៅពេលទៅដល់កន្លែងនេះអ្នកទស្សនានឹងឃើញរូបសំណាកព្រះហិណ្ឌូ Murugan កម្ពស់ ៤២ ម៉ែត្រ បូករួមនឹងទិដ្ឋភាពគួរឱ្យចាប់អារម្មណ៍បំផុតនៃព្រៃត្រូពិចជុំវិញ។

៤.តំបន់ Suoi Da៖ Suoi Da គឺជាកន្លែងសម្រាប់សកម្មភាពឡើងភ្នំគួរឱ្យចាប់អារម្មណ៍មួយនៅក្នុងតំបន់ភាគខាងត្បូងប្រទេសវៀតណាម។ នេះគឺជាជួរភ្នំថ្មដែលមានកំពស់រហូតដល់ ៦ ម៉ែត្រ មិនត្រូវការខ្សែក្រវ៉ាត់សុវត្ថិភាពទេ ដោយសារថ្មនៅទីនេះមានភាពរលូន ងាយស្រួលក្នុងការយកឈ្នះ។

៥.ទីក្រុង Lopburi៖ Lopburi ស្ថិតនៅភាគខាងជើងនៃទីក្រុងបាងកក ប្រទេសថៃ គឺជាជម្រើសដ៏ល្អមួយសម្រាប់អ្នកទេសចរដែលចង់ទទួលបានបទពិសោធន៍ឡើងភ្នំក្នុងទីធ្លាស្ងប់ស្ងាត់ និងសម្រាកលំហែជាមួយដីចម្រុះ។ ផ្លូវឡើងភ្នំនាំអ្នកទស្សនាទៅកាន់ Khao Chin Lae ដែលជាកំពូលភ្នំដ៏លេចធ្លោនៅក្នុងតំបន់ ដែលអ្នកអាចរីករាយនឹងទេសភាពធម្មជាតិដ៏ស្រស់បំព្រងនៅទីនោះ៕