ប្រទេសហ្វីលីពីន៖ ប្រធានាធិបតីហ្វីលីពីន លោក Ferdinand Marcos បានប្រកាសថា នៅថ្ងៃទី ៤ ខែវិច្ឆិកានេះគឺជាថ្ងៃកាន់ទុក្ខជាតិ ដើម្បីរំលឹកដល់អ្នកដែលបានស្លា.ប់ និងគ្រួសារដែលរងគ្រោះដោយសារឥទ្ធិពលព្យុះ Tra Mi ។

ប្រធានាធិបតីហ្វីលីពីនបានចូលរួមរំលែកទុក្ខចំពោះការបាត់បង់គ្រួសារ និងមនុស្សជាទីស្រឡាញ់ត្រូវបានស្លា.ប់ ឬបាត់ខ្លួនដោយសារឥទ្ធិពលខ្យល់ព្យុះ។ ដូច្នេះទិវាជាតិនៃការកាន់ទុក្ខត្រូវបានប្រកាស “ដើម្បីបង្ហាញពីសាមគ្គីភាពជាមួយគ្រួសារដែលរងផលប៉ះពាល់” ។

តាមច្បាប់ ទង់ជាតិត្រូវតែបង្ហូតត្រឹមពាក់កណ្តាលពីថ្ងៃរះដល់ថ្ងៃលិច ដើម្បីរំលឹកដល់អ្នកស្លា.ប់នៅទូទាំងប្រទេស ហើយគ្រប់ភ្នាក់ងាររដ្ឋាភិបាលហ្វីលីពីននៅបរទេសទាំងអស់ក៏ត្រូវអនុវត្តបែបនេះដែរ។ យោងតាមទិន្នន័យដែលបានចេញផ្សាយ មនុស្សចំនួន ១៥០ នាក់បានបាត់បង់ជីវិត និងរាប់សិបនាក់ផ្សេងទៀតបានបាត់ខ្លួន មិនទាន់រកឃើញនៅឡើយទេ ដោយសារតែព្យុះ Tra Mi ដែលជាព្យុះដ៏ខ្លាំងបំផុតមួយបានវាយប្រហារប្រទេសហ្វីលីពីនក្នុងឆ្នាំនេះ។

លើសពីនេះ មនុស្សជាង ៧ លាននាក់ផ្សេងទៀតក៏បានរងផលប៉ះពាល់ពីព្យុះដ៏កំណាចនេះផងដែរ។ ព្យុះត្រាមីបានបំផ្លិចបំផ្លាញទ្រព្យសម្បត្តិ រួមទាំងការខូចខាតយ៉ាងធ្ងន់ធ្ងរដល់វិស័យកសិកម្ម និងហេដ្ឋារចនាសម្ព័ន្ធសំខាន់ៗ ព្រមទាំងរំខានដល់ជីវភាព និងរបៀបរស់នៅរបស់ប្រជាជនផងដែរ។ យោងតាមទីភ្នាក់ងារសារព័ត៌មានហ្វីលីពីន (PNA) ប្រទេសក្នុងតំបន់អាស៊ីអាគ្នេយ៍ចំនួនបួនរួមមាន សិង្ហបុរី ប្រ៊ុយណេ ម៉ាឡេស៊ី និងឥណ្ឌូនេស៊ី បានកំពុងជួយហ្វីលីពីនឱ្យយកឈ្នះលើការខូចខាតបន្ទាប់ពីព្យុះត្រូពិកត្រាមី។

គួរបញ្ជាក់ដែរថា ជារៀងរាល់ឆ្នាំ ព្យុះធំៗប្រហែល ២០ បានបោកបក់មកលើប្រទេសហ្វីលីពីន ឬតំបន់ទឹកជុំវិញ ដែលបណ្តាលឱ្យខូចខាតផ្ទះសម្បែង ហេដ្ឋារចនាសម្ព័ន្ធ និងបានសម្លា.ប់មនុស្សជាច្រើននាក់។ នេះបើយោងតាមការសិក្សានាពេលថ្មីៗនេះ បានបង្ហាញថា ព្យុះនៅតំបន់អាស៊ីប៉ាស៊ីហ្វិកមួយទៀត ក៏កំពុងកៀកនឹងឆ្នេរសមុទ្រនៃប្រទេសហ្វីលីពីន កាន់តែខ្លាំង កាន់តែលឿន និងអូសបន្លាយនៅលើដី ដោយសារការប្រែប្រួលអាកាសធាតុផងដែរ៕

ប្រទេសរុស្ស៊ី ៖ កាលពីថ្ងៃទី១ ខែវិច្ឆិកា ឆ្នាំ២០២៤ សារព័ត៌មាន CNN រាយការណ៍ថា ប្រទេសរុស្ស៊ីបានប្តឹ.ង Google គឺជាក្រុមហ៊ុនបច្ចេកវិទ្យាដ៏ធំលើពិភពលោក ឱ្យបង់ប្រាក់យ៉ាងច្រើនមហាសាល ស្មើរហូតដល់ ២ម៉ឺន លាន លាន លាន លាន លាន ដុល្លារអាមេរិក (ឬ ២០ ដេស៊ីលានដុល្លារ) (២0,000,000,000,000,000,000,000,000,000,000,000 ដុល្លារ) ពីករណី Google បិទប្រព័ន្ធផ្សព្វផ្សាយ YouTube ជាច្រើនដែលគាំទ្ររដ្ឋាភិបាលរុស្ស៊ី ។

សារព័ត៌មានរបស់រដ្ឋាភិបាលរុស្ស៊ី ឈ្មោះ TASS រាយការណ៍ថា កន្លងមក តុលាការរុស្ស៊ីបានកាត់ក្តីឱ្យ Google បើកដំណើរការឡើងវិញសម្រាប់ប្រព័ន្ធ YouTube ចំនួន១៧ ដែលគាំទ្ររដ្ឋាភិបាលរុស្ស៊ី ក្រោយពី Google បានបិទ YouTube រុស្ស៊ី កាលពីឆ្នាំ២០២២ ពីព្រោះ Google ពុំគាំទ្រឱ្យប្រធានាធិបតីរុស្ស៊ី លោក វ្ល៉ាឌីមៀ ពូទីន ឈ្លានពានអ៊ុយក្រែន ។ តុលាការរុស្ស៊ីបញ្ជាក់ថា បើ Google មិនបើក YouTube ទាំងនេះវិញទេ រុស្ស៊ីនឹងប្តឹង Google ឱ្យបង់ប្រាក់ថែមទៀត ។

សារព័ត៌មាននេះរាយការណ៍បន្តថា សូម្បតែលោក Dmitry Peskov មន្ត្រីនាំពាក្យរដ្ឋាភិបាលរុស្ស៊ី ក៏ពុំអាចអានចំនួនតួលេខទឹកប្រាក់ដ៏ច្រើននេះបានដែរ ។ តុលាការរុស្ស៊ីបានកាត់ក្តីឱ្យ Google បើកដំណើរការប្រព័ន្ធផ្សព្វផ្សាយ YouTube របស់រុស្ស៊ីឡើងវិញ ក្នុងរយៈពេល៩ខែ ហើយបើ Google មិនធ្វើតាមទេនោះ ចំនួនប្រាក់នេះនឹងកើនឡើងទ្វេដង ក្នុង១សប្តាហ៍ ។

កាលពីថ្ងៃទី៣១ ខែតុលា កន្លងមក លោក Dmitry Peskov មន្ត្រីនាំពាក្យរដ្ឋាភិបាលរុស្ស៊ីនិយាយថា រុស្ស៊ីប្តឹងទាមទារប្រាក់យ៉ាងច្រើនពី Google គឺដើម្បីបញ្ជាក់ថា Google ពុំគួរបិទប្រព័ន្ធ YouTube របស់រុស្ស៊ីទេ ។ រីឯ Google បញ្ជាក់ថា ការប្តឹងរបស់រុស្ស៊ីគ្មានផលប៉ះពាល់អវិជ្ជមានដល់ក្រុមហ៊ុនទេ ។

គួរបញ្ជាក់ថា ក្រោយពីរុស្ស៊ីធ្វើសង្គ្រាមជាមួយអ៊ុយក្រែន Google បានកាត់បន្ថយការងារខ្លះៗនៅរុស្ស៊ី ប៉ុន្តែ Google ពុំបានដកទីតាំងចេញពីរុស្ស៊ី ដូចក្រុមហ៊ុនផ្សេងៗរបស់អាមេរិកទេ ។ ហេតុនេះ ទើបរុស្ស៊ីនៅតែអាចប្រើប្រាស់សេវាកម្មផ្សេងៗរបស់ Google ដូចជា ៖ YouTube និង Google Search ។

ចំនួនប្រាក់ដែលរុស្ស៊ីប្តឹង Google ឱ្យបង់នេះ គឺជាការទាមទារប្រាក់យ៉ាងច្រើនមហាសាល ដែលពុំធ្លាប់មាននៅលើពិភពលោក ។ បើប្រៀបធៀបជាមួយផលិតផលក្នុងស្រុកសរុប (GDP) របស់ពិភពលោក គឺចំនួនប្រាក់នេះច្រើនជាង GDP របស់ពិភពលោក ទៅទៀត ៕

ប្រទេសជប៉ុន ៖ កាលពីថ្ងៃទី១ ខែវិច្ឆិកា ឆ្នាំ២០២៤ ប្រទេសជប៉ុនបានចាប់ផ្តើមអនុវត្តច្បាប់ថ្មីតឹងតែងជាងមុន គឺអ្នកជិះកង់បណ្តើរ និយាយទូរស័ព្ទបណ្តើរ ឬប្រើប្រាស់ទូរស័ព្ទដៃក្នុងពេលជិះកង់តាមផ្លូវ នឹងជាប់ពន្ធនា.គារ រយៈពេល៦ខែ ឬពិន័យជាប្រាក់ប្រមាណ៦៦៦ដុល្លារអាមេរិក ។

ប្រទេសជប៉ុនបានអនុវត្តច្បាប់ថ្មីនេះ ក្រោយពីចំនួនគ្រោះថ្នាក់ចរាចរណ៍ពាក់ព័ន្ធនឹងការប្រើប្រាស់ទូរស័ព្ទពេលជិះកង់ ផ្តើមកើនឡើងតាំងពីឆ្នាំ២០២១ ។ កាលពីមុន ពលរដ្ឋជប៉ុនប្រើប្រាស់មធ្យោបាយធ្វើដំណើរសាធារណៈ ដូចជា ៖ ជិះរថយន្តក្រុង និងរថភ្លើង ប៉ុន្តែចាប់ពីជំងឺកូវីដ-១៩ ឆ្លងរាតត្បាតមក ពលរដ្ឋជប៉ុនក៏និយមជិះកង់វិញ ។

កាលពីឆ្នាំ២០២៣ ជប៉ុនបានកំណត់ឱ្យអ្នកជិះកង់តាមផ្លូវត្រូវតែពាក់ពួកសុវត្ថិភាពជានិច្ច ។ បន្ទាប់មក នៅខែឧសភា ឆ្នាំ២០២៤ រដ្ឋសភាជប៉ុនបានអនុម័តច្បាប់អនុញ្ញាតឱ្យសមត្ថកិច្ចផាកពិន័យអ្នកជិះកង់មិនគោរពច្បាប់ចរាចរណ៍ ។

ក្រៅពីជប៉ុនរឹតបន្តឹងការប្រើប្រាស់ទូរស័ព្ទដៃពេលជិះកង់ហើយ ច្បាប់ថ្មីនេះក៏បានដាក់ទោសអ្នកផឹកគ្រឿងស្រវឹងហើយជិះកង់ផងដែរ ។ អ្នកល្មើសច្បាប់នឹងជាប់ពន្ធនាគាររហូតដល់៣ឆ្នាំ ឬពិន័យជាប្រាក់ប្រមាណ ៣.៣៦៣ដុល្លារអាមេរិក ។

ក្រោយពីជប៉ុនអនុវត្តច្បាប់ថ្មី អាជ្ញាធរទីក្រុងអូសាកាបញ្ជាក់ថា សមត្ថកិច្ចចាប់បានអ្នកជិះកង់បណ្តើរ និយាយទូរស័ព្ទបណ្តើរ និងអ្នកជិះកង់ពេលស្រវឹង រួចហើយទៅបុកអ្នកជិះកង់ដូចគ្នា ។ កាលពីឆ្នាំ២០២៣ មានគ្រោះថ្នាក់ចរាចរណ៍ពាក់ព័ន្ធនឹងកង់ រហូតដល់ជាង៧២.០០០លើក នៅជប៉ុន ដែលចំនួននេះច្រើនជាង២០% របស់គ្រោះថ្នាក់ចរាចរណ៍សរុប ។

ដោយឡែក នៅឆមាសទី១ ឆ្នាំ២០២៤ គ្រោះថ្នាក់ចរាចរណ៍បណ្តាលមកពីការនិយាយទូរស័ព្ទពេលជិះកង់ គឺមានមនុស្សស្លាប់ម្នាក់ និងរបួសធ្ងន់១៧នាក់ ។ វាជាចំនួនខ្ពស់បំផុតចាប់ពីសមត្ថកិច្ចជប៉ុនកត់ត្រាចំនួនគ្រោះថ្នាក់ចរាចរណ៍ កាលពីឆ្នាំ២០០៧ ។

តាមរបាយការណ៍របស់សមត្ថកិច្ចបង្ហាញថា ចាប់ពីឆ្នាំ២០១៨ ដល់ឆ្នាំ២០២២ មានគ្រោះថ្នាក់ចរាចរណ៍កើតឡើងដោយសារការប្រើប្រាស់ទូរស័ព្ទពេលជិះកង់ ចំនួន៤៥៤លើក កើនឡើង៥០% បើធៀបនឹងរយៈពេល៥ឆ្នាំមុន ។ ហេតុនេះ ជប៉ុនបានបង្កើតច្បាប់ថ្មីឱ្យតឹងតែងជាងមុន ដើម្បីកាត់បន្ថយគ្រោះថ្នាក់ចរាចរណ៍ ៕

ប្រទេសហូឡង់ ៖ បើយើងសុបិនចង់ទៅរស់នៅកន្លែងណាមួយមានភាពស្ងប់ស្ងាត់ និងទេសភាពយ៉ាងស្រស់ស្អាតដូចក្នុងផ្ទាំងគំនូរ យើងអាចផ្លាស់ប្តូរមករស់នៅភូមិមួយឈ្មោះ «Giethoorn» ស្ថិតនៅភាគឦសានប្រទេសហូឡង់ ។ វាជាភូមិបុរាណមួយដែលបានបង្កើតឡើងតាំងពីឆ្នាំ១២៣០ មកម៉្លេះ ហើយល្បីល្បាញថាជាភូមិស្រស់ស្អាតបែបធម្មជាតិ ។

ភូមិ Giethoorn មានភាពលេចធ្លោខុសប្លែកពីភូមិផ្សេងៗ គឺភូមិនេះគ្មានផ្លូវសម្រាប់ឱ្យពលរដ្ឋធ្វើដំណើរទេ ប៉ុន្តែក្នុងភូមិមានប្រឡាយទឹក និងស្ពាន រហូតដល់១៧៦កន្លែង ។ ការធ្វើដំណើររបស់ពលដ្ឋនៅទីនេះ គឺជិះទូកតូចៗហៅថា «Punter» ក្នុងប្រឡាយទឹក ឬក៏ដើរនៅតាមផ្លូវដើរតែប៉ុណ្ណោះ ។

ភ្ញៀវទេសចរដែលមកកម្សាន្តនៅភូមិ ត្រូវជួលទូកតូចៗសម្រាប់ជិះតាមប្រឡាយទឹក ទើបធ្វើឱ្យភូមិនេះស្ងប់ស្ងាត់បំផុត ។ រីឯសំឡេងខ្លាំងបំផុតក្នុងភូមិ គឺជាសំឡេងសត្វស្លាបយំ និងសំឡេងសត្វទាក្នុងភូមិប៉ុណ្ណោះ ។ ភ្ញៀវទេសចរមកលេងទីនេះច្រើនបំផុត គឺនៅរដូវក្តៅ និងរដូវផ្ការីក ដោយសារភ្ញៀវទេសចរអាចជិះទូកតាមប្រឡាយគយគន់សួនច្បារដ៏ស្រស់ស្អាតតាមមាត់ប្រឡាយ ។

ប៉ុន្តែប្រឡាយទឹកខ្វាត់ខ្វែងក្នុងភូមិនឹងក្លាយជាផ្ទាំងទឹកកកសម្រាប់ឱ្យភ្ញៀវទេសចរជិះស្គីលេងនៅរដូវរងា ។ ប្រឡាយក្នុងភូមិកើតឡើងដោយសារការជីកដីធ្វើកសិកម្ម និងស្វែងរកធ្យូងថ្មដ៏មានតម្លៃរបស់តំបន់អឺរ៉ុបកាលពីបុរាណ ហើយពេលពលរដ្ឋជីកដីស្វែងរកធ្យូងថ្ម រណ្តៅដីក៏ក្លាយប្រឡាយទឹកជ្រៅ ហើយពួកគេក៏បានជីកដីជាបន្តបន្ទាប់ដើម្បីតភ្ជាប់ប្រឡាយ ។

ភូមិ Giethoorn មានប្រឡាយទឹកខ្វត់ខ្វែងតភ្ជាប់គ្នាសម្រាប់ឱ្យពលរដ្ឋធ្វើដំណើរទៅមក និងសម្រាប់ដឹកជញ្ជូនទំនិញផ្សេងៗក្នុងភូមិ ។ បច្ចុប្បន្ន ប្រឡាយទឹកទាំងនេះបានក្លាយជាផ្នែកមួយនៃវប្បធម៌របស់ពលរដ្ឋហូឡង់ និងជាតំបន់ទេសចរណ៍ទាក់ទាញភ្ញៀវទេសចរមកពីជុំវិញពិភពលោក ។

ភូមិនេះបង្កើតឡើងដោយពលរដ្ឋ Flemish ដែលបានជម្លៀសមកពីតំបន់មេឌីទែរ៉ាណេ ។ ពាក្យថា «Giethoorn» គឺមកពីពាក្យ «Geytenhoren» ដែលភាសាហូឡង់បុរាណមានន័យថា «ស្នែងពពែ» ។ ពេលជម្លៀសមករស់នៅភូមិនេះ ពលរដ្ឋ Flemish បានឃើញស្នែងពពែយ៉ាងច្រើនក្រោយមានទឹកជំនន់ខ្លាំង ។

ភូមិដ៏ស្ងប់ស្ងាត់នេះមានប្រវែងប្រមាណ៧.៥គីឡូម៉ែត្រ ដែលសម្បូរលំនៅឋានឈើទទួលបានការថែទាំយ៉ាងល្អ និងមានសួនច្បារនៅផ្នែកខាងមុខយ៉ាងស្រស់ស្អាត ។ ក្រៅពីការជិះទូកកម្សាន្ត និងថតរូប ភ្ញៀវទេសចរក៏អាចទៅលេងតំបន់ទេសចរណ៍, ទស្សនាសារមន្ទីរ, បរិភោគអាហារ និងទិញវត្ថុអនុស្សាវរីយ៍ ៕