រថយន្ត Pagani Zonda Carpincho (ផាហ្គានី ហ្សូនដា ខាភីនឆូ) ត្រូវបានដាក់បង្ហាញនៅមហោស្រព Art Basel ក្នុងទីក្រុង Miami សហរដ្ឋអាមេរិក កាលពីថ្ងៃទី១៥ ខែធ្នូ បានទាក់ទាញការចាប់អារម្មណ៍ខ្លាំងពីមហាជន ដោយសាររូបរាងប្លែកអស្ចារ្យរបស់វា និងជារថយន្តដែលផលិតពីកាក់ពណ៌មាស មានតែមួយគត់ក្នុងលោក។

រថយន្តនេះផលិតពីកាក់ 2 Uruguayan Peso ទាំងស្រុងប្រមាណ ១០ ម៉ឺនកាក់ រួមជាមួយឈើ ស្នោ និងដីឥដ្ឋ ដោយវិចិត្រករ Joaquin Arbiza ជនជាតិអ៊ុយរូហ្គាយ ដែលលោកគឺជាជាងចម្លាក់ដែក និងជាអ្នកបង្កើតស្នាដៃសិល្បៈរថយន្តនេះមក។ ស្នាដៃភាគច្រើនដែលលោកបានបង្កើតគឺមេកានិច សូម្បីតែរូបសំណាកជ្រូកព្រៃដែលបង្កើតឡើងសម្រាប់ប្រធានាធិបតីអ៊ុយរូហ្គាយ ក៏ត្រូវបានបង្កើតឡើងដោយឧបករណ៍ ក្រវិល និងឧបករណ៍ផ្សេងៗទៀតផងដែរ។

វិចិត្រករ Joaquin Arbiza បាននិយាយថា លោកបានចំណាយពេល ៣ ឆ្នាំធ្វើការលើគម្រោងនេះ ដើម្បីបង្កើតរថយន្ត Pagani Zonda Carpincho ក្នុងគោលបំណងដណ្តើមយកពានរង្វាន់ច្នៃប្រឌិតក្នុងកម្មវិធីតាំងពិព័ណ៌ Art Basel។ ដូច្នេះកាក់ទាំងអស់ត្រូវបានផ្សាភ្ជាប់ជាមួយគ្នា សរុបជាង ១០០,០០០ នៅទូទាំងរថយន្តទាំងមូល គឺជាការបំផុសគំនិតដោយរថយន្តទំនើប Pagani Zonda។ បច្ចុប្បន្នរយន្តនេះត្រូវបានទិញដោយអ្នកជំនួញ Jorge Gomez ដែលជាអ្នកស្រឡាញ់រថយន្តច្នៃប្រឌិត ក្នុងតម្លៃត្រឹមតែ ៤,៥០០ ដុល្លារអាមេរិកប៉ុណ្ណោះ។

ដោយសាររថយន្តនេះគ្រាន់តែធ្វើពីកាក់ពណ៌មាសធម្មតា ហើយមិនអាចបើកបរបាននោះទេ។ អ្នកជំនួញ Jorge Gomez គឺជាអ្នកប្រមូលទិញរថយន្តប្លែកៗ ថ្មីៗជាច្រើននិងជាអ្នកគាំទ្រ Pagani។ ទោះជាយ៉ាងណានេះមិនមែនជារថយន្តសិល្បៈដំបូងរបស់លោកនោះទេ។ នៅផ្ទះ Buenos Aires របស់លោកមានរូបសំណាកដៃមួយ គូររូប Zonda នៅលើជញ្ជាំង។ ដៃនេះត្រូវបានបង្កើតឡើងពីសំណល់នៃរថយន្តដំបូងរបស់ Horacio Pagani ដែលជារថយន្ត Toyota Corolla ឆ្នាំ ១៩៨១។ លើសពីនេះនៅក្នុងផ្ទះរបស់ Jorge Gomez ក៏មានរថយន្ត C12 របស់ Pagani ដែលលោកបានទិញដោយផ្ទាល់ពី Pagani ក្នុងការដំឡើងផងដែរ៕

ប្រទេសបារាំង ៖ កាលពីថ្ងៃទី១៥ ខែធ្នូ ឆ្នាំ២០២៤ មន្ត្រីក្រសួងមហាផ្ទៃបារាំងប្រកាសថា អាចមានពលរដ្ឋរាប់ពាន់នាក់បាត់ប.ង់ ជីវិតដោយសារខ្យល់ព្យុះស៊ីក្លូនឈ្មោះ «Chido» ដែលមានកម្លាំងបំផុតបោកបក់មកលើកោះ Mayotte របស់បារាំង ក្នុងរយៈពេលជិត១០០ឆ្នាំកន្លងមក ។

មន្ត្រីឧតុនិយមឱ្យដឹងថា ខ្យល់ព្យុះនេះបានបក់មកលើកោះ Mayotte កាលពីយប់ថ្ងៃទី១៥ ខែធ្នូ កន្លងមក ដែលមានកម្លាំងស្មើជាង២០០គីឡូម៉ែត្រក្នុង១ម៉ោង ។ ខ្យល់ព្យុះនេះបណ្តាលឱ្យខូចខាតផ្ទះសម្បែងពលរដ្ឋ, អគារ និងមន្ទីរពេទ្យមួយកន្លែង ហើយជាខ្យល់ព្យុះមានកម្លាំងខ្លាំងបំផុតដែលបោកមកលើកោះក្នុងរយៈពេលជាង៩០ឆ្នាំ ។

ពលរដ្ឋម្នាក់បាននិយាយមកកាន់សារព័ត៌មាន Reuters ថា ៖ «ពួកយើងកំពុងជួបប្រទះនឹងសោកនាដកម្ម ហើយមានអារម្មណ៍ដូចស្ថិតក្នុងហេតុការណ៍ក្រោយសង្គ្រាមនុយក្លេអ៊ែរ ក្រោយពីបានឃើញខ្យល់ព្យុះបំផ្លាញលំនៅឋានអស់ជាច្រើនខ្នង» ។

តាមរូបភាពថតពីលើអាកាស គេបានឃើញផ្ទះពលរដ្ឋរាប់ពាន់ខ្នងបាក់ខ្ចាត់ខ្ចាយនៅប្រជុំកោះ Mayotte ជាកន្លែងប្រមូលផ្តុំរបស់ជនភៀសខ្លួនខុសច្បាប់ ដែលធ្វើដំណើរមកពីកោះ Comoros នៅក្បែរនោះ ។ អាជ្ញាធរមូលដ្ឋានពិបាករាប់ចំនួនពលរដ្ឋស្លាប់ដោយសារខ្យល់ព្យុះ និងបារម្ភពីការខ្វះខាតអាហារ, ទឹក និងថ្នាំពេទ្យ ពីព្រោះកោះ Mayotte ជាទឹកដីរបស់មូស្លីម ។

ប្រធានាធិបតីបារាំង លោក Emmanuel Macron ថ្លែងថា ៖ «ខ្ញុំសូមចូលរួមសោកស្តាយទៅកាន់បងប្អូនជនរួមជាតិរបស់យើងរស់នៅកោះ Mayotte ដែលបានឆ្លងកាត់ពេលវេលាដ៏អាក្រក់បំផុត ហើយពលរដ្ឋខ្លះបានបាត់បង់អ្វីៗគ្រប់យ៉ាងក្នុងជីវិត» ។

រយៈពេលជាច្រើនឆ្នាំមកនេះ ពលរដ្ឋរាប់ម៉ឺននាក់បានព្យាយាមធ្វើដំណើរពីកោះ Comoros ស្ថិតនៅឆ្នេរសមុទ្រអាហ្វ្រិកខាងកើត មកកាន់កោះ Mayotte ដោយសារការរស់នៅលើកោះនេះល្អប្រសើរជាង និងទទួលបានប្រាក់ឧបត្ថម្ភផ្នែកសង្គមពីបារាំង ។ ក្រសួងមហាផ្ទៃទទួលស្គាល់ថា បច្ចុប្បន្ន មានមនុស្សជាង១ម៉ឺននាក់បានមករស់នៅលើកោះ Mayotte ដោយខុសច្បាប់ ឬគ្មានឯកសារស្នាក់នៅ ៕

កូរ៉េខាងត្បូង៖ ភ្ញៀវទេសចរអន្តរជាតិជាច្រើនបានលុបចោលការធ្វើដំណើរទៅប្រទេសកូរ៉េជាបន្តបន្ទាប់ ដោយសារវិបត្តិនយោបាយ បន្ទាប់ពីច្បាប់អាជ្ញាសឹកកាលពីសប្តាហ៍មុន។
យោងតាមការចុះផ្សាយរបស់សារព័ត៌មានបរទេស CNN វិបត្តិនយោបាយនៅប្រទេសកូរ៉េខាងត្បូងនាពេលបច្ចុប្បន្ននេះបានកំពុងរំខានដល់ឧស្សាហកម្មទេសចរណ៍យ៉ាងខ្លាំង ធ្វើឱ្យប្រទេសនេះបាត់បង់ភ្ញៀវបរទេសយ៉ាងច្រើនសន្ធឹកសន្ធាប់ ខណៈនៅចុងឆ្នាំមុនមានភ្ញៀវទេសចរមកទស្សនាច្រើន ប៉ុន្តែនៅចុងឆ្នាំនេះស្រាប់តែស្ងាត់ភ្ញៀវទេសចរទៅវិញ។

កាលពីចុងសប្តាហ៍មុន សមាគមអ្នកចាប់ផ្តើមអាជីវកម្មទេសចរណ៍កូរ៉េបាននិយាយថា ចំនួននៃការកក់ទុកក្នុងឆមាសទី ១ ឆ្នាំ ២០២៥ បានធ្លាក់ចុះយ៉ាងខ្លាំង។ បន្ទប់នៅសណ្ឋាគារដែលច្រើនតែពេញក្នុងរដ្ឋធានីសេអ៊ូលបានក្លាយទៅជាទទេដោយសារតែការលុបចោលរបស់អ្នកទេសចរ ប្រតិបត្តិករទេសចរណ៍ក្នុងស្រុកបាននិយាយថា សណ្ឋាគារមួយចំនួនថែមទាំងផ្តល់ការបញ្ចុះតម្លៃ និងការផ្តល់ជូនពិសេសដើម្បីទាក់ទាញការកក់កាន់តែច្រើន ទោះជាយ៉ាងណាភ្ញៀវបរទេសនៅតែមិនចាប់អារម្មណ៍។

គ្លីនិកវះកាត់កែសម្ផស្សក្នុងតំបន់ Gangnam ដ៏ធំនៃទីក្រុងសេអ៊ូលក៏បាននិយាយផងដែរថាអ្នកជំងឺបរទេសមួយចំនួនបានលុបចោលការណាត់ជួបរបស់ពួកគេចាប់តាំងពីមានឧប្បត្តិហេតុច្បាប់អាជ្ញាសឹក។ តំណាងគ្លីនិកម្នាក់បាននិយាយថា “មិនចាំបាច់ព្រួយបារម្ភខ្លាំងពេកអំពីស្ថានភាពបច្ចុប្បន្ននោះទេ ប៉ុន្តែប្រសិនបើរឿងនេះនៅតែបន្ត វានឹងប៉ះពាល់ដល់ភ្ញៀវទេសចរបរទេសយ៉ាងខ្លាំង”។

អភិបាលក្រុងសេអ៊ូល លោក Oh Se-hoon បាននិយាយកាលពីថ្ងៃទី ១២ ខែធ្នូថា “ភ្ញៀវបរទេសមានការព្រួយបារម្ភពីបញ្ហាសុវត្ថិភាពនៅក្នុងទីក្រុងសេអ៊ូល” ទោះជាយ៉ាងណាលោកនិងមន្ត្រីឧស្សាហកម្មទេសចរណ៍ បានពិភាក្សាគ្នាយ៉ាងយកចិត្តទុកដាក់ ដោយនិយាយថា ជីវិតប្រចាំថ្ងៃ និងសកម្មភាពទេសចរណ៍នៅតែបន្តដូចធម្មតា បើទោះបីជាមានការតវ៉ាទ្រង់ទ្រាយធំជាបន្តបន្ទាប់ក៏ដោយ ក៏ទីក្រុងសេអ៊ូលនៅតែមានសុវត្ថិភាពជានិច្ច ដូច្នេះភ្ញៀវទេសចរបរទេសមិនបាច់បារម្ភពីសុវត្ថិភាពនោះទេ ដោយភ្ញៀវអាចអញ្ជើញធ្វើដំណើរទៅប្រទេសកូរ៉េខាងត្បូងបានដោយសេរី។

ទោះបីជាបច្ចុប្បន្នមានភាពច្របូកច្របល់ផ្នែកនយោបាយបន្តិចក៏ដោយ ក៏ប្រទេសនេះសង្ឃឹមថានឹងកើនឡើងជិតពីរដងនៃចំនួនភ្ញៀវទេសចរប្រចាំឆ្នាំដល់ ៣០ លាននាក់នៅឆ្នាំ ២០២៧ បើធៀបនឹងកម្រិតឆ្នាំ ២០១៩ ផ្នែកនៃយុទ្ធសាស្រ្តនេះក៏ផ្តោតលើការធ្វើដំណើរអាជីវកម្មជាក្រុមសម្រាប់ព្រឹត្តិការណ៍នានា រួមមានសន្និសីទ និងការតាំងពិពណ៌ ដែលជាវិស័យដែលគេស្គាល់ថាជាទេសចរណ៍ MICE ។ ទោះបីជាយ៉ាងណា បើតាមលោកស្រី Ha Hong-kook អគ្គលេខាធិការនៃសមាគម MICE របស់កូរ៉េ វាអាចនឹងរងផលប៉ះពាល់ ប្រសិនបើវិបត្តិនយោបាយអូសបន្លាយរហូតដល់ដើមឆ្នាំក្រោយ៕

ប្រទេសថៃ ៖ យោងតាមការព្យាករអាកាសធាតុរយៈពេល៧ថ្ងៃរបស់ភ្នាក់ងារឧតុនិយមថៃបង្ហាញថា ចាប់ពីថ្ងៃទី១៤ ដល់ថ្ងៃទី២០ ខែធ្នូ ឆ្នាំ២០២៤ ប្រទេសថៃនឹងមានភ្លៀងធ្លាក់ខ្លាំង និងសីតុណ្ហភាពធ្លាក់ចុះរហូតដល់៧អង្សារសេដោយសារអាកាសធាតុផ្លាស់ប្តូរ ហើយសូមឱ្យពលរដ្ឋថែទាំសុខភាព និងប្រយ័ត្នទឹកជំនន់ហូរពីតំបន់ព្រៃភ្នំ ។

ចាប់ពីថ្ងៃទី១៤ ដល់ថ្ងៃទី១៧ ខែធ្នូ គឺមានខ្យល់ត្រជាក់បក់ពីប្រទេសចិនមកគ្របដណ្តប់លើភាគខាងជើង និងខាងត្បូងប្រទេសថៃ ព្រមទាំងសមុទ្រចិនខាងត្បូង ហើយមានខ្យល់មូសុងឦសានបោកបក់នៅភាគខាងជើងថៃ ។ ដូច្នេះ វានឹងធ្វើឱ្យភ្លៀងធ្លាក់ខ្លាំងនៅតំបន់នេះ និងសីតុណ្ហភាពធ្លាក់ចុះ ក្នុងនោះភាគឦសាន សីតុណ្ហភាពធ្លាក់ចុះពី៥ ទៅ៧អង្សារសេ រីឯភាគខាងជើង, កណ្តាល, ទីក្រុងបាងកក និងតំបន់ជុំវិញ សីតុណ្ហភាពធ្លាក់ចុះពី៣ ទៅ៦អង្សារសេ ។

ខ្យល់មូសុងឦសាននឹងគ្របដណ្តប់លើឈូងសមុទ្រថៃ និងភាគខាងត្បូង ព្រមទាំងមានសម្ពាធទាបនៅសមុទ្រចិនខាងត្បូងឆ្លងកាត់ឈូងសមុទ្រថៃ និងប្រទេសម៉ាឡេស៊ី ចាប់ពីថ្ងៃទី១៤ ដល់ថ្ងៃទី១៦ ខែធ្នូ ។ ដូច្នេះ ធ្វើឱ្យភ្លៀងធ្លាក់ខ្លាំងនៅខេត្តភាគខាងត្បូងរបស់ថៃ និងមានខ្យល់បក់ខ្លាំងនៅឈូងសមុទ្រថៃ និងសមុទ្រអាដាម៉ាន់ ។ ឈូងសមុទ្រថៃនឹងមានទឹករលកកម្ពស់ពី២ ទៅ៣ម៉ែត្រ ហើយតំបន់មានផ្គររន្ទះ ទឹករលកនឹងមានកម្ពស់ជាង៣ម៉ែត្រ ។

ចាប់ពីថ្ងៃទី១៨ ដល់ថ្ងៃទី២០ ខែធ្នូ ឆ្នាំ២០២៤ ខ្យល់ត្រជាក់ដែលគ្របដណ្តប់ភាគខាងជើង និងខាងត្បូងថៃ ព្រមទាំងសមុទ្រចិនខាងត្បូង នឹងខ្សោយកម្លាំង ហើយធ្វើឱ្យភាគខាងជើងថៃមានសីតុណ្ហភាពកើនឡើងពី១ ទៅ២អង្សារសេ ។ ដូច្នេះ តំបន់ទាំងនេះនឹងមានអាកាសធាតុត្រជាក់ និងចុះអ័ព្ទពេលព្រឹក ។ រីឯខ្យល់មូសុងឦសានដែលគ្របដណ្តប់លើឈូងសមុទ្រថៃ និងភាគខាងត្បូង គឺមានកម្លាំងមធ្យមទៅខ្លាំង ហើយទឹករលកនៅឈូងសមុទ្រថៃនឹងមានកម្ពស់២ម៉ែត្រ រីឯតំបន់មានផ្គររន្ទះ ទឹករលកមានកម្ពស់ជាង២ម៉ែត្រ ។

ភ្នាក់ងារឧតុនិយមបានប្រកាសឱ្យពលរដ្ឋនៅខេត្តភាគខាងត្បូងប្រុងប្រយ័ត្ន និងថែទាំសុខភាព ដោយសារមានភ្លៀងធ្លាក់ខ្លាំងចាប់ពីថ្ងៃទី១៤ ដល់ថ្ងៃទី១៦ ខែធ្នូ ។ អាកាសធាតុមិនល្អអាចបណ្តាលមានទឹកជំនន់ភ្លាមៗ និងទឹកហូរពីតំបន់ព្រៃភ្នំ ជាពិសេស បរិវេណជាយភ្នំនៅជិតផ្លូវទឹ និងតំបន់ទំនាប ។ ពលរដ្ឋរស់នៅឆ្នេរសមុទ្រខាងត្បូង និងខាងកើត គួរប្រយ័ត្នទឹករលកខ្លាំងបោកបក់មកលើឆ្នេរ រីឯអ្នកនេសាទនៅឈូងសមុទ្រថៃ និងសមុទ្រអាដាម៉ាន់ គួរនេសាទដោយការប្រយ័ត្ន និងចៀសវាងការនេសាទនៅបរិវេណផ្គររន្ទះ ។ ដូចគ្នានេះ ទូកនេសាទតូចៗនៅឈូងសមុទ្រថៃ ពុំគួរចាកចេញពីឆ្នេរទេ ។

ហេតុនេះ សូមពលរដ្ឋរស់នៅខេត្តភាគខាងជើងប្រទេសថៃ ថែទាំសុខភាពដោយសារអាកាសធាតុមិនល្អ ក៏ដូចជាប្រយ័ត្នគ្រោះថ្នាក់ភ្លើងឆេះបណ្តាលពីខ្យល់បក់ខ្លាំង ចាប់ពីថ្ងៃទី១៤ ដល់ថ្ងៃទី១៧ ខែធ្នូ ។ ក្រៅពីនេះ ពលរដ្ឋនៅខេត្តភាគខាងជើងត្រុងប្រយ័ត្នការធ្វើដំណើរតាមតំបន់ចុះអ័ព្ទខ្លាំង ចាប់ពីថ្ងៃទី១៨ ដល់ថ្ងៃទី២០ ខែធ្នូ ៕

ពាក្យ “Mukbang” គឺជាភាសាកូរ៉េមានន័យថា “ការបរិភោគ” ដោយជាទូទៅវីដេអូ Mukbang បង្ហាញពីមនុស្សម្នាក់ដែលថតខ្លួនឯងញ៉ាំអាហារច្រើនក្នុងពេលតែមួយ នៅពេលដែលវីដេអូនេះមានអ្នកមើលច្រើន និងកាន់តែកើនឡើងខ្លាំង ធ្វើឱ្យអ្នកជំនាញអាហារូបត្ថម្ភមានការព្រួយបារម្ភអំពីឥទ្ធិពលអវិជ្ជមាននៃនិន្នាការមកលើអ្នកមើល។ នេះបើយោងតាមអ្នកជំនាញផ្នែកអាហារូបត្ថម្ភ Grace Derocha នៅរដ្ឋ Michigan សហរដ្ឋអាមេរិក បាននិយាយថា ការផលិតវីដេអូញ៉ាំច្រើនក្នុងពេលតែមួយ គឺមិនមានប្រយោជន៍នោះទេ វាជាវីដេអូមិនមានសុខភាពល្អ ដែលបង្ហាញពីមនុស្សម្នាក់ញ៉ាំច្រើនក្នុងរយៈពេលខ្លី ឬញ៉ាំអាហារហឹរខ្លាំង ដែលអាចបង្កគ្រោះថ្នាក់។

លើសពីនេះវាក៏ជះឥទ្ធិពលអវិជ្ជមានមកលើអ្នកទស្សនា ធ្វើឱ្យអ្នកទស្សនាត្រាប់តាម ដោយពួកគេទៅទិញអាហារប្លែកៗជាច្រើន ដែលសម្បូរទៅដោយខ្លាញ់ និងជាអាហារកែច្នៃ មកបរិភោគបណ្តាលឱ្យខូចសុខភាពរាងកាយ ជាហេតុធ្វើឱ្យមនុស្សទូទាំងពិភពលោកប្រឈមនឹងជំងឺធាត់ ឬមហារីកជាដើម។ យោងតាមការសិក្សាខែមករាឆ្នាំ ២០២០ បានឱ្យដឹងថា វីដេអូ mukbang ជាង ៥,០០០ នៅលើ YouTube សុទ្ធតែជាវីដេអូដែលមានប្រយោជន៍តិចបំផុត ប៉ុន្តែមានអ្នកមើលច្រើនបំផុតទៅវិញ។

អ្នកនាំពាក្យ Derocha នៃ Academy of Nutrition and Dietetics (USA) បារម្ភថា បច្ចុប្បន្ននិន្នាការ “Mukbang” កាន់តែកើនឡើង អាចលើកទឹកចិត្តអ្នកមើលមួយចំនួនឱ្យញ៉ាំច្រើន ជៀសវាងអាហារមួយចំនួន ឬមិនញ៉ាំសារធាតុចិញ្ចឹមផ្សេងៗដែលរាងកាយរបស់ពួកគេត្រូវការ។ អ្នកជំនាញខាងអាហាររូបត្ថម្ភដែលមានមូលដ្ឋាននៅរដ្ឋផ្លរីដា អ្នកស្រី Suzanne Fisher ក៏បាននិយាយដែរថា ជាទូទៅអ្នកផលិតមាតិការ “Mukbang” ពួកគេមិនញ៉ាំច្រើនដូចនៅក្នុងកាមេរ៉ានោះទេ កាលដែលគេថតវីដេអូញ៉ាំច្រើនក្នុងពេលតែមួយភាគច្រើនគឺជាវីដេអូកាត់តប៉ុណ្ណោះ។

ទោះជាយ៉ាងណាអ្នកទស្សនាមិនដឹង តែងតែគិតថាអ្នកផលិតវីដេអូទាំងនោះញ៉ាំច្រើនពិតមែន ធ្វើឱ្យពួកគេឃ្លានតាមហើយក៏ទិញអាហារមិនល្អមកញ៉ាំ បណ្តាលឱ្យខូចសុខភាព។ ហេតុនេះអ្នកជំនាញផ្នែកអាហារូបត្ថម្ភសង្ឃឹមថា អ្នកផលិតមាតិការ “Mukbang” គួរកាត់បន្ថយដោយប្តូរមកផលិតមាតិការណាដែលមានប្រយោជន៍ផ្សេងទៀតដូចជា ចែករំលែកចំណេះដឹងទូទៅដល់អ្នកទស្សនា Makeup ធ្វើម្ហូបដែលមានសុខភាពល្អ ឬវីដេអូបែបកំប្លែងកម្សាន្តអារម្មណ៍ជាដើម៕