មនុស្សភាគច្រើនបានបរិភោគអាហារសម្រន់ក្នុងពេលកំពុងបើកបររថយន្តនៅតាមផ្លូវ ជាពិសេស ពេលព្រឹក និងពេលល្ងាចក្រោយចេញពីធ្វើការ ប៉ុន្តែតើជ្រាបទេថា ការបរិភោគអាហារក្នុងពេលបើករថយន្តនឹងបណ្តាលឱ្យមានគ្រោះថ្នា.ក់ និងផលប៉ះពាល់យ៉ាងច្រើន ដែលយើងតែងតែមើលរំលង ។ ខាងក្រោមនេះ គឺជាផលប៉ះពាល់ និងគ្រោះថ្នា.ក់ ដោយសារការបរិភោគអាហារពេលកំពុងបើករថយន្ត ៖

១-បាត់បង់សមាធិក្នុងការបើករថយន្ត ៖ ការបរិភោគអាហារ ឬនំចំណីផ្សេងៗពេលកំពុងបើករថយន្តនៅតាមផ្លូវ វានឹងធ្វើឱ្យយើងបាត់បង់ស្មារតីបញ្ជារថយន្ត ពីព្រោះអាហារភាគច្រើនត្រូវតែយកដៃចាប់ ឬដួសដោយស្លាបព្រា ឬសម ។

លើសពីនេះ យើងនឹងបាត់បង់ការចាប់អារម្មណ៍សម្លឹងមើលផ្លូវខាងមុខ ហើយងាកមកចាប់អារម្មណ៍លើចំណីអាហារវិញ ។ ហេតុនេះ បើមានម៉ូតូបើកកាត់មុខរថយន្ត ឬមនុស្សដើរឆ្លងផ្លូវ វានឹងធ្វើឱ្យមានគ្រោះថ្នាក់កើតឡើង ។

២-ការឆ្លើយតបនឹងហេតុការណ៍ខាងក្រៅធ្លាក់ចុះ ៖ ការបរិភោគអាហារពេលបើករថយន្តនឹងធ្វើឱ្យការឆ្លើយតបនឹងហេតុការណ៍ ឬចរាចរណ៍ខាងក្រៅរថយន្តធ្លាក់ចុះ ។ វានឹងធ្វើឱ្យការជាន់ហ្វ្រាំង ឬបញ្ជារថយន្តយឺតពុំទាន់ពេលវេលា ពីព្រោះរវល់តែបរិភោគអាហារ និងខ្លាចចានអាហារធ្លាក់ប្រឡាក់រថយន្ត ។

៣-ពុំអាចគ្រប់គ្រងរថយន្តបានពេញលេញ ៖ ការបរិភោគអាហារចាំបាច់ត្រូវប្រើប្រាស់ដៃកាន់ស្លាបព្រា មានន័យថា យើងនឹងប្រើប្រាស់ដៃតែម្ខាងប៉ុណ្ណោះកាន់ចង្កូតរថយន្ត ។ ករណីចាំបាច់ត្រូវផ្លាស់ប្តូរផ្លូវបើកបរ ឬបើករថយន្តគេចពីអ្វីមួយភ្លាមៗ គឺយើងនឹងពុំអាចគ្រប់គ្រងរថយន្តបានពេញលេញទេ ហើយនឹងកើតគ្រោះថ្នាក់ ។

៤-មានក្លិនស្អុយក្នុងរថយន្ត ៖ ក្រៅពីការបរិភោគអាហារបណ្តាលឱ្យមានគ្រោះថ្នាក់ហើយ កាកសំណល់អាហារអាចធ្លាក់ទៅក្នុងរន្ធផ្សេងៗរបស់រថយន្តដែលមើលមិនឃើញ និងពិបាកសម្អាត ។ បន្ទាប់មក កាកសំណល់អាហារនឹងជះក្លិនស្អុយពិបាកកម្ចាត់ក្លិន បើទោះជាយើងយករថយន្តទៅឱ្យភ្នាក់ងារកម្ចាត់ក្លិនក្តី ក៏ពុំអាចបំបាត់ក្លិនអស់ដែរ ។

បើចាំបាច់ត្រូវបរិភោគអាហារក្នុងរថយន្ត គួរតែបរិភោគអាហារពេលរថយន្តនៅស្ងៀម ឬពេលរថយន្តឈប់នៅចំណុចភ្លើងស្តុប ហើយជាអាហារងាយស្រួលបរិភោគដោយប្រើប្រាស់ដៃម្ខាង មិនងាយកំពប់ ។ ការអនុវត្តបែបនេះនឹងពុំប៉ះពាល់ដល់ការបើកបររថយន្តនៅតាមផ្លូវ ឬប៉ះទង្គិចជាមួយរថយន្តផ្សេងទៀត ៕

មានដឹងអត់ តើជំងឺមហារីកប្រភេទណាដែលមនុស្សប្រុសងាយនឹងប្រឈមជាងគេ? ជំងឺមហារីក គឺជាជំងឺមួយដែលកើតឡើងនៅពេលកោសិកាសាហាវរីកលូតលាស់ខុសធម្មតានៅក្នុងរាងកាយ។ បច្ចុប្បន្នជំងឺនេះ នៅតែជាប្រធានបទដ៏ក្ដៅគគុកមិនថា មនុស្សប្រុស ឬមនុស្សស្រីឡើយ សុទ្ធតែប្រឈមនឹងជំងឺគ្រោះថ្នា.ក់ទាំងនេះ។ ទោះជាយ៉ាងណាតើលោកអ្នកដឹងទេថា ក្នុងចំណោមជំងឺមហារីកទាំងអស់ តើបុរសងាយនឹងប្រឈមជំងឺមហារីកប្រភេទណាជាងគេ?

យោងតាមការស្ទង់មតិលើអ៊ីនធឺណិតដោយសេវាពិនិត្យ Hancut Health One-Line Review បានឱ្យដឹងថា ជំងឺមហារីកដែលបុរសងាយប្រឈមជាងគេគឺមហារីកក្រពេញប្រូស្តាត។ ជំងឺមហារីកក្រពេញប្រូស្តាតកើតមានចំពោះតែបុរសប៉ុណ្ណោះ ជាពិសេសអ្នកដែលមានអាយុលើសពី ៥០ ឆ្នាំ។ មហារីកនេះមានប្រភពចេញពីកោសិកាក្នុងក្រពេញប្រូស្តាត ដែលជាសរីរាង្គតូចមួយផលិតទឹកកាម និងជាសារធាតុរាវដែលចិញ្ចឹម និងដឹកជញ្ជូនមេជីវិតឈ្មោល។ ជំងឺនេះអាចត្រូវបានពិនិត្យឱ្យបានឆាប់តាមរយៈការធ្វើតេស្តឈាមប្រូស្តាតជាក់លាក់អង់ទីហ្សែន (PSA) និងការពិនិត្យរន្ធគូថឌីជីថល (DRE) ជាដើម។

ក្រៅពីជំងឺមហារីកក្រពេញប្រូស្តាត បុរសក៏ងាយនឹងកើតជំងឺមហារីកសួត ពោះវៀនធំ និងប្លោកនោមផងដែរ។ មហារីកសួតគឺជាមូលហេតុមួយក្នុងចំណោមមូលហេតុចម្បងនៃការស្លាប់ដោយសារជំងឺមហារីកនៅលើពិភពលោក ជាមួយនឹងអត្រាខ្ពស់ចំពោះបុរស។ ការជក់បារីគឺជាកត្តាហានិភ័យចម្បង ពីព្រោះបារីមានផ្ទុកសារធាតុគីមីច្រើនជាង ៧,០០០ ដែលភាគច្រើនបណ្តាលឱ្យកើតមហារីក។ នៅពេលជក់បារី សារធាតុទាំងនេះអាចបង្កគ្រោះថ្នាក់បន្តិចម្តងៗ ដែលនាំឱ្យកើតមហារីកសួត និងមហារីកប្រភេទជាច្រើនទៀត។

ក្រៅពីជក់បារី ការទទួលទានសាច់ក្រហម និងសាច់កែច្នៃច្រើនពេក ក៏ជាកត្តាហានិភ័យនៃជំងឺមហារីកពោះវៀនធំផងដែរ។ អ្នកគួរតែញ៉ាំសាច់ក្រហមល្មមៗបានហើយ ក៏ដូចជាកំណត់សាច់កែច្នៃ រួមទាំងញ៉ាំផ្លែឈើ និងបន្លែឱ្យបានគ្រប់គ្រាន់ ហើយផឹកទឹកប្រហែលពីរលីត្រក្នុងមួយថ្ងៃទើបល្អចំពោះសុខភាព។ លើសពីនេះលំហាត់ប្រាណទៀងទាត់ក៏ជួយរក្សាទម្ងន់ឱ្យមានសុខភាពល្អ ពង្រឹងប្រព័ន្ធការពាររាងកាយ និងពង្រឹងប្រព័ន្ធរំលាយអាហារផងដែរ៕

តារាចម្រៀង K-pop ជំនាន់ទី ៤ ដ៏ល្បីល្បាញរបស់កូរ៉េគឺ Ningning សមាជិក Aespa បានប្រាប់ពីវិធីសាស្ត្រថែរក្សាសម្រស់ឱ្យមានភាពស្រស់ស្អាតដូចទេពធីតានូវគន្លឹះងាយៗទាំងនេះ ដោយនាងតែងតែអនុវត្តជារៀងរាល់ថ្ងៃ។ Ningning បាននិយាយថា ដើម្បីទទួលបានស្បែកសភ្លឺចែងចាំង គ្មានមុន គ្មានស្នាម និងរាងស្អាត ដងខ្លួនស្រឡូន គឺនាងបានអនុវត្តនៅអាថ៌កំបាំងដូចខាងក្រោម៖

១.រក្សារបៀបរស់នៅដែលមានសុខភាពល្អ៖ តារាចម្រៀងវ័យ ២២ ឆ្នាំរូបនេះតែងតែយកចិត្តទុកដាក់បន្ថែមលើផ្លែឈើស្រស់ៗ ផឹកទឹកឱ្យបានច្រើន និងគេងឱ្យបានគ្រប់គ្រាន់ ដើម្បីបង្កើនសុខភាពស្បែកពីខាងក្នុង។ យោងតាម Ningning របបអាហារគ្មានតុល្យភាព និងការគេងមិនគ្រប់គ្រាន់អាចជះឥទ្ធិពលអវិជ្ជមានដល់សុខភាពស្បែក ដែលធ្វើឱ្យវាងាយនឹងមានបញ្ហាដូចជាមុន ស្នាមអុចខ្មៅ និងស្នាមជាំកន្ទួលជាដើម។ លើសពីនេះនាងក៏តែងតែយកចិត្តទុកដាក់ក្នុងការរក្សាស្មារតីឱ្យល្អ ជៀសវាងទុកឱ្យខ្លួនឯងព្រួយបារម្ភ ឬគិតច្រើន។

២.ប្រើផលិតផលថែរក្សាស្បែក៖ នៅថ្ងៃដែលស្បែកស្ងួត កូនពៅ aespa នឹងប្រើសេរ៉ូមតិច ហើយប្រើក្រែមច្រើន ដោយបន្ថែមប្រេងលើមុខបន្តិច។ តារាចម្រៀងស្រីរូបនេះបាននិយាយថា ការលាបសារធាតុសំខាន់ៗមុនចូលគេងជួយឱ្យស្បែករបស់នាងមានសុខភាពល្អពីខាងក្នុង។ ចាប់តាំងពីនាងបានចូលវិស័យសិល្បៈមក Ningning បានយកចិត្តទុកដាក់យ៉ាងខ្លាំងចំពោះការប្រើប្រាស់សេរ៉ូមប្រឆាំងភាពចាស់ ដោយជារឿយៗនាងជ្រើសរើសផលិតផលដែលមានធាតុផ្សំពិសេស ដើម្បីជួយកាត់បន្ថយ និងពង្រឹងការបង្កើតឡើងវិញនៃស្បែក។

៣.ការពារកំដៅថ្ងៃសម្រាប់ស្បែក៖ តារាចម្រៀងវ័យក្មេងរូបនេះតែងរក្សាទម្លាប់លាបឡេការពារកម្ដៅថ្ងៃជានិច្ចក្នុងកម្រិតមធ្យមមុនពេលផាត់មុខ។ វិធីនេះជួយស្បែករបស់នាងការពារកម្តៅថ្ងៃ ភាពចាស់មុនអាយុ និងចំណុចខ្មៅ។ ដូច្នេះស្ត្រីគួរតែផ្តល់អាទិភាពដល់ផលិតផលឡេការពារកម្តៅថ្ងៃដែលមានសភាពរលោង និងស្ងួត។

៤.លាងសម្អាតមុខជានិច្ច៖ ការសម្អាតមុខពីរដងគឺជាវិធីរបស់ Ningning ក្នុងការថែរក្សាស្បែកស្អាត និងមានសុខភាពល្អ។ នាងលុបគ្រឿងសម្អាងដែលមិនជ្រាបទឹក និងឡេការពារកម្ដៅថ្ងៃចេញ ហើយទឹកសម្អាតមុខនឹងកម្ចាត់ជាតិខ្លាញ់លើសពីស្បែក។ នាងក៏ប្រើហ្វូមលាងមុខដើម្បីសំអាតរន្ធញើសយ៉ាងជ្រៅផងដែរ បន្ទាប់ពីលាងសម្អាតពីរដងរួច តារាស្រីរូបនេះក៏លាបម៉ាសមុខត្រឹមតែ ៥ នាទីក្នុងមួយថ្ងៃ ដើម្បីជួយឱ្យស្បែករបស់នាងស្អាត រលោង និងភ្លឺថ្លា៕