សហរដ្ឋអាមេរិក ៖ កាលពីថ្ងៃទី១៩ ខែធ្នូ ឆ្នាំ២០២៤ សារព័ត៌មានបរទេសរាយការណ៍ថា អាមេរិកប្រើប្រាស់បច្ចេកវិទ្យា AI ក្នុងសាលារៀន ដើម្បីត្រួតពិនិត្យអាវុ.ធ យ៉ាងឆាប់រហ័ស និងកាត់បន្ថយហេតុការណ៍បា.ញ់ ប្រហារ ។ ក្រៅពីនេះ អាមេរិកក៏បានដំឡើងប្រព័ន្ធឃ្លាំមើលនៅតាមព្រំដែនផងដែរ ក្នុងគោលបំណងទប់ស្កាត់ជនភៀសខ្លួនខុសច្បាប់ និងការជួញដូរគ្រឿងញៀន ។

ស្របពេលភ្នាក់ងារគយ និងការពារព្រំដែនអាមេរិកបានប្រើប្រាស់បច្ចេកវិទ្យា AI សម្រាប់តាមដានការឆ្លងដែនខុសច្បាប់ គេសង្កេតឃើញសាលារៀនកាន់តែច្រើនបានប្រើប្រាស់បច្ចេកវិទ្យានេះចាប់អាវុធ ដើម្បីផ្តល់សុវត្ថិភាពក្នុងទីធ្លាសាលា និងការពារការបាញ់ដែលតែងតែកើតឡើងជាញឹកញាប់នៅអាមេរិក ។

សាលា Cardinal Local Schools ស្ថិតនៅតំបន់ Geauga County រដ្ឋអូហៃអូ បានបំពាក់បច្ចេកវិទ្យា Zeroeyes ចាប់អាវុធជាតិផ្ទុះដោយស្វ័យប្រវត្តិហើយវាអាចទប់ស្កាត់ការគំរាមកំហែងចាប់ពីខ្លោងទ្វារសាលា ។ បច្ចេកវិទ្យានេះនឹងពិនិត្យការធ្វើចលនាផ្សេងៗនៅមុខកាមេរ៉ា បន្ទាប់មក វានឹងជូនដំណឹងពីប្រភេទកាំភ្លើងទៅនាយកសាលា និងសន្តិសុខជាបន្ទាន់ ។

រីឯសាលា Stark County នៅក្បែរគ្នា ក៏បានប្រើប្រាស់បច្ចេកវិទ្យា Zeroeyes ដែរ កាលពីចុងខែតុលា ឆ្នាំ២០២៤ ពីព្រោះសាលាគិតពីសុវត្ថិភាពកូនសិស្ស និងគ្រូបង្រៀនជាចម្បង ។ ប៉ុន្តែបច្ចេកវិទ្យានេះពុំអាចចាប់អាវុធដែលលាក់ទុកបានទាំងអស់ទេ ហើយសាលាត្រូវតែប្រើប្រាស់ឧបករណ៍ការពារសុវត្ថិភាពបន្ថែមទៀត ។

ទីប្រឹក្សាសន្តិសុខអាមេរិកនិយាយថា Zeroeyes គ្រាន់តែជួយការពារសុវត្ថិភាពបន្ថែមប៉ុណ្ណោះ ចំណែកបច្ចេកវិទ្យាដែលអាចចាប់អាវុធលាក់ទុកនោះ គឺ Evolve ពីព្រោះវានឹងស្កេនមនុស្សដើរឆ្លងកាត់ ។

បច្ចុប្បន្ន បច្ចេកវិទ្យា AI ក៏ត្រូវយកទៅប្រើប្រាស់នៅតាមបរិវេណព្រំដែនអាមេរិកជាប់ប្រទេសម៉ិកស៊ិកផងដែរ ដើម្បីតាមដានសកម្មភាពជួញដូរមនុស្ស, ការនាំចូលគ្រឿងញៀន និងជនភៀសខ្លួនខុសច្បាប់ ៕

ប្រទេសថៃ ៖ កាលពីថ្ងៃទី៨ ខែធ្នូ ឆ្នាំ២០២៤ លោក Pichai Naripthaphan រដ្ឋមន្ត្រីក្រសួងពាណិជ្ជកម្មថៃបានពិភាក្សាជាមួយឯកអគ្គរដ្ឋទូតចិនប្រចាំប្រទេសថៃ លោក Han Zhiqiang ព្រមទាំងមន្ត្រីពាក់ព័ន្ធ ដើម្បីពង្រឹងទំនាក់ទំនងពាណិជ្ជកម្មរវាងប្រទេសទាំងពីរ ។ ក្រៅពីនេះ ភាគីទាំងពីរបានពិភាក្សាពីការដោះស្រាយបញ្ហាទំនិញ និងអាជីវកម្មខុសច្បាប់ ហើយថៃសុំឱ្យចិនជួយទិញទិន្នផលកសិកម្ម ដូចជា ៖ ដំឡូងមី និងអង្ករបន្ថែម ។

លោក Pichai និយាយថា តាំងពីឡើងកាន់តំណែងជារដ្ឋមន្ត្រីក្រសួងពាណិជ្ជកម្ម លោកបានជួបជាមួយលោក Han ជាបន្តបន្ទាប់ ដើម្បីស្វែងរកកិច្ចសហការរវាងថៃ និងចិន ។ កាលពីថ្ងៃទី២៦ ខែកញ្ញា កន្លងមក លោក Han បាននាំមន្ត្រីមកប្រជុំនៅក្រសួងពាណិជ្ជកម្មថៃ ដោះស្រាយការបារម្ភពីបញ្ហាទំនិញ និងអាជីវកម្មខុសច្បាប់ ។ យើងផ្តោតលើមិត្តភាព សម្ព័ន្ធភាពដ៏ល្អគ្រប់វិស័យ និងពុំប៉ះពាល់ទំនាក់ទំនងរវាងប្រទេសទាំងពីរ ហើយភាគីចិនយល់យ៉ាងច្បាស់ និងជួយគ្នាដោះស្រាយបញ្ហាដោយជោគជ័យ ។

នាយករដ្ឋមន្ត្រីថៃ លោកស្រី ផេថងថាន ស៊ីណាវ៉ាត់ បារម្ភពីបញ្ហាទំនិញ និងអាជីវកម្មខុសច្បាប់នៅប្រទេសថៃ ទើបតែងតាំងលោក Pichai ជាប្រធានគណៈកម្មការដោះស្រាយបញ្ហានេះ ។ លោកក៏បានប្រជុំជាមួយភ្នាក់ងារពាក់ព័ន្ធផងដែរ និងរកវិធានការដោះស្រាយយ៉ាងឆាប់រហ័សដើម្បីកាត់បន្ថយផលប៉ះពាល់ ។

ក្រោយពីមើលឃើញថា ចិនជាទីផ្សារធំ ទើបលោក Pichai ស្នើឱ្យចិនជួយទិញទិន្នផលកសិកម្មរបស់ថៃ ហើយវានឹងមានប្រយោជន៍ដល់កសិករថៃយ៉ាងខ្លាំង ។ ការពិភាក្សាគ្នាជំហ៊ានដំបូង គឺចិនរីករាយនឹងជួយកសិករថៃ ហើយចិនសន្យាថា នឹងទិញអង្ករថៃបន្ថែមទៀត ចំនួន២៨ម៉ឺនតោន ។ លើសពីនេះ លោកបានស្នើឱ្យចិនទិញទិញដំឡូងមី ដែលកំពុងផ្តល់ទិន្នផលយ៉ាងច្រើនដើម្បីជួយកសិករជាង៧សែនគ្រួសារ ។

នៅឆ្នាំ២០២៥ គឺជាខួបលើកទី៥០ នៃទំនាក់ទំនងការទូតរវាងប្រទេសថៃ និងចិន ហើយក្រសួងពាណិជ្ជកម្មនឹងរៀបចំកម្មវិធីជាច្រើនរួមគ្នាជាមួយចិន ក្នុងគោលបំណងជំរុញពាណិជ្ជកម្ម ការវិនិយោគរវាងសហគ្រិនថៃ និងចិន ។

ចំណែកលោក Han ឯកអគ្គរដ្ឋទូតចិនប្រចាំប្រទេសថៃ និយាយថា ទំនាក់ទំនងរវាងប្រទេសទាំងពីរប្រៀបដូចជាព្រៃឈើ ដែលនឹងដុះលូតលាស់ជាបន្តបន្ទាប់ទៅថ្ងៃអនាគត ប៉ុន្តែបញ្ហាផ្សេងៗ គឺដូចគ្នានឹងសត្វដង្កូវតូចមួយ ហើយត្រូវតែចាប់វាចេញ ទើបព្រៃឈើដុះលូតលាស់ល្អ ។ លោកនឹងជំរុញការធ្វើពាណិជ្ជកម្មរវាងចិន និងថៃ ឱ្យកាន់តែល្អប្រសើរ ៕

ប្រទេសជប៉ុន ៖ កាលពីថ្ងៃទី១៩ ខែធ្នូ ឆ្នាំ២០២៤ សារព័ត៌មានបរទេសរាយការណ៍ថា ស្របពេលក្រុមហ៊ុនផលិតរថយន្តអគ្គិសនីចិន BYD និង Tesla របស់អាមេរិកបានប្រកួតប្រជែងគ្នាខ្លាំងលើទីផ្សារ ហើយមានចំនួនលក់រថយន្តកើនឡើងខ្ពស់ជាងក្រុមហ៊ុនផ្សេងៗលើពិភពលោក ស្រាប់តែក្រុមហ៊ុនរថយន្តធំៗចំនួន២ គឺ Honda និង Nissan មានគម្រោងចរចារួមបញ្ចូលគ្នាជាក្រុមហ៊ុនតែមួយ ។

ក្រុមហ៊ុនផលិតរថយន្តនាំមុខនៅប្រទេសជប៉ុន គឺ Honda និង Nissan នឹងចរចាពីការរួមបញ្ចូលគ្នាជាក្រុមហ៊ុនតែមួយ ដើម្បីទប់ទល់នឹងគូប្រជែង គឺក្រុមហ៊ុនផលិតរថយន្តអគ្គិសនីចិន BYD និង Tesla ។ ការរួមបញ្ចូលគ្នានេះបានធ្វើឱ្យមហាជនចាប់អារម្មណ៍ និងរង្គោះរង្គើដល់ឧស្សាហកម្មរថយន្តយ៉ាងខ្លាំង ។

សារព័ត៌មានជប៉ុន Nikkei រាយការណ៍ថា Honda និង Nissan ក៏មានគម្រោងរួមបញ្ចូលក្រុមហ៊ុន Mitsubishi Motors ផងដែរនាថ្ងៃអនាគត ខណៈ Nissan បានកាន់កាប់ភាគហ៊ុនច្រើនបំផុតនៅ Mitsubishi ។ ក្រោយពីក្រុមហ៊ុនទាំងពីរប្រកាសពីការរួមបញ្ចូលគ្នាបានធ្វើឱ្យភាគហ៊ុនរបស់ Nissan កើនឡើងជាង២៣% នៅទីក្រុងតូក្យូ កាលពីថ្ងៃទី១៨ ខែធ្នូ ។ រីឯភាគហ៊ុនរបស់ Honda ធ្លាក់ចុះ៣% ហើយភាគហ៊ុន Mitsubishi កើនឡើងជិត២០% ។

ក្រុមហ៊ុនទាំងពីរនឹងបង្កើតក្រុមហ៊ុនថ្មីរួមគ្នា និងដំណើរការជាក្រុមហ៊ុន Holding ព្រមទាំងចុះអនុស្សរណៈនៃការយោគយល់គ្នា (MOU) នាពេលឆាប់ៗ ។ រីឯការកាន់កាប់ភាគហ៊ុនរបស់ក្រុមហ៊ុនទាំងពីរក្នុងក្រុមហ៊ុនថ្មី និងចំណុចលម្អិតផ្សេងៗ នឹងសម្រេចចិត្តនាពេលក្រោយ ។ កាលពីខែមីនា ឆ្នាំ២០២៤ ក្រុមហ៊ុនទាំងពីរបានសហការគ្នាលើអាជីវកម្មរថយន្តអគ្គិសនី និងបច្ចេកវិទ្យា Software ដើម្បីកាត់បន្ថយការចំណាយដើមទុន និងបង្កើនសមត្ថភាពប្រកួតប្រជែង ។ នៅខែសីហា ឆ្នាំ២០២៤ Mitsubishi ក៏បានចូលរួមសហការដែរ ។

Honda និង Nissan បានបាត់បង់ចំណែកទីផ្សាររថយន្តនៅចិន ស្មើជិត៧០% នៃចំនួនលក់រថយន្តអគ្គិសនីទូទាំងពិភពលោក នៅខែវិច្ឆិកា ឆ្នាំ២០២៤ ។ ក្រុមហ៊ុនទាំងពីរបានលក់រថយន្តទូទាំងពិភពលោក សរុបចំនួន៧លាន៤សែនគ្រឿង នៅឆ្នាំ២០២៣ ប៉ុន្តែក្រុមហ៊ុនទាំងពីរពិបាកប្រកួតប្រជែងជាមួយ BYD ដែលប្រាក់ចំណូលប្រចាំត្រីមាសរបស់ក្រុមហ៊ុននេះខ្ពស់ជាង Tesla របស់អាមេរិកជាលើកដំបូង កាលពីខែតុលា ឆ្នាំ២០២៤ ។

កាលពីខែវិច្ឆិកានេះ Nissan បានប្រកាសបញ្ឈប់បុគ្គលិកចំនួន៩,០០០នាក់នៅទូទាំងពិភពលោក និងកាត់បន្ថយការផលិតរថយន្ត ស្មើ២០% ។ ក្រុមហ៊ុនអះអាងថា អាជីវកម្មនៅអាមេរិក និងចិនមានបញ្ហា ទើបធ្វើឱ្យការលក់រថយន្តធ្លាក់ចុះជាងការរំពឹងទុក ៕