ប្រទេសជប៉ុន ៖ សារព័ត៌មាន Reuters រាយការណ៍ថា ក្រុមហ៊ុនអាកាសចរណ៍ជប៉ុន Japan Airlines (JAL) បានរងការវាយប្រ.ហារ តាមអ៊ីនធើរណេត កាលពីថ្ងៃទី២៦ ខែធ្នូ ឆ្នាំ២០២៤ ដែលធ្វើឱ្យក្រុមហ៊ុននេះពន្យារពេលហោះហើរយន្តហោះដឹកអ្នកដំណើរទាំងក្នុងប្រទេស និងក្រៅប្រទេស និងប៉ះពាល់អ្នកដំណើរជាច្រើន ។

ការវាយប្រហារតាមអ៊ីនធើរណេតបណ្តាលឱ្យប៉ះពាល់ដល់ប្រព័ន្ធការងារផ្ទៃក្នុង និងភ្នាក់ងារបញ្ជាយន្តហោះផ្នែកខាងក្រៅ ហើយក្រុមហ៊ុនរកឃើញថា ឧបករណ៍ចែកចាយសេវាអ៊ីនធើរណេត (Router) ដំណើរការខុសធម្មតា ។ ហេតុនេះ ក្រុមហ៊ុនក៏បិទដំណើរការរបស់ Router ជាបណ្តោះអាសន្នដើម្បីដោះស្រាយបញ្ហា និងធ្វើឱ្យជើងហោះហើរចំនួន២៤ជើងដែលបម្រុងចាកចេញពីអាកាសយានដ្ឋាន ពន្យារពេលអស់ជាង៣០នាទី ។

ក្រុមហ៊ុន Japan Airlines បញ្ជាក់ថា នឹងចាត់វិធានការបញ្ហានេះ និងស៊ើបអង្កេតពីប្រភពការវាយប្រហារ ពីព្រោះវាធ្វើឱ្យប៉ះពាល់យ៉ាងខ្លាំងដល់អ្នកដំណើររបស់ខ្លួន ។ រីឯក្រុមហ៊ុនអាកាសចរណ៍ផ្សេងៗរបស់ជប៉ុនគ្មានការវាយប្រហារតាមអ៊ីនធើរណេតទេ ហើយដំណើរការជាធម្មតា ។

អ្នកដំណើរម្នាក់អាយុ៦០ឆ្នាំ ដែលត្រៀមធ្វើដំណើរត្រឡប់ទៅផ្ទះនៅទីក្រុងម៉ាត់ស៊ឹយ៉ាម៉ាក់ ខេត្តអេហ៊ិម៉ាក់ និយាយថា វាពិតជារញ៉េរញ៉ៃមែន ពីព្រោះក្រុម Hacker តែងតែវាយប្រហារតាមអ៊ីនធើរណេតក្នុងថ្ងៃបុណ្យគ្រិស្តម៉ាស និងឆ្លងឆ្នាំ ។

សារព័ត៌មាន Reuters រាយការណ៍ថា Japan Airlines បានដំណើរការយន្តហោះដឹកអ្នកដំណើរតាមធម្មតាវិញហើយ បន្ទាប់ពីដោះស្រាយបញ្ហារួចរាល់ ។ ប៉ុន្តែហេតុការណ៍នេះធ្វើឱ្យតម្លៃភាគហ៊ុនរបស់ក្រុមហ៊ុននេះធ្លាក់ចុះ២.៥% នាព្រឹកថ្ងៃដដែល ដោយសារបាត់បង់ទំនុកចិត្តពីអ្នកវិនិយោគ ។

គួរបញ្ជាក់ថា ការវាយប្រហារតាមអ៊ីនធើរណេតនេះ ពុំមែនមែនទើបតែកើតឡើងលើកដំបូងទេនៅប្រទេសជប៉ុន កាលពីឆ្នាំ២០២៣ ភ្នាក់ងាររុករកអវកាសជប៉ុន (JAXA) បានរងការវាយប្រហារតាមអ៊ីនធើរណេតពីក្រុម Hacker មិនស្គាល់អត្តសញ្ញាណ ។ នៅឆ្នាំដដែល កំពង់ផែណាកូយ៉ា ក៏រងការវាយប្រហារតាមអ៊ីនធើរណេតដែរ ហើយភ្នាក់ងារសន្តិសុខអ៊ីនធើរណេតជប៉ុនរកឃើញថា មានការព្យាយាម Hacker អស់រយៈពេល៩ខែ ៕

បើប្រៀបធៀបរាងកាយរវាងមនុស្ស និងសត្វឃើញថា បើទោះជាសត្វមួយចំនួនមានរាងកាយប៉ុនមនុស្សក្តី ប៉ុន្តែវាពុំមានអាយុវែងដូចមនុស្សទេ ។ ប៉ុន្តែអ្នកវិទ្យាសាស្ត្របានព្យាយាមបន្តអាយុរបស់មនុស្ស និងរកវិធីពន្យារភាពជរា ហើយពួកគេរកឃើញថា មានសត្វកម្រមួយប្រភេទដែលរស់នៅបាតសមុទ្រទឹកជ្រៅអាចយកមកធ្វើថ្នាំអាយុវែងរបស់មនុស្ស ។

ត្រីឆ្លាម Greenland (Greenland Shark) គឺជាពូជត្រីឆ្លាមដ៏កម្ររស់នៅបាតមហាសមុទ្រអាត្លង់ទិកខាងជើងដ៏ត្រជាក់ ដែលអ្នកវិទ្យាសាស្ត្រអាចយកវាមកធ្វើថ្នាំអាយុវែង ដោយសារវាមានអាយុរហូតដល់រាប់រយឆ្នាំមិនគួរឱ្យជឿ ។ ត្រីឆ្លាមនេះមានអាយុចាប់ពី២៧២ឆ្នាំ ទៅជាង៥០០ឆ្នាំ ហើយអាយុរបស់វា គឺវែងជាងប្រទេសមួយចំនួនលើពិភពលោក ទៅទៀត ។

ប៉ុន្តែអ្នកវិទ្យាសាស្ត្រមានឯកសារពាក់ព័ន្ធនឹងត្រីឆ្លាម Greenland តិចតួចណាស់ ហើយពួកគេកម្រឃើញ ដោយសារវារស់នៅបាតសមុទ្រទឹកជ្រៅក្នុងតំបន់ត្រជាក់ខ្លាំង ។ អាយុវែងរបស់វាធ្វើឱ្យអ្នកវិទ្យាសាស្ត្រជាច្រើននាក់សន្និដ្ឋានថា អាចយកវាមកធ្វើជាថ្នាំអាយុវែងរបស់មនុស្សបាន ដោយសារហ្សែនរបស់ត្រីឆ្លាម Greenland មានទំហំធំជាងហ្សែនត្រីឆ្លាមផ្សេងៗ ហើយមានទំហំវែងជាង២ដង បើធៀបនឹងហ្សែនរបស់មនុស្ស ។

ការស្រាវជ្រាវចុងក្រោយបង្អស់ពីត្រីឆ្លាម Greenland ដោយការត្រួតពិនិត្យ DNA 92% បង្ហាញថា វាអាចក្លាយជាថ្នាំអាយុវែងរបស់មនុស្សនាថ្ងៃអនាគត ដោយសាររាងកាយវាលូតលាស់យឺតខ្លាំង គឺមិនដល់១សង់ទីម៉ែត្រក្នុង១ឆ្នាំ ។ ហេតុនេះ ទម្រាំរាងកាយវាធំពេញវ័យ គឺធ្វើឱ្យអាយុវាកើនឡើងដល់រាប់រយឆ្នាំ ។

កាលពីឆ្នាំ២០១៦ គេបានប្រទះឃើញត្រីឆ្លាម Greenland នៅភាគខាងជើងមហាសមុទ្រអាត្លង់ទិកជិតកោះ Greenland និងតំបន់ប៉ូលខាងជើង ។ តាមការស្រាវជ្រាវរបស់អ្នកវិទ្យាសាស្ត្របង្ហាញថា ត្រីឆ្លាមញីចំនួន២៨ក្បាល មានអាយុយ៉ាងហោចណាស់ ២៧២ឆ្នាំ ហើយគេសន្និដ្ឋានថា វានឹងមានអាយុរហូតដល់៥១២ឆ្នាំ ។ រីឯត្រីឆ្លាមពេញវ័យ គឺមានទម្ងន់ប្រមាណ១២,០០០គីឡូក្រាម ។

តើត្រីឆ្លាមនេះអាចក្លាយជាថ្នាំអាយុវែងរបស់មនុស្សឬក៏អត់នោះ គឺយើងត្រូវរង់ចាំតាមដានបន្តទៀត ប៉ុន្តែគោលដៅចម្បងរបស់ការស្រាវជ្រាវពីត្រីឆ្លាម Greenland គឺចង់ឱ្យពិភពលោក អភិរក្សពូជត្រីឆ្លាមនេះ ដោយសារវាជិតផុតពូជ ៕

មនុស្សជំនាន់មុនជាពិសេសជនជាតិរ៉ូមបានធ្វើឱ្យកូនចៅជំនាន់ក្រោយភ្ញាក់ផ្អើលយ៉ាងខ្លាំងនូវស្នាដៃស្ថាបត្យកម្មដ៏អស្ចារ្យរបស់ខ្លួន ដែលបង្ហាញពីភាពធន់ និងអាចយកឈ្នះលើការបំផ្លិចបំផ្លាញដ៏អាក្រក់នៃពេលវេលា។ សំណង់អច្ឆរិយៈទាំងនេះគឺមានភាពល្បីល្បាញខ្លាំងណាស់ដោយសាររចនាសម្ពន្ធ័ប្លែកខុសពីគេ និងភាពធន ជាមួយអាយុកាលរាប់ពាន់ឆ្នាំ។ ដូច្នេះខាងក្រោមនេះគឺជាសំណង់អច្ឆរិយៈបុរាណចំនួន ៥ នៅអឺរ៉ុបដែលមានរចនាសម្ពន្ធ័អស្ចារ្យបំផុត៖

១.Colosseum៖ គឺជាសំណង់អច្ឆរិយៈមួយក្នុងចំណោមអច្ឆរិយៈទាំងប្រាំពីររបស់ពិភពលោក និងជាកន្លែងដែលត្រូវទៅទស្សនានៅពេលដែលលោកបានទៅដល់ទីក្រុងរ៉ូម ប្រទេសអ៊ីតាលី។ Roman Coliseum ត្រូវបានសាងសង់ឡើងនៅចន្លោះឆ្នាំ ៧០ និង ៧២ មុនគ.ស គឺជាសង្វៀនបុរាណដ៏ធំបំផុតរបស់ពិភពលោក ដែលអាចផ្ទុកកៅអីបានរហូតដល់ ៨០.០០០ កៅអី។ សង្វៀននេះមានកម្ពស់ជិត ៥០ ម៉ែត្រ ជាមជ្ឈមណ្ឌលកម្សាន្តដ៏សំខាន់មួយ ដែលជនជាតិរ៉ូមបុរាណចូលចិត្តខ្លាំងបំផុត។ វាមានភាពល្បីល្បាញដោយសារស្ថាបត្យកម្មដំបូលបួនជាន់ ហើយត្រូវបានប្រើប្រាស់សម្រាប់រៀបចំសកម្មភាពផ្សេងៗដូចជាកីឡាចំបាប់ និងការសម្ដែងដ៏អស្ចារ្យនៅសម័យបុរាណ។

២.Pont du Gard៖ គឺជាស្ពានបីជាន់ដែលមានទីតាំងនៅភាគខាងត្បូងនៃប្រទេសបារាំង។ វាមិនត្រឹមតែល្បីល្បាញដោយសារភាពស្រស់ស្អាត និងល្អឥតខ្ចោះប៉ុណ្ណោះទេ ប៉ុន្តែវាក៏ជាស្នាដៃដ៏អស្ចារ្យមិនគួរឱ្យជឿនៃភាពល្អិតល្អន់ និងបច្ចេកទេសសាងសង់ដ៏កំពូលរបស់ជនជាតិរ៉ូមបុរាណផងដែរ។

៣.Porta Nigra៖ ច្រកទ្វារទីក្រុងបុរាណ Porta Nigra ត្រូវបានគេស្គាល់ថាជាគោលដៅទេសចរណ៍ដ៏ល្បីល្បាញមួយក្នុងទីក្រុង Trier ប្រទេសអាល្លឺម៉ង់។ សំណង់នេះត្រូវបានចាត់ទុកថាជាបូជនីយដ្ឋានរស់នៅដែលកត់ត្រានូវសញ្ញាសម្គាល់នៃអរិយធម៌រ៉ូម៉ាំងបុរាណ។ យោងតាមឯកសារប្រវត្តិសាស្ត្រ Porta Nigra ត្រូវបានសាងសង់ពីថ្មភក់ពណ៌ប្រផេះ ដែលបង្ហាញពីការរចនាប៉មភ្លោះពីរស្របគ្នា។ ជាមួយនឹងទំហំនិងភាពស្មុគ្រស្មាញខ្ពស់របស់វាប្រាសាទ Porta Nigra ត្រូវបានទទួលស្គាល់ដោយអង្គការយូណេស្កូថាជាតំបន់បេតិកភណ្ឌពិភពលោក ហើយក៏បានក្លាយជាគោលដៅដែលមិនអាចរំលងបានសម្រាប់អ្នកដែលស្រឡាញ់ប្រវត្តិសាស្ត្រនៃចក្រភពរ៉ូមផងដែរ។

៤.Baths of Caracalla៖ គឺជាកន្លែងងូតទឹកសារធាតុណៈរបស់ជនជាតិរ៉ូម៉ាំង និងជាអាងទឹកកំដៅដ៏ធំបំផុតក្នុងប្រវត្តិសាស្ត្រ ដែលសាងសង់ឡើងពីថ្មប្រហែល ៥ លានតោន។ កាលពីអតីតកាល ការងូតទឹកសាធារណៈនេះបានបម្រើមនុស្សជាង ៨.០០០ នាក់ជារៀងរាល់ថ្ងៃ ដោយបច្ចុប្បន្នបន្ទប់ទឹក Caracalla គឺជាកន្លែងដ៏គួរឱ្យចាប់អារម្មណ៍ និងជាប់ទាក់ទងនឹងប្រវត្តិសាស្ត្ររាប់ពាន់ឆ្នាំនៃរដ្ឋធានីរ៉ូម។

៥.Aphrodisias៖ គឺជាវិមានបុរាណតំណាងឱ្យសេចក្តីស្រឡាញ់នៅក្នុងទេវកថាក្រិក មានទីតាំងនៅភាគនិរតីនៃប្រទេស Türkiye ស្ថិតនៅជ្រលងភ្នំខាងលើនៃទន្លេ Morsynus។ ប្រាសាទ Aphrodisias បានចូលជាបេតិកភណ្ឌពិភពលោករបស់អង្គការយូណេស្កូចាប់តាំងពីឆ្នាំ ២០១៧។ អដ្ឋិធាតុរបស់ប្រាសាទនេះត្រូវបានរក្សាទុកយ៉ាងល្អ រួមទាំងសសរថ្មខ្ពស់ធម្មតានៃស្ថាបត្យកម្មរ៉ូម៉ាំង រោងមហោស្រពពាក់កណ្តាលរង្វង់ និងតំបន់ថ្មម៉ាបសម្រាប់កិច្ចប្រជុំនយោបាយសំខាន់ៗ។ យោងតាមអ្នកជំនាញ ប្រាសាទ Aphrodisias ដើរតួនាទីយ៉ាងសំខាន់ក្នុងវិស័យស្រាវជ្រាវលើស្ថាបត្យកម្មចម្លាក់រ៉ូម៉ាំង។ លើសពីនេះប្រាសាទ Aphrodisias គឺជាកន្លែងដ៏ល្អបំផុតដើម្បីរៀនអំពីចម្លាក់ថ្មម៉ាបបុរាណផងដែរ៕