រយៈពេលជាង៧ខែមកនេះ ខេត្តស្ទឹងត្រែងជាខេត្តគំរូ ដែលគ្មានសំណុំរឿងក្មេងទំនើង សូម្បី ១ករណី ខណៈខេត្តកែប ប៉ៃលិន និងព្រះវិហារ ក៏ជាខេត្តដ៏ល្អ មានសំណុំរឿងតិចបំផុត។ ផ្ទុយទៅវិញ រាជធានីភ្នំពេញបែរជាមានសំណុំរឿងក្មេងទំនើងច្រើនជាងគេ បន្ទាប់មកមានកំពង់ស្ពឺ តាកែវ បន្ទាយមានជ័យ និងសៀមរាប។ 
ថ្លែងក្នុងសន្និសីទសារព័ត៌មានស្តីពី «ករណីក្រុមក្មេងទំនើង» នារសៀលថ្ងៃទី២៥ ខែធ្នូ ឆ្នាំ២០២៤ នៅទីស្តីការក្រសួងយុត្តិធម៌ ឯកឧត្ដម កេង សុម៉ារិទ្ធ រដ្ឋលេខាធិការក្រសួងយុត្ដិធម៌ បានគូសបញ្ជាក់ថា «ខេត្តដែលមានសំណុំរឿងក្មេងទំនើងតិចជាងគេបំផុតគឺ ខេត្តស្ទឹងត្រែង ពោលមានសូន្យករណី! ស្ទឹងត្រែង ជាខេត្តមួយ ដែលពុំមានករណី ពាក់ព័ន្ធក្មេងទំនើងកើតឡើងទេ! ដូច្នេះអាចចាត់ទុកបានជាខេត្តមួយគំរូ ដែលខេត្តផ្សេងៗអាចមើលពីលំនាំនៃការរៀបចំការងាររបស់ខេត្តនេះបាន។
ឯកឧត្ដមបានឱ្យដឹងថា ខេត្តដែលល្អ មានសំណុំរឿងពាក់ព័ន្ធក្មេងទំនើងតិចជាងគេ ចំណាត់ថ្នាក់លេខ២ គឺ ខេត្តកែប, ចំណាត់ថ្នាក់លេខ ៣ បានទៅលើខេត្តប៉ៃលិន ,និងលេខ៤ បានទៅលើខេត្តព្រះវិហារ។
យ៉ាងណា រាជធានីភ្នំពេញបែរជាឈរនៅលើលេខរៀងទី១ ដែលមានសំណុំក្មេងទំនើងច្រើនជាងគេ។ បន្ទាប់មកគឺខេត្តកំពង់ស្ពឺឈរចំណាត់ថ្នាក់លេខ២ ,លេខ ៣ គឺខេត្តតាកែវ , លេខ៤ គឺខេត្តបន្ទាយមានជ័យ និងលេខ ៥ ខេត្តសៀមរាបជាខេត្តមានសំណុំរឿងក្មេងទំនើងច្រើនជាងគេផងដែរ។
ឯកឧត្តមបានឱ្យដឹងទៀតថា ជាង៧ខែមកនេះ ស្ថាប័នក្រោមដំបូលវិស័យ យុត្តិធម៌បានទទួលបានសំណុំរឿងពាក់ព័ន្ធនឹងក្មេងទំនើងនៅ ទូទាំងប្រទេសសរុបចំនួន២១១៥សំណុំរឿង។ ក្នុងនោះតុលាការ បានចាត់ការរួចរាល់លើសំណុំរឿងចំនួន១៥៧៩សំណុំរឿង នៅសល់ចំនួន៥៣៦សំណុំរឿង ស្ថិតក្នុងដំណាក់កាលចៅក្រម ស៊ើបសួរ និងចៅក្រមជំនុំជម្រះកំពុងតែបន្តនីតិវិធីផងដែរ៕
