ប្រទេសឥណ្ឌា៖ ថ្មីៗនេះមានបាតុភូតដ៏អស្ចារ្យមួយគឺមាសនិងគ្រឿងអលង្ការមានតម្លៃជាច្រើនបានអណ្តែតមកលើឆ្នេរសមុទ្រ Uppada ក្នុងសង្កាត់ East Godavari រដ្ឋ Andhra Pradesh ប្រទេសឥណ្ឌា បណ្តាលឱ្យមនុស្សរាប់រយនាក់នាំគ្នាសម្រុកទៅកើបវត្ថុទាំងនោះ។
យោងតាមការចុះផ្សាយរបស់សារព័ត៌មានបរទេស Time of India ភាគល្អិតមាសដ៏ភ្លឺចែងចាំងត្រូវបានបោកបក់មកលើឆ្នេរខ្សាច់ដោយរលក នៅម៉ោងប្រហែល ១០ ព្រឹកនាថ្ងៃទី២៥ ខែធ្នូបន្ទាប់ពីព្យុះ បង្កើតបានជាការប្រមាញ់កំណប់ទ្រង់ទ្រាយធំ។

មនុស្សជាច្រើនជឿថា មាសនិងគ្រឿងអលង្ការមានតម្លៃទាំងនោះទំនងជារបស់ជនរងគ្រោះ.ដែលបានបាត់ជីវិ.តដោយសារព្យុះ ខណៈកាលពីដើមខែវិច្ឆិកាមានព្យុះដ៏ធំមួយបានបោកបក់មកលើឆ្នេរសមុទ្រ Uppada បណ្តាលឱ្យផ្ទះរាប់រយខ្នងខូចខាត ហើយទ្រពសម្បត្តិរបស់ពួកគេក៏បានបាត់បង់ទៅតាមព្យុះ។ ដូច្នេះនៅពេលមានរលកធំៗបោកបក់ ក៏បាននាំយកវត្ថុទាំងនោះមកលើឆ្នេរសមុទ្រ បណ្តាលឱ្យមនុស្សរាប់រយនាក់នាំគ្នាសម្រុកទៅកើបវត្ថុទាំងនោះភ្លាមៗតែម្តង។

ពួកគេមិនត្រឹមតែរកឃើញបំណែកមាសតូចៗប៉ុណ្ណោះទេ ប្រជាជនក្នុងតំបន់ក៏បានរកឃើញគ្រឿងអលង្ការ និងដុំមាសធំៗផងដែរ។ បច្ចុប្បន្នតំបន់សមុទ្រនេះមិនត្រឹមតែជាកន្លែងរុករកមាសប៉ុណ្ណោះទេ វាក៏ជាកន្លែងដ៏មានសក្តានុពលក្នុងការទាក់ទាញទេសចរដ៏សំខាន់ផងដែរ។ ថ្មីៗនេះឧបនាយករដ្ឋមន្ត្រីឥណ្ឌា ក៏ប្រែក្លាយឆ្នេរ Uppada និងឆ្នេរផ្សេងទៀតនៅក្នុងតំបន់ទៅជាគោលដៅទេសចរណ៍អន្តរជាតិ ដោយផ្តោតលើភាពទាក់ទាញក្នុងស្រុក និងសម្រស់ធម្មជាតិទៀតផង។

ទោះជាយ៉ាងណាក៏ដោយ បាតុភូតដ៏អស្ចារ្យនេះមិនមែនទើបតែកើតឡើងថ្មីៗនោះទេ វាធ្លាប់កើតឡើងជាយូរមកហើយ។ ឆ្នេរ Uppada មានភាពល្បីល្បាញដោយសារប្រវត្តិសាស្រ្តដ៏សម្បូរបែបនៃការរកឃើញមាស។ ជាញឹកញយអ្នកភូមិមកពីតំបន់ក្បែរនោះ រួមទាំង Uppada និង Suradapet បានស្វែងរកភាគល្អិតមាស និងគ្រឿងអលង្ការនៅក្នុងខ្សាច់ជាច្រើនជំនាន់មកហើយ៕

យន្តហោះមិនមែនចេះតែធ្លាក់រហូតនោះទេ ប៉ុន្តែយើងជាអ្នកដំណើរក៏គួរដឹងខ្លះៗពីយន្តហោះផងដែរដើម្បីការពារខ្លួន ក៏ដូចជាមានការប្រុងប្រយ័ត្នខ្ពស់ពេលធ្វើដំណើរលើអាកាស។ យោងតាមការស្រាវជ្រាវរបស់ក្រុមប្រឹក្សាសុវត្ថិភាពដឹកជញ្ជូនជាតិអាមេរិក (NTSB) ដោយផ្អែកលើការធ្លាក់យន្តហោះពីឆ្នាំ ១៩៧១ ដល់បច្ចុប្បន្ន អត្រារស់រានមានជីវិតនៃអ្នកដំណើរដែលអង្គុយនៅខាងក្រោយយន្តហោះគឺខ្ពស់ជាងអ្នកដំណើរផ្សេងទៀតរហូតដល់ ៤០%។ ស្រដៀងគ្នានេះដែររបាយការណ៍ពីទស្សនាវដ្តី Popular Mechanics និង Time ដែលវិភាគទិន្នន័យគ្រោះថ្នាក់ក្នុងរយៈពេល ៣៥ ឆ្នាំរហូតដល់ឆ្នាំ ២០១៥ ក៏បានបញ្ជាក់ដែរថា មនុស្សដែលអង្គុយនៅខាងក្រោយយន្តហោះភាគច្រើនគឺមានអត្រារស់រានមានជីវិតខ្ពស់ជាងគេពិតមែន។

ជាក់ស្តែងដូចហេតុការណ៍ធ្លាក់យន្តហោះដឹកអ្នកដំណើរនៅប្រទេសកាហ្សាក់ស្ថានកាលពីថ្ងៃទី២៥ ខែធ្នូថ្មីៗនេះអ៊ីចឹង អ្នកនៅរស់រានមានជីវិតភាគច្រើនគឺអង្គុយខាងក្រោយយន្តហោះ។ កាលពីថ្ងៃទី ២៥ ខែធ្នូ យន្តហោះ Embraer 190 ដែលជាកម្មសិទ្ធិរបស់ក្រុមហ៊ុនអាកាសចរណ៍ Azerbaijan Airlines ដែលកំពុងធ្វើដំណើរពី Baku ប្រទេស Azerbaijan ទៅកាន់ទីក្រុង Grozny ភាគខាងត្បូងប្រទេសរុស្ស៊ីស្រាប់តែធ្លាក់។ ឧបនាយករដ្ឋមន្ត្រីអាស៊ែបៃហ្សង់លោក Kanat Bozumbaev បាននិយាយថា ចំនួនមនុស្សសរុបដែលស្លាប់ក្នុងការធ្លាក់យន្តហោះ Embraer 190 គឺមានចំនួន ៣៨ នាក់ ក្នុងនោះមានមនុស្ស ២៨ នាក់ប៉ុណ្ណោះដែលនៅរស់រានមានជីវិត។ គួរកត់សម្គាល់ថាភាគច្រើននៃអ្នកដំណើរដែលបានរួចជីវិតគឺសុទ្ធតែអង្គុយនៅខាងក្រោយយន្តហោះ។

ដូច្នេះទីតាំងដែលមានសុវត្ថិភាពខ្ពស់បំផុតនៃយន្តហោះគឺកៅអីផ្នែកខាងក្រោយ។ ការសិក្សាក៏បានបង្ហាញផងដែរថា ទីតាំងដែលមានសុវត្ថិភាពតិចបំផុតគឺកៅអីច្រកផ្លូវ នៅក្នុងតំបន់រវាងស្លាបទាំងពីរ ជាមួយនឹងអត្រាអ្នកស្លាប់រហូតដល់ ៤៤% និងកៅអីផ្នែកខាងមុខយន្តហោះ។ អ្នកស្រាវជ្រាវផ្នែកសុវត្ថិភាពអាកាសចរណ៍នៅសាកលវិទ្យាល័យ North Dakota លោក Daniel Kwasi Adjekum បាននិយាយថា ផ្នែកខាងមុខរបស់យន្តហោះកាន់តែមានប្រជាប្រិយភាព ព្រោះវានៅឆ្ងាយពីម៉ាស៊ីន និងមានសំឡេងតិច។ ទោះជាយ៉ាងណា ប្រសិនបើយន្តហោះធ្លាក់នេះជាផ្នែកដែលនឹងត្រូវប៉ះពាល់មុនគេ ទន្ទឹមនឹងនេះ ផ្នែកខាងក្រោយនៃយន្តហោះទំនងជានៅដដែលបន្ទាប់ពីការប៉ះទង្គិច៕

ថ្មីៗនេះនាយកប្រតិបត្តិ Meta លោក Mark Zuckerberg បានចំណាយលុយ ៣០០ លានដុល្លារអាមេរិកដើម្បីទិញនាវាយក្សដ៏ប្រណីតមួយក្នុងគោលបំណងជូនប្រពន្ធកូនដើរលេងមើលទឹកសមុទ្រនាថ្ងៃចូលឆ្នាំសកល។

Mark Zuckerberg ដែលត្រូវបានគេស្គាល់ថាជាបុរសពូកែថ្នមចិត្តភរិយា បានទិញកប៉ាល់ទំនើបដោយសម្ងាត់ដើម្បីទុក Surprised ភរិយា។ កប៉ាល់នោះមានឈ្មោះថា «Launchpad» គឺជាកប៉ាល់មួយក្នុងចំណោមកប៉ាល់ធំជាងគេលើពិភពលោក ដែលមានតម្លៃប្រមាណ ៣០០ លានដុល្លារអាមេរិក។

Launchpad ជាកប៉ាល់ប្រណីត និងទំនើបដែលមានបន្ទប់ចំនួន ១២ រោងកុនឯកជន កន្លែងហាត់ប្រាណ បាររាត្រី ភោជនីយដ្ឋាន និងកន្លែងសម្រាកលំហែកាយដូចជាស្ប៉ា និងសូណាជាដើម។ លើសពីនេះកប៉ាល់នេះក៏មានសួនទឹកសម្រាប់កុមារ រួមទាំងមានកន្លែងកម្សាន្តសប្បាយៗជាច្រើនទៀតផងដែរ។ ជាមួយប្រវែងសរុប ១១៨.៩ ម៉ែត្រ កប៉ាល់ Launchpad មានធ្នឹម ១៥.៨ ម៉ែត្រ មានតួដែក និងរចនាសម្ព័ន្ធអាលុយមីញ៉ូម អាចផ្ទុកមនុស្សបាន ២៦ នាក់ជាកប៉ាល់ដែលត្រូវបានរចនាឡើងដើម្បីឱ្យមានផាសុកភាព។

មិនដូចមុនទៀតទេ Mark Zuckerberg បានផ្លាស់ប្តូរហើយដោយឥឡូវនេះលោកតែងតែបង្ហាញពីជីវិតរស់នៅបែបអភិជន ជាមួយនឹងដំណើរកម្សាន្តបែបប្រណីតៗ ក៏ដូចជាប្រែក្លាយពីបុរសសាមញ្ញ ទៅជាបុរសបុរសដែលហៃសូបំផុត។ គួរបញ្ជាក់ដែរថា ថៅកែ Facebook និង Instagram រូបនេះបច្ចុប្បន្នគឺជាមហាសេដ្ឋីលំដាប់លេខ ៤ នៅលើពិភពលោក ជាមួយទ្រពសម្បត្តិសរុបប្រមាណ ២០២.៧ ពាន់លានដុល្លារអាមេរិក បន្ទាប់ពី Elon Musk, Larry Ellison, និង Jeff Bezo ៕

ទឹកធ្លាក់ខនផាផេង (Khone Phapheng Waterfall) ដែលមានទីតាំងស្ថិតនៅខេត្តចំប៉ាសាក់ តាមដងទន្លេមេគង្គ ភាគខាងត្បូងប្រទេសឡាវ ជិតព្រំដែនប្រទេសកម្ពុជា គឺជាទឹកធ្លាក់ធំជាងគេបំផុតនៅអាស៊ីអាគ្នេយ៍ និងធំបំផុតមួយនៅក្នុងពិភពលោកផងដែរ ដែលមានទទឹង ១០,៧៨៣ ម៉ែត្រ រួមជាមួយកម្ពស់ពី ១៥-២១ ម៉ែត្រ ហើយមានរំហូរទឹកជំនន់ ៤២,៥០០ ម៉ែត្រគូប/វិនាទី។ នៅទីនោះគឺជាច្រកតែមួយគត់ដែលអាចឱ្យទឹកទន្លេមេគង្គហូរកាត់ចន្លោះតំបន់ភ្នំដងរែក និងតំបន់ខ្ពស់រាបភាគឦសានប្រទេសកម្ពុជានិងខាងត្បូងប្រទេសឡាវផងដែរ។

ទឹកធ្លាក់ខនផាផេងបច្ចុប្បន្នបានកំពុងទាក់ទាញភ្ញៀវទេសចររាប់ពាន់នាក់ឱ្យមកទស្សនានូវទិដ្ឋភាពដ៏អស្ចារ្យនៃទឹកហូរធ្លាក់ឈូឆរត្របាញ់ខ្មួលខ្មាញ់កាត់តាមផ្ទាំងថ្មធំៗជាច្រើនដំណាក់ រំលេចផ្ទៃទឹកសក្បុសក្នុងសីតុណ្ហភាពត្រជាក់ ធ្វើឱ្យភ្ញៀវទេសចរជាប់ចិត្តនឹងសម្រស់ស្រស់ស្អាតគ្មានពីររបស់ទឹកធ្លាក់នេះ។ ទឹកធ្លាក់ខនផាផេងមិនត្រឹមផ្តល់នូវទេសភាពស្រស់បំព្រងគួរជាទីចាប់អារម្មណ៍ប៉ុណ្ណោះទេ វាថែមទាំងមានខ្យល់អាកាសបរិសុទ្ធ ព្រៃប្រឹក្សាដ៏ខៀវស្រងាត់ព័ទ្ធជុំវិញ បង្កើតបានជាកន្លែងអស្ចារ្យមួយដែលមិនអាចបំភ្លេចបាន។

ក្រៅពីទឹកធ្លាក់ខនផាផេងរបស់ប្រទេសឡាវ ទឹកធ្លាក់ Dudhsagar ដែលស្ថិតនៅលើទន្លេ Mandovi ក្នុងរដ្ឋ Goa Dudhsagar ប្រទេសឥណ្ឌា ក៏ជាទឹកធ្លាក់មួយក្នុងចំណោមទឹកធ្លាក់ដែលមានទំហំធំផងដែរ។ ជាមួយទទឹង ៣០ ម៉ែត្រ និងកំពស់ប្រហែល ៣១០ ម៉ែត្រ ទឹកធ្លាក់ Dudhsagar មានកម្លាំងទឹកហូរខ្លាំង ដោយទឹកធ្លាក់ពីខាងលើចែកជា ៤ ជាន់។ លើសពីនេះទឹកធ្លាក់ Epupa របស់ប្រទេសណាមីប៊ីក៏ស្ថិតក្នុងបញ្ជីទឹកធ្លាក់ធំបំផុតរបស់ពិភពលោកផងដែរ។

ទឹកធ្លាក់ Epupa ស្ថិតនៅក្នុងចំណុចដាច់ស្រយាលបំផុតមួយនៃប្រទេសណាមីប៊ីគឺជាកន្លែងពិសេសមួយសម្រាប់អ្នកស្រឡាញ់ធម្មជាតិ។ ទឹកធ្លាក់នេះនៅលើទន្លេ Kunene គឺជាទឹកជ្រោះដ៏សំខាន់បំផុតមួយនៅអាហ្វ្រិកខាងត្បូង។ ទោះបីជាវាមានការធ្លាក់ចុះអតិបរមា ២០ ម៉ែត្រក៏ដោយ ប៉ុន្តែវាបង្កើតបាននូវទេសភាពដ៏គួរឱ្យភ្ញាក់ផ្អើលដែលពោរពេញទៅដោយការធ្លាក់ជាបន្តបន្ទាប់គ្នារវាងថ្ម សក្តិសមបំផុតសម្រាប់អ្នកចូលចិត្តផ្សងព្រេង និងអ្នកស្រឡាញ់ធម្មជាតិ៕

ប្រទេសថៃ ៖ កាលពីថ្ងៃទី២៦ ខែធ្នូ ឆ្នាំ២០២៤ អ្នកលេងបណ្តាញសង្គម និងគ្រូពេទ្យថៃបានបង្ហាញការសោកស្តាយចំពោះការស្លា.ប់ របស់ Influencer ដ៏ល្បីម្នាក់ឈ្មោះ ប៊ែង ឡេសស្ទ័រ អាយុ២១ឆ្នាំ ក្រោយពីបានផឹកស្រាអស់យ៉ាងច្រើនក្នុងរយៈពេលខ្លី ព្រោះតែចង់បានប្រាក់៣ម៉ឺនបាត ។ មុនពេលក្លាយជា Influencer លោក ប៊ែង មានមុខរបរដើរលក់កម្រងផ្កាតាមផ្លូវដើម្បីចិញ្ចឹមលោកយាយរបស់ខ្លួន ហើយលោកត្រូវបានគេជួលឱ្យផឹកស្រា និងបង្កើតមាតិកាប្លែកៗជាញឹកញាប់ ។

ក្រោយការស្លាប់របស់ Influencer រូបនេះ បានធ្វើឱ្យផ្ទុះការចាប់អារម្មណ៍យ៉ាងខ្លាំងពីសំណាក់មហាជន ហើយមានសំណួរថា តើវាជាកំហុសអ្នកណារវាងអ្នកជួលឱ្យគេផឹកស្រា និងអ្នកផឹកស្រាព្រោះតែចង់បានប្រាក់ចំនួន៣ម៉ឺនបាត (ឬស្មើនឹង៨៨២ដុល្លារអាមេរិក) និងពុំគិតពីផលប៉ះពាល់សុខភាព ឬអាយុជីវិតរបស់ខ្លួន?

ហ្វេសប៊ុកផេករបស់គ្រូពេទ្យថៃឈ្មោះ សុរ៉ាត់ បានបង្ហាញពីការសោកស្តាយចំពោះការបាត់បង់ជីវិ.ត របស់ Influencer រូបនេះ ដោយសារការបង្កើតមាតិកាផឹកស្រាលើកដាច់អស់ពីកែវត្រឹមតែរយៈពេលខ្លី ។ លោកគ្រូពេទ្យហាមដាច់ខាតកុំផឹកស្រាច្រើនយ៉ាងឆាប់រហ័សបែបនេះ ជាពិសេស នៅថ្ងៃឆ្លងឆ្នាំ ពីព្រោះអាចស្លាប់ដូចករណីខាងលើ ។

លោកគ្រូពេទ្យ សុរ៉ាត់ និយាយថា ៖ «ការបង្កើតមាតិការបស់ Influencer លើពិភពលោក ដូចជា ការផឹកស្រាក្នុងរយៈពេលខ្លីរហូតដល់ស្លាប់នេះ ធ្លាប់កើតឡើងរួចមកហើយ ប៉ុន្តែបច្ចុប្បន្ន មនុស្សខ្លះនៅតែប្រព្រឹត្ត ។ ជាក់ស្តែង Influencer ថៃម្នាក់បានស្លាប់ក្រោយពីផឹកស្រាអស់ច្រើន ផឹកលឿន និងលើកដាច់ ហើយពុំដឹងថាខ្លួនមានជំងឺប្រចាំកាយ» ។

Influencer រូបនេះបានផឹកស្រាអស់យ៉ាងច្រើនយ៉ាងឆាប់រហ័ស ព្រោះតែចង់បានប្រាក់៣ម៉ឺនបាត ប៉ុន្តែចុងក្រោយ ត្រូវបាត់បង់ជីវិត ។ ដូច្នេះ ចូរឈប់បង្ខំឱ្យមិត្តភក្តិ ឬសាច់ញាតិផឹកស្រាដើម្បីប្តូរយកប្រាក់រង្វាន់ទៀតទៅ ប្រយ័ត្នអ្នកផឹកស្លាប់ ហើយអ្នកបង្ខំឱ្យគេផឹក អាចនឹងជាប់ពន្ធនាគារ ។

រាងកាយរបស់មនុស្សម្នាក់ៗពុំដូចគ្នាទេ អ្នកខ្លះផឹកស្រាហើយគ្មានបញ្ហាអ្វី ប៉ុន្តែអ្នកខ្លះទៀតស្លាប់ ។ ការផឹកស្រាអស់ច្រើនយ៉ាងឆាប់រហ័សនេះនឹងបណ្តាលឱ្យពុលស្រាភ្លាមៗ ពីព្រោះអាល់កុលបានចូលក្នុងរាងកាយជាបន្តបន្ទាប់ ហើយអ្នកផឹកពុំបានឱ្យរាងកាយបានសម្រាក ឬមានពេលបញ្ចេញអាល់កុល ហើយអាល់កុលនឹងកើនឡើងលឿនក្នុងសរសៃឈាម, ក្អួតចង្អោរ, ពិបាកដកដង្ហើម និងស្លាប់ ។ នេះបើតាមការលើកឡើងរបស់គ្រូពេទ្យ ៕