បច្ចុប្បន្ននេះកង់អេឡិចត្រូនិកគឺមានការពេញនិយមណាស់មិនថានៅអឺរ៉ុប និងអាស៊ីនោះទេភាគច្រើនសុទ្ធតែប្រើប្រាស់កង់អេឡិចត្រូនិក។ ទោះជាយ៉ាងណានៅប្រទេសអង់គ្លេសថ្មីៗនេះគឺមានករណីដ៏រន្ធ.ត់មួយបានកើតឡើងនៅតំបន់ Catford នៃទីក្រុងឡុងដ៍ដោយសារកង់អេឡិចត្រូនិកផ្ទុះ ខណៈកំពុងសាកថ្ម បណ្តាលឱ្យឆេះផ្ទះយ៉ាងសន្ធោសន្ធៅ។

យោងតាមសារព័ត៌មានបរទេសចុះផ្សាយថា នៅពេលឆេះផ្ទះភ្លាមៗមានមនុស្ស ៣ នាក់នៅក្នុងផ្ទះ ប៉ុន្តែមានម្នាក់អាចរត់គេចខ្លួនបានដោយសុវត្ថិភាពតាមទ្វារខាងមុខ ប៉ុន្តែពីរនាក់ទៀតបានជាប់នៅលើដំបូលផ្ទះ ដោយសារតែផ្លូវរត់គេចងងឹតដាច់ភ្លើង ពួកគេក៏ឡើងទៅដំបូលផ្ទះតែម្តង។

ជាអកុសល មនុស្សម្នាក់ក្នុងចំណោមមនុស្សពីរនាក់នោះបានធ្លាក់ពីលើដំបូល ហើយរងរបួសធ្ងន់ ប៉ុន្តែមិនមានគ្រោះថ្នាក់ដល់ជីវិតឡើយ ខណៈម្នាក់ទៀតត្រូវបានអ្នកពន្លត់អគ្គីភ័យជួយទាន់ពេលវេលា។ យោងតាមស្នងការរង Richard Field បាននិយាយថា “e-bikes និង e-scooters ត្រូវបានកត់ត្រាការឆេះប្រហែល ១៦០ ករណីហើយនៅទីក្រុងឡុងដ៍ក្នុងឆ្នាំនេះ ដែលបង្ហាញថាកង់ទាំងនេះគឺមានគ្រោះថ្នាក់ខ្លាំងណាស់”។ Field បានបន្តថា “កង់នេះត្រូវបានបំលែងពីកង់ធម្មតាដោយបន្ថែមកញ្ចប់ថ្ម lithium-ion ហើយត្រូវបានដោតនៅពេលអស់ថ្ម។

យោងតាមតំណាងរដ្ឋាភិបាលក៏បាននិយាយដែរថា កង់អគ្គិសនី ឬកង់អេឡិចត្រូនិកគឺពិតជាមានហានិភ័យខ្ពស់ខ្លាំងដោយសារការដំណើរការខុសប្រក្រតី ជាពិសេសប្រសិនបើជួសជុល ឬប្រើឆ្នាំងសាកមិនត្រឹមត្រូវវានឹងផ្ទុះ។ ដូច្នេះហើយសម្រាប់គ្រួសារដែលមានកង់ទាំងពីរប្រភេទនេះនៅក្នុងផ្ទះសូមប្រុងប្រយ័ត្នឱ្យបានខ្ពស់បន្តិច។ Field ក៏បានបន្តទៀតថា “ប្រសិនបើលោកអ្នកស្រឡាញ់កង់ប្រភេទនេះសូមកុំទិញតាមអនឡាញឱ្យសោះ យល់ល្អគួរតែទិញផលិតផលពីហាងល្បីឈ្មោះ ដែលផលិតផលនេះទំនងជាត្រូវនឹងស្តង់ដារសុវត្ថិភាពជាង”។

លោកបន្ថែមទៀតថា ប្រសិនបើអាចធ្វើបាន សូមទុកកង់អគ្គិសនី ឬម៉ូតូអគ្គិសនីរបស់អ្នកនៅខាងក្រៅ ឬយានដ្ឋានល្អជាង។ ប្រសិនបើអ្នកទុកវានៅក្នុងផ្ទះ សូមទុកវានៅជិតច្រកចេញ កុំដាក់វានៅក្នុងបន្ទប់ដែលបិទទ្វារឱ្យសោះ ក្នុងករណីមានអគ្គីភ័យ វាបឹងអាចបង្កគ្រោះថ្នាក់ដល់លោកអ្នក។ លើសពីនេះអ្នកប្រើក៏ត្រូវបានណែនាំឱ្យប្រើឆ្នាំងសាកឱ្យបានត្រឹមត្រូវ មិនត្រូវសាកយូរពេក និងមិនត្រូវសាកថ្មពេលគេងនោះទេ៕

សហរដ្ឋអាមេរិក ៖ ប្រធានាធិបតីអាមេរិកថ្មី លោក Donald Trump នឹងដកអាមេរិកចេញពីអង្គការសុខភាពពិភពលោក (WHO) ចាប់ពីថ្ងៃឡើងកាន់តំណែងដំបូង ពីព្រោះអាមេរិកបានចំណាយថវិកាយ៉ាងច្រើនសម្រាប់មន្ត្រីអង្គការ ហើយលោកពុំពេញចិត្តនឹងវិធានការទប់ស្កាត់ជំងឺកូវីដ-១៩ របស់អង្គការកន្លងមក ។ នេះបើតាមការចុះផ្សាយរបស់កាសែត Financial Times កាលពីថ្ងៃទី២២ ខែធ្នូ ឆ្នាំ២០២៤ ។

លោក Trump និយាយថា អង្គការសុខភាពពិភពលោក ស្ថិតក្រោមការគ្រប់គ្រងរបស់ចិន ហើយចិនបានដាក់សម្ពាធអង្គការនេះក្នុងពេលជំងឺកូវីដឆ្លងរាតត្បាតកាលពីឆ្នាំ២០២០ ។ លោកក៏បានរិះគន់ពីវិធានការទប់ស្កាត់ជំងឺកូវីដរបស់ WHO ផងដែរថា បង្ខំឱ្យប្រទេសនានាបិទព្រំដែន ហើយ WHO បង្ខំឱ្យពលរដ្ឋលើពិភពលោក ចាក់វ៉ាក់សាំងដែលទើបផលិត ។ លោកក៏បានស្នើឱ្យអង្គការនេះផ្តល់ប្រាក់ឧបត្ថម្ភទៅឱ្យអង្គការសប្បុរសធម៌ផ្នែកសុខភាពជំនួសវិញ ។

ក្រុមការងាររបស់លោក Trump ឱ្យដឹងថា ពួកគេបានតាំងចិត្តដកអាមេរិកចេញពីអង្គការ WHO នៅថ្ងៃដែលលោក Trump ស្បថឡើងកាន់តំណែង គឺថ្ងៃទី២០ ខែមករា ឆ្នាំ២០២៥ ដោយសារអាមេរិកបានចំណាយប្រាក់យ៉ាងច្រើនសម្រាប់អង្គការ ខណៈមន្ត្រីរដ្ឋាភិបាលខ្លះទៀតពុំចង់ឱ្យអាមេរិកដកខ្លួនចេញទេ ដើម្បីជំរុញកំណែទម្រង់អង្គការ ។

នៅថ្ងៃទី២០ ខែមករា ឆ្នាំ២០២១ ប្រធានាធិបតីអាមេរិក លោក Joe Biden បានបង្កើតទំនាក់ទំនងជាថ្មីជាមួយអង្គការ WHO ក្រោយពីលោក Trump ក្នុងឋានៈជាប្រធានាធិបតីអាណត្តិមុនដកអាមេរិកចេញពីអង្គការនេះ ។ កាលពីឆ្នាំ១៩៤៨ សភាអាមេរិកបានអនុម័តថា អាមេរិកអាចដកខ្លួនចេញពីអង្គការសុខភាពពិភពលោកបាន លុះត្រាតែផ្តល់ដំណឹងជាមុនរយៈពេល១ឆ្នាំ និងត្រូវបង់ប្រាក់យ៉ាងច្រើន ។

អង្គការសុខភាពពិភពលោក គឺជាភ្នាក់ងាររបស់អង្គការសហប្រជាជាតិ ដែលបំពេញតួនាទីជាអង្គការសម្របសម្រួលបញ្ហាសុខភាពសាធារណៈអន្តរជាតិ ហើយអង្គការនេះទទួលបានប្រាក់ឧបត្ថម្ភពីប្រទេសសមាជិក ។ រីឯអាមេរិកបានផ្តល់ប្រាក់ច្រើនបំផុតស្ថិតក្នុងលំដាប់ទី២ ដល់អង្គការនេះអស់រយៈពេលជាច្រើនឆ្នាំ ៕

ប្រទេសថៃ ៖ កាលពីថ្ងៃទី២៧ ខែធ្នូ ឆ្នាំ២០២៤ សារព័ត៌មានថៃឈ្មោះ Matichon រាយការណ៍ថា ដោយសារការរីកចម្រើនផ្នែករថយន្តអគ្គិសនី និងការពង្រីកទីផ្សាររថយន្តអគ្គិសនីរបស់ប្រទេសថៃកើនឡើងជាបន្តបន្ទាប់ មន្ត្រីក្រសួងពាណិជ្ជកម្មថៃបានសម្លឹងឃើញឱកាសវិនិយោគសាងសង់ស្ថានីយសាករថយន្តអគ្គិសនីនៅប្រទេសកម្ពុជា ដើម្បីបំពេញតម្រូវការប្រើប្រាស់នាថ្ងៃអនាគត ។

លោកស្រី ស៊ុណាន់តា កាំងវ៉ាលកុឡាកិច មន្ត្រីនាយកដ្ឋានជំរុញពាណិជ្ជកម្មអន្តរជាតិនៃក្រសួងពាណិជ្ជកម្មនិយាយថា នាយកដ្ឋានបានស្នើឱ្យមន្ត្រីស្ថានទូតថៃប្រចាំប្រទេសនានាពិនិត្យឱកាសនាំចេញផលិតផលថៃ ស្របតាមគោលនយោបាយរបស់ក្រសួងពាណិជ្ជកម្ម ដែលជំរុញឱ្យក្រុមហ៊ុនថៃវិនិយោគក្នុងទីផ្សារពុំប៉ះពាល់បរិស្ថាន ។

បន្ទាប់មក នាយកដ្ឋានជំរុញពាណិជ្ជកម្មអន្តរជាតិ ក៏បានទទួលសេចក្តីរាយការណ៍ពីលោក និរ៉ាវ៉ាត់ រ៉ាំងស៊ីកាន ប្រធានការិយាល័យជំរុញពាណិជ្ជកម្មក្រៅប្រទេស ប្រចាំរាជធានីភ្នំពេញ ប្រទេសកម្ពុជា ថា ក្រុមហ៊ុនថៃអាចវិនិយោគសាងសង់ស្ថានីយសាករថយន្តអគ្គិសនីនៅកម្ពុជា ដើម្បីបំពេញតម្រូវការប្រើប្រាស់កើនឡើង ។

បច្ចុប្បន្ន រថយន្តអគ្គិសនីមានឱកាស និងសក្តានុពលកំណើនខ្ពស់នៅកម្ពុជា ពីព្រោះមិនត្រឹមតែជួយការពារបរិស្ថាន និងលើកកម្ពស់គុណភាពការរស់នៅរបស់ពលរដ្ឋខ្មែរប៉ុណ្ណោះទេ ប៉ុន្តែវាបានជំរុញឱ្យជ្រើសរើសប្រើប្រាស់ថាមពលផងដែរ ខណៈរថយន្តអគ្គិសនីទទួលបានការពេញនិយមពីពលរដ្ឋខ្មែរជាបន្តបន្ទាប់ ។ រាជរដ្ឋាភិបាលកម្ពុជាបានជំរុញការប្រើប្រាស់រថយន្តអគ្គិសនី ដោយកំណត់គោលដៅមានរថយន្តអគ្គិសនី ចំនួន៨សែនគ្រឿង និងស្ថានីយសាករថយន្តអគ្គិសនីនៅទូទាំងប្រទេស ក្នុងឆ្នាំ២០៣០ ។ នេះបើយោងតាមការចុះផ្សាយរបស់សារព័ត៌មានថៃ ។

លោកស្រី ស៊ុណាន់តា បន្តថា បញ្ហាបរិស្ថាន និងគ្រោះធម្មជាតិចាប់ផ្តើមកើតឡើងនៅទូទាំងពិភពលោក ធ្វើឱ្យប្រទេសនានាបង្កើនការអភិរក្សបរិស្ថាន ហើយកម្ពុជាក៏បានអភិរក្សបរិស្ថានដែរ តាមរយៈការប្រើប្រាស់រថយន្តអគ្គិសនី ។ ហេតុនេះ វាជាឱកាសរបស់ក្រុមហ៊ុនថៃ ដែលប្រកបអាជីវកម្មពាក់ព័ន្ធនឹងឧស្សាហកម្មផលិតរថយន្តអគ្គិសនី អាចវិនិយោគសាងសង់ស្ថានីយសាករថយន្តអគ្គិសនីនៅកម្ពុជា ពីព្រោះតម្រូវការប្រើប្រាស់នឹងកើនឡើង នាថ្ងៃអនាគត ៕