ការឆ្លងឆ្នាំសកលតែងប្រារព្ធឡើងជារៀងរាល់ឆ្នាំនៃថ្ងៃទី៣១ ខែធ្នូ តាមបណ្តាប្រទេសទាំងអស់នៅលើពិភពលោក។

ការប្រារព្ធពិធីឆ្លងឆ្នាំសកល មិនមែនប្រារព្ធឡើងក្នុងពេលដំណាលគ្នានោះតេ ដោយមានប្រទេសខ្លះឆ្លងឆ្នាំមុន និងមួយចំនួនទៀតឆ្លងឆ្នាំក្រោយ។ ជាក់ស្តែងដូចកម្ពុជាយើង នឹងឆ្លងចូលឆ្នាំ២០២៥មុន បណ្តាប្រទេសមួយចំនួននៅទ្វីបអឺរ៉ុបប្រមាណជា៦ម៉ោង។

មូលហេតុដែលនាំឱ្យមានការឆ្លងឆ្នាំមុន និងក្រោយនេះ ក៏ព្រោះតែដោយសារល្វែងម៉ោងខុសគ្នា។ គេបានបង្កើតខ្សែបន្ទាត់អរូបីមួយហៅថា International Date Line (IDL) ដែលស្ថិតនៅខ្សែបណ្តោយទី១៨០ របស់ប្រទេសរុស្សុី រដ្ឋអាឡាស្កា និងមហាសមុទ្រប៉ាសុីហ្វិក។

គេរាប់ថ្ងៃថ្មីដូចទៅនឹងដំណើរនៃផែនដីវិល ដោយបណ្តាលប្រទេសនៅខ្សែបន្ទាត់ខាងឆ្វេងដៃនៅឆ្លងឆ្នាំមុន ខណៈប្រទេសដែលនៅខាងស្តាំដៃនៃខ្សែបន្ទាត់ស្ថិតនៅថ្ងៃចាស់។

ចំពោះ៣ប្រទេសដែលនឹងឆ្លងឆ្នាំសកល២០៥មុនគេ រួមមាន គីរីបាទី តុងហ្គា និងកោះសាម័រ។ បើគិតនឹងម៉ោងនៅកម្ពុជា ប្រទេសនេះនឹងអបអរសាទរការឆ្លងចូលឆ្នាំថ្មីឆ្នាំសកល នៅម៉ោង៥ល្ងាច ថ្ងៃទី៣១ខែធ្នូ។

ដោយឡែកចំពោះ កោះ Baker និងកោះ Howland នៅទ្វីបអាមេរិកខាងជើងនិងត្បូង នឹងអបអរឆ្នាំថ្មីនៅម៉ោង៧យប់ ថ្ងៃទី១ខែមករាម៉ោងនៅកម្ពុជា៕

«លោក ជីវ តាក្វាន់ បានជួបនគរចេនឡា» ជាកំណត់ត្រាចិនដ៏ល្បីអំឡុងសតវត្សទី ១៣ ដែលពិពណ៌នាអំពីវប្បធម៌ អរិយធម៌នាសម័យអង្គរដ៏រុងរឿងរបស់ខ្មែរ។ យ៉ាងណា ទស្សនីយភាពប្រវត្តិសាស្ត្រពាន់ឆ្នាំដ៏កម្រនិងអស្ចារ្យនេះ នឹងលេចឡើងម្តងទៀតឲ្យមហាជនទស្សនា នាថ្ងៃទី ២៩ ខែធ្នូ ឆ្នាំ២០២៤ ខាងមុខនេះ ដោយរួមព្រះរាជវត្តមានសម្តែងពីព្រះនាងតូចនរោត្តមជេនណាផងដែរ។

ថ្មីៗនេះ ស្ថានទូតចិនប្រចាំកម្ពុជា បានជម្រាបជូនដំណឹងអំពី ការសម្តែងសិល្បៈក្រោមចំណងជើងថា”លោក ជីវ តាក្វាន់ បានជួបនគរចេនឡា”។ ការសម្តែងនេះនឹងបង្ហាញអំពីដំណើរប្រវត្តិសាស្ត្ររបស់អ្នកការទូតចិន ជីវ តាក្វាន់ ដែលបានធ្វើដំណើរមកកាន់ប្រទេសកម្ពុជាក្នុងសតវត្សទី ១៣ ដោយនឹងនាំអារម្មណ៍អ្នកទាំងអស់គ្នាចូលទៅកាន់សម័យអង្គរដ៏រុងរឿងតាមរយៈការសម្តែង របាំ និងសាច់រឿង។ ជាមួយគ្នានោះនឹងមានការសម្តែងរួមគ្នារវាងសិល្បៈករ និងសិល្បៈការីទាំងចិននិងខ្មែរយ៉ាងច្រើនកុះករ។

ទស្សនីយភាពសិល្បៈដ៏ធំលើកនេះ ក៏រួមមានព្រះរាជវត្តមានសម្តែងពីព្រះនាងតូចនរោត្តមជេនណាផងដែរ ដោយថ្មីៗនេះ ព្រះនាងបានបង្ហាញវីដេអូក្នុងការហាត់សមសម្តែង និងគូសបញ្ជាក់ថា «សូមពុកម៉ែបងប្អូនអញ្ជើញចូលរួមទស្សនាឱ្យបានច្រើនកុះករដោយហេតុថាស្នាដៃសិល្បៈនេះបង្ហាញពីអរិយធម៌ខ្មែរនៅសតវត្សរ៍ទី ១៣ តាមរយៈការសម្តែង ការរាំ និងការច្រៀង ជាមួយនឹងការលាយបញ្ចូលគ្នានៃប្រវត្តិសាស្ត្រ វប្បធម៌ និងមនោសញ្ចេតនា»។

ចំពោះទីតំាងសម្តែងគឺនឹងប្រព្រឹត្តិទៅនៅឯសាលមហោស្រពចតុមុខ (រាជធានីភ្នំពេញ) នាថ្ងៃអាទិត្យ ទី ២៩ ខែធ្នូ ឆ្នាំ២០២៤ ដែលរួមមានការសម្តែងចំនួន២ ដង គឺនៅម៉ោង ៣ រសៀល និងម៉ោង ៧ ល្ងាច។ ចំពោះតម្លៃសំបុត្រចូលទស្សនាគឺមានពី ៥ដុល្លារ និង ១២.៥ដុល្លារផងដែរ៕

សាទរកម្ពុជា ជាព្រឹត្តិការណ៍ដ៏ធំសម្បើមមួយរបស់ព្រះរាជាណាចក្រកម្ពុជា ដែលនឹងប្រារព្ធឡើងនាថ្ងៃទី ៣១ ខែធ្នូ ឆ្នាំ ២០២៤ នៅបរិវេណមុខព្រះបរមរាជវាំង (រាជធានីភ្នំពេញ)។

ភាពលេចធ្លោនៃព្រឹត្តិការណ៍នេះ នឹងរួមបញ្ចូលផ្ទាំងទស្សនីភាពទាំងបុរាណនិងសម័យ ជាពិសេសនោះគឺក្បួនដង្ហែ«សាទរកម្ពុជា»ដ៏មហាឡារិក មានអ្នកចូលរួមប្រមាណ ៣០០០នាក់ នឹងប្រារព្ធឡើងនៅវេលាម៉ោង៦ ល្ងាច ដល់ម៉ោង ៨ យប់។

យ៉ាងណា សម្រាប់ការសម្តែងសិល្បៈទស្សនីយភាពចម្រុះ នឹងចាប់ផ្តើមពីម៉ោង ៨ យប់ ដល់ម៉ោង ១ ទៀបភ្លឺ។ ទន្ទឹមនឹងនោះ នឹងលេចវត្តមានសិល្បករ សិល្បការិនីល្បីៗ ប្រចាំព្រះរាជាណាចក្រកម្ពុជាជាច្រើនដួងផងដែរ ធានាថានឹងកក្រើកនារាត្រីឆ្លងឆ្នាំ។

អ្វីដែលជាការគោរពនិងកោតស្ញប់ស្ញែង នារាត្រីនោះក៏រួមមានព្រះវត្តមានដ៏ខ្ពង់ខ្ពស់របស់ព្រះនាងតូច នរោត្តមជេន ណា និងអ្នកអង្គម្ចាស់ នរោត្តម រស្មីខេមុនី សម្តែងនៅលើឆាកតន្ត្រីផងដែរ។ ចំពោះតារាល្បីៗដែលនឹងអញ្ជើញមកចូលរួមវិញគឺរួមមាន កំពូលតារាចម្រៀងរ៉េប វណ្ណដា, អ្នកនាង ឱក សុគន្ធកញ្ញា, អ្នកនាងពេជ្រ សោភា, និងលោកសាយជាដើម។

សូមជម្រាបថា ព្រឹត្តិការណ៍«សាទរកម្ពុជា» ដែលបានរៀបចំឡើងដោយសហភាពសហព័ន្ធយុវជនកម្ពុជា ដឹកនាំដោយឯកឧត្តម ហ៊ុន ម៉ានី ដោយមានកម្មវិធីពិសេសៗជាច្រើនដូចជា ការដង្ហែក្បួនដ៏អស្ចារ្យ ការសម្តែងសិល្បៈទស្សនីយភាពចម្រុះ ការពិពណ៌ដ៏ច្រើនអនេក និងការរាប់ថយក្រោយក្រោមពន្លឺកាំជ្រួចដ៏ស្រស់ស្អាត៕

យោងតាមការដាក់បង្ហោះរបស់ក្រសួងទេសចរណ៍ បានគូសបញ្ជាក់ទីតំាងធំៗចំនួន ៤ ដែលបានរៀបចំព្រឹត្តិការណ៍ឆ្លងឆ្នាំសកលយ៉ាងមហាឡារិក ដោយក្នុងនោះគឺរួមមានរាជធានីភ្នំពេញ ខេត្តព្រះសីហនុ ខេត្តបាត់ដំបង និងខេត្តតាកែវ។

នាថ្ងៃទី៣១ ខែធ្នូនេះ ព្រឹត្តិការណ៍«សាទរកម្ពុជា» ដែលនឹងប្រារព្ធឡើងនៅមុខព្រះបរមរាជវាំង ស្ថិតក្នុងសង្កាត់ជ័យជំនះ ខណ្ឌដូនពេញ រាជធានីភ្នំពេញ ដោយរួមមានពិធីដង្ហែក្បួនថ្មើរជើង ការសម្តែងទស្សនីយភាពចម្រុះ ការប្រគុំតន្ត្រីរួមវត្តមានពីតារាល្បីៗ ការតំាងពិពណ៌ និងការបាញ់កាំជ្រួញអបអរសាទរ។ នៅរាជធានីភ្នំពេញដដែល សម្រាប់អ្នកដែលចូលចិត្តភាពស្ងប់ស្ងាត់និងចង់បំពេញកុសលនាថ្ងៃឆ្លងឆ្នាំ វត្តនិគ្រោធវ័ន ហៅវត្តគល់ទទឹង ក៏មានរៀបចំកម្មវិធីសមាធិឆ្លងឆ្នាំផងដែរ។

ក្រឡេកទៅកាន់ខេត្តព្រះសីហនុវិញ ក៏មានរៀបចំកម្មវិធីឆ្លងឆ្នាំដ៏ធំអស្ចារ្យដូចគ្នាដែរ ដែលមានទីតំាងស្ថិតនៅទីលានតេជោ រមណីយដ្ឋានតំបន់ឆ្នេរ ឆ្នេរអូរត្រេះ និងឆ្នេរអូឈើទាល។ នៅទីនោះនឹងមានការ ប្រគំតន្រ្តី សម្តែងសិល្បៈ តាំងពិព័រណ៍ បង្ហោះគោម វិថីម្ហូបអាហារ សម្តែងសិល្បៈបុរាណប្រពៃណីយ៉ាងច្រើនអនេក។ https://blogger.googleusercontent.com/img/b/R29vZ2xl/AVvXsEgT15FZIxTf5Pq7jahcYMTuffY8HebSk881KEiw7tXIhfmzR-BMnt7r0sYc_zCdE0upYbAvhXTwYEcL_dA9_Ykr8UsGXVA7vlyOXS6sj19H1LE1sdfUt8CMqwaAIJuvIP3GQCVvwuyly-2CnGp8oZyCVmx7FXSiqTBWjhyphenhyphenNbLdNqx-J5R8cdzfEv8LWG7AL/s2048/IMG_0343.JPG

រីឯខេត្តបាត់ដំបងវិញក៏មិនណយ ពិព័រណ៍ម្ហូបអាហារខ្មែរដ៏ធំ FOOD FAIR ដែលនឹងរៀបចំឡើងរយៈពេល ៣ថ្ងៃ នាថ្ងៃទី២៩-៣០-៣១ ខែធ្នូនេះ មានទីតំាងនៅមុខអគារសារមន្ទីរប្រវត្តិសាស្ត្រ ខេត្តបាត់ដំបង។ ចំណែកនៅឯក្រុងដូនពេញ ខេត្តតាកែវវិញ ក៏កំពុងត្រៀមរៀបចំព្រឹត្តិការណ៍ប្រគុំតន្រ្តីដ៏ធំ អបអរដល់កម្មវីធីឆ្នាំសកលផងដែរ។

យ៉ាងណាមិនមែន មានត្រឹមតែ ៤ ខេត្តក្រុងនេះទេ ដែលត្រៀមរៀបចំកម្មវីធីឆ្លងឆ្នាំ, ដោយឡែកនៅតាមបណ្តាខេត្ត ក៏ដូចជាទីតំាងផ្សេងៗទៀត ក៏មានរៀបចំកម្មវីធីសប្បាយៗជាបន្តបន្ទាប់ផងដងដែរ៕

ជឿជាក់ថាប្រិយមិត្តភាគច្រើនប្រាកដបានជាស្គាល់យ៉ាងច្បាស់ហើយ ល្ខោនបាសាក់វង់ ភី សុគន្ធី ដែលជាវង់ល្ខោនដ៏ល្បីមួយក្នុងប្រទេសកម្ពុជា ដោយជាទូទៅ គេសង្កេតឃើញថា តែងមានការសម្តែងនៅតាមទីជនបទ និងវត្តអារាមជាដើម។ តែយ៉ាងណា ស្របតាមបរិបទថ្មី រោងល្ខោននឹងត្រូវលើកយកមកដាក់ក្នុងទីផ្សារទំនើបដ៏ធំជំនួសវិញ ប្រកបដោយភាពទាក់ទាញ។

យោងតាមការដាក់បង្ហោះរបស់គេហទំព័រ ផ្សារទំនើបអ៊ីអនម៉លមានជ័យ គឺបានគូសបញ្ជាក់ថា «នាថ្ងៃអាទិត្យ ទី ២៩ ខែធ្នូ ឆ្នាំ ២០២៤ នេះ ផ្ទាំងទស្សនីយភាពការសម្ដែងល្ខោនបាសាក់ វង់ ភី សុគន្ធី ដែលអ៊ំពូមីងបងប្អូនទន្ទឹងរង់ចាំ នឹងត្រឡប់មកកំដរអារម្មណ៍អ៊ំពូមីងបងប្អូនសារជាថ្មីហើយ»។

នាថ្ងៃអាទិត្យនេះ វង់ល្ខោនភី សុគន្ធី នឹងនាំមកជូនរឿងមួយក្រោមចំណងជើងថា “ចន្ទសង្វាបុប្ផាភួង”។ ចំពោះទីតំាងសម្តែងគឺស្ថិតនៅជាន់ផ្ទាល់ដី ក្នុងផ្សារទំនើបអ៊ីអនម៉លមានជ័យផ្ទាល់តែម្តង នៅវេលាម៉ោង ៥ ល្ងាច។ ដូច្នេះហើយអ៊ំពូមីងបងប្អូនទាំងអស់ គឺអញ្ជើញមកចូលរួមទស្សនាឲ្យបានច្រើនកុះករ ដើម្បីជាការស្ទួយដល់សិល្បៈវប្បធម៌ខ្មែរឲ្យបានគង់វង្សជាដរាប។

សូមជម្រាបថា ផ្សារទំនើបអ៊ីអនម៉លមានជ័យ ឬផ្សារទំនើបអ៊ីអន៣ តែងបង្ហាញជូននូវសិល្បៈវប្បធម៌ខ្មែរជាច្រើនទម្រង់ឲ្យមហាជនទស្សនា ស្ទើរតែជារៀងរាល់សប្តាហ៍ ដែលរួមមានល្ខោនស្រមោលស្បែកធំ ស្បែកតូច ល្ខោនបាសាក់ និងល្ខោនយីកេជាដើម ហើយទទួលបានការសន្ទុះគាំទ្រយ៉ាងច្រើនផុសផុល។ ផ្សារទំនើបអ៊ីអន៣ មានទីតាំងស្ថិតនៅតាមបណ្តោយមហាវិថីសម្ដេចតេជោ ហ៊ុន សែន (ផ្លូវ៦០ម៉ែត្រ) ស្ថិតក្នុងសង្កាត់ចាក់អង្រែក្រោម ខណ្ឌមានជ័យ ភាគខាងត្បូងនៃរាជធានីភ្នំពេញ៕

ប្រទេសកម្ពុជា ទឹកដីអច្ឆរិយៈ ដែលសម្បូរទៅដោយប្រាសាទបុរាណ ទីតំាងប្រវត្តិសាស្រ្ត ព្រមជាមួយនឹងគម្របធម្មជាតិពណ៌បៃតងខៀវខ្ចីនិងជីវចម្រុះដ៏សម្បូរបែប។ ថ្មីៗនេះ គេហទំព័រដ៏ល្បីមួយបានចាត់ថ្នាក់ ប្រទេសកម្ពុជា ថាជាទីតំាងដ៏ល្អឥតខ្ចោះសម្រាប់អ្នកស្រលាញ់ធម្មជាតិមកទស្សនាកម្សាន្ត។

យោងតាមការស្ទង់មតិពីគេហទំព័រ BookRetreats បានចាត់ថ្នាក់ប្រទេសទាំង១០ ដែលសម្បូរដោយទីតំាងធម្មជាតិដ៏ស្រស់ស្អាតបំផុតលើលោក សម្រាប់ភ្ញៀវទេសចរធ្វើដំណើរកម្សាន្តនាថ្ងៃឈប់សម្រាក ដោយជាមួយគ្នានោះ កម្ពុជាយើងឈរលើលេខរៀងទី ៩។

ចំណែកចំណាត់ថ្នាក់ទាំង ១០ នោះវិញគឺរួមមាន ចំណាត់ថ្នាក់១ ប្រទេសប្រេស៊ីល , ២ កូស្តារីកា , ៣ ប៉ាណាម៉ា , ៤ បូលីវី , ៥.ប្រទេសជប៉ុន ៦.ហ្វាំងឡង់ , ៧.ស៊ុយអែត ,៨.អាល្លឺម៉ង់ ,៩.កម្ពុជា និង ១០. អូទ្រីស។

សូមជម្រាបថា ប្រទេសកម្ពុជាគឺជាទឹកដីដ៏សម្បូរបែបនិងអំណោយផលដល់ធនធានធម្មជាតិ ដែលរួមមានទាំងសមុទ្រ ព្រៃ ភ្នំ ទន្លេបឹងបួរ ជីវចម្រុះ ព្រមជាមួយនឹងរមនីយដ្ឋានទាំងធម្មជាតិនិងកែច្នៃ ហើយកាន់តែអស្ចារ្យនោះគឺប្រាសាទបុរាណដែលបន្សល់ទុកពីបុព្វបុរសខ្មែរយ៉ាងច្រើនសន្ធឹកសន្ធាប់។ បើក្រឡេកទៅកាន់តំបន់ការពារធម្មជាតិនៅកម្ពុជាវិញ បានបែកចែកជា ៨ ប្រភេទ ដែលរួមមាន តំបន់ឧទ្យានជាតិ តំបន់ដែនជម្រកសត្វព្រៃ តំបន់ទេសភាព តំបន់ប្រើប្រាស់ច្រើនយ៉ាង តំបន់រ៉ាមសារ តំបន់ស្នូលនៃបឋនីយជីវមណ្ឌល តំបន់បេតិកភណ្ឌធម្មជាតិ តំបន់ឧទ្យានជាតិសមុទ្រ ជាមួយនឹងផ្ទៃដីនិងគម្របព្រៃឈើរាប់លានហិចតា៕

ព្រែកទាល់ដែលមានទីតាំងស្ថិតនៅឃុំកោះជីវាំង ស្រុកឯកភ្នំ ខេត្តបាត់ដំបង គឺជាតំបន់ជីវចម្រុះមួយក្នុងចំណោមបីរបស់បឹងទន្លេសាប ដែលបច្ចុប្បន្នបានកំពុងទាក់ទាញភ្ញៀវទេសចរគ្រប់ជាតិសាសន៍ឱ្យមកទស្សនានូវសត្វស្លាបចម្រុះ ទេសភាពបឹងទន្លេសាប ទេសភាពព្រៃលិចទឹក ភូមិអណ្តែតទឹក សហគមន៍នេសាទ និងសិប្បកម្មកែច្នៃកំប្លោកជាដើម។ សហគមន៍អេកូទេសចរណ៍ព្រែកទាល់ ជាប្រព័ន្ធបរិស្ថានធម្មជាតិមួយគ្មានពីរ និងជាដែនជម្រកសត្វស្លាបកម្រច្រើនប្រភេទ រស់នៅជាសំបុកបង្កើតបានទស្សនីយភាពគួរឱ្យចង់ទស្សនាបំផុត។

ដើម្បីធ្វើដំណើរទៅដល់សហគមន៍អេកូទេសចរព្រែកទាល់ ភ្ញៀវទេសចរត្រូវឆ្លងកាត់ ២ដំណាក់កាលគឺផ្លូវគោក និងផ្លូវទឹក ដោយភ្ញៀវត្រូវធ្វើដំណើរទៅកាន់កំពង់ផែចុងឃ្នាស ឬកំពង់ផែមេជ្រៃ ហើយត្រូវជួលទូកទៅកាន់ព្រែកទាល់។ នៅពេលទៅដល់លោកអ្នកនឹងបានឃើញជីវចម្រុះដ៏សម្បូរបែប រួមទាំងបក្សាបក្សីជាច្រើនប្រភេទប្រមូលផ្ដុំគ្នានៅរវាងពីខែធ្នូ ដល់ខែកុម្ភៈ បង្កើតបានជាទិដ្ឋភាពស្រស់ស្អាតបំផុត។ សម្រាប់ពេលវេលាដែលល្អក្នុងការទស្សនាសត្វនៅទីនេះ គឺពេលព្រឹកព្រលឹម និងពេលរសៀល។

ដូច្នេះបើភ្ញៀវទេសចរចង់ទស្សនាទិដ្ឋភាពដ៏អស្ចារ្យរបស់សត្វស្លាបទាំងនេះ អ្នកត្រូវតែចំណាយពេលមួយយប់ក្នុងការស្នាក់នៅក្នុងតំបន់ព្រែកទាល់។ នៅក្នុងសហគមន៍អេកូទេសចរណ៍ព្រែកទាល់ គឺមានផ្ទះស្នាក់សម្រាប់ភ្ញៀវទេសចរសម្រាកនៅទីនោះ រួមទាំងសេវាម្ហូបអាហារ និងភេសជ្ជៈ អ្នកដឹកភ្ញៀវតាមទូក និងកន្លែងលក់វត្ថុអនុស្សាវរីយ៍។ ហេតុនេះភ្ញៀវទេសចរអាចទិញវត្ថុអនុស្សាវរីយ៍ ដូចជាកាបូប និងសម្ភារៈប្រើប្រាស់ដែលធ្វើឡើងពីកំប្លោកផលិតដោយប្រជាពលរដ្ឋខ្មែរនៅក្នុងសហគមន៍បានផងដែរ។ ជាពិសេសនាពេលរសៀល ភ្ញៀវទេសចអាចគយគន់សម្រស់នៃព្រះអាទិត្យលិច និងអាចផ្តិតយកទេសភាពដ៏ស្រស់ស្អាតក្នុងសហគមន៍បានទៀតផង។

ក្រៅអំពីភាពទាក់ទាញទេសចរណ៍ដោយការទស្សនាសត្វស្លាប ភ្ញៀវទេសចរក៏អាចទទួលបានបទពិសោធន៍ល្អៗអំពីការទស្សនាទេសភាពបឹងទន្លសាបដ៏ធំល្វឹងល្វើយ ព្រៃលិចទឹក ព្រៃរនាម ភូមិបណ្តែតទឹករបស់ប្រជាជនជាង ១ ២០០ គ្រួសារ ជីវភាពរស់នៅរបស់ប្រជានេសាទសហគមន៍នេសាទ ការចិញ្ចឹមសត្វ និងវត្តទេសចរណ៍ដែលពាក់ព័ន្ធនឹងរឿងព្រេងបុរាណផងដែរ។ ដូច្នេះការទស្សនកិច្ចរបស់ភ្ញៀវទេសចរនៅតំបន់រ៉ាំសាព្រែកទាល់នេះ បានចូលរួមចំណែកយ៉ាងសំខាន់ក្នុងការលើកកម្ពស់កម្រិតជីវភាពរស់នៅរបស់ប្រជាជនក្នុងមូលដ្ឋាន ក៏ដូចជារួមចំណែកក្នុងការការពារអភិរក្សបរិស្ថានធម្មជាតិ និងលើកស្ទួយវិស័យអប់រំក្នុងមូលដ្ឋានផងដែរ៕