សហរដ្ឋអាមេរិក ៖ កាលពីថ្ងៃទី១៩ ខែវិច្ឆិកា ឆ្នាំ២០២៤ សារព័ត៌មាន BBC រាយការណ៍ថា មនុស្សជិតស្និទ្ធ និងអ្នកគាំទ្រលោក Donald Trump បានចេញមុខរិះគ.ន់ លោកប្រធានាធិបតី Joe Biden អនុញ្ញាតឱ្យអ៊ុយក្រែនបា.ញ់មីស៊ីលចម្ងាយឆ្ងាយវាយប្រ.ហារ រុស្ស៊ី ដែលធ្វើឱ្យខូចផែនការបញ្ចប់សង្គ្រា.ម នៅអ៊ុយក្រែន ។

ក្រោយព័ត៌មានចុះផ្សាយថា លោកប្រធានាធិបតីអាមេរិក Biden អនុញ្ញាតឱ្យអ៊ុយក្រែនបាញ់មីស៊ីលចម្ងាយឆ្ងាយវាយប្រហាររុស្ស៊ី បានធ្វើមនុស្សជិតស្និទ្ធ និងអ្នកគាំទ្រលោក Trump ពុំពេញចិត្តយ៉ាងខ្លាំង ខណៈលោក Trump បានឈ្នះឆ្នោត និងគ្រោងចូលកាន់តំណែងជាប្រធានាធិបតី នៅខែមករា ឆ្នាំ២០២៥ ។

លោក Donald Trump Jr. កូនប្រុសរបស់លោក Trump ដែលជាសមាជិកគណបក្ស Republican និយាយថា ៖ «ពួកគេចង់ឱ្យកើតសង្គ្រាមលោក លើកទី៣ មុនពេលឪពុករបស់ខ្ញុំអាចស្វែងរកសន្តិភាព និងជួយជីវិតមនុស្ស» ។

អ្នកស្រី Marjorie Taylor Greene សមាជិកសភា និងគាំទ្រលោក Trump បានរិះគន់លោក Biden ថា ៖ «ពលរដ្ឋពុំឯកភាពនឹងការសម្រេចចិត្តចុងក្រោយរបស់អាមេរិកទេ ហើយយើងពុំចង់ឱ្យអាមេរិកផ្តល់ប្រាក់ជួយសង្គ្រាមនៅក្រៅប្រទេស ។ យើងចង់ដោះស្រាយបញ្ហារបស់យើងនៅអាមេរិក» ។

រីឯលោក Fred Fleitz អតីតនាយកក្រុមប្រឹក្សាសន្តិសុខជាតិនិយាយថា លោក Biden កំពុងបំផ្លាញផែនការបញ្ចប់សង្គ្រាមរបស់លោក Trump ដោយសារអនុញ្ញាតឱ្យអ៊ុយក្រែនបាញ់មីស៊ីលដាក់រុស្ស៊ី ។ លោក Trump ចង់បញ្ឈប់ការបាញ់គ្នា និងចរចាដោយសន្តិវិធីយ៉ាងឆាប់រហ័ស ប៉ុន្តែវាបែរជាធ្វើឱ្យសង្គ្រាមកាន់តែក្តៅ ហើយរុស្ស៊ីពុំពេញចិត្ត ។ លោក Biden កំពុងបំផ្លាញការព្យាយាមកសាងសន្តិភាពរបស់លោក Trump ។

ចំណែកលោក Trump ពុំបាននិយាយអ្វីពាក់ព័ន្ធនឹងការផ្តល់មីស៊ីលទេ ប៉ុន្តែលោកធ្លាប់សន្យាជាមួយពលរដ្ឋក្នុងអំឡុងពេលរកសំឡេងឆ្នោតថា លោកនឹងបញ្ចប់សង្គ្រាមរវាងរុស្ស៊ី និងអ៊ុយក្រែនក្នុងរយៈពេលខ្លី ។ អាមេរិកបានចំណាយប្រាក់អស់រាប់លានដុល្លារដើម្បីជួយអ៊ុយក្រែន ហើយលោកនឹងយកប្រាក់បង់ពន្ធរបស់ពលរដ្ឋមកប្រើប្រាស់ដើម្បីឱ្យពលរដ្ឋមានជីវភាពល្អប្រសើរ ជាជាងផ្តល់ឱ្យអ៊ុយក្រែន ។

ដោយឡែក ពេលអ្នកសារព័ត៌មានសួរថា លោក Biden នឹងជិតអស់តំណែងជាប្រធានាធិបតីអាមេរិក ប៉ុន្តែហេតុអ្វីសម្រេចចិត្តឱ្យអ៊ុយក្រែនបាញ់មីស៊ីល? លោក Matthew Miller មន្ត្រីនាំពាក្យក្រសួងការបរទេសនិយាយថា យើងនឹងធ្វើអ្វីដែលជាប្រយោជន៍ពលរដ្ឋ បើរដ្ឋាភិបាលថ្មីមានគោលនយោបាយខុសពីនេះ យើងនឹងមានសិទ្ធិផ្លាស់ប្តូរ ៕

ប្រទេសអូស្ត្រាលី៖ វាជារឿងដ៏កម្រមួយ ដោយសារសត្វភេនឃ្វីនមិនងាយបង្ហាញខ្លួននៅទីប្រជុំជនក្នុងទីក្រុងនោះទេ ភាគច្រើនវាចូលចិត្ករស់នៅជាក្រុម ហើយបង្ហាញខ្លួនតែនៅតំបន់ទឹកកកអង់តាក់ទិកប៉ុណ្ណោះ។
ទោះជាយ៉ាងណាកាលពីពេលថ្មីៗនេះ មនុស្សម្នាជាច្រើនបានប្រទះឃើញសត្វភេនឃ្វីនដ៏កំសត់មួយក្បាល បានបង្ហាញខ្លួននៅលើវាលខ្សាច់ក្នុងទីក្រុងប្រទេសអូស្ត្រាលី ហើយពួកគេក៏បានជូនដំណឹងដល់អាជ្ញាធរមូលដ្ឋានភ្លាមៗ។

យោងតាមនាយកដ្ឋានជីវចម្រុះ និងការអភិរក្ស (DBCA) បានឱ្យដឹងថា សត្វនេះទំនងជាវង្វេងផ្លូវហើយ។ លោក Belinda Cannell អ្នកស្រាវជ្រាវនៅសាកលវិទ្យាល័យ Western Australia បាននិយាយថា ជាធម្មតា សត្វភេនឃ្វីនរស់នៅតំបន់ទឹកកកអង់តាក់ទិក ហើយកម្រទៅឆ្ងាយជាងព្រំដែនទឹកកកនៃសមុទ្រភាគខាងត្បូងរបស់ខ្លួនណាស់។ ប៉ុន្តែលោកសន្មត់ថា ដំណើរដ៏វែងឆ្ងាយរបស់សត្វនេះ ប្រហែលជាត្រូវបានជះឥទ្ធិពលដោយចរន្តទឹកសមុទ្រដែលសំបូរទៅដោយអាហារ ដែលនាំវាទៅកាន់គោលដៅដែលមិនធ្លាប់ស្គាល់។

ដំណើរដ៏មិនគួរឱ្យជឿរបស់អធិរាជភេនឃ្វីនបង្ហាញថា សត្វនេះអាចហែលជាមួយចរន្តទឹកសមុទ្រភាគខាងជើងដើម្បីស្វែងរកអាហារ ហើយបានបញ្ចប់ទៅឆ្ងាយជាងការរំពឹងទុក។ នៅពេលមនុស្សប្រទះឃើញវាដំបូង សត្វភេនឃ្វីនហាក់ដូចជាខ្វះអាហារូបត្ថម្ភ និងត្រូវការការថែទាំជាបន្ទាន់។ បច្ចុប្បន្ន Carol Biddulph ដែលជាអ្នកស្តារសត្វសមុទ្រក្នុងតំបន់បានយកវាទៅដាក់ក្នុងទ្រុងសុវត្ថិភាពដើម្បីរក្សាលំនឹងសុខភាពរបស់វា ហើយពួកគេនឹងនាំយកសត្វនេះទៅតំបន់ទឹកកកអង់តាក់ទិវិញ ក្នុងបរិយាកាសដែលសមស្របមួយ។

សត្វភេនឃ្វីនអធិរាជមានភាពល្បីល្បាញខ្លាំងដោយសារភាពរឹងប៉ឹង និងការស៊ូទ្រាំរបស់ពួកវានៅក្នុងបរិយាកាសដ៏អាក្រក់នៃអង់តាក់ទិក ដែលជាកន្លែងពួកវាបង្កាត់ពូជក្នុងរដូវរងារនៅសីតុណ្ហភាពក្រោមសូន្យ។ ការធ្វើដំណើរដ៏ឆ្ងាយបែបនេះពីតំបន់ទឹកកកអង់តាក់ទិកចូលមកដល់ទីក្រុងប្រទេសអូស្ត្រាលី គឺជាព្រឹត្តិការណ៍ដ៏អស្ចារ្យមួយ ដែលអាចផ្តល់ព័ត៌មានថ្មីអំពីគំរូនៃការធ្វើចំណាកស្រុករបស់សត្វភេនឃ្វីន តាមរយៈចរន្តទឹកសមុទ្រ និងផលប៉ះពាល់កាន់តែទូលំទូលាយនៃការប្រែប្រួលអាកាសធាតុជាមួយសត្វសមុទ្រ៕

អ្នកគាំទ្រកម្ពុជាមួយចំនួនបានសម្តែងការខកចិត្តនិងបានបញ្ចេញមតិរិះគន់ចាស់ដៃផងទៅកាន់ Rachel Gupta ដែលជា Miss Grand International 2024 បានយករឿងសណ្តែកដីដែល MGI និង MGC ផ្ទុះភាពចម្រូងចម្រាសជាមួយគ្នានិយាយឌឺដងមកប្រទេសកម្ពុជាទាំងពេលនៅខ្មែរនិយាយពេញៗមាត់ចូលចិត្ត វណ្ណដា ស្រលាញ់ខ្មែរ។ ហួសចិត្តនឹងបវរកញ្ញាឥណ្ឌារូបនេះពេកអ្នកគាំទ្របវរកញ្ញាផ្លែផ្កាឱ្យវិញថាសមហើយដែលជាម្ចាស់មកុដទាំងមូលទៅ Live លក់ប្រហុកទឹកត្រីបែបនេះសម្តីមិនសមជាបវរកញ្ញាសោះ។

ថ្មីៗនេះអ្នកលេងបណ្តាញសង្គមកម្ពុជាបានបញ្ចេញមតិប្រតិកម្មយ៉ាងខ្លាំងនិងមិនពេញចិត្តទៅកាន់ម្ចាស់មកុដ Miss Grand International 2024 Rachel បន្ទាប់ពីវីដេអូមួយបានចែករំលែកយ៉ាងផុសផុលនៅលើបណ្តាញសង្គម។ ក្នុងវីដេអូនោះគេបានឃើញ Rachel កំពុងញុំាសណ្តែកដីហើយឮសំឡេងរបស់អ្នកស្រី ថេរិសា សួរថាជាអ្វីនិងបានបង្រៀននាងឱ្យនិយាយជាភាសាថៃ។ អ្វីដែលធ្វើឱ្យអ្នកគាំទ្រហួសចិត្តនោះគឺម្ចាស់មកុដ MGI រូបនេះបានឌឺដងថាសណ្តែកដីនេះសម្រាប់នាងហៅថា ដ្រាម៉ាពីកឹៗ ដែលចង់សម្តៅមកប្រទេសកម្ពុជា។

ឃើញចរិតក្លែងក្លាយរបស់បវរកញ្ញាឥណ្ឌារូបនេះហើយអ្នកគាំទ្រកម្ពុជាពិតជាហួសចិត្តយ៉ាងខ្លាំងនិងបានរិះគន់នាងយ៉ាងចាស់ដៃព្រោះសម្តីសម្តៅនាងមិនសមជាបវរកញ្ញាជាម្ចាស់មកុដទាល់តែសោះ។ កាលពីប្រកួតនៅប្រទេសកម្ពុជា Miss Grand India រូបនេះនិយាយថានាងគឺជាហ្វេនម្នាក់របស់ វណ្ណដា ថែមទាំងមានបំណងចង់ជួប វណ្ណដា ទៀតផង។ មិនត្រឹមតែប៉ុណ្ណោះ Rachel គឺបង្ហាញការចូលចិត្តស្រលាញ់ប្រទេសកម្ពុជាយ៉ាងខ្លាំងសូម្បីតែថ្ងៃចាកចេញទៅប្រទេសថៃនាងក៏បង្ហាញការអាឡោះអាល័យដែរ។

ភាពផ្លាស់ប្តូររបស់ Rachel ទាំងរឿងស្ងប់ស្ងាត់ទៅហើយនេះបានធ្វើឱ្យអ្នកគាំទ្រកម្ពុជាដែលធ្លាប់ស្រលាញ់នាងសម្តែងការខកចិត្តយ៉ាងខ្លាំងសូម្បីតែ គីមគីម ដែលជាក្រុមការងារក៏ហួសចិត្តឈឺជាងសង្សារសុំបែកទៅទៀតដែលនាងខំសរសើរបវរកញ្ញារូបនេះថាអត្តចរិតល្អតែក្លែងក្លាយញាក់សាច់។ អ្នកលេងបណ្តាញសង្គមខ្លះក៏បានលើកឡើងដែរថាអត្តចរិតបែបនេះហើយបានជាម្ចាស់មកុដទាំងមូលលោក ណាវ៉ាត់ ឱ្យអង្គុយ Live លក់ប្រហុក លក់ទឹកត្រីបែបនេះ៕

ប្រទេសអេហ្ស៊ីប ៖ កាលពីថ្ងៃទី១៩ ខែវិច្ឆិកា ឆ្នាំ២០២៤ សារព័ត៌មាន Reuters រាយការណ៍ថា យុវជនឈ្មោះ Omar Nok អ្នកធ្វើដំណើរផ្សងព្រេងនៅប្រទេសអេហ្ស៊ីប និងមានឈ្មោះល្បីល្បាញក្នុងបណ្តាញសង្គម បានធ្វើដំណើរទៅដល់ប្រទេសជប៉ុនដោយជោគជ័យ ។ យុវជនរូបនេះបានកំណត់គោលដៅទៅជប៉ុនដោយពុំជិះយន្តហោះ ក្នុងចម្ងាយផ្លូវសរុប ៤៦,២៣៩គីឡូម៉ែត្រ និងចំណាយពេលអស់២៧៤ថ្ងៃ ។

លោក Omar មានអាយុ៣០ឆ្នាំ និងមានអ្នកតាមដានក្នុង Instagram រហូតដល់ជាង៧៥ម៉ឺននាក់ បានបង្ហោះរូបភាពជោគជ័យរបស់ខ្លួន ក្រោយពីបានធ្វើដំណើរឆ្លងកាត់ជាង១០ប្រទេសដើម្បីទៅដល់ជប៉ុន តាមការតាំងចិត្តដោយពុំជិះយន្តហោះ ។ លោកធ្វើដំណើរតាមរថយន្ត, ម៉ូតូ, នាវា, ជិះសត្វអូដ្ឋ និងសេះ រហូតដល់គោលដៅ បើប្រៀបធៀបជាមួយការជិះយន្តហោះពីទីក្រុងឃៃរ៉ូ ប្រទេសអេហ្ស៊ីប ទៅកាន់ទីក្រុងតូក្យូ ប្រទេសជប៉ុន គឺចំណាយពេលតែ១២ម៉ោងប៉ុណ្ណោះ ។

លោកបានថតរូបភាពជាបន្តបន្ទាប់ក្នុងអំឡុងពេលធ្វើដំណើរ ចាប់ពីទីក្រុងឃៃរ៉ូ រហូតដល់ទីក្រុងតូក្យូ ក្នុងចម្ងាយផ្លូវសរុប ៤៦,២៣៩គីឡូម៉ែត្រ ។ លោកប្រាប់ថា ជប៉ុន គឺជាគោលដៅឆ្ងាយបំផុតដែលលោកបានធ្វើដំណើរមកដល់ក្នុងតំបន់អាស៊ី ដោយពុំចាំបាច់ជិះយន្តហោះ ហើយលោកធ្វើដំណើរតាមនាវាមកដល់ទីក្រុង Fukuoka កាលពីខែតុលា ឆ្នាំ២០២៤ បន្ទាប់មក ក៏ធ្វើដំណើរមកទីក្រុងតូក្យូ ។

កន្លងមក លោកធ្លាប់ធ្វើដំណើរផ្លូវឆ្ងាយក្នុងតំបន់អឺរ៉ុប និងអាមេរិក ប៉ុន្តែពុំធ្លាប់ធ្វើដំណើរឆ្ងាយបែបនេះទេ ។ ការធ្វើដំណើរថ្ងៃដំបូងពិបាកបំផុត ក្រោយពីឪពុករបស់លោកនាំមកកំពង់ផែសមុទ្រក្រហមនៅទីក្រុង Safaga ភាគខាងត្បូងអេហ្ស៊ីប ដើម្បីជិះនាវាទៅអារ៉ាប៊ីសាអូឌីត គឺលោកបារម្ភថា ពុំអាចនិយាយភាសាបរទេសបានពេលទៅដល់អាស៊ីកណ្តាល និងគ្មានភ្ញៀវទេសចរច្រើន ។ ប៉ុន្តែដោយសារការលើកទឹកចិត្តពីឪពុក លោកក៏សម្រេចចិត្តជិះនាវា និងធ្វើដំណើរបន្ត ។

លោកបានឆ្លងកាត់ Mecca ជាទីក្រុងរបស់សាសនាឥស្លាម រួចហើយធ្វើដំណើរកាត់តាមវាលខ្សាច់ប្រទេសអ៊ីរ៉ង់មកដល់រុស្ស៊ី ឆ្លងកាត់ជួរភ្នំថាជិគីស្ថាន ។ លោកបានឆ្លងកាត់តំបន់ខ្លះរបស់ប្រទេសកៀហ្ស៊ីស៊ីស្ថាន និងកាហ្សាក់ស្ថាន ដោយជិះសត្វអូដ្ឋ និងសេះ ។

លោកធ្លាប់ធ្វើការផ្នែកវិភាគហិរញ្ញវត្ថុរបស់ Amazon ប្រទេសអាល្លឺម៉ង់ និងលុចសំបួរ ហើយលោកបានចាយវាយប្រាក់សន្សំសម្រាប់ការធ្វើដំណើរលើកនេះ ។ លោកបានចំណាយប្រាក់ចំនួន២៥ដុល្លារអាមេរិកក្នុង១ថ្ងៃ រីឯការធ្វើដំណើរកាត់តាមប្រទេសអាហ្វហ្គានីស្ថាន មានរយៈពេល២សប្តាហ៍ គឺចំណាយប្រាក់អស់តែ៨៨ដុល្លារប៉ុណ្ណោះ ។

ការធ្វើដំណើរតាមផ្លូវដ៏វែងឆ្ងាយនេះ លោកពុំអារម្មណ៍ពីគ្រោះថ្នាក់ទេ ពីព្រោះតែងតែមានមនុស្សពុំស្គាល់គ្នាជួយជានិច្ច ។ ពួកគេចិត្តល្អ ហើយលោកមានទំនុកចិត្តថា សន្តិភាពនឹងកើតឡើងនៅលើពិភពលោក ៕