អ្នកគាំទ្រជ្រាបមកហើយថាថ្មីៗនេះ វណ្ណដា និង វណ្ណថាន បានបង្កើតប្រវត្តិសាស្រ្តជាមួយគ្នាលើកដំបូងទៅលើបទ កំលោះស្រុកខ្មែរ ដែលមានការស្តាប់ដល់ទៅ១០០លានដងនៅលើយូធូប។ សមិទ្ធផលដ៏ជោគជ័យនេះតារាចម្រៀង វណ្ណថាន ថាលោកនឹងខិតខំបន្តទៀតដើម្បីឱ្យតន្រ្តីខ្មែរកាន់តែល្បីល្បាញ។
នៅល្ងាចថ្ងៃទី១៨ ខែវិច្ឆិកា លោក វណ្ណថាន បានបង្ហោះPoster អបអរបទ កំលោះស្រុកខ្មែរ មានការស្តាប់១០០លានដងអមដោយអារម្មណ៍រំភើបចិត្តថា«១០០ លានទស្សនា ជាដំបូងខ្ញុំសូមអរគុណទៅកាន់ពុកម៉ែបងប្អូនអ្នកគាំទ្រទាំងអស់សម្រាប់កាដូដ៏ធំមួយនេះ។
ចំនួនទស្សនានេះជាសមិទ្ធផលធំជាងគេបង្អស់ដែលខ្ញុំទទួលបានតាំងពីចាប់អាជីពសិល្បៈនេះមក ហើយដោយសារតែការគាំទ្ររបស់អ្នកទាំងអស់គ្នា ទើបអាចជំរុញភាពច្នៃប្រឌិតរបស់ខ្ញុំឱ្យកាន់តែកើនខ្ពស់ឡើងកម្រិតថែមទៀតពីមួយថ្ងៃទៅមួយថ្ងៃ»។
តារាចម្រៀងរូបនេះបានឱ្យដឹងថាដំបូងឡើងលោកមិននឹកស្មានថាបទនេះនឹងទទួលបានការស្រលាញ់ចូលចិត្តច្រើនខ្លាំងយ៉ាងនេះនោះទេ។ «រម្លឹកបន្តិចទៅកាលពេលចេញបទនេះដំបូងមិននឹកស្មានថាអ្នកទាំងអស់គ្នានឹងស្រលាញ់ចូលចិត្តខ្លាំងបែបនេះទេ ហើយខ្ញុំសប្បាយចិត្តមែនទែនដែលខ្ញុំ និងវណ្ណដាអាចផលិតចេញជាបទចូលឆ្នាំមួយជូនបងប្អូនខ្មែរយើងបានរាំលេងសប្បាយទាំងអស់គ្នាមិនថាអ្នកទាំងអស់គ្នានៅក្នុងស្រុក ឬក្រៅស្រុក»។
លោក វណ្ណថាន ថា«សមិទ្ធផលដ៏អស្ចារ្យមួយនេះខ្ញុំនឹងខិតខំបន្តទៀតដើម្បីឱ្យតន្ត្រីខ្មែរយើងកាន់តែល្បីល្បាញ»។
គួរឱ្យដឹងថាបទ «កំលោះស្រុកខ្មែរ» ពីតារាចម្រៀងរ៉េប វណ្ណដា និង វណ្ណថាន ទទួលបានសមិទ្ធផលដ៏ជោគជ័យមានការស្តាប់លើសពី១០០លានដង បន្ទាប់ពីចាយពេល១ឆ្នាំ៧ខែនិងជាង១០ថ្ងៃ។ នេះជាប្រវត្តិសាស្រ្តលើកដំបូងសម្រាប់ វណ្ណថាន មានបទចម្រៀង១០០M ខណៈជាលើកទី២ សម្រាប់ វណ្ណដា បន្ទាប់ពីបទ «Time To Rise» ៕
