ដើម Manchineel ត្រូវបានសៀវភៅកំណត់ត្រាពិភពលោក Guinness ទទួលស្គាល់ថាជា “ដើមឈើគ្រោះ.ថ្នាក់បំផុតក្នុងពិភពលោក” ដោយសារវាផ្ទុកនូវសារធាតុពុលដ៏សាហាវនៅគ្រប់ផ្នែកទាំងអស់។ ដើម manchineel ច្រើនដុះនៅទីក្រុង Caribbean, Bahamas, ឈូងសមុទ្រម៉ិកស៊ិក, កោះ Galápagos និងកន្លែងជាច្រើនទៀតនៅរដ្ឋ Florida សហរដ្ឋអាមេរិក។ នេះបើយោងតាមសារព័ត៌មានបរទេស IFL Science បានឱ្យដឹងថា ដើមឈើ manchineel គឺពិតជាមានជាតិពុលសាហាវខ្លាំងណាស់ សូម្បីតែការប៉ះស្លឹកឈើរបស់វា ក៏អាចបង្កឱ្យមានការរលាកដោយជាតិគីមីធ្ងន់ធ្ងរផងដែរ។

រីឯផ្លែរបស់វាមានរសជាតិផ្អែម និងក្លិនក្រអូប ទោះជាយ៉ាងណាអ្នកមិនគួរញ៉ាំវាទេ ព្រោះវានឹងបណ្តាលឱ្យក្អួតចង្អោរ រាគ និងប្រកាច់។ អ្នកឯកទេសខាងវិទ្យុសកម្មលោកស្រី Nicola Strickland ធ្លាប់បានប្រាប់ពីការប្រទះឃើញដើមឈើ manchineel ពេលកំពុងសម្រាកនៅ Tobago ។ លោកស្រីបាននិយាយថា មិត្តរបស់គាត់ច្រឡំបេះផ្លែមួយប្រភេទនេះញ៉ាំ មិនយូរប៉ុន្មានពួកគេក៏ចាប់ផ្តើមពិបាកដកដង្ហើមដោយសារស្ទះផ្លូវដង្ហើម។ ទន្ទឹមនឹងនោះ ពួកគេមានការឈឺចាប់យ៉ាងខ្លាំងនៅក ដោយសារជាតិពុលចូលទៅក្នុងកូនកណ្តុរ។

ទោះជាយ៉ាងណា មិត្តភ័ក្តិរបស់គាត់មិនមានគ្រោះថ្នាក់នោះទេ ដោយសារពួកគេបានញ៉ាំផ្លែឈើនេះតែបន្តិចប៉ុណ្ណោះ មិនដល់មួយផ្លែផង។ គួរបញ្ជាក់ដែរថា អ្នកដែលញ៉ាំផ្លែឈើ manchineel ច្រើនក្នុងពេលតែមួយ អាចមានរោគសញ្ញាធ្ងន់ធ្ងរជាងនេះដូចជា ចង្វាក់បេះដូងទាប ហើមបំពង់ក ដែលអាចត្រូវការបំពង់ខ្យល់ ការហូរឈាមក្រពះពោះវៀន និងការបាត់បង់ជីវិត។ ទោះបីជាអ្នកមិនបរិភោគផ្លែឈើនេះក៏ដោយ ក៏ដើម និងស្លឹក manchineel អាចបង្កឱ្យមានការរលាកដោយជាតិគីមីធ្ងន់ធ្ងរផងដែរ។

ការសិក្សាឆ្នាំ ២០១១ បានរៀបរាប់លម្អិតអំពីអ្វីដែលបានកើតឡើងចំពោះសិស្សមួយក្រុមដែលបានជ្រកភ្លៀងនៅក្រោមដើមឈើ manchineel នៅលើកោះ Bequia ក្នុងភាគខាងលិចប្រទេសឥណ្ឌា ហើយបានវិវត្តន៍ទៅជាជំងឺរលាកស្បែក និងរលាកភ្នែក។ ដើមឈើ manchineel ដុះលូតលាស់ដល់កម្ពស់ ១៥ ម៉ែត្រ មានមែកធំៗជាច្រើន សំបកពណ៌បៃតង និងផ្កាតូចៗពណ៌លឿង ដែលមើលទៅដូចជាដើមឈើធម្មតា ប៉ុន្តែដើមឈើមួយប្រភេទនេះពិតជាគ្រោះ.ថ្នាក់ខ្លាំងណាស់៕

សហរដ្ឋអាមេរិក៖ ថ្មីៗនេះក្រុមហ៊ុន Coca-Cola បានបង្កឱ្យមានភាពចម្រូងចម្រាសយ៉ាងខ្លាំង ជាមួយនឹងការផ្សាយពាណិជ្ជកម្មដោយប្រើ AI ជាបន្តបន្ទាប់។

Coca-Cola គឺជាក្រុមហ៊ុនដ៏ធំ និងល្បីល្បាញបំផុតទូទាំងពិភពលោក តែងតែផ្សព្វផ្សាយប្រមូតផលិតផលរបស់ខ្លួននៅថ្ងៃបុណ្យណូអែល ដែលយុទ្ធនាការផ្សាយពាណិជ្ជកម្មរបស់ក្រុមហ៊ុនភាគច្រើនផ្តោតទៅលើ ការជួបជុំគ្រួសារដ៏កក់ក្តៅ វេទមន្ត និងការរួមគ្នា។

ទោះជាយ៉ាងណាក្នុងរដូវកាលបុណ្យណូអែលនេះ ក្រុមហ៊ុន Coca-Cola បានកំពុងរងការរិះគន់យ៉ាងចាស់ដៃចំពោះការប្រើប្រាស់ AI ដើម្បីផលិតវីដេអូផ្សព្វផ្សាយជាបន្តបន្ទាប់ ខណៈក្រុមហ៊ុននេះគឺជាក្រុមហ៊ុនភេសជ្ជៈឈានមុខគេ បែរជាផលិតវីដេអូ AI ទាំងស្រុងទៅវិញ។ យើងដឹងហើយថា បច្ចុប្បន្ន AI គឺមានការពេញនិយមខ្លាំងណាស់ ប៉ុន្តែសម្រាប់អាជីវកម្មតូចតាច គេប្រើវាដើម្បីអស់ថវិការតិច ចំណែក Coca-Cola ដែលជាក្រុមហ៊ុនធំ ស្រាប់តែប្រើ AI ដែរ ហើយចុះបុគ្គលិក និងតារាល្បីៗជាច្រើននាក់ទៀត មិនជួលមកផ្សាយពាណិជ្ជកម្មទៅ?

លើសពីនេះវីដេអូ AI ដែលក្រុមហ៊ុនបានចាក់ផ្សាយនៅលើ YouTube គឺជាវីដេអូកាលពីឆ្នាំ ១៩៩៥ ដែលក្រុមហ៊ុនយកមករំលឹកឡើងវិញ ផលិតជាវីដេអូ AI ចាក់ផ្សាយម្តងទៀត ដែលនេះធ្វើឱ្យមនុស្សជាច្រើនមានការមិនពេញចិត្ត។ អ្នកទាំងនោះបានរិះគន់ថា វីដេអូនេះកន្លងផុតយូរហើយ បច្ចុប្បន្នមានវីដេអូថ្មីៗជាច្រើនដែលត្រូវបង្ហាញ ហេតុអ្វីបានជាក្រុមហ៊ុនមិនមានការអាប់ដេតអ៊ីចឹង?

អ្នកខ្លះថា ការផលិតជាវីដេអូ AI ហាក់មិនមានភាពទាន់សម័យ និងគ្មានភាពទាក់ទាញសោះ។ អ្នកខ្លះទៀតក៏ថា ក្រុមហ៊ុនមិនឱ្យតម្លៃមនុស្ស បែរជាឱ្យតម្លៃ AI ជាង មានន័យថា បច្ចេកវិទ្យាថ្មីទាញយកអត្ថប្រយោជន៍ពីផលិតផលដែលមានស្រាប់ដើម្បីសំយោគអ្វីដែលថ្មី ហើយនោះមិនមែនជាការច្នៃប្រឌិតនោះទេ។

ទោះយ៉ាងណាក៏ដោយ នេះមិនមែនជាលើកទីមួយទេ ដែល Coca-Cola បានអនុវត្ត AI ក្នុងការផ្សាយពាណិជ្ជកម្ម។ កាលពីឆ្នាំមុន ក្រុមហ៊ុន Coca-Cola បានសហការជាមួយ OpenAI និងបានចេញវីដេអូខ្លីមួយដែលមានចំណងជើងថា “Masterpiece” ហើយទទួលបានការសរសើរជាច្រើនសម្រាប់ទាំងខ្លឹមសារដែលបានបញ្ជូន និងបច្ចេកទេសដែលបានប្រើប្រាស់៕

សហរដ្ឋអាមេរិក៖ មេដឹកនាំនៃនាយកដ្ឋានប្រសិទ្ធភាពរដ្ឋាភិបាលថ្មីគឺលោក Elon Musk និងលោក Vivek Ramaswamy បានចែករំលែកទស្សនៈរបស់ពួកគេសម្រាប់ផែនការកាត់បន្ថយបុគ្គលិកមន្ត្រីរាជការរាប់ពាន់នាក់។

នៅក្នុងកាសែត Wall Street Journal op-ed ដែលចេញផ្សាយកាលពីថ្ងៃទី ២០ ខែវិច្ឆិកា លោក Musk និង Ramaswamy បាននិយាយថា ពួកគេនឹងសហការជាមួយការិយាល័យគ្រប់គ្រង និងទីភ្នាក់ងារផ្សេងទៀត ហើយនឹងជូនដំណឹងដល់លោក Trump អំពីការគ្រប់គ្រង និងការកាត់បន្ថយចំណាយរដ្ឋបាល ដែលនេះនឹងនាំឱ្យមានការបញ្ឈប់ការងារនៅទូទាំងភ្នាក់ងារសហព័ន្ធអាមេរិក។

ដូច្នេះអ្នកទាំងពីរនឹងធ្វើការជាមួយភ្នាក់ងារពាក់ព័ន្ធដើម្បីកំណត់ចំនួនបុគ្គលិកអប្បបរមាដែលត្រូវការនៅក្នុងទីភ្នាក់ងារណាមួយ ដើម្បីឱ្យនាយកដ្ឋានអាចបំពេញមុខងារដែលមានការអនុញ្ញាតតាមរដ្ឋធម្មនុញ្ញ និងស្របតាមច្បាប់។ ប្រធាននាយកដ្ឋានទាំងពីររូបនេះ ក៏បានបន្ថែមទៀតថាចំនួនបុគ្គលិកដែលត្រូវបានកាត់បន្ថយត្រូវតែស្មើនឹងចំនួនបទប្បញ្ញត្តិរបស់សហព័ន្ធដែលលោក Trump បានលុបចោល។ លើសពីនេះ បុគ្គលិកដែលត្រូវបានស្នើសុំឱ្យចាកចេញ ត្រូវតែគោរពតាមច្បាប់របស់ពួកគេ ហើយគោលដៅរបស់ពួកគេ គឺដើម្បីផ្លាស់ប្តូរបុគ្គលិកមន្ត្រីរាជការទៅកាន់វិស័យឯកជន។

ប្រធានាធិបតីអាចប្រើប្រាស់ច្បាប់ដែលមានស្រាប់ ដើម្បីលើកទឹកចិត្តដល់ការចូលនិវត្តន៍មុនកាលកំណត់សម្រាប់បុគ្គលិកសហព័ន្ធមួយចំនួន និងអនុវត្តការបង់ប្រាក់ផ្តាច់មុខដោយស្ម័គ្រចិត្តដើម្បីជួយសម្រួលដល់ពួកគេ។ មេដឹកនាំទាំងពីរក៏បានស្នើគំនិតដែលតម្រូវឱ្យបុគ្គលិកទីភ្នាក់ងារសហព័ន្ធមកការិយាល័យ ៥ ថ្ងៃក្នុងមួយសប្តាហ៍ផងដែរ។ នេះអាចបណ្តាលឱ្យមាន “រលក” នៃការបញ្ចប់កិច្ចសន្យាដោយស្ម័គ្រចិត្តពីមនុស្សមួយចំនួន។ ទោះជាយ៉ាងណាក៏ដោយ ច្បាប់នេះនឹងមិនមានសិទ្ធិអំណាចឯករាជ្យដើម្បីធ្វើការសម្រេចចិត្តលើការកាត់បន្ថយការចំណាយនោះទេ។

មានន័យថា ការផ្លាស់ប្តូរកម្មវិធីជាច្រើន រួមទាំងកម្មវិធីចាំបាច់ដូចជា សន្តិសុខសង្គម និង Medicare នឹងត្រូវការការយល់ព្រមពីសភាជាមុនសិន។ គួរបញ្ជាក់ដែរថា កាលពីដើមខែនេះប្រធានាធិបតីជាប់ឆ្នោត Donald Trump បានប្រកាសថាមហាសេដ្ឋី Elon Musk និង Vivek Ramaswamy នឹងដឹកនាំ “នាយកដ្ឋានប្រសិទ្ធភាពរដ្ឋាភិបាល” ថ្មីរបស់សហរដ្ឋអាមេរិក។ តួនាទីនេះនឹងត្រួសត្រាយផ្លូវសម្រាប់រដ្ឋបាល ក្នុងការរុះរើប្រព័ន្ធការិយាធិបតេយ្យរបស់រដ្ឋាភិបាល កាត់បន្ថយបទប្បញ្ញត្តិដែលលែងត្រូវការតទៅទៀត ក៏ដូចជាកាត់បន្ថយការចំណាយខ្ជះខ្ជាយ និងរៀបចំរចនាសម្ព័ន្ធទីភ្នាក់ងារសហព័ន្ធឡើងវិញ ដែលមានសារៈសំខាន់សម្រាប់ចលនា “Save America”៕