ប្រទេសកូរ៉េខាងត្បូង ៖ ព្យុះព្រិលបានធ្លាក់យ៉ាងខ្លាំងនៅទីក្រុងសេអ៊ូល ប្រទេសកូរ៉េខាងត្បូង ហើយវាធ្លាក់ខ្លាំងបំផុតក្នុងរយៈពេលជាង៥០ឆ្នាំកន្លងមក ដែលបណ្តាលឱ្យជើងហោះហើររាប់រយប្រកាសផ្អាកដឹកអ្នកដំណើរ និងរង់ចាំឱ្យស្ថានការណ៍ស្ងប់ស្ងាត់ ។ នេះបើតាមការចុះផ្សាយរបស់សារព័ត៌មានបរទេស កាលពីថ្ងៃទី២៧ ខែវិច្ឆិកា ឆ្នាំ២០២៤ ។

សារព័ត៌មាន AP រាយការណ៍ថា ព្រិលបានគ្របដណ្តប់លើទីក្រុងសេអ៊ូលរបស់កូរ៉េខាងត្បូង ហើយគេចាត់ទុកថា វាជាព្យុះព្រិលខ្លាំងក្លាបំផុត បើធៀបនឹងរយៈពេលរាប់សិបឆ្នាំមកនេះ ។ ព្រិលធ្លាក់ជាច្រើនថ្ងៃបណ្តាលឱ្យប៉ះពាល់ដល់ជើងហោះហើរនានាត្រូវប្រកាសផ្អាកដឹកអ្នកដំណើរបណ្តោះអាសន្ន ហើយវាក៏ប៉ះពាល់ដល់ការធ្វើចរាចរណ៍តាមផ្លូវគោកផងដែរ ។

មន្ត្រីឧតុនិយមកូរ៉េខាងត្បូងឱ្យដឹងថា ព្រិលបានធ្លាក់នៅតំបន់ខាងជើងរបស់ទីក្រុងសេអ៊ូល ព្រមទាំងតំបន់នៅជុំវិញ ដែលព្រិលមានកម្ពស់រហូតដល់២០សង់ទីម៉ែត្រ ។ វាជាព្យុះព្រិលខ្លាំងបំផុតនៅសេអ៊ូល ដែលទីក្រុងនេះធ្លាប់មានព្រិលធ្លាក់ខ្លាំងកាលពី៥២ឆ្នាំមុន ឬតាំងពីថ្ងៃទី២៨ ខែវិច្ឆិកា ឆ្នាំ១៩៧២ ដែលពេលនោះ ព្រិលបានធ្លាក់កម្ពស់១២សង់ទីម៉ែត្រ ។

នៅឆ្នាំ២០២៤ ព្រិលនៅតែបន្តធ្លាក់ក្នុងតំបន់ជាច្រើនទៀតរបស់កូរ៉េខាងត្បូង ដែលធ្វើឱ្យភាគកណ្តាល, ខាងកើត និងនិរតី មានព្រិលកម្ពស់ចាប់ពី១០សង់ទីម៉ែត្រ ទៅ២៣សង់ទីម៉ែត្រ ។ ផលប៉ះពាល់ដោយសារព្យុះព្រិលលើកនេះ ធ្វើឱ្យពលរដ្ឋកូរ៉េខាងត្បូងស្លាប់ម្នាក់ និងរងរបួស៤នាក់ ក្នុងហេតុការណ៍រថយន្ត៥គ្រឿងបុកគ្នាតាមផ្លូវក្នុងទីក្រុង Hongcheon ភាគខាងកើតប្រទេស ។

លើសពីនេះ វាធ្វើឱ្យជើងហោះហើរយ៉ាងហោចណាស់ ២២០ជើងនៅអាកាសយានដ្ឋានទូទាំងប្រទេសត្រូវលុបចោលការហោះហើរ ឬយឺតយ៉ាវ ។ ក្រៅពីនេះ អាជ្ញាធរបានបញ្ជាឱ្យនាវាដឹកអ្នកដំណើរ ប្រមាណ៩០គ្រឿងផ្អាកបណ្តោះអាសន្ន ព្រមទាំងបិទផ្លូវធ្វើដំណើរក្នុងព្រៃជាច្រើនកន្លែង ។

ពលរដ្ឋរស់នៅទីក្រុងសេអ៊ូល ពិបាកធ្វើដំណើរនៅតាមផ្លូវយ៉ាងខ្លាំង ជាពិសេស នាពេលព្រឹក ដោយសារគ្របដណ្តប់ដោយទឹកកក ។ រីឯភ្នាក់ងារសង្គ្រោះបន្ទាន់នៅទូទាំងប្រទេសបានប្រកាសឱ្យពលរដ្ឋប្រយ័ត្នគ្រោះថ្នាក់បណ្តាលមកពីដើមឈើ និងស្លាកសញ្ញាផ្សេងៗបាក់តាមផ្លូវ ៕

ប្រទេសថៃ ៖ កាលពីថ្ងៃទី២៧ ខែវិច្ឆិកា ឆ្នាំ២០២៤ សារព័ត៌មានថៃរាយការណ៍ថា ស្ថានការណ៍នៅព្រំដែនខេត្តមេហុងសន ជាប់ប្រទេសមីយ៉ាន់ម៉ាកំពុងតែតានតឹងខ្លាំង ក្រោយពីកងទ័ពជើងគោកថៃប្រាប់ឱ្យកងទ័ពជនជា.តិភា.គតិចមីយ៉ាន់ម៉ា «វ៉ាក្រហម» ឬ UWSA (United Wa State Army) ដកថយចេញពីទឹកដីថៃ នៅទល់មុខស្រុកប៉ាយ ខេត្តមេហុងសន ប៉ុន្តែពួកគេពុំព្រមដកថយ និងប្រកាសសង្គ្រា.មជាមួយថៃ ។

ក្រសួងការបរទេសថៃបានបញ្ជាឱ្យកងទ័ពជើងគោកត្រៀមកម្លាំង និងអាវុធ ដើម្បីការពារអធិបតេយ្យភាពទឹកដីខេត្តមេហុងសន នៅភាគខាងជើង ក្រោយពីមានសេចក្តីរាយការណ៍ថា កងទ័ពវ៉ាក្រហម មកបោះទីតាំងលើទឹកដីថៃ ។ កងទ័ពវ៉ាក្រហម ពុំបានដកថយចេញពីតំបន់នេះទេ ហើយថែមទាំងប្រកាសថា ពួកគេត្រៀមខ្លួនធ្វើសង្គ្រាមជាមួយប្រទេសថៃ ។

តាមប្រភពព័ត៌មានពីមន្ត្រីកងទ័ពជាន់ខ្ពស់របស់កងកម្លាំងសង្គ្រោះជាតិរដ្ឋឆាន និយាយថា ស្ថានការណ៍នៅព្រំដែនថៃបរិវេណដយណងលួង និងដយហ៊ួម៉ា នៅទល់មុខស្រុកប៉ាយ ខេត្តមេហុងសន កំពុងតានតឹងយ៉ាងខ្លាំង ។ កងទ័ពវ៉ាក្រហមក្នុងតំបន់បានខៃលួង បានបន្ថែមកម្លាំងទ័ព ព្រមទាំងអាវុធកាន់តែច្រើនចូលមកតំបន់ដយហ៊ួម៉ា និងតំបន់ផ្សេងទៀត ក្រោយពីកងទ័ពជើងគោកថៃប្រាប់ឱ្យពួកគេដយថយចេញពីទឹកដីថៃ ។

កាលពីថ្ងៃទី១៨ ដល់ថ្ងៃទី១៩ ខែវិច្ឆិកា កន្លងមក សមាជិកកងទ័ពវ៉ាក្រហម ចំនួន៦នាក់ បានមកជួបជាមួយអាជ្ញាធរស្រុកមឿង ខេត្តឈៀងម៉ៃ ដើម្បីពិភាក្សាអំពីបញ្ហាថ្នាំញៀន និងការចូលទឹកដីថៃរបស់កងទ័ពវ៉ាក្រហម ក្នុងតំបន់ដយហ៊ួម៉ា និងតំបន់ក្បែរគ្នា ។ រីឯភាគីថៃបានស្នើឱ្យពួកគេដកទ័ពចេញពីទឹកដីថៃ ហើយសមាជិកកងទ័ពវ៉ាក្រហម ក៏បានយកសំណើរបស់ថៃទៅរាយការណ៍ប្រាប់មេបញ្ជាការនៅទីក្រុងប៉ាងសាង ហើយពួកគេនឹងឆ្លើយតបវិញ ក្នុងរយៈពេល៣០ថ្ងៃ ។

កងទ័ពវ៉ាក្រហម បានដំឡើងកាំភ្លើងធំនៅលើទឹកដីថៃជាច្រើនកន្លែង និងត្រៀមបាញ់កាំភ្លើងធំ ករណីថៃបញ្ជាឱ្យពួកគេដកថយចេញពីតំបន់ ។ កងទ័ពវ៉ាក្រហម បាននិយាយមកកាន់សារព័ត៌មានបរទេសថា ពួកគេនឹងពុំព្រមដកទ័ពចេញតាមការស្នើសុំរបស់កងទ័ពថៃឡើយ ពីព្រោះតំបន់ដែលពួកគេឈរជើងនេះ ពុំមែនជាទឹកដីថៃ និងក៏ពុំមែនជាតំបន់គ្រប់គ្រងរបស់មីយ៉ាន់ម៉ាដែរ ។

ហេតុនេះ អ្នកណាក៏ដោយដែលស្នើឱ្យដកទ័ពចេញពីតំបន់ ពួកគេពុំព្រមជាដាច់ខាត ពីព្រោះពួកគេគ្រាន់តែមានតួនាទីការពារអធិបតេយ្យភាពរបស់ខ្លួនប៉ុណ្ណោះ ។ ប្រទេសថៃពុំគួរដាក់សម្ពាធមកលើកងទ័ពវ៉ាក្រហមទេ ពួកគេពុំបានឈ្លានពានទឹកដីថៃសូម្បីតែ១ចំអាម ហើយបើថៃនៅតែរុករានចូលតំបន់នេះ ពួកគេនឹងតទល់វិញ ។

គួរបញ្ជាក់ថា ប្រទេសថៃបានចរចាជាមួយកងទ័ពវ៉ាក្រហម ឱ្យដកថយចេញពីតំបន់ជម្លោះអស់រយៈពេលជាង១០ឆ្នាំមកហើយ ប៉ុន្តែកងទ័ពវ៉ាក្រហមបដិសេធថា បើកងទ័ពថៃបុកចូលតំបន់នេះ ពួកគេនឹងតទល់វិញមួយទំហឹង ។ តំបន់នេះមិនមែនជាទឹកដីថៃ ហើយក៏មិនមែនជាទឹកដីមីយ៉ាន់ម៉ា ប៉ុន្តែស្ថិតក្រោមការគ្រប់គ្រងរបស់កងទ័ពវ៉ាក្រហម ៕

ប្រទេសថៃ ៖ កាលពីថ្ងៃទី២៧ ខែវិច្ឆិកា ឆ្នាំ២០២៤ សារព័ត៌មានថៃរាយការណ៍ថា វាជាដំណឹងដ៏រីករាយសម្រាប់ពលរដ្ឋ ពីព្រោះប្រទេសថៃនឹងបញ្ចុះតម្លៃអគ្គិសនីមកនៅត្រឹមតែ៤.១៥បាតក្នុង១គីឡូវ៉ាត់ប៉ុណ្ណោះ (ឬស្មើជាង ៤០០រៀល) ដើម្បីជួយសម្រាលបន្ទុកចាយវាយក្នុងជីវភាពរស់នៅរបស់ពលរដ្ឋ គិតចាប់ពីខែមករា រហូតដល់ខែមេសា ឆ្នាំ២០២៥ ។

លោក ផីរ៉ាក់ផាន់ សាលីរ៉ាត់វិផាក ឧបនាយករដ្ឋមន្ត្រី និងជារដ្ឋមន្ត្រីក្រសួងថាមពលលើកឡើងថា ក្រសួងថាមពលនឹងបញ្ចុះតម្លៃអគ្គិសនីមកនៅត្រឹមតែ៤.១៥បាតក្នុង១គីឡូវ៉ាត់ គិតចាប់ពីខែមករា រហូតដល់ខែមេសា ឆ្នាំ២០២៥ ខណៈតម្លៃអគ្គិសនីបច្ចុប្បន្ន (ចាប់ពីខែកញ្ញា ដល់ខែធ្នូ ឆ្នាំ២០២៤) គឺស្មើនឹង៤.១៨បាតក្នុង១គីឡូវ៉ាត់ ។ វាជាការជួយសម្រាលបន្ទុកចំណាយក្នុងជីវភាពរស់នៅ និងជាកាដូឆ្នាំថ្មី ឆ្នាំ២០២៥ សម្រាប់ពលរដ្ឋថៃគ្រប់រូប ។

លោក ផីរ៉ាក់ផាន់ បញ្ជាក់ថា ៖ «ខ្ញុំទើបតែទទួលបានដំណឹងល្អពីគណៈកម្មការគ្រប់គ្រងថាមពលថា នឹងបញ្ចុះតម្លៃអគ្គិសនីរយៈពេល៤ខែ នៅឆ្នាំ២០២៥ គឺបញ្ចុះមកនៅត្រឹម៤.១៥បាតក្នុង១គីឡូវ៉ាត់ ។ កន្លងមក ខ្ញុំបានស្នើឱ្យស្ថាប័នពាក់ព័ន្ធនានាពិភាក្សគ្នាថា តើអាចបញ្ចុះតម្លៃអគ្គិសនីបន្តទៀតដែរឬទេ» ។

នេះជាការជួយសម្រាលបន្ទុកចំណាយរបស់ពលរដ្ឋគ្រប់រូប ហើយក្នុងនាមខ្ញុំតំណាងឱ្យរដ្ឋាភិបាល និងក្រសួងថាមពល ខ្ញុំសូមយកឱកាសនេះផ្តល់ជាកាដូឆ្នាំថ្មីឱ្យពលរដ្ឋទាំងអស់ ។ ខ្ញុំក៏សូមអរគុណគណៈកម្មការគ្រប់គ្រងថាមពលផងដែរ ដែលជាស្ថាប័នដ៏សំខាន់របស់រដ្ឋ និងអរគុណដល់អាជ្ញាធរអគ្គិសនី ក៏ដូចជាក្រុមហ៊ុនប្រេងឥន្ធនៈ PTT ដែលបានសហការជាមួយរដ្ឋាភិបាលជួយពលរដ្ឋ ។ នេះបើតាមការលើកឡើងរបស់លោក ផីរ៉ាក់ផាន់ ។

ក្រសួងថាមពលនឹងធ្វើសេចក្តីប្រកាសជាផ្លូវការអំពីការបញ្ចុះតម្លៃអគ្គិសនីឱ្យពលរដ្ឋបានជ្រាប ។ កន្លងមក ក្រសួងថាមពលបានស្តាប់នូវមតិយោបល់ផ្សេងៗពាក់ព័ន្ធនឹងការបញ្ចុះតម្លៃអគ្គិសនី ហើយកិច្ចប្រជុំរបស់គណៈកម្មការគ្រប់គ្រងថាមពល នៅថ្ងៃទី២៧ ខែវិច្ឆិកា គឺបានឯកភាពឱ្យបញ្ចុះតម្លៃអគ្គិសនី រយៈពេល៤ខែក្នុងឆ្នាំ២០២៥ ៕

កូរ៉េខាងត្បូង៖ ប្រធានក្រុមហ៊ុន Samsung Electronics លោក Lee Jae-yong អាចត្រូវបានកាត់ទោសឱ្យជាប់ពន្ធ.នាគាររយៈពេល ៥ ឆ្នាំ និងពិន័យជាប្រាក់ចំនួន ៣៧៥,០០០ ដុល្លារអាមេរិកបន្ទាប់ពីត្រូវបានចោទប្រកាន់ដោយរដ្ឋអាជ្ញាកូរ៉េពីបទក្លែងបន្លំតម្លៃភាគហ៊ុន និងគណនេយ្យទាក់ទងនឹងការច្របាច់បញ្ចូលគ្នានៃក្រុមហ៊ុនបុត្រសម្ព័ន្ធ Samsung នៅក្នុងឆ្នាំ ២០១៥។

កាលពីថ្ងៃទី២៥ ខែវិច្ឆិកា រដ្ឋអាជ្ញាកូរ៉េខាងត្បូងបានចោទប្រកាន់លោក Lee Jae-yong និងអតីតនាយកប្រតិបត្តិក្រុមហ៊ុន Samsung ចំនួន ១៣ នាក់ផ្សេងទៀត ពីបទបំពានច្បាប់ទីផ្សារមូលធន។ ជាពិសេស ការច្របាច់បញ្ចូលគ្នាចំនួន ៨ ពាន់លានដុល្លាររវាងក្រុមហ៊ុនបុត្រសម្ព័ន្ធ Cheil Industries និង Samsung C&T ត្រូវបានគេនិយាយថានឹងជួយលោក Lee Jae-yong ពង្រឹងការគ្រប់គ្រងនៅក្រុមហ៊ុន Samsung Electronics ។

ទោះជាយ៉ាងណាលោក Lee Jae-yong បានបដិសេធរាល់ការចោទប្រកាន់ ដោយលោកបានបញ្ជាក់ថា ដំណើរការរួមបញ្ចូលគ្នានេះ ធ្វើឡើងក្នុងក្របខ័ណ្ឌប្រតិបត្តិការស្តង់ដាររបស់ក្រុមហ៊ុន។ លោកក៏បានសង្កត់ធ្ងន់ផងដែរថា ការមិនរកប្រាក់ចំណេញផ្ទាល់ខ្លួន និងមិនមានឥទ្ធិពលលើម្ចាស់ភាគហ៊ុន ដើម្បីបង្កើនកម្មសិទ្ធិភាគហ៊ុនរបស់គាត់នៅក្នុងដំណើរការនេះនោះទេ។

ទោះបីកន្លងមកជនជាប់ចោទត្រូវបានរកឃើញថាមិនមានទោសក៏ដោយ ក៏សាលក្រមនេះត្រូវបានព្រះរាជអាជ្ញាប្តឹងឧទ្ធរណ៍ដែរ ដោយសារករណីនេះនឹង “ធ្វើឱ្យមូលដ្ឋាននៃទីផ្សារមូលធនចុះខ្សោយ”។ យោងតាមព្រះរាជអាជ្ញាបានសង្កត់ធ្ងន់ថាប្រសិនបើចុងជាប់ចោទទទួលបានការកាត់បន្ថយទោស នេះនឹងបង្កើតគំរូមិនល្អដោយលើកទឹកចិត្តឱ្យសាជីវកម្មប្រើប្រាស់វិធានការខុសច្បាប់ដើម្បីទទួលបានផលប្រយោជន៍ផ្ទាល់ខ្លួន។

គួរបញ្ជាក់ដែរថា ការចោតប្រកាន់នេះបានធ្វើឡើងនៅក្នុងបរិបទដែល Samsung កំពុងប្រឈមមុខនឹងការលំបាកដោយសារតែការធ្លាក់ចុះប្រាក់ចំណេញ។ ទោះបីជាប្រាក់ចំណេញប្រតិបត្តិការត្រីមាសទី ៣ របស់ Samsung ឈានដល់ ៧.៦៧ ពាន់លានដុល្លារអាមេរិកក៏ដោយ ក៏ចំនួននេះគឺស្ទើរតែមិនផ្លាស់ប្តូរបើធៀបនឹងត្រីមាសមុន៕

សិង្ហបុរីគឺជាប្រទេសដែលមានសុភមង្គលជាងគេបំផុតនៅអាស៊ីក្នុងឆ្នាំ ២០២៤ នេះ ដោយទទួលបានចំណាត់ថ្នាក់លេខ ១ សម្រាប់ឆ្នាំទីពីរជាប់ៗគ្នា នេះបើយោងតាមការចុះផ្សាយរបស់សារព័ត៌មានបរទេស CNBC ដែលបានស្រង់ទិន្នន័យពីរបាយការណ៍សុភមង្គលពិភពលោក។ របាយការណ៍សុភមង្គលពិភពលោក ដែលជាការស្ទង់មតិ គឺផ្អែកទៅលើទិន្នន័យ Gallup World Poll គាំទ្រដោយអង្គការសហប្រជាជាតិ។ ប្រទេសដែលមានសុភមង្គលត្រូវបានអ្នកជំនាញវាយតម្លៃតាមរយៈ ៦ ចំណុចរួមមាន៖

ផលិតផលក្នុងស្រុកសរុបសម្រាប់មនុស្សម្នាក់, ការគាំទ្រពីសង្គម, អាយុសង្ឃឹមរស់ដែលមានសុខភាពល្អ, សេរីភាពក្នុងការជ្រើសរើសរបស់បុគ្គល, ភាពសប្បុរសរបស់ប្រជាជនទូទៅ និងការយល់ឃើញអំពីកម្រិតនៃអំពើពុករលួយខាងក្នុង និងខាងក្រៅប្រទេស។ ក្នុងចំណោមប្រទេសចំនួន ១៤៣ សិង្ហបុរីជាប់ចំណាត់ថ្នាក់លេខ ៣០ នៅលើពិភពលោក និងលេខ ១ នៅអាស៊ី ខណៈប្រទេសហ្វាំងឡង់ នៅតែបន្តនាំមុខគេជាប្រទេសមានសុភមង្គលបំផុតលើពិភពលោកជាប់ចំណាត់ថ្នាក់លេខ ១ ជាមួយនឹងពិន្ទុ ៧.៧ តាមពីក្រោយដោយប្រទេសដាណឺម៉ាក អ៊ីស្លង់ និងស៊ុយអែត។

ជាការពិតណាស់ នៅអាស៊ីយើងនេះសិង្ហបុរីគឺជាប្រទេសនាំមុខគេ ដោយសារគោលនយោបាយល្អ សុវត្ថិភាព ជាប្រទេសគ្មានជម្លោះ រួមទាំងសុខុមាលភាពសង្គម និងការអប់រំខ្ពស់។ លើសពីនេះប្រទេសសិង្ហបុរីក៏មានប្រព័ន្ធយុត្តិធម៌ព្រហ្មទណ្ឌប្រកបដោយប្រសិទ្ធភាព និងរដ្ឋាភិបាលដែលរក្សាទំនាក់ទំនងប្រកបដោយសុខភាពល្អជាមួយពលរដ្ឋរបស់ពួកគេផងដែរ។ បច្ចុប្បន្នប្រជាជនសិង្ហបុរីគឺមានអារម្មណ៍សុវត្ថិភាពផ្ទាល់ខ្លួនខ្ពស់បំផុត ហើយក៏មានបទពិសោធន៍វិជ្ជមានជាមួយការអនុវត្តច្បាប់ច្រើនជាងអ្នករស់នៅក្នុងប្រទេសដទៃទៀតផង។

ទន្ទឹមនឹងនេះប្រទេសសិង្ហបុរីក៏មានអត្រាឧក្រិដ្ឋកម្មទាបបំផុតមួយក្នុងពិភពលោក ប្រហែលជាដោយសារតែការពិន័យធ្ងន់ធ្ងរដែលត្រូវបានចេញសម្រាប់ឧក្រិដ្ឋកម្មតូចតាច។ រដ្ឋាភិបាល និងប៉ូលីសគ្រប់គ្រងយ៉ាងតឹងរ៉ឹងនូវកាំភ្លើង និងអាវុធផ្សេងទៀត ហើយឧក្រិដ្ឋកម្មហិង្សា និងការប្រឈមមុខដាក់គ្នាគឺកម្រមានណាស់នៅក្នុងប្រទេសអាស៊ីអាគ្នេយ៍មួយនេះ។ ក្រៅពីប្រទេសសិង្ហបុរី តៃវ៉ាន់ ជប៉ុន កូរ៉េខាងត្បូង ហ្វីលីពីន វៀតណាម និងថៃក៏ស្ថិតក្នុងបញ្ជីប្រទេសដែលមានសុភមង្គលជាងគេនៅអាស៊ីផងដែរ៕