ទម្លាប់ល្អៗទាំង ៥ ដែលជួយឱ្យលោកអ្នកមានលុយកាន់តែច្រើន

ឆ្នាំ ២០២៥ ហើយកែទម្លាប់អាក្រក់ៗខ្លះទៅដើម្បីអភិវឌ្ឍជីវិតឱ្យកាន់តែល្អ និងមានលុយកាន់តែច្រើន។ គន្លឹះទាំងនេះអាចជួយអ្នកកែលម្អហិរញ្ញវត្ថុផ្ទាល់ខ្លួនឱ្យប្រសើឡើងជាងមុន ក៏ដូចជាជួយអ្នកសម្រេចបាននូវគោលដៅកាន់តែងាយស្រួល ដោយអ្នកគ្រាន់មានទម្លាប់ល្អៗដូចខាងក្រោម៖

១.ពិនិត្យគណនី និងវិក្កយបត្ររបស់អ្នកឱ្យបានទៀងទាត់៖ ការពិនិត្យមើលគណនីធនាគារ និងវិក្កយបត្ររបស់អ្នកឱ្យបានទៀងទាត់ ជួយឱ្យអ្នកដឹងច្បាស់ថាតើលុយចូលប៉ុន្មាន ចេញប៉ុន្មាន ជាហេតុធ្វើឱ្យអ្នកកាន់តែមានការប្រុងប្រយ័ត្នខ្ពស់ក្នុងការចំណាយ។ នេះបើយោងតាមអ្នកជំនាញផ្នែកហិរញ្ញវត្ថុបាននិយាយថា អ្នកគួរចំណាយពេលបន្តិចរៀងរាល់សប្តាហ៍ដើម្បីពិនិត្យមើលឡើងវិញនូវអ្វីដែលអ្នកបានចំណាយ និងចំនួនប្រាក់ដែលនៅសេសសល់។ ប្រសិនបើអ្នកមិនអនុវត្តបែបនេះទេ អ្នកនឹងចំណាយប្រាក់ច្រើនដោយមិនចេះគិត រហូតដល់ក្រីក្រ។

២.ជំនួសឱ្យសម្ភារៈនិយមគួរទិញមាសទុក៖ ប្រសិនបើអ្នកមានប្រាក់ច្រើន យល់ល្អគួរកុំចំណាយលើសម្ភារៈនិយមហួសហេតុពេកដូចជា សម្លៀកបំពាក់ប្រេនៗ ទូរស័ព្ទដៃ និងរបស់របរទំនើបៗ ប្រសិននៅប្រើបានប្រើវាបន្តទៀតទៅ។ លើសពីនេះបើអ្នកចង់ទិញរបស់របរទុក គួរទិញមាសព្រោះវត្ថុទាំងនេះមានតម្លៃណាស់ អាចជួយអ្នកដោះស្រាយបញ្ហាលំបាកផ្សេងៗបាន។

៣.កំណត់គោលដៅសន្សំ៖ ការកំណត់គោលដៅសន្សំច្បាស់លាស់គឺដើម្បីជួយតម្រង់ទិសដៅឱ្យអ្នកស្គាល់ច្បាស់ពីគោលដៅដែលអ្នកចង់សម្រេចបាន។ ឧទាហរណ៍ថា អ្នកមានគោលដៅចង់សន្សំឱ្យបាន ៣០ ដុល្លារក្នុងមួយខែ ឬ ៣៦០ ដុល្លារក្នុងមួយឆ្នាំ។ ជាមួយការកំណត់គោលដៅច្បាស់លាស់បែបនេះ យើងនឹងដឹងថាខ្លួនត្រូវប្ដេជ្ញាសម្រេចតាមគោលដៅនៃផែនការប៉ុនណា ត្រឹមរយៈពេលណា និងចៀសវាងការចាយវាយគ្មានកំណត់។

៤.ដកលុយសន្សំទុកមុនចាយ៖ ពេលបើកប្រាក់ខែ ឬបានចំណូលប្រចាំខែមក អ្វីដែលត្រូវធ្វើមុនគេគឺដកលុយសម្រាប់សន្សំឱ្យហើយសិន ដោយអាចកំណត់យក ១៥% ឬ ២០% នៃប្រាក់ចំណូលប្រចាំខែ។ ការដកប្រាក់សន្សំមុនចាយគឺជាវិធីមានប្រសិទ្ធិភាពមួយក្នុងការសម្រេចគោលដៅសន្សំ ព្រោះអ្នកបានកំណត់ប្រាក់ដែលអ្នកអាចចាយវាយបានរួចជាស្រេច ហើយមិនបាច់ខ្លាចចាយអស់លុយដែលត្រូវសន្សំទៀតផង។

៥.រកការងារក្រៅម៉ោង៖ ប្រសិនបើអ្នកមានពេលទំនេរច្រើនដូចជាសៅរ៍ អាទិត្យសម្រាកអាចរកការងារក្រៅម៉ោងដើម្បីបានប្រាក់ចំណូលបន្ថែមទៀត ដែលវិធីសាស្ត្រមួយនេះពិតជាល្អខ្លាំងណាស់ យកពេលទំនេររបស់អ្នកបង្កើតលុយ វាប្រសើជាងចំណាយពេលចោលផងដែរ៕