ប្រទេសអង់គ្លេស ៖ កាលពីថ្ងៃទី៤ ខែមករា ឆ្នាំ២០២៥ សារព័ត៌មានបរទេសរាយការណ៍ថា ក្រុមអ្នកបុរាណវិទ្យាបានរកឃើញរណ្តៅប្លែកៗជិត២០០រណ្តៅ នៅកន្លែងយកថ្មក្បែរទីក្រុងឡុងដ៍ ប្រទេសអង់គ្លេស ។ ក្រោយមក ទើបពួកគេដឹងថា វាពុំមែនជារណ្តៅធម្មតាទេ គឺជាដានជើងរបស់សត្វដាយណូស័រដើរជាជួរ កាលពី១៦៦លានឆ្នាំមុន ។

ការប្រទះឃើញដានជើងធំៗរបស់ដាយណូស័រ គឺស្ថិតនៅក្បែរទីក្រុងឡុងដ៍ ហើយត្រូវបានគេដាក់ឈ្មោះថា «ផ្លូវដើរដាយណូស័រ» ។ អ្នកជំនាញនៅសាកលវិទ្យាល័យ Birmingham ជឿជាក់ថា ការរកឃើញដានជើងដាយណូស័រទាំងនេះ គឺជាការបង្ហាញភស្តុតាងសំខាន់ក្នុងយុគសម័យ Jurassic កណ្តាល ។

អ្នកវិទ្យាសាស្ត្រ និស្សិត និងអ្នកស្ម័គ្រចិត្ត ជាង១០០នាក់ បានសហការគ្នាជីកដីនៅកន្លែងយកថ្ម តាំងពីខែមិថុនា ឆ្នាំ២០២៤ ហើយបានឃើញដានជើងទាំងនេះនៅឆ្ងាយពីគ្នាប្រមាណ ៣ម៉ែត្រ ។ ពីដំបូង យើងគិតថា វាគ្រាន់តែជារណ្តៅធម្មតាប៉ុណ្ណោះ ប៉ុន្តែដោយសារអង់គ្លេសធ្លាប់រកឃើញដានជើងដាយណូស័រនៅបរិវេណក្បែរនេះកាលពីឆ្នាំ១៩៩០ ទើបយើងសន្និដ្ឋានថា វាជាដានជើងដាយណូស័រ ។ នេះបើតាមការលើកឡើងរបស់លោក Gary Johnson ដែលបានឃើញដានជើងមុនគេ ។

ក្នុងចំណោមដានជើងដាយណូស័រជិត២០០កន្លែង ក្នុងនោះមានដានជើង៤កន្លែងជារបស់ដាយណូស័រពូជ Cetiosaurus ដែលស៊ីរុក្ខជាតិជាអាហារ និងដើរជើង៤ ។ រីឯដានជើង១កន្លែងទៀត គឺជារបស់ដាយណូស័រពូជ Megalosaurus ស៊ីសាច់ និងដើរជើង២ ។ ការរកឃើញដានជើងដាយណូស័របង្ហាញថា នៅមានភស្តុតាងថ្មីៗជាច្រើនទៀតពាក់ព័ន្ធនឹងសត្វប្រភេទនេះ ។

ក្រុមអ្នកបុរាណវិទ្យានៅសាកលវិទ្យាល័យ Birmingham និយាយថា ដានជើងដាយណូស័រវែងជាងគេមានប្រវែង១៥០ម៉ែត្រ ហើយវាអស្ចារ្យបំផុតដែលពួកគេមិនធ្លាប់ឃើញ ។ ចូរស្រមៃទៅរកអតីតកាលរាប់លានឆ្នាំមុន គឺយើងនឹងឃើញសត្វមានខ្លួនធំៗដូចយក្សដើរទៅមក ហើយយើងនឹងយល់ពីការបម្លាស់ទី និងបរិស្ថារស់នៅ ។ ឯកសារជាច្រើននឹងក្លាយជាជំនួយសម្រាប់ស្រាវជ្រាវនាថ្ងៃអនាគត អំពីទំហំខ្លួន និងការបម្លាស់ទីរបស់ដាយណូស័រ ៕

កូរ៉េខាងត្បូង៖ ក្នុងរយៈពេលប៉ុន្មានឆ្នាំថ្មីៗនេះរថយន្តអគ្គិសនីរបស់កូរ៉េបានឆាបឆេះដោយឯកឯង បង្កឱ្យមានឧប្បត្តិហេតុមិនល្អជាច្រើន ធ្វើឱ្យសាធារណជនទូទៅបាត់បង់ទំនុកចិត្ត។
ទោះជាយ៉ាងណាថ្មីៗនេះអ្នកស្រាវជ្រាវនៅក្នុងប្រទេសបានចាប់ផ្តើមខិតខំប្រឹងប្រែងលើការកែលម្អសុវត្ថិភាពនៃកញ្ចប់ថ្មនៅក្នុងរថយន្តអគ្គិសនីឡើងវិញ។ ដោយអ្នកស្រាវជ្រាវនៅវិទ្យាស្ថានវិទ្យាសាស្ត្រ និងបច្ចេកវិទ្យា Daegu Gyeongbuk (DGIST) បានបង្កើតថ្មលីចូមដែកដែលមានអាយុកាលយូរជាងអាគុយលីចូម-អ៊ីយ៉ុងប្រពៃណី ជាមួយសមត្ថភាពពិសេសអាចពន្លត់ភ្លើងដោយខ្លួនឯងបានប្រសិនបើឆេះ។

មូលហេតុដែលរថយន្តអគ្គិសនីតែងតែឆាបឆេះដោយឯកឯងគឺដោយសារតែរថយន្តនីមួយៗមានខ្សែភ្លើងជាច្រើន ដែលបំពាក់ដោយប្រព័ន្ធសំឡេង ឬប្រព័ន្ធប្រឆាំងចោរកម្មពីហាងខាងក្រៅ ប្រសិនបើអ្នកបច្ចេកទេសមិនមានជំនាញក្នុងការដោះស្រាយប្រព័ន្ធអគ្គិសនី និងខ្សែភ្លើងនោះទេ វាអាចបណ្តាលឱ្យមានចរន្តអគ្គិសនី ឬឧបករណ៍ខ្លះអាចឡើងកំដៅ និងបង្កជាអគ្គីភ័យ។ លើសពីនេះប្រសិនបើមានការលេចធ្លាយប្រេងពីផ្នែកណាមួយនៃប្រព័ន្ធចែកចាយឥន្ធនៈ ហើយមកប៉ះនឹងបំពង់ផ្សែងក្តៅខ្លាំង នោះវានឹងមានឱកាសខ្ពស់ដែលធ្វើឱ្យរថយន្តឆេះផងដែរ។

ដូច្នេះហើយដើម្បីកែលម្អថ្មឡើងវិញ អ្នកស្រាវជ្រាវរបស់កូរ៉េខាងត្បូងក៏បានបង្កើតឡើងជាពិសេសនូវថ្មលីចូមដែកអេឡិចត្រូលីតជាមួយវត្ថុធាតុ polymer រឹងបីស្រទាប់ ដែលអាចការពារការឆេះរថយន្តដោយឯកឯងយ៉ាងមានប្រសិទ្ធភាព។ គម្រោងនេះត្រូវបានគេរំពឹងថានឹងរួមចំណែកយ៉ាងសំខាន់ក្នុងការធ្វើពាណិជ្ជកម្មនៃថ្មលីចូមលោហធាតុ ដោយប្រើអេឡិចត្រូលីតប៉ូលីម៊ែរដ៏រឹងមាំ។ យោងតាមលោកបណ្ឌិត Kim Jae-hyun អ្នកស្រាវជ្រាវនាំមុខគេបាននិយាយថា ប្រសិនបើបច្ចេកវិទ្យានេះត្រូវបានធ្វើពាណិជ្ជកម្ម វាក៏អាចត្រូវបានអនុវត្តទៅលើឧបករណ៍ជាច្រើន ចាប់ពីស្មាតហ្វូន យានយន្តអគ្គិសនី រហូតដល់ប្រព័ន្ធផ្ទុកថាមពលទ្រង់ទ្រាយធំផងដែរ។

ទោះជាយ៉ាងណា យន្តការការពារភ្លើងពីអាគុយខាងលើនេះ នៅតែស្ថិតក្នុងដំណាក់កាលដំបូងនៃការស្រាវជ្រាវ និងអភិវឌ្ឍន៍នៅឡើយ ហើយនៅមិនទាន់មានដំណោះស្រាយគ្រប់ជ្រុងជ្រោយ ដែលអាចទប់ស្កាត់ភ្លើងឆេះរថយន្តអគ្គិសនីបានទាំងស្រុងនៅពេលនេះនោះទេ។ ទោះបីជាយ៉ាងណាក៏ដោយ ដោយសារទីផ្សាររថយន្តអគ្គិសនីពិភពលោកកំពុងកើនឡើងជារៀងរាល់ឆ្នាំ អ្នកជំនាញបាននិយាយថា ដំណោះស្រាយសុវត្ថិភាពថ្មនឹងត្រូវបានអភិវឌ្ឍយ៉ាងឆាប់រហ័សក្នុងពេលឆាប់ៗនេះ៕

នៅត្រីមាសទី១ ឆ្នាំ២០២៥ អ្នកវិទ្យាសាស្ត្រមកពីអង្គការរុករកមហាសមុទ្រទឹកជ្រៅ នឹងសាកល្បងបញ្ជូនក្រុមអ្នកជ្រមុជទឹកទៅស្នាក់នៅ និងធ្វើការនៅបាតសមុទ្រ រយៈពេល១សប្តាហ៍ ។ អ្នកវិទ្យាសាស្ត្ររំពឹងថាថា ចាប់ពីឆ្នាំ២០៣០ តទៅ មនុស្សនឹងអាចរស់នៅបាតសមុទ្របានច្រើនឆ្នាំ ហើយនេះជាជម្រើសថ្មីមួយទៀត ក្រៅពីការរស់នៅលើភពអង្គារ ។

កាលពីថ្ងៃទី៥ ខែមករា ឆ្នាំ២០២៥ សារព័ត៌មានបរទេសរាយការណ៍ថា អង្គការរុករកមហាសមុទ្រទឹកជ្រៅបានចាប់ផ្តើមស្រាវជ្រាវគម្រោងមួយចំណាយពេលជាច្រើនឆ្នាំ ដើម្បីបញ្ជូនមនុស្សទៅរស់នៅបាតសមុទ្រជម្រៅប្រមាណ២០០ម៉ែត្រ ក្នុងរយៈពេលជាច្រើនសប្តាហ៍, ច្រើនខែ និងអាចរស់នៅច្រើនឆ្នាំ ។

នៅត្រីមាសទី១ ឆ្នាំ២០២៥ អង្គការនេះនឹងសាកល្បងការស្នាក់នៅបាតសមុទ្រក្នុងបន្ទប់ឈ្មោះថា Vanguard ដែលមានទំហំប៉ុនទូរកុងទឺន័រ និងអាចបម្លាស់ទីបាន ។ អ្នកជ្រមុជទឹកអាចស្នាក់នៅបន្ទប់នេះបាន៣នាក់ រយៈពេល១សប្តាហ៍ ហើយពួកគេនឹងធ្វើការនៅបាតសមុទ្របានយូរជាងនេះ ពីព្រោះមានកន្លែងបរិភោគអាហារ និងសម្រាក ។

ក្រៅពីនេះ អង្គការរុករកមហាសមុទ្រទឹកជ្រៅ ក៏មានគម្រោងបណ្តុះបណ្តាលអ្នកស្រាវជ្រាវដែលចាប់អារម្មណ៍ចង់រស់នៅបាតសមុទ្រនៅកន្លែងដែលពួកគេរៀបចំផងដែរ ។ ពួកគេរំពឹងថា គម្រោងនេះនឹងអាចបំពេញតម្រូវការរុករកនៅបាតសមុទ្រដើម្បីឈ្វេងយល់ពីប្រព័ន្ធអេកូឡូស៊ី និងបរិស្ថានក្រោមទឹកដ៏អាថ៌កំបាំង ហើយមហាសមុទ្របានស្រូបកាបូនឌីអុកស៊ីត១ភាគ៤ និងស្រូបកំដៅប្រមាណ៩០% ដែលបង្កើតឡើងដោយមនុស្ស ។

ក្រោយពីបញ្ចប់ការសាកល្បងស្នាក់នៅបាតសមុទ្រនៅត្រីមាសទី១ ឆ្នាំ២០២៥ គម្រោងរស់នៅបាតសមុទ្រនឹងដំណើរការជាបណ្តើរៗនៅឆ្នាំ២០២៧ ហើយចាប់ពីឆ្នាំ២០៣០ តទៅ មនុស្សនឹងអាចរស់នៅបាតសមុទ្រជាច្រើនឆ្នាំ ។ នេះបើតាមការលើកឡើងរបស់ក្រុមអ្នកវិទ្យាសាស្ត្រមកពីអង្គការរុករកមហាសមុទ្រទឹកជ្រៅ ៕

ប្រទេសឥណ្ឌូនេស៊ី៖ ហាងកាហ្វេមួយនៅប្រទេសឥណ្ឌូនេស៊ីដែលមានឈ្មោះ Bilik Rumah Coffe បានបង្កើតម៉ឺនុយភេសជ្ជៈថ្មីគឺកាហ្វេទឹកដោះគោរួមផ្សំជាមួយមីកញ្ចប់ ក្រូចឆ្មារ និងរោយម្ទេសពីលើ កំពុងទទួលបានការចាប់អារម្មណ៍ខ្លាំងពេញបណ្តាញសង្គម។

ថ្មីៗនេះម៉ឺនុយ “Ice Latte with Noodle” គឺបានទាក់ទាញការចាប់អារម្មណ៍យ៉ាងខ្លាំង ពីសំណាក់ប្រជាជនឥណ្ឌូនេស៊ី ដោយសារតែវាមានភាពប្លែកខុសពីកាហ្វេដទៃ ជាមួយរសជាតិពិសេសមិនធ្លាប់មាន ប៉ុន្តែក៏ទទួលបានមតិវិជ្ជមាន និងអវិជ្ជមានផងដែរ។

មនុស្សជាច្រើនបាននិយាយថា ភេសជ្ជៈថ្មីនេះរៀងភ្លាវបន្តិច ខណៈអ្នកខ្លះទៀតបាននិយាយថា ឆ្ងាញ់ពួកគេចូលចិត្ត។ ម៉ឺនុយកាហ្វេដ៏ពេញនិយមនេះរួមបញ្ចូលគ្នានូវ latte ទឹកកកជាមួយនឹងមីកញ្ចប់ Indomie ដ៏ល្បីល្បាញរបស់ប្រទេសឥណ្ឌូនេស៊ី។ ចំពោះរបៀបនៃការឆុងភេសជ្ជៈដ៏ចម្លែកមួយនេះ គឺឆុងធម្មតាដូចកាហ្វេទូទៅដែរ ប៉ុន្តែខុសប្លែកនៅត្រង់ថា ក្រៅពីបន្ថែមប្រភេទ Topping ជាប្រភេទ Cream ឫ នំ Caramel គេបែរជាដាក់សរសៃមី ជំនួសទៅវិញ។

លើសពីនេះ គេបានបន្ថែមខ្ទឹមបំពង ម្ទេស និងក្រូចឆ្មាមួយចំណិតពីលើ ដើម្បីធ្វើឱ្យសរសៃមី ដែលដាក់លើពីលើកាហ្វេនោះមានរសជាតិកាន់តែឆ្ងាញ់។ ដូច្នេះការធ្វើម៉ឺនុយថ្មីនេះ គឺក្នុងគោលបំណងដើម្បីទាក់ទាញអតិថិជន ដោយចាប់ផ្តើមធ្វើកាហ្វេដាក់ទឹកដោះគោ ជាមួយទឹកកកធម្មតា ប៉ុន្តែជំនួសឱ្យការដាក់គ្រីមពីលើ ម្ចាស់ហាងក៏បានដាក់មីកញ្ចប់ និងម្ទេស ក្រូចឆ្មារពីលើវិញ។ ជាការពិតណាស់ Ice Latte គឺជាភេសជ្ជៈដ៏ពេញនិយមមួយសម្រាប់យុវវ័យទូទាំងពិភពលោក ដោយភេសជ្ជៈមួយមុខនេះត្រូវបានគេយកមកច្នៃធ្វើជាភេសជ្ជៈប្លែកៗជាច្រើនមុខហើយ។

កាលពីមុនប្រទេសចិនបានយក Ice Latte ទៅរួមផ្សំជាមួយស្លឹកខ្ទឹម ឬហៅថាកាហ្វេស្លឹកខ្ទឹម ហើយហាងមួយទៀត ក៏បានបង្កើតម៉ឺនុយ កាហ្វេរស់ជាតិសាច់ជ្រូកផងដែរ ក្នុងគោលបំណងទាក់ទាញអតិថិជន។ នៅខែធ្នូ ឆ្នាំ ២០២៤ ភោជនីយដ្ឋានមួយក្នុងប្រទេសវៀតណាមដែលទើបនឹងបើកថ្មីៗ ក៏បានបង្កើតម៉ឺនុយអាហារប្លែកៗជាច្រើនដូចជា “មីទឹកដោះគោគុជ” ដែលកំពុងទទួលបានការចាប់អារម្មណ៍ខ្លាំងពេញបណ្តាញសង្គមទាំងក្នុង និងក្រៅប្រទេសផងដែរ៕

សហរដ្ឋអាមេរិក ៖ អ្នកស្រាវជ្រាវនៅសាកលវិទ្យាល័យ Johns Hopkins និង Stanford សហរដ្ឋអាមេរិក បានទទួលជោគជ័យក្នុងការបង្ហាត់មនុស្សយន្តឱ្យចេះវះកាត់អ្នកជំងឺ ហើយវាអាចវះកាត់បានល្អដូចគ្រូពេទ្យជំនាញដែរ ដោយគ្រាន់តែឱ្យមនុស្សយន្តបំពាក់បច្ចេកវិទ្យា AI ទស្សនាវីដេអូវះកាត់ ។ អ្នកស្រាវជ្រាវរំពឹងថា ភាពជោគជ័យនេះនឹងអាចដោះស្រាយបញ្ហាខ្វះខាតគ្រូពេទ្យវះកាត់នៅអាមេរិក នាថ្ងៃអនាគត ។

កាលពីថ្ងៃទី៥ ខែមករា ឆ្នាំ២០២៥ សារព័ត៌មានបរទេសរាយការណ៍ថា បើទោះជាពិភពលោក បានយកមនុស្សយន្តមកជួយផ្នែកវះកាត់អ្នកជំងឺតាំងពីឆ្នាំ១៩៨៥ ក្តី ប៉ុន្តែមនុស្សយន្តថ្មីនេះមានលក្ខណៈពិសេសជាងមនុស្សយន្តសម័យមុន ។ វាអាចរៀនសូត្រ និងដោះស្រាយបញ្ហាដោយខ្លួនឯង ដោយពុំចាំបាច់មានមនុស្សបញ្ជា ។

ក្រុមអ្នកស្រាវជ្រាវអាមេរិកបានបង្កើតភាសាគំរូសម្រាប់មនុស្សយន្តវះកាត់ ដោយភាសានេះនឹងបញ្ជាក់ពីការប្រើប្រាស់ឧបករណ៍វេជ្ជសាស្ត្រ ហើយស្រដៀងគ្នានឹងគំរូភាសាក្នុងកម្មវិធី ChatGPT ។ បច្ចេកវិទ្យា AI នឹងបំលែងរូបភាពក្នុងវីដេអូទៅជាទិន្នន័យតួលេខ ហើយមនុស្សយន្តនឹងបំលែងជាសកម្មភាព ។

ហេតុនេះ មនុស្សយន្តនឹងជួយវះកាត់អ្នកជំងឺ និងអាចដោះស្រាយបញ្ហាដោយខ្លួនឯងពុំចាំបាច់មនុស្សបញ្ជា ពីព្រោះក្រោយការសាកល្បងរបស់ក្រុមអ្នកស្រាវជ្រាវបង្ហាញថា មនុស្សយន្តបានវះកាត់សត្វជ្រូក និងមាន់ដោយជោគជ័យ ។ លើសពីនេះ គ្រូពេទ្យអាចទំនាក់ទំនងជាមួយមនុស្សយន្តបានធម្មតា គឺដូចនិយាយជាមួយគ្រូពេទ្យជាមនុស្សដែរ ដូចជា ៖ ប្រាប់ឱ្យវាផ្លាស់ទីទៅខាងឆ្វេង ឬខាងស្តាំ ។

អ្នកស្រាវជ្រាវសង្ឃឹមថា ការបង្ហាត់មនុស្សយន្តឱ្យចេះពីវិធីវះកាត់អ្នកជំងឺនៅមន្ទីរពេទ្យ នឹងអាចដោះស្រាយបញ្ហាខ្វះខាតគ្រូពេទ្យវះកាត់នៅអាមេរិក និងជួយលើកកម្ពស់ស្តង់ដារផ្នែកវេជ្ជសាស្ត្រ នាថ្ងៃអនាគត ៕