សហរដ្ឋអាមេរិក ៖ អ្នកស្រាវជ្រាវនៅសាកលវិទ្យាល័យ Johns Hopkins និង Stanford សហរដ្ឋអាមេរិក បានទទួលជោគជ័យក្នុងការបង្ហាត់មនុស្សយន្តឱ្យចេះវះកាត់អ្នកជំងឺ ហើយវាអាចវះកាត់បានល្អដូចគ្រូពេទ្យជំនាញដែរ ដោយគ្រាន់តែឱ្យមនុស្សយន្តបំពាក់បច្ចេកវិទ្យា AI ទស្សនាវីដេអូវះកាត់ ។ អ្នកស្រាវជ្រាវរំពឹងថា ភាពជោគជ័យនេះនឹងអាចដោះស្រាយបញ្ហាខ្វះខាតគ្រូពេទ្យវះកាត់នៅអាមេរិក នាថ្ងៃអនាគត ។
កាលពីថ្ងៃទី៥ ខែមករា ឆ្នាំ២០២៥ សារព័ត៌មានបរទេសរាយការណ៍ថា បើទោះជាពិភពលោក បានយកមនុស្សយន្តមកជួយផ្នែកវះកាត់អ្នកជំងឺតាំងពីឆ្នាំ១៩៨៥ ក្តី ប៉ុន្តែមនុស្សយន្តថ្មីនេះមានលក្ខណៈពិសេសជាងមនុស្សយន្តសម័យមុន ។ វាអាចរៀនសូត្រ និងដោះស្រាយបញ្ហាដោយខ្លួនឯង ដោយពុំចាំបាច់មានមនុស្សបញ្ជា ។
ក្រុមអ្នកស្រាវជ្រាវអាមេរិកបានបង្កើតភាសាគំរូសម្រាប់មនុស្សយន្តវះកាត់ ដោយភាសានេះនឹងបញ្ជាក់ពីការប្រើប្រាស់ឧបករណ៍វេជ្ជសាស្ត្រ ហើយស្រដៀងគ្នានឹងគំរូភាសាក្នុងកម្មវិធី ChatGPT ។ បច្ចេកវិទ្យា AI នឹងបំលែងរូបភាពក្នុងវីដេអូទៅជាទិន្នន័យតួលេខ ហើយមនុស្សយន្តនឹងបំលែងជាសកម្មភាព ។
ហេតុនេះ មនុស្សយន្តនឹងជួយវះកាត់អ្នកជំងឺ និងអាចដោះស្រាយបញ្ហាដោយខ្លួនឯងពុំចាំបាច់មនុស្សបញ្ជា ពីព្រោះក្រោយការសាកល្បងរបស់ក្រុមអ្នកស្រាវជ្រាវបង្ហាញថា មនុស្សយន្តបានវះកាត់សត្វជ្រូក និងមាន់ដោយជោគជ័យ ។ លើសពីនេះ គ្រូពេទ្យអាចទំនាក់ទំនងជាមួយមនុស្សយន្តបានធម្មតា គឺដូចនិយាយជាមួយគ្រូពេទ្យជាមនុស្សដែរ ដូចជា ៖ ប្រាប់ឱ្យវាផ្លាស់ទីទៅខាងឆ្វេង ឬខាងស្តាំ ។
អ្នកស្រាវជ្រាវសង្ឃឹមថា ការបង្ហាត់មនុស្សយន្តឱ្យចេះពីវិធីវះកាត់អ្នកជំងឺនៅមន្ទីរពេទ្យ នឹងអាចដោះស្រាយបញ្ហាខ្វះខាតគ្រូពេទ្យវះកាត់នៅអាមេរិក និងជួយលើកកម្ពស់ស្តង់ដារផ្នែកវេជ្ជសាស្ត្រ នាថ្ងៃអនាគត ៕
