យោងតាមអ្នកយកព័ត៌មានរបស់កាសែត The Straits Times ដែលមានឈ្មោះថា Lydia Yang បានចែករំលែកថា សម្រាប់ភ្ញៀវទេសចរដែលចូលចិត្តឡើងភ្នំគយគន់ទេសភាព តំបន់ទាំង ៥ នៃប្រទេសអាស៊ីអាគ្នេយ៍នេះគឺពិតជាស្រស់ស្អាត និងទាក់ទាញខ្លាំងណាស់ ជាពិសេសនៅរដូវរងារតែម្តង ដែលកន្លែងទាំងនោះរួមមាន៖

១.ភ្នំកំពង់ត្រាច៖ ភ្នំកំពង់ត្រាចមានទីតាំងស្ថិតនៅតាមបណ្តោយផ្លូវជាតិលេខ ៣៦ ក្នុងឃុំដំណាក់កន្ទួត ស្រុកកំពង់ត្រាច ខេត្តកំពត ប្រទេសកម្ពុជាយើង។ ភ្នំនេះគឺជារមណីយដ្ឋានធម្មជាតិនិងប្រវត្តិសាស្ត្រមួយ ដែលទាក់ទាញបំផុតសម្រាប់ភ្ញៀវទេសចរដែលចង់ទៅកម្សាន្តនៅតំបន់ទេសភាពប្លែកភ្នែក ខ្យល់អាកាសបរិសុទ្ធ រូងភ្នំមានខ្យល់ត្រជាក់ ជាពិសេសគឺបទពិសោធន៍ឡើងភ្នំតែម្តង ដែលអាចធ្វើឱ្យអ្នកលោកអ្នកទៅកម្សាន្តនៅទីនេះទទួលបានអារម្មណ៍ស្រស់ស្រាយបំផុត។

២.តំបន់ Thakhek៖ តំបន់ Thakhek មានទីតាំងស្ថិតនៅភាគកណ្តាលប្រទេសឡាវ ជាប់ព្រំដែនប្រទេសថៃ។ តំបន់នេះមានភាពល្បីល្បាញខ្លាំងដោយសារផ្លូវឡើងភ្នំចម្រុះជាង ៦០០ ដែលមានជួរភ្នំជាច្រើន មានផ្ទាំងថ្មធំៗ ទម្រង់ថ្មរាងចម្លែក និងជម្រាលថ្មចោត។ ផ្លូវឡើងភ្នំមានទីតាំងនៅជ្រលងភ្នំដូចគ្នា ចំណុចខ្លះទៀតត្រូវដើរ ១០-២០ នាទីពីកន្លែងបោះជំរំ។ ដូច្នេះកន្លែងនេះគឺសក្តិសមបំផុតសម្រាប់ភ្ញៀវទេសចរណ៍ដែលចូលចិត្តឡើងភ្នំ និងការផ្សងព្រេង។

៣.តំបន់ Batu Caves៖ Batu Caves គឺជាកន្លែងទាក់ទាញដ៏ល្បីល្បាញមួយរបស់ប្រទេសម៉ាឡេស៊ី រួមទាំងការឡើងភ្នំផងដែរ។ ជាមួយនឹងច្រាំងថ្មកំបោរ និងប្រព័ន្ធរូងភ្នំដ៏ធំទូលាយ តំបន់ Batu Caves ផ្តល់នូវផ្លូវឡើងភ្នំសមរម្យសម្រាប់គ្រប់កម្រិតទាំងអស់។ នៅពេលទៅដល់កន្លែងនេះអ្នកទស្សនានឹងឃើញរូបសំណាកព្រះហិណ្ឌូ Murugan កម្ពស់ ៤២ ម៉ែត្រ បូករួមនឹងទិដ្ឋភាពគួរឱ្យចាប់អារម្មណ៍បំផុតនៃព្រៃត្រូពិចជុំវិញ។

៤.តំបន់ Suoi Da៖ Suoi Da គឺជាកន្លែងសម្រាប់សកម្មភាពឡើងភ្នំគួរឱ្យចាប់អារម្មណ៍មួយនៅក្នុងតំបន់ភាគខាងត្បូងប្រទេសវៀតណាម។ នេះគឺជាជួរភ្នំថ្មដែលមានកំពស់រហូតដល់ ៦ ម៉ែត្រ មិនត្រូវការខ្សែក្រវ៉ាត់សុវត្ថិភាពទេ ដោយសារថ្មនៅទីនេះមានភាពរលូន ងាយស្រួលក្នុងការយកឈ្នះ។

៥.ទីក្រុង Lopburi៖ Lopburi ស្ថិតនៅភាគខាងជើងនៃទីក្រុងបាងកក ប្រទេសថៃ គឺជាជម្រើសដ៏ល្អមួយសម្រាប់អ្នកទេសចរដែលចង់ទទួលបានបទពិសោធន៍ឡើងភ្នំក្នុងទីធ្លាស្ងប់ស្ងាត់ និងសម្រាកលំហែជាមួយដីចម្រុះ។ ផ្លូវឡើងភ្នំនាំអ្នកទស្សនាទៅកាន់ Khao Chin Lae ដែលជាកំពូលភ្នំដ៏លេចធ្លោនៅក្នុងតំបន់ ដែលអ្នកអាចរីករាយនឹងទេសភាពធម្មជាតិដ៏ស្រស់បំព្រងនៅទីនោះ៕

ប្រទេសចិន ៖ សារព័ត៌មានបរទេសបានរាយការណ៍ កាលពីថ្ងៃទី៣ ខែធ្នូ ឆ្នាំ២០២៤ ថា រដ្ឋាភិបាលក្រុងប៉េកាំងបានលុបចោលវិធានការហាមឃាត់ការនាំចូលសាច់គោពីប្រទេសអូស្ត្រាលី ក្រោយពីចិនអនុវត្តវិធានការនេះតាំងពីអំឡុងពេលការឆ្លងរាតត្បាតនៃជំងឺកូវីដ-១៩ លើពិភពលោក និងធ្វើឱ្យប៉ះពាល់សេដ្ឋកិច្ចអូស្ត្រាលីយ៉ាងខ្លាំង ។

ក្រសួងពាណិជ្ជកម្មចិនបានចេញសេចក្តីប្រកាសលុបចោលវិធានការហាមឃាត់ការនាំចូលសាច់គោពីក្រុមហ៊ុនអូស្ត្រាលី ចំនួន២ ហើយចិននឹងនាំចូលសាច់គោអូស្ត្រាលីគ្រប់ប្រភេទឡើងវិញ ក្រោយពីចិនបាននាំចូលសាច់គោអូស្ត្រាលីមួយចំនួនតូចតាំងពីចុងឆ្នាំ២០២៣ ។

ចំណែកក្រសួងពាណិជ្ជកម្មអូស្ត្រាលីបានបង្ហាញក្តីរីករាយជាមួយសេចក្តីប្រកាសរបស់រដ្ឋាភិបាលក្រុងប៉េកាំង ដែលអនុញ្ញាតឱ្យនាំចូលសាច់គោអូស្ត្រាលីឡើងវិញ ពីព្រោះរយៈពេលកន្លងមកនេះ វិធានការហាមឃាត់ការនាំចូលសាច់គោរបស់ចិន បានធ្វើឱ្យអូស្ត្រាលីបាត់បង់ប្រាក់ចំណូលរហូតដល់២ម៉ឺនលានដុល្លារអូស្ត្រាលី ។

វិធានការហាមឃាត់ការនាំចូលសាច់គោរបស់ចិន ដែលជាប្រទេសដៃគូពាណិជ្ជកម្មដ៏ធំបំផុតរបស់អូស្ត្រាលី គឺអនុវត្តចាប់ពីឆ្នាំ២០២០ ដល់ឆ្នាំ២០២២ ។ វាជាពេលដែលសម្ព័ន្ធភាពរវាងប្រទេសទាំង២ តានតឹងយ៉ាងខ្លាំងដោយសារករណីជាច្រើន ជាពិសេស ករណីរដ្ឋាភិបាលទីក្រុង Canberra របស់អូស្ត្រាលី ហាមឃាត់ក្រុមហ៊ុន Huawei ចូលរួមក្នុងគម្រោងតភ្ជាប់ប្រព័ន្ធ និងអភិវឌ្ឍន៍បណ្តាញ 5G ។

មុនពេលអូស្ត្រាលីហាមឃាត់ក្រុមហ៊ុន Huawei របស់ចិន ប្រទេសទាំង២ មានបញ្ហាជាមួយគ្នាយូរមកហើយពាក់ព័ន្ធនឹងការបង្កើតឥទ្ធិពលលើប្រទេសដែនកោះនៅមហាសមុទ្រប៉ាស៊ីហ្វិកខាងត្បូង ។

ទោះយ៉ាងណា សម្ព័ន្ធភាពរវាងប្រទេសចិន និងអូស្ត្រាលីមានភាពល្អប្រសើរឡើង នៅពេលរដ្ឋាភិបាលអូស្ត្រាលីរបស់គណបក្សការងារស្ថិតក្រោមការដឹកនាំដោយលោកនាយករដ្ឋមន្ត្រី Anthony Albanese កាលពីឆ្នាំ២០២២ ។ លោក Anthony បានមកទស្សនកិច្ចនៅក្រុងប៉េកាំង នៅខែធ្នូ ឆ្នាំ២០២៣ និងជួបប្រធានាធិបតីចិន លោក ស៊ី ជិនពីង ដើម្បីស្តារទំនាក់ទំនងល្អឡើងវិញ ៕

នាពេលបច្ចុប្បន្ននេះសម្លៀកបំពាក់ប្រពៃណីកូរ៉េ ឬហៅថាហាន់បុកហាក់មានការថយចុះគួរឱ្យកត់សម្គាល់ ជាពិសេសក្នុងថ្ងៃរៀបអាពាហ៍ពិពាហ៍ដោយកូនក្រមុំ និងកូនកំលោះលែងស្លៀកឈុតបុរាណទៀតហើយ លើកលែងតែម្តាយរបស់កូនក្រមុំ និងកូនកំលោះប៉ុណ្ណោះដែលនៅតែបន្តស្លៀកឈុតនេះ។ ម្លៀកបំពាក់ប្រពៃណីកូរ៉េ ឬហៅថាហាន់បុកត្រូវបានគេចាត់ទុកថាល្អិតល្អន់ពេក ដូច្នេះកូនក្រមុំ និងកូនកំលោះនាពេលបច្ចុប្បន្ននេះបានជ្រើសរើសសម្លៀកបំពាក់សម័យថ្មីវិញដូចជារ៉ូបស និងអាវក្រហ្សេជាដើម។

ទោះជាយ៉ាងណាបើយើងក្រឡេកទៅមើលភ្ញៀវកិត្តយសដែលចូលរួមពិធីមង្គលការវិញ គឺឃើញថាភាគច្រើនទាំងប្រុសទាំងស្រីសុទ្ធតែនិយមស្លៀកឈុតពណ៌ខ្មៅ តើការស្លៀកឈុតពណ៌ខ្មៅចូលរួមពិធីមង្គលការមានអត្ថន័យដូចម្តេច? ហេតុអ្វីបានជាប្រជាជនកូរ៉និយមស្លៀកឈុតខ្មៅចូលរួមពិធីមង្គលការម្លេះ? សម្រាប់មូលហេតុដែលភ្ញៀវតែងតែស្លៀកឈុតពណ៌ខ្មៅចូលរួមពិធីមង្គលការ គឺដោយសារពួកគេចង់ផ្តោតការយកចិត្តទុកដាក់លើកូនក្រមុំតែម្នាក់គត់ ខណៈកូនក្រមុំស្លៀកឈុតពណ៌ស កូនកំលោះនិងភ្ញៀវត្រូវស្លៀកឈុតពណ៌ខ្មៅ ដើម្បីបង្កើនភាពលេចធ្លោដ៏កូនក្រមុំនៅថ្ងៃពិសេស។

ជាការពិតណាស់នៅតាមបណ្តាប្រទេសភាគច្រើនគិតថា ការស្លៀកឈុតខ្មៅគឺតំណាងឱ្យភាពសោកសៅ និងការរំលែកទុក្ខដ៏ក្រៀមក្រំ ផ្ទុយទៅវិញសម្រាប់ប្រទេសកូរ៉េការស្លៀកឈុតខ្មៅគឺជាការឱ្យតម្លៃដល់កូនក្រមុំ និងបង្កើនភាពលេចធ្លោដល់កូនក្រមុំក្នុងថ្ងៃពិសេស។ វប្បធម៌នេះបានលេចចេញយ៉ាងច្បាស់នៅក្នុងពិធីមង្គលការដ៏ល្បីមួយដែលបានប្រារព្ធឡើងកាលពីដើមខែវិច្ឆិកាក្នុងទីក្រុងសេអ៊ូលដោយមានការចូលរួមពីតារាល្បីៗជាច្រើនដូចជា៖ Jennie Black Pink, Song Hye-kyo, Byun Woo-seok និងតារាល្បីៗជាច្រើននាក់ទៀតសុទ្ធតែស្លៀកឈុតពណ៌ខ្មៅ។

នៅក្នុងវប្បធម៌កូរ៉េភ្ញៀវដែលស្លៀកសម្លៀកបំពាក់ពណ៌ភ្លឺស្អាតឈរក្បែរកូនក្រមុំត្រូវបានគេចាត់ទុកថា ឈ្លើយ ឬមិនឱ្យតម្លៃកូនក្រមុំ។ ផ្ទុយទៅវិញបើនិយាយពីវប្បធម៌នៅក្នុងប្រទេសកម្ពុជាយើង និងបណ្តាប្រទេសផ្សេងទៀត ភាគច្រើនភ្ញៀវដែលចូលរួមពិធីមង្គលការគឺស្លៀកសម្លៀកបំពាក់ចម្រុះពណ៌ ដោយមានការតុបតែងខ្លួនយ៉ាងឡូយឆាយ បង្ហាញពីភាពរីករាយនៅក្នុងពិធីមង្គលការ បើកាលណាភ្ញៀវស្លៀកឈុតពណ៌ខ្មៅគឺមិនល្អនោះទេ នេះបញ្ជាក់ថាវប្បធម៌កូរ៉េគឺមានការខុសប្លែកគ្នាខ្លាំងពីបណ្តាប្រទេសផ្សេងទៀត៕

Krish Arora អាយុ ១០ ឆ្នាំមកពីសាលា Hounslow របស់ចក្រភពអង់គ្លេស បានធ្វើឱ្យពិភពលោកភ្ញាក់ផ្អើលយ៉ាងខ្លាំងជាមួយនឹង IQ ១៦២ ខ្ពស់ជាងអ្នកប្រាជ្ញរូបវិទ្យា Albert Einstein និង Stephen Hawking ទៅទៀតដែល IQ របស់ពួកគាត់ត្រូវបានគេប៉ាន់ស្មានថាមានត្រឹមតែ ១៦០ ប៉ុណ្ណោះ។

នេះបើយោងតាមគេហទំព័របរទេសចុះផ្សាយថា កុមារា Krish Arora មាន IQ រហូតដល់ ១៦២ និងមានសមត្ថភាពពិសេសជាច្រើន។ ក្មេងប្រុសរូបនេះកាលពីអាយុ ៤ ឆ្នាំអាចដោះស្រាយបញ្ហាគណិតវិទ្យាដ៏ស្មុគស្មាញត្រឹមតែមួយប៉ព្រិចភ្នែកប៉ុណ្ណោះ ហើយអាចអានមេរៀនយ៉ាងស្ទាត់ជំនាញបំផុត។

អ្នកស្រី Nischal ដែលជាម្តាយរបស់ Krish Arora បាននិយាយថា នៅអាយុ ៤ ឆ្នាំសមត្ថភាពសរសេររបស់ Krish គឺល្អខ្លាំងណាស់ លើសពីនេះក្មេងប្រុសម្នាក់នេះក៏ធ្លាប់លលេងអុកឈ្នះគ្រូចំនួន ៤ ដងផងដែរ។ Krish Arora ក៏មានទេពកោសល្យពីធម្មជាតិសម្រាប់តន្ត្រីផងដែរ បន្ទាប់ពីសិក្សាព្យាណូបានត្រឹមតែ ១ ឆ្នាំកន្លះ Krish ទទួលបានកម្រិត ៨ ដែលជាសមិទ្ធិផលដ៏គួរឱ្យកត់សម្គាល់។

លើសពីនេះ Krish គឺមានសមត្ថភាពដ៏កម្រមួយដោយការស្តាប់ភ្លេងតែម្តង អាចលេងព្យាណូបានដោយមិនចាំបាច់បង្រៀន មានន័យថាគាត់អាចកំណត់ចំណាំភ្លេងនីមួយនៅលើព្យាណូ ដោយខ្លួនឯងបាន។ ថ្មីៗនេះ Krish ត្រូវបានអង្គការ Mensa ដែលជាអង្គការដ៏មានកិត្យានុភាពសម្រាប់មនុស្សឆ្លាតបំផុតក្នុងពិភពលោកទទួលស្គាល់សមត្ថភាពដ៏ពូកែអស្ចារ្យនេះ ដោយអនុញ្ញាតឱ្យចូលរៀននៅសាលា Queen Elizabeth’s School ដែលជាវិទ្យាល័យកំពូលឈានមុខមួយនៅក្នុងប្រទេសអង់គ្លេស។

ទន្ទឹមនឹងនេះប្អូនស្រីភ្លោះរបស់ Krish ដែលមានឈ្មោះថា Keira ក៏មានភាពឆ្លាតវៃ និងមានទេពកោសល្យខ្លាំងពូកែផងដែរ។ នាងត្រូវបានគេទទួលចូលរៀននៅវិទ្យាល័យចំនួន ៤ ក្នុងប្រទេស ដោយសារសមត្ថភាពរបស់ពួកគេឆ្លាតជាងមនុស្សដទៃ ទោះអាយុតិចក៏គេឱ្យចូលរៀនថ្នាក់វិទ្យាល័យជាមួយមនុស្សធំដែរ៕