ចាប់ពីដើមខែមករា ឆ្នាំ២០២៥នេះតទៅ គ្រឹះស្ថានអង្គរ នឹងចាប់ផ្ដើមដាក់លក់ប័ណ្ណទស្សនារមណីយដ្ឋាន បេងមាលា ក្នុងតម្លៃ៤មុឺនរៀល (១០ដុល្លារ) និងរមណីយដ្ឋានដ្ឋានក្បាលស្ពាន តម្លៃ២មុឺនរៀល (៥ដុល្លារ) សម្រាប់ភ្ញៀវទេសចរណ៍បរទេស។
សម្រាប់ភ្ញៀវដែលបានទិញប័ណ្ណទស្សនារមណីយដ្ឋានអង្គរតម្លៃ៣៧ដុល្លារ អាចនៅទស្សនាក្នុងរមណីយដ្ឋានទាំងពីរខាងលើដោយឥតគិតថ្លៃ។.png)
ប្រាសាទបេងមាលា មានទីតាំងស្ថិតនៅភូមិបេងមាលា ស្រុកស្វាយលើ ខេត្តសៀមរាប។ ប្រាសាទនេះ មានរចនាប័ទ្មដូចទៅនឹងប្រាសាទអង្គរវត្ត ដោយបានកសាងក្នុងរាជ្យព្រះបាទសូរ្យវរ្ម័នទី២។
បើយោងតាមអនុក្រឹត្យរបស់រាជរដ្ឋាភិបាលនៅតំបន់ប្រាសាទបេងមាលា មានទំហំដល់ទៅ ៨៦៩ហិកតា។ នៅខាងកើតប្រាសាទនេះ មានបារាយណ៍ដ៏ធំមួយ មានបណ្តោយ ១៦០០ម៉ែត្រ និងទទឹង ៨០០ម៉ែត្រ។ តួប្រាសាទមានទំហំបណ្តោយ ១០៧៦ម៉ែត្រ ទទឹង ៩១៣ម៉ែត្រ។
គួរបញ្ជាក់ថា ប្រាសាទបេងមាលា ជាបេតិកភណ្ឌជាតិ ដោយដំបូងឡើយប្រាសាទនេះមានសភាពទ្រុឌទ្រោមខ្លាំង ដែលការបែកបាក់មានទំហំពី៦០ ទៅ៧០ភាគរយ ខណៈបច្ចុប្បន្នត្រូវបានអាជ្ញាធរជាតិអប្សរា និងបណ្ឌិតសភាបេតិកភណ្ឌចិន ធ្វើការរួមគ្នាដើម្បីស្រាវជ្រាវ និងជួសជុល៕
