ដេត ស្រីនាឌ ដែលសម្រេចចិត្តពហិកាមិនចូលរួមប្រកួត Miss Planet International 2024 ក្នុងថ្ងៃផ្តាច់ព្រ័ត្របានធ្វើឱ្យមានការរិះគន់យ៉ាងខ្លាំងពីសំណាកអ្នកលេងបណ្តាញសង្គម។ ទោះជាយ៉ាងណា ស្រ្តីម្នាក់ទំនងជាម្តាយ និងបុរសម្នាក់អះអាងថា ស្រីនាឌ គឺជាប្អូន បានចេញមកបង្ហើបខ្លះៗថាមានហេតុផលនៅពីក្រោយទើបនាងសម្រេចចិត្តធ្វើបែបនេះ។

តាមរយៈសារសំឡេងមួយដែលបានចែករំលែកនៅលើបណ្តាញសង្គមសំឡេងស្ត្រីម្នាក់បានហៅ ដេត ស្រីនាឌ គឺជាកូន គាត់បាននិយាយថា មានរឿងច្រើនណាស់នៅក្នុងហ្នឹង មិនមែនចង់ដកខ្លួននោះទេបេក្ខភាពផ្សេងៗទាំង ស្រីនាឌ គឺខំប្រឹងដល់ថ្នាក់ដាក់សេរ៉ូមនៅសៀមរាបនៅតែតស៊ូងើបស្លៀកពាក់មកសាលាប៊ែលធី មកផ្ទះម៉ែរ៊ួយ ស្រីនាឌឡើងស្គម ៤០ជាងគីឡូ នៅសល់តែ៣០ជាងគីឡូ អ្នកណាមួយដែលគេមិនស្រលាញ់មុខមាត់ប្រទេសជាតិ មុខមាត់គ្រួសារ ទាល់តែនៅជិតម្នាក់នោះទើបបានយល់ ទទួលលទ្ធផលពីគេមកបានដឹង»។

ចំណែកគណនីហ្វេកប៊ុកមួយឈ្មោះថា Tim Ravy បានបង្ហោះសំណេរថា «និយាយបន្តិច ពួកអ្នកដែលជេប្អូនខ្ញុំ Det Sreyneat ខ្ញុំចង់សួរពួកអស់លោកវិញ មានដឹងរឿងនៅរឿងពីក្រោយ រឺ ផ្ទៃក្នុងគេមិចអត់បានមួយៗចេញមកជេរ ចាំតែជាន់ ជាពិសេសម្នាក់មួយអីក្នុង TikTok សុទ្ធតែគេឆាតប្រាប់វាពីប្អូនខ្ញុំ អ្នកដែលឆាតទៅនៅផ្ទះមួយលោកមែនហាស បានដឹងចរិតប្អូនលោកច្បាស់ម៉េស។ មុននឹងថាមុននឹងជេរមុននឹងស្តី គួរតែរកព័ត៌មានឱ្យបានគ្រប់ជ្រុងជ្រោយសិន ចាំជេចាំថា កម្មវិធីសម្តែង»។

គួរបញ្ជាក់ផងដែរថា ដេត ស្រីនាឌ បានចេញមកប្រកាសពហិកាមិនចូលរួមកម្មវិធីប្រកួត Miss Planet International នៅព្រឹកថ្ងៃទី២៧ ខែវិច្ឆិកា ខណៈនៅពេលយប់ជាពេលវេលាប្រកួតផ្តាច់ព្រ័ត្រ។ ការប្រកាសនេះបានធ្វើឱ្យទស្សនិកជនភ្ញាក់ផ្អើលយ៉ាងខ្លាំងនិងបានលើកឡើងថានាងមិនគិតមុខមាត់ប្រទេសជាតិជាធំ ជាមនុស្សគ្មានទំនួលខុសត្រូវ។ ក្រោយពីរឿងនេះរីករាលខ្លាំង ការបង្ហោះរបស់ ដេត ស្រីនាឌ ត្រូវបានបាត់ចេញពីហ្វេកប៊ុកវិញ ខណៈទំព័រផ្លូវការ Miss Planet Cambodia បានចេញសេចក្តីប្រកាសថានាងមិនអាចចូលរួមប្រកួតបានដោយសារតែបញ្ហាសុខភាពដោយលំដាប់រងទី១នឹងចូលរួមប្រកួតវិញ។

គិតមកទល់នឹងព្រឹកថ្ងៃទី២៩ វិច្ឆិកា ដេត ស្រីនាឌ មិនទាន់ចេញមកបកស្រាយពីមូលហេតុជាក់លាក់នៃការសម្រេចចិត្តបោះបង់ការប្រកួត ហើយទស្សនិកជនក៏ចង់ដឹងចេញពីមាត់របស់ ដេត ស្រីនាឌ ផ្ទាល់៕

ប្រទេសអង់គ្លេស ៖ សមាជិកសភាអង់គ្លេសបានអនុម័តលើសេចក្តីព្រាងច្បាប់ហាមយុវជនទិញ និងប្រើប្រាស់បា.រី អេឡិចត្រូនិក ដើម្បីការពារផលប៉ះពាល់សុខភាព ចាប់ពីឆ្នាំ២០២៥ តទៅ ។ រដ្ឋាភិបាលទីក្រុងឡុងដ៍បញ្ជាក់ថា មានគោលដៅបង្កើតក្រុមយុវជនមិនប្រើប្រាស់បា.រី ដំបូងគេនៅប្រទេសអង់គ្លេស ។

សារព័ត៌មាន AFP បានរាយការណ៍ កាលពីថ្ងៃទី២៧ ខែវិច្ឆិកា ឆ្នាំ២០២៤ ថា សមាជិកសភាចំនួន៤១៥នាក់ បានអនុម័តលើសេចក្តីព្រាងច្បាប់ហាមប្រើប្រាស់បារីអេឡិចត្រូនិក ហើយមានមតិមិនឯកភាពត្រឹមតែ៤៧សំឡេងប៉ុណ្ណោះ ។ ច្បាប់នេះនឹងការពារមិនឱ្យយុវជន ដែលកើតក្រោយថ្ងៃទី១ ខែមករា ឆ្នាំ២០០៩ ប្រើប្រាស់បារីអេឡិចត្រូនិក ប៉ុន្តែអង់គ្លេសនឹងបង្កើនអាយុអប្បបរមាយុវជនអាចទិញបារីបាន ។

សេចក្តីព្រាងច្បាប់នេះ គឺស្រដៀងគ្នានឹងសេចក្តីព្រាងច្បាប់របស់រដ្ឋាភិបាលអាណត្តិមុន ប៉ុន្តែត្រូវបានផ្អាកកាលពីដើមឆ្នាំ២០២៤ ពេលលោក Rishi Sunak នាយករដ្ឋមន្ត្រីអង់គ្លេសនាពេលនោះ អំពាវនាវឱ្យបោះឆ្នោតមុនកំណត់ ។ នៅឆ្នាំ២០២៤ នាយករដ្ឋមន្ត្រីអង់គ្លេសថ្មី លោក Keir Starmer និងមន្ត្រីរដ្ឋាភិបាល ក៏បានយកសេចក្តីព្រាងច្បាប់នេះមកពិចារណាឡើងវិញ ដើម្បីការពារសុខភាពយុវជនតាមការស្នើរបស់ភ្នាក់ងារសុខភាពជាតិ ។

សេចក្តីព្រាងច្បាប់ថ្មីនឹងកំណត់លើការផ្សព្វផ្សាយពាណិជ្ជកម្មគាំទ្របារីអេឡិចត្រូនិក, ការបង្ហាញរសជាតិ និងវេចខ្ចប់បារី ដើម្បីកាត់បន្ថយភាពទាក់ទាញកុមារ និងយុវជន ។ រដ្ឋាភិបាលទីក្រុងឡុងដ៍បញ្ជាក់ថា ប្រទេសអង់គ្លេសនឹងអនុវត្តច្បាប់ហាមឃាត់យុវជនទិញ និងប្រើប្រាស់បារីអេឡិចត្រូនិក ចាប់ពីឆ្នាំ២០២៥ តទៅ ក្រោមច្បាប់ដាច់ដោយឡែក ។

ក្រៅពីនេះ រដ្ឋាភិបាលអង់គ្លេសនឹងបន្ថែមតំបន់ហាមជក់បារីផងដែរ ដូចជា ៖ កន្លែងក្មេងលេង, សាលារៀន និងបរិវេណខាងក្រៅមន្ទីរពេទ្យ ។ រីឯនៅក្លិបរាត្រី និងកន្លែងធ្វើការ រដ្ឋាភិបាលអង់គ្លេសបានហាមឃាត់រួចហើយកាលពីឆ្នាំ២០០៧ ដោយសារមើលឃើញថា ការជក់បារីមិនត្រឹមតែបំផ្លាញសុខភាពអ្នកជក់ប៉ុណ្ណោះទេ ប៉ុន្តែវានឹងបំផ្លាញសុខភាពសមាជិកគ្រួសារ និងមនុស្សជុំវិញខ្លួន ៕

Influencer ដ៏ល្បីល្បាញម្នាក់របស់ឥណ្ឌា Simran Balar Jain មានអ្នកតាមដាន Instagram ជាង ១.៤ លាននាក់ បានធ្វើការពិសោធន៍ដ៏គួរឱ្យភ្ញាក់ផ្អើលមួយ នៅពេលដែលនាងបានធ្វើដំណើរទៅដល់ទីក្រុងតូក្យូប្រទេសជប៉ុន។

Simran Balar Jain បានបង្ហោះវីដេអូមួយ ដោយដោះស្បែកជើង ពាក់តែស្រោមជើងពណ៌សដើរតាមផ្លូវក្នុងទីក្រុងតូក្យូរយៈពេល ១៥ នាទី ប៉ុន្តែអ្វីដែលគួរឱ្យភ្ញាក់ផ្អើលនោះគឺថា ស្រោមជើងពណ៌សរបស់នាងនៅតែស្អាតដដែល គ្មានស្នាមប្រឡាក់ដីទាល់តែសោះ។

នេះបញ្ជាក់ថាកម្រិតអនាម័យនៅតាមដងផ្លូវក្នុងទីក្រុងតូក្យូគឺល្អឥតខ្ចោះ ហើយនាងបានវាយតម្លៃថាជប៉ុនគឺជាប្រទេសស្អាតជាងគេលើពិភពលោក។ វីដេអូនេះបានសាយភាយយ៉ាងឆាប់រហ័សនៅលើបណ្តាញសង្គម ដោយទាក់ទាញអ្នកចូលមើលជាង ២៦ លានដងនៅលើ Instagram។ ទោះជាយ៉ាងណាក៏មានមតិមួយចំនួនរិះ.គន់ថា “វីដេអូរបស់នាងនិយាយបំផ្លើសការពិតទាំងស្រុង” អ្នកខ្លះក៏ថា “ពួកគេមិនជឿទេ”។ Simran Balar Jain គឺជាបុគ្គលមានឥទ្ធិពលម្នាក់នៅក្នុងបណ្តាញសង្គម ដោយជាទូទៅនាងតែងតែចែករំលែកវីដេអូនៃបទពិសោធន៍ធ្វើដំណើរ និងការយល់ដឹងអំពីភាពស្រស់ស្អាត។

គួររំលឹកដែរថាកាលពីឆ្នាំ ២០២៣ ទីក្រុងតូក្យូត្រូវបានចាត់ថ្នាក់ថា ជាទីក្រុងមួយក្នុងចំណោមទីក្រុងស្អាតបំផុតទាំង ១០ នៅលើពិភពលោកដោយក្រុមហ៊ុនប្រឹក្សាសកល Mercer Eco-City ។ ប្រទេសជប៉ុនមានភាពល្បីល្បាញដោយសារផ្លូវស្អាត ប្រព័ន្ធគ្រប់គ្រងកាកសំណល់ប្រកបដោយប្រសិទ្ធភាព និងការបំពុលតិចតួចបំផុត។ ភាពស្អាតស្អំត្រូវបានបញ្ចូលយ៉ាងជ្រៅនៅក្នុងវប្បធម៌ជប៉ុន ដែលចាត់ទុកថាជាការឆ្លុះបញ្ចាំងពីសណ្តាប់ធ្នាប់ និងវិន័យល្អ។

ជនជាតិជប៉ុនចាត់ទុកថាទង្វើនៃការចោលសំរាម គឺជាសញ្ញានៃការមិនគោរពដល់អ្នកដទៃ និងខ្វះការគោរពដល់សង្គម។ ទីក្រុងតូក្យូដែលមានប្រជាជនជិត ១៤ លាននាក់រស់នៅ មានធុងសំរាមសាធារណៈតិចតួចណាស់ ដោយសារមនុស្សភាគច្រើនយកសំរាមទៅផ្ទះ។ ការចោលសំរាមពាសវាលពាសកាល គឺជាអំពើខុសច្បាប់នៅក្នុងប្រទេសជប៉ុន អ្នកបំពានអាចត្រូវបានកាត់ទោសឱ្យជាប់ពន្ធនាគាររហូតដល់ ៥ ឆ្នាំ និងពិន័យជាប្រាក់រហូតដល់ ១០ លានយ៉េន (ប្រមាណជាង ៦,៦០០ ដុល្លារអាមេរិក) ឯណោះ៕

ឥណ្ឌូណេស៊ី៖ កម្មវិធី “អាហារថ្ងៃត្រង់ឥតគិតថ្លៃ” របស់ប្រទេសឥណ្ឌូនេស៊ីនឹងចាប់ផ្តើមសាកល្បងនៅខែក្រោយ ហើយនឹងបើកដំណើរការជាផ្លូវការនៅដើមឆ្នាំ ២០២៥ ក្នុងគោលបំណងកាត់បន្ថយភាពក្រីក្ររបស់ប្រជាជន ក៏ដូចជាបង្កើនការងារសម្រាប់ប្រជាជនផងដែរ។

យោងតាមសារព័ត៌មានបរទេសចុះផ្សាយថា សម្រាប់ពលរដ្ឋពិការភាព ស្ត្រីមានផ្ទៃពោះ កុមារ និងមនុស្សចាស់ អាចទទួលទានអាហារថ្ងៃត្រង់ឥតគិតថ្លៃ នៅគ្រប់ហាងទូទាំងប្រទេសតែម្តង មានន័យថាម្ចាស់ភោជនីយដ្ឋានទាំងអស់បានសហការជាមួយរដ្ឋាភិបាលដើម្បីជួយកាត់បន្ថយភាពក្រីក្ររបស់ប្រជាជន និងបង្កើនការងារសម្រាប់ប្រជាជនផងដែរ។

កម្មវិធីនេះដំបូងឡើយមានគោលបំណងសម្រាប់តែសិស្សមត្តេយ្យសិក្សា និងកុមារនៅសាលា ដែលជាផ្នែកនៃកិច្ចខិតខំប្រឹងប្រែងដើម្បីដោះស្រាយបញ្ហាកង្វះអាហារូបត្ថម្ភរបស់កុមារ ប៉ុន្តែក្រោយមកក៏ត្រូវបានពង្រីកដោយរួមបញ្ចូលទាំងស្ត្រីមានផ្ទៃពោះ ជនពិការ និងមនុស្សចាស់។ យោងតាមទីភ្នាក់ងារអាហារូបត្ថម្ភជាតិរបស់ប្រទេសឥណ្ឌូនេស៊ី អាហារនីមួយៗត្រូវបានគេប៉ាន់ស្មានថាមានតម្លៃប្រហែល ១៥,០០០ រូពី (ប្រមាណ ០.៩៥ ដុល្លារអាមេរិក)។

ប្រធានទីភ្នាក់ងារអាហារូបត្ថម្ភជាតិរបស់ឥណ្ឌូនេស៊ី លោក Dadan Hindayana បាននិយាយថា កម្មវិធីនេះនឹងចាប់ផ្តើមសាកល្បងនៅខែធ្នូ ពីទីក្រុង Sabang ទៅកាន់ទីក្រុង Merauke បន្ទាប់មកនឹងត្រូវដាក់ឱ្យដំណើរការទូទាំងប្រទេសនៅដើមឆ្នាំ ២០២៥។ លោក Dadan បានបន្ថែមថា កម្មវិធី “អាហារថ្ងៃត្រង់ឥតគិតថ្លៃ” នឹងចាប់ផ្តើមជាផ្លូវការនៅថ្ងៃទី ២ ខែមករា ឆ្នាំ ២០២៥ ជាមួយនឹងទំហំហាងបាយចំនួន ៩២៣ ក្នុងរយៈពេល ៣ ខែដំបូង បន្ទាប់មកនឹងពង្រីកដល់ ៥,០០០ ចាប់ពីខែកក្កដា ដល់ខែសីហា ឆ្នាំ ២០២៥។

ហាងបាយនីមួយៗត្រូវបានគេរំពឹងថានឹងបម្រើមនុស្សប្រហែល ៣,០០០ នាក់ក្នុងមួយថ្ងៃ។ វាត្រូវបានគេប៉ាន់ប្រមាណថាកម្មវិធីនេះក៏នឹងបង្កើតការងារប្រហែល ១.៥ លានកន្លែងនៅក្នុងប្រទេស និងផ្តល់អត្ថប្រយោជន៍ដល់មនុស្សប្រហែល ៨២.៩ លាននាក់ក្នុងរយៈពេល ២ ឆ្នាំដំបូងនៃប្រតិបត្តិការផងដែរ។ គំនិតផ្តួចផ្តើមខាងលើគឺជាការប្តេជ្ញាចិត្តនៃយុទ្ធនាការរបស់ប្រធានាធិបតីឥណ្ឌូនេស៊ី Prabowo Subianto៕

សហរដ្ឋអាមេរិក ៖ ផែនការរបស់លោក Donald Trump គឺការដំឡើងពន្ធទំនិញនាំចូលពីប្រទេសកាណាដា និងម៉ិកស៊ិក ស្មើ២៥% អាចធ្វើឱ្យប៉ះពាល់ដល់ប្រាក់ចំណេញក្រុមហ៊ុនផលិតរថយន្តនានារបស់អាមេរិក ជាពិសេស ក្រុមហ៊ុន General Motors (GM) ។

លោក Trump ដែលជាប់ឆ្នោតជាប្រធានាធិបតីអាមេរិកថ្មី បានប្រកាសកាលពីថ្ងៃទី២៥ ខែវិច្ឆិកា ឆ្នាំ២០២៤ ថា លោកនឹងបញ្ជាឱ្យដំឡើងពន្ធទំនិញនាំចូលពីប្រទេសដៃគូពាណិជ្ជកម្មសំខាន់ៗ ចំនួន៣ គឺ ៖ កាណាដា, ម៉ិកស៊ិក និងចិន ស្របតាមគោលនយោបាយ «America First» ដែលលោកធ្លាប់សន្យាពេលរកសំឡេងឆ្នោត ។

ហេតុនេះ លោកនឹងដំឡើងពន្ធទំនិញនាំចូលពីកាណាដា និងម៉ិកស៊ិក ស្មើនឹង២៥% រហូតដល់ប្រទេសទាំងពីរដោះស្រាយបញ្ហាថ្នាំញៀន ជាពិសេស ថ្នាំញៀនហ្វេនតានីល (Fentanyl) ព្រមទាំងដោះស្រាយបញ្ហាជនភៀសខ្លួន ។ ក្រៅពីនេះ លោកនឹងដំឡើងពន្ធទំនិញនាំចូលពីចិន លើសមុន១០% ។

ប៉ុន្តែការដំឡើងពន្ធរបស់លោក Trump បែរជាធ្វើឱ្យប៉ះពាល់ក្រុមហ៊ុនរបស់អាមេរិកទៅវិញ ជាពិសេស ក្រុមហ៊ុនផលិតរថយន្ត ចំនួន៣ ប៉ះពាល់ខ្លាំងជាងគេ គឺ ៖ General Motors, Ford និងក្រុមហ៊ុន Stellantis ដោយសារក្រុមហ៊ុនអាមេរិកទាំងនេះមានរោងចក្រនៅក្រៅប្រទេស និងនាំចូលគ្រឿងបន្លាសពីក្រៅប្រទេសមកអាមេរិក ។

General Motors ស្ថិតក្នុងចំណោមក្រុមហ៊ុនផលិតរថយន្តឈានមុខរបស់អាមេរិក ដែលក្រុមហ៊ុននេះនាំចេញរថយន្តពីម៉ិកស៊ិក មកអាមេរិកខាងជើង ព្រមទាំងក្រុមហ៊ុន Ford និង Stellantis នឹងរងផលប៉ះពាល់ដោយសារការដំឡើងពន្ធទំនិញរបស់លោក Trump ។ តាមទិន្នន័យរបស់សមាគមឧស្សាហកម្មរថយន្តម៉ិកស៊ិកបញ្ជាក់ថា ក្រុមហ៊ុនផលិតរថយន្ត ចំនួន១០ ដែលមានរោងចក្រនៅម៉ិកស៊ិក បានផលិតរថយន្តសរុបចំនួន១លាន៤សែនគ្រឿង នៅឆមាសទី១ ឆ្នាំ២០២៤ ក្នុងនោះរថយន្ត៩០% បាននាំចេញពីម៉ិកស៊ិក មកអាមេរិក ។

ក្រុមហ៊ុនវិភាគទិន្នន័យលំដាប់ពិភពលោក Global Data ឱ្យដឹងថា ក្រុមហ៊ុន General Motors របស់អាមេរិក នឹងនាំចូលរថយន្តពីកាណាដា និងម៉ិកស៊ិក ស្មើជាង៧៥ម៉ឺនគ្រឿង នៅឆ្នាំ២០២៤ ។ ក្រៅពីនេះ ក្រុមហ៊ុននឹងនាំចូលរថយន្តភីកអាប់យក្ស Chevy Silverado ឬ GMC Sierra ជិត៣៧ម៉ឺនគ្រឿង ព្រមទាំងរថយន្ត SUV ទំហំកណ្តាល ជិត៣៩ម៉ឺនគ្រឿង ។

រោងចក្ររបស់ក្រុមហ៊ុន General Motors នៅម៉ិកស៊ិក ក៏បានផលិតរថយន្តអគ្គិសនីថ្មី២ម៉ាក គឺ Equinox និង Blazer SUV អាចនឹងរងផលប៉ះពាល់ដោយសារការដំឡើងពន្ធរបស់លោក Trump ផងដែរ ។ ក្រុមហ៊ុននេះមានបុគ្គលិកចំនួន១២៥,០០០នាក់នៅអាមេរិកខាងជើង ហើយការលក់រថយន្តធ្លាក់ចុះនៅម៉ិកស៊ិក នឹងប៉ះពាល់ដល់ប្រាក់ចំណេញក្រុមហ៊ុនក្នុងតំបន់ ។

ក្រៅពីនេះ ការដំឡើងពន្ធ ក៏បានធ្វើឱ្យការចំណាយដើមទុនសម្រាប់ដំឡើងរថយន្តនៅអាមេរិកកើនឡើងផងដែរ ដោយសារ General Motors បាននាំចូលគ្រឿងបន្លាស់រថយន្តពីកាណាដា និងម៉ិកស៊ិក ស្មើជាង៥០% នៃគ្រឿងបន្លាស់រថយន្តទាំងអស់មកអាមេរិក ៕