Asaro គឺជាក្រុមកុលសម្ព័ន្ធមួយដែលមានភាពល្បីល្បាញខ្លាំងនៅប៉ាពួញូហ្គីណេ ដោយសារតែរបាំងមុខគួរឱ្យខ្លា.ច និងចរិតលក្ខណៈដ៏ចម្លែករបស់ពួកគេ។ ក្រុមកុលសម្ព័ន្ធនេះបានទាក់ទាញការចាប់អារម្មណ៍ខ្លាំងពីអ្នកជំនាញ និងភ្ញៀវទេសចរជុំវិញពិភពលោក ដោយសារពួកគេមើលទៅខុសពីក្រុមកុលសម្ព័ន្ធផ្សេងទៀត។ ជាទូទៅពួកគេតែងតែពាក់របាំងមុខធ្វើពីភក់ជារូបយក្ស ឬបិសាច ពាក់ក្រចកដៃវែងៗ ដើរប្រមាញ់សត្វនៅក្នុងព្រៃ មើលទៅគួរឱ្យខ្លាច និងចម្លែកបំផុត។

Asaro មានឈ្មោះក្រៅហៅថា “បុរសភក់” រស់នៅភាគខាងកើតនៃប្រទេស ក្បែរទន្លេអាសារ៉ូ ដូច្នេះឈ្មោះរបស់ពួកគេគឺដាក់តាមទន្លេនេះ។ យោងតាមរឿងព្រេងនិទានថា ជនជាតិអាសារ៉ូបានចាញ់ក្នុងសមរភូមិដោយកុលសម្ព័ន្ធខ្ពង់រាបមួយទៀត ហើយពួកគេក៏ភៀសខ្លួនទៅទន្លេអាសារ៉ូ។ នៅពេលដែលធ្លាក់ចូលទៅក្នុងទន្លេ អ្នកចម្បាំង Asaro ត្រូវបានគ្របដណ្ដប់ដោយភក់ពណ៌ស ដែលធ្វើឱ្យកុលសម្ព័ន្ធគូប្រជែងមានការភ័យខ្លាច ពីព្រោះពួកគេគិតថា ទាំងនេះគឺជាព្រលឹងដែលត្រលប់មកសងសឹកវិញ។

ចាប់ពីពេលនោះមកប្រជាជន Asaro ក៏បានចាប់ផ្តើមធ្វើរបាំងភក់ និងក្លែងធ្វើចលនារបស់ខ្មោច ដើម្បីបន្លាចសត្រូវទាំងអស់។ យោងតាមការសិក្សា ការពាក់របាំងមុខធ្វើពីភក់ជារូបយក្ស ឬបិសាច អាចធ្វើឱ្យសត្រូវភ័យខ្លាច ឈ្នះគ្រប់កិច្ចការ ដោយសាររបាំងមុខនេះតំណាងឱ្យព្រលឹងវិញ្ញាណរបស់បុព្វបុរសជំនាន់មុន។ ទោះជាយ៉ាងណា អ្នកជំនាញមិនទាន់ដឹងថាក្រុមកុលសម្ព័ន្ធនេះកើតឡើងតាំងពីពេលណានោះទេ ព្រោះប្រវតិ្តរបស់ប៉ាពួញូហ្គីណេកម្រកត់ត្រាទុកណាស់ ធ្វើឱ្យមនុស្សជាច្រើនមិនដឹងថាពួកគេមានអាយុប៉ុន្មាននោះទេ ដោយសារថ្ងៃខែឆ្នាំកំណើតរបស់ពួកគេមិនត្រូវបានកត់ត្រាទុក។

កាលពីមុនកុលសម្ព័ន្ធមួយក្រុមនេះមានចរិតកាចសាហាវខ្លាំងណាស់ ប៉ុន្តែនៅពេលដែលពិភពលោកជឿនលឿន អ្វីៗក៏បានប្រែប្រួលធ្វើឱ្យកុលសម្ព័ន្ធមួយនេះក្លាយជាក្រុមមនុស្សដែលលែងចូលរួមក្នុងសង្គ្រាម ឬធ្វើឃាតទៀតហើយ។ ក្រៅពីបម្រើភ្ញៀវទេសចរ កុលសម្ព័ន្ធនេះក៏ល្បីខាងជំនាញធ្វើស្រែចម្ការ ជាពិសេសការដាំដំឡូងផ្អែម។ ដូច្នេះភ្ញៀវទេសចរដែលចង់ដឹងចង់ឃើញពីជីវិតរស់នៅប្រចាំថ្ងៃរបស់ Asaro អាចទៅប្រទេសប៉ាពួញូហ្គីណេ ចូលរួមក្នុងពិធីបុណ្យ Mount Hagen ដែលជាកន្លែងកុលសម្ព័ន្ធនៅ Papua New Guinea ប្រមូលផ្តុំគ្នាដើម្បីសំដែង ឬទៅ Goroka ផ្ទះរបស់ប្រជាជនភក់ Asaro តែម្តងក៏បាន៕

កាលពីថ្ងៃទី១ ខែធ្នូ ឆ្នាំ២០២៤ សារព័ត៌មាន Reuters រាយការណ៍ថា ខ្យល់ព្យុះ Fengal បានបោកបក់មកកាន់តំបន់ភាគខាងត្បូងប្រទេសឥណ្ឌា បន្ទាប់ពីខ្យល់ព្យុះនេះបោកបក់លើប្រទេសស្រីលង្កា ដែលបណ្តាលឱ្យមានទឹកជំនន់ធ្ងន់ធ្ងរក្នុងតំបន់ជាច្រើន និងបណ្តាលឱ្យពលរដ្ឋប្រទេសទាំងពីរស្លា.ប់ យ៉ាងហោចណាស់ ១៩នាក់ ។

ឥទ្ធិពលខ្យល់ព្យុះនេះបណ្តាលឱ្យមានទឹកជំនន់នៅរដ្ឋ Tamil Nadu និងតំបន់ Puducherry ស្ថិតនៅភាគខាងកើតប្រទេសឥណ្ឌា បន្ទាប់ពីវាបានប្តូរទិសដៅពីឈូងសមុទ្រ Bengal កាលពីថ្ងៃទី៣០ ខែវិច្ឆិកា កន្លងមក ។

តំបន់ Puducherry មានភ្លៀងធ្លាក់យ៉ាងខ្លាំងក្នុងរយៈពេល៣០ឆ្នាំ ដោយសារឥទ្ធិពលខ្យល់ព្យុះ ហើយតំបន់មួយចំនួនរបស់ទីក្រុង Chennai លិចនៅក្រោមទឹក ដែលធ្វើឱ្យពលរដ្ឋ៣នាក់ស្លាប់ដោយសារខ្សែភ្លើងឆក់ ។ វាប៉ះពាល់ដល់ការធ្វើដំណើរតាមផ្លូវសាធារណៈទាំងអស់ ហើយជើងហោះហើរក្នុងទីក្រុងនេះបានផ្អាកបណ្តោះអាសន្ន កាលពីថ្ងៃទី៣០ ខែវិច្ឆិកា និងដំណើរការឡើងវិញនៅព្រឹកថ្ងៃទី១ ខែធ្នូ ក្រោយពីភ្លៀងធ្លាក់តិចជាងមុន ។

រដ្ឋាភិបាលឥណ្ឌាបានបញ្ជាឱ្យកងទ័ពបង្កើនកម្លាំងជួយសង្គ្រោះពលរដ្ឋរងគ្រោះដោយសារទឹកជំនន់ ក្នុងតំបន់គ្រីសាណាថា ស្មើជាង៥០០គ្រួសារ ដែលទឹកបានលិចលំនៅឋានពួកគេក្នុងកម្ពស់ជាង១៥០សង់ទីម៉ែត្រ ។ រហូតមកដល់ថ្ងៃទី១ ខែធ្នូ នេះ កងទ័ពបានជួយជម្លៀសពលរដ្ឋជាង១០០នាក់ ចេញពីលំនាឋានទៅកាន់កន្លែងមានសុវត្ថិភាព ។

គួរបញ្ជាក់ថា ខ្យល់ព្យុះ Fengal បានបម្លាស់ទីយឺតៗនៅភាគខាងជើងរដ្ឋ Tamil Nadu និងឆ្នេរសមុទ្រតំបន់ Puducherry ហើយវាក៏ចាប់ផ្តើមខ្សោយកម្លាំង ។ កន្លងមក ខ្យល់ព្យុះនេះបានបោកបក់មកលើប្រទេសស្រីលង្កា បណ្តាលឱ្យភ្លៀងធ្លាក់ខ្លាំងប៉ះពាល់ពលរដ្ឋចំនួន១៣៨,៩៤៤គ្រួសារ និងមានមនុស្សស្លាប់១៦នាក់ ។

បើទោះជាកម្រិតទឹកទន្លេចាប់ផ្តើមស្រកចុះក្តី ប៉ុន្តែភ្នាក់ងារសង្គ្រោះ និងកងទ័ពជើងទឹកស្រីលង្កានៅតែបន្តជួយសង្គ្រោះពលរដ្ឋ ដោយសហការជាមួយរដ្ឋាភិបាល និងផ្នែកឯកជន ។ មជ្ឈមណ្ឌលគ្រប់គ្រងគ្រោះមហន្តរាយស្រីលង្ការាយការណ៍ថា ខ្យល់ព្យុះបណ្តាលឱ្យមានទឹកជំនន់ធ្ងន់ធ្ងរ, បាក់ដី និងខ្យល់កន្ត្រាក់ ៕

Meta គឺជាក្រុមហ៊ុនមេរបស់ Facebook, Instagram និង WhatsApp ដែលបានផ្តល់សេវាកម្មអ៊ីនធើរណេតលំដាប់ទី២ លើពិភពលោកនាពេលបច្ចុប្បន្ន មានគម្រោងពង្រាយខ្សែកាបបណ្តាញអ៊ីនធើរណេតរហូតដល់៤ម៉ឺនគីឡូម៉ែត្រនៅក្រោមមហាសមុទ្រ ស្មើទឹកប្រាក់១ម៉ឺនលានដុល្លារអាមេរិក ព្រមទាំងការវិនិយោគលើបច្ចេកវិទ្យា AI ផងដែរ ។

គេហទំព័របច្ចេកវិទ្យាដ៏ល្បីឈ្មោះ Techcrunch រាយការណ៍កាលពីចុងខែវិច្ឆិកា ឆ្នាំ២០២៤ ថា គម្រោងនេះនឹងធ្វើឱ្យក្រុមហ៊ុន Meta របស់លោក Mark Zuckerberg អាចតភ្ជាប់ខ្សែបណ្តាញអ៊ីនធើរណេតដ៏ធំបំផុតនៅក្រោមមហាសមុទ្រ ព្រមទាំងក្លាយជាប្រព័ន្ធទំនាក់ទំនងយ៉ាងរឹងមាំ ។ Meta នឹងវិនិយោគខ្សែកាបក្រោមទឹកជំហានដំបូង ស្មើទឹកប្រាក់២,០០០លានដុល្លារអាមេរិក និងពង្រីកការវិនិយោគរហូតដល់១ម៉ឺនលានដុល្លារអាមេរិក ក្នុងរយៈពេលជាច្រើនឆ្នាំខាងមុខ ។ Meta នឹងបង្ហាញព័ត៌មានលម្អិតជាផ្លូវការ នៅដើមឆ្នាំ២០២៥ ។

អ្នកវិភាគឧស្សាហកម្មខ្សែកាបនៅបាតសមុទ្របានបញ្ចេញមតិក្នុងគេហទំព័រ Techcrunch ថា បច្ចុប្បន្ន ការតភ្ជាប់ខ្សែកាបបណ្តាញអ៊ីនធើរណេតលើកប៉ាល់នៅមានកម្រិត និងតម្លៃថ្លៃ ។ បើ Meta អនុវត្តគម្រោងបានជោគជ័យ គឺខ្សែកាបនេះនឹងមានរូបរាងស្រដៀងអក្សរ W ហើយវាលាតសន្ធឹងក្រោមមហាសមុទ្រចាប់ពីឆ្នេរខាងកើតអាមេរិក និងព័ទ្ធឆ្នេរអាហ្វ្រិកខាងត្បូងទៅប្រទេសឥណ្ឌា, អូស្ត្រាលី ព្រមទាំងឆ្លងកាត់មហាសមុទ្រប៉ាស៊ីហ្វិកទៅឆ្នេរសមុទ្រខាងលិចអាមេរិក ។

គម្រោងពង្រាយខ្សែកាបរបស់ Meta ស្ថិតនៅក្រោមការគ្រប់គ្រងរបស់នាយកគម្រោងហេដ្ឋារចនាសម្ព័ន្ធពិភពលោក និងជានាយកផ្នែកវិស្វកម្ម ។ ក្រៅពីនេះ Meta មានក្រុមការងារលំដាប់ពិភពលោក ទទួលខុសត្រូវ និងរៀបចំបណ្តាញទំនាក់ទំនងរបស់ក្រុមហ៊ុន ។ Meta មិនមែនជាក្រុមហ៊ុនថ្មីដែលមានគម្រោងតភ្ជាប់បណ្តាញខ្សែកាបក្រោមសមុទ្រទេ ពីព្រោះកន្លងមក Meta ធ្លាប់សហការជាមួយក្រុមហ៊ុននានា ដូចជា ៖ Orange, Vodafone, China Mobile និង Bayobab/MTN ប៉ុន្តែបើការអនុវត្តគម្រោងនេះជោគជ័យ វានឹងធ្វើឱ្យ Meta ក្លាយជាម្ចាស់គម្រោង ១០០% ។

មូលហេតុចម្បងធ្វើឱ្យ Meta មានគម្រោងពង្រាយខ្សែកាបនៅក្រោមបាតសមុទ្ររាប់ម៉ឺនគីឡូម៉ែត្រ ដោយសារក្រុមហ៊ុនចង់ឱ្យការតភ្ជាប់អ៊ីនធើរណេតកាន់តែមានប្រសិទ្ធភាព និងបញ្ជូនទិន្នន័យបានច្រើនជាងមុន គឺដូចគ្នានឹង Google ដែលផ្តល់ភាពសំខាន់លើបណ្តាញខ្សែកាបក្រោមសមុទ្រ ។ ក្រៅពីនេះ ការពង្រាយខ្សែកាបថ្មីរបស់ Meta ក៏បានចៀសវាងតំបន់សង្គ្រាមនៅមជ្ឈិមបូព៌ា ឬដែនទឹកដែលមានបញ្ហានយោបាយជាមួយអាមេរិក ៕

នៅក្នុងដំណើរយាងបំពេញព្រះរាជទស្សនកិច្ចនៅប្រទេសវៀតណាម ពីថ្ងៃទី២៨ដល់ថ្ងៃទី២៩វិច្ឆិកា នាយករដ្ឋមន្ត្រីវៀតណាមលោក ផាម មិញជិញ បានស្នើដល់ព្រះមហាក្សត្រ ព្រះបាទនរោត្តម សីហមុនី ជួយពន្លឿនការបង្កើតសាលា “ភាសាវៀតណាម” នៅសាកលវិទ្យាល័យភូមិន្ទភ្នំពេញ។

បើតាមលោកនាយករដ្ឋមន្ត្រីវៀតណាម បានលើកឡើងថា៖”ការបង្កើតសាលា ឬមជ្ឈមណ្ឌលសិក្សាវៀតណាមនេះ ដើម្បីឱ្យនិស្សិតកម្ពុជា អាចសិក្សាស្វែងយល់ពីភាសា វប្បធម៌ និងប្រជាជន ក៏ដូចជាទំនាក់ទំនងរវាងវៀតណាម និងកម្ពុជា ឱ្យបានកាន់តែច្បាស់។

ចំពោះការរកបង្កើតសាលា ឬដេប៉ាតឺម៉ង់សិក្សាវៀតណាមនេះ ក្នុងសាកលវិទ្យាល័យភូមិន្ទភ្នំពេញ បានកើនឡើងតាំងពីឆ្នាំ២០២២មកម្ល៉េះ តែគ្រានោះមហាជនជាច្រើនបានធ្វើការរិះគន់យ៉ាងខ្លាំងទៅលើគម្រោងមួយនេះ។

កាលនោះដេប៉ាតឺម៉ង់សិក្សាវៀតណាម បានផ្ដល់ការសិក្សាដល់ជំនាញកម្រិតបរិញ្ញាប័ត្រ ចំនួន៣ រួមមាន៖ មុខវិជ្ជាសិក្សាវៀតណាម មុខជំនាញបកប្រែភាសាវៀតណាម និងមុខជំនាញបកប្រែភាសាវៀតណាម សម្រាប់ទំនាក់ទំនងធុរកិច្ច។

ពាក់ព័ន្ធនឹងករណីនេះ ក្រសួងអប់រំ ធ្លាប់បានលើកឡើងម្តងរួចមកហើយថា៖”ការបង្កើតដេប៉ាតឺម៉ងភាសាវៀតណាម គឺមិនទាស់ខុសអីនោះទេ ព្រោះវាដូចគ្នានឹងការបង្កើតដេប៉ាតឺម៉ងភាសាបរទេសផ្សេងទៀត ដែលរួមាន ដេប៉ាតឺម៉ងភាសាអង់គ្លេស បារាំង ជប៉ុន កូរ៉េ និងចិនជាដើម៕

ធ្លាប់ឆ្ងល់អត់ គ្រប់អគារខ្ពស់ៗនៅហុងកុងភាគច្រើនតែងតែមានរន្ធចម្លែកមួយនៅកណ្តាល តើគេទុកឱ្យមានចន្លោះកណ្តាលនោះដើម្បីអ្វី?
ទីក្រុងហុងកុងរបស់ប្រទេសចិន គឺមានភាពល្បីល្បាញខ្លាំងណាស់ដោយសារអគារខ្ពស់ៗ និងទំនើបៗប៉ុន្តែប្រសិនបើអ្នកយកចិត្តទុកដាក់ អ្នកនឹងឃើញចំណុចពិសេសមួយគឺថា អគារខ្ពស់ៗជាច្រើននៅទីនេះមាន “រន្ធ” នៅចំកណ្តាលរចនាសម្ព័ន្ធ។ វាមិនមែនជាកំហុសក្នុងការរចនា ឬចៃដន្យនោះទេ ប៉ុន្តែរន្ធនៅកណ្តាលគឺទាក់ទងទៅនឹងវប្បធម៌ខាងវិញ្ញាណដ៏ជ្រាលជ្រៅបំផុតរបស់ប្រជាជនអាស៊ី។

ជាការពិតណាស់ ហុងកុងគឺជាកន្លែងដែលជឿខ្លាំងលើវប្បធម៌ហុងស៊ុយ ជាពិសេសក្នុងការសាងសង់ និងការរៀបចំផែនការ។ យោងតាមហុងស៊ុយ ថាមពលវិជ្ជមាន ត្រូវការចរាចរដោយសេរី ដើម្បីនាំសំណាង និងភាពរុងរឿង។ ប្រសិនបើអគារខ្ពស់គ្មានរន្ធនៅចំកណ្តាល នឹងបណ្តាលឱ្យមានសំណាងអាក្រក់ មិនត្រឹមតែសម្រាប់អ្នករស់នៅក្នុងអគារប៉ុណ្ណោះទេថែមទាំងសម្រាប់តំបន់ជុំវិញផងដែរ។ នៅក្នុងជំនឿរបស់ប្រជាជនចិន រន្ធទាំងនេះត្រូវបានគេហៅថា “ទ្វារនាគ” ។

យោងទៅតាមរឿងព្រេងទីក្រុងហុងកុងគឺជាជម្រករបស់នាគ ដូច្នេះការសាងសង់អាគារដោយទុកឱ្យមានចន្លោះកណ្តាល ឬចុះរន្ធ គឺដើម្បីឱ្យមានភាពរឹងមាំនិងសំណាងល្អនៅក្នុងវប្បធម៌ចិន។ រន្ធនេះត្រូវបានសាងសង់ជាផ្លូវសម្រាប់សត្វនាគហោះហើរដោយសេរីពីភ្នំទៅកាន់សមុទ្រដោយមិនមានការរារាំងដោយអគារ។ នេះត្រូវបានគេជឿថាដើម្បីការពារតុល្យភាពថាមពលរបស់ទីក្រុង ព្រមទាំងនាំពរដល់ប្រជាជនផងដែរ។

ទោះបីជាអ្នកវិទ្យាសាស្ត្រមិនបានបញ្ជាក់ពីប្រសិទ្ធភាពនៃហុងស៊ុយក៏ដោយ ក៏អ្នកអភិវឌ្ឍន៍អចលនទ្រព្យជាច្រើននៅហុងកុងតែងតែយកចិត្តទុកដាក់លើបញ្ហានេះយ៉ាងខ្លាំង។ អគារដែលមានការរចនាហុងស៊ុយមិនអំណោយផលអាចបាត់បង់តម្លៃ ឬពិបាកក្នុងការស្វែងរកអ្នកជួល។ ដូច្នេះ “ទ្វារនាគ” បានក្លាយជាមធ្យោបាយមួយដើម្បីផ្សះផ្សាតម្រូវការស្ថាបត្យកម្មទំនើប និងជំនឿប្រពៃណី។

ក្រៅពីហេតុផលហុងស៊ុយ រន្ធនៅកណ្តាលអគារក៏ផ្តល់អត្ថប្រយោជន៍ជាក់ស្តែងមួយចំនួនផងដែរ។ ក្នុងករណីជាច្រើន ពួកវាជួយកាត់បន្ថយភាពធន់នឹងខ្យល់នៅលើអគារ ជាពិសេសនៅក្នុងទីក្រុងហុងកុង ដែលជាកន្លែងដែលមានព្យុះខ្លាំង។ លើសពីនេះ ពួកវាក៏ជួយបង្កើនប្រសិទ្ធភាពពន្លឺធម្មជាតិ និងបង្កើតអារម្មណ៍ខ្យល់អាកាសកាន់តែច្រើនសម្រាប់ការរស់នៅ និងកន្លែងធ្វើការផងដែរ៕

ប្រទេសឥណ្ឌូណេស៊ី ៖ កាលពីពាក់កណ្តាលខែវិច្ឆិកា ឆ្នាំ២០២៤ សារព័ត៌មានបរទេសរាយការណ៍ថា ក្រសួងកសិកម្មរបស់ឥណ្ឌូណេស៊ីបានកំណត់គោលដៅឱ្យឥណ្ឌូណេស៊ីក្លាយជាប្រទេសដាំដុះដូងប្រេងច្រើនបំផុតនៅឆ្នាំ២០២៥ ព្រមទាំងកំណត់តម្លៃដូងប្រេងលើពិភពលោក ។

ហេតុនេះ ដើម្បីសម្រេចគោលដៅ លោក Sudaryono Pastikan Tak Maju អនុរដ្ឋមន្ត្រីក្រសួងកសិកម្មបានអំពាវនាវឱ្យកសិករទាំងអស់ និងក្រុមហ៊ុនដូងប្រេងនានាជ្រាបថា ចម្ការដូងប្រេងរបស់ឥណ្ឌូណេស៊ីមានសារៈសំខាន់យ៉ាងខ្លាំងសម្រាប់វិស័យកសិកម្ម និងគួរតែយកចិត្តទុកដាក់ជាពិសេសដើម្បីពង្រឹងសេដ្ឋកិច្ចជាតិ ។

ឥណ្ឌូណេស៊ីមានបច្ចេកវិទ្យាទំនើបសម្រាប់ការផលិតគ្រាប់ពូជដូងប្រេងឱ្យមានគុណភាពល្អ ព្រមទាំងអាចវាយតម្លៃគុណភាពគ្រាប់ពូជសម្រាប់ការដាំដុះផងដែរ ។ វាមានសារៈសំខាន់ក្នុងការកំណត់ពូជដូងប្រេងរបស់ឥណ្ឌូណេស៊ីឱ្យមានស្តង់ដារ និងទទួលស្គាល់លើពិភពលោក ។

ចំណែកប្រេងម៉ាស៊ូតប្រភេទ B50 ត្រូវបានចាត់ទុកថា គឺជាប្រេងឥន្ធនៈរបស់ឥណ្ឌូណេស៊ី ដែលមានការទទួលស្គាល់ច្រើន បើទោះជាប្រទេសផ្សេងៗពុំចាប់អារម្មណ៍នឹងប្រេងនេះក្តី ។ ប៉ុន្តែឥណ្ឌូណេស៊ីអាចប្រើប្រាស់ប្រេងនេះនៅក្នុងប្រទេស ដើម្បីបង្កើនការគាំទ្រដូងប្រេងរបស់ខ្លួន ។

គួរបញ្ជាក់ថា រដ្ឋាភិបាលឥណ្ឌូណេស៊ីបានពិចារណាពីកត្តាទាំងអស់ពាក់ព័ន្ធនឹងសមាមាត្រនៃការនាំចេញដូងប្រេងទៅក្រៅប្រទេស និងបែងចែកសម្រាប់ការប្រើប្រាស់ក្នុងស្រុក ដើម្បីឱ្យប្រាកដចិត្តថា ដូងប្រេងនឹងអាចជំរុញសេដ្ឋកិច្ចជាតិខ្លាំងបំផុត ។

លើសពីនេះ រដ្ឋាភិបាលក៏មានគម្រោងបន្ថែមសារធាតុផ្សំពីដូងប្រេងទៅក្នុងប្រេងម៉ាស៊ូតប្រភេទ B40 ឱ្យស្មើនឹង៤០% នៅឆ្នាំ២០២៥ ខណៈបច្ចុប្បន្ន ស្មើនឹង៣៥% ព្រមទាំងមានវិធានការកាត់បន្ថយការនាំចូលប្រេងឥន្ធនៈហ្វូស៊ីល, បង្កើនការលាយថាមពលប្រកបដោយនិរន្តរភាព និងគាំទ្រឧស្សាហកម្មដូងប្រេងក្នុងស្រុក ៕