ស្លៀកសំលៀកបំពាក់ពណ៌ខ្មៅទៅចូលរួមពីធីបុណ្យសពបានក្លាយជាការពិភាក្សានៅលើបណ្តាញសង្គមបន្ទាប់ពីតារាចម្រៀង វណ្ណដា ស្លៀកពាក់ខ្មៅមួយឈុតចូលរួមបុណ្យរបស់ Ruthko ។ រឿងមួយនេះបានធ្វើឱ្យលោក ហេង វាសនា អ្នកបង្កើតមាតិកាល្បីមួយរូបបាននិយាយទាំងមិនអស់ចិត្តគ្រាន់តែពាក់អាវខ្មៅក៏អាចបង្កជាជម្លោះនិងទើសបានហេតុអ្វីប្រកាន់ខ្លាំងយ៉ាងនេះ។
លោក ហេង វាសនា បានបង្ហោះសំណេរមួយនៅលើបណ្តាញសង្គមនៅយប់ថ្ងៃទី៧ មករា ថា «កុំគ្រាន់តែគ្នាពាក់អាវខ្មៅចូលរួមពិធីបុណ្យសព ក៏អាចបង្កជាជម្លោះ និងទើសបាន, បើកចិត្តបន្តិចទៅ, គ្នាទៅចូលរួមរំលែកទុក្ខ គ្នាបាត់បង់មនុស្សសំខាន់ហើយ សូមកុំមកបន្ថែមទុក្ខទៀត, ហេតុអ្វីក៏សង្គមនេះមានមនុស្សប្រកាន់ខ្លាំងយ៉ាងហ្នឹង Toxic យ៉ាងហ្នឹង, ឱ…បងប្អូនកម្ពុជាខ្ញុំអើយ»។
ភាពចម្រូងចម្រាសនេះបានកើតឡើងនៅលើបណ្តាញសង្គមបន្ទាប់ពីមានវីដេអូចែករំលែកនៅលើបណ្តាញសង្គមដោយតារាចម្រៀងរ៉េបល្បីឈ្មោះ វណ្ណដា និងគូស្នេហ៍រួមទាំងអ្នកមួយចំនួនទៀតបានទៅចូលរួមរំលែកទុក្ខតារាចម្រៀង Ruthko ដែលទទួលមរណភាពក្នុងហេតុការណ៍គ្រោះថ្នាក់ចរាចរណ៍។ វណ្ណដា បានស្លៀកពាក់ខ្មៅចូលរួមក្នុងពិធីបុណ្យសពប៉ុន្តែហាក់រងនូវការវែកញែកពីអ្នកលេងបណ្តាញសង្គមមួយចំនួនថាការស្លៀកពាក់នេះជាប្រពៃណីរបស់ប្រទេសជិតខាង។
មែនទែនទៅមិនមែនមានតែ វណ្ណដា ដែលបានស្លៀកពាក់ខ្មៅ អ្នកមួយចំនួនទៀតក៏បានស្លៀកពាក់ខ្មៅដូចគ្នាតែដោយសារតែ វណ្ណដា ជាមនុស្សល្បីល្បាញទើបជំរុញឱ្យតារាចម្រៀងរ៉េបរូបនេះរងនូវការវែកញែកគ្រាន់តែទៅចូលរួមរំលែកទុក្ខហើយស្លៀកពាក់ខ្មៅ។.png)
មនុស្សមួយចំនួនបានលើកឡើងដែរថាគ្រាន់តែស្លៀកពាក់បែបនេះសោះហេតុអ្វីក៏ប្រកាន់ច្រើនម្ល៉េះ។ គេចាំបានថា កាលពីឆ្នាំ២០២១ តារាចម្រៀង ឱក សុគន្ធកញ្ញា បានស្លៀកពាក់ខ្មៅមួយឈុតចូលរួមពិធីបុណ្យសពរបស់ម្តាយតារាចម្រៀង ឆន សុវណ្ណារាជ ក៏រងនូវការវែកញែកដូចគ្នា៕
