កាលពីថ្ងៃទី ៦ ខែមករានេះ មជ្ឈមណ្ឌលវះកាត់កុមារ ឬហៅថា (ពេទ្យគៀនឃ្លាំង) បានជម្រាបជូនដំណឹងអំពី ការពិនិត្យព្យាបាល និងវះកាត់លើជំងឺ ត្រចៀក បំពងក និងច្រមុះ ជូនអ្នកជំងឺគ្រប់វ័យ នៅថ្ងៃទី ១៧ ដល់ថ្ងៃទី ២១ ខែកុម្ភះ ឆ្នាំ ២០២៥ ខាងមុខនេះ។

តាមការគូសបញ្ជាក់ មជ្ឈមណ្ឌលវះកាត់កុមារយើងខ្ញុំនឹងមានក្រុមគ្រូពេទ្យបារាំងជំនាញជំងឺត្រចៀក បំពងក ច្រមុះ មកពីប្រទេសបារាំង ផ្តល់ជូនការពិនិត្យព្យាបាល និងវះកាត់គ្រប់វ័យ ដូចជា ៖
– អ្នកជំងឺមានដុំពក ក ឬ ពក ក
– ដុះសាច់ច្រមុះ
– ឬសដូងច្រមុះ
– ឈាមច្រមុះ
– និយាយស្អក (បញ្ហាបំពង់សំលេង)
– ដុសសាច់ក្នុងត្រចៀក
– ខ្សោយការស្តាប់សំលេង
– ធ្លាយកន្តាសត្រចៀក

គេហទំព័រពេទ្យខាងលើក៏បានគូសបញ្ជាក់ទៀតថា ការព្យាបាលនិងវះកាត់សំរាប់អ្នកក្រីក្រគឺមិនគិតថ្លៃអ្វីទាំងអស់។ តែសំរាប់អ្នកមានលទ្ធភាពពេលវះកាត់គឺតំរូវអោយជួយបរិច្ចាគថវិការជួយមន្ទីរពេទ្យតាមដែលខ្លួនឯងចង់ផ្តល់(តាមចិត្តរបស់អ្នកដែលបរិច្ចាក) ដើម្បីទុកសំរាប់អ្នកដែលអត់។ ខាងមន្ទីរពេទ្យគឺធ្វើការពីថ្ងៃចន្ទដល់ថ្ងៃសុក្រ ពីម៉ោង៨ ព្រឹកដល់ ៥ល្ងាច។

ដូច្នេះហើយអ្នកជំងឺអាចមកចុះឈ្មោះចាប់ពីថ្ងៃជូនដំណឹងនេះតទៅ ដើម្បីជួបគ្រូពេទ្យបារាំងបានតាមរយៈមជ្ឈមណ្ឌលជាតិស្តារលទ្ធភាពពលកម្មគៀនឃ្លំាងឬ មូលនិធិជនពិការ ដែលមានទីតាំងនៅលើផ្លូវ៦អា ភូមិគៀនឃ្លំាង ខណ្ឌជ្រោយចង្វារ រាជធានីភ្នំពេញ។ សម្រាប់ព័ត៌មានបន្ថែមអាចទាក់ទងទៅកាន់លេខតេលេក្រាម ០១២ ៨០៧ ៦៧៩៕

ថ្មីៗនេះ នៅលើបណ្តាញសង្គមគឺមានការបង្ហោះចែកចាយ និងវែក.ញែកខ្លាំងមែនទែនទាក់ទងនឹងតម្លៃ ក៏ដូចជាទីផ្សារស្រូវនៅលើប្រទេសកម្ពុជា ស្របពេលដែលរដូវប្រមូលផលបានឈានចូលមកដល់។

យោងតាមសហព័ន្ធស្រូវអង្ករកម្ពុជា បានគូសបញ្ជាក់ពីតម្លៃមធ្យមភាគស្រូវសើម នៅតាមបណ្តាខេត្តមួយចំនួន គិតត្រឹមថ្ងៃទី ៦ ខែមករា ឆ្នាំ២០២៥ នេះ បានឲ្យដឹងថា៖
-នៅឯស្រុកបាធាយ ខេត្តកំពង់ចាម ៖ ស្រូវអូអឹម តម្លៃ ៨១០ រៀល, និងស្រូវអ៊ីអ៊ែ ៧១០ រៀល(គិតជាគីឡូក្រាម)
-ស្រុកសន្ទុកនិងតាំងគោក ខេត្តកំពង់ធំ៖ ស្រូវអូអឹម តម្លៃ ៧៩០ រៀល
-ស្រុកព្រះនេត្រព្រះនិងភ្នំសន្ទុក ខេត្តបន្ទាយមានជ័យ ៖ ស្រូវឡើងទឹក តម្លៃ ៦៨០ រៀល
-ខេត្តបាត់ដំបង៖ ស្រូវនាងខុន ៧៧០ រៀល, ស្រូវស្រង៉ែ ៩៤០រៀល
-ស្រុកបរិបូណ៍ ខេត្តកំពង់ឆ្នំាង៖ ស្រូវអូអឹម ៧៧០រៀល
-ស្រុកកណ្តៀង ពោធិ៍សាត់៖ ស្រូវអូអឹម ៧៩០រៀល
-ស្រុកពារាំង ព្រៃវែង៖ ស្រូវអូអឹម ៨០០រៀល។

យ៉ាងណា សម្រាប់ស្រូវសើមដែលមានស្ថិរភាពតម្លៃ ក៏ដូចជាមានទីផ្សារនាំចេញខ្ពស់ជាងគេនោះគឺជា ពូជស្រូវសែនក្រអូប ដែលតម្លៃហក់ឡើងដល់ចន្លោះពី ១២៥០-១៣៥០រៀល/១គីឡូក្រាម ឯណ្ណោះ។

កាលពីពេលកន្លងទៅ ឯកឧត្តម យ៉ង សាំងកុមារ រដ្ឋលេខាធិការក្រសួងកសិកម្មក៏បានគូសបញ្ជាក់ថា ស្រូវមានទីផ្សារ និងមានតម្លៃល្អអាស្រ័យលើកត្តាសំខាន់ៗដូចខាងក្រោមនេះ៖
១- ប្រភេទពូជ
២-គុណភាពស្រូវ (កំរិតនៃភាពសុទ្ធ សំណើម និងកំរិតនៃភាពទុំ)
៣- បរិមាណស្រូវប្រមូលបានក្នុងមួយថ្ងៃ
៤- ទីតាំង ដែលប្រមូលផ្តុំស្រូវ
៥- ពេលវេលា ដែលដឹងមុន ឬប្រាប់អំពីការមានស្រូវលក់ (បាន៥ ថ្ងៃមុនល្អ) ។ ទាំងនេះហើយជាកត្តា និងគោលការណ៍ដែលមន្រ្តីកសិកម្មឃុំ យកចិត្តទុកដាក់ក្នុងការធ្វើការជាមួយកសិករ ដើម្បីដោះស្រាយបញ្ហាទីផ្សារ និងតម្លៃស្រូវ៕

កាលពីឆ្នាំ២០២៤ កន្លងទៅថ្មីនេះ អង្ករ ២ ប្រភេទរបស់កម្ពុជា គឺ អង្ករក្រអូបប្រណិតកម្ពុជា ម៉ាក “ម្លិះអង្គរ” ពូជស្រូវផ្ការំដួល បានឈ្នះពានរង្វាន់អង្ករល្អប្រណិតផ្តាច់គេលើពិភពលោក លើកទី៦, ខណៈអង្ករ«ពូជសែនក្រអូប០១» បានឈ្នះពានរង្វាន់មាស ២ ដង ស្ទួនៗគ្នា ក្នុងឆ្នាំ២០២៣ និង ២០២៤។

កាលពីថ្ងៃទី៧ វិច្ឆិកា២០២៤ អង្ករក្រអូបប្រណិតកម្ពុជា ម៉ាក “ម្លិះអង្គរ” ពូជស្រូវផ្ការំដួល បានឈ្នះពានរង្វាន់អង្ករល្អប្រណិតផ្តាច់គេលើពិភពលោក លើកទី៦ ក្នុងការប្រកួតអង្ករល្អផ្តាច់គេលើពិភពលោក នៅក្នុង “សន្និសីទស្រូវអង្ករពិភពលោកឆ្នាំ២០២៤” (World Best Rice) ទីក្រុងម៉ានីឡា ប្រទេសហ្វីលីពីន។

ទន្ទឹមនឹងនោះ កាលពីថ្ងៃទី៨ ខែវិច្ឆិកា ឆ្នាំ២០២៤ អង្ករម៉ាកសមូហភាព SKO ពូជសែនក្រអូប ០១ បានឈ្នះពានរង្វាន់មាស នៅក្នុងកម្មវិធីវាយតម្លៃគុណភាព រសជាតិ ប្រភេទអង្ករសគ្រាប់វែង ចិន-អាស៊ាន លើកទី២ ដែលកម្មវិធីនេះរៀបចំឡើងដោយវិទ្យាស្ថានវិទ្យាសាស្ត្រស្រូវនៃបណ្ឌិតសភាវិទ្យាសាស្ត្រកសិកម្មខេត្ត Guangxi និងមណ្ឌលការគ្រប់គ្រងគ្រាប់ពូជនៃតំបន់ស្វយ័ត Guangxi Zhuang របស់ប្រទេសចិន។ សូមជម្រាបថា នេះជាលើកទី ២, ខណៈកាលពីឆ្នាំ ២០២៣ អង្ករ«ពូជសែនក្រអូប០១» ក៏ធ្លាប់បានឈ្នះពានរង្វាន់មាសកម្មវិធីដដែលនេះដូចគ្នាដែរ។

គួរបញ្ជាក់ថា ក្នុងរយៈពេល១០ខែ នៃឆ្នាំ២០២៤នេះ កម្ពុជាបាននាំចេញអង្ករចំនួន ៥០៧ ០២៩ តោន គិតជាទឹកប្រាក់បានចំនួន ៣៧៦.៦៣លានដុល្លារសហរដ្ឋអាម៉េរិក។ ក្នុងនោះ ប្រភេទអង្ករដែលកម្ពុជាបាននាំចេញមានដូចជា អង្ករប្រអូបគ្រប់ប្រភេទ ៧៣.២១% អង្ករសគ្រាប់វែង ២១.៧១% អង្ករចំហុយ ៣.០៤% អង្ករសរីរាង្គ ១.៧៤% និងអង្ករផ្សេងៗទៀត ០.៣០%៕

កាលពីវេលាម៉ោង៦ល្ងាច ថ្ងៃទី៧ ខែមករា ឆ្នាំ២០២៥ មានករណីបា.ញ់ប្រ.ហារ លើ លោក លឹម គីមយ៉ា ជនជាតិខ្មែរ សញ្ជាតិបារាំង ដែលត្រូវបានគេស្គាល់ថា គឺជាអតីតតំណាងរាស្រ្តរបស់គណបក្សសង្រ្គោះជាតិកម្ពុជា មណ្ឌលកំពង់ធំ ដែលបង្កឱ្យមានការភ្ញាក់ផ្អើលនៅមុខវត្ត Bowonniwet តំបន់បាងឡាំភូ សង្កាត់ព្រះណាខន ទីក្រុងបាងកក ។

ក្រោយហេតុការណ៍នេះ សមត្ថកិច្ចថៃបានស្រាវជ្រាវ និងកំណត់អត្តសញ្ញាណឃាតករ គឺឈ្មោះ អេកខាឡាក់ ផេណយ និងឈ្មោះហៅក្រៅថា «អេម កងរឿ» អាយុ៤១ឆ្នាំ ជនជាតិថៃ គឺជាអតីតទាហានជើងទឹក ។ តុលាការថៃបានចេញដីកាឱ្យសមត្ថកិច្ចចាប់ខ្លួនឃាតករពីករណីសម្លាប់មនុស្សដោយគ្រោងទុក និងដាក់អាវុធតាមខ្លួននៅទីសាធារណៈគ្មានការអនុញ្ញាត ។

តាមការស៊ើបអង្កេត គឺឃាតករបានបើករថយន្តគេចខ្លួនទៅកាន់ខេត្តស្រះកែវ ហើយការត្រួតពិនិត្យក្នុងកាមេរ៉ាសុវត្ថិភាពឃើញថា ឃាតករបានធ្វើដំណើរទៅចំណុចព្រំដែនខៅឌិន ក្នុងស្រុកឃ្លងហាត ខេត្តស្រះកែវ នាយប់ថ្ងៃទី៧ ខែមករា បន្ទាប់មក ក៏រត់គេចទៅប្រទេសកម្ពុជា តាមច្រកធម្មជាតិ ។

ហេតុនេះ សមត្ថកិច្ចថៃបានទំនាក់ទំនងទៅសមត្ថកិច្ចកម្ពុជា និងបញ្ជូនក្រុមសមត្ថកិច្ចស៊ើបអង្កេតថៃទៅចាប់ខ្លួនឃាតករជាមួយសមត្ថកិច្ចកម្ពុជា ។ សមត្ថកិច្ចថៃបញ្ជាក់ថា ឃាតករបានប្តូរប្រាក់ចំនួន៤,០០០បាត នៅកន្លែងប្តូរប្រាក់តំបន់ព្រំដែន រួចហើយក៏ជិះរថយន្តក្រុងសំដៅទៅរាជធានីភ្នំពេញ ហើយត្រូវសមត្ថកិច្ចខេត្តបាត់ដំបងឃាត់ខ្លួន ពេលឃាតករចុះពីរថយន្តក្រុងចូលហាងបាយមួយកន្លែងនៅឃុំព្រៃស្វាយ ស្រុកមោងឫស្សី ។

ផ្អែកតាមការស្នើសុំសហការពីសមត្ថកិច្ចកិច្ចថៃ សមត្ថកិច្ចកម្ពុជាបានស្រាវជ្រាវរកឃាតករ ហើយនៅថ្ងៃទី៨ ខែមករា កន្លងមក សមត្ថកិច្ចខេត្តបាត់ដំបង បានរកឃើញ និងឃាត់ខ្លួនឃាតករនៅភូមិព្រៃស្វាយ ឃុំព្រៃស្វាយ ស្រុកមោងឫស្សី ខេត្តបាត់ដំបង ។ កម្ពុជានឹងបញ្ជូនឃាតកររូបនេះទៅប្រទេសថៃវិញតាមសំណូមពររបស់សមត្ថកិច្ចថៃ បន្ទាប់ពីសមត្ថកិច្ចកម្ពុជាបញ្ចប់នីតិវិធី ៕

«កោះតាគៀវ» មានលក្ខណៈស្ងប់ស្ងាត់ល្អ និងមានទេសភាពស្រស់ស្អាតខ្លាំងណាស់ ប៉ុន្តែហាក់រំលងភ្នែកភ្ញៀវទេសចរបន្តិច។ កោះនេះមានឆ្នេរជាច្រើនដូចជា ឆ្នេរខ្សាច់ស ឆ្នេរប្លង់តុង និងឆ្នេរឡុងប៊ិច គឺជារមណីយដ្ឋានទេសចរធម្មជាតិដ៏សែនមនោរម្យមួយ ស្ថិតនៅក្នុងខេត្តព្រះសីហនុ មានចម្ងាយប្រមាណ ៤ គីឡូម៉ែត្រពីឆ្នេរអូរត្រេស ឬត្រឹមតែ ១ គីឡូម៉ែត្រពីឧទ្យានជាតិរាម។ ដើម្បីទៅដល់គោលដៅឋានសួគ៌នេះ លោកអ្នកអាចធ្វើដំណើរដោយការជិះកាណូតប្រហែល ២០ នាទីពីឆ្នេររាម។

នៅពេលទៅដល់លោកអ្នកនឹងបានឃើញប្លង់តុងដែលបញ្ចេញពន្លឺផ្លេកៗនៅតាមឆ្នេរសមុទ្រពេលដែលរលកវាយមក រួមជាមួយទឹកសមុទ្រថ្លាឈ្វង់ ខ្យល់អាកាសត្រជាក់បរិសុទ្ធ អាចគយគន់មើលថ្ងៃរះនិងថ្ងៃលិចនៅលើកោះ ក៏ដូចជាអាចដើរកាត់ព្រៃពីឆ្នេរមួយទៅឆ្នេរមួយទៀតដើម្បីទទួលបានអារម្មណ៍រីករាយ ជ្រះអស់ទុក្ខកង្វល់។ នៅទីនេះក៏មានរីស៊ត និងបឹងកាឡូតជាមួយតម្លៃសមរម្យ រួមទាំងមានកន្លែងបោះតង់សម្រាកលម្ហែកាយ ស្ទូចត្រី ចាប់ខ្ចង ចាប់ក្តាមនៅតាមឆ្នេនាពេលរាត្រី បង្កើតជាអនុស្សារីដែលមិនអាចបំភ្លេចបាន។

លោកអ្នកក៏អាចអាំងសាច់ និងគ្រឿងសមុទ្រស្រស់ៗជាច្រើនមានដូចជាមឹក បង្គា បង្គង និយាយរឿងក្នុងចិត្តជាមួយបងប្អូនគ្រួសារ និងមិត្តភក្តិយ៉ាងមានក្តីសុខ។ ជាមួយលក្ខណៈស្ងប់ស្ងាត់ និងទេសភាពស្រស់បំព្រង កោះតាគៀវក៏ជាតំបន់ដែលពោពេញទៅដោយសក្តានុពលធម្មជាតិបែបសមុទ្រផងដែរ។ កោះតាគៀវ គឺជាកោះដ៏តូចមួយដែលមានក្រឡាផ្ទៃចំនួន ២៨ គីឡូម៉ែត្រការ៉េ គ្របដណ្ដប់ដោយព្រៃឈើបៃតងគួរជាទីគគយគន់ ។

ហេតុនេះនៅថ្ងៃឈប់សម្រាក ឬចុងសប្តាហ៍ភ្ញៀវទេសចរកុំភ្លេចចូលទស្សនាតំបន់រមណីយដ្ឋានកោះតាគៀវផង ប្រសិនបើលោកអ្នកបានទៅដល់ខេត្តព្រះសីហនុ។ នៅខេត្តព្រះសីហនុ ក្រៅពីកោះតាគៀវ ក៏មានកោះល្បីជាច្រើនទៀតផងដែរដូចជា ឆ្នេរអូរឈើទាល កោះរុង កោះរុងសន្លឹម ឆ្នេរអូរត្រេស ឧទ្យានជាតិរាម កោះទន្សាយ កោះទន្សាយ និងកន្លែងកម្សាន្តសប្បាយៗជាច្រើនទៀត៕