Yong Wu ដែលជាផ្លូវលិចទឹកស្ថិតក្នុងខេត្ត Jiangxi ត្រូវបានគេស្គាល់ថាជា “ផ្លូវលិចទឹកដែលស្អាតជាងគេបំផុតក្នុងប្រទេសចិន”។ ផ្លូវនេះផ្តល់ឱ្យអ្នកទស្សនានូវបទពិសោធន៍ដ៏សម្បូរបែបនៃការបើកបរលើទឹក ជាមួយទិដ្ឋភាពទឹកឡើងនៃបឹង Poyang បង្កើតបានជាផ្លូវទឹកដ៏ប្លែក និងស្រស់ស្អាតបំផុត។ ផ្លូវ Yong Wu គឺជាផ្នែកមួយនៃផ្លូវ X២១៩ ដែលតភ្ជាប់ទីក្រុងបុរាណ Wuzhen ជាមួយទីក្រុង Jiujiang ខេត្ត Jiangxi ។ គម្រោងនេះមានប្រវែងជាង ៥ គីឡូម៉ែត្រ ដោយឆ្លងកាត់បឹង Poyang ដែលជាបឹងទឹកសាបធំបំផុតនៅក្នុងប្រទេសចិន។

ចាប់តាំងពីគម្រោងនេះបានបើកដំណើរការជាផ្លូវការក្នុងឆ្នាំ ២០១៣ មក គ្មានគ្រោះថ្នាក់ធ្ងន់ធ្ងរណាមួយកើតឡើងនោះទេ ដោយសាររបាំងសុវត្ថិភាពទាំងសងខាង និងអ្នកបើកបរដែលធ្វើដំណើរលើផ្លូវសុទ្ធតែគោរពតាមល្បឿនអតិបរមាដែលបានអនុញ្ញាត។ ទោះជាយ៉ាងណាកាលពីខែសីហា ឆ្នាំមុន នៅដើមរដូវវស្សា យានយន្តជាង ៨ ពាន់គ្រឿងក៏បានបង្កឱ្យមានការកកស្ទះខ្លាំងផងដែរ។ ផ្លូវលិចទឹក Yong Wu បើកដំណើរការតែនៅដើមរដូវវស្សាប៉ុណ្ណោះ ដោយសារកម្រិតទឹកនៅពេលនេះមានភាពទាក់ទាញជាងរដូវផ្សេងទៀត។

នៅពេលដែលកម្រិតបឹងឡើងដល់ប្រហែល ១៨.៦ ម៉ែត្រ ផ្លូវនេះក៏ត្រូវបានលិចក្នុងទឹក ហើយបង្កើតបាននូវទិដ្ឋភាពដ៏គួរឱ្យចាប់អារម្មណ៍ ប៉ុន្តែនៅពេលទឹកបឹងឡើងខ្ពស់ជាង ១៩ ម៉ែត្រ អាជ្ញាធរមូលដ្ឋាននឹងបញ្ឈប់យានយន្តនៅលើដងផ្លូវដើម្បីធានាសុវត្ថិភាព ដូច្នេះភ្ញៀវទេសចរត្រូវបានអនុញ្ញាតឱ្យគយគន់ទេសភាពនេះនៅដើមរដូវវស្សាប៉ុណ្ណោះ។

ក្រៅពីផ្លូវ Yong Wu ដែលជាផ្លូវលិចទឹកស្រស់ស្អាតជាងគេក្នុងប្រទេសចិន ស្ពានឈើ Shiziguan ដែលជារចនាសម្ព័ន្ធអណ្តែតលើផ្ទៃទន្លេ Qingjiang ក្នុងខេត្ត Hubei ក៏មានភាពល្បីល្បាញដូចគ្នាផងដែរ។ ទោះជាយ៉ាងណាក៏ដោយ ផ្លូវនេះត្រូវបានបិទជាបណ្ដោះអាសន្នដើម្បីចរាចរណ៍បន្ទាប់ពីមានឧបទ្ទវហេតុក្នុងឆ្នាំ ២០២៣ នៅពេលដែលរថយន្តមួយបានធ្លាក់ពីលើផ្លូវរថភ្លើងហើយចូលទៅក្នុងទឹក។ បច្ចុប្បន្នផ្លូវឆ្លងកាត់ស្ពានឈើបានបើកឡើងវិញហើយ ប៉ុន្តែត្រូវកំណត់ល្បឿន និងទម្ងន់សម្រាប់យានយន្តដែលឆ្លងកាត់៕

សហរដ្ឋអាមេរិក ៖ នាយករដ្ឋមន្ត្រីកាណាដា លោក Justin Trudeau បានបដិសេធនឹងគំនិតរបស់ប្រធានាធិបតីអាមេរិកថ្មី លោក Donald Trump ដែលលើកឡើងថា អាមេរិកនឹងប្រើប្រាស់អំណាចសេដ្ឋកិច្ច ដើម្បីបង្ខំឱ្យកាណាដា ក្លាយជារដ្ឋទី៥១ ។

លោក Justin បានសរសេរក្នុងបណ្តាញសង្គម X កាលពីថ្ងៃទី៧ ខែមករា ឆ្នាំ២០២៥ ថា ៖ «គ្មានការយល់ព្រមសូម្បីតែបន្តិច ដែលកាណាដានឹងក្លាយជាទឹកដីមួយផ្នែករបស់អាមេរិក ។ ពលរដ្ឋកាណាដា និងអាមេរិក ទទួលបានអត្ថប្រយោជន៍ពីភាពជាដៃគូពាណិជ្ជកម្ម និងសន្តិសុខពីគ្នាទៅវិញទៅមក» ។

កន្លងមក ប្រព័ន្ធផ្សព្វផ្សាយអាមេរិកបានសួរទៅលោក Trump នៅរីសតម៉ាអាឡាកូ ក្នុងរដ្ឋផ្លរីដា ថា តើអាមេរិកនឹងប្រើប្រាស់កម្លាំងកងទ័ពដើម្បីកាន់កាប់ប្រទេសកាណាដា ដែរឬទេ? លោកឆ្លើយថា យើងពុំប្រើកម្លាំងកងទ័ពទេ ប៉ុន្តែយើងនឹងប្រើអំណាចសេដ្ឋកិច្ច ពីព្រោះអាមេរិកកំពុងមានបញ្ហាសេដ្ឋកិច្ចជាមួយកាណាដា ។

លោកពុំពេញចិត្តយូរមកហើយរឿងឱនភាពពាណិជ្ជកម្មអាមេរិកជាមួយកាណាដា ហើយលោកធ្លាប់ប្រាប់ទៅប្រព័ន្ធផ្សព្វផ្សាយកន្លងមកថា បន្ទាត់ព្រំដែនរវាងប្រទេសទាំងពីរ គឺគូសដោយការស្រមើស្រមៃប៉ុណ្ណោះ ។ លោកនឹងដំឡើងពន្ធទំនិញកាណាដានាំចូលអាមេរិក ស្មើនឹង២៥% ដោយសារកាណាដាបាននាំចេញទំនិញមកកាន់ព្រំដែនអាមេរិក រហូតដល់៧៥% ។

កាលពីថ្ងៃទី៧ ខែមករា កន្លងមក រដ្ឋមន្ត្រីក្រសួងការបរទេសកាណាដា លោកស្រី Mélanie Joly បានរិះគន់ការលើកឡើងរបស់លោក Trump ដោយលោកស្រីនិយាយថា លោក Trump ពុំយល់សោះឡើយ ហេតុអ្វីបានជាកាដាណាជាប្រទេសរឹងមាំ ។ យើងគ្មានថ្ងៃយល់ព្រម ឬចុះចាញ់ការគំរាមកំហែងណាទាំងអស់ ។

គួរបញ្ជាក់ថា កាណាដានឹងរៀបចំការបោះឆ្នោត នៅថ្ងៃទី២០ ខែតុលា ឆ្នាំ២០២៥ ហើយតាមលទ្ធផលការស្ទង់មតិបង្ហាញថា គណបក្សប្រឆាំងឈ្មោះ Conservative នឹងទទួលជ័យជម្នះភ្លូកទឹក ភ្លូកដី ។ មេដឹកនាំគណបក្សនេះបានបង្ហាញពីគោលជំហរថា កាណាដាគ្មានថ្ងៃក្លាយជារដ្ឋទី៥១ របស់អាមេរិកទេ ពីព្រោះកាណាដាជាប្រទេសធំ និងមានឯករាជ្យ ៕

ប្រទេសថៃ ៖ កាលពីថ្ងៃទី៧ ខែមករា ឆ្នាំ២០២៥ នៅវិមានរដ្ឋាភិបាល លោកស្រី ផេថងថាន ស៊ីណាវ៉ាត់ នាយករដ្ឋមន្ត្រីថៃ បានផ្តល់សម្ភាសន៍ជាមួយប្រព័ន្ធផ្សព្វផ្សាយ អំពីការបញ្ចុះតម្លៃអគ្គិសនីមកត្រឹមតែ៣.៧០បាតក្នុង១គីឡូវ៉ាត់ (ឬស្មើ៣០០រៀល) ដោយលោកស្រីថ្លែងថា រដ្ឋាភិបាលមានគោលដៅបញ្ចុះតម្លៃអគ្គិសនី ដើម្បីជួយដោះស្រាយបន្ទុកចំណាយរបស់ពលរដ្ឋ ។

រដ្ឋាភិបាលយកចិត្តទុកដាក់ក្នុងការបញ្ចុះតម្លៃអគ្គិសនីឱ្យកាន់តែថោកជាងមុន ហើយបើរដ្ឋាភិបាលចរចាជាមួយស្ថាប័នពាក់ព័ន្ធពីការបញ្ចុះតម្លៃអគ្គិសនីមកនៅត្រឹម៣.៧០បាត ដោយជោគជ័យ គឺវានឹងក្លាយជាប្រយោជន៍សម្រាប់ជាតិ និងស្របតាមគោលដៅ ។ យើងនឹងព្រមព្រៀង និងជជែកជាមួយស្ថាប័នពាក់ព័ន្ធជាច្រើន ហើយអាចនឹងរង់ចាំពេលបន្តិច ប៉ុន្តែវាជាគោលដៅរបស់រដ្ឋាភិបាល ពលរដ្ឋពុំចាំបាច់បារម្ភពីបញ្ហានេះទេ ពីព្រោះការបញ្ចុះតម្លៃអគ្គិសនី គឺជាប្រធានបទដំបូងគេដែលត្រូវពិភាក្សាគ្នា ។

ការបញ្ចុះតម្លៃអគ្គិសនីនឹងធ្វើឡើងដំណាក់កាលបន្តបន្ទាប់ រហូតបញ្ចុះមកនៅត្រឹម៣.៧០បាត ដើម្បីប្រកួតប្រជែងជាមួយប្រទេសនានាលើពិភពលោក ។ វានឹងជួយកាត់បន្ថយការចំណាយប្រាក់របស់ពលរដ្ឋ ហើយពលរដ្ឋនឹងរស់នៅមានជីវភាពសមរម្យ ។ លោកស្រី ផេថងថាន បានពិភាក្សាជាមួយលោក ផីរ៉ាផាន់ សាលីរ៉ាត់ថាវិផាក រដ្ឋមន្ត្រីក្រសួងថាមពល ហើយរដ្ឋាភិបាលតែងយកចិត្តទុកដាក់ពីតម្លៃអគ្គិសនី ប៉ុន្តែត្រូវគិតពីផលប៉ះពាល់ផ្នែកថាមពលផងដែរ ។

ការប្រកាសពីគោលដៅបញ្ចុះតម្លៃអគ្គិសនីមកនៅត្រឹមតែ៣.៧០បាតនេះ គឺបន្ទាប់ពីលោកស្រី ផេថងថាន បានអញ្ជើញចូលរួមក្នុងកម្មវិធីទិវាកុមារជាតិ ដោយលោកស្រីបញ្ជាក់ថា រដ្ឋាភិបាលប្តេជ្ញាបញ្ចុះតម្លៃអគ្គិសនីឱ្យបាន ដើម្បីឱ្យពលរដ្ឋប្រើប្រាស់អគ្គិសនីក្នុងតម្លៃថោកសមរម្យ ។

គួរបញ្ជាក់ថា ពេលរកសំឡេងឆ្នោត គណបក្សភឿថៃរបស់លោកស្រី ផេថងថាន ធ្លាប់ប្រកាសថា នឹងបញ្ចុះតម្លៃអគ្គិសនី និងប្រេងឥន្ធនៈឱ្យពលរដ្ឋ ។ បើអគ្គិសនីមានតម្លៃ៣.៧០ក្នុង១គីឡូវ៉ាត់តាមគោលដៅ បញ្ជាក់ថា អគ្គិសនីមានតម្លៃថោកបំផុតក្នុងអាណត្តិលោកស្រី បើធៀបនឹងរដ្ឋាភិបាលអាណត្តិមុនៗ ៕

ប្រទេសថៃ ៖ កាលពីវេលាម៉ោង៦ល្ងាច ថ្ងៃទី៧ ខែមករា ឆ្នាំ២០២៥ សារព័ត៌មានថៃឈ្មោះ Thairath បានរាយការណ៍ថា មានជនមិនស្គាល់មុខជិះម៉ូតូ មកបា.ញ់ប្រ.ហារ លើ លោក លឹម គីមយ៉ា ដែលត្រូវបានគេស្គាល់ថា គឺជាអតីតតំណាងរាស្រ្តរបស់គណបក្សសង្រ្គោះជាតិកម្ពុជា មណ្ឌលកំពង់ធំ បង្កឱ្យមានការភ្ញាក់ផ្អើលនៅមុខវត្ត Bowonniwet តំបន់បាងឡាំភូ សង្កាត់ព្រះណាខន ទីក្រុងបាងកក ។

នៅព្រឹកថ្ងៃទី៨ ខែមករា នេះ តុលាការថៃបានដេញដីកាឱ្យសមត្ថកិច្ចចាប់ខ្លួនខ្មា.ន់ កាំភ្លើ.ង ឈ្មោះ អេកខាឡាក់ ផេណយ ដោយចោទប្រកាន់ពីបទសម្លា.ប់ មនុស្សគិតទុកជាមុន ។ សមត្ថកិច្ចថៃសន្និដ្ឋានថា វាជាជម្លោះផ្ទាល់ខ្លួនតែប៉ុណ្ណោះ គឺពុំពាក់ព័ន្ធនឹងរឿងនយោបាយទេ ។

យោងតាមការចុះផ្សាយសារព័ត៌មានថៃ Thairath បាយរាយការណ៍ថា ជនរងគ្រោះឈ្មោះ លឹម គឹមយ៉ា អាយុ៧៣ឆ្នាំ ជនជាតិខ្មែរ មានសញ្ជាតិបារាំង និងភរិយាជនជាតិបារាំង ។ លោកបានធ្វើដំណើរតាមរថយន្តក្រុងពីខេត្តសៀមរាប មកប្រទេសថៃ ហើយត្រូវខ្មាន់កាំភ្លើងបាញ់ពីចំហៀងខាងស្តាំ ត្រូវចំស្មាខាងស្តាំ ចំនួន៣គ្រាប់ បណ្តាលឱ្យស្លាប់ភ្លាមៗ ពេលលោកចុះពីលើរថយន្តក្រុង ។

តាមការពិនិត្យសាកសពបឋមបង្ហាញថា មានគ្រាប់កាំភ្លើងចំនួន៣គ្រាប់ បានចូលក្នុងឆ្អឹងជំនីស្តាំ និងស្មាស្តាំ ដែលធ្វើឱ្យអតីតតំណាងរាស្រ្តរបស់គណបក្សសង្រ្គោះជាតិកម្ពុជា មណ្ឌលកំពង់ធំ រូបនេះបាត់បង់ជីវិតភ្លាមៗនៅកន្លែងកើតហេតុ បើទោះបីជាភ្នាក់ងារបានព្យាយាមជួយសង្គ្រាមបឋមនៅត្រង់បេះដូងក្តី ប៉ុន្តែដោយសាររបួសមានសភាពធ្ងន់ធ្ងរពេក ។

សមត្ថកិច្ចឱ្យដឹងថា ជនល្មើសជាមនុស្សប្រុស ពាក់អាវដៃខ្លី ពណ៌ប្រផេះ ស្ពាយកាបូប និងស្លៀកខោខូវប៊យ ពាក់មួកសុវត្ថិភាព បានជិះម៉ូតូម៉ាក Honda Wave ពណ៌ក្រហម ស្លាកលេខ 845 ហើយជនល្មើសបានលាក់កាំភ្លើងនៅក្នុងកាបូបស្ពាយ ។

តាមការស៊ើបអង្កេតបឋម គឺជនរងគ្រោះជាអតីតតំណាងរាស្រ្តរបស់គណបក្សនយោបាយកម្ពុជា ដែលបានជិះរថយន្តក្រុងពីខេត្តសៀមរាប ប្រទេសកម្ពុជា មកទីក្រុងបាងកក ជាមួយភរិយាជនជាតិបារាំង ។ ជនរងគ្រោះបានចុះពីរថយន្តក្រុងនៅកន្លែងកើតហេតុ បន្ទាប់មក ជនល្មើសក៏ជិះម៉ូតូមកដល់ ហើយចុះពីលើម៉ូតូបាញ់សំដៅមកជនរងគ្រោះ និងជិះម៉ូតូគេចខ្លួនតាមផ្លូវព្រះសុមេន ។

ក្រោយកើតហេតុ សមត្ថកិច្ចក៏បាននាំភរិយាសាកសពទៅសាកសួរនៅប៉ុស្តិ៍នគរបាល ដើម្បីស្វែងរកមូលហេតុអំពើឃាតកម្មបាញ់ប្រហារអតីតតំណាងរាស្រ្តកម្ពុជា នៅកណ្តាលក្រុងបាងកក ។ ភរិយាសាកសព ប្រាប់ថា ខ្លួន និងស្វាមី មានគោលបំណងមកដើរលេងនៅថៃ ប៉ុន្តែក៏ជួបហេតុការណ៍នេះ ។

នៅព្រឹកថ្ងៃទី៨ ខែមករា នេះ តុលាការថៃបានដេញដីកាឱ្យសមត្ថកិច្ចចាប់ខ្លួនខ្មា.ន់ កាំភ្លើ.ង ឈ្មោះ អេកខាឡាក់ ផេណយ ដោយចោទប្រកាន់ពីបទសម្លា.ប់ មនុស្សគិតទុកជាមុន និងដាក់អាវុធតាមខ្លួននៅទីសាធារណៈដោយគ្មានការអនុញ្ញាត ។

ជនល្មើសឈ្មោះ អេកខាឡាក់ ផេណយ និងមានឈ្មោះហៅក្រៅថា «អេម កងរឿ» អាយុ៤១ឆ្នាំ ប្រកបមុខរបររត់ម៉ូតូឌុប គឺជាអតីតទាហានជើងទឹកថៃ ។ សមត្ថកិច្ចសន្និដ្ឋានថា នេះជាករណីជម្លោះផ្ទាល់ខ្លួនប៉ុណ្ណោះ ហើយពុំពាក់ព័ន្ធនឹងរឿងនយោបាយទេ ៕

ប្រទេសជប៉ុន៖ Onsen គឺជាប្រពៃណីនៃការងូតទឹកក្តៅធម្មជាតិដែលមានអាយុកាលរាប់សតវត្សមកហើយនៅក្នុងប្រទេសជប៉ុន។ វាត្រូវបានបង្កើតឡើងពីប្រភពទឹកក្តៅក្រោមដីនៅជិតតំបន់ភ្នំភ្លើងដែលនៅតែសកម្ម ការងូតទឹកក្តៅគឺជាបទពិសោធន៍ដែលមិនអាចខ្វះបានសម្រាប់អ្នកមកលេងប្រទេសជប៉ុន។ សម្រាប់ជនជាតិដើមភាគតិច ការងូតទឹកក្តៅមិនត្រឹមតែជាអនាម័យរាងកាយប៉ុណ្ណោះទេ ថែមទាំងជាវប្បធម៌ ពិធីសម្អាតព្រលឹង វិធីសាស្រ្តនៃការព្យាបាល និងការថែទាំរាងកាយផងដែរ។

ដូច្នេះប្រទេសជប៉ុនគ្រោងដាក់បញ្ចូលវប្បធម៌នេះ ជាបេតិកភណ្ឌវប្បធម៌អរូបីរបស់អង្គការយូណេស្កូនៅឆ្នាំ ២០២៨ ដោយបច្ចុប្បន្នអភិបាលមួយក្រុមតំណាងឱ្យខេត្តចំនួន ៤៤ កំពុងធ្វើយុទ្ធនាការដើម្បីធ្វើឱ្យវប្បធម៌ងូតទឹក Onsen ក្លាយជាបេតិកភណ្ឌវប្បធម៌អរូបីរបស់អង្គការយូណេស្កូនៅពេលខាងមុខ។ លោក Shinji Hirai អភិបាលខេត្ត Tottori បាននិយាយថា វប្បធម៌ងូតទឹកក្តៅធម្មជាតិនេះសមនឹងទទួលបានការទទួលស្គាល់ស្មើនឹងសិល្បៈនៃការធ្វើស្រា និង shochu កាលពីខែធ្នូផងដែរ។

យោងតាមសារព័ត៌មានបទេសចុះផ្សាយថា Onsen មិនត្រឹមតែជាសកម្មភាពសម្រាកលំហែកាយប៉ុណ្ណោះទេ ប៉ុន្តែក៏ជារបៀបរស់នៅដ៏ទាក់ទាញមួយរបស់ជប៉ុនផងដែរ ដែលជាប់ទាក់ទងយ៉ាងជិតស្និទ្ធជាមួយនឹងជីវិតប្រចាំថ្ងៃរបស់មនុស្ស។ បច្ចុប្បន្នប្រទេសជប៉ុនមានរមណីយដ្ឋានទឹកក្ដៅប្រហែល ៣,០០០ ដែលជនជាតិដើមភាគតិចចាត់ទុកថាជាអំណោយពីធម្មជាតិ។ កាលពីមុន ប្រជាជនជប៉ុនតែងតែស្នាក់នៅតំបន់ Onsen យ៉ាងហោចណាស់មួយសប្តាហ៍ ឬយូរជាងនេះដើម្បីជាវិធីព្យាបាលជំងឺ ដោយងូតទឹកច្រើនដងក្នុងមួយថ្ងៃ។

ទោះជាយ៉ាងណាដោយសារពលរដ្ឋឥឡូវមានការងាររវល់ច្រើន ដូច្នេះពួកគេមកងូតទឹកក្តៅត្រឹមតែមួយ ឬពីរថ្ងៃប៉ុណ្ណោះ។ គួរបញ្ជាក់ដែរថា កិច្ចខិតខំប្រឹងប្រែងដើម្បីធ្វើឱ្យ onsen ក្លាយជាបេតិកភណ្ឌវប្បធម៌អរូបីពិភពលោក គឺទទួលបានសន្ទុះចាប់តាំងពីអង្គការយូណេស្កូបានទទួលស្គាល់វប្បធម៌សូណារបស់ប្រទេសហ្វាំងឡង់ក្នុងឆ្នាំ ២០២០។ សូណាត្រូវបានណែនាំជាផ្នែកមួយដែលមិនអាចខ្វះបាននៃជីវិតរបស់មនុស្សភាគច្រើន។ ហេតុនេះប្រទេសជប៉ុនក៏មានវប្បធម៌ងូតទឹកក្តៅ ដែលស្រដៀងនឹងសូណាដែរ ដែលវប្បធម៌នេះ គ្រោងនឹងដាក់បញ្ចូលជាបេតិកភណ្ឌវប្បធម៌អរូបីរបស់អង្គការយូណេស្កូនៅឆ្នាំ ២០២៨៕