ប្រទេសជប៉ុន ៖ យោងតាមក្រុមហ៊ុនស្រាវជ្រាវជប៉ុនបង្ហាញថា ក្រុមហ៊ុនផ្នែកអាហារនៅប្រទេសជប៉ុន រួមមាន ៖ ភោជនីយដ្ឋាន, ផ្សារទំនើប និងហាងទំនិញ នឹងដំឡើងថ្លៃអាហាររហូតដល់ជាង៣,៩០០មុខ នៅដើមឆ្នាំ២០២៥ ដោយសារក្រុមហ៊ុនទាំងនេះត្រូវចំណាយថ្លៃដើមខ្ពស់ ។ ប៉ុន្តែវាធ្វើឱ្យពលរដ្ឋបារម្ភខ្លាំងពីតម្លៃអាហារកើនឡើងម្តងទៀត ក្រោយពីក្រុមហ៊ុនទាំងនេះទើបតែដំឡើងថ្លៃអាហារចំនួន១២,៥២០មុខ នៅឆ្នាំ២០២៤ ។

ក្រុមហ៊ុនស្រាវជ្រាវ Teikoku Databank ឱ្យដឹងថា តម្លៃអាហារនៅជប៉ុនបានកើនឡើងជាបន្តបន្ទាប់ រហូតដល់ឆ្នាំ២០២៥ ។ បើតាមការសាកសួរទៅកាន់ភោជនីយដ្ឋាន, ផ្សារទំនើប និងហាងទំនិញជាច្រើនកន្លែងឱ្យដឹងថា ពួកគេនឹងដំឡើងថ្លៃអាហាររហូតដល់ជាង៣,៩០០មុខ គិតចាប់ពីខែមករា ដល់ខែមេសា ឆ្នាំ២០២៥ ។

ក្រុមហ៊ុនស្រាវជ្រាវបញ្ជាក់ថា បើទោះជាការដំឡើងថ្លៃអាហារបានជួយឱ្យក្រុមហ៊ុនទាំងនេះពុំរងផលប៉ះពាល់ដោយសារការចំណាយដើមទុនខ្ពស់ ប៉ុន្តែវានឹងប៉ះពាល់ពលរដ្ឋ ដោយសារពួកគេត្រូវចំណាយប្រាក់ច្រើនជាងមុន ។ ម្យ៉ាងទៀត បើតម្លៃអាហារ និងទំនិញកើនឡើងខ្ពស់ វាមិនងាយធ្លាក់ចុះវិញទេ ហើយពលរដ្ឋនឹងកាត់បន្ថយការចំណាយ ។

ក្រុមហ៊ុនអាហារជប៉ុន ចំនួន១៩៥ក្រុមហ៊ុន បានប្រកាសកាលពីចុងខែវិច្ឆិកា ឆ្នាំ២០២៤ ថា ពួកគេនឹងដំឡើងថ្លៃអាហារចំនួន៣,៩៣៣មុខ រួមមាន ៖ គ្រឿងស្រវឹង, ភេសជ្ជៈផ្អែមមានជាតិហ្គាស, នំប៉័ង, អាហារកែច្នៃ, អាហារក្លាសេ និងនំចណីជាច្រើនមុខ ។
ការចំណាយថ្លៃដើមខ្ពស់ក្នុងការទិញបន្លែបង្ការ និងត្រីសាច់ គឺជាមូលហេតុចម្បងដែលធ្វើឱ្យថ្លៃអាហារកើនឡើងនៅជប៉ុន ។ រីឯការចំណាយដើមទុនលើការដឹកជញ្ជូនអាហារ និងកម្លាំងពលកម្មកើនឡើង ក៏បានជំរុញឱ្យថ្លៃអាហារកើនឡើងផងដែរ ។ កត្តាទាំងនេះនឹងធ្វើឱ្យក្រុមហ៊ុនអាហារជប៉ុនដំឡើងថ្លៃអាហារកាន់តែខ្ពស់ នៅឆ្នាំ២០២៥ ។

តាមរបាយការណ៍បញ្ជាក់ថា ពេញមួយឆ្នាំ២០២៤នេះ អាហារជប៉ុនចំនួន១២,៥២០មុខ បានឡើងថ្លៃជាបន្តបន្ទាប់ ហើយអាហារចំនួន១០៩មុខ នឹងឡើងថ្លៃ នៅខែធ្នូ ឆ្នាំ២០២៤ ។ ដូច្នេះ វាធ្វើឱ្យពលរដ្ឋជប៉ុនបង្ហាញក្តីបារម្ភ ដោយសារពួកគេត្រូវចំណាយប្រាក់ច្រើនជាងមុនសម្រាប់ទិញទំនិញ និងអាហារប្រចាំថ្ងៃ ៕

ប្រទេសម៉ាឡេស៊ី ៖ សមាជិកសភាតំណាងរាស្ត្រគណបក្សប្រឆាំងមួយរូបនៅប្រទេសម៉ាឡេស៊ី ត្រូវបានមហាជនរិះ.គន់ ពេញបណ្តាញសង្គម ក្រោយពីស្នើរដ្ឋាភិបាលគាំទ្រឱ្យពលរដ្ឋមានប្តី-ប្រពន្ធច្រើន ដើម្បីដោះស្រាយបញ្ហាចំនួនពលរដ្ឋធ្លាក់ចុះ ។ នេះបើតាមការចុះផ្សាយរបស់សារព័ត៌មានបរទេស កាលពីថ្ងៃទី២ ខែធ្នូ ឆ្នាំ២០២៤ ។

លោក Dato Rosol Wahid ជាសមាជិកសភាប្រចាំខេត្តទ្រាំងកានូ មកពីគណបក្សឥស្លាមម៉ាឡេស៊ី បានលើកឡើងក្នុងកិច្ចពិភាក្សាពីសេចក្តីព្រាងថវិកាឆ្នាំ២០២៥ នៅរដ្ឋសភា កាលពីថ្ងៃទី២៨ ខែវិច្ឆិកា កន្លងមកថា រដ្ឋាភិបាលគួរតែលើកទឹកចិត្តឱ្យយុវជនសម័យថ្មីរៀបការ និងមានកូនឱ្យច្រើន ពីព្រោះពួកគេពុំព្រមរៀបការបង្កើតគ្រួសារទេ ។

លោកបន្តថា តើក្រសួងកិច្ចការនារី និងអភិវឌ្ឍន៍សហគមន៍អាចធ្វើអ្វីបានខ្លះ ដើម្បីជំរុញឱ្យយុវជនម៉ាឡេស៊ីរៀបការមានកូន ដើម្បីឱ្យប្រទេសរបស់យើងមានចំនួនពលរដ្ឋកើនឡើង? ហេតុនេះ រដ្ឋាភិបាលគួរតែសាកល្បងជំរុញឱ្យពលរដ្ឋមានប្តី-ប្រពន្ធច្រើន ដើម្បីដោះស្រាយបញ្ហាអត្រាកំណើតធ្លាក់ចុះ នាពេលបច្ចុប្បន្ន ។

ក្រោយការលើកឡើងបែបនេះ បានធ្វើឱ្យសមាជិកសភាផ្សេងៗក្នុងរដ្ឋសភាសើចចំអក និងរិះគន់យ៉ាងច្រើន ។ លើសពីនេះ ក៏មានការជជែកវែកញែកពីមហាជនពេញបណ្តាញសង្គមផងដែរ ពាក់ព័ន្ធនឹងសំណើឱ្យពលរដ្ឋមានប្តី-ប្រពន្ធច្រើន ។ ប៉ុន្តែលោក Dato បញ្ជាក់ថា ប្រទេសមហាអំណាច ដូចជា ៖ ចិន, ឥណ្ឌា និងឥណ្ឌូណេស៊ី សុទ្ធតែមានពលរដ្ឋច្រើនទាំងអស់ ហើយដើម្បីក្លាយជាប្រទេសមួយអស្ចារ្យ ម៉ាឡេស៊ីត្រូវតែមានពលរដ្ឋច្រើនដូចគ្នា ។

រដ្ឋាភិបាលម៉ាឡេស៊ីក្រោមការដឹកនាំរបស់អតីតនាយករដ្ឋមន្ត្រី លោក Mahathir Mohamad ដែលធ្លាប់កំណត់គោលដៅកាលពីឆ្នាំ១៩៨២ ឱ្យម៉ាឡេស៊ីមានពលរដ្ឋរហូតដល់៧០លាននាក់ ប៉ុន្តែអត្រាកំណើតបានធ្លាក់ចុះជាបន្តបន្ទាប់ ។ ជាក់ស្តែង កាលពីឆ្នាំ២០១០ ស្ត្រីម្នាក់មានកូន២នាក់ ប៉ុន្តែនៅឆ្នាំ២០២០ ពួកនាងមានកូនតែម្នាក់ប៉ុណ្ណោះ ។

នេះជាបញ្ហាគួរឱ្យបារម្ភយ៉ាងខ្លាំង ហើយនៅឆ្នាំ២០៤៣ ម៉ាឡេស៊ីនឹងសម្បូរពលរដ្ឋអាយុច្រើន គឺពលរដ្ឋ១៥% នឹងមានអាយុលើស៦៥ឆ្នាំ ។ យើងប្រឈមនឹងបញ្ហាអត្រាកំណើតធ្លាក់ចុះខ្លាំង ហើយវានឹងប៉ះពាល់ដោយផ្ទាល់ចំពោះការអភិវឌ្ឍសង្គម និងសេដ្ឋកិច្ចជាតិ ។ នេះបើតាមការលើកឡើងរបស់លោក Dato ។

មហាជនពុំយល់ស្របនឹងការលើកឡើងរបស់សមាជិកសភារូបនេះទេ ដោយពួកគេនិយាយថា មូលហេតុធ្វើឱ្យអត្រាកំណើតធ្លាក់ចុះ ដោយសារបញ្ហាសេដ្ឋកិច្ច និងការចំណាយក្នុងជីវភាពរស់នៅខ្ពស់ ។ រីឯការមានប្តី-ប្រពន្ធច្រើននាក់ពុំអាចជួយអ្វីឡើយ ហើយរដ្ឋាភិបាលគួរតែលើកទឹកចិត្តឱ្យវិនិយោគិនបរទេសមកវិនិយោគនៅម៉ាឡេស៊ីឱ្យបានច្រើន ដើម្បីឱ្យពលរដ្ឋមានការងារធ្វើ និងបង្កើនឱកាសអាជីវកម្ម ៕

ប្រទេសប៉ាគីស្ថាន៖ គ្រូបង្រៀន AI ដំបូងបង្អស់របស់ប៉ាគីស្ថានដែលមានឈ្មោះថា Miss Aini បានធ្វើឱ្យសិស្សជាច្រើនមានការចាប់អារម្មណ៍យ៉ាងខ្លាំង នៅពេលដែលនាងបានបង្ហាញខ្លួននៅក្នុងសាលារៀន Happy Palace ក្នុងទីក្រុង Karachi ប្រទេសប៉ាគីស្ថាន។

យោងតាមសារព័ត៌មានបរទេសចុះផ្សាយថា Miss Aini ដែលជាគ្រូបង្រៀន AI ដំបូងបង្អស់របស់ប៉ាគីស្ថានមានសមត្ថភាពឆ្លើយសំណួរជាង ២០ ភាសាឯណោះរួមមាន ភាសាអ៊ូឌូ អង់គ្លេស ស៊ីនឌី បារាំង ចិន និងផ្សេងៗទៀត។ សិស្សដែលចូលរួមក្នុងថ្នាក់រៀនជាមួយកញ្ញា Aini បានសម្តែងការរំភើបចិត្តយ៉ាងខ្លាំង ដោយបញ្ជាក់ថាគ្រូ AI ឆ្លើយសំណួររបស់ពួកគេភ្លាមៗ ដែលធ្វើឱ្យថ្នាក់រៀនមួយនេះក្លាយជាបទពិសោធន៍ពិសេស និងរីករាយបំផុត។

វិស្វករ Hassan Siddiqui ដែលជាអ្នកបង្កើតកញ្ញា Aini បាននិយាយថា មនុស្សយន្តមួយនេះត្រូវបានបង្កើតឡើងដោយមានធាតុផ្សំដូចជាខ្សែភ្លើង សរសៃកញ្ចក់ ប្លាស្ទិក សក់សំយោគដែលមានប្រភពមកពីទីផ្សារក្នុងស្រុក និងបំពាក់ដោយបញ្ញាសិប្បនិម្មិត។ Hassan Siddiqui បានបន្តថា លោកបានចំណាយពេលប្រាំពីរខែ ដើម្បីអភិវឌ្ឍនាងឱ្យក្លាយជាគ្រូបង្រៀនរ៉ូបូតដ៏អស្ចារ្យម្នាក់។

នាយកសាលា Happy Palace បាននិយាយថា Aini គឺជាគ្រូបង្រៀន AI ដំបូងគេដែលត្រូវបានណែនាំនៅក្នុងប្រទេសប៉ាគីស្ថាន និងជាមនុស្សយន្តដំបូងដែលបានបង្ហាញខ្លួនក្នុងសាលារៀននេះ។ មូលហេតុដែលសាលាដាក់ដំណើរការគ្រូបង្រៀន AI គឺដើម្បីជួយសិស្សអភិវឌ្ឍចំណេះដឹងបន្ថែមទាក់ទងនឹងបច្ចេកវិទ្យា ដូច្នេះសិស្សានុសិស្សនឹងអាចអភិវឌ្ឍជំនាញជាច្រើនតាមរយៈការអនុវត្តន៍នៅក្នុងមន្ទីរពិសោធន៍ដូចជា មនុស្សយន្ត និងបញ្ញាសិប្បនិម្មិតជាដើម។

អ្នកតំណាងសាលាក៏បាននិយាយដែរថា “បទពិសោធន៍ទាំងនេះនឹងជួយឱ្យយើងដឹងពីសក្តានុពលនៃ AI” ។ គួរបញ្ជាក់ដែរថា ការដាក់ដំណើរការគ្រូបង្រៀន AI នៅក្នុងសាលារៀននាពេលបច្ចុប្បន្ននេះគឺមានការកើនឡើងខ្លាំងគួរឱ្យកត់សម្គាល់។ កាលពីដើមឆ្នាំនេះឥណ្ឌាក៏បានដាក់ដំណើរការគ្រូបង្រៀន AI ដំបូងបង្អស់នៅក្នុងសាលារៀនរបស់ខ្លួនផងដែរ ក្នុងគោលបំណងដូចគ្នាគឺចង់ឱ្យសិស្សមានការយល់ដឹងកាន់តែច្បាស់ពីបច្ចេកវិទ្យាពិភពលោក៕

ប្រទេសវៀតណាម ៖ កាលពីថ្ងៃទី១ ខែធ្នូ ឆ្នាំ២០២៤ សារព័ត៌មានបរទេសរាយការណ៍ថា រដ្ឋសភាវៀតណាមបានអនុម័តគម្រោងកសាងផ្លូវរថភ្លើងល្បឿនលឿន ដើម្បីតភ្ជាប់ពីទីក្រុងហាណូយនៅភាគខាងជើង ទៅកាន់ទីក្រុងហូជីមិញភាគខាងត្បូង ។ គម្រោងនេះនឹងចំណាយថវិកាកសាងប្រមាណ៦៧,០០០លានដុល្លារអាមេរិក ។

ផ្លូវរថភ្លើងល្បឿនលឿនតភ្ជាប់ទីក្រុងធំៗរបស់វៀតណាម គឺមានប្រវែងសរុប១,៥៤១គីឡូម៉ែត្រ ហើយរថភ្លើងថ្មីនេះមានល្បឿន៣៥០គីឡូម៉ែត្រក្នុង១ម៉ោង ។ ដូច្នេះ វានឹងកាត់បន្ថយរយៈពេលធ្វើដំណើរពី៣០ម៉ោង មកនៅត្រឹមតែ៥ម៉ោងប៉ុណ្ណោះ ។

វៀតណាមនឹងចាប់ផ្តើមកសាងផ្លូវរថភ្លើងនេះនៅដើមឆ្នាំ២០២៧ ហើយរំពឹងថា រថភ្លើងនឹងដំណើរការនៅឆ្នាំ២០៣៥ ។ រថភ្លើងល្បឿនលឿននឹងធ្វើដំណើរឆ្លងកាត់ខេត្ត-ក្រុង ចំនួន២០ និងមានស្ថានីយរថភ្លើង២៣កន្លែង, ស្ថានីយដឹកទំនិញ៥កន្លែង ហើយរថភ្លើងនឹងដឹកទាំងអ្នកដំណើរ, ទំនិញ ព្រមទាំងផ្តល់សេវាកម្មផ្នែកការពារជាតិផងដែរ ។

លោក Nguyen Danh Huy អនុរដ្ឋមន្ត្រីក្រសួងគមនាគមន៍ថ្លែងថា គម្រោងនេះសម្រាប់បំពេញតម្រូវការដឹកជញ្ជូនទំនិញកើនឡើង ពីព្រោះបើតាមការស្ទង់មតិជាច្រើនបង្ហាញថា ពលរដ្ឋវៀតណាមចង់មានផ្លូវធ្វើដំណើរឆាប់រហ័សជាងមុនពីភាគខាងជើងមកភាគខាងត្បូង ។ ដូច្នេះ វាជាគម្រោងដ៏សំខាន់សម្រាប់ហេដ្ឋារចនាសម្ព័ន្ធដឹកជញ្ជូន និងបំពេញតួនាទីជួយវៀតណាមឱ្យឈានទៅរកការរីកចម្រើនយ៉ាងឆាប់រហ័ស ។

ប្រទេសវៀតណាមនឹងចំណាយដើមទុនក្នុងស្រុកសម្រាប់អនុវត្តគម្រោងនេះ ព្រមទាំងខ្ចីថវិកាបន្ថែមពីក្រៅប្រទេសមិនលើសពី៣០% ឬស្មើប្រមាណ២០,១០០លានដុល្លារអាមេរិក ។ បច្ចុប្បន្ន វៀតណាមកំពុងពិចារណាជ្រើសរើសរូបរាងរថភ្លើងល្បឿនលឿនរបស់ជប៉ុន និងចិន ។

អ្នកវិភាគផ្នែកដឹកជញ្ជូននិយាយថា គម្រោងនេះនឹងមានសារៈសំខាន់ ព្រមទាំងបង្កើនសមត្ថភាពប្រកួតប្រជែងផ្នែកដឹកជញ្ជូនវៀតណាម ដោយសារការដឹកជញ្ជូនក្នុងស្រុកមានកំណត់ ។ ពេលកសាងផ្លូវរថភ្លើងល្បឿនលឿនរួចរាល់ វានឹងអាចកាត់បន្ថយថ្លៃដឹកជញ្ជូនទំនិញពីភាគខាងជើងមកខាងត្បូង ។

គួរបញ្ជាក់ថា ការធ្វើដំណើរពីទីក្រុងហាណូយ ទៅទីក្រុងហូជីមិញតាមរថភ្លើងធម្មតា គឺចំណាយពេលចាប់ពី៣៤ម៉ោង ទៅ៣៨ម៉ោង ខណៈថ្លៃធ្វើដំណើរ គឺពី៦៤ដុល្លារ ទៅ៩២ដុល្លារអាមេរិក ។ រីឯថ្លៃធ្វើដំណើរតាមយន្តហោះ ចាប់ពី១០០ដុល្លារ ទៅ៣៦០ដុល្លារអាមេរិក ៕

ទោះបីជាបច្ចុប្បន្ននេះទីផ្សាររថយន្តអគ្គិសនីរបស់ចិន កំពុងកើនឡើងខ្លាំងឥតឈប់ឈរក៏ដោយ ក៏មនុស្សភាគច្រើននៅតែជ្រើសរើសប្រើប្រាស់រថយន្តជប៉ុនដែរ។ តើមូលហេតុអ្វីបានជារថយន្តជប៉ុននៅតែមានភាពទាក់ទាញជាងរថយន្តចិនបែបនេះ? សម្រាប់មូលហេតុរួមមាន៖

១.បទពិសោធន៍ និងកេរ្តិ៍ឈ្មោះ៖ ក្រុមហ៊ុនរថយន្តជប៉ុនមានបទពិសោធន៍ជាច្រើនទសវត្សរ៍មកហើយក្នុងការផលិត និងអភិវឌ្ឍរថយន្ត។ ក្រុមហ៊ុននេះមានបច្ចេកវិទ្យាដែលត្រូវបានគេបង្ហាញថាអាចទុកចិត្តបាន ហើយមានកេរ្តិ៍ឈ្មោះល្អក្នុងទីផ្សាររថយន្តពិភពលោក ជាហេតុធ្វើឱ្យរថយន្តជប៉ុននៅតែមានប្រជាប្រិយភាព។

២.គុណភាពនិងភាពធន់៖ រថយន្តជប៉ុនជាទូទៅមានភាពល្បីល្បាញដោយសារភាពធន់ និងគុណភាពផលិតកម្មខ្ពស់ ធ្វើឱ្យអ្នកប្រើប្រាស់មានទំនុកចិត្តថារថយន្តរបស់ពួកគេនឹងមានរយៈពេលយូរ អាចកាន់កាប់បានយូរអង្វែង សក្តិសមសម្រាប់អ្នកដែលមិនចង់ប្តូរឡានញឹកញាប់។

៣.ងាយស្រួលស្វែងរកគ្រឿងបន្លាស់៖ ម៉ាករថយន្តចិនគឺពិបាករកគ្រឿងបន្លាស់ណាស់ ប៉ុន្តែម៉ាករថយន្តជប៉ុនវិញគឺអ្នកអាចស្វែងរកគ្រឿងបន្លាស់បានយ៉ាងងាយស្រួល ទាំងគ្រឿងបន្លាស់ពិត និងគ្រឿងបន្លាស់ដែលអាចប្រៀបធៀបបាន ដូច្នេះវាអាចប្រើបានយូរឆ្នាំ និងមិនងាយអស់ស្តុកនោះទេ។

៤.តម្លៃលក់បន្តល្អ៖ រថយន្តជប៉ុនមានតម្លៃលក់បន្តល្អបើធៀបទៅនឹងរថយន្តចិន ដោយសារតែប្រជាប្រិយភាពខ្ពស់របស់វានៅលើទីផ្សារ។ នៅពេលលក់បន្តរថយន្តជប៉ុននៅតែមានតម្លៃខ្ពស់ ចំណែករថយន្តចិនវិញគឺមិនសូវមានតម្លៃនោះទេ។ ទោះបីជាអត្រានៃការរំលោះគឺដូចគ្នាក៏ដោយ ប៉ុន្តែបើគិតពីចំនួនលុយវិញក៏នៅតែចាត់ទុកថារថយន្តជប៉ុនមានតម្លៃល្អជាងរថយន្តចិនផងដែរ៕

បើតាមរបាយការណ៍របស់ភ្នាក់ងារឧតុនិយមពិភពលោក ដែលបានផ្សព្វផ្សាយកាលពីខែសីហា ឆ្នាំ២០២៤ បង្ហាញថា កម្រិតទឹកមហាសមុទ្រប៉ាស៊ីហ្វិកបានកើនឡើងជាបន្តបន្ទាប់លើសពីមធ្យមភាគពិភពលោក ហើយតំបន់ភាគខាងលិចរបស់មហាសមុទ្រនេះមានកម្រិតទឹកសមុទ្រកើនឡើងខ្ពស់ ចាប់ពី១០សង់ទីម៉ែត្រ ទៅ១៥សង់ទីម៉ែត្រ ។

អ្វីដែលគួរឱ្យបារម្ភខ្លាំងបំផុតនោះ គឺប្រទេសកោះនានានៅមហាសមុទ្រប៉ាស៊ីហ្វិក នឹងរងផលប៉ះពាល់ខ្លាំងដោយសារកម្រិតទឹកសមុទ្រកើនឡើង ដោយសារប្រទេសកោះទាំងនេះមានកម្ពស់ជាមធ្យមផុតពីទឹកសមុទ្រ ត្រឹមតែ១ម៉ែត្រ ឬ២ម៉ែត្រប៉ុណ្ណោះ ។ ហេតុនេះ ប្រទេសកោះប្រឈមនឹងការលិចទឹកបន្តិចម្តងៗនាថ្ងៃអនាគត ហើយកម្រិតទឹកសមុទ្រកើនឡើង ក៏បានប៉ះពាល់ដល់អ្នករស់នៅក្បែរឆ្នេរសមុទ្រផងដែរ ។

ក្រុមអង្គការអន្តរជាតិបានស្នើឱ្យតុលាការយុត្តិធម៌អន្តរជាតិ ឬតុលាការពិភពលោក (ICJ) ផ្តល់យោបល់អំពីកាតព្វកិច្ចរបស់ប្រទេសផ្សេងៗ ដើម្បីជួយការពារការផ្លាស់ប្តូរអាកាសធាតុលើពិភពលោក ។ មន្ត្រីអង្គការអន្តរជាតិនិយាយថា តុលាការពិភពលោក គួរចាត់វិធានការតាមផ្លូវច្បាប់លើប្រទេសអភិវឌ្ឍនានា ដែលតែងតែបញ្ចេញខ្យល់ពុលយ៉ាងច្រើនលើបរិយាកាស ហើយប្រទេសទាំងនេះគួរផ្តល់ប្រាក់សំណងទៅឱ្យប្រទេសដែលរងផលប៉ះពាល់ដោយសារគ្រោះធម្មជាតិ ។

វ៉ានូអាទូ គឺជាប្រទេសមួយក្នុងចំណោមប្រទេសចំនួន៩៨ ដែលបានរងផលប៉ះពាល់ខ្លាំងបំផុតពីគ្រោះធម្មជាតិនៅលើពិភពលោក ហើយអង្គការអន្តរជាតិចំនួន១២ នឹងលើកឡើងអំពីបញ្ហាលំបាករបស់ប្រទេសទាំងនេះទៅកាន់តុលាការពិភពលោក (ICJ) ។ ប្រទេសវ៉ានូអាទូ (Vanuatu) មានឈ្មោះជាផ្លូវការថា «សាធារណរដ្ឋវ៉ានូអាទូ» គឺជាដែនដីកោះស្ថិតនៅប៉ែកខាងត្បូងមហាសមុទ្រប៉ាស៊ីហ្វិក ។

យោងតាមរបាយការណ៍របស់ភ្នាក់ងារឧតុនិយមពិភពលោក បញ្ជាក់ថា កម្រិតទឹកសមុទ្រកើនឡើងនេះពុំអាចចៀសវាងបានឡើយ ហើយវានឹងកើនឡើងបែបនេះរយៈពេលជាច្រើនឆ្នាំទៀត ដោយសារការស្រូបយកកំដៅពីមហាសមុទ្រ និងការរលាយផ្ទាំងទឹកកកជាបន្តបន្ទាប់ ៕