សហរដ្ឋអាមេរិក ៖ ប្រធានាធិបតីចិន លោក ស៊ី ជិនពីង បានបដិសេធការអញ្ជើញមកចូលរួមពិធីកាន់តំណែងជាប្រធានាធិបតីអាមេរិករបស់ លោក Donald Trump នៅថ្ងៃទី២០ ខែមករា ឆ្នាំ២០២៥ ប៉ុន្តែលោកនឹងបញ្ជូនមន្ត្រីស្ថានទូតជាន់ខ្ពស់មកចូលរួមជំនួស ។ នេះបើតាមការចុះផ្សាយរបស់កាសែត Financial Times កាលពីថ្ងៃទី៩ ខែមករា កន្លងមក ។

តាមប្រភពជិតស្និទ្ធជាមួយប្រធានាធិបតីចិន បញ្ជាក់ថា មន្ត្រីស្ថានទូតជាន់ខ្ពស់របស់ចិននឹងចូលរួមពិធីកាន់តំណែងរបស់លោក Trump ជំនួសលោក ស៊ី ជិនពីង ហើយមន្ត្រីស្ថានទូតរូបនេះនឹងពិភាក្សាបញ្ហាមួយចំនួនជាមួយក្រុមការងារលោក Trump ។ រីឯស្ថានទូតចិននៅទីក្រុងវ៉ាស៊ីនតោន និងក្រុមការងាររបស់លោក Trump ពុំបាននិយាយអ្វីពាក់ព័ន្ធនឹងការលើកឡើងនេះទេ ។

លោក Trump បានបញ្ជូនលិខិតអញ្ជើញទៅលោក ស៊ី ជិនពីង កាលពីខែធ្នូ ឆ្នាំ២០២៤ ហើយអ្នកជំនាញនិយាយនាពេលនោះថា វាពុំអាចទៅរួចទេ ដែលមេដឹកនាំចិននឹងមកចូលរួមពិធីកាន់តំណែងរបស់លោក Trump វាគ្រាន់តែជាល្ខោននយោបាយប៉ុណ្ណោះ ។ លោក Trump បានថ្លែងកាលពីថ្ងៃទី៦ ខែមករា ឆ្នាំ២០២៥ ថា លោកបានជជែកជាមួយលោក ស៊ី ជិនពីង តាមរយៈមន្ត្រីតំណាង ហើយលោកជឿថា មេដឹកនាំទាំង២រូបនឹងចុះសម្រុងគ្នាពេលលោកកាន់តំណែងអាណត្តិទី២ ។

អ្នកជំនាញបន្តថា ពេលលោក Trump កាន់តំណែងជាប្រធានាធិបតីលើកនេះ គឺសហរដ្ឋអាមេរិកនឹងប្រឈមមុខជាមួយចិនខ្លាំងជាងអាណត្តិមុន ដោយសារលោកបាននិយាយក្នុងពេលរកសំឡេងឆ្នោតថា នឹងដំឡើងពន្ធទំនិញចិនខ្ពស់រហូតដល់ជាង៦០% ដើម្បីឱ្យរដ្ឋាភិបាលក្រុងប៉េកាំងដោះស្រាយបញ្ហាការលួចនាំចូលថ្នាំញៀនមកសហរដ្ឋអាមេរិក ។

ចំណែកក្រសួងការបរទេសចិនបានបញ្ជាក់កាលពីថ្ងៃទី៧ ខែមករា ថា រដ្ឋាភិបាលក្រុងប៉េកាំងផ្តល់ភាពសំខាន់យ៉ាងខ្លាំងចំពោះការលើកឡើងរបស់លោក Trump ហើយចិនតាំងចិត្តជំរុញស្ថិរភាព ពង្រឹងសេដ្ឋកិច្ច និងពាណិជ្ជកម្មជាមួយសហរដ្ឋអាមេរិក ៕

ទីក្រុងហុងកុង ៖ ពលរដ្ឋហុងកុងជាង២សែននាក់ នៅតែរស់នៅយ៉ាងលំបាក ដោយសារតម្លៃលំនៅឋាន និងបន្ទប់ស្នាក់នៅកើនឡើងខ្ពស់ក្នុងចំណោមប្រទេសមានតម្លៃលំនៅឋានខ្ពស់លើពិភពលោក ។ អ្នកមានប្រាក់ចំណូលតិចបានជួលបន្ទប់មានទំហំធំជាងគ្រែសម្រាកបន្តិច គ្មានបង្អួច ហើយ៤គ្រួសារត្រូវប្រើប្រាស់បន្ទប់ទឹក និងផ្ទះបាយរួមគ្នា ខណៈបន្ទប់ជួលខ្លះទៀត មានបន្ទប់ទឹកតែ១ប៉ុណ្ណោះ សម្រាប់ប្រើប្រាស់២០នាក់ ។

នារីម្នាក់ប្រាប់ថា រយៈពេល៣ឆ្នាំមកនេះ នាងបានរស់នៅក្នុងបន្ទប់ដ៏តូចចង្អៀត ។ នាងគ្មានអ្វីក្រៅពីការចងចាំដ៏ឈឺចាប់ពេលរស់នៅក្នុងជីវិតបែបនេះ ពីព្រោះនាងគ្មានប្រាក់គ្រប់គ្រាន់សម្រាប់បង់ថ្លៃផ្ទះជួលល្អជាងនេះទេ ។

ពលរដ្ឋហុងកុងជាង២សែននាក់ បានរស់នៅក្នុងបន្ទប់ធំជាងគ្រែសម្រាកបន្តិច ដោយទ្រាំធុំក្លិនស្អុយ និងមានសត្វល្អិតចម្លងមេរោគក្នុងរដូវក្តៅ ។ ក្រៅពីនេះ ដោយសារគ្មានម៉ាស៊ីនបញ្ចេញខ្យល់ បានធ្វើឱ្យអ្នកជួលបន្ទប់តូចៗត្រូវបើកទ្វារបន្ទប់គ្រប់ពេលវេលា ហើយធ្វើឱ្យការរស់នៅគ្មានភាពផ្ទាល់ខ្លួន ។

ទីក្រុងហុងកុងមានគោលដៅលុបបំបាត់ការជួលបន្ទប់ស្នាក់នៅទាំងអស់នៅត្រឹមឆ្នាំ២០៤៩ ដែលកំណត់ដោយមន្ត្រីជាន់ខ្ពស់នៅទីក្រុងប៉េកាំង ដោយសារឃើញពលរដ្ឋហុងកុងពិបាករស់នៅខ្លាំងពេក ។ វាជាមូលហេតុធ្វើឱ្យបញ្ហាក្នុងសង្គមកើនឡើង ហើយបង្កឱ្យមានការប្រមូលផ្តុំគ្នាតវ៉ាយ៉ាងធំ កាលពីឆ្នាំ២០១៩ ។

រដ្ឋាភិបាលចិនបានព្យាយាមដោះស្រាយបញ្ហាខ្វះខាតទីលំនៅរបស់ពលរដ្ឋ តាមរយៈការបង្កើនលំនៅឋាន ចំនួន៣០ម៉ឺន ៨ពាន់ខ្នង ចាប់ពីឆ្នាំ២០២៥ ដល់ឆ្នាំ២០៣៥ ។ SoCO ជាអង្គការពុំស្វែងរកប្រាក់ចំណេញនៅហុងកុងឱ្យដឹងថា កាលពីឆ្នាំ២០២២ ហុងកុងមានផ្ទះល្វែងបែងចែកជាបន្ទប់តូចៗសម្រាប់ជួល ប្រមាណ១១ម៉ឺនកន្លែង ។

ចំណែក Oxfam ជាអង្គការពុំស្វែងរកប្រាក់ចំណេញនៅអង់គ្លេសបញ្ជាក់ថា ហុងកុងមានពលរដ្ឋប្រមាណ ៧លាន ៥សែននាក់ ក្នុងនោះពលរដ្ឋ ១លាន ៤សែននាក់ បានរស់នៅក្នុងភាពក្រីក្រ ។ រីឯចំនួនលំនៅឋានអ្នកក្រ បានកើនឡើងដល់ ៦១ម៉ឺន ៩ពាន់ខ្នង ក្នុងត្រីមាសទី១ ឆ្នាំ២០២៤ ៕

លិខិតឆ្លងដែន ឬហៅថា Passports គឺជាឯកសារដ៏សំខាន់មួយសម្រាប់អ្នកទេសចរដែលធ្វើដំណើរទៅក្រៅប្រទេស ខណៈវាក៏ជាឯកសារផ្លូវការដែលចេញដោយរដ្ឋាភិបាលផ្ទាល់ផងដែរ។ ដូច្នេះក្នុងចំណោម ១៩៥ ប្រទេសជុំវិញពិភពលោក លិខិតឆ្លងដែនរបស់ប្រទេសសិង្ហបុរីគឺមានឥទ្ធិពលជាងគេ ពោលគឺអាចប្រើប្រាស់ដើម្បីធ្វើដំណើរទៅកាន់ប្រទេសនិងដែនដីដទៃទៀត ដោយពុំចាំបាច់តម្រូវឱ្យមានការស្នើសុំទិដ្ឋាការជាមុន ឬមិនត្រូវការទិដ្ឋាការតែម្តង មានន័យថា លោកអ្នកគ្រាន់តែមានលិខិតឆ្លងដែនសិង្ហបុរីតែមួយ គឺអាចឆ្លងដែនទៅប្រទេសនានាចំនួន ១៩៥ យ៉ាងមានសេរីភាពបំផុត។

មូហេតុដែលលិខិតឆ្លងដែនរបស់ប្រទេសនេះមានឥទ្ធិពលជាងគេនៅលើពិភពលោកគឺដោយសារទំនាក់ទំនងការទូតល្អជាមួយបណ្តាប្រទេសផ្សេងៗ ការចូលរួមយ៉ាងសកម្មក្នុងអង្គការអន្តរជាតិ សេដ្ឋកិច្ចរឹងមាំ សុវត្ថិភាព និងស្ថិរភាព គឺជាហេតុផលដែលលិខិតឆ្លងរបស់ប្រទេសសិង្ហបុរីមានឥទ្ធិពលខ្លាំងបំផុតនៅឆ្នាំ ២០២៥។ ជាការពិតណាស់ ទំនាក់ទំនងការទូតគឺបានដើរតួនាទីយ៉ាងសំខាន់ក្នុងចំណាត់ថ្នាក់លិខិតឆ្លងដែន។ សិង្ហបុរីជាប្រទេសមួយដែលមានទំនាក់ទំនងល្អគ្រប់ប្រទេសតែម្តង ដែលនេះបានធ្វើឱ្យលិខិតឆ្លងដែនរបស់ប្រទេសសិង្ហបុរីមានភាពរឹងមាំ។

លើសពីនេះសិង្ហបុរីក៏បានចូលរួមយ៉ាងសកម្មនៅក្នុងអង្គការអន្តរជាតិ ដោយជំរុញកិច្ចសហប្រតិបត្តិការទ្វេភាគី និងពហុភាគីផងដែរ។ ទំនាក់ទំនងការទូតទាំងនេះនាំឱ្យមានកិច្ចព្រមព្រៀងទិដ្ឋាការទៅវិញទៅមក ដែលធ្វើឱ្យវាកាន់តែងាយស្រួលសម្រាប់ប្រជាជនសិង្ហបុរីក្នុងការធ្វើដំណើរជុំវិញពិភពលោក។ យោងតាមក្រសួងពាណិជ្ជកម្ម និងឧស្សាហកម្មសិង្ហបុរី អត្រាកំណើនសេដ្ឋកិច្ចរបស់ប្រទេសអាស៊ីអាគ្នេយ៍មួយនេះក្នុងឆ្នាំ ២០២៤ បានឈានដល់ ៤% ជិត ៤ ដងខ្ពស់ជាង ១.១% ក្នុងឆ្នាំ ២០២៣។ ដូច្នេះមូលដ្ឋានគ្រឹះសេដ្ឋកិច្ចដ៏រឹងមាំក៏ជាកត្តាសំខាន់ក្នុងការបង្កើតភាពរឹងមាំនៃលិខិតឆ្លងដែនផងដែរ។

ទន្ទឹមនឹងនេះប្រទេសនេះក៏ត្រូវបានគេទទួលស្គាល់ថាជាមជ្ឈមណ្ឌលហិរញ្ញវត្ថុពិភពលោកដ៏សំខាន់មួយដែលមាន GDP ខ្ពស់ក្នុងមនុស្សម្នាក់។ ស្ថិរភាពសេដ្ឋកិច្ចជួយសិង្ហបុរីកសាងទំនុកចិត្តក្នុងប្រទេសផ្សេងទៀត ដោយធ្វើឱ្យពួកគេមានឆន្ទៈក្នុងការផ្តល់សិទ្ធិចូលប្រើប្រាស់ដោយគ្មានទិដ្ឋាការដល់ពលរដ្ឋសិង្ហបុរី។ លើសពីនេះ លិខិតឆ្លងដែនសិង្ហបុរីក៏រួមបញ្ចូលមុខងារសុវត្ថិភាពកម្រិតខ្ពស់ដូចជាទិន្នន័យជីវមាត្រ និងបច្ចេកវិទ្យាអ៊ិនគ្រីបទៀតផង ដែលភាពជឿនលឿនទាំងនេះការពារការក្លែងបន្លំលិខិតឆ្លងដែន និងការប្រើប្រាស់ខុសច្បាប់ ដោយធានានូវសុវត្ថិភាព និងភាពជឿជាក់នៃលិខិតឆ្លងដែនសិង្ហបុរី៕

កន្លែងទាំងនេះគឺជាគោលដៅទេសចរណ៍ដែលទាក់ទងទៅនឹងអតីតកាលសោកនាដ.កម្មដ៏ឈឺចាប់ ដែលកំពុងទាក់ទាញអ្នកទស្សនាឱ្យយល់កាន់តែច្បាស់ពីប្រវត្តិសាស្ត្រដ៏ជូចត់។ កន្លែងទាំងនេះត្រូវបានគេស្គាល់ថាជា តំបន់ទេសចរណ៍ងងឹត ដែលជារឿយៗត្រូវបានផ្សារភ្ជាប់ជាមួយនឹងប្រវត្តិនៃការឈឺ.ចាប់ សោកនាដកម្ម និងសង្រ្គាម។ ដូច្នេះហើយខាងក្រោមនេះយើងនឹងនាំលោកអ្នកមកស្គាល់តំបន់ទេសចរណ៍ងងឹត៖

១.សារមន្ទីរទួលស្លែង ឬគុ.កទួលស្លែង៖ សារមន្ទីរឧក្រិដ្ឋកម្មប្រល័យពូជសាសន៍ទួលស្លែង ជាបូជនីយដ្ឋាននៃការចងចាំពីព្រឹត្តិការណ៍ដែលកើតឡើងក្នុងអតីត “មន្ទីរសន្ដិសុខ២១ ឬមន្ទីរស-២១” ក្នុងរបបកម្ពុជាប្រជាធិបតេយ្យ(សម័យខ្មែរក្រហម)។ អតីតមន្ទីរឃុំឃាំងនេះ ស្ថិតនៅចំកណ្តាលទីក្រុងភ្នំពេញដែលស្ងាត់ជ្រងំ ក្រោយខ្មែរក្រហមជម្លៀសប្រជាជនទាំងអស់ចេញកាលពីថ្ងៃទី១៧ ខែមេសា ឆ្នាំ១៩៧៥។

គុកនេះក៏ជាកន្លែងសម្ងាត់សម្រាប់ឃុំឃាំង សួរចម្លើយ ធ្វើទារុណកម្ម និងសម្លា.ប់អ្នកដែលត្រូវចាត់ទុកថាជា “អ្នកទោសនយោបាយ” របស់របបនេះផងដែរ។ បច្ចុប្បន្នសារមន្ទីរឧក្រិដ្ឋកម្មប្រល័យពូជសាសន៍ទួលស្លែង ត្រូវបានគេចាត់ទុកថាជាកន្លែងដ៏ឈឺចាប់មួយ ដោយរក្សាទុកនូវរឿងរ៉ាវរបស់ជនរងគ្រោះ និងរំលឹកពីឧក្រិដ្ឋកម្មដ៏ឃោរឃៅរបស់ ប៉ុល ពត។

២.វិមាន Murambi៖ គឺជាវិមានដ៏ក្រៀមក្រំមួយ ដែលរំលឹកដល់ជនជាតិ Tutsis រាប់ពាន់នាក់ត្រូវបានគេសម្លាប់ក្នុងអំឡុងការប្រល័យពូជសាសន៍ Rwandan ឆ្នាំ១៩៩៤។ វិមាននេះរួមមានអដ្ឋិធាតុដែលបានរក្សាទុក ផ្នូរដ៏ធំ និងទ្រព្យសម្បត្តិផ្ទាល់ខ្លួនរបស់ជនរងគ្រោះ ដែលផ្តល់នូវទិដ្ឋភាពពិតនៃអំពើប្រល័យពូជសាសន៍។ ការទៅលេង Murambi គឺជាបទពិសោធន៍ផ្លូវចិត្តដែលទាមទារការគោរព និងរក្សាភាពស្ងៀមស្ងាត់។

៣.ជំរុំ Auschwitz-Birkenau៖ គឺជាកន្លែងប្រវត្តិសាស្ត្រដ៏ឈឺចាប់នៃអំពើឃោរឃៅរបស់មនុស្សដែលមានទីតាំងនៅប្រទេសប៉ូឡូញ។ កាលពីឆ្នាំ ១៩៤០ ដល់ឆ្នាំ ១៩៤៥ ពួកណាស៊ីបានសម្លាប់មនុស្សជាង ១.១ លាននាក់ ដែលភាគច្រើនជាជនជាតិយូដានៅទីនេះ។ ដូច្នេះពេលទៅលេងជំរុំ Auschwitz-Birkenau អ្នកទស្សនាគួរតែបង្ហាញការគោរពចំពោះអ្នកស្លាប់។

៤.ទីបញ្ចុះសព Père Lachaise ក្នុងទីក្រុងប៉ារីស៖ គឺជាកន្លែងសម្រាប់ដាក់សាកសពរបស់មនុស្សល្បីៗជាច្រើនដូចជា Jim Morrison, Oscar Wilde និង Edith Piaf ។ កន្លែងនេះត្រូវបានសាងសង់ក្នុងឆ្នាំ ១៨០៤ ជាទីបញ្ចុះសពឆ្លុះបញ្ចាំងពីប្រវត្តិសាស្រ្តដ៏សម្បូរបែប និងសិល្បៈនៃទីក្រុងប៉ារីស តាមរយៈផ្នូរ និងរូបចម្លាក់របស់វា។ ភ្ញៀវទេសចរដែលមកទស្សនាទីនេះត្រូវតែគោរពវិញ្ញាណក្ខន្ធ ហើយគួររក្សាភាពស្ងៀមស្ងាត់ ដើម្បីជៀសវាងការរំខានដល់គ្រួសារដែលមិនទាន់បានរួចផុតពីទុក្ខសោក។

៥.ព្រៃ Aokigahara ឬព្រៃអត្តឃាត៖ ព្រៃនេះមានទីតាំងនៅជើងភ្នំ Fuji ប្រទេសជប៉ុន ត្រូវបានគេស្គាល់ថាជាព្រៃដែលពោរពេញទៅដោយអាថ៌កំបាំង ខណៈមនុស្សជាច្រើនបានមកព្រៃនេះដើម្បីធ្វើអត្តឃាត។ បច្ចុប្បន្នជនជាតិជប៉ុនចាត់ទុកថាព្រៃ Aokigahara ជាកន្លែងគ្រោះថ្នាក់ ដូច្នេះអ្នកទេសចរគួរតែទៅជាមួយមគ្គុទ្ទេសក៍ទេសចរណ៍ដើម្បីធានាសុវត្ថិភាព និងមិនអាចធ្វើដំណើរចូលព្រៃនេះម្នាក់ឯងបានឡើយ៕

Elon Musk, Jeff Bezos និង Mark Zuckerberg សុទ្ធតែជាកំពូលមហាសេដ្ឋីល្បីៗនៅលើពិភពលោក ដោយពួកគាត់បានចែករំលែកដំបូន្មានល្អៗជាច្រើនសម្រាប់អ្នកដែលចង់បានជីវិតជោគជ័យ។ ជាការពិតណាស់អ្នកទាំងបីមិនត្រឹមតែល្បីល្បាញដោយសារការច្នៃប្រឌិតបច្ចេកវិទ្យាជឿនលឿនប៉ុណ្ណោះទេ ពួកគាត់ក៏មានទស្សនវិជ្ជាដ៏រឹងមាំ និងឆ្លាតវៃផងដែរ។ ខាងក្រោមនេះគឺជាទស្សនវិជ្ជាដ៏មានតម្លៃរបស់មហាសេដ្ឋីពិភពលោក។

១. Elon Musk៖ Elon Musk បានប្រកាន់ភ្ជាប់នៅទម្លាប់គោរពពេលវេលា និងឧស្សាហ៍ព្យាយាម។ លោកបាននិយាយថា ភាពខ្ជិល និងការពន្យាពេល ធ្វើអ្វីមួយយឺតយ៉ាវ គឺជាទម្លាប់ដ៏អាក្រក់បំផុត ដែលអាចធ្វើឱ្យមនុស្សបរាជ័យក្នុងជីវិត។ ដូច្នេះលោកជឿថា ភាពជោគជ័យគឺជាដំណើរការដ៏វែងមួយ ដែលទាមទារឱ្យមានការតស៊ូ ឧស្សាហ៍ព្យាយាម ការអំណត់អត់ធន់ និងការខិតខំប្រឹងប្រែងឥតឈប់ឈរ។ មហាសេដ្ឋី Elon Musk បានចែករំលែកបន្តថា លោកបានប្រឈមមុខជាមួយការបរាជ័យ និងបញ្ហាដែលហាក់ដូចជាមិនអាចយកឈ្នះបាន។ ប៉ុន្តែដោយសារការតស៊ូ និងការតាំងចិត្តមិនចុះចាញ់ រួមទាំងការគោរពពេលវេលា លោកក៏បានយកឈ្នះក្នុងរឿងគ្រប់យ៉ាង។

២. Jeff Bezos៖ Jeff Bezos ដែលជាមហាសេដ្ឋីទីពីររបស់ពិភពលោកបានប្រកាន់ភ្ជាប់នៅទម្លាប់គ្រប់គ្រងអារម្មណ៍។ លោកបាននិយាយថា ភាពវៃឆ្លាតខាងអារម្មណ៍ (EQ) គឺជាកត្តាចាំបាច់ និងសំខាន់បំផុតដែលមិនអាចខ្វះបានក្នុងដំណើរឆ្ពោះទៅរកភាពជោគជ័យរបស់មនុស្ស។ ស្ថាបនិក Amazon ណែនាំមនុស្សឱ្យយកចិត្តទុកដាក់ក្នុងការអភិវឌ្ឍន៍កត្តានេះ ដោយលោកជឿថា បុគ្គលដែលមានភាពវៃឆ្លាតខាងផ្លូវអារម្មណ៍ និងអាចគ្រប់គ្រងអារម្មណ៍បានល្អ មិនងាយខឹងផ្តេសផ្តាស់ គឺជាមនុស្សអស្ចារ្យបំផុតអាចកំណត់ជោគវាសនាជីវិតរបស់ខ្លួនបាន។

មនុស្សទាំងនេះមិនងាយស្ត្រេស ឬបាក់ទឹកចិត្តដោយសារការលំបាកឡើយ ពួកគេតែងតែរក្សាអាកប្បកិរិយាវិជ្ជមាន ខិតខំប្រឹងប្រែងឥតឈប់ឈរ និងមានឆន្ទៈក្នុងការរៀនអភិវឌ្ឍខ្លួនជានិច្ច។ មហាសេដ្ឋីរូបនេះក៏បានបន្តទៀតថា មនុស្សដែលឆាប់ខឹង ឆៀវឆាវ មិនចេះគ្រប់គ្រងអារម្មណ៍ខ្លួនឯង នឹងជួបប្រទះការលំបាកជាច្រើនទាំងក្នុងជីវិត និងការងារ។

៣. Mark Zuckerberg៖ នាយកប្រតិបត្តិ Meta លោក Mark Zuckerberg បានប្រកាន់ភ្ជាប់នៅទម្លាប់នៃការដាក់ខ្លួន ឬបន្ទាបខ្លួន។ មេរៀនដ៏សំខាន់មួយដែល Mark តែងតែចែករំលែកគឺការនៅឱ្យឆ្ងាយពីភាពក្រអឺតក្រទម ដោយលោកបានសង្កត់ធ្ងន់ថា ភាពជោគជ័យមិនអាចសម្រេចបានឡើយ ប្រសិនបើអ្នកមិនចេះបន្ទាបខ្លួនក្នុងការទំនាក់ទំនងជាមួយសង្គម។ មនុស្សដែលគិតតែពីខ្លួនឯង ហើយមិនព្រមស្តាប់អ្នកដ៏ទៃ ងាយធ្លាក់ចូលទៅក្នុងភាពបរាជ័យណាស់ និងមិនអាចអភិវឌ្ឍខ្លួនបាននោះទេ។ ដូច្នេះអ្នកត្រូវចាំថា គ្មាននរណាម្នាក់អាចជោគជ័យតែម្នាក់ឯងបានឡើយ បើគ្មានកិច្ចសហប្រតិបត្តិការ ការទំនាក់ទំនង និងការរៀនសូត្រពីអ្នកដទៃ៕

កាលពីថ្ងៃទី ៨ ខែមករា ឆ្នាំ២០២៥ នេះ សារព័ត៌មានវៀតណាមបានចុះផ្សាយថា អាជ្ញាធរវៀតណាមនឹងផ្តល់ប្រាក់រង្វាន់ប្រមាណ ២០០ ដុល្លារភ្លាមៗ ជូនទៅកាន់ពលរដ្ឋរូបណា ដែលរាយការណ៍អំពីអ្នកប្រព្រឹត្តិបទលើ្ម.សច.រាចរណ៍លើដងផ្លូវធ្វើដំណើរ។

ដូចដែលគ្រប់គ្នាជ្រាបមកហើយថា ការធ្វើដំណើរនៅលើដងផ្លូវប្រទេសវៀតណាម ហាក់មានភាពមមាលញឹកខ្លាំង ជាពិសេសគឺសម្បូរទៅដោយម៉ូតូ ជិះយ៉ាងត្រសេចត្រសាចពេញពេញផ្លូវតែម្តង ដែលជារឿយៗគឺបណ្តាលឲ្យមានការកកស្ទះចរាចរតាមដងវិថីសំខាន់ៗ ក្នុងទីក្រុងហាណូយ និងហូជីមិញជាដើម។

ដូច្នេះហើយ ដើម្បីអនុវត្តច្បាប់ចរាចរណ៍ឲ្យកាន់តែមានប្រសិទ្ធទ្វេដង អាជ្ញាធរវៀតណាមបានដាក់ចេញនូវគោលនយោបាយថ្មីមួយ គឺប្រកាសថានឹងផ្តល់ប្រាក់រង្វាន់ជាទឹកប្រាក់ប្រមាណ ៥ លានដុង ឬស្មើនឹង ១៩៦ ដុល្លារ ទៅកាន់នរណាម្នាក់ ដែលបានរាយការណ៍អំពីករណីអ្នកបំពានច្បាប់លើដងវិថី ដូចជា ការបើកបរមិនគោរពភ្លើងសញ្ញាចរាចរណ៍ និងចុចទូរស័ព្ទដៃអំឡុងពេលបើកបរជាដើម។ ចំពោះអ្នកដែលត្រូវបានផាកពិន័យ អ្នកបើកម៉ូតូនឹងពិន័យជាទឹកប្រាក់ ៦លានដុង ឬប្រមាណ ២៣៦ ដុល្លារ ,ខណៈអ្នកបើករថយន្តវិញនឹងត្រូវពិន័យរហូតដល់ ២០លានដុង ឬ៧៨៧ដុល្លារឯណ្ណោះ។

សម្រាប់អ្នកដែលរាយការណ៍ពីបទល្មើស គឺត្រូវតែបង្ហាញភស្តុតាងច្បាស់លាស់ទៅកាន់សមត្ថកិច្ច ដោយត្រូវមានវីដេអូបង្ហាញសកម្មភាពបទល្មើសទាំងនោះ ដើម្បីទទួលបានប្រាក់រង្វាន់ ខណៈសមត្ថកិច្ច ក៏សន្យាថានឹងធានាការសង្ងាត់ជូនផងដែរ។

យោងតាមស្ថិតិផ្លូវការវៀតណាម មានម៉ូតូប្រហែល ៧៧ លានគ្រឿង និងរថយន្ត ៦.៣លានគ្រឿង បានចរាចរណ៍លើដងវិថីទូទាំងជារៀងរាល់ថ្ងៃ។ របាយការណ៍វៀមណាមបង្ហាញទៀតថា ក្នុងឆ្នាំ ២០២៤ គ្រោះថ្នាក់ចរាចរណ៍បានឆក់យកជីវិតមនុស្សយ៉ាងហោចណាស់ ៣០ នាក់ក្នុងមួយថ្ងៃ ដែលបណ្តាលមកពីគ្រោះថ្នាក់ចៃដន្យផ្សេងៗដូចជាបើកបរហួសល្បឿនកំណត់ មិនគោរពច្បាប់ចរាចរណ៍ ក៏ដូចជាផឹកស្រវឹងហើយបើកបរជាដើម៕