Kim Sae Ron ជំពាក់បំណុលអតីតភ្នាក់ងារគ្រប់គ្រងជិត៥០ម៉ឺនដុល្លារមុនពេលលា.ចាកលោក

គិតត្រឹមថ្ងៃទី១៨ ខែកុម្ភៈនេះ គេបានទម្លាយថាតារាសម្តែងស្រី Kim Sae Ron ដែលបានទទួលមរណភាពក្នុងវ័យ២៤ឆ្នាំកាលពីថ្ងៃទី១៦ ខែកុម្ភៈ បានជំពាក់បំណុលគេយ៉ាងខ្លាំង ចំនួន ៧០០ លានវ៉ុន ប្រមាណជាង៤៨ម៉ឺនដុល្លារដល់អតីតភ្នាក់ងាររបស់នាងគឺ Gold Medalist ។ បំណុលនេះកើតចេញពីការផាកពិន័យ និងការទូទាត់សំណងទាក់ទងនឹងឧបទ្ទវហេតុបើកបរក្នុងស្ថានភាពស្រវឹងដែលនាងបានបង្កឡើងក្នុងខែឧសភា ឆ្នាំ ២០២២។

ហេតុការណ៍បានកើតឡើងនៅ Gangnam ទីក្រុងសេអ៊ូលដោយ Kim Sae Ron បានបុកដើមឈើ បង្កាន់ដៃផ្លូវ និងម៉ាស៊ីនភ្លើង ខណៈពេលកំពុងបើកបរក្រោមឥទ្ធិពលស្រវឹលដែលបណ្តាលឱ្យដាច់ចរន្តអគ្គិសនីដ៏ធំ ដែលប៉ះពាល់ដល់អាជីវកម្មក្នុងស្រុក។ ឧប្បត្តិហេតុនេះនាំឱ្យមានការទាមទារសំណង។ លើសពីនេះ Kim Sae Ron ប្រឈមមុខនឹងការពិន័យយ៉ាងធ្ងន់ធ្ងរចំពោះការបំពានលើកិច្ចសន្យាផ្សាយពាណិជ្ជកម្ម និងរឿងភាគរបស់នាង។

យោងតាមប្រភពនៅក្នុងឧស្សាហកម្មកម្សាន្ត Kim Sae Ron បានស្នើសុំពេលវេលាបន្ថែមពីភ្នាក់ងាររបស់នាង ដោយលើកឡើងពីបញ្ហាហិរញ្ញវត្ថុ និងសន្យាថានឹងសងបំណុលទាំងស្រុង។ ទោះជាយ៉ាងណា នាងមិនអាចបំពេញតាមការសន្យារបស់នាងមុនពេលនាងស្លាប់ដោយមិនទាន់ពេលវេលា។ Kim Sae Ron ត្រូវបានគេប្រទះឃើញស្លាប់នៅផ្ទះរបស់នាងក្នុងទីក្រុង Seongdong-gu ទីក្រុងសេអ៊ូល វេលាម៉ោងប្រហែល៤ និង៤៥ នាទីល្ងាចថ្ងៃទី ១៦ ខែកុម្ភៈ។ មិត្តភ័ក្តិម្នាក់ដែលបានណាត់ជួបជាមួយតារាស្រីរូបនេះបានរកឃើញនាង ហើយបានជូនដំណឹងដល់ប៉ូលិស។ ពុំមានលិខិតអត្តឃាតត្រូវបានគេរកឃើញនៅកន្លែងកើតហេតុទេ ហើយការសម្រេចចិត្តធ្វើកោសល្យវិច័យក៏មិនត្រូវបានគេបង្ហើបឱ្យដឹងដែរ ដោយស្របតាមការចង់បានរបស់ក្រុមគ្រួសារ។

នៅខែធ្នូ ឆ្នាំ២០២២ បន្ទាប់ពីកិច្ចសន្យារបស់នាងជាមួយក្រុមហ៊ុនគ្រប់គ្រង Gold Medalist បានផុតកំណត់ Kim Sae Ron តាមសេចក្តីរាយការណ៍បានសន្យាថានឹងសងបំណុលចំនួន ៧០០លានវ៉ុន ។ ទោះជាយ៉ាងណាក៏ដោយ ជាមួយនឹងអាជីពរបស់នាងធ្លាក់ចុះ ហើយរូបភាពសាធារណៈរបស់នាងត្រូវបានខូចខាតយ៉ាងធ្ងន់ធ្ងរ។ តារាស្រីរូបនេះងាកមករកការងារក្រៅម៉ោងនៅហាងកាហ្វេ និងសាលាសម្ដែង ខំប្រឹងធ្វើការដើម្បីតែសងបំណុល។

ខណៈដែលការសងបំណុលរបស់នាងនៅតែបន្តពន្យារពេលក្រុមហ៊ុន Gold Medalist បានផ្ញើសេចក្តីជូនដំណឹងផ្លូវច្បាប់ទាមទារឱ្យសងប្រាក់ដែលនាងជំពាក់។ ដោយសារមូលនិធិរបស់ក្រុមហ៊ុនត្រូវបានខ្ចីទៅនាង ការខកខានក្នុងការសងបំណុលអាចចាត់ទុកថាជាការរំលោភលើកាតព្វកិច្ច។ ការទាមទារសំណងរបស់ភ្នាក់ងារនេះនៅតែមិនទាន់ដោះស្រាយនៅឡើយ៕