សហរដ្ឋអាមេរិក ៖ ក្រុមហ៊ុន Tombot បានយកឆ្កែយន្តមកបង្ហាញក្នុងកម្មវិធីតាំងពិព័រណ៍បច្ចេកវិទ្យា CES 2025 នៅទីក្រុង Las Vegas រដ្ឋ Nevada សហរដ្ឋអាមេរិក ដែលធ្វើឱ្យអ្នកចូលរួមចាប់អារម្មណ៍យ៉ាងខ្លាំង ដោយសារវាចេះបក់កន្ទុយ និងដេកលក់ដូចឆ្កែពិតប្រាកដ ។ ក្រុមហ៊ុនបញ្ជាក់ថា ការផលិតឆ្កែយន្តនេះ គឺសម្រាប់ជួយបំបាត់ការអផ្សុករបស់មនុស្សចាស់ ហើយអ្នកប្រើប្រាស់ពុំពិបាកថែទាំវាច្រើនទេ ។

ឆ្កែយន្តគួរឱ្យស្រឡាញ់នេះត្រូវបានផលិតឡើងសម្រាប់មនុស្សចាស់ស្រឡាញ់ឆ្កែ និងអាចបំពេញតម្រូវការប្រើប្រាស់របស់មនុស្សចាស់នៅលើពិភពលោក ។ នាថ្ងៃអនាគត ក្រុមហ៊ុន Tombot នឹងផលិតឆ្មាយន្តផងដែរ សម្រាប់អ្នកស្រឡាញ់ឆ្មា ។

លោក Tom Stevens ស្ថាបិកក្រុមហ៊ុន Tombot និយាយថា ការផលិតឆ្កែយន្តបំបាត់ភាពឯកោរបស់មនុស្សចាស់ គឺក្រោយពីលោកបានបំបែកឆ្កែជាទីស្រឡាញ់ពីម្តាយ ដោយសារគ្រូពេទ្យរកឃើញថា ម្តាយលោកវង្វេងស្មារតី ។ បើទោះលោករកអ្វីផ្សេងមកជំនួសឆ្កែ ប៉ុន្តែម្តាយលោកពុំចូលចិត្ត ប៉ុន្តែឆ្កែយន្តនេះធ្វើឱ្យម្តាយលោកញញឹម ចង់រស់នៅក្បែរវា ថែទាំ និងបារម្ភពីវា បើទោះគាត់ដឹងថា វាពុំមែនជាឆ្កែមានជីវិតក្តី ។ នាថ្ងៃអនាគត លោកនឹងផលិតឆ្មាយន្តសម្រាប់អ្នកស្រឡាញ់ឆ្មា ។

បច្ចុប្បន្ន ពលរដ្ឋអាមេរិកមានអាយុច្រើនបានរស់នៅជាមួយឧបករណ៍បំពាក់បច្ចេកវិទ្យាទាំងនេះ ស្របតាមគម្រោងការរស់នៅក្នុងវ័យជរារបស់រដ្ឋាភិបាល ។ រីឯពលរដ្ឋលើពិភពលោក ដែលមានអាយុចាប់ពី៦៥ឆ្នាំឡើងទៅ បានកើនឡើងយ៉ាងឆាប់រហ័សជាងពលរដ្ឋអាយុតិច ។ នេះបើតាមទិន្នន័យរបស់អង្គការសហប្រជាជាតិ ។

ឧបសគ្គមួយក្នុងការថែទាំមនុស្សចាស់ គឺទទួលបានការព្យាបាល ។ បើអ្នកអាចតាមដានការសម្រាក, បរិភោគអាហារ, ធ្វើចលនា និងត្រួតពិនិត្យទឹកនោមមនុស្សចាស់ជាប្រចាំនោះ អ្នកនឹងអាចជួយសង្គ្រោះយ៉ាងឆាប់រហ័ស និងថែទាំតាមតម្រូវការ ។ មនុស្សចាស់ជិត៩០% នៅអាមេរិកចង់រស់នៅក្នុងផ្ទះរបស់ខ្លួន ប៉ុន្តែមនុស្សភាគច្រើនបារម្ភថា ការរស់នៅផ្ទះម្នាក់ឯងពិបាកណាស់ លុះត្រាតែមានឧបករណ៍ជួយបំបាត់ភាពអផ្សុក, ផ្តល់សញ្ញាពេលរអិលដួល និងត្រួតពិនិត្យថា តើមនុស្សចាស់លេបថ្នាំហើយឬនៅ ។

ការប្រើប្រាស់ឧបករណ៍បច្ចេកវិទ្យាទាំងនេះ នឹងធ្វើឱ្យមនុស្សចាស់មានអាយុវែង និងរស់នៅផ្ទះម្នាក់ឯងបាន ។ ពលរដ្ឋអាមេរិកមានអាយុច្រើននិយមប្រើប្រាស់ឧបករណ៍វាស់សម្ពាធឈាម, រទេះរុញអគ្គិសនី និងឧបករណ៍ជូនដំណឹងពីការលេបថ្នាំ ។ នេះបើតាមនាយកប្រតិបត្តិក្រុមហ៊ុន Starling Medical ៕

សហរដ្ឋអាមេរិក៖ ភ្លើងឆេះព្រៃនៅទីក្រុង Los Angeles នៃរដ្ឋកាលីហ្វ័រញ៉ាប៉ុន្មានថ្ងៃនេះ ត្រូវបានគេប៉ាន់ប្រមាណថា នឹងបណ្តាលឱ្យខាតបង់សេដ្ឋកិច្ចពី ១៣៥ ទៅ ១៥០ ពាន់លានដុល្លារអាមេរិក ដែលជាការខាតបង់ធ្ងន់ធ្ងរបំផុតក្នុងប្រវត្តិសាស្ត្រ។ នេះបើយោងតាមការចុះផ្សាយរបស់សារព័ត៌មានបរទេស Investopedia ភ្លើងឆេះព្រៃដ៏ធំសម្បើមនេះក៏ត្រូវបានគេព្យាករណ៍ដែរថា ពិបាកក្នុងការងើបឡើងវិញណាស់សម្រាប់ ១០ ឆ្នាំខាងមុខ។

កាលពីថ្ងៃទី ៧ រហូតដល់ថ្ងៃទី១១ ខែមករា ភ្លើងបានឆាបឆេះព្រៃហើយបានរាលដាលយ៉ាងលឿនដល់ផ្ទះជាច្រើនខ្នង ក្នុងនោះក៏មានផ្ទះតារាល្បីៗ និងមហាសេដ្ឋីផងដែរ។ លើសពីនេះភ្លើងក៏បានបំផ្លាញផ្ទៃដីសរុបជាង ១១,៦០០ ហិកតា រួមទាំងបង្កឱ្យមានការខូចខាតរចនាសម្ព័ន្ធជាង ១០,០០០ គម្រោងទៀតផង។ គិតត្រឹមថ្ងៃទី ១២ ខែមករា ចំនួនមនុស្សដែលស្លាប់នៅក្នុងហេតុការណ៍ភ្លើងឆេះព្រៃគឺបានកើនឡើងដល់ ១៦ នាក់ហើយ ដែលបច្ចុប្បន្នមនុស្ស ១៥៣,០០០ នាក់នៅក្នុងទីក្រុង Los Angeles នៅតែត្រូវបានបញ្ជាឱ្យជម្លៀសចេញជាបណ្តោះអាសន្ន។

ទោះបីជាឥឡូវនេះភ្លើងត្រូវបានរលត់អស់ ៥០% ក៏ដោយ ក៏អ្នកជំនាញព្យាករណ៍ថាភ្លើងទំនងឆេះរាលដាលម្តងទៀតយ៉ាងឆាប់រហ័សនៅថ្ងៃទី១៣ ដល់ថ្ងៃទី ១៥ ខែមករា ដោយសារមានខ្យល់កន្ត្រាក់មួយទៀតបានបោកបក់។ ដូច្នេះបើយោងតាម AccuWeather ដែលជាក្រុមហ៊ុនព្យាករណ៍អាកាសធាតុឯកជនមួយ បានប៉ាន់ប្រមាណថា ភ្លើងឆេះព្រៃនៅទីក្រុង Los Angeles នៃរដ្ឋកាលីហ្វ័រញ៉ា នឹងបណ្តាលឱ្យមានការខាតបង់សេដ្ឋកិច្ចចំនួន ១៣៥ ទៅ ១៥០ ពាន់លានដុល្លារអាមេរិក ដែលជាសញ្ញាថាដំណើរការស្តារឡើងវិញនឹងមានការលំបាក ហើយបុព្វលាភធានារ៉ាប់រងរបស់ម្ចាស់ផ្ទះក៏នឹងកើនឡើងយ៉ាងខ្លាំងផងដែរ។

គួរបញ្ជាក់ដែរថា មូលហេតុដែលព្រៃត្រូវបានភ្លើងឆេះឥតឈប់ឈរគឺដោយសារសកម្មភាពរបស់មនុស្ស ជាពិសេសការកាប់បំផ្លាញព្រៃឈើ និងការដុតព្រៃដើម្បីកាប់ឆ្ការដីកសិកម្ម រួមទាំងគ្រោះរាំងស្ងួតជាប្រវត្តិសាស្ត្រកាលពីឆ្នាំមុនៗ ក៏ដូចជាការប្រែប្រួលអាកាសធាតុ ការកង្វះទឹកភ្លៀង ដែលកំពុងបង្កើនចំនួនភ្លើងឆេះព្រៃឥតឈប់ឈរ ជាហេតុបណ្តាលឱ្យបរិស្ថានស្ងួត និងងាយឆេះបែបនេះ៕

សហរដ្ឋអាមេរិក ៖ កាលពីថ្ងៃទី១២ ខែមករា ឆ្នាំ២០២៥ សារព័ត៌មានបរទេសរាយការណ៍ថា អាមេរិកបានសហការជាមួយម៉ិកស៊ិក បំផ្លា.ញ ផ្លូវក្រោមដីខុសច្បាប់មួយកន្លែង ដែលតភ្ជាប់ពីប្រទេសម៉ិកស៊ិកមកកាន់រដ្ឋតិចសាស់របស់អាមេរិក ។ ផ្លូវក្រោមដីនេះភ្ជាប់ជាមួយប្រព័ន្ធបង្ហូរទឹកស្អុយរបស់អាមេរិក ហើយផ្នែកខាងក្នុងមានទាំងភ្លើងបំភ្លឺ និងប្រព័ន្ធខ្យល់ចេញ-ចូល ។

ភ្នាក់ងារយាមល្បាតនៅតាមព្រំដែនរបស់អាមេរិកនិយាយថា បានរកឃើញផ្លូវក្រោមដីនេះ បន្ទាប់ពីពួកគេបើកបន្ទះដែកដ៏ធំមួយគ្របច្រកចូលផ្លូវក្រោមដី ដែលតភ្ជាប់ពីទីក្រុងស៊ិវដាដ ជឺរេស ខេត្តឈិវ៉ាវ៉ា របស់ម៉ិកស៊ិក ជាមួយប្រព័ន្ធបង្ហូរទឹកស្អុយរបស់ទីក្រុងអែលប៉ាសូ រដ្ឋតិចសាស់ របស់អាមេរិក ។

ប៉ុន្តែភ្នាក់ងារយាមល្បាតនៅតាមព្រំដែនអាមេរិកពុំបានបញ្ជាក់ថា តើអ្នកណាជាអ្នកគាំទ្រឱ្យធ្វើផ្លូវក្រោមដីនេះ? រីឯមន្ត្រីការិយាល័យស៊ើបអង្កេតកណ្តាល (FBI) របស់អាមេរិកបញ្ជាក់ថា ការសហការគ្នាបំផ្លាញផ្លូវក្រោមដីរបស់មន្ត្រីអាមេរិក និងម៉ិកស៊ិក គឺមានសារៈសំខាន់យ៉ាងខ្លាំងសម្រាប់បង្ក្រាបការលួចឆ្លងដែនខុសច្បាប់មកអាមេរិក ។

សារព័ត៌មាន Reuters រាយការណ៍ថា ការរកឃើញផ្លូវក្រោមដី គឺបង្ហាញពីការប្រឹងប្រែងបង្ក្រាបសកម្មភាពខុសច្បាប់ ដែលគំរាមកំហែងដល់សន្តិសុខនៅតាមព្រំដែនអាមេរិក មុនពេលលោក Donald Trump ឡើងកាន់តំណែងជាប្រធានាធិបតីអាមេរិក អាណត្តិទី២ នៅថ្ងៃទី២០ ខែមករា ឆ្នាំ២០២៥ ប្រកាសថា លោកនឹងបង្ក្រាបជនអន្តោប្រវេសន៍ខុសច្បាប់ ។

កាលពីថ្ងៃទី៩ ខែមករា កន្លងមក ភ្នាក់ងារយាមល្បាតនៅព្រំដែនអាមេរិកបានសហការជាមួយម៉ិកស៊ិក ព្រមទាំងមន្ត្រីការិយាល័យស៊ើបអង្កេតកណ្តាល (FBI) បំផ្លាញផ្លូវក្រោមដីនេះ ។ នេះបង្ហាញថា មានពលរដ្ឋម៉ិកស៊ិកយ៉ាងច្រើនសម្រុកធ្វើដំណើរមកកាន់ព្រំដែនអាមេរិកតាមផ្លូវក្រោមដីតាំងពីចូលឆ្នាំសកលរហូតមក មុនពេលលោក Trump ឡើងកាន់តំណែងនាពេលឆាប់ៗ ៕

ធ្លាប់តែជាបុរសសាមញ្ញៗ មិនសូវអួតសម្ភារៈនិយម ពាក់ខោអាវដដែលៗ ប៉ុន្តែឥឡូវនេះស្ថាបនិក Meta ប្រែហើយក្លាយជាបុរសហៃសូបំផុតក្នុងឆ្នាំ ២០២៥។
ថ្មីៗនេះមហាជនជាច្រើនបានចាប់អារម្មណ៍ទៅលើនាឡិការដៃរបស់លោក Mark Zuckerberg នៅពេលដែលលោកបានបង្ហោះវីដេអូមួយនិយាយអំពី ការកែប្រែនូវ Policy ថ្មីរបស់ខ្លួន ដោយដកចោលនូវមុខងារ fact-checking ហើយជំនួសមកវិញដោយ Community Notes។

ប៉ុន្តែនៅក្នុងវីដេអូនោះគេមិនសូវចាប់អារម្មណ៍ខ្លឹមសារដែលលោកនិយាយនោះទេ ផ្ទុយទៅវិញគឺគេបែរជាចាប់អារម្មណ៍ទៅលើនាឡិការដៃដែលមហាសេដ្ឋីរូបនេះពាក់ទៅវិញ។ នាឡិកាដៃដ៏ប្រណីតរបស់ថៅកែ Facebook និង Instagram គឺជាម៉ូដែល Greubel Forsey Hand Made 1 មានតម្លៃជាង ១ លានដុល្លារអាមេរិក អាចទិញផ្ទះបានមួយខ្នង និងឡានទំនើបបានមួយគ្រឿង។ នាឡិកានេះផលិតដោយក្រុមហ៊ុនរបស់ស្វីស ធ្វើឡើងដោយដៃសុទ្ធ ៩៥ ភាគរយ រួមទាំងចំណាយពេលរហូតដល់ ៦០០០ ម៉ោងទម្រាំផលិតបាន ១ គ្រឿងៗ។

Greubel Forsey គឺជាម៉ាកនាឡិកាដៃប្រណីត ដែលមានតម្លៃថ្លៃបំផុតមួយនៅលើពិភពលោក សូម្បីតែរបស់មួយទឹក ក៏មានតម្លៃចន្លោះពី ១៥,០០០០ ដល់ ៥០,០០០០ ដុល្លារអាមេរិកផងដែរ។ យើងដឹងហើយថាប៉ុន្មានសប្តាហ៍មុនលោក Zuckerberg ទើបតែទិញកប៉ាល់ទំនើបតម្លៃ ៣០០ លានដុល្លារនោះទេ ហើយថ្មីៗនេះលោកក៏បានទិញនាឡិការដៃប្រណីតតម្លៃ ១ លានដុល្លារទៀត នេះសរបញ្ជាក់ឱ្យឃើញថា ស្ថាបនិក Meta លែងដូចមុនហើយ មិនមែនជាបុរសសាមញ្ញ ធម្មតាដូចយើងឃើញទៀតទេ។

ទោះជាយ៉ាងណាវាមិនចម្លែកទេដែលមហាសេដ្ឋីរូបនេះប្រើប្រាស់របស់របរទំនើបៗ និងប្រណីតៗ។ កាលពីឆ្នាំមុនលោកក៏បានប្តូរស្ទីលតែងខ្លួន ដូចជាការស្លៀកសម្លៀកបំពាក់ប្រេនៗជារៀងរាល់ថ្ងៃ ពាក់ខ្សែកមាសធំៗ រួមទាំងការប្រើរបស់ថ្លៃៗទៀតផង ដែលបង្ហាញថាសម័យជឿនលឿន អ្វីៗគឺមិនដូចពីមុនឡើយ តែងតែប្រែប្រួលពីមួយថ្ងៃទៅមួយថ្ងៃ។ លោក Mark Zuckerberg ធ្លាប់បាននិយាយថា លោកតែងខ្លួនប្លែកៗ និងប្រើប្រាស់របស់ថ្លៃៗ គឺដោយសារលោកចង់កែលម្អជីវិតរបស់លោក លុបបំបាត់រឿងមិនល្អដែលកើតឡើងពីមុន រួមទាំងបន្ថែមថាមពលដល់ជីវិត៕

ប្រទេសឥណ្ឌូណេស៊ី ៖ កាលពីថ្ងៃទី១១ ខែមករា ឆ្នាំ២០២៥ អ្នកលេងបណ្តាញសង្គមឥណ្ឌូណេស៊ីបានបង្ហាញវីដេអូមួយមានចំនួនទស្សនារហូតដល់ជាង៥០លានលើក គឺគេបានឃើញក្រពើ១ក្បាលហាក់កំពុងធ្វើពុតជាលង់ទឹក និងបញ្ឆោតឱ្យមនុស្សចុះក្នុងទឹក ។ ប៉ុន្តែអ្នកជំនាញនិយាយថា ក្រពើពុំចាំបាច់ព្យាយាមដល់ថ្នាក់នេះទេដើម្បីបានចំណីស៊ី ។

វីដេអូបង្ហាញពីទង្វើប្លែកៗរបស់ក្រពើកំពុងហែលទឹកក្នុងទន្លេបារិតូ នៅកោះបរនៀ ប្រទេសឥណ្ឌូណេស៊ី បានល្បីល្បាញយ៉ាងខ្លាំងក្នុងបណ្តាញសង្គម ។ មនុស្សមួយចំនួនបារម្ភថា ក្រពើនេះបានលើកជើងខាងមុខឡើងលើ ខណៈខ្លួនវាស្ថិតនៅក្រោមទឹក គឺជាការធ្វើពុតដើម្បីបញ្ឆោតឱ្យមនុស្សចុះក្នុងទឹក រួចហើយ វាក៏ចាប់ស៊ីជាចំណី ។ មនុស្សខ្លះទៀតថា ការវាយប្រហាររបស់ក្រពើគួរឱ្យខ្លាច ហើយបើវាចេះបញ្ឆោតមនុស្សបែបនេះ គឺកាន់តែគួរឱ្យខ្លាចថែមទៀត ។

តាមគេហទំព័រ Science Daily បញ្ជាក់ថា ក្រពើ គឺជាសត្វឆ្លាត និងពូកែចាប់ចំណី ។ បើទោះជាវាមានគុណសម្បត្តិបែបនេះក្តី ប៉ុន្តែអ្នកជំនាញបដិសេធថា ក្រពើពុំចេះបញ្ឆោតមនុស្សឱ្យចុះទឹកទេ ហើយវាពុំពិតដូចការលើកឡើងឡើយ ។ ជារៀងរាល់ឆ្នាំ ក្រពើបានវាយប្រហារមនុស្សរាប់រយដង ហើយក្រពើទឹកប្រៃមានគ្រោះថ្នាក់បំផុត រីឯរូបភាពក្រពើក្នុងវីដេអូពុំច្បាស់ថា វាជាពូជអ្វីទេ ។

លោក Brandon Sidelo អ្នកស្រាវជ្រាវពីមនុស្ស និងសត្វ នៅសាកលវិទ្យាល័យ Charles Darwin ប្រទេសអូស្ត្រាលី និយាយថា ក្រពើ១ក្បាលនេះអាចកំពុងស៊ីចំណីក្នុងមាត់ ទើបវាបង្ហាញទង្វើប្លែកៗ ។ រីឯអ្នកជំនាញផ្នែកសត្វ និយាយថា ការលើកឡើងបែបនេះខុសពីការពិត គឺកន្ទុយក្រពើអាចជាប់នឹងអ្វីមួយ ទើបធ្វើឱ្យវាពុំអាចហែលទឹកបាន ។

សាស្ត្រាចារ្យម្នាក់នៅសាកលវិទ្យាល័យ Missouri សហរដ្ឋអាមេរិក បាននិយាយមកកាន់ទស្សនាវដ្តី Newsweek ថា រូបភាពនេះធ្វើឱ្យមនុស្សភាគច្រើនគិតថា ក្រពើកំពុងស្ថិតក្នុងគ្រោះថ្នាក់ចង់ឱ្យមនុស្សជួយ គឺវាគួរឱ្យអស់សំណើច ។

រីឯលោក Gregory Erikson សាស្ត្រាចារ្យជីវវិទ្យានៅសាកលវិទ្យាល័យរដ្ឋផ្លរីដា និងមានជំនាញវិភាគការស៊ីចំណីរបស់ក្រពើ ពុំជឿថា ក្រពើព្យាយាមបោកមនុស្សឱ្យចុះទឹកទេ ហើយរូបភាពនេះពុំធ្លាប់កើតឡើងពីមុន ពីព្រោះវាចូលចិត្តលាក់ខ្លួនតាមធម្មជាតិ និងពុំចាំបាច់ប្រើវិធីនេះដើម្បីបានចំណី ។ ប៉ុន្តែវានឹងបង្ហាញភាពក្លាហានក្នុងពេលត្របាក់ចំណី ៕

ប្រទេសឥណ្ឌា៖ ពិធីបុណ្យងូតទឹក Kumbh Mela ដែលមានអ្នកកាន់សាសនាហិណ្ឌូប្រហែល ៤០០ លាននាក់នឹងចូលរួមក្នុងពិធីនេះចាប់ពីថ្ងៃទី១៣ ខែមករា តទៅដែលមានរយៈពេល ៦ សប្តាហ៍។
ពិធីបុណ្យ Kumbh Mela នឹងប្រារព្ធឡើងនៅ Prayagraj រដ្ឋ Uttar Pradesh ប្រទេសឥណ្ឌា គឺជាព្រឹត្តិការណ៍ដ៏សំខាន់មួយសម្រាប់សហគមន៍ហិណ្ឌូ ដែលប្រារព្ធឡើងរៀងរាល់ ១២ ឆ្នាំម្តង។ Kumbh Mela ជាភាសាហិណ្ឌូមានន័យថា “ពិធីបុណ្យងូតទឹកដ៏ពិសិដ្ឋ” ដែលប្រារព្ធឡើងនៅចំនុចប្រសព្វនៃទន្លេ Ganges, Yamuna និង Sarasvati ។

ពិធីបុណ្យនេះគឺជាការងូតទឹកសមូហភាពនៅក្នុងទន្លេដ៏ពិសិដ្ឋ តម្រូវឱ្យបុរសជាច្រើនអាក្រាត.កាយលាបផេះ ហើយងូតទឹកនៅក្នុងទន្លេដ៏ពិសិដ្ឋនេះជារៀងរាល់ព្រឹក។ បន្ទាប់ពីងូតទឹកហើយក៏មានពិធីបួងសួងដែលធ្វើដោយការថ្វាយទៀនព្រះវស្សា ឬចង្កៀងប្រេងដល់ព្រះ ដែលជាធម្មតាត្រូវអុជដោយប្រេងឆា ឬប្រេងខ្យល់។ អ្នកកាន់សាសនាក៏បញ្ចេញចង្កៀងអធិស្ឋានរាប់លានដែលធ្វើពីម្សៅដុត ដុតជាមួយប្រេង mustard ឬ ghee ផងដែរ។ ហិណ្ឌូជឿថាការងូតទឹកខ្នាតធំបែបនេះនឹងជួយសម្អាតអំពើបាប រក្សាដួងព្រលឹងឱ្យល្អ ក៏ដូចជាសម្រេចបាននូវសេចក្ដីសង្រ្គោះពីព្រះផងដែរ។

ដូច្នេះអ្នកជឿជាច្រើនជ្រើសរើសរស់នៅយ៉ាងសាមញ្ញក្នុងពិធីបុណ្យនេះ ដោយសន្យាថាមិនមានអំពើហឹង្សា រក្សាសីលធម៍ ការផ្តល់ទានដល់ជនក្រីក្រ ផ្តោតលើការអធិស្ឋាន និងសមាធិ។ នេះបើយោងតាមរដ្ឋាភិបាលបានហៅបុណ្យ Kumbh Mela ថាជាការបញ្ចូលគ្នាយ៉ាងរស់រវើកនៃវប្បធម៌ ប្រពៃណី និងភាសា ដែលមានមនុស្សរាប់លាននាក់មកជួបជុំគ្នានៅប្រទេសឥណ្ឌា ខណៈភ្ញៀវទេសចរក៏អាចចូលរួមទស្សនាបានផងដែរ។ ពិធីបុណ្យ Kumbh Mela មានប្រភពចេញពីទេវកថាហិណ្ឌូអំពីការប្រយុទ្ធគ្នារវាងព្រះ និងអារក្ស ដើម្បីគ្រប់គ្រងឆ្នាំងដែលមានទឹកឃ្មុំអមតៈ។

ទឹកឃ្មុំចំនួនបួនដំណក់បានធ្លាក់ក្នុងកំឡុងសង្គ្រាម ដែលក្នុងនោះមួយបានធ្លាក់នៅក្នុងទីក្រុង Prayagraj ជាកន្លែងដែលពិធីបុណ្យ Kumbh Mela ដ៏សំខាន់កើតឡើង។ ដំណក់បីដែលនៅសល់ធ្លាក់នៅ Nashik, Ujjain និង Haridwar ជាកន្លែងដែលពិធីបុណ្យតូចៗត្រូវបានប្រារព្ធឡើងក្នុងឆ្នាំឆ្លាស់គ្នា។ ហេតុនេះកាលបរិច្ឆេទនៃពិធីបុណ្យនីមួយៗត្រូវបានកំណត់ដោយផ្អែកលើទីតាំងហោរាសាស្រ្តនៃព្រះអាទិត្យ ព្រះច័ន្ទ និងភពព្រហស្បតិ៍។

គួរបញ្ជាក់ដែរថា Kumbh Mela ត្រូវបានអង្គការ UNESCO ទទួលស្គាល់ថា ជាបេតិកភណ្ឌវប្បធម៌អរូបីពិភពលោកក្នុងឆ្នាំ ២០១៧។ នេះគឺជាការទទួលស្គាល់ដ៏សំខាន់សម្រាប់ពិធីបុណ្យនេះ ដោយទទួលស្គាល់តម្លៃវប្បធម៌ សាសនា និងសហគមន៍របស់ Kumbh Mela ទៀតផង៕

ប្រទេសចិន ៖ វីដេអូបុរសពិការជើងម្ខាងម្នាក់ប្រើប្រាស់ឈើច្រត់ឡើងទៅលើកំពូលភ្នំទឹកកក ថៃណា កម្ពស់៥,២០០ម៉ែត្រ នៅខេត្តស៊ីឈួន ប្រទេសចិន បានក្លាយជារូបភាពមួយផ្តល់កម្លាំងចិត្តដល់មនុស្សជាច្រើននាក់ និងសរសើរបុរសនេះថា គឺជាអ្នកចម្បាំងក្នុងជីវិតពិត ។ បុរសពិការជើងម្ខាងមានក្តីសុបិនលើសពីនេះ គឺចង់ឡើងដល់កំពូលភ្នំអេវឺរេសដ៏ខ្ពស់បំផុតលើពិភពលោក ។

បុរសពិការជើងរូបនេះឈ្មោះ វាំងហុយ មានស្រុកកំណើតនៅខេត្តហឺប៉ី ហើយដោយសារកើតជំងឺធ្ងន់ធ្ងរ ទើបធ្វើឱ្យលោកបាត់បង់ជើងខាងស្តាំ ។ បើទោះជាត្រូវឆ្លងកាត់ពេលវេលាដ៏លំបាកក្តី ប៉ុន្តែលោកមានសំណាងល្អបានជួបមនុស្សចិត្តល្អ និងជួយសង្គ្រោះរហូតមក ហើយជួយឱ្យលោកអាចឆ្លងកាត់ពេលដ៏លំបាកក្នុងជីវិត ។ កាលពីឆ្នាំ២០២៣ លោកបានមើលវីដេអូអ្នកឡើងភ្នំជាច្រើននាក់ ហើយធ្វើឱ្យលោកចង់ឡើងភ្នំដូចពួកគេដែរ ។

ការឡើងភ្នំទឹកកក ថៃណា គឺជាភារកិច្ចពិបាកបំផុតក្នុងជីវិតរបស់លោក វាំងហុយ ដោយសារភ្នំនេះមានកម្ពស់ខ្ពស់ ហើយផ្លូវឡើងក៏ពិបាក ។ ហេតុនេះ លោកចាំបាច់ត្រូវប្រើប្រាស់ឈើច្រត់សម្រាប់ឡើងឱ្យដល់កំពូលភ្នំ និងលោតទៅខាងមុខ ហើយការឡើងភ្នំនេះខុសប្លែកពីកំពូលភ្នំដែលលោកធ្លាប់ឡើងកន្លងមក ។ ភ្នំនេះគ្មានជណ្តើរទេ គឺមានតែថ្មរដិបរដុបគ្របដណ្តប់ទៅដោយផ្ទាំងទឹកកកប៉ុណ្ណោះ ហើយធ្វើឱ្យលោកពិបាកមើលឃើញផ្លូវឡើងភ្នំយ៉ាងខ្លាំង ។

លោកប្រើប្រាស់ឈើច្រត់យ៉ាងប្រុងប្រយ័ត្ន បើពុំដូច្នោះទេ លោកអាចនឹងរអិលជើងដួល ។ នៅទីបំផុត លោកក៏បានឡើងដល់កំពូលភ្នំទឹកកក ថៃណា ដោយជោគជ័យ និងចំណាយពេលអស់ជាង ៣ម៉ោង ។ តាំងពីចាប់ផ្តើមឡើងលើកំពូលភ្នំ រហូតមកដល់បច្ចុប្បន្ន (ឆ្នាំ២០២៥) លោកបានឡើងលើកំពូលភ្នំ ចំនួនជាង៣០ ដោយចំណាយពេលសរុបស្មើជាង១ឆ្នាំ ហើយគោលដៅនាថ្ងៃខាងមុខ គឺលោកចង់ឡើងលើកំពូលភ្នំអេវឺរេស ។

បើទោះជាលោក វាំងហុយ បាត់បង់ជើងស្តាំម្ខាង ប៉ុន្តែវាពុំបានធ្វើឱ្យលោកចុះចាញ់ក្នុងជីវិតឡើយ ផ្ទុយទៅវិញ លោកបានពុះពារឡើងដល់កំពូលភ្នំជាច្រើនកន្លែងដោយជោគជ័យ ។ វាជាគំរូមួយសម្រាប់មនុស្សជាច្រើនទៀតឱ្យចេះតស៊ូព្យាយាមក្នុងជីវិត ទោះបីស្ថិតក្នុងស្ថានភាពណាក៏ដោយ ៕