ពិតជាមិនធម្មតានោះទេទើបតែជ្រកក្នុងទ្រនំថ្មីជាងកន្លះឆ្នាំប៉ុន្តែតារាចម្រៀង រ៉េត ស៊ូហ្សាណា មានឱកាសចេញទៅសម្តែងនៅលើទឹកដីអាម៉េរិកក្នុងកម្មវិធីដែល វណ្ណដា និង វណ្ណថាន បានទៅសម្តែងកាលពីឆ្នាំមុន។ ក្រៅពី ហ្សាណា សិល្បករដែលនឹងចូលរួមទៀតមានដូចជា យូហៃ និង និរទ្ធ។
ប្រឡូកក្នុងវិស័យសិល្បៈរយៈពេលជាង៨ឆ្នាំ កេរ្តិ៍ឈ្មោះតារាចម្រៀងដ៏ស្រស់សោភា រ៉េត ស៊ូហ្សាណា កាន់តែចាក់ចូលទៅក្នុងក្រអៅបេះដូងទោះបីជាការចាប់ផ្តើមដំបូងរូបនាងរងនូវសម្ពាធដ៏ខ្លាំងពីមហាជនក្តី ប៉ុន្តែ ហ្សាណា បានប្រើទេពកោសល្យរបស់ខ្លួនរហូតមានការទទួលស្គាល់ពីទស្សនិកជន។ មិនត្រឹមតែទឹកដមសំឡេង រ៉េត ស៊ូហ្សាណា ក៏បានធ្វើឱ្យអ្នកគាំទ្រចាប់អារម្មណ៍ពីការផ្លាស់ប្តូររូបរាងរបស់នាងកាន់តែស្រស់ស្អាតទៅៗ។ កសាងកេរ្តិ៍ឈ្មោះលើវិថីសិល្បៈនេះដែរ ហ្សាណា ក៏ក្តោបឱកាសក្នុងតំណែងជាទូតសុឆ្ឆន្ទៈម៉ាកយីហោមួយចំនួន។
ទោះយ៉ាងណា បន្ទាប់ពីឈានចូលទ្រនំទី២របស់ខ្លួនរយៈពេលជាងកន្លះឆ្នាំនេះប៉ុណ្ណោះ រ៉េត ស៊ូហ្សាណា គឺមានឱកាសនឹងចេញទៅសម្តែងនៅមហោស្រពតន្រ្តី Sabaidee នៅ Gloria Molina Grand Park ទីក្រុង Los Angeles សហរដ្ឋអាម៉េរិកនាថ្ងៃទី ១២ និង ១៣ ខែកក្កដា ឆ្នាំ ២០២៥ ខាងមុខនេះ។ នេះបើតាមការបញ្ជាក់របស់ផលិតកម្មបារមីនៅលើបណ្តាញសង្គមហ្វេកប៊ុក។ មិនត្រឹមតែតារាចម្រៀងរូបនេះប៉ុណ្ណោះទេ ប៉ុន្តែដៃគូរបស់នាងគឺ យូហៃ ដែលទើបសហការជាមួយគ្នាថ្មីៗនេះក៏នឹងមានវត្តមានដូចគ្នា ស្របពេលកំលោះសង្ហា នរិទ្ធ ក៏នឹងត្រៀមខ្លួនជួបអ្នកគាំទ្រនៅអាម៉េរិក។
.png)
គេចាំបានថា កាលពីខែមិថុនា ឆ្នាំ២០២៤ តារាចម្រៀងរ៉េប វណ្ណដា វណ្ណថាន និងឡូរ៉ា ម៉ម ចូលរួមក្នុងកម្មវិធីខាងលើនេះរួមទាំងអ្នកសិល្បៈខ្មែរមួយចំនួនទៀត។ វត្តមានរបស់សិល្បករខ្មែរចូលរួមមហោស្រពនេះគឺទទួលបានការគាំទ្រយ៉ាងខ្លាំងពីទស្សនិកជននៅទីនោះ។
ក្នុងទ្រនំទី២ រ៉េត ស៊ូហ្សាណា បានទម្លាក់បទនៅលើទីផ្សារមានដូចជា LOST , BETTER OFF
ស្រ្តីសេរី ជាមួយកញ្ញា ឡូរ៉ា ម៉ម និងបទចុងក្រោយនេះ 2AM ជាមួយ យូហៃ ដែលទទួលបានការគាំទ្រខ្លាំងជាងគេ៕
