សហរដ្ឋអាមេរិក ៖ សារព័ត៌មានបរទេសបានផ្សព្វផ្សាយពីហេតុការណ៍ភ្លើងឆេះព្រៃយ៉ាងសន្ធោសន្ធៅក្នុងទីក្រុងឡូសអេនជឺឡេស រដ្ឋកាលីហ្វ័រញ៉ា សហរដ្ឋអាមេរិក ដែលធ្វើឱ្យមនុស្សស្លា.ប់ និងខូចខាតទ្រព្យសម្បត្តិយ៉ាងច្រើន ។ មតិមួយចំនួនលើកឡើងថា ហេតុអ្វីភ្នាក់ងារពន្លត់ភ្លើងពុំប្រើប្រាស់ទឹកសមុទ្រពន្លត់ភ្លើងឆេះរាលដាល ខណៈទីក្រុងនេះនៅជាប់ឆ្នេរមហាសមុទ្រប៉ាស៊ីហ្វិក?

ភ្លើងឆេះព្រៃនៅទីក្រុងឡូសអេនជឺឡេស គឺជាហេតុការណ៍ដ៏ធ្ងន់ធ្ងរបំផុតក្នុងប្រវត្តិសាស្ត្រ ដោយសារភ្លើងបានឆេះរាលដាលផ្ទះសម្បែង និងអគារអស់ជាច្រើនខ្នងនៅសល់តែផេះ ។ ពលរដ្ឋអាមេរិកជាង១៣ម៉ឺននាក់បានជម្លៀសចេញពីផ្ទះ និងបន្សល់ទុកតែការខូចខាតយ៉ាងធ្ងន់ធ្ងរ ។

ភ្នាក់ងារពន្លត់ភ្លើងបានធ្វើការអស់ពីសមត្ថភាពដើម្បីគ្រប់គ្រងភ្លើងឆេះរាលដាលសម្លាប់ជីវិតមនុស្ស ប៉ុន្តែមនុស្សភាគច្រើនសួរថា ហេតុអ្វីពួកគេពុំប្រើប្រាស់ទឹកសមុទ្រពន្លត់ភ្លើង ខណៈទីក្រុងនេះនៅជាប់ឆ្នេរមហាសមុទ្រប៉ាស៊ីហ្វិក? មនុស្សមួយចំនួនធំយល់ថា ការយកទឹកសមុទ្រមកពន្លត់ភ្លើង គឺជាវិធីងាយស្រួល និងឆាប់រហ័សបំផុត ។

ចម្លើយមានច្រើន គឺតាំងពីបច្ចេកទេសមានកម្រិត រហូតដល់ផលប៉ះពាល់អាចនឹងកើតឡើងដោយសារការយកទឹកសមុទ្រមកពន្លត់ភ្លើងដោយផ្ទាល់ នៅទីកុ្រងឡូសអេនជឺឡេស ។ វាមិនត្រឹមតែជាការគ្រប់គ្រងភ្លើងឆេះរាលដាលប៉ុណ្ណោះទេ ប៉ុន្តែរួមទាំងការគ្រប់គ្រងធនធានធម្មជាតិ និងផលប៉ះពាល់បរិស្ថាននាថ្ងៃអនាគត ផងដែរ ។

គេអាចយកទឹកសមុទ្រអាចយកមកពន្លត់ភ្លើងដូចទឹកសាបធម្មតា ប៉ុន្តែមានមូលហេតុសំខាន់មួយចំនួនដែលធ្វើឱ្យភ្នាក់ងារពន្លត់ភ្លើងពុំប្រើប្រាស់ទឹកសមុទ្រ រួមមាន ៖ ទី១ ឧបករណ៍ពន្លត់ភ្លើងមានតម្លៃថ្លៃៗភាគច្រើនផលិតពីលោហៈ ដែលវាអាចច្រែះ ឬខូចអស់ បើត្រូវទឹកប្រៃ ។

ទី២ ទឹកសមុទ្រនឹងបំផ្លាញរុក្ខជាតិ ហើយអំបិលនឹងធ្វើឱ្យដីបរិវេណនេះរាំងស្ងួត និងពុំអាចដាំដំណាំជាច្រើនឆ្នាំ ។ បើទោះទីក្រុងនេះនៅជិតឆ្នេរសមុទ្រ និងជាជម្រើសងាយស្រួលក្តី ប៉ុន្តែផលប៉ះពាល់នាថ្ងៃអនាគត ទាំងឧបករណ៍ពន្លត់ភ្លើង និងបរិស្ថាន គឺជាមូលហេតុសំខាន់ធ្វើឱ្យភ្នាក់ងារពន្លត់ភ្លើងប្រើប្រាស់ទឹកសាបជំនួស ។ នេះបើតាមគេហទំព័រ Technology.org ។

ភ្នាក់ងារពន្លត់ភ្លើងនៅរដ្ឋកាលីហ្វ័រញ៉ា និយាយថា យើងអាចយកទឹកសមុទ្រមកពន្លត់ភ្លើងនៅតំបន់ឆ្ងាយបាន ប៉ុន្តែត្រូវបូមវាដាក់រថយន្តដឹកជញ្ជូន និងដឹកមកកាន់តំបន់ភ្លើងឆេះ ។ បន្ទាប់មក ចាក់វាចូលក្នុងអាងស្តុកទឹកចល័ត និងបូមវាចូលម៉ាស៊ីន ទើបអាចពន្លត់ភ្លើងបាន ។ ការប្រើប្រាស់ឧទ្ធម្ភាគចក្រ ឬយន្តហោះពន្លត់ភ្លើងប្រភេទ Super Scooper ក៏គ្មានសុវត្ថិភាពដែរ ករណីទឹករលកខ្លាំង ឬខ្ពស់ ពីព្រោះឧទ្ធម្ភាគចក្រត្រូវស្រូបទឹកលើផ្ទៃទឹក ៕

ប្រទេសចិន ៖ លោក Donald Trump ដែលគ្រោងឡើងកាន់តំណែងជាប្រធានាធិបតីអាមេរិកថ្មីជាផ្លូវការ នៅថ្ងៃទី២០ ខែមករា ឆ្នាំ២០២៥ ត្រូវបានមនុស្សជាច្រើនស្គាល់ថា លោកពុំមែនជាមនុស្សស្ងប់ស្ងាត់ ឬចិត្តត្រជាក់ទេ ។ ប៉ុន្តែសិក្ខាសាលាមួយក្នុងតំបន់ជនបទប្រទេសចិន បែរជាយករូបចម្លាក់លោក Trump អង្គុយសមាធិ មកបង្ហាញទទួលបានប្រាក់ចំណូល និងការចាប់អារម្មណ៍យ៉ាងខ្លាំង ។

កាលពីថ្ងៃទី១៣ ខែមករា ឆ្នាំ២០២៥ សារព័ត៌មាន AFP រាយការណ៍ថា រូបចម្លាក់លោក Trump អង្គុយសមាធិ និងបិទភ្នែកពុំជិត បានធ្វើឱ្យមនុស្សគ្រប់គ្នានឹកឃើញដល់ព្រះពុទ្ធ ។ វាជាស្នាដៃរបស់លោក ហុង ជិនស៊ឺ អាយុ៤៧ឆ្នាំ ជាជាងចម្លាក់ជនជាតិចិន ។

លោក ហុង បានលក់រូបចម្លាក់លោក Trump ក្នុងតម្លៃចាប់ពី១៣៨ដុល្លារ ទៅ២,៧៩៤ដុល្លារអាមេរិក ហើយតម្លៃ គឺអាស្រ័យលើទំហំតូច ឬធំ ។ កាលពីឆ្នាំ២០២១ ពលរដ្ឋចិនបានជជែកគ្នាយ៉ាងច្រើនពីរូបចម្លាក់ប្រធានាធិបតីអាមេរិករូបនេះក្នុងបណ្តាញសង្គម រហូតដល់ល្បីល្បាញពេញប្រទេសចិន ។ បច្ចុប្បន្ន មុនពេលលោក Trump ឡើងកាន់តំណែងជាប្រធានាធិបតីអាមេរិក អាណត្តិទី២ រូបចម្លាក់នេះក៏ទទួលបានការពេញនិយមម្តងទៀត ។

លោក ហុង និយាយថា ៖ «ក្រោយពីលោក Trump ជាប់ឆ្នោតថ្មីៗ មានមនុស្សជាច្រើននាក់ចាប់អារម្មណ៍នឹងរូបចម្លាក់នេះ ។ អ្នកនយោបាយភាគច្រើនតែងតែមានចរិតលក្ខណៈគួរឱ្យធុញទ្រាន់ ប៉ុន្តែសម្រាប់លោក Trump គឺជាបុគ្គលដ៏សំខាន់ និងទទួលការចាប់អារម្មណ៍ខ្លាំងក្នុងបណ្តាញសង្គម ។ កាលពីមុន លោកធ្វើរូបចម្លាក់លោក Trump សម្រាប់លេងសើចតែប៉ុណ្ណោះ» ។

រយៈពេលប៉ុន្មានឆ្នាំនេះ លោកបានធ្វើរូបចម្លាក់លោក Trump រាប់រយ ហើយរូបចម្លាក់ទាំងនេះធ្វើឱ្យអ្នកទិញញញឹម ពីព្រោះចរិតរបស់លោក Trump ពិតប្រាកដ គឺផ្ទុយគ្នាពីរូបចម្លាក់ដាច់ស្រឡះ ។ រូបចម្លាក់នីមួយៗមានសរសេរអក្សរចិនថា «ធ្វើឱ្យក្រុមហ៊ុនរីកចម្រើនម្តងទៀត» ដែលនេះជាការសរសេរត្រាប់តាមការលើកឡើងរបស់លោក Trump ថា «Make America Great Again» ៕

សហរដ្ឋអាមេរិក ៖ ក្រុមហ៊ុន Tombot បានយកឆ្កែយន្តមកបង្ហាញក្នុងកម្មវិធីតាំងពិព័រណ៍បច្ចេកវិទ្យា CES 2025 នៅទីក្រុង Las Vegas រដ្ឋ Nevada សហរដ្ឋអាមេរិក ដែលធ្វើឱ្យអ្នកចូលរួមចាប់អារម្មណ៍យ៉ាងខ្លាំង ដោយសារវាចេះបក់កន្ទុយ និងដេកលក់ដូចឆ្កែពិតប្រាកដ ។ ក្រុមហ៊ុនបញ្ជាក់ថា ការផលិតឆ្កែយន្តនេះ គឺសម្រាប់ជួយបំបាត់ការអផ្សុករបស់មនុស្សចាស់ ហើយអ្នកប្រើប្រាស់ពុំពិបាកថែទាំវាច្រើនទេ ។

ឆ្កែយន្តគួរឱ្យស្រឡាញ់នេះត្រូវបានផលិតឡើងសម្រាប់មនុស្សចាស់ស្រឡាញ់ឆ្កែ និងអាចបំពេញតម្រូវការប្រើប្រាស់របស់មនុស្សចាស់នៅលើពិភពលោក ។ នាថ្ងៃអនាគត ក្រុមហ៊ុន Tombot នឹងផលិតឆ្មាយន្តផងដែរ សម្រាប់អ្នកស្រឡាញ់ឆ្មា ។

លោក Tom Stevens ស្ថាបិកក្រុមហ៊ុន Tombot និយាយថា ការផលិតឆ្កែយន្តបំបាត់ភាពឯកោរបស់មនុស្សចាស់ គឺក្រោយពីលោកបានបំបែកឆ្កែជាទីស្រឡាញ់ពីម្តាយ ដោយសារគ្រូពេទ្យរកឃើញថា ម្តាយលោកវង្វេងស្មារតី ។ បើទោះលោករកអ្វីផ្សេងមកជំនួសឆ្កែ ប៉ុន្តែម្តាយលោកពុំចូលចិត្ត ប៉ុន្តែឆ្កែយន្តនេះធ្វើឱ្យម្តាយលោកញញឹម ចង់រស់នៅក្បែរវា ថែទាំ និងបារម្ភពីវា បើទោះគាត់ដឹងថា វាពុំមែនជាឆ្កែមានជីវិតក្តី ។ នាថ្ងៃអនាគត លោកនឹងផលិតឆ្មាយន្តសម្រាប់អ្នកស្រឡាញ់ឆ្មា ។

បច្ចុប្បន្ន ពលរដ្ឋអាមេរិកមានអាយុច្រើនបានរស់នៅជាមួយឧបករណ៍បំពាក់បច្ចេកវិទ្យាទាំងនេះ ស្របតាមគម្រោងការរស់នៅក្នុងវ័យជរារបស់រដ្ឋាភិបាល ។ រីឯពលរដ្ឋលើពិភពលោក ដែលមានអាយុចាប់ពី៦៥ឆ្នាំឡើងទៅ បានកើនឡើងយ៉ាងឆាប់រហ័សជាងពលរដ្ឋអាយុតិច ។ នេះបើតាមទិន្នន័យរបស់អង្គការសហប្រជាជាតិ ។

ឧបសគ្គមួយក្នុងការថែទាំមនុស្សចាស់ គឺទទួលបានការព្យាបាល ។ បើអ្នកអាចតាមដានការសម្រាក, បរិភោគអាហារ, ធ្វើចលនា និងត្រួតពិនិត្យទឹកនោមមនុស្សចាស់ជាប្រចាំនោះ អ្នកនឹងអាចជួយសង្គ្រោះយ៉ាងឆាប់រហ័ស និងថែទាំតាមតម្រូវការ ។ មនុស្សចាស់ជិត៩០% នៅអាមេរិកចង់រស់នៅក្នុងផ្ទះរបស់ខ្លួន ប៉ុន្តែមនុស្សភាគច្រើនបារម្ភថា ការរស់នៅផ្ទះម្នាក់ឯងពិបាកណាស់ លុះត្រាតែមានឧបករណ៍ជួយបំបាត់ភាពអផ្សុក, ផ្តល់សញ្ញាពេលរអិលដួល និងត្រួតពិនិត្យថា តើមនុស្សចាស់លេបថ្នាំហើយឬនៅ ។

ការប្រើប្រាស់ឧបករណ៍បច្ចេកវិទ្យាទាំងនេះ នឹងធ្វើឱ្យមនុស្សចាស់មានអាយុវែង និងរស់នៅផ្ទះម្នាក់ឯងបាន ។ ពលរដ្ឋអាមេរិកមានអាយុច្រើននិយមប្រើប្រាស់ឧបករណ៍វាស់សម្ពាធឈាម, រទេះរុញអគ្គិសនី និងឧបករណ៍ជូនដំណឹងពីការលេបថ្នាំ ។ នេះបើតាមនាយកប្រតិបត្តិក្រុមហ៊ុន Starling Medical ៕

សហរដ្ឋអាមេរិក៖ ភ្លើងឆេះព្រៃនៅទីក្រុង Los Angeles នៃរដ្ឋកាលីហ្វ័រញ៉ាប៉ុន្មានថ្ងៃនេះ ត្រូវបានគេប៉ាន់ប្រមាណថា នឹងបណ្តាលឱ្យខាតបង់សេដ្ឋកិច្ចពី ១៣៥ ទៅ ១៥០ ពាន់លានដុល្លារអាមេរិក ដែលជាការខាតបង់ធ្ងន់ធ្ងរបំផុតក្នុងប្រវត្តិសាស្ត្រ។ នេះបើយោងតាមការចុះផ្សាយរបស់សារព័ត៌មានបរទេស Investopedia ភ្លើងឆេះព្រៃដ៏ធំសម្បើមនេះក៏ត្រូវបានគេព្យាករណ៍ដែរថា ពិបាកក្នុងការងើបឡើងវិញណាស់សម្រាប់ ១០ ឆ្នាំខាងមុខ។

កាលពីថ្ងៃទី ៧ រហូតដល់ថ្ងៃទី១១ ខែមករា ភ្លើងបានឆាបឆេះព្រៃហើយបានរាលដាលយ៉ាងលឿនដល់ផ្ទះជាច្រើនខ្នង ក្នុងនោះក៏មានផ្ទះតារាល្បីៗ និងមហាសេដ្ឋីផងដែរ។ លើសពីនេះភ្លើងក៏បានបំផ្លាញផ្ទៃដីសរុបជាង ១១,៦០០ ហិកតា រួមទាំងបង្កឱ្យមានការខូចខាតរចនាសម្ព័ន្ធជាង ១០,០០០ គម្រោងទៀតផង។ គិតត្រឹមថ្ងៃទី ១២ ខែមករា ចំនួនមនុស្សដែលស្លាប់នៅក្នុងហេតុការណ៍ភ្លើងឆេះព្រៃគឺបានកើនឡើងដល់ ១៦ នាក់ហើយ ដែលបច្ចុប្បន្នមនុស្ស ១៥៣,០០០ នាក់នៅក្នុងទីក្រុង Los Angeles នៅតែត្រូវបានបញ្ជាឱ្យជម្លៀសចេញជាបណ្តោះអាសន្ន។

ទោះបីជាឥឡូវនេះភ្លើងត្រូវបានរលត់អស់ ៥០% ក៏ដោយ ក៏អ្នកជំនាញព្យាករណ៍ថាភ្លើងទំនងឆេះរាលដាលម្តងទៀតយ៉ាងឆាប់រហ័សនៅថ្ងៃទី១៣ ដល់ថ្ងៃទី ១៥ ខែមករា ដោយសារមានខ្យល់កន្ត្រាក់មួយទៀតបានបោកបក់។ ដូច្នេះបើយោងតាម AccuWeather ដែលជាក្រុមហ៊ុនព្យាករណ៍អាកាសធាតុឯកជនមួយ បានប៉ាន់ប្រមាណថា ភ្លើងឆេះព្រៃនៅទីក្រុង Los Angeles នៃរដ្ឋកាលីហ្វ័រញ៉ា នឹងបណ្តាលឱ្យមានការខាតបង់សេដ្ឋកិច្ចចំនួន ១៣៥ ទៅ ១៥០ ពាន់លានដុល្លារអាមេរិក ដែលជាសញ្ញាថាដំណើរការស្តារឡើងវិញនឹងមានការលំបាក ហើយបុព្វលាភធានារ៉ាប់រងរបស់ម្ចាស់ផ្ទះក៏នឹងកើនឡើងយ៉ាងខ្លាំងផងដែរ។

គួរបញ្ជាក់ដែរថា មូលហេតុដែលព្រៃត្រូវបានភ្លើងឆេះឥតឈប់ឈរគឺដោយសារសកម្មភាពរបស់មនុស្ស ជាពិសេសការកាប់បំផ្លាញព្រៃឈើ និងការដុតព្រៃដើម្បីកាប់ឆ្ការដីកសិកម្ម រួមទាំងគ្រោះរាំងស្ងួតជាប្រវត្តិសាស្ត្រកាលពីឆ្នាំមុនៗ ក៏ដូចជាការប្រែប្រួលអាកាសធាតុ ការកង្វះទឹកភ្លៀង ដែលកំពុងបង្កើនចំនួនភ្លើងឆេះព្រៃឥតឈប់ឈរ ជាហេតុបណ្តាលឱ្យបរិស្ថានស្ងួត និងងាយឆេះបែបនេះ៕