ក្រសួងកសិកម្ម រុក្ខាប្រមាញ់ និងនេសាទ សម្រេចផ្តល់ទុន៥លានដុល្លារ ដល់កសិករ៣ឃុំ ក្នុងខេត្តកំពង់ធំ ដែលបានស្ម័គ្រចិត្តរួមគ្នា បង្កើតជាសហគមន៍កសិកម្មទំនើបខ្នាតធំ ដើម្បីផលិតស្រូវសែនក្រអូបរបស់កម្ពុជាលើផ្ទៃដី៥ពាន់ហិកតា។

ទុន៥លានដុល្លារនេះ នឹងឱ្យកសិករក្នុងសហគមន៍ខ្ចី ដោយមិនចាំបាច់ឱ្យកសិករពិបាករកខ្ចីប្រាក់ ដែលធ្វើឱ្យជាប់បំណុលគេ ឬ ត្រូវដាក់ទុនដោយខ្លួនឯងនោះទេ។

ការរួមគ្នាបង្កើត ជាសហគមន៍កសិកម្មទំនើបខ្នាតធំនេះ ធ្វើឡើង ស្របពេលដែលប្រភេទស្រូវអូអឹម(OM) កំពុងធ្លាក់ថ្លៃ ដែលឈានដល់មានការធ្វើបាតុកម្មសុំអន្តរាគមន៍ពីក្រុមកសិករដែលបានដាំដុះស្រូវពូជប្រភេទនេះ។

បើតាមសម្តេចធិបតី ហ៊ុន ម៉ាណែត បានណែនាំទៅប្រជាកសិករឱ្យចូលរួមបង្កើតសហគមន៍កសិកម្មទំនើប និងពិចារណាឡើងវិញ នៅក្នុងការប្រើប្រាស់នៅពូជស្រូវសែនក្រអូបរបស់ខ្មែរ ដែលធានាលំនឹងទីផ្សារ មានអ្នកទិញច្បាស់លាស់ ហើយទទួលបានតម្លៃខ្ពស់។

បច្ចុប្បន្ននេះ ប្រភេទស្រូវផ្ការំដួលសែនក្រអូបរបស់កម្ពុជា លក់នៅស្រែបានតម្លៃពី ១២៥០ ទៅ១៣០០រៀល ហើយអ្នកប្រមូលទិញនៅរោងម៉ាស៊ីនមានតម្លៃជាង ១ ៤០០រៀលក្នុង១គីឡូក្រាម៕

ត្រពាំងខ្មោច បានក្លាយជាតំបន់ទេសចរណ៍ថ្មីមួយ ដែលមានទឹកថ្លាឈ្វង់ មើលឃើញដល់បាត តែមិនអនុញ្ញាតឱ្យមនុស្សចូលលេងទឹកនោះទេ។

ត្រពាំងនេះ មានទំហំ៦ហិកតា ស្ថិតនៅទីតាំងភូមិស្រះស្រង់ខាងត្បូង សង្កាត់នគរធំ ក្រុងសៀមរាប ស្ថិតនៅក្នុងតំបន់ការពារទី១នៃឧទ្យានអង្គរ។

ចំពោះការដាក់ឈ្មោះត្រពាំងខ្មោចនេះ មិនមានប្រភពច្បាស់ណាមួយមកបញ្ជាក់មកបាននោះទេ ដោយគេដឹងត្រឹមថា ដើមឡើយត្រពាំងនេះ ត្រូវបានគេស្គាល់ថាជា “ត្រពាំងបុរាណ” ដែលត្រូវអនុញ្ញាតឱ្យប្រជាកសិករជាច្រើនគ្រួសារ អាស្រ័យផលធ្វើស្រែ។

តែក្រោយមក ត្រពាំងនេះ ក៏ត្រូវបានឈ្មួញជីកកកាយ និងដឹកអាចម៍ដីចេញយកទៅលក់ក្នុងក្រុងសៀមរាប អស់រយៈពេលរាប់ឆ្នាំ ទើបបណ្តាលឱ្យទឹកប្រែក្លាយជាមានសភាពខុសធម្មតា។

ថ្វីបើត្រពាំងខ្មោចនេះ មានទេសភាពស្អាត និងទឹកថ្លាឈ្វង់ តែមិនអនុញាតឱ្យមានការរៀបចំជាកន្លែងលក់ដូរប្រកបអាជីវកម្មផ្សេងនៅតាមខ្នងត្រពាំង ឬចិញ្ចឹមត្រីក្នុងត្រពាំងឡើយ៕

រូបភាព៖ នាម-NEAM

ជឿជាក់ថាប្រិយមិត្តមួយចំនួនជ្រាបមកហើយអ្នកបង្កើតមាតិកា Yuro បានធ្លាក់ខ្លួនមានជំងឺច្រើនមុខបង្កឱ្យសាធារណជនអាណិតនិងបានចូលរួមផ្តល់ជាថវិកាតាមសទ្ធាដើម្បីឱ្យលោកទៅព្យាបាលនៅក្រៅប្រទេស។ យ៉ាងណាមិញថ្មីៗនេះ Yuro បានប្រកាសថាជំងឺរបស់លោកស្ថិតនៅក្នុងដំណាក់កាលតាមដានមិនធ្ងន់ធ្ងរដោយសំណូមពរឱ្យអ្នកដែលបាញ់លុយជួយលោកបង្វែរទៅជួយក្រុមគ្រួសារដែលជួបគ្រោះថ្នាក់ចរាចរណ៍ស្លា.ប់ទាំងប្ដីទាំងកូនពីរនាក់។

នៅយប់ថ្ងៃទី១១ មករា Yuro Mong បានបង្ហោះថា«សួស្ដីបងប្អូនទាំងអស់គ្នាឥឡូវខ្ញុំបានមកដល់ខ្មែរវិញហើយ ជំងឺរបស់ខ្ញុំស្ថិតនៅក្នុងការតាមដានរបស់គ្រូពេទ្យបីខែទៀតត្រូវឡើងទៅវិញ ដូច្នោះហើយខ្ញុំគិតថាខ្ញុំមិនអីទេខ្ញុំមិនធ្ងន់ធ្ងរទេ ខ្ញុំឃើញបងប្អូនទាំងអស់គ្នានៅតែបន្តបាញ់លុយឱ្យខ្ញុំ ខ្ញុំសុំអត់ទទួលទៀតទេ អរគុណសម្រាប់ទឹកចិត្តបងប្អូនខ្លាំងណាស់ តែបើបងប្អូននៅតែបន្តចង់ជួយខ្ញុំទៀតខ្ញុំសូមឱ្យបងប្អូនទៅជួយក្រុមគ្រួសាររបស់បងស្រីដែលជួបគ្រោះថ្នាក់ចរាចរណ៍ស្លា.ប់ទាំងប្ដីទាំងកូនពីរនាក់ហើយបងស្រីក៏ត្រូវពិការទៀត ចង់ឱ្យបងប្អូនទៅជួយគាត់វិញណា សូមអរគុណដោយក្តីស្រឡាញ់»។

ទឹកចិត្តរបស់ Yuro នេះបានធ្វើឱ្យមនុស្សជាច្រើនសម្តែងការកោតសរសើរចំពោះលោក។ អ្នកបង្កើតមាតិការូបនេះបានធ្លាក់ខ្លួនមានបញ្ហាឈឺក្រលៀនទាំងសងខាង ឈាមស ថ្លើមរលាក ជាតិស្ករឡើង រលាកក្រពះពោះវៀន បញ្ហាគ្រាប់ឈាមខុសប្រក្រតី …។

សូមបញ្ជាក់ផងដែរថា នៅល្ងាចថ្ងៃទី១០ ខែមករា មានករណីគ្រោះថ្នាក់ចរាចរណ៍មួយកើតឡើងលើផ្លូវ៦០ម៉ែត្រដោយបុរសម្នាក់បើករថយន្តស្ថិតក្នុងស្ថានភាពស្រវឹងបានបុកជាមួយម៉ូតូដែលមានសមាជិក៤នាក់ខណៈបុរសជាឪពុកនិងកូនពីរនាក់បានទទួលមរណភាពខណៈស្រ្តីជាម្តាយមានរបួសធ្ងន់ធ្ងន់ដាច់ជើងដែលកំពុងសម្រាកព្យាបាលនៅប្រទេសវៀតណាម។ សោកនាដកម្មនេះបានធ្វើឱ្យសាធារណជនមានការរំជួលចិត្តជាខ្លាំង៕

ថ្មីៗនេះ អ្នកលេងបណ្តាញសង្គមជាច្រើនហាក់មានការចាប់អារម្មណ៍ខ្លាំងមែនទែនទៅនំខ្មែរ ២ ប្រភេទ គឺនំពារ និងនំពពារ ដោយសង្កេតឃើញថាមានការបង្ហោះចែកចាយជាច្រើនទាំងនៅលើហ្វេសបុកនិង Tik Tok ទើបធ្វើឲ្យអ្នកដែលធ្លាប់ភ្លក្សហើយក៏នឹករសជាតិ ចង់បរិភោគឡើងវិញ ខណៈអ្នកមិនទាន់បានភ្លក្សក៏កំពុងតែស្វះស្វែងរកជាវជាបន្តបន្ទាប់ផងដែរ។

ជាការពិតណាស់ មហាជនភាគច្រើនប្រាកដជាស្គាល់យ៉ាងច្បាស់ហើយ នំពារខ្មែរ ដែលជាប្រភេទនំម្យ៉ាង សំបកខាងក្រៅមូលដោយស្រទាប់ម្សៅ និងស្នូលខាងក្នុងមានជម្រើសរសជាតិយ៉ាងច្រើនសម្បូរបែប ដូចជាស្នូលទុរេន សណ្តែក ត្រាវ ដូង ស្លឹកតើយ និងស្នូលពងពារប្រៃជាដើម។ នំពារប្រភេទនេះគឺគេអាចរក្សាទុកបានយូរថ្ងៃ ដែលជាទូទៅគេតែងនិយមយកទៅវត្តប្រគេនព្រះសង្ឃ ឬក៏លេចវត្តមាននៅតាមកម្មវីធីនានាផងដែរ។ នំពារ គឺជាចំណូលចិត្តរបស់មនុស្សគ្រប់វ័យតែម្តង មិនថា ក្មេងចាស់ប្រុសស្រី ដោយសារតែរសជាតិដ៏ឆ្ងាញ់ពិសារ។

ក្រឡេកទៅកាន់«នំពពារ»វិញ ឬអ្នកខ្លះហៅថា«នំប៉ក់ពារ» ក៏ត្រូវបានគេស្គាល់ថាជានំខ្មែរមួយបែបទៀត ដែលនំនេះសំបកខាងក្រៅភាគច្រើនគឺជាបន្ទះម្សៅស្តើងៗរសជាតិស្លឹកតើយ ដែលគេបានធ្វើការចម្អិនវារួចជាស្រេច។ ទើបយកមកខ្ចប់ជាមួយស្នូលមានដូចជា ល្ងរ ស្ករ និងសាច់ដូងខ្ចីជាដើម។ ដើម្បីឲ្យវាក្លាយជានំពពារដ៏ឈ្ងុយឆ្ងាញ់មួយដុំ គេក៏ត្រូវមូលបន្ទះម្សៅដែលឆ្អិនស្រាប់នោះជាមួយនឹងស្នូលជាការស្រេច។ ចំណុចទាក់ទាញនៃនំនេះគឺជានំមួយប្រភេទដែលងាយស្រួលធ្វើ ថែមទាំងមានរសជាតិឈ្ងុយឆ្ងាញ់ស្របតាមចំណូលចិត្តរបស់ប្រជាជនខ្មែរផងដែរ៕

ប្រធានបទមួយបានលេចឡើងយ៉ាងក្តៅគគុកតំាងពីអំឡុងចុងឆ្នាំ ២០២៤ និងដើមឆ្នាំ ២០២៥ ទាក់ទងនឹងក្រុមហ៊ុនទេសចរណ៍ក្នុងស្រុកមួយ ដែលត្រូវបានគេស្គាល់ថា «សកុណា ត្រាវែល » បានរកស៊ីបោ.កប្រាស់ទំនុកចិត្តនិងប្រាក់ពីអតិថិជនខ្លួនសរុបរាប់សិបម៉ឺនដុល្លារ។ ខណៈក្រុមហ៊ុននេះត្រូវបានដកអាជ្ញាបណ្ណចេញតាំងពីថ្ងៃទី ១៤ ខែវិច្ឆិកា ឆ្នាំ២០២៤មកម្លេះ។

យោងតាមការគូសបញ្ជាក់ពីមហាជនជាច្រើនបានឲ្យដឹងថា ក្រុមហ៊ុនទេសចរណ៍«សកុណា ត្រាវែល»គឺបានបោកលុយអតិថិជន ក៏ដូចជាប្រជាជនខ្មែររាប់សិបម៉ឺនដុល្លារអាមេរិក តាមរយៈរូបភាពមួយចំនួនដូចជា ការទិញកញ្ចប់ធួរដំណើរកម្សាន្ត ប៉ុន្តែបែរជាខកខាននិងមិនព្រមរៀបចំជូនភ្ញៀវឡើយ ហើយអ្នកខ្លះទៀតបានទៅហើយ តែបែរជាគ្មានសំបុត្រយន្តហោះត្រឡប់មកវិញជាដើម។ ក្រសួងទេសចរណ៍ក៏បានគូសបញ្ជាក់កាលពីអំឡុងខែវិច្ឆិកា ឆ្នាំ២០២៤ថា អតិថិជនសរុប៨២គ្រួសារ បានខាតបង់ប្រាក់ឲ្យក្រុមហ៊ុននេះ ដែលគិតជាទឹកប្រាក់ ប្រមាណ ២៦៥,០០០ដុល្លារអាមេរិក។

អ្វីដែលអាណិតនិងខ្លោចចិត្តនោះ តាមការឲ្យដឹងពីអតិថិជនវ័យចំណាស់ជាច្រើននាក់ ហេតុតែចង់ធ្វើដំណើរកម្សាន្តទៅលេងក្រៅប្រទេស បានសម្រេចចិត្តសន្សំលុយ ដើម្បីទិញកញ្ចប់ដំណើរកម្សាន្តពីក្រុមហ៊ុនទេសចរណ៍ខាងលើ និងបង់ប្រាក់រួចរាល់ហើយ តែក៏ត្រូវបានក្រុមហ៊ុនផ្អាកដំណើរកម្សាន្តវិញ និងមិនព្រមសងថ្លៃខូចខាតឲ្យនោះឡើយ។

សូមរំឭកថា ក្រុមហ៊ុនទេសចរណ៍ សកុណា ត្រាវែល (ខេមបូឌា) ឯ.ក ដែលមានលោកស្រី អ៊ុក រដ្ឋា ជាម្ចាស់អាជ្ញាបណ្ណ មានទីតំាងស្ថិតនៅផ្ទះលេខ ៩៨DE0 ផ្លូវ១០៨ សង្កាត់វត្តភ្នំ ខណ្ឌដូនពេញ រាជធានីភ្នំពេញ។ ក្រុមហ៊ុននេះ ក៏ត្រូវបានក្រសួងទេសចរណ៍ប្រកាសលុបអាជ្ញាបណ្ណ តំាងពីថ្ងៃទី១៤ ខែវិច្ឆិកា ឆ្នាំ២០២៤ មកម្លេះ ព្រោះបានប្រព្រឹត្តខុសនឹងបទប្បញ្ញត្តិទេសចរណ៍នៃព្រះរាជាណាចក្រកម្ពុជា។

តែយ៉ាងណា រហូតមកទល់ពេលនេះ ក៏នូវតែមានជនរងគ្រោះជាច្រើននាក់ទៀត ចាញ់បោកក្រុមហ៊ុននេះជាបន្តបន្ទាប់ផងដែរ។ ដូច្នេះហើយ សូមអំពាវនាវដល់ប្រជាពលរដ្ឋទាំងអស់បង្កើននូវការប្រុងប្រយ័ត្នឲ្យបានខ្ពស់បំផុត ជាពិសេសទាក់ទងនឹងករណីឆបោកតាមរូបភាពផ្សេងៗ ដែលកំពុងតែរីករាលខ្លាំងនាពេលបច្ចុប្បន្ន។ អ្នកទាំងអស់ត្រូវតែស្រាវជ្រាវប្រភពឲ្យបានច្បាស់លាស់ជាមុនសិន និងជៀសវាងជឿស្តាប់តាមគ្នា ឬក៏តាមមេខ្យល់៕