ភាពចម្រូងចម្រាស់ទាក់ទងនឹងតម្លៃស្រូវអង្ករបានក្លាយជាប្រធានបទក្តៅក្នុងចំណោមប្រជាជនខ្មែរ ស្របពេលប្រទេសឥណ្ឌាបានក្លាយជាប្រទេសនាំចេញអង្ករលំដាប់ទី ១ លើពិភពលោក។ ក្រឡេកទៅកាន់ថៃ និងវៀតណាម ដែលជាប្រទេសនាំចេញអង្ករធំៗទាំង ២ ប្រចាំអាស៊ាន ក៏កំពុងតែព្រួយបារម្ភពីការធ្លាក់ចុះទាំងបរិមាណការនាំចេញនិងតម្លៃអង្ករ លើទីផ្សារអន្តរជាតិផងដែរ។

យោងតាមការចេញផ្សាយរបស់កាសែតវៀតណាម កាលពីចុងឆ្នាំ ២០២៤បានឲ្យដឹងថា ប្រទេសឥណ្ឌាបានក្លាយជាប្រទេសឈានមុខគេ នាំចេញអង្ករ ១៧ លានតោន ក្នុងឆ្នាំ ២០២៤។ ឯប្រទេសថៃជាប់ចំណាត់ថ្នាក់លេខ ២ នាំចេញអង្ករបាន ១០ លានតោន និងវៀតណាម ជាប្រទេសនាំចេញអង្ករឈរលើលំដាប់លេខរៀងទី ៣ នាំចេញបាន ៩លានតោន និងរកចំណូលបាន ៥,៧ ពាន់លានដុល្លារ។

យ៉ាងណា ក្នុងឆ្នាំ ២០២៥នេះ ទាំងវៀតណាមនិងថៃគឺកំពុងតែភ័យព្រួយអំពីការកើនឡើងនៃការនាំចេញអង្ករឥណ្ឌាទៅកាន់ទីផ្សារអន្តរជាតិខ្ពស់ ដែលនាំឲ្យខ្លួនបាត់បង់ឱកាស។ ម៉្យាងវិញទៀត ប្រទេសឥណ្ឌូនេស៊ី ហ្វីលីពីន និងម៉ាឡេស៊ី ដែលជាទីផ្សារនាំចូលអង្ករថៃ-វៀតណាមដ៏សំខាន់បំផុត, នៅក្នុងឆ្នាំនេះ បែរជាមានបំណងកាត់បន្ថយបរិមាណការនាំចូលផងដែរ។

យោងតាមចក្ខុវិស័យឆ្នាំ២០២៥ ប្រទេសឥណ្ឌាត្រូវបានគេព្យាករថានឹងនាំចេញអង្កររហូតដល់ទៅ ២២លានតោន ដែលខ្ពស់ជាងឆ្នាំ២០២៤ ចំនួន ៥លានតោន។ ខណៈដែលវៀតណាម និងថៃ អាចប្រឈមនឹងការលំបាកក្នុងការនាំចេញអង្ករ ក៏ដូចជាប៉ះពាល់តម្លៃលើទីផ្សារ។ គេព្យាករណ៍ថា ប្រទេសថៃក្នុងឆ្នាំ ២០២៥ នេះនឹងធ្លាក់ចុះបរិមាណនាំចេញអង្ករ មកត្រឹមតែ៧.៥ លានតោនប៉ុណ្ណោះ (ធ្លាក់ចុះ ២.៥លានតោន បើធៀបនឹងឆ្នាំមុន)។

សូមជម្រាបថា ប្រទេសឥណ្ឌាបានលុបចោលបម្រាមនាំចេញអង្ករកាលពីខែកញ្ញា ឆ្នាំ២០២៤ ដែលនាំឲ្យឥណ្ឌាបានដណ្តើមយកដំណែងទីផ្សារនាំចេញអង្ករធំជាងគេលើពិភពលោក។ យ៉ាងណា ទីផ្សារឥណ្ឌាក៏បានជះឥទ្ធិពលដល់ប្រទេសនាំចេញអង្ករធំៗ ដូចជាថៃ វៀតណាមជាដើម ខណៈដែលកម្ពុជា បើទោះបីជាមិនជាប្រទេសនាំចេញអង្ករធំក៏ដោយ តែក៏បានរងនូវឥទ្ធិពលផងដែរ ក៏ព្រោះតែឥណ្ឌាជាទីផ្សារផ្គត់ផ្គង់ទី១ ខណៈមានតម្លៃអង្ករថោកជាងគេបំផុតផងដែរ៕

ប្រទេសថៃ៖ ភ្លើងឆេះព្រៃនៅទីក្រុង Los Angeles មិនទាន់រលត់ស្រួលបួលផង ឥឡូវនេះមានហេតុការណ៍ដ៏ភ័យរន្ធ.ត់មួយទៀតហើយ គឺភ្លើងឆេះព្រៃយ៉ាងសន្ធោសន្ធៅនៅខេត្តឈុនបុរី ភាគខាងកើតនៃទីក្រុងប៉ាតាយ៉ា ប្រទេសថៃវិញម្តង ដែលបានបង្កឱ្យមានការភ្ញាក់ផ្អើលយ៉ាងខ្លាំង។យោងតាមការចុះផ្សាររបស់សារព័ត៌មានបរទេស The Pattaya News ហេតុការណ៍ភ្លើងឆេះព្រៃបានកើតឡើងនៅវេលាម៉ោង ៩:៣០ នាទីយប់នាថ្ងៃទី ១៥ ខែមករា ឆ្នាំ ២០២៥។

ភ្លាមៗនោះសេវាសង្គ្រោះបន្ទាន់ រួមទាំងរថយន្តពន្លត់អគ្គីភ័យ ត្រូវបានបញ្ជូនទៅកាន់កន្លែងកើតហេតុ ដើម្បីពន្លត់ភ្លើង។ ទោះជាយ៉ាងណាបន្ទាប់ពីពន្លត់អស់រយៈពេលពេញមួយយប់ ភ្លើងនៅតែបន្តឆាបឆេះឥតឈប់ឈរដដែល ហើយនៅតែបន្តរាលដាលយ៉ាងឆាប់រហ័ស ដោយបានបង្កការគំរាមកំហែងដល់វត្តមួយដែលនៅក្បែរនោះទៀតផង។ គិតត្រឹមថ្ងៃទី១៦ ខែមករានេះ មន្ត្រីមូលដ្ឋានកំពុងធ្វើការយ៉ាងយកចិត្តទុកដាក់ក្នុងការទប់ស្កាត់ភ្លើងមិនឱ្យឆេះដល់វត្តនោះទេ។

នេះបើយោងតាមប្រភពដដែលបានឱ្យដឹងទៀតថា ទោះបីជាមានភ្លើងឆេះព្រៃខ្លាំងប៉ុណ្ណាក៏ដោយ ក៏មិនមានការបញ្ជាឱ្យជម្លៀសពលរដ្ឋឡើយដោយសារទីតាំងឆេះ ហាក់នៅឆ្ងាយពីតំបន់លំនៅដ្ឋានរបស់ប្រជាជន ខណៈភ្លាមៗក៏មិនទាន់មានសេចក្តីរាយការណ៍អំពីទំហំនៃការខូចខាតដែរ ប៉ុន្តែគេបារម្ភថា គុណភាពខ្យល់ដែលបណ្តាលមកពីផ្សែងភ្លើង នឹងប៉ះពាល់ដល់សុខភាពមនុស្ស។

សម្រាប់មូលហេតុនៃភ្លើងឆេះព្រៃវិញក៏មិនទាន់ដឹងថា បណ្តាលមកពីអ្វីដែរ ប៉ុន្តែបើតាមធម្មតា រាល់ឆ្នាំឱ្យតែដល់ខែធ្លាក់ខ្យល់ ប្រទេសថៃតែងតែកើតមានភ្លើងឆេះព្រៃជានិច្ច គ្រាន់តែថាឆ្នាំនេះ រដូវភ្លើងឆេះព្រៃហាក់កើតឡើងលឿនខុសធម្មតា។ ដូច្នេះហើយអគ្គិភ័យនៅតែស្ថិតក្រោមការស៊ើបអង្កេតរបស់រដ្ឋាភិបាល ខណៈគេសង្ស័យថាមូលហេតុដែលមានភ្លើងឆេះព្រៃគឺកើតឡើងដោយសារបរិយាកាសធម្មជាតិ និងសកម្មភាពរបស់មនុស្ស៕

ប្រទេសអូស្ត្រាលី៖ ប្រទេសអូស្ត្រាលីបានរកឃើញដុំមូលតូចៗដ៏អាថ៌កំបាំងជាច្រើនអណ្តែតរសាត់តាមឆ្នេរ បង្ខំឱ្យរដ្ឋាភិបាលប្រកាសបិទឆ្នេរល្បីៗចំនួន ៩ នៅទីក្រុងស៊ីដនី។
យោងតាមការចុះផ្សាយរបស់សារព័ត៌មានបរទេស BBC ឆ្នេរចំនួន ៩ ពី Manly ដល់ North Narrabeen ត្រូវបានបិទជាបណ្តោះអាសន្ន ដោយសារតែការរកឃើញ កំទេចកំទីតូចៗស្រដៀងនឹងថ្មម៉ាបដែលមានប្រហែល ២០០០ ដុំ។

យោងតាមការចុះផ្សាយវត្ថុទាំងនេះមិនមែនកើតឡើងពីធម្មជាតិនោះទេ វាជាវត្ថុចម្លែងអ្វីម្យ៉ាងដែលមានផ្ទុកនូវសារធាតុគ្រោះថ្នាក់ជាច្រើន។ បច្ចុប្បន្នក្រុមប្រឹក្សាកំពុងធ្វើការយ៉ាងជិតស្និទ្ធជាមួយទីភ្នាក់ងារការពារបរិស្ថាន New South Wales (EPA) ដើម្បីប្រមូលគំរូសម្រាប់ការធ្វើតេស្ត ក៏ដូចជាកំពុងរៀបចំការឈូសឆាយប្រកបដោយសុវត្ថិភាពនៃលំហ និងការត្រួតពិនិត្យឆ្នេរផ្សេងៗទៀត រួមទាំងសម្អាតភាពកខ្វក់ពីឆ្នេរ និងណែនាំប្រជាជនឱ្យនៅឱ្យឆ្ងាយពីកម្ទេចកម្ទីគ្រោះថ្នាក់ទាំងនេះប្រសិនបើឃើញវាដោយចៃដន្យ។

យោងតាមការស្រាវជ្រាវ ដុំមូលតូចៗដ៏អាថ៌កំបាំងជាច្រើនអណ្តែតរសាត់តាមឆ្នេរ មានផ្ទុកអ្វីៗគ្រប់យ៉ាងតាំងពីប្រេងឆា និងម៉ូលេគុលសំណល់សាប៊ូ រហូតដល់ថ្នាំបញ្ចុះសម្ពាធឈាម ថ្នាំសម្លាប់សត្វល្អិត ថ្នាំលាបសក់ សមាសធាតុស្តេរ៉ូអ៊ីត និងថ្នាំពេទ្យសត្វ ដែលអាចប៉ះពាល់យ៉ាងធ្ងន់ធ្ងរដល់សុខភាពរាងកាយរបស់មនុស្សប្រសិនបើប៉ះពាល់វា។ អភិបាលក្រុង Northern Beaches លោក Sue Heins បាននិយាយថា ដុំមូលចម្លែកទាំងនេះទំនងចេញពីប្រភពលូទឹកស្អុយ ហើយអណ្តែតមកលើសមុទ្រ។

ទោះជាយ៉ាងណា ពួកគេនៅមិនអាចកំណត់ពីប្រភពដើមជាក់លាក់របស់វត្ថុអាថ៌កំបាំងទាំងនេះនោះទេ។ គួរបញ្ជាក់ដែរថា នេះមិនមែនជាលើកទីមួយទេដែលវត្ថុចម្លែកបានបង្ហាញខ្លួននៅលើឆ្នេរស៊ីដនី។ កាលពីខែតុលា និងខែធ្នូឆ្នាំមុន ឆ្នេរស៊ីដនីដ៏ពេញនិយមមួយចំនួន រួមទាំងឆ្នេរ Coogee នៅតំបន់ភាគខាងកើតក៏ត្រូវបានបិទផងដែរ ដោយសារតែការរកឃើញ គ្រាប់បាល់តូចៗដែលអណ្តែតរសាត់តាមឆ្នេរ ហើយតំបន់នៅជិតអាកាសយានដ្ឋានស៊ីដនីក៏បានកត់ត្រាបាតុភូតស្រដៀងគ្នានេះផងដែរ៕

កាលពីថ្ងៃទី១៤ ខែមករា ឆ្នាំ២០២៥ សារព័ត៌មាន Bloomberg និង Wall Street Journal រាយការណ៍ថា រដ្ឋាភិបាលចិននឹងអនុញ្ញាតលក់ TikTok ឱ្យលោក Elon Musk នាយកក្រុមហ៊ុន Tesla និង Space X ដើម្បីកុំឱ្យអាមេរិកបិទបណ្តាញសង្គមនេះ ពីព្រោះតុលាការកំពូលអាមេរិកនឹងបិទ TikTok នៅថ្ងៃទី១៩ ខែមករា លើកលែងតែក្រុមហ៊ុន ByteDance ជាម្ចាស់ TikTok ព្រមលក់បណ្តាញសង្គមឱ្យអាមេរិក ។

ការចុះផ្សាយព័ត៌មានអំពីការលក់ TikTok ឱ្យលោក Elon Musk បានធ្វើឱ្យមហាជនចាប់អារម្មណ៍យ៉ាងខ្លាំងលើផ្នែកបច្ចេកវិទ្យា និងនយោបាយ ព្រមទាំងតាមដានស្ថានការណ៍ថា តើវានឹងប៉ះពាល់ដល់អ្នកលេង TikTok នៅអាមេរិកដែរឬទេ? ចំណែក TikTok បានបដិសេធនឹងការចុះផ្សាយរបស់សារព័ត៌មាន Bloomberg ថា រដ្ឋាភិបាលចិននឹងលក់បណ្តាញសង្គមនេះឱ្យមហាសេដ្ឋីអាមេរិក ដើម្បីអាចធ្វើប្រតិបត្តិការផ្សេងៗនៅអាមេរិកបន្តទៀត គឺគ្រាន់តែជារឿងប្រឌិតប៉ុណ្ណោះ ។

កាលពីថ្ងៃទី១៥ ខែមករា កន្លងមក សារព័ត៌មាន Reuters រាយការណ៍ថា TikTok ពុំបានលក់បណ្តាញសង្គមរបស់ខ្លួនឱ្យមហាសេដ្ឋីអាមេរិកទេ ប៉ុន្តែ TikTok គ្រោងបិទបណ្តាញសង្គមនៅអាមេរិក នៅថ្ងៃទី១៩ ខែមករា ឆ្នាំ២០២៥ ដោយសាររដ្ឋាភិបាលអាមេរិកអនុវត្តច្បាប់គ្រប់គ្រងបណ្តាញសង្គម ។

គួរបញ្ជាក់ថា កាលពីខែមេសា ឆ្នាំ២០២៤ លោក Joe Biden ប្រធានាធិបតីអាមេរិកបានចុះហត្ថលេខាលើច្បាប់កំណត់ឱ្យក្រុមហ៊ុន ByteDance ត្រូវតែលក់បណ្តាញសង្គមនេះឱ្យអាមេរិក នៅត្រឹមថ្ងៃទី១៩ ខែមករា ឆ្នាំ២០២៥ បើមិនដូច្នោះទេ អាមេរិកនឹងហាមឃាត់ការប្រើប្រាស់ ។ ប៉ុន្តែក្រុមហ៊ុននានាបានស្នើឱ្យរដ្ឋាភិបាលអាមេរិកពន្យារពេលអនុវត្តច្បាប់នេះ ពីព្រោះជាការបំបិទសិទ្ធិនិយាយស្តីរបស់ពលរដ្ឋ ។

លោក Biden ថ្លែងថា បើគ្មានការលក់ TikTok នៅអាមេរិកទេ គឺចិននឹងប្រើប្រាស់ TikTok សម្រាប់ស៊ើបការណ៍ និងជ្រៀតជ្រែកកិច្ចការនយោបាយផ្ទៃក្នុងអាមេរិក ។ ផ្ទុយទៅវិញ TikTok លើកឡើងថា បណ្តាញសង្គមរបស់ខ្លួនមិនស្ថិតនៅក្រោមឥទ្ធិពលគណបក្សកុម្មុយនិស្តចិនទេ ហើយច្បាប់ហាមឃាត់ការប្រើប្រាស់ TikTok របស់អាមេរិក គឺល្មើសនឹងសិទ្ធិសេរីភាព និងការបញ្ចេញមតិ ៕