ប្រទេសមីយ៉ាន់ម៉ា ៖ កាលពីថ្ងៃទី២១ ខែមករា ឆ្នាំ២០២៥ កាសែត Global New Light of Myanmar រាយការណ៍ថា រយៈពេលជាង១ឆ្នាំ រដ្ឋាភិបាលយោធាមីយ៉ាន់ម៉ាបានបណ្តេញក្រុមបោ.កប្រាស់តាមអនឡាញ សរុបស្មើ៥ម៉ឺន៥ពាន់នាក់ ឱ្យត្រឡប់ទៅប្រទេសកំណើតវិញ ។ នេះជាចំនួនក្រុមបោ.កប្រាស់ច្រើនបំផុត តាំងពីមីយ៉ាន់ម៉ាបានបណ្តេញកាលពីខែតុលា ឆ្នាំ២០២៣ ។

ទីតាំងក្រុមបោកប្រាស់តាមអនឡាញបានកើនឡើងដូចផ្សិតនៅបរិវេណព្រំដែនមីយ៉ាន់ម៉ា និងមានបុគ្គលិកធ្វើការជាច្រើន ហើយភាគច្រើនជាជនបរទេសដែលត្រូវបញ្ឆោត ឬជួញដូរឱ្យមកធ្វើការ ។ បុគ្គលិកទាំងនេះត្រូវបង្ខំឱ្យធ្វើការបោកប្រាស់ជនជាតិដូចគ្នា រហូតដល់ក្រុមបោកប្រាស់អាចរកប្រាក់ចំណូលបានរាប់លានដុល្លារអាមេរិក ។

ក្នុងចំណោមជនបោកប្រាស់ទាំង៥ម៉ឺន៥ពាន់នាក់ ក្នុងនោះមានជនជាតិចិនច្រើនជាងគេ ស្មើនឹង៥ម៉ឺន៣ពាន់នាក់ បន្ទាប់មក គឺវៀតណាម ១,០០០នាក់, ថៃ ៦០០នាក់ និងជនបោកប្រាស់មកពី២៥ប្រទេសផ្សេងទៀត ។ ក្រោយការបណ្តេញក្រុមបោកប្រាស់ត្រឡប់ទៅប្រទេសវិញ រដ្ឋាភិបាលមីយ៉ាន់ម៉ាបានស្នើឱ្យប្រទេសជិតខាងជួយសហការទប់ស្កាត់ជនខិលខូចតាមអ៊ីនធើរណេត និងការភ្នាល់អនឡាញ ។

ព្រំដែនភាគខាងជើងរបស់មីយ៉ាន់ម៉ាដែលជាប់ប្រទេសចិន គឺសម្បូរក្រុមបោកប្រាស់តាមអនឡាញគ្រប់គ្រងដោយក្រុមប្រដាប់អាវុធ ប៉ុន្តែក្រោយពីការបំផ្លាញទីតាំងរួចមក ក្រុមបោកប្រាស់ទាំងនេះក៏បានប្តូរទីតាំងមកកាន់តំបន់ព្រំដែនជាប់ប្រទេសថៃ ។ នៅខែមករា ឆ្នាំ២០២៥នេះ រដ្ឋាភិបាលមីយ៉ាន់ម៉ាបានសហការជាមួយថៃរកវិធីដោះស្រាយបញ្ហាការបោកប្រាស់ និងភ្នាល់អនឡាញ ។

គួរបញ្ជាក់ថា ការបោកបញ្ឆោតតាមអនឡាញ គឺជាបញ្ហាចម្បងដែលបណ្តាប្រទេសក្នុងតំបន់អាស៊ីអាគ្នេយ៍រកវិធានការដោះស្រាយ ហើយមីយ៉ាន់ម៉ាស្ថិតក្នុងភាពវឹកវរតាំងពីរដ្ឋាភិបាលយោធាធ្វើរដ្ឋប្រហារទម្លាក់លោកស្រី អង់សានស៊ូជី ដែលគ្រប់គ្រងប្រទេសតាមរយៈការបោះឆ្នោតឱ្យចេញពីតំណែង កាលពីឆ្នាំ២០២១ ៕

ជឿថាប្រិយមិត្តភាគច្រើនប្រាកដជាធ្លាប់កាត់តរូបភាព ឬវីដេអូនៅក្នុងកម្មវិធី CapCut ហើយ ដោយបច្ចុប្បន្នកម្មវិធីនេះហាក់ពិបាកកាត់ជាងមុន កាត់ទាក់ៗ និងផ្សាយពាណិជ្ជកម្មញឹកញាប់បំផុត។ ប៉ុន្តែឈប់បារម្ភទៀតទៅ លោកអ្នកគ្រាន់តែរងចាំប៉ុន្មានសប្តាហ៍ទៀតទេក្រុមហ៊ុន Meta នឹងបញ្ចេញកម្មវិធីថ្មីមួយដែលមានឈ្មោះថា Edits ជាមួយមុខងារស្រដៀងនឹង CapCut កំពុងដាក់ឱ្យប្រើប្រាស់ក្នុងពេលឆាប់ៗនេះ។

វាជាដំណឹងដ៏ល្អមួយសម្រាប់អ្នកដែលចូលចិត្តកាត់តវីដេអូ ឬរូបភាពជារៀងរាល់ថ្ងៃ។ កម្មវិធី Edits របស់ក្រុមហ៊ុន Meta គឺជាកម្មវិធី free ដោយអ្នកទាំងអស់គ្នា អាចចូលទៅទាញយកបាននៅលើ Play Store និង App Store នៅពេលដែល Meta បញ្ចេញវាជាផ្លូវការនៅអំឡុងខែកុម្ភៈ ឆ្នាំ ២០២៥ ខាងមុខនេះ។ កម្មវិធី Edits គឺមានលក្ខណៈស្រដៀងគ្នាទៅនឹងកម្មវិធី CapCut របស់ TikTok ដែរ ដែលពួកវាសុទ្ធតែជាកម្មវិធីកាត់តវីដេអូតាមទូរស័ព្ទដៃដូចគ្នា។

ចំពោះមុខងារសំខាន់ៗនៅក្នុងកម្មវិធីនេះមានដូចជា៖ insert custom text, captions, AI-generated content, multiple audio tracks, stickers, special effects, green screens និងមុខងារជាច្រើនផ្សេងទៀត។ បន្ថែមលើនេះ user នឹងអាចធ្វើការថតវីដេអូ តាមរយៈកម្មវិធី Edits នេះដោយផ្ទាល់ ហើយវាមានផ្តល់ជម្រើស សម្រាប់កំណត់ទៅលើ resolutions និង frame rates ផងដែរ។

ទន្ទឹមនឹងនេះក្រុមហ៊ុនក៏បានកែលម្អកម្មវិធី Instagram ទៀតផង ដោយបង្កើនរយៈពេលអតិបរមាសម្រាប់វីដេអូ Reels ពី ៩០ វិនាទីទៅ ៣ នាទី។ លោក Adam Mosseri ប្រធាន Instagram បាននិយាយថា ការកែលម្អនេះកើតចេញពីមតិរបស់អ្នកប្រើប្រាស់ដែលចង់បាននាទីច្រើនជាងមុខ។

យោងតាមសារព័ត៌មានបរទេស ការផ្លាស់ប្តូរទាំងនេះក៏កើតឡើងនៅក្នុងបរិបទដែល TikTok កំពុងមានបញ្ហាចម្រូងចម្រាសជាមួយអាមេរិកផងដែរ ខណៈមនុស្សជាច្រើនជឿថានេះគឺជាឱកាសមាសសម្រាប់ក្រុមហ៊ុន Meta ដើម្បីទាក់ទាញអ្នកប្រើប្រាស់ពីដៃគូប្រកួតប្រជែង។ ទោះបីជា TikTok និង Capcut នៅតែអាចប្រើប្រាស់បានក៏ដោយ ក៏ក្រុមហ៊ុន Meta ជឿថាកម្មវិធីថ្មីរបស់ខ្លួននឹងអាចយកឈ្នះកម្មវិធី Capcut របស់ TikTok ជាក់ជាមិនខាន៕

សហរដ្ឋអាមេរិក ៖ នាយកក្រុមហ៊ុន Tesla និង SpaceX លោក Elon Musk បានបង្ហាញកាយវិការរីករាយយ៉ាងខ្លាំង រហូតទប់អារម្មណ៍លែងបាននៅលើវេទិកាកាន់តំណែងប្រធានាធិបតីអាមេរិករបស់លោក Donald Trump កាលពីថ្ងៃទី២០ ខែមករា ឆ្នាំ២០២៥ ។ លោកនិយាយថា វាជាជ័យជម្នះមួយ ប្រទេសយើងនឹងមានសុវត្ថិភាពបំផុត មានសន្តិសុខតាមព្រំដែន ហើយយើងនាំក្រសួងប្រសិទ្ធភាពរបស់រដ្ឋាភិបាលទៅកាន់ភពអង្គារ ។

លោក Elon Musk បាននិយាយអរគុណទៅកាន់អ្នកគាំទ្រគ្រប់រូបដែលធ្វើឱ្យលោកមានថ្ងៃនេះ ហើយលោកថា ការបោះឆ្នោតលើកនេះពិតជាមានសារៈសំខាន់ខ្លាំងណាស់ ។ លោកគាំទ្រយ៉ាងពេញទំហឹងចំពោះការលើកឡើងរបស់លោក Trump កន្លងមកថា អាមេរិកនឹងបញ្ជូនអាកាសយានិកទៅដោតទង់ជាតិនៅលើភពអង្គារ ។ ក្រៅពីនេះ លោកក៏បានស្នើឱ្យកាត់បន្ថយមន្ត្រីរដ្ឋាភិបាលអាមេរិកជាច្រើនរូប ។

ក្នុងពិធីប្រកាសឡើងកាន់តំណែងរបស់លោក Trump គេបានឃើញលោក Elon Musk ឈរសើចទះដៃនៅក្បែរកូនប្រុសរបស់លោក Trump ហើយលោកថែមទាំងលើកមេដៃគាំទ្រទៀតផង ខណៈលោក Trump ថ្លែងថា នឹងនាំអាមេរិកទៅកាន់ផ្ទៃមេឃដ៏ស្រស់ស្អាត ។

ប៉ុន្តែកាយវិការរបស់លោក Elon Musk នៅលើវេទិកាបានធ្វើឱ្យមហាជនជជែកគ្នាយ៉ាងច្រើនក្នុងបណ្តាញសង្គមថា លោកសប្បាយចិត្តខ្លាំងពេក រហូតដល់លើកដៃស្តាំឡើងលើ គឺដូចគ្នានឹងកាយវិការរបស់លោក Adolf Hitler មេដឹកនាំផ្តាច់ការប្រទេសអាល្លឺម៉ង់ ។ រីឯអ្នកលេងបណ្តាញសង្គមខ្លះទៀតថា លោកបង្ហាញពីការគាំទ្រគំនិតជាតិស្តាំនិយមយ៉ាងច្បាស់ ។

ប៉ុន្តែមនុស្សមួយចំនួនថា ពុំចាំបាច់គិតច្រើនទេ លោក Elon Musk គ្រាន់តែបង្ហាញកាយវិការរីករាយប៉ុណ្ណោះ ។ រីឯលោក Elon Musk ពុំបានយកចិត្តទុកដាក់នឹងការរិះគន់ទាំងនេះទេ ដោយលោកគ្រាន់តែនិយាយថា ការរិះគន់រឿងណាស៊ី គឺហួសសម័យហើយ ។

មនុស្សជាច្រើនគិតថា លោក Elon Musk មានភាពជិតស្និទ្ធជាមួយលោក Trump ហើយលោកនឹងទទួលបានផលប្រយោជន៍យ៉ាងច្រើនក្រោយពីលោក Trump ក្លាយជាប្រធានាធិបតីអាមេរិកនាពេលបច្ចុប្បន្ន ៕

បើទោះមានមតិជាច្រើនលើកឡើងខុសៗគ្នាពីឋាននរ.ក ប៉ុន្តែមនុស្សភាគច្រើនជឿថា ឋាននរ.ក ស្ថិតនៅក្រោមផ្ទៃផែនដី និងពោរពេញទៅដោយភ្លើងឆេះយ៉ាងសន្ធោសន្ធៅ ហើយពួកគេក៏រកឃើញផ្លូវសម្ងាត់ចុះទៅក្រោមដីផងដែរ ។ រីឯអ្នកវិទ្យាសាស្ត្រនិយាយថា ការលើកឡើងបែបនេះអាចជាការពិតខ្លះតាមផ្នែកវិទ្យាសាស្ត្រ ដែលកើតឡើងនៅតំបន់ជាច្រើនលើពិភពលោក ។

អ្នកវិទ្យាសាស្ត្រជឿថា មានកន្លែងចំនួន៥ នៅលើពិភពលោក ដែលអាចជាទ្វារទៅកាន់ឋាននរក ។ វាជាកន្លែងដែលផ្ទៃផែនដីហាក់បើកចំហឱ្យយើងឃើញអ្វីនៅផ្នែកខាងក្រោម និងជាទីកន្លែងពាក់ព័ន្ធនឹងពាក្យបណ្តាសា ដូចជា ៖

១-St Patrick’s Purgatory ប្រទេសអៀរឡង់ ៖ ស្ថិតនៅលើកោះ Station ភាគពាយ័ព្យប្រទេសអៀរឡង់ ដែលពលរដ្ឋអៀរឡង់បុរាណជឿថា គឺជារណ្តៅភ្លើងសម្រាប់អ្នកសាងបាបនឹងទទួលទុក្ខវេទនានៅទីនេះ ។ កាលពីសតវត្សរ៍ទី១២ អ្នកប្រវត្តិសាស្ត្រកត់ត្រាថា នៅលើកោះ Station មានរណ្តៅ៩ បើអ្នកណាម្នាក់ហ៊ានសម្រាកយប់ក្បែររណ្តៅទាំងនេះ បីសាចនឹងចាប់អ្នកនោះភ្លាម ។ រណ្តៅគួរឱ្យខ្លាចទាំងនេះត្រូវបានគេចាក់ដីលុបដើម្បីសាងសង់ព្រះវិហារនៅឆ្នាំ១៧៩០ ហើយមានវត្តមួយរហូតមកដល់បច្ចុប្បន្ន ។ វាជាកន្លែងពេញនិយមនៅអឺរ៉ុបសម្រាប់អ្នកស្វែងរកបុណ្យ និងចង់កត់ត្រារឿងរ៉ាវពាក់ព័ន្ធនឹងភ្លើង ។

២-Hekla ប្រទេសអៀរឡង់ ៖ ជាភ្នំភ្លើងកម្ពស់១,៤៩១ម៉ែត្រ គ្របដណ្តប់ដោយព្រិល ហើយមនុស្សគ្រប់គ្នាចាប់ផ្តើមខ្លាចភ្នំនេះ ក្រោយពីវាផ្ទុះខ្លាំងកាលពីឆ្នាំ១១០៤ ដែលបានបញ្ចេញថ្ម, ផេះភ្នំភ្លើង និងឧស្ម័នពុល ហើយគេដាក់ឈ្មោះភ្នំភ្លើងនេះថា «រណ្តៅផ្ទុះឋាននរក» ។ វាបានផ្ទុះម្តងទៀតនៅឆ្នាំ២០០០ ដេលបញ្ចេញផេះ និងភ្លើងឡើងលើមេឃ រហូតដល់១៥គីឡូម៉ែត្រ ។

៣-Hierapolis ប្រទេសតួកគី ៖ ទីក្រុងរ៉ូមបុរាណ ត្រូវបានសាងសង់ចាប់ឆ្នាំ១៤ ដល់ឆ្នាំ៣៧ មុនគ្រិស្តសករាជ ហើយគេជឿថា វាជាផ្លូវដើរសម្ងាត់ទៅកាន់ពិភពក្រោមដីដោយផ្ទាល់ ។ កាលពីឆ្នាំ២០១១ គេបានរកឃើញទ្វារតូចៗចូលទៅរូងថ្ម ខណៈអ្នកប្រាជបុរាណឈ្មោះ Strabo សរសេរថា សត្វផ្សេងៗនឹងងាប់ភ្លាមពេលចូលទ្វារនេះ ប៉ុន្តែអ្នកបួសអាចចូលបានដោយគ្មានគ្រោះថ្នាក់ ។ ផ្ទុយទៅវិញ អ្នកវិទ្យាសាស្ត្របញ្ជាក់ថា វាបណ្តាលមកពីកាបូនឌីអុកស៊ីតចេញពីប្រហោងភ្នំភ្លើងធ្វើឱ្យកើតឧស្ម័នពុល ទើបធ្វើឱ្យសត្វតូចៗងាប់ ។ រីឯអ្នកបួសមានកម្ពស់ខ្ពស់ជាងសត្វ ទើបពួកគេអាចដកដង្ហើមនៅផ្នែកខាងលើឧស្ម័នពុល ហើយគ្មានគ្រោះថ្នាក់ ។

៤-Gehenna ប្រទេសអ៊ីស្រាអែល ៖ ជាជ្រលងភ្នំជ្រៅនៅក្រៅរបងទីក្រុងចាស់យូរ៉ូសាឡឹម ហើយបើតាមព្រះគម្ពីបញ្ជាក់ថា ជនជាតិអ៊ីស្រាអែលបុរាណបានធ្វើពិធីបូជាយញ្ញក្មេងនៅទីនេះ ហើយត្រូវទេវតាដាក់បណ្តាសា ។ បច្ចុប្បន្ន គេជឿថា មនុស្សបាបនឹងត្រូវទម្លាក់ទៅក្នុងជ្រលងភ្នំ Gehenna ហើយគេនឹងពុំកប់សាកសពអ្នកនោះទេ ។

៥-Actun Tunichil Muknal ប្រទេសបេលីស ៖ គេបានរកឃើញល្អាងក្រោមដីមានប្រវែង៥គីឡូម៉ែត្រគួរឱ្យខ្លាចនេះ លើកដំបូងកាលពីឆ្នាំ១៩៨៩ ដែលពោរពេញដោយឆ្អឹងមនុស្ស ហើយអ្នកបុរាណវិទ្យាបានឃើញឆ្អឹងទារកអាយុត្រឹម៤ឆ្នាំ ដែលត្រូវគេវាយរហូតដល់ស្លាប់ ។ គេមានជំនឿថា វាជាល្អាងទៅកាន់ឋាននរករបស់ជនជាតិម៉ាយ៉ាន ព្រមទាំងជាកន្លែងរបស់ទេវតាគ្រប់គ្រងការស្លាប់ ក៏ដូចជាកន្លែងធ្វើពិធីសម្លាប់មនុស្ស ៕

មានធ្លាប់ឆ្ងល់អត់! ហេតុអ្វីប្រទេសថៃបើកឡានប្រើចង្កូតស្តាំ ហើយប្រកាន់ឆ្វេង ខណៈប្រទេសភាគច្រើនប្រមាណ ១៦៥ ផ្សេងទៀតក្នុងនោះក៏មានកម្ពុជាយើងដែរ ប្រើចង្កូតឆ្វេង ប្រកាន់ស្តាំទៅវិញ? ហេតុអ្វីបានជាដូច្នេះ ម្តេចមិនប្រើចង្កូតស្តាំ ឬចង្កូតឆ្វេងដូចគ្នាទាំងអស់ទៅ?

សម្រាប់មូលហេតុគឺដោយសារដំបូងឡើយ កាលពីសម័យបុរាណ មនុស្សទាំងអស់ជុំវិញពិភពលោកធ្វើដំណើរទៅមុខនៅខាងឆ្វេងដៃនោះទេ មានន័យថា ពួកគេប្រកាន់ឆ្វេង ដោយសារពេលនោះពួកគេជិះសេះ និងរទេះ ជាពិសេសក្នុងពេលមានសង្គ្រាម ពួកគេងាយស្រួលប្រើដៃស្តាំដើម្បីដកដាវចេញពីស្រោមប្រយុទ្ធជាមួយសត្រូវ។

ទោះជាយ៉ាងណាមកដល់ចុងស.វទី១៧ ចំណុចរបត់ដ៏សំខាន់មួយបានកើតឡើងក្នុងអំឡុងបដិវត្តន៍បារាំង នៅពេលស្តេច Napoleon Bonaparte ឡើងកាន់អំណាច ក៏បានកែទម្រង់ដើម ដោយតម្រូវឱ្យពលរដ្ឋទាំងអស់បើកបរប្រើចង្កូតឆ្វេង និងប្រកាន់ស្តាំវិញ ខណៈប្រទេសដែលស្ថិតក្រោមអាណានិគមបារាំងក៏បានអនុវត្តបែបនេះជារៀងរហូត។ ដូច្នេះមកដល់បច្ចុប្បន្នប្រទេសចំនួន ១៦៥ ក្នុងនោះក៏មានកម្ពុជា វៀតណាម និងឡាវផងដែរ សុទ្ធតែធ្លាប់ស្ថិតក្រោមអាណានិគមបារាំង ក៏បានបើកបរប្រើចង្កូតឆ្វេង និងប្រកាន់ស្តាំរហូតមកដល់ពេលនេះ។

ប៉ុន្តែសម្រាប់ប្រទេសដែលធ្លាប់ស្ថិតក្នុងអាណានិគមអង់គ្លេសវិញនៅតែបន្តបើកបរប្រើចង្កូតស្តាំ ហើយប្រកាន់ឆ្វេងដដែល។ នេះបើយោងតាមរបាយការណ៍ ប្រទេសដែលស្ថិតក្រោមអាណានិគមអង់គ្លេសមានប្រមាណ ៦៧ ប្រទេសសុទ្ធតែប្រើចង្កូតស្តាំ ហើយប្រកាន់ឆ្វេង។ ទោះជាយ៉ាងណាប្រទេសថៃមិនដែលស្ថិតក្នុងអាណានិគមប្រទេសណាមួយឡើយ ហេតុអ្វីប្រទេសនេះប្រើចង្កូតស្តាំ ប្រកាន់ឆ្វេងដូចអង់គ្លេសដែរ?

សម្រាប់ហេតុផលគឺដោយសារប្រទេសថៃបានទទួលឥទ្ធិពលវប្បធម៌ពីប្រទេសអង់គ្លេសជាយូរមកហើយ លើសពីនេះស្តេចថៃមានព្រះរាជបំណងធ្វើទំនើបកម្មប្រទេស។ ដូច្នេះក៏សម្រេចទិញរថយន្តដំបូង ពីប្រទេសអង់គ្លេស ហើយចាប់តាំងពីពេលនោះមក ប្រទេសថៃក៏បានប្រើយានយន្តចង្កូតស្តាំ ប្រកាន់ឆ្វេងដូចប្រទេសអង់គ្លេសដែរ៕

សហរដ្ឋអាមេរិក ៖ កាលពីថ្ងៃទី២០ ខែមករា ឆ្នាំ២០២៥ លោក Donald Trump បានឡើងកាន់តំណែងជាប្រធានាធិបតីអាមេរិក ទី៤៧ ជាផ្លូវការ ហើយលោកក៏បានចុះហត្ថលេខាលើបទបញ្ជាប្រតិបត្តិជាច្រើនច្បាប់ ដើម្បីផ្លាស់ប្តូរប្រទេសតាមការសន្យាររបស់លោកក្នុងពេលរកសំឡេងឆ្នោត ក្នុងនោះមានការលុបចោលការផ្តល់សញ្ជាតិអាមេរិកពីកំណើតផងដែរ ។

ការលុបចោលការផ្តល់សញ្ជាតិអាមេរិកពីកំណើត គឺអនុវត្តចំពោះទារកដែលកើតពីជនអន្តោប្រវេសន៍រស់នៅអាមេរិកខុសច្បាប់ ឬជនបរទេសរស់នៅអាមេរិកបណ្តោះអាសន្ន ដូចជា ៖ ការរស់នៅតាមរយៈទិដ្ឋាការ ។

កាលពីថ្ងៃទី២១ ខែមករា កន្លងមក រដ្ឋគាំទ្រគណបក្សប្រជាធិបតេយ្យ ចំនួន១៨ បានរួមគ្នាដាក់ពាក្យប្តឹងតវ៉ាទៅតុលាការកណ្តាលនៅរដ្ឋម៉ាសាឈូសេត ដើម្បីជំទាស់នឹងការលុបចោលការផ្តល់សញ្ញាតិអាមេរិកពីកំណត់របស់លោក Trump មុនពេលរដ្ឋាភិបាលអនុវត្ត ។ ពាក្យបណ្តឹងសរសេរថា ការលុបចោលនេះល្មើសនឹងរដ្ឋធម្មនុញ្ញអាមេរិកដែលបញ្ជាក់ថា អ្នកណាក៏ដោយដែលកើតលើទឹកដីអាមេរិក នឹងទទួលបានសញ្ជាតិអាមេរិកដោយស្វ័យប្រវត្តិ ។

ទោះជាប្រធានាធិបតីមានសិទ្ធិអំណាចទូលំទូលាយក្នុងការកំណត់គោលនយោបាយជនអន្តោប្រវេសន៍ក្តី ប៉ុន្តែការលុបចោលការផ្តល់សញ្ជាតិនេះ គឺហួសពីអំណាចតាមច្បាប់របស់ប្រធានាធិបតី ។ ការលុបចោលសិទ្ធិផ្តល់សញ្ជាតិពុំងាយស្រួលទេ ពីព្រោះវាជាសិទ្ធិដែលបញ្ជាក់ក្នុងរដ្ឋធម្មនុញ្ញយ៉ាងច្បាស់លាស់ ហើយតុលាការកំពូលអាមេរិកធ្លាប់ចេញសាលក្រមការពារសិទ្ធិនេះ ចំនួន២លើក ។ នេះបើតាមការបញ្ជាក់ក្នុងពាក្យបណ្តឹង ។

កន្លងមក លោក Trump ធ្លាប់និយាយអំពីសិទ្ធិតាមរដ្ឋធម្មនុញ្ញនេះ ដែលអាមេរិកអនុវត្តអស់រយៈពេល១៥០ឆ្នាំ កំណត់ថា ទារកណាកើតនៅអាមេរិកនឹងទទួលបានសញ្ជាតិអាមេរិកពីកំណើត គឺលោកថា វាគួរឱ្យអស់សំណើច លោកនឹងលុបចោលសិទ្ធិនេះពេលថ្ងៃកាន់តំណែងដំបូង ។

គួរបញ្ជាក់ថា លោក Trump បានកំណត់គោលដៅយ៉ាងច្បាស់លាស់ ដូចជា ៖ ការបណ្តេញជនអន្តោប្រវេសន៍ខុសច្បាប់ពីអាមេរិក, ច្បាប់ពាក់ព័ន្ធនឹងអាកាសធាតុ, គោលនយោបាយភាពចម្រុះ និងបង្ហាញឯកសារសម្ងាត់ជាច្រើន ។ ហេតុនេះ លោកបានចុះហត្ថលេខាលើបទបញ្ជាប្រតិបត្តិជាច្រើនច្បាប់ពេលកាន់តំណែង ប៉ុន្តែប្រធានាធិបតីអាណត្តិក្រោយទៀតអាចលុបចោលបទបញ្ជាប្រតិបត្តិទាំងនេះ ឬតុលាការអាចចេញដីកាលុបចោលបាន ៕