សហរដ្ឋអាមេរិក ៖ ក្នុងពេលសុន្ទរកថាកាលពីថ្ងៃទី១៩ ខែមករា ឆ្នាំ២០២៥ នៅពហុកីឡដ្ឋាន Capital One Arena ទីក្រុងវ៉ាស៊ីនតោន ប្រធានាធិបតីអាមេរិកថ្មី លោក Donald Trump ថ្លែងថា លោកនឹងដាក់កំហឹតយ៉ាងតឹងរ៉ឹងលើជនអន្តោប្រវេសន៍ខុសច្បាប់ចាប់ពីថ្ងៃឡើងកាន់តំណែងដំបូង ហើយលោកសន្យាថា នឹងធ្វើតាមការសន្យាក្នុងពេលរកសំឡេងឆ្នោត ។

ការថ្លែងសន្ទរកថាក្រោមឈ្មោះ «Make America Great Again Victory Rally» លោក Trump ថ្លែងថា ពេលព្រះអាទិត្យលិចនៅថ្ងៃស្អែក (ថ្ងៃទី២០ ខែមករា) ការឈ្លានពេលប្រទេសយើងនឹងបញ្ឈប់ ហើយយើងនឹងចាប់ផ្តើមបណ្តេញជនអន្តោប្រវេសន៍រាប់ពាន់នាក់ចេញពីអាមេរិក ។ ទោះយ៉ាងណា យើងនឹងចំណាយពេលច្រើនឆ្នាំ និងចំណាយប្រាក់យ៉ាងច្រើនមហាសាល ។ វាជាការផ្លាស់ប្តូរនយោបាយដ៏ធំបំផុតក្នុងប្រវត្តិសាស្ត្រអាមេរិក ហើយកាលពី៧៥ថ្ងៃមុន យើងសម្រេចបាននូវជ័យជម្នះនយោបាយដ៏អស្ចារ្យបំផុត ។ ចាប់ថ្ងៃស្អែកតទៅ (ថ្ងៃទី២០ ខែមករា) ខ្ញុំនឹងរឹតបន្តឹងយ៉ាងឆាប់រហ័ស និងដោះស្រាយវិបត្តិផ្សេងៗដែលប្រទេសយើងប្រឈម ។

នេះជាការថ្លែងសុន្ទរកថាលើកដំបូងរបស់លោក Trump នៅទីក្រុងវ៉ាស៊ីនតោន តាំងពីលោកថ្លែងលើកចុងក្រោយកាលពីថ្ងៃទី៦ ខែមករា ឆ្នាំ២០២១ មុនពេលក្រុមអ្នកគាំទ្រលោក វាយលុកអគាររដ្ឋសភាអាមេរិក ។ លោកថ្លែងថា លោកនឹងលើកលែងទោសឱ្យមនុស្សជាង១,៥០០នាក់ ដែលត្រូវបានតុលាការកាត់ទោស និងចោទប្រកាន់ពីការវាយលុកអគាររដ្ឋសភាពេលនោះ ។

ផែនការរបស់លោក Trump នឹងធ្វើឱ្យជនអន្តោប្រវេសន៍ជាច្រើននាក់ត្រូវបានបណ្តេញចេញពីទឹកដីអាមេរិក ព្រមទាំងបណ្តេញជនអន្តោប្រវេសន៍ដែលគោរពច្បាប់ និងរស់នៅអាមេរិករយៈពេលយូរឆ្នាំ ជាមួយស្វាមី ឬភរិយា និងកូនដែលទទួលបានសញ្ជាតិអាមេរិក ។

ក្រៅពីនេះ លោក Trump បញ្ជាក់ថា លោកនឹងបង្ហាញឯកសារសម្ងាត់ពាក់ព័ន្ធនឹងការសម្លាប់ប្រធានាធិបតីអាមេរិក លោក John F. Kennedy កាលពីឆ្នាំ១៩៦៣ និងបងប្រុសឈ្មោះ Robert F. Kennedy ព្រមទាំងការសម្លាប់មេដឹកនាំសិទ្ធិមនុស្ស លោក Martin Luther King Jr. កាលពីឆ្នាំ១៩៦៨ ៕

សហរដ្ឋអាមេរិក៖ ក្នុងរយៈពេល ៥ ឆ្នាំកន្លងមកនេះ នាយកប្រតិបត្តិ Meta លោក Mark Zuckerberg បានចំណាយប្រាក់ជាង ៦០ ពាន់លានដុល្លារលើបច្ចេកវិទ្យា VR/AR ដែលជាបច្ចេកវិទ្យាការពិតនិម្មិត ដោយបច្ចុប្បន្នមិនទាន់សម្រេចបានជោគជ័យនោះទេ។

VR/AR គឺជាបច្ចេកវិទ្យាការពិតនិម្មិត ត្រូវបានគេផលិតជាវ៉ែនតា 3D ខណៈវ៉ែនតារបស់ Mark Zuckerberg ដែលមានឈ្មោះថា Meta Quest 3 គឺមិនទទួលបានផលចំណេញឡើយ។

បច្ចេកវិទ្យាមួយនេះក៏ធ្វើឱ្យក្រុមហ៊ុនធំៗមួយចំនួនដូចជា Apple, Microsoft, Google និង Sony ដែលបានវិនិយោគប្រាក់យ៉ាងច្រើនក្នុងរយៈពេលប៉ុន្មានឆ្នាំកន្លងមកនេះ ក៏ទទួលបានការខាតបង់ប្រាក់ផងដែរ។ ដូច្នេះមកទល់ពេលនេះមិនទាន់មានក្រុមហ៊ុនណាទទួលបានភាពជោគជ័យលើបច្ចេកវិទ្យាមួយនេះទេ។

ជាក់ស្តែងដូចវ៉ែនតា Apple Vision Pro និង Snap’s Spectacles អ៊ីចឹងឧបករណ៍ទាំងពីរនេះលក់បានតិចតួចណាស់ ហើយក៏ត្រូវបានគេបំភ្លេចចោលយ៉ាងឆាប់រហ័សទៀតផង។ យោងតាមកំណត់ត្រាហិរញ្ញវត្ថុរបស់ក្រុមហ៊ុន Meta ក្រុមហ៊ុនបានខាតបង់ច្រើនជាង ៦០ ពាន់លានដុល្លារដោយសារតែបច្ចេកវិទ្យាការពិតនិម្មិតក្នុងរយៈពេល ៥ ឆ្នាំចុងក្រោយនេះ។

នេះបញ្ជាក់ថា បច្ចេកវិទ្យាមួយនេះគឺនៅឆ្ងាយពីការរំពឹងទុករបស់លោក Zuckerberg ខ្លាំងណាស់។ ទោះជាយ៉ាងណានៅក្នុងសេចក្តីថ្លែងការណ៍ជាសាធារណៈម្ចាស់ Facebook និង Instagram រូបនេះបានជូនដំណឹងដល់អ្នកវិនិយោគថា ទោះបីមិនទាន់ទទួលបានភាពជោគជ័យក៏ដោយ ក៏លោកនៅតែបន្តអនុវត្តបច្ចេកវិទ្យា VR និង AR ដោយសង្ឃឹមថានឹងទទួលបានភាពជោគជ័យនាពេលអនាគត៕

តៃវ៉ាន់ ៖ សារព័ត៌មាន Reuters រាយការណ៍ថា កាលពីពាក់កណ្តាលអធ្រាត្រថ្ងៃទី២០ ខែមករា ឆ្នាំ២០២៥ មានគ្រោះរញ្ជួយដីកម្រិត៦.៤រិចទ័រ ស្មើជម្រៅជាង៩គីឡូម៉ែត្រ ដែលមានចំណុចកណ្តាលនៅទីក្រុងតាពូ តំបន់ចៀអ៊ី ស្ថិតនៅភាគខាងត្បូងតៃវ៉ាន់ ។ ជំហ៊ានដំបូង អាជ្ញាធរបានរកឃើញពលរដ្ឋរងរបួសយ៉ាងហោចណាស់ ២៧នាក់ ។

កម្លាំងរំញ័រដោយសារគ្រោះរញ្ជួយដីបានធ្វើឱ្យផ្ទះសម្បែងពលរដ្ឋជាច្រើនខ្នងខូចខាត ខណៈអគារខ្ពស់ៗជាច្រើនកន្លែងនៅទីក្រុងតៃប៉ិ ដែលស្ថិតនៅចម្ងាយជាង៣០០គីឡូម៉ែត្រពីទីតាំងរញ្ជួយដី បានរង្គើ ។ ភ្នាក់ងារសង្គ្រោះបន្ទាន់ប្រចាំនៅតំបន់ណាស៊ី ស្ថិតនៅក្បែរទីតាំងរញ្ជួយដី ឱ្យដឹងថា គ្មានការជូនដំណឹងពីការខូចខាតធ្ងន់ធ្ងរទេ ប៉ុន្តែមនុស្ស៣នាក់ ជាប់នៅក្រោមអគារបាក់បែកមួយកន្លែងក្នុងទីក្រុងថៃណាន ។

TSMC គឺជាក្រុមហ៊ុនផលិតបន្ទះឈីបកុំព្យូទ័រដ៏ល្បីល្បាញបញ្ជាក់ថា ក្រុមហ៊ុនបានបញ្ជាឱ្យជម្លៀសបុគ្គលិកចេញពីរោងចក្រនៅតំបន់កណ្តាល និងភាគខាងត្បូងតៃវ៉ាន់រួចរាល់ហើយ ។

តៃវ៉ាន់បានកើតគ្រោះរញ្ជួយដីជាញឹកញាប់ ហើយគ្រោះរញ្ជួយដីដ៏ខ្លាំងក្លាលើកចុងក្រោយរបស់តៃវ៉ាន់ គឺកើតឡើងកាលពីខែមេសា ឆ្នាំ២០២៤ ក្នុងកម្រិត៧.២រិចទ័រ នៅទីក្រុងឆ្នេរសមុទ្រភាគខាងកើតឈ្មោះ វ៉ាលៀន ដែលបណ្តាលឱ្យមនុស្សស្លាប់ចំនួន១៣នាក់ ។ រីឯគ្រោះរញ្ជួយដីនៅភាគខាងត្បូងតៃវ៉ាន់ កាលពីឆ្នាំ២០១៦ មានមនុស្សស្លាប់ជាង១០០នាក់ ។

លើសពីនេះ កាលពីឆ្នាំ១៩៩៩ តៃវ៉ាន់បានកើតគ្រោះរញ្ជួយដីយ៉ាងធ្ងន់ធ្ងរ ស្មើនឹងកម្រិត៧.៣រិចទ័រ ដែលបណ្តាលឱ្យមនុស្សស្លាប់ជាង២,០០០នាក់ ។ ចាប់ពីពេលនោះមក តៃវ៉ាន់បានកែសម្រួលច្បាប់សាងសង់ឡើងវិញដើម្បីឱ្យផ្ទះសម្បែង និងអគារសាងសង់ថ្មីរឹងមាំអាចទប់ស្កាត់គ្រោះរញ្ជួយដីយ៉ាងមានប្រសិទ្ធភាព ៕

ប្រទេសថៃ ៖ សារព័ត៌មានថៃរាយការណ៍ថា លោក ថាក់ស៊ីន ស៊ីណាវ៉ាត់ត្រា អតីតនាយករដ្ឋមន្ត្រីថៃ និងឪពុករបស់នាយករដ្ឋមន្ត្រីថៃ លោកស្រី ផេថងថាន ស៊ីណាវ៉ាត់ បានលើកឡើងពីវិធានការបង្ក្រា.ប ក្រុមបោកប្រាស់តាមអនឡាញនៅឆ្នាំ២០២៥ ក្រោយពីនាយករដ្ឋមន្ត្រីថៃត្រូវបានជនខិលខូចប្រើប្រាស់បច្ចេកវិទ្យា AI បន្លំជាសំឡេងប្រធានាធិបតីអាមេរិក លោក Donald Trump ។

កាលពីថ្ងៃទី១៨ ខែមករា ឆ្នាំ២០២៥ ក្នុងពេលជួយរដ្ឋបាលខេត្តនគរភ្នំមកពីគណបក្សភឿថៃ រកសំឡេងគាំទ្រពីពលរដ្ឋ លោក ថាក់ស៊ីន និយាយថា លោកស្រី ផេថងថាន នាយករដ្ឋមន្ត្រីថៃ ត្រូវបានជនខិលខូចប្រើប្រាស់ AI បន្លំជាសំឡេងលោក Trump ប្រធានាធិបតីអាមេរិក ដោយទូរស័ព្ទឱ្យលោកស្រីផ្ទេរប្រាក់ទៅទីក្រុងហុងកុង ។

កន្លងមក ក្រុមជនខិលខូចបានប្រើប្រាស់គ្រប់មធ្យោបាយដើម្បីឱ្យពលរដ្ឋថៃផ្ទេរប្រាក់ឱ្យ ដែលពួកគេបង្កើតទីតាំងនៅប្រទេសជិតខាងរបស់ថៃ ដូចជា ៖ មីយ៉ាន់ម៉ា និងកម្ពុជា ។ កម្ពុជាសហការបានយ៉ាងល្អជាមួយថៃក្នុងការបង្ក្រាបជនខិលខូច ហើយការបោកប្រាស់តាមអនឡាញកំពុងធ្លាក់ចុះនៅកម្ពុជា ។ រីឯមីយ៉ាន់ម៉ានឹងចាត់វិធានការបង្ក្រាបជនខិលខូចតាមអនឡាញ ខណៈថៃក៏ចាត់វិធានការបង្ក្រាបជនខិលខូចឱ្យអស់នៅត្រឹមឆ្នាំ២០២៥ ដើម្បីកុំឱ្យពលរដ្ឋចាញ់បោកបន្តទៀត ។

លោកស្រី ផេថងថាន ក៏បានផ្តល់សម្ភាសន៍ជាមួយប្រព័ន្ធផ្សព្វផ្សាយផងដែរថា ជនខិលខូចបានផ្ញើសារជាសំឡេងលោក Trump ដើម្បីឱ្យលោកស្រីជួយបរិច្ចាគប្រាក់មួយចំនួន ប៉ុន្តែដោយសារមានការសង្ស័យ ទើបលោកស្រីពុំបានផ្ទេរប្រាក់ឱ្យពួកគេ ។

សមត្ថកិច្ចស៊ើបអង្កេតផ្នែកឧក្រិដ្ឋកម្មបច្ចេកវិទ្យាបញ្ជាក់ថា ជនខិលខូចបានប្រើប្រាស់បច្ចេកវិទ្យា AI បន្លំជាសំឡេងរបស់បុគ្គលល្បីៗដូចបេះបិទ តាមរយៈការដោនឡូត App សម្ងាត់ ពីព្រោះសំឡេងបុគ្គលល្បីត្រូវបានថតទុកក្នុងពេលផ្តល់សម្ភាសន៍ជាមួយប្រព័ន្ធផ្សព្វផ្សាយ និង YouTube ។ បន្ទាប់មក ជនខិលខូលក៏វាយអក្សរដើម្បីឱ្យ AI និយាយតាមជាសំឡេងរបស់បុគ្គលនោះ ខណៈ App ទាំងនេះពុំអនុញ្ញាតឱ្យដោនឡូតជាសាធារណៈទេ ។

លើសពីនេះ ជនខិលខូចបានផ្ញើ Link ផ្សេងៗមកកាន់ជនរងគ្រោះដើម្បីដឹងព័ត៌មានផ្ទាល់ខ្លួន និងដឹងថា ជនរងគ្រោះជិតស្និទ្ធជាមួយអ្នកណាខ្លះ ។ បន្ទាប់មក ពួកគេក៏ទាក់ទងឱ្យមនុស្សជិតស្និទ្ធជាមួយជនរងគ្រោះផ្ញើប្រាក់ទៅឱ្យ ឬពួកគេងាយស្រួលផ្ទេរប្រាក់ចេញពីគណនីធនាគារក្រោយការចុច Link ៕

ប្រទេសចិន៖ ថ្មីៗនេះក្រសួងធនធានធម្មជាតិរបស់ប្រទេសចិនបានប្រកាសពីការរកឃើញអណ្តូងរ៉ែមាសសំខាន់ៗនៅក្នុងតំបន់ជាច្រើន ដែលមានធនធានមាសរហូតដល់ ១៦៨ តោន។
យោងតាមការចុះផ្សាយរបស់ Global Times តំបន់ដែលរកឃើញរ៉ែមាសរួមមាន ខេត្ត Gansu តំបន់ភាគពាយ័ព្យ តំបន់ស្វយ័តម៉ុងហ្គោលី និងខេត្ត Heilongjiang ភាគឦសានប្រទេសចិន។ ក្នុងចំណោមនោះខេត្ត Gansu បានរកឃើញរ៉ែមាសដែលមានទុនបម្រុងរហូតដល់ ១០២,៤ តោន ត្រូវបានចាត់ទុកថាជារ៉ែមាសដ៏ធំបំផុត។ រីឯរ៉ែមាសនៅម៉ុងហ្គោលីមានទុនបម្រុង ៤១.៣ តោន និង Heilongjiang មាន ២៤.៣ តោន។

ក្នុងការស្វែងរកនេះ ប្រទេសចិនបានផ្តោតលើការរុករករ៉ែមាសនៅក្នុងតំបន់រុករករ៉ែសំខាន់ៗ និងមូលដ្ឋានធនធានមាសធំៗចំនួន ២៤ នៅទូទាំងប្រទេស។ តាមរយៈការរួមបញ្ចូលគ្នានៃការប្រើប្រាស់បច្ចេកទេសរុករកកម្រិតខ្ពស់នៃគំរូទស្សន៍ទាយការជីកយករ៉ែ រួមទាំងទិន្នន័យធំ គំរូធំ និងការគណនាខ្ពស់ ប្រទេសនេះបានកំណត់តំបន់គោលដៅចំនួន ៤៧ ដោយមាន ៣៥ សំណើដែលបានដាក់ស្នើ ជួយពង្រីកវិសាលភាពនៃការស្វែងរកមាស។

ក្នុងរយៈពេលប៉ុន្មានឆ្នាំកន្លងមកនេះ ប្រទេសចិនបានប្រកាសពីការរកឃើញសំខាន់ៗជាបន្តបន្ទាប់នៅក្នុងសកម្មភាពរុករករ៉ែមាស។ នៅខែវិច្ឆិកា ឆ្នាំ ២០២៤ វិទ្យាស្ថានភូគព្ភសាស្ត្រខេត្ត Hunan បានប្រកាសពីរបកគំហើញដ៏សំខាន់មួយក្នុងការរុករករ៉ែមាសនៅស្រុក Binh Giang ជាមួយនឹងការរកឃើញសរសៃរ៉ែមាសជាង ៤០ ដែលមានទុនបំរុងជាង ៣០០ តោននៅក្នុងតំបន់ស្នូលនៅជម្រៅ ២,០០០ ម៉ែត្រនៅ Van អណ្តូងរ៉ែមាស។

នេះគឺជាអណ្តូងរ៉ែមាសខ្នាតធំមួយ ដែលមានជម្រៅ ៣,០០០ ម៉ែត្រ ដោយមានទុនបំរុងប៉ាន់ស្មានជាង ១,០០០ តោន ដែលមានតម្លៃ ៦០០ ពាន់លានយន់ (ជិត ៨៣ ពាន់លានដុល្លារអាមេរិក) ប្រសិនបើគណនាតាមតម្លៃមាសបច្ចុប្បន្ន។ ដូច្នេះការរកឃើញធនធានរ៉ែបានជួយប្រទេសចិនបង្កើនទុនបម្រុងមាស tantalum កម្រ និង zircon បន្ថែមទៀត។

គួរបញ្ជាក់ដែរថា ទុនបម្រុងមាសជាតិបានដើរតួនាទីយ៉ាងសំខាន់ក្នុងការគ្រប់គ្រងវិបត្តិសេដ្ឋកិច្ច ប្រយុទ្ធប្រឆាំងនឹងអតិផរណា ស្ថេរភាពអត្រាប្តូរប្រាក់ និងគាំទ្រដល់ប្រព័ន្ធទូទាត់។ បច្ចុប្បន្នទុនបម្រុងមាសបានកើនឡើងជាង ១,២០០ តោនហើយ ដែលស្មើនឹងការរកឃើញអណ្តូងរ៉ែមាសធំៗចំនួន ៦០។ នេះបើយោងតាម Trading Economics ដែលជាទីភ្នាក់ងារទិន្នន័យសេដ្ឋកិច្ចពិភពលោក ក្នុងឆ្នាំ ២០២៤ ទុនបំរុងមាសរបស់ប្រទេសចិនបានជាប់ចំណាត់ថ្នាក់លេខ ៦ នៅលើពិភពលោកដែលមានមាសរហូតដល់ ២,២៦៤ តោន៕

អ្នកជំនាញផ្នែកចាប់ថ្នាក់មនុស្សប្រុសផិតក្ប.ត់ នៅរដ្ឋកាលីហ្វ័រញ៉ា សហរដ្ឋអាមេរិក បានចំណាយពេលអស់៣ឆ្នាំ ដើម្បីតាមដាន Profile បណ្តាញសង្គមរបស់មនុស្សប្រុសជាង៥,០០០នាក់ ហើយលទ្ធផលតាមដានបង្ហាញថា មនុស្សប្រុសធ្វើការ៤អាជីពនេះ ភាគច្រើនពុំស្មោះត្រង់ជាមួយគូស្នេហ៍ ។

កាលពីថ្ងៃទី១៩ ខែមករា ឆ្នាំ២០២៥ គេហទំព័របរទេសបានបង្ហាញលទ្ធផលការតាមដានចរឹតមនុស្សប្រុសរបស់អ្នកនាង Madeleine Smith អាយុ៣២ឆ្នាំ គឺជាអ្នកជំនាញចាប់ថ្នាក់មនុស្សផិតក្ប.ត់ ឬជំនាញការសាកល្បងភាពស្មោះត្រង់របស់បុរសជាមួយគូស្នេហ៍ ។ នាងរស់នៅទីក្រុងឡូសអេនជឺឡេស រដ្ឋកាលីហ្វ័រញ៉ា សហរដ្ឋអាមេរិក និងមានអ្នកតាមដានក្នុង TikTok រហូតដល់២លាននាក់ ។

អ្នកនាង Madeleine បញ្ជាក់ថា ខ្ញុំគ្រាន់តែមើល Profile របស់មនុស្សប្រុសមួយចំនួន គឺខ្ញុំដឹងភ្លាមថា តើម្ចាស់ Profile ជាមនុស្សបោកប្រាស់មនុស្សស្រីឬក៏អត់ ។ អ្នកនាងបើកការពិគ្រោះយោបល់សម្រាប់ស្ត្រីទាំងឡាយណាដែលសង្ស័យពីភាពស្មោះត្រង់គូស្នេហ៍របស់ខ្លួន គឺត្រូវបង់ប្រាក់ចំនួន៦៥ដុល្លារអាមេរិក សម្រាប់ការពិគ្រោះយោបល់ក្នុង១លើក ។

រយៈពេល៣ឆ្នាំមកនេះ អ្នកនាងបានតាមដានចរឹតមនុស្សប្រុសក្នុងបណ្តាញសង្គម ស្មើជាង៥,០០០នាក់ ហើយរកឃើញការក្បត់ចិត្តគូស្នេហ៍ជាច្រើនលើក ។ អ្នកនាងក៏បានចាត់ចំណាត់ថ្នាក់អាជីពរបស់មនុស្សប្រុសដែលក្បត់ចិត្តច្រើនបំផុត រួមមាន ៖

១-សមត្ថកិច្ច និងការងារផ្នែកសេវាកម្ម ៖ មនុស្សប្រុសធ្វើការជាសមត្ថកិច្ច និងការងារសេវាកម្ម តែងតែរកឱកាសក្បត់ចិត្តគូស្នេហ៍ច្រើនបំផុត ។ ក្រៅពីនេះ ក៏មានភ្នាក់ងារពន្លត់ភ្លើង, ភ្នាក់ងារសង្គ្រោះបន្ទាន់ និងកងទ័ព ក៏ជាមនុស្សពុំស្មោះត្រង់ដែរ ។

២-អ្នកចូលចិត្តហាត់ប្រាណ
៣-អ្នកជំនួញ និងភ្នាក់ងារលក់
៤-មេធាវី ។

ចំណែកអាជីពដែលក្បត់ចិត្តគូស្នេហ៍តិចបំផុត គឺគ្រូពេទ្យ ដោយសារគ្រូពេទ្យមានការងារជាច្រើនដែលត្រូវបំពេញ ប៉ុន្តែបើគ្រូពេទ្យក្បត់ចិត្តវិញ គឺពួកគេតែងតែលួចទាក់ទងជាមួយគ្រូពេទ្យធ្វើការនៅមន្ទីរពេទ្យជាមួយគ្នា ។

ការក្បត់ចិត្តភាគច្រើនរបស់មនុស្សប្រុស គឺកើតឡើងដោយសារខ្វះភាពអត់ធ្មត់ ឬពុំចេះដោះស្រាយបញ្ហារបស់ខ្លួន ។ ទោះយ៉ាងណា វាគ្រាន់តែជាការអះអាងរបស់អ្នកជំនាញផ្នែកចាប់ថ្នាក់មនុស្សប្រុសផិតក្ប.ត់ នៅរដ្ឋកាលីហ្វ័រញ៉ា ប៉ុណ្ណោះ ៕