ប្រទេសថៃ ៖ ស្ត្រីភ្ញៀវទេសចរកាណាដាម្នាក់ត្រូវបានប្រទះឃើញស្លា.ប់ នៅលើឆ្នេរសមុទ្រកាតា ខេត្តភូកេត ប្រទេសថៃ កាលពីថ្ងៃទី៦ ខែមីនា ឆ្នាំ២០២៥ ហើយគ្រូពេទ្យសន្និដ្ឋានថា ដោយសារខេត្តភូកេត មានអាកាសធាតុក្តៅខ្លាំងពេក ទើបធ្វើឱ្យភ្ញៀវទេសចរដាច់សរសៃឈាមខួរក្បាលស្លា.ប់ ភ្លាមៗ (Heat Stroke) ។ ហេតុនេះ សូមភ្ញៀវទេសចរ និងពលរដ្ឋថៃថែទាំសុខភាព កុំនៅក្រោមកំដៅថ្ងៃយូរ ជាពិសេស ចាប់ពីម៉ោង១០ព្រឹក ដល់ម៉ោង៤ល្ងាច ។

អ្នកប្រទះឃើញសាកសពភ្ញៀវទេសចរមុនគេប្រាប់ថា កាលពីវេលាម៉ោង១០និង៣០នាទី ខ្លួនបានឃើញភ្ញៀវទេសចរកាណាដាដេកហាលថ្ងៃផ្គាប់មុខនៅលើឆ្នេរខ្សាច់ ប៉ុន្តែពេលដើរមកទីនេះម្តងទៀត នៅវេលាម៉ោង១និង៣០នាទី ស្រាប់តែឃើញភ្ញៀវទេសចរនៅតែដេកផ្គាប់មុខដដែល ។ ហេតុនេះ ខ្លួនក៏ផ្តល់ដំណឹងទៅសមត្ថកិច្ចឱ្យមកត្រួតពិនិត្យរាងកាយភ្ញៀវទេសចរ ។

បើតាមសមត្ថកិច្ច គឺគ្មានស្លាកស្នាមការធ្វើបាបរាងកាយទេ ប៉ុន្តែនៅជាប់ខ្លួនភ្ញៀវទេសចរ គឺមានប័ណ្ណរបស់សណ្ឋាគារ Kata Palm Resort នៅស្រុកកាតា ខេត្តស៊ីសាកេត ដែលជាកន្លែងសម្រាករបស់ភ្ញៀវទេសចរ ។ ភ្ញៀវទេសចរបានមកសម្រាកក្នុងសណ្ឋាគារតែម្នាក់ឯង តាំងពីថ្ងៃទី៣ ខែមីនា មកម៉្លេះ សមត្ថកិច្ចបានទាក់ទងទៅស្ថានទូតកាណាដារួចហើយ ដើម្បីផ្តល់ដំណឹងដល់ក្រុមគ្រួសារសាកសពឱ្យបានជ្រាប ។

ភ្ញៀវទេសចរកាណាដា អាយុ៨០ឆ្នាំ អាចស្លាប់ជាច្រើនម៉ោងមុនពេលប្រទះឃើញ ហើយគ្រូពេទ្យសន្និដ្ឋានថា មូលហេតុនៃការស្លាប់បណ្តាលមកពីភ្ញៀវទេសចរដាច់សរសៃឈាមខួរក្បាលភ្លាមៗ ដោយសារនៅខែមីនានេះ ខេត្តភូកេត មានអាកាសក្តៅខ្លាំង ។ ប៉ុន្តែគ្រូពេទ្យនឹងពិនិត្យរាងកាយសាកសពឱ្យលម្អិតបន្ថែមទៀត ។

ក្រោយហេតុការណ៍នេះ គ្រូពេទ្យបានដាស់តឿនទៅកាន់ពលរដ្ឋឱ្យប្រុងប្រយ័ត្នគ្រោះថ្នាក់សុខភាពដោយសារអាកាសធាតុក្តៅខ្លាំង ព្រោះប្រទេសថៃចូលដល់រដូវក្តៅ ធ្វើឱ្យសីតុណ្ហភាពកើនឡើងខ្ពស់ ទើបរាងកាយបាត់បង់ទឹក ។ បើរាងកាយពុំអាចបញ្ចេញកំដៅទាន់ពេលវេលាទេ គឺអាចបណ្តាលឱ្យដាច់សរសៃឈាមខួរក្បាលភ្លាមៗ និងស្លាប់ ។

ភ្ញៀវទេសចរ និងពលរដ្ឋថៃ គួរកុំនៅក្រោមកំដៅថ្ងៃយូរព ជាពិសេស ចាប់ពីម៉ោង១០ព្រឹក ដល់ម៉ោង៤ល្ងាច ។ ក្រៅពីនេះ ត្រូវផឹកទឹកឱ្យបានគ្រប់គ្រាន់ និងចៀសវាងផឹកស្រា ឬកាហ្វេ, កុំស្លៀកពាក់ក្រាស់ៗ និងពាក់មួក ឬកាន់ឆ័ត្រដើម្បីការពារកំដៅថ្ងៃ ។ បើងងឹតមុខ វិលមុខ បែកញើសច្រើន និងបេះដូងលោតញាប់ សូមប្រញាប់ទៅជ្រកក្រោមម្លប់ ផឹកទឹក ដើម្បីកាត់បន្ថយសីតុណ្ហភាពរាងកាយ ៕

ប្រទេសថៃ ៖ កាលពីថ្ងៃទី៧ ខែមីនា ឆ្នាំ២០២៥ សារព័ត៌មានថៃរាយការណ៍ថា ក្រុមហ៊ុនអាកាសចរណ៍ថៃហាមអ្នកដំណើរប្រើប្រាស់ និងសាកថ្ម Power Bank នៅលើយន្តហោះ ចាប់ពីថ្ងៃទី១៥ ខែមីនា ដើម្បីផ្តល់សុវត្ថិភាពដល់អ្នកដំណើរ ។ ការហាមឃាត់នេះ គឺក្រោយពីកើតហេតុការណ៍ភ្លើងឆេះយន្តហោះរបស់ក្រុមហ៊ុនអាកាសចរណ៍បរទេស ហើយសន្និដ្ឋានថា វាបណ្តាលមកពីការប្រើប្រាស់ Power Bank លើយន្តហោះ ។

ហេតុនេះ ទើបក្រុមហ៊ុនអាកាសចរណ៍ Thai Airways បានកំណត់វិធានការផ្តល់សុវត្ថិភាពពេលធ្វើដំណើរតាមយន្តហោះ ដោយពុំអនុញ្ញាតឱ្យអ្នកដំណើរប្រើប្រាស់ និងសាកថ្ម Power Bank លើយន្តហោះ ចាប់ពីថ្ងៃទី១៥ ខែមីនា តទៅ ។ ការកំណត់វិធានការ គឺដើម្បីផ្តល់សុវត្ថិភាពខ្ពស់ដល់អ្នកដំណើរគ្រប់រូប រួមទាំងបុគ្គលិកអាកាសចរណ៍ផងដែរ ហើយក្រុមហ៊ុនសំណូមពរឱ្យអ្នកដំណើរអនុវត្តតាមវិធានការនេះ ។

ក្នុងសេចក្តីប្រកាសរបស់ក្រុមហ៊ុន Thai Airways បញ្ជាក់ថា ដោយសារមានហេតុការណ៍ភ្លើងឆេះយន្តហោះរបស់ក្រុមហ៊ុនអាកាសចរណ៍បរទេស ហើយសន្និដ្ឋានថា គឺបណ្តាលមកពីការប្រើប្រាស់ Power Bank ពេលធ្វើដំណើរ ទើបក្រុមហ៊ុនហាមអ្នកដំណើរប្រើប្រាស់វា ។ អ្នកដំណើរអាចយកវាឡើងលើយន្តហោះបាន ប៉ុន្តែពុំអនុញ្ញាតឱ្យប្រើប្រាស់ពេលធ្វើដំណើរទេ ។

កន្លងមក ប្រទេសថៃធ្លាប់កើតហេតុការណ៍ផ្ទុះឆេះ Power Bank នៅលើយន្តហោះ១គ្រឿង ពេលចាកចេញពីអាកាសយានដ្ឋានដនមឿង ទីក្រុងបាងកក ទៅកាន់ខេត្តណាខនស្រ៊ីថាំម៉ារ៉ាជ ដែលបណ្តាលឱ្យចលាចលពេញយន្តហោះ ។ បន្ទាប់មក បុគ្គលិកអាកាសចរណ៍ក៏បានពន្លត់ភ្លើងវិញ ហើយអ្នកដំណើរទាំងអស់មានសុវត្ថិភាព ។

ដោយឡែក ក្រុមហ៊ុនអាកាសចរណ៍ជាច្រើនលើពិភពលោក ក៏បានហាមឃាត់អ្នកដំណើរប្រើប្រាស់ និងសាកថ្ម Power Bank លើយន្តហោះដែរ នាពេលកន្លងមក ដូចជា ៖ ក្រុមហ៊ុន Air Busan របស់កូរ៉េខាងត្បូង ពុំអនុញ្ញាតឱ្យអ្នកដំណើរទុក Power Bank នៅកន្លែងដាក់អីវ៉ាន់ផ្នែកខាងលើ ប៉ុន្តែអ្នកដំណើរអាចដាក់វាតាមខ្លួន ។ ក្រុមហ៊ុនបានហាមអ្នកដំណើរសាក Power Bank លើយន្តហោះ ដើម្បីកុំឱ្យ Power Bank ផ្ទុះឆេះ ។

បច្ចុប្បន្ន មនុស្សភាគច្រើនត្រូវការប្រើប្រាស់បណ្តាញសង្គមផ្សេងៗលើទូរស័ព្ទដៃរយៈពេលយូរ ជាពិសេស ក្នុងពេលធ្វើដំណើរផ្លូវឆ្ងាយ ប៉ុន្តែទូរស័ព្ទដៃរបស់ពួកគេឆាប់អស់ថ្ម ទើប Power Bank ក្លាយជាឧបករណ៍ប្រើប្រាស់ចាំបាច់សម្រាប់ដាក់តាមខ្លួន ៕

បឹង Hillier ដែលត្រូវបានស្គាល់ថាជាបឹងពណ៌ផ្កាឈូក គឺមានទីតាំងស្ថិតនៅចំកណ្តាលកោះ Recherche Archipelago នៃភាគខាងលិចប្រទេសអូស្ត្រាលី។ បឹងនេះត្រូវបានគេរកឃើញដំបូងក្នុងឆ្នាំ ១៨០២ ដោយអ្នករុករកជនជាតិអង់គ្លេស Matthew Flinders ដែលបឹងនេះគឺជាបឹងទឹកប្រៃមួយក្នុងចំណោមបឹងពណ៌ផ្កាឈូកទាំងប្រាំផ្សេងទៀតនៅរដ្ឋ Victoria របស់ប្រទេសអូស្ត្រាលី។

តាមពិតទៅបឹងពណ៌ផ្កាឈូកមិនមែនជាបឹងចម្លែកអ្វីនោះទេ ដោយសារវាមាននៅជុំវិញសកលលោកតែម្តង សូម្បីតែប្រទេសម៉ិចស៊ិក និងប្រទេសសេណេហ្កាល់ ក៏មានបឹងពណ៌ផ្កាឈូកផងដែរ។ ខណៈប្រទេសអូស្ត្រាលីមានបឹងនេះរហូតដល់ ៥ កន្លែងឯណោះរួមមាន៖ បឹង Crosbie, Becking, Hardy, Kenyon និងបឹង Hillier ដែលរំលេចនូវទស្សនីយភាពដ៏គួរឱ្យចាប់អារម្មណ៍បំផុត ប្រៀបបានដូចជាឋានសួគ៌ក្រៅភពអ៉ីចឹង។

ទោះជាយ៉ាងណាក្នុងចំណោមបឹងទឹកប្រៃពណ៌ផ្កាឈូកទាំងនោះ បឹង Hillier ហាក់លេចធ្លោជាងគេ ដោយសារវាមានភាពស្រស់ស្អាត និងទាក់ទាញ ជាពិសេសវាក៏ស្ថិតនៅជាប់មហាសមុទ្រប៉ាស៊ីហ្វិកទៀតផង។ ប្រសិនបើអ្នកទេសចរទស្សនាបឹងនេះពីលើអាកាស អ្នកនឹងឃើញពណ៌ផ្កាឈូកស្រាលនៃបឹង Hillier និងពណ៌ខៀវស្រទន់នៃមហាសមុទ្រ គឺមើលទៅពិតជាអស្ចារ្យខ្លាំងណាស់។

ជាមួយបណ្តោយប្រវែង ៦០០ ម៉ែត្រ និងទទឹងមិនលើសពី ២៥០ ម៉ែត្រ បឹង Hillier មានត្រីចម្រុះជាច្រើនប្រភេទ និងរុក្ខជាតិបៃតងអមជុំវិញយ៉ាងល្អឥតខ្ចោះ ប្រៀបដូចជាបឹងកែច្នៃ ឬកាត់តអ៉ីចឹង ប៉ុន្តែតាមពិតទៅវាជាបឹងកើតឡើងដោយធម្មជាតិនោះទេ។ ចំពោះមូលហេតុដែលបឹងនេះមានពណ៌ផ្កាឈូកគឺដោយសារវត្តមានសារ៉ាយម្យ៉ាងឈ្មោះថា Dunaliella salina ដែលសារ៉ាយនេះជាអ្នកផលិតពណ៌យ៉ាងច្រើននៅបាតទន្លេ ធ្វើឱ្យពណ៌ទឹកខុសប្រក្រតីខ្លាំង នេះបើយោងតាមការចុះផ្សាយរបស់គេហទំព័របរទេស Daily Mail៕

ប្រទេសចិន៖ នេះជាលើកទី ៣ ហើយដែលក្រុមហ៊ុនផលិតរថយន្តអគ្គិសនីចិន BYD បានឈ្នះពានរង្វាន់ដ៏កំពូលនៅប្រទេសជប៉ុនសម្រាប់ឆ្នាំ ២ ឆ្នាំជាប់ៗគ្នា។ មានន័យថាលើកទី ១ ផលិតផលរបស់ម៉ាកយីហោនេះ គឺមិនបានជាប់ចំណាត់ថ្នាក់ទេ ប៉ុន្តែនៅលើកទី ២ និងលើកទី ៣ វិញរថយន្តអគ្គិសនីរបស់ក្រុមហ៊ុន BYD បានឈ្នះពានរង្វាន់ប្រចាំឆ្នាំ ២០២៣ និង ២០២៤ នៅក្នុងប្រទេសជប៉ុន។

យោងតាមសារព័ត៌មានបរទេស CNC ដែលបានចុះផ្សាយកាលពីថ្ងទី៥ ខែមិនា ឆ្នាំ២០២៥ ថា BYD Seal បានឈរនៅចំណាត់ថ្នាក់លេខ ១ ជារថយន្តអគ្គិសនីល្អបំផុតនៅប្រទេសជប៉ុនក្នុងឆ្នាំ២០២៤ បន្ទាប់ពីម៉ូដែល Dolphin របស់ក្រុមហ៊ុនដែលបានផ្តល់កិត្តិយសក្នុងឆ្នាំ ២០២៣។ ជាមួយពិន្ទុ ១៩៥ ដែលបានយកឈ្នះម៉ូដែល Honda N-Van e: និង Hyundai loniq5N។

ដូច្នេះបច្ចុប្បន្នរថយន្ត BYD Seal ត្រូវបានគេចាត់ទុកថាជាម៉ូដែលល្អបំផុតទាំង ១០ របស់ប្រទេសជប៉ុន សម្រាប់ឆ្នាំ ២០២៤ និង ២០២៥។ យោងតាមលោក Liu Xueliang អ្នកគ្រប់គ្រងទូទៅនៃផ្នែកលក់ BYD អាស៊ីប៉ាស៊ីហ្វិក និងជាប្រធានក្រុមហ៊ុន BYD Japan បានឱ្យដឹងថា BYD Seal បាននាំចូលទៅក្នុងប្រទេសជប៉ុននៅឆ្នាំ ២០២៤ ដោយមានប្រព័ន្ធបើកបរ កង់ក្រោយ និងប្រភេទកង់បួន។ អ្នករៀបចំពានរង្វាន់ EVsmart និងសារធារណជនជាច្រើនបានសរសើររថយន្តនេះថា “ជាឧស្សាហកម្មសម្រាប់រចនាបថ ការរចនាដ៏ស្រស់ស្អាត និងដំណើរការដ៏ទូលំទូលាយ។

លើសពីនេះពួកគេក៏សរសើរថា BYD Seal មិនត្រឹមតែបង្ហាញពីដំណើរការល្អឥតខ្ចោះនៃរថយន្តអគ្គិសនីសុទ្ធប៉ុណ្ណោះទេ ប៉ុន្តែវាថែមទាំងកំណត់ស្តង់ដារឧស្សាហកម្មជាមួយនឹងបទពិសោធន៍បើកបរដែលមានគុណភាពខ្ពស់របស់វាទៀតផង”។ BYD Seal មានប្រវែង ៤,៨០០ mm, ទទឹង ១,៨៧៥ mm, កម្ពស់ ១,៤៦០ mm និងមាន wheelbase ២,៩២០ mm គឺជារថយន្តទ្វារបួន។ ការរចនាគឺផ្អែកលើប្រធានបទ “រូបរាងរលោងនៃសត្វសមុទ្រហែលទឹកដោយសេរី”។

ម៉ូដែលនេះត្រូវបានបំពាក់ដោយកញ្ចប់ថ្ម ៨២.៥៦ kWh BYD Blade ហើយកំណែដ្រាយកង់ ៤ អាចបង្កើនល្បឿនពី ០-១០០ គីឡូម៉ែត្រក្នុងមួយម៉ោងត្រឹមតែ ៣.៨ វិនាទី និង ៥.៩ វិនាទីសម្រាប់កំណែដ្រាយកង់ក្រោយ។ នៅឆ្នាំនេះក្រុមហ៊ុនក៏គ្រោងនឹងដាក់លក់រថយន្ត Plug-in Hybrid ដំបូងរបស់ខ្លួននៅក្នុងប្រទេសជប៉ុន ក៏ដូចជាម៉ូដែលថ្មីៗជាច្រើនទៀតរៀងរាល់ឆ្នាំនៅក្នុងប្រទេសជប៉ុនផងដែរ៕