ប្រទេសជប៉ុន ៖ អាងត្រី Aquarium នៅប្រទេសជប៉ុន បានចែករំលែករឿងរ៉ាវមួយគួរឱ្យចាប់អារម្មណ៍ក្នុងបណ្តាញសង្គម គឺអាងត្រីបានផ្អាកការចូលទស្សនាត្រីជាបណ្តោះអាសន្នដោយសារត្រូវជួសជុលកែលម្អ ហើយបុគ្គលិកសង្កេតឃើញថា ត្រីយក្សជាច្រើនក្បាលធ្វើខ្លួនប្លែកៗ អត់ព្រមស៊ីចំណី ។ ពីដំបូង បុគ្គលិកគិតថា ត្រីទាំងនេះមានជំងឺ ប៉ុន្តែការពិត ពួកវាពុំបានឈឺទេ ពួកវាឯកោព្រោះគ្មានមនុស្សទៅមើល ។

នេះពុំមែនជាការកំប្លែងទេ ប៉ុន្តែករណីនេះបានកើតឡើងពិតប្រាកដនៅប្រទេសជប៉ុន នៅពេលបុគ្គលិកអាងត្រី Aquarium សង្កេតឃើញត្រីយក្ស (Sunfish) ជាច្រើនក្បាលមានសភាពក្រៀមក្រំ និងឯកោ ។ បុគ្គលិកក៏ពុំដឹងថា តើគួរធ្វើដូចម្តេចដើម្បីឱ្យត្រីទាំងអស់រីករាយឡើងវិញ?

អាងត្រី Aquarium នេះឈ្មោះ «Kaikyokan» ស្ថិតនៅទីក្រុង Shimonoseki ភាគខាងត្បូងប្រទេសជប៉ុន ។ កាលពីខែធ្នូ ឆ្នាំ២០២៤ អាងត្រីបានបិទការចូលទស្សនាដើម្បីជួសជុលកែលម្អ ស្រាប់តែត្រីទាំងនេះក្រៀមក្រំ ដោយសារគ្មានមនុស្សចូលមើល ។ ពួកវាថែមទាំងឈប់ស៊ីចំណី ហើយចាប់ផ្តើមយកខ្លួនទៅត្រដុសជាមួយផ្ទាំងកញ្ចក់ចុះឡើង ទើបបុគ្គលិកគិតថា ពួកវាមានបញ្ហាពិបាករំលាយអាហារ ឬឆ្លងជំងឺ ។ ប៉ុន្តែការពិត ពុំមែនដូចការគិតទេ ។

បុគ្គលិកអាងត្រី បានសរសេរក្នុងបណ្តាញសង្គម X ថា ៖ «ពីដំបូង យើងពុំដឹងថា ពួកវាកើតអ្វីទេ ហើយនៅសុខៗ បុគ្គលិកម្នាក់និយាយថា ត្រីឯកោដោយសារអត់មានមនុស្សមកមើល ។ យើងគិតថា ពុំអាចទៅរួចទេ បន្ទាប់មក យើងសាកល្បងយករូបក្បាលមនុស្សមកបិទលើក្រដាស និងដាក់ឯកសណ្ឋានបុគ្គលិកនៅក្បែរផ្ទាំងកញ្ចក់ ដើម្បីឱ្យមើលទៅដូចមនុស្ស ។ ក្រោយធ្វើបែបនេះ ត្រីយក្សជាច្រើនក្បាលមានភាពស្រស់ថ្លាភ្លាម នាថ្ងៃបន្ទាប់» ។

មហាជនសួរថា តើខាងអាងត្រីដឹងដោយរបៀបណាថា ត្រីឯកោ? ខាងអាងត្រី និយាយថា តាមការសង្កេត គឺត្រី Sunfish តែងតែសម្លឹងទៅកាន់បរិវេណដែលមានរូបក្បាលមនុស្ស ហើយពួកវាក៏ហែលមកជិតទីនោះជាញឹកញាប់ ។ រីឯអាការៈឯកោ អត់ព្រមស៊ីចំណី ក៏លែងកើតឡើងទៀត ។

គួរបញ្ជាក់ថា មានវិធីជាច្រើនដើម្បីធ្វើឱ្យត្រីធំៗរីករាយ ។ ជាក់ស្តែង កាលពីឆ្នាំ២០២០ ជាពេលជំងឺកូវីដ-១៩ ឆ្លងរាតត្បាតលើពិភពលោក អាងទឹកមួយកន្លែងនៅទីក្រុងតូក្យូ បានស្នើឱ្យអ្នកស្ម័គ្រចិត្តជជែកជាមួយត្រីក្នុងអាង ចំនួន៣០០ក្បាល ដែលពួកវាខ្មាស់អៀនពេលគ្មានមនុស្សមកមើល ៕

ប្រទេសវៀតណាម ៖ វៀតណាមបានក្លាយជាគោលដៅលេចធ្លោជាងប្រទេសនានាក្នុងតំបន់អាស៊ាន ដោយសារក្រុមហ៊ុនជប៉ុនរហូតដល់ជាង៥០% ចង់មកវិនិយោគនៅវៀតណាម ។ កត្តាសំខាន់ដែលធ្វើឱ្យវិនិយោគិនបរទេសចាប់អារម្មណ៍វៀតណាមខ្លាំងជាងគេ គឺការចំណាយលើកម្លាំងពលកម្មទាប និងមានស្ថិរភាពនយោបាយ ។

លទ្ធផលស្ទង់មតិមួយចេញផ្សាយដោយអង្គការជំរុញពាណិជ្ជកម្មអន្តរជាតិរបស់ប្រទេសជប៉ុន កាលពីថ្ងៃទី២១ ខែមករា ឆ្នាំ២០២៥ បង្ហាញថា ក្រុមហ៊ុនជប៉ុនដែលប្រកបអាជីវកម្មនៅក្រៅប្រទេស ស្មើនឹង៥៦.១% មានគម្រោងបង្កើនការវិនិយោគនៅវៀតណាម ចាប់ពី១ឆ្នាំ ទៅ២ឆ្នាំខាងមុខ ។ ហេតុនេះ វៀតណាមស្ថិតនៅលំដាប់ទី១ ក្នុងតំបន់អាស៊ីអាគ្នេយ៍ ដែលក្រុមហ៊ុនជប៉ុនចង់វិនិយោគខ្លាំងបំផុត ។

អ្នកតំណាងជាន់ខ្ពស់របស់អង្គការជំរុញពាណិជ្ជកម្មអន្តរជាតិជប៉ុន នៅទីក្រុងហាណូយ និយាយថា ការនាំចេញ និងតម្រូវការក្នុងស្រុកកើនឡើង, ចំណុចមានប្រៀបរបស់វៀតណាម ផ្នែកចំណាយលើកម្លាំងពលកម្មទាប ព្រមទាំងមានស្ថិរភាពនយោបាយ និងសង្គម គឺជាកត្តាសំខាន់ជំរុញឱ្យក្រុមហ៊ុនជប៉ុនមកវិនិយោគនៅវៀតណាម ។ ក្រុមហ៊ុនជាច្រើនបានពិចារណាពង្រីកអាជីវកម្មដើម្បីទទួលបានផលប្រយោជន៍ពីឱកាសបង្កើនការលក់ និងប្រាក់ចំណេញ ខណៈក្រុមហ៊ុនផលិតផ្តោតលើការផលិតទំនិញជាច្រើនដែលមានតម្លៃខ្ពស់ ។

ទោះយ៉ាងណា ក្រុមហ៊ុនជប៉ុនបានលើកឡើងពីដែនកំណត់ និងហានិភ័យមួយចំនួនក្នុងការមកវិនិយោគនៅប្រទេសវៀតណាម ។ អ្នកឆ្លើយតបការស្ទង់មតិ ស្មើ៦២.៤% ជឿថា នីតិវិធីផ្តល់អាជ្ញាប័ណ្ណវិនិយោគមានភាពស្មុគស្មាញខ្លាំង ខណៈអ្នកឆ្លើយតប ស្មើ៥៧.៨% និយាយថា ច្បាប់វៀតណាមពុំទាន់ពេញលេញ និងខ្វះតម្លាភាព ។ ក្រៅពីនេះ ក្រុមហ៊ុនក្នុងស្រុកពុំអាចអនុវត្តតាមវិធានការកំណត់ផ្នែកគុណភាព និងបច្ចេកវិទ្យា ព្រមទាំងខ្វះខាតក្រុមហ៊ុនផ្គត់ផ្គង់វត្ថុធាតុដើម ។

អ្នកតំណាងជាន់ខ្ពស់របស់អង្គការជំរុញពាណិជ្ជកម្មអន្តរជាតិជប៉ុនបញ្ជាក់ថា ដើម្បីចាប់យកឱកាសពីការផ្លាស់ប្តូរនិន្នាការវិនិយោគ និងការផលិត គឺវៀតណាមចាំបាច់ត្រូវកែលម្អបរិយាកាសវិនិយោគជាបន្តបន្ទាប់ ដូចជា ៖ កាត់បន្ថយលក្ខខណ្ឌការស្នើសុំឯកសារ, កែសម្រួលច្បាប់ និងបង្កើនប្រសិទ្ធភាពការអនុវត្តគោលនយោបាយ ។ ក្រៅពីនេះ វៀតណាមត្រូវលើកកម្ពស់ការអភិវឌ្ឍឧស្សាហកម្មដែលពាក់ព័ន្ធ និងគាំទ្រគ្នាទៅវិញទៅមក ព្រមទាំងកែលម្អបច្ចេកវិទ្យាផលិតទំនិញឈានទៅបង្កើនសមត្ថភាព ដើម្បីទាក់ទាញក្រុមហ៊ុនបរទេសកាន់តែច្រើន រួមទាំងក្រុមហ៊ុនជប៉ុន ៕

នៅក្នុងទំនៀមទំលាប់វប្បធម៌ចិន ការលោតម៉ុងសាយ សំដៅលើការដេញវិញ្ញាណអាក្រក់ និងនាំមកនូវភាពរុងរឿង លាភសំណាងល្អ សម្រាប់ឆ្នាំថ្មី។

ម៉ុងសាយត្រូវបានធ្វើឡើងពី គ្រោងឫស្សី បិទដោយក្រដាស និងមានមនុស្សពីរនាក់សម្តែង។ ម្នាក់កាន់ក្បាល ហើយម្នាក់ទៀតកាន់កន្ទុយ និងចលនាពួកគេធ្វើតាមចង្វាក់ភ្លេងស្គរ។

យោងតាមរឿងព្រេងនិទានចិន ម៉ុងសាយ ឬសត្វតោ ត្រូវបានគេប្រើសម្រាប់ដេញសត្វចម្លែកមួយឈ្មោះថា ណៀន (nien)។

ណៀន (nien) ជាសត្វកាចសាហាវ តែងតែមកអុកឡុកនៅក្នុងភូមិ សូម្បីតែខ្លាក៏មិនអាចសម្លាប់វាបាន។ ដោយអស់សង្ឃឹម ប្រជាជនបានងាកទៅរកសត្វតោ ដែលជាស្តេចសត្វព្រៃ។

ពេលមួយ ណៀន (nien)បានចូលមកកម្ទេចផ្ទះអ្នកភូមិ ត្រូវបានសត្វតោប្រយុទ្ធឈ្នះរត់បាត់ស្រមោល ដោយសន្យានឹងមកសងសឹង។

រំលងបាន១ឆ្នាំ ណៀនក៏បានត្រឡប់វិញ តែគ្រាសត្វតោ រវល់យាមទ្វារឱ្យព្រះចៅអធិរាជ មិនអាចទៅជួយអ្នកភូមិបាន ដូច្នេះ អ្នកភូមិក៏បានយកឫស្សី និងក្រណាត់មកធ្វើរូបតោ ដោយមានបុរសពីរនាក់បានលូនចូលទៅខាងក្នុងហើយសម្តែងធ្វើឱ្យសត្វណៀន (nien) ខ្លាចរត់ទៅបាត់ទាំងព្រឺព្រួច។

ចាប់តាំងពីពេលនោះមក ពលរដ្ឋចិន មានជំនឿលើសត្វតោ ដោយគ្រប់នគរចិន តែងមានរូបសំណាកសត្វតោនៅយាមខាងមុខទ្វារ៕

សហរដ្ឋអាមេរិក ៖ នៅខែមករា ឆ្នាំ២០២៥ មហាជនបានចាប់អារម្មណ៍នឹងពាក្យចចាមអារ៉ាមមួយថា អតីតប្រធានាធិបតីអាមេរិក លោក បារ៉ាក់ អូបាម៉ា បានបញ្ចប់ជីវិតគូជាមួយភរិយា លោកស្រី មីស៊ែល អូបាម៉ា ដែលរស់នៅជាមួយគ្នា៣០ឆ្នាំ ក្រោយពីគេសង្កេតឃើញថា អ្នកទាំងពីរពុំបង្ហាញមុខជាមួយគ្នាជាសាធារណៈ រួមទាំងក្នុងកម្មវិធីនយោបាយ ។ ជាមួយគ្នានេះ មហាជនក៏បានលើកឡើងពីតារាស្រីហូលីវូដ ជេនីហ្វ័រ អានិស្តុន ថា អ្នកនាងជាស្រីស្នេហ៍ថ្មីរបស់លោក អូបាម៉ា ។

ពាក្យចចាមអារ៉ាមនេះបានផ្ទុះការចាប់អារម្មណ៍យ៉ាងខ្លាំងក្នុងបណ្តាញសង្គម ក្រោយពីទស្សនាវដ្តី InTouch ផ្សព្វផ្សាយអត្ថបទមួយមានចំណងជើងថា «The Truth About Jen & Barack» ដែលនិយាយពីទំនាក់ទំនងរវាងអ្នកនាង អានិស្តុន ជាមួយលោក អូបាម៉ា ។ បន្ទាប់មក ក៏មានពាក្យចចាមអារ៉ាមជាច្រើនថា អ្នកទាំងពីរបានសេពគប់គ្នាលួចលាក់ ប៉ុន្តែគ្មានការបញ្ជាក់ច្បាស់លាស់ពីស្នេហានេះទេ ។ ក្រៅពីនេះ មនុស្សមួយចំនួនអះអាងថា លោក អូបាម៉ា និងអ្នកស្រី មីស៊ែល ចែកផ្លូវគ្នាហើយ បច្ចុប្បន្ន អ្នកទាំងពីររាប់អានគ្នាជាមិត្តភក្តិ ។

ប៉ុន្តែអ្នកនាង អានិស្តុន បានបកស្រាយយ៉ាងឆាប់រហ័សចំពោះពាក្យចចាមអារ៉ាមនេះ អំឡុងពេលសម្ភាសន៍កម្មវិធី «Jimmy Kimmel Live» ដោយអ្នកនាងនិយាយថា ការចុះផ្សាយរបស់ទស្សនាវដ្តី InTouch ពុំមែនជាការពិតឡើយ ។ អ្នកនាងពុំខឹងសម្បារទេ ប៉ុន្តែវាពុំពិតដូចការលើកឡើង ។ នាងគ្រាន់តែជួបលោក អូបាម៉ា តែម្តងប៉ុណ្ណោះ ហើយនាងស្គាល់អ្នកស្រី មីស៊ែល ជាងស្វាមី ។

ប៉ុន្តែការសង្ស័យថា លោក អូបាម៉ា មានទំនាក់ទំនងលួចលាក់ជាមួយនាង បានផ្ទុះការចាប់អារម្មណ៍ខ្លាំងក្នុងបណ្តាញសង្គម ។ គេហទំព័រកម្សាន្តអាមេរិកដ៏ល្បី ឈ្មោះ RadarOnline ផ្សព្វផ្សាយថា លោក អូបាម៉ា និងភរិយា មានបញ្ហាក្នុងជីវិតគូ ។ ទំនាក់ទំនងធ្លាប់តែល្អូកល្អើនប្រែជាតានតឹង ហើយវាជាលើកដំបូងដែលលោក អូបាម៉ា និងភរិយា ព្យាយាមលាក់បាំងបញ្ហា និងការចាប់អារម្មណ៍ពីទំនាក់ទំនងជាមួយអ្នកនាង អានិស្តុន ។ រីឯអ្នកស្រី មីស៊ែល មានអារម្មណ៍ខកចិត្ត ពីព្រោះបច្ចុប្បន្ន អ្នកស្រីនិងស្វាមី គ្រាន់តែជាមិត្តភក្តិប៉ុណ្ណោះ ។

ទោះជាគេហទំព័រនេះចុះផ្សាយគ្មានប្រភពច្បាស់លាស់ ប៉ុន្តែមហាជនជឿជាក់លើព័ត៌មាននេះ ដោយសារមនុស្សភាគច្រើនមើលឃើញថា លោក អូបាម៉ា និងភរិយា ពុំដើរទៅណាមកណាជាមួយគ្នាជាច្រើនលើក ជាពិសេស ក្នុងកម្មវិធីសំខាន់ ដូចជា ៖ ពិធីបុណ្យសពអតីតប្រធានាធិបតីអាមេរិក លោក ជីមី ខាតធ័រ (Jimmy Carter) និងពិធីឡើងកាន់តំណែងរបស់លោក Donald Trump ជាដើម ។

ចំណែកលោក អូបាប៉ា ពុំទាន់បដិសេធនឹងពាក្យចចាមអារ៉ាមថា លោកមានទំនាក់ទំនងជាមួយតារាស្រីហូលីវូដ អ្នកនាង អានិស្តុន ទេ ។ ហេតុនេះ ធ្វើឱ្យមហាជនលើពិភពលោក តាមដានថា តើវាជាការពិត ឬយ៉ាងណា?